پىندۇق

پىندۇق بولسا  قېـيىـن دەرىـخـى ئائىـلىسـىـدىـكى ئۆسۈملۈك ئورمان ياڭىقى (Gorylus avellana.L) نىڭ قۇرۇتۇلغان پىشقان ئۇرۇقى بولۇپ، ئۇيغۇرتېبابىتىدە پىندۇق ياكى تاش ياڭىقى، نامىدا ئىشلىتىلىدۇ. مېۋىسى سۇس سارغۇچ، خورما رەڭ. شەكلى قاتتىق، تەمى تاتلىق، مېغىزنىڭ ئازراق پۇرىقى بار.جۇڭگو، پاكىستان، ياۋروپا، غەربىي ئاسىيا، روسىيە، ئۆز بېكىستان قاتارلىق جايلاردىن چىقىدۇ.

خۇسۇسيىتى

سۈت ۋە مەنىنى كۆپەيتىش، مېڭە ۋە نېرۋىنى قۇۋۋەتلەش، باھنى قۇۋۋەتلەش، بەدەننى سەمرىتىش، پەي مۇسكۇللارنى چىڭىتىش، بەلغەم بوشىتىش، نەپەسنى راۋانلاشتۇرۇش خۇسۇسىيىتىگە ئىگە.

ئەكىس تەسىرى

ئاشقازانغا زىيان قىلىدۇ.

خىمىيىلىك تەركىبى

مېغىزى تەركىبىدە %71–58 ياغ، %51.4–18.9 ئاقسىل، 58–3 كاربۇن سۇ بىرىكىلىرى، ئۇنىڭدىن باشقا كاروتىن، ليۇئەسنۇ،تۆمۈر، تۇز قاتارلىق ماددىلار بار.

ئىشلىتىش ئۇسۇلى

1. بەدەننى سەمرىتىش، ئۇيقۇ كەلتۈرۈش ئۈچۈن، پىندۇق مېغىزىنى چاي ياكى سۈت بىلەن كۈندە مۇۋاپىق ئىستېمال قىلىپ بەرسە بولىدۇ. 2. جىنسىي ئاجىزلىقنى داۋالاش، مەنى كۆپەيتىش ئۈچۈن سۆئلەپ مىسىرىدىن 10 گرام، پىندۇق مېغىزىدىن 20 گرام، چىلغۇز مېغىزىدىن 15 گرام ئېلىپ، سۇپۇپ تەييارلاپ، ئىچىپ بېرىلسە بولىدۇ. 3. بۆرەك ۋە باھنى قۇۋۋەتلەش ئۈچۈن پىندۇق مېغىزىدىن 10 گرام، سۆئلەپ مىسرىدىن 10 گرام، نارجىلدىن 10 گرام، ئاقىر قارھادىن 7 گرام، شاقاقۇل 10 گرام، تۇخۇم سېرىقىدىن 3 دانىدىن ئېلىپ، سۇپۇپ تەييارلاپ، ئىچىپ بەرسە بولىدۇ. 4. نەپەسنى راۋانلاشتۇرۇش ئۈچۈن، سەرپىستان، بادام مېغىزى، پىندۇق مېغىزىدىن 15 گرامدىن ئېلىپ، سۇپۇپ تەييارلاپ ئىچىپ بەرسە بولىدۇ.

ئىشلىتىلىشى

مېڭە ئاجىزلىقى، ئەستە تۇتۇش قابىلىيىتى تۆۋەنلەش، جىنسى ئاجىزلىق، نېرۋا ئاجىزلىق، ئاشقازان ئاجىزلىقى، كۆپ ئېھتىلام بولۇش، مەنى تېز يۈرۈپ كېتىش، يۆتەل، زىققا، پەي، مۇسكۇل بوشاپ كېتىش قاتارلىقلارغا ئىشلىتىلىدۇ.

مىقدارى

12 – 4 گرامغىچە.

ساقلاش

كۈز پەسلىدە مېۋىسى پىشقاندا ئۇرىقىنى ئاجرىتىپ ئېلىپ،ئاپتاپتا قۇرۇتۇپ، قۇرغاق جايسا ساقلىنىدۇ.

تۈزەتكۈچىسى

پىننە، قەلەمپۇر.

ئورۇنباسارى

ياڭاق، چىلغۇزە مېغىزى.

لۇبۇبى كەبىر، ھالۋائى بېيزە.^[0]