قاندىن بولغان باش ئاغرىقى

سەۋەبى: بۇ كېسەللىك، گۆش، كاۋاپ، ھالۋا قاتارلىق ئىسسىق تەبىئەتلىك تائاملارنى كۆپ يېيىش، ھەرخىل ئىسسىق تەبىئەتلىك دورىلارنى كۆپلەپ ئىستېمال قىلىش سەۋەبىدىن كېلىپ چىقىدۇ.

ئالامىتى: بۇ باش لوقۇلداپ ئاغرىش ھەمدە بەدەن ئېغىر بولۇش، كۆز ئېقى قىزىرىش، تومۇرى ناھايىتى توم، قاتتىق ئۇرۇش، يۈزى قىزىرىپ، كۆپ ئەسنەش، بەزىلەرنىڭ كالپۇك، گال، ئېغىز ۋە چىش مىلىكلىرىگە قاپارتچۇق لار چىقىش، كانىيى يىرىك بىلىنىپ، گېلى ئاغرىش، ئاۋازى بۇزۇلۇش، سۈيدۈكى قىزىل ھەم قويۇق كېلىش قاتارلىق ئالامەتلەر بىلەن ئىپادىلىنىدۇ.

1-رېتسېپ

تەركىبى: چىلاندىن بەش تال، شاھتەررە، نېلۇپەر، ئاق سەندەلدىن بەش گىرامدىن، شاھتەررە ئەرىقىگە 150 گىرام.

تەييارلاش ئۇسۇلى: دورىلارنى شاھتەررە ئەرەقىگە چىلاپ بىر كېچە تۇرغۇزۇپ، ئەتىسى سۈزۈپ تەييارلىنىدۇ.

ئىشلىتىش مىقدارى: كۈنىگە ئىككى قېتىم، ھەر قېتىمدا مۇۋاپىق مىقداردا ئىستېمال قىلىنىدۇ.

2-رېتسېپ

تەركىبى: چىلان، ئەينۇلا، تەرەنجىبىن 60 گىرامدىن، نېلۇپەر، بىنەپشە 15 گىرامدىن، ئاق لەيلى ئۇرۇقى، ئىتئۈزۈمى، سېمىز ئوت ئۇرۇقى 10 گىرامدىن.

تەييارلاش ئۇسۇلى: دورىلارنى سۇس ئوتتا قاينىتىپ شەربەت تەييارلىنىدۇ.

ئىشلىتىش مىقدارى: كۈنىگە ئۈچ قېتىم، ھەر قېتىمدا 30 مىللىلىتىردىن ئىچىلىدۇ.

3-رېتسېپ

تەركىبى: لىمون جەۋھىرىدىن 60 گىرام، قىزىلگۈلدىن 50 گىرام، شېكەردىن بىر كىلوگرام، سۇ مۇۋاپىق مىقداردا.

تەييارلاش ئۇسۇلى: لىمون جەۋھىرى، قىزىلگۈلنى سۇدا بىر قاينىتىپلا، ئۈستىگە شېكەرنى سېلىپ قىيام تەييارلىنىدۇ.

ئىشلىتىش مىقدارى: كۈنىگە ئىككى قېتىم، ھەر قېتىمدا 20 مىللىلىتىردىن مۇز سۈيىگە ئارىلاشتۇرۇپ ئىچىلىدۇ.

قاننىڭ قىزىتمىسىنى پەسەيتىش ئۈچۈن، شارائىت يار بەرسە قان ئېلىش كېرەك.

چىلان شەربىتى، تەمرى ھىندى شەربىتى، ئاچچىق ئانار شەربىتى، لىمون شەربىتى، نىلۇپەر شەربىتى، بىنەپشە شەربىتى قاتارلىقلاردىن بىرى تاللاپ ئىچكۈزۈلىدۇ. تەمرى ھىندى، ئەينۇلا، چىلان، سەرپىستان، نىلۇپەر، بىنەپشە، قىزىلگۈل قاتارلىقلار سېلىنغان دەملەنمە (كاشكاپ) ئىچكۈزۈلۈپ، بەدەن تازىلىنىدۇ. ئۇنىڭدىن باشقا يەنە ئىسسىقتىن بولغان باش ئاغرىقىدا سۆزلەنگەن چارىلەردىن پايدىلانسا بولىدۇ. ^[0]