ئارزۇگۈل ئابلىز
ئائىلە سۆھبىتى سىنىپ مەسئۇلىنىڭ ئوقۇغۇچىلارنى چۈشىنىشتىكى مۇھىم بىر يولى. ئائىلە باشلىقلىرى بىلەن ئۇچرىشىپ تۇرۇش جەمئىيەتنىڭ ھەممە تەرەپلىرىنى چۈشىنىشتەك ناھايىتى ياخشى پۇرسەت بولۇپ سىنىپ مەسئۇلى ئائىلە باشلىقىنىڭ ئىدىيەسىنى ئىگىلەش ۋە تەھلىل قىلىش ئارقىلىق ئۇلارغا پارتىيەنىڭ مائارىپ فاڭجېنى بىلەن تەسىر كۆرسىتىپ، ئائىلە باشلىقلىرىنى ياش – ئۆسمۈرلەرنى تەربىيەلەشتە مۇھىم كۈچكە ئايلاندۇرۇش لازىم.
سىنىپ مەسئۇلى ئائىلە سۆھبىتى ئارقىلىق ئوقۇغۇچىنىڭ ۋە ئۇنىڭ ئائىلىسىنىڭ ئومۇمىي ئەھۋالىنى، ئائىلە تەربىيەسىدە ساقلانغان ئومۇمىي مەسىلىلەرنى ۋە ئوقۇغۇچىلاردىكى ئارتۇقچىلىق – كەمچىلىكلەرنىڭ پەيدا بولۇش سەۋەبىنى چوڭقۇرراق چۈشىنىدۇ. بۇ سىنىپ مەسئۇلى ئوقۇغۇچىنىڭ ئەھۋالىنى تېخىمۇ چوڭقۇر تەتقىق قىلىپ، ئائىلە باشلىقى بىلەن ماسلىشىپ ئوقۇغۇچىنى بىرلىكتە تەربىيەلەشنىڭ ئۇسۇلىنى تېپىشقا ياردەم بېرىدىغان ئۇسۇل بولۇپ ئۇنىڭ ئايرىم ئوقۇغۇچىلاردىكى ئالاھىدە مەسىلىلەرنى ھەل قىلىشتا ئۆزىگە خاس رولى بار. سىنىپ مەسئۇلى ئائىلە سۆھبىتى ئېلىپ بېرىشنى دائىملىق خىزمەت قاتارىغا قويۇشى، ئوقۇغۇچى ۋە ئائىلە باشلىقلىرىدىكى ئوخشىمىغان مەسىلە ۋە ئەھۋاللارغا ئاساسەن ئائىلە سۆھبىتى ئېلىپ بېرىشتىكى مەقسەت ۋە تەلەپنىڭمۇ ئوخشاش بولماسلىقىنى نەزەرگە ئېلىشى لازىم. ئىمكان بار ھەر مەۋسۇمدا ھەربىر ئوقۇغۇچىنىڭ ئائىلىسىنى بىر قېتىمدىن زىيارەت قىلىپ چىقىشنى قولغا كەلتۈرۈش لازىم. ئائىلە سۆھبىتىدە ئوبيېكىتقا دىققەت قىلىش، ئائىلىدە كىم يېتەكچىلىك رول ئوينايدىغانلىقىنى، بولۇپمۇ ئوقۇغۇچى ئۈچۈن كىم ئاساسلىق رول ئوينايدىغانلىقىنى ياكى ئوقۇغۇچىنىڭ مەلۇم ئىدىيەۋى ھەرىكىتىگە تەسىر كۆرسىتىدىغان مۇھىم ئادەمنىڭ كىم ئىكەنلىكىنى بىلىش ئاساسىدا نۇقتىلىق ھالدا خىزمەت ئىشلەيدىغان ئوبيېكىتنى بەلگىلەش لازىم.
سىنىپ مەسئۇلى ئائىلە سۆھبىتى ئېلىپ بېرىشتىن بۇرۇن ئوبدان تەييارلىق قىلىشى، پوزىتسىيەدە سەمىمىي بولۇشى، پىلانسىز مېھمان سۈپتىدە زىيارەت قىلىشتىن ساقلىنىشى كېرەك. ئوخشاش بولمىغان ئوبيېكىتقا ئوخشاشمىغان ئۇسۇل قوللىنىش كېرەك.
ئائىلە سۆھبىتىدە ئەرز – شىكايەت قىلماسلىق كېرەك. لېكىن، ئوقۇغۇچىنىڭ مەكتەپتىكى ئەخلاقى ، ئەقلى ۋە جسىمانىي جەھەتتىكى ئەھۋالىنى ئەتراپلىق ئىنكاس قىلىش كېرەك. ئائىلە سۆھبىتىدە ئالدى بىلەن ئوقۇغۇچىنىڭ ئۆگىنىش، ئىدىيە ۋە ھەر جەھەتتىكى ئارتۇقچىلىق ھەم ئىلغار تەرەپلىرىنى سۆزلەش، ئاندىن كېيىن كەمچىلىكلىرىگە ئۆتۈش، كەمچىلىكىنى سۆزلىگەندىمۇ ئەيىبلەش ياكى ئائىلە باشلىقلىرىدىن ئاغرىنىش تەلەپپۇزىدا ئەمەس بەلكى ئائىلە باشلىقى بىلەن بىرلىكتە تەربىيە تەدبىرىنى مۇزاكىرە قىلىپ، ئوقۇغۇچىنى بىرلىكتە تەربىيەلەشكە دائىر تەكلىپ ۋە تەلەپلەرنى ئوتتۇرىغا قويۇش لازىم. ئائىلە سۆھبىتى ئىمكانقەدەر ئومۇميۈزلۈك بولۇشى، ياخشى، ئوتتۇراھال ۋە ناچار ئوقۇغۇچىلارنىڭ ھەممىسنىڭ ئائىلىسىنى زىيارەت قىلىش، ھەرگىز مەسىلىسى بار، ئارقىدا قالغان ئوقۇغۇچىلارنىڭلا ئائىلىسىنى زىيارەت قىلىش بىلەن چەكلىنىپ قالماسلىق كېرەك. ئۇنىڭدىن باشقا تەكشۈرۈش زىيارىتى قىلىش ئارقىلىق ئوقۇغۇچىلارنى چۈشىنىش كېرەك. ئوقۇغۇچىلارنىڭ ئەھۋالىغا قارىتا شۇ سىنىپنىڭ ھەيئەتلىرى، دەرس ئوقۇتقۇچىلىرى، ياشلار ئىتتىپاقى، پىيونېرلار ئەترىتىنىڭ تەربىيەچىلىرى، شۇ ئوقۇغۇچىنىڭ يېقىن دوستلىرى قاتارلىقلار بىلەن كۆرۈشۈپ مەخسۇس تېمىدا تەكشۈرۈش ئېلىپ بېرىش لازىم. ئەھۋالنى تەپسىلىي ئىگىلىگەندىلا ئاندىن ئومۇميۈزلۈك، چوڭقۇر، توغرا تەھلىل يۈرگۈزگىلى، تەھلىل ۋە تەتقىق قىلىش ئاساسىدا مۇۋاپىق تەربىيە تەدبىرى ۋە ئۇسۇلىنى ئوتتۇرىغا قويۇپ سىنىپ كوللېكتىپىنىڭ ھەرقايسى جەھەتلەردىن ياخشى نەتىجە ھاسىل قىلىشىنى قولغا كەلتۈرگىلى بولىدۇ.
(بۈگۈر ناھىيەسى چومپاق بازارلىق ئوتتۇرا مەكتەپتىن)
