جۆئىدە

جۆئىدە  بولسا ئۆسۈملۈك ئادەتتە ئىككى خىل بولىدۇ، بىر خىلى كىچىك «تاغنىڭكى» بولۇپ، ئۇنىڭ رەڭگى ئاق كېلىدۇ، ئۇزۇنلۇقى 20 سانتىمېتىر ئەتراپىدا، يوپۇرماقلىرى ئىنچىكە، يەرگە چاپلىشىپ تۇرىدۇ، يوپۇرماقلىرىنىڭ ئۈستۈنكى تەرىپىدىكى يۈزى تۈكلۈك، يوپۇرماقلىرىنىڭ ئەتراپى ئۇششاق تىكەنلىك، شاخلىرىنىڭ ئۇچلىرىدا گۈمبەزگە ئوخشاش مۇنچاقلىرى بولىدۇ. ئۇ مۇنچاقلارنىڭ ئۈستىدە چاچقا ئوخشاش ئىنچىكە ئاق رەڭلىك يىلتىزى بار، مۇنچاقلار ئۇرۇق بىلەن تولغان بولىدۇ، گۈلى ئاق، بىرئاز سېرىق تەرەپكە مايىل، پۇرىقى ئېغىر، تەمى ئاچچىقراق، بىرئاز خۇشبۇي.ئىككىنچى خىلى يۇرتتا ئۆسىدۇ، بۇنى پارسچە «چاڭگاك» دەيدۇ. بۇنىڭ قۇۋۋىتى ئاجىزراق بولۇپ، دورىغا تاغنىڭكى ئىشلىتىلىدۇ.چەت ئەللەردىن چىقىدۇ.

توسالغۇلارنى ئېچىش، قاننى تازىلاش، سۈيدۈك ۋە ھەيزنى راۋانلاشتۇرۇش، زەھەر قايتۇرۇش، يەل تارقىتىش، تەرەتنى راۋانلاشتۇرۇش، ئىششىق تارقىتىش، ئاغرىق پەسەيتىش، جاراھەت پۈتتۈرۈش خۇسۇسىيىتى بار.

ئەكىس تەسىرى

باش ئاغرىقى پەيدا قىلىدۇ.

1. جۆئىدە بابۇنە، يەرلىك شوخلا، قاتارلىقلارنى تەڭ مىقدار ئېلىپ بىللە قاينىتىپ سىركە قۇيۇپ ئىچسە ئىششىقنى قايتۇرىدۇ. 2. مۇۋاپىق مىقداردىكى جۆئىدەنى ھۆل ۋاقتىدا ئېزىپ چاپسا، كونا يىرىڭلىق چاقىلارغا مەنپەئەت قىلىدۇ. 3. جۆئىدىنى ھۆل ۋاقتىدا جاراھەتلەرگە سەپسە، جاراھەت پۈتتۈرىدۇ. 4. مۇۋاپىق مىقداردىكى جۆئىدەنىڭ ھۆلىنى ئېزىپ باشقا چاپسا، باش ئاغرىقىنى پەسەيتىدۇ.

ئىشلىتىلىشى

سۈيدۈك تۇتۇلۇش، ھەيز توسۇلۇش، ئۇنتۇغاقلىق، سوغۇقتىن بولغان ئىستىسقا، توسالغۇ مەنبەلىك يەرقان، كونا يىرىڭلىق چاقا قاتارلىقلارغا ئىشلىتىلىدۇ.

مىقدارى

4 گرام

تۈزەتكۈچىسى

بىدىمىشكى

ئورۇنباسارى

قەنتەرىيۇن، سەلىخە.

ۋەكىل خاراكتېرلىك پىششىق دورا ياسالمىسى

شەربىتى جۆئىدە

كېلىش مەنبەسى(ئەسەر)

ئۇيغۇر تېبابىتى خام دورىلار ئىلمى بىرىنچى توم(سىناق نۇسخا) شىنجاڭ تېببىي ئۇنىۋېرسىتېتى،^[0]