تېرەك ئىسسىق سۇ ئارشىڭى

باي ناھىيە بازىرىنىڭ شىمالىدىكى (60 كىلومېتىر يىراقلىقتا) كېسەللەرگە شىپا بولىدىغان بىر تەبئىي داۋالاش ئورنى بار. بۇ مەشھۇر سەيلىگاھ _ تېرەك ئىسسىق سۇ ئارشىڭىدۇر. ئەقىل - پاراسەتلىك ئەجدادلىرىمىز خېلى زامانلار ئىلگىرىلا تېرەك ئىسسىق سۇ ئارشىڭىنىڭ كېسەل داۋالاشتىكى ئالاھىدە رولىنى بايقىغان ۋە ئۇنىڭدىن پايدىلانغان. 

تېرەك ئىسسىق سۇ ئارشىڭىدا ئون نەچچە كۆر بۇلاق بار بولۇپ، ئۇلارنىڭ ئىگەللىگەن ئورنى ئىككى كۋادرات كېلومىتر كېلىدۇ. چىقىدىغان سۇ مىقدارى 691 توننا، سۇنىڭ تېمپۇراتورىسى قىش-ياز 65 سېلىتسىيە گىرادۇس ئەتراپىدا بولىدۇ.2000-يىلى باي ناھىيەسىدىكى مۇناسىۋەتلىك ئورۇنلار بۇ يەردە تېرەك ئىسسىق سۇ ئارشىڭى ئارامگاھىنى قۇرۇپ، بۇلاق سۈيىنى تۇربا ئارقىلىق يۇيۇنۇش كۆلچەكلىرى، ئايرىمخانا ۋە ياتاقلارغىچە يەتكۈزگەن. شۇڭا بۇ يەرگە ھەر قانداق چاغدا كېلىپ داۋالانغىلى بۇلىدۇ.

مۇز تاغ باغرىدىكى گۈزەل مەنزىرە، ساپ ھاۋا، سۈپسۈزۈك ئاسمان، شاۋقۇن سېلىپ ئېقىۋاتقان تاغ سۈيى ... سىزگە ھۇزۇر ۋە راھەت بېغىشلايدۇ. 

تېرەك ئىسسى سۇ ئارشىڭىغا  بارىدىغان يوللار ئاسفالتلاشتۇرۇلغان بولۇپ، بۇ يەرگە كۈندە ئاپتوبۇس قاتنايدۇ. 

20-ئەسىرنىڭ 80-يىللىرى باي ناھىيە پارتكوم، خەلق ھۆكۈمىتى مۇناسىۋەتلىك تارماقلارنى تەشكىللەپ، تېرەك ئىسسىق سۇ ئارشىڭىنى ئىلمى تەكشۈرۈپ، ئۇنىڭ باي ناھىيە بازىرىنىڭ شىمالىدىكى تېرەك كۆمۈرلىكىدە تەبئىي شەكىللەنگەن ئىسسىقلىق مەنبەسى ئىكەنلىكىنى، بۇلاقتىن چىققان ئىسسىق سۇنىڭ تەركىبىدە گۈڭگۈرت، زەمچە، فوسفور قاتارلىق مېنرال ماددىلارنىڭ بارلىقىنى، بۇلارنىڭ تېرە كېسەللىرى، رېماتىزىم، يۇقىرى قان بېسىم كېسەللىرىگە شىپا بولىدىغانلىقى، شۇنىڭدەك ھۆسىن گۈزەللەشتۈرۈپ، بەدەننى ساغلاملاشتۇرىدىغانلىقىنى ئىسپاتلىغان.