ئەفسەنتىن

بۇ مۇرەككەپ گۈللۈكلەر ئائىلىسىدىكى كۆپ يىللىق سامان غوللۇق ئۆسۈملۈك ئاچچىق ئەمەن بولۇپ، تېنى يېشىل رەڭلىك، تەمى ئاچچىق، پۇرىقى ئۆتكۈر، بۇ ئۆسۈملۈكنىڭ پۈتۈن چۆپى «ئاچچىق ئەمەن» ياكى «ئەفسەنتىن» نامىدا دورىغا ئىشلىتىلىدۇ.

توسالغۇلارنى ئېچىش، مېڭە، جىگەر، ئاشقازاننى قۇۋۋەتلەش، ئىششىق ياندۇرۇش، سۈيدۈك ۋە ھەيزنى راۋانلاشتۇرۇش، قۇرت ئۆلتۈرۈش خۇسۇسىيىتى بار.

پۈتۈن چۆپنىڭ تەركىبىدە ياغ، يېلىم، ئاز مىقداردا مىنېرال ماددىلار بار.

سۈيدۈك، ھەيز راۋان بولماسلىق، بوغۇم ئاغرىقى، تەپ، جىگەر ياللۇغى، مەددە قۇرت، ئاشقازان ئاجىزلىقى، ئىشتىھاسىزلىق، گال ئاغرىقى، بادامسىمان بەز ياللۇغى، چىيقان، ھۆل تەمرەتكە قاتارلىقلارغا ئىشلىتىلىدۇ.

1. ئاچچىق ئەمەندىن 7 گرام، فۇپەلدىن 5 گرام، بەرەڭگى كابىلىدىن 5 گرام ئېلىپ، سوقۇپ مۇۋاپىق مىقداردا ئىچسە، مەددە قۇرت چۈشۈرىدۇ.

 2. ئاچچىق ئەمەندىن بىلەن چۈچۈكبۇيادىن تەڭ مىقداردا ئېلىپ، قاينىتىپ سۈيىدە يەرلىك ئورۇننى يۇيسا، چىيقان ۋە ھۆل تەمرەتكىگە پايدا قىلىدۇ.

3. ئاچچىق ئەمەن 30 گرام، ئاق سەندەلدىن 15 گرام ، سىركەدىن 50 گرام ئېلىپ، سىركەنجىۋىل تەييارلاپ ئىچسە، گال ئاغرىقى ۋە تەپكە مەنپەئەت قىلىدۇ.

 4. بادام يېغى بىلەن قاينىتىپ قۇلاققا تېمىتسا، قۇلاق يارىلىرى ۋە ئاغرىقلىرىنى ساقايتىدۇ.

 5. ئاچچىق ئەمەن، رومبەدىيان، كاسىنە ئۇرۇقى، قىزىلگۈل قاتارلىقلاردىن 10 گرامدىن ئېلىپ قاينىتىپ ئىچىپ بەرسە، سۈيدۈك، ھەيزنى راۋانلاشتۇرۇپ، ئىشتىھانى ئېچىپ، جىگەر ياللۇغىغا مەنپەئەت قىلىدۇ.

فارماكولوگىيەلىك تەسىرى

سازاڭ قۇرتىنى ئۆلتۈرش تەسىرى بار.

شىنجاڭنىڭ ھەممە جايلىرىدىن شۇنداقلا ئافغانىستان، ئىران، كەشمىر، قازاقىستان، ئوكرائىنا، ئەرمىنىيە قاتارلىق جايلارغا تارقالغان، چەت ئەلدە ياۋروپانىڭ جەنۇبىدىن چىقىدۇ.^[0]