روزى توختى داۋۇت
ئاسماندا ئاي
ئاسماندا ئاي،
نۇر چاچار تىنماي.
نۇرىدىن ئۇنىڭ
يورۇيدۇ ھەرجاي.
ئاسماندا ئاي،
نۇر چاچار تىنماي.
نۇر بىلەن جاھان
گۈزەلكەن ھاي – ھاي!
ئاق كېچە
ئاق كېچە، ئاپئاق كېچە،
ئاي نۇر تۆكەر تاڭغىچە.
كۈمۈش نۇرغا چۆمۈلۈپ،
بىز ئوينايمىز قانغۇچە.
ئاسماندىكى يۇلتۇزلار
بىز ئوينىساق قارايدۇ.
ئوينايلى دەپ چاقىرساق،
يېنىمىزغا كېلەمدۇ؟
لەگلەك
شامال چىقار غۇرقىراپ،
يۈرەكلەرنى سەگىتىپ.
كۆكتە لەگلەك ئۇچماقتا،
شاماللارغا ئەگىشىپ.
ئۇ ئۇچىدۇ، ئۇچىدۇ،
پەرۋا قىلماي شاخلارغا.
كەتكۈسى بار ئۇنىڭكى
ئۇچۇپ يىراق جايلارغا.
يىراق جايدا نېمە بار؟
ئۇ بىلمەيدۇ، بىلمەيدۇ.
نېمىشقىدۇر بىر تىلەك
ئۇنى ئالغا ئۈندەيدۇ.
(ئاپتور چىرا ناھىيەسى گۇلاخما يېزىسىدا)
