ئەڭ مەشھۇر تۇمانلىق پايتەخت

دۇنيادا بەزى جايلار دائىم تۇمان بىلەن قاپلىنىپ تۇرىدۇ. بۇلارنىڭ ئىچىدە ئەنگلىيىنىڭ لوندون شەھىرى ئەڭ مەشھۇر تۇمانلىق شەھەر ھېسابلىنىدۇ. كىشىلەر ئۇنى «تۇمانلىق پايتەخت» دەپ ئاتايدۇ. 

لوندوندا بىر يىل ئىچىدە قانچە كۈن تۇمانلىق ئۆتىدۇ؟ دۇنياۋىي ھاۋارايى خاتىرىسىدىن قارىغاندا، لوندوندا بىر يىل ئىچىدە تۇمانلىق ئۆتىدىغان كۈن 70-80 كۈندىن ئاشىدۇ، يەنى ھەر بەش كۈندە بىر كۈننى تۇمان قاپلايدۇ. 

مەملىكىتىمىزنىڭ پايتەختى بېيجىڭدا بىر يىل ئىچىدە ئاران 15-25 كۈنلا تۇمانلىق ئۆتىدۇ. تۇمانلىق كۈن كۆپرەك بولىدىغان شاڭخەيمۇ بىر يىل ئىچىدە ئاران 40-50 كۈن تۇمانلىق ئۆتىدۇ، لوندونغا سېلىشتۇرغاندا، پەرق خېلىلا چوڭ.

يېقىنقى يۈز يىل ئىچىدە تۇمانلىق پايتەختى لوندوندا ھاۋا ئېغىر دەرىجىدە بۇلغىنىش ۋەقەسى جەمئىي سەككىز قېتىم يۈز بەرگەن. بۇلارنىڭ ئىچىدە 1952-يىلى يۈز بەرگەن تۇمان قاپلاش ۋەقەسى ئەڭ ئېغىر بولغان. قىش كۈنى بىر سەھەردە لوندوننىڭ ھاۋاسى سوغۇق يۇقىرى بېسىمنىڭ تەسىرىگە ئۇچرىغان. شامال چىقماي تىنجىقلىق ھۆكۈم سۈرگەن. سوغۇق ھاۋا لوندون ئويمانلىقىنىڭ تۆۋەن قىسمىغا بېسىپ كىرگەن. يۇقىرىدا ئىسسىقراق ھاۋا بولغانلىقتىن، ھاۋا قاتلىمى ئىنتايىن تۇراقلاشقان. قويۇق سوغۇق تۇمان ئەتراپقا تارقىلىپ كېتەلمەي، تۆت كۈنگىچە شەھەرنى قاپلاپ تۇرغان، ئۇنىڭ ئۈستىگە زاۋۇت ۋە ئائىلىلەردىن چىققان كۆپلىگەن ئىش ۋە چاڭ-توزاڭلار قويۇق تۇمان بىلەن قاپلىنىپ تارقىلىپ كېتەلمىگەن. شۇنىڭ بىلەن 3500-4000 ئادەم كانەيچە ياللۇغى، ئۆپكە كېسىلى، يۈرەك كېسىلى بىلەن ئۆلگەن. بۇ ۋەقە لوندوندىكى تۇماننىڭ داڭقىنى تېخىمۇ چىقارغان.