ESP

ESP بىخەتەرلىك سەپلىمىسى يەنى ئۇنىڭ ئىنگلىزچە تولۇق ئاتىلىشى Electronic Stability Program، ئۇيغۇرچە ئاتىلىشى ئاپتوموبىلنىڭ ئېلېكتىرونلۇق مۇقىملاشتۇرۇش سىستېمىسى بولۇپ، بەزى ئاپتوموبىللاردا بۇ ئىسىم قوللىنىلماسلىقى مۇمكىن، چۈنكى ئاپتوموبىل ئىشلەپ چىقارغۇچى زاۋۇتلارنىڭ ئوخشىماسلىقى تۈپەيلى قوللىنىدىغان ئىسمىمۇ ئوخشاش بولمايدۇ. مەسىلەن BMW ماركىلىق ئاپتوموبىللاردا DSC، تويوتا ماركىلىق ئاپتوموبىللاردا VSCC دېگەندەك.

بۇ سىستېما ھازىر نۇرغۇن ئىستېمالچىلار ئالاھىدە ئەھمىيەت بېرىدىغان بىر تۈرلۈك سەپلىمە بولۇپ قالدى. ئامېرىكا، كانادا، ئاۋسترالىيە قاتارلىق دۆلەتلەردە بۇ ئىقتىدار ئاللىبۇرۇن ئاپتوموبىللارغا مەجبۇرىي سەپلىنىش تەلەپ قىلىنغان.

ESP بولسا ABS ،EBD ،ASR قاتارلىق بىخەتەرلىك ئىقتىدارلىرىنىڭ تېخىمۇ بىر قەدەر كېڭەيتىلگىنى ھەمدە مۇشۇ ئاساستا ھەرخىل سېنزورلارنى كۆپەيتىپ ئاپتوموبىلنىڭ ئەھۋالىنى ئانالىز قىلىپ، ئاپتوموبىلنىڭ تەڭپۇڭلۇقىنى ساقلاشنى كونترول قىلىپ،ئاپتوموبىل تېيىلىپ كېتىپ كونتروللىقىنى يوقىتىش ھادىسىنى ئازايتىپ، خەتەرلىك ئەھۋال ئاستىدا قۇتقۇزۇش رولىنى ئوينايدۇ.