ئادەتتىن تاشقىرى يېنىك تىپتىكى ئايروپىلان

ئېغىرلىقى بويىچە تۈرگە ئايرىغاندا ، ئەڭ يېنىك بولغان بىر خىل ئايروپىلان ، 70 - يىللاردىن بۇيان تېز تەرەققىي قىلغان . ئۇ يېنىك ئايروپىلان بىلەن بولان پەرقىدە قاتتىق بىرلىككە كەلگەن بەلگىلىمە يوق . ئادەتتىن تاشقىرى يېنىك ئايروپىلان خەلق ئاۋىياتسىيە تۈرىگە تەۋە ، ئۇچۇش پائالىيىتى خەلق ئاۋىياتسىيە ئىدارىسى باشقۇرۇش تەۋەلىكىدە بولىدۇ ، شوپۇرلۇق پىراۋىسى خەلق ئاۋىياتسىيە باش ئىدارىسى تارقىتىدۇ ، ئىلتىماس قىلىش بىر قەدەر قىيىن . ھازىر ھەرقايسى جايلاردىكى ئاۋىياتسىيە مەكتىپى ۋە ئاۋىياتسىيە كۇلۇبىدا ئۆگىنىش ئارقىلىق ئىلتىماس قىلسا بولىدۇ .

ئېغىرلىقى

70-يىللىرىدا ئەنئەنىۋى يېنىك تىپتىكى ئايروپىلاندىنمۇ يېنىك بولغان بىر خىل ئايروپىلان دۇنياغا كەلدى. بۇ خىل ئايروپىلان ئادەتتىن تاشقىرى يېنىك تىپتىكى ئايروپىلان دەپ ئاتالدى. مۇنداقچە قىلىپ ئېيتقاندا، بىر كىشىلىك ئادەتتىن تاشقىرى يېنىك تىپتىكى ئايروپىلاننىڭ ئېغىرلىقى 115 كىلوگىرامدىن، ئىككى كىشىلىك ئادەتتىن تاشقىرى يېنىك تىپتىكى ئايروپىلاننىڭ ئېغىرلىقى 150 كىلوگىرامدىن ئېشىپ كەتمەيدۇ. بۇنداق ئايروپىلاننىڭ سائەتلىك ئۇچۇش تېزلىكى 100 كىلومېتىردىن ئېشىپ كەتمەيدۇ.

ئادەتتىن تاشقىرى يېنىك تىپتىكى ئايروپىلان ئادەتتە تەنتەربىيە ۋە كۆڭۈل ئېچىش پائالىيىتى ئۈچۈن ئىشلىتىلىدۇ. ھازىر تەرەققىي قىلغان دۆلەتلەردە كىشىلەرنىڭ ئادەتتىن تاشقىرى يېنىك تىپتىكى ئايروپىلاننى ھەيدەپ تەنتەربىيە نومۇرى كۆرسىتىشنى ياكى كۆڭۈل ئېچىش خاراكتېردىكى ئۇچۇش پائالىيەتلىرىنى ئۆتكۈزۈشى بارغانسېرى كۆپەيمەكتە. بەزى دۆلەتلەردە، ئادەتتىن تاشقىرى يېنىك تىپتىكى ئايروپىلاننىڭ ئۇچۇش ئېگىزلىكى 100 مېتىردىن تۆۋەن بولۇشى كېرەك، ئايروپورت، ئۇچۇش لىنىيەسى ھەمدە تاشيول، پىرىستان ۋە شەھەر-بازار قاتارلىق ئاھالە زىچ ئولتۇراقلاشقان رايونلارنىڭ سىرتىدا كۈندۈزى ئۇچقاندا ۋاقىت چەكلىمىسىگە ئۇچرىمايدۇ، دەپ بەلگىلەنگەن.

ئادەتتىن تاشقىرى يېنىك تىپتىكى ئايروپىلاننىڭ قورۇلمىسى ئاددىي، باھاسى ئەرزان، ھەيدەش ئاسان، بىخەتەر بولغاچقا، يېنىك تىپتىكى ئايروپىلان ئارقىلىق قىلغىلى بولىدىغان ئىشلار، مەسىلەن، دېھقانچىلىق، يايلاق، ئورمانلىقلارنى چارلاش، قىسقا يوللۇق ياكى قاتناش شارائىتى ناچار رايونلاردا قاتناش قورالى قىلىپ ئىشلىتىلىش، ئىلمىي تەكشۈرۈش قاتارلىق ئىشلارنىڭ ھەممىسى ئادەتتىن تاشقىرى يېنىك تىپتىكى ئايروپىلان ئارقىلىق قىلىنىدىغان بولدى. پەن-تېخنىكا ۋە ئىقتىسادنىڭ تەرەققىي قىلىشىغا ئەگىشىپ، ئادەتتىن تاشقىرى يېنىك تىپتىكى ئايروپىلان تېخىمۇ يېنىك، تېخىمۇ قولايلىق، تېخىمۇ ئەرزان بولىدۇ، ئىشلىتىلىش دائىرىسىمۇ بارغانسېرى كېڭىيىدۇ.