سوزۇلما خاراكتېرلىك بوغۇم ياللۇغى

سەۋەبى: بۇ كېسەللىك، كۆپىنچە ئۆتكۈر بوغۇم ياللۇغىنىڭ ئاسارىتى سۈپىتىدە ۋە بەزىدە سوغۇق تېگىش، ناچار مۇھىت، ئوزۇقلۇق ناچارلىق، بوغۇملارنىڭ زەخىملىنىشى قاتارلىق سەۋەبىدىن كېلىپ چىقىدۇ.

ئالامىتى: بوغۇملارنىڭ توقۇلمىلىرى قاتتىقلىشىپ، ھەرىكىتى توسالغۇغا ئۇچراش، سوغۇق ۋە ھۆلچىلىك كۈنلەردە ھەمدە كېچىسى ئاغرىق كۈچىيىش، بوغۇملار ئىششىش، مۇشەك گۆشلەر ئاجىزلىشىش ۋە بەدەن ئورۇقلاش قاتارلىق ئالامەتلەر بىلەن ئىپادىلىنىدۇ.

1-رېتسېپ

تەركىبى: ھەسەل بىر كىلوگرام، سۇ ئالتە كىلوگرام.

تەييارلاش ئۇسۇلى: ھەسەلنى سۇ بىلەن تۆتتىن بىرى قالغۇچە قاينىتىپ تەييارلىنىدۇ.

ئىشلىتىش مىقدارى: كۈنىگە تۆت قېتىم، ھەر قېتىمدا 100 ~ 150 مىللىلىتىردىن ئىچىلىدۇ.

2-رېتسېپ

تەركىبى: زەنجىۋىل، قەلەمپۇر، دارچىن، جويۇز، لاچىندانە، قارىمۇچ، پىلپىل، سىيادان، ئارپىبەدىيان، خولىنجان بىر ھەسسىدىن، مۇدەببەر قىلىنغان كۇچۇلا ھەممە دورا مىقدارى بىلەن تەڭ. ھەسەل جەمئىي دورا مىقدارىنىڭ ئۈچ ھەسسىسىچىلىك.

تەييارلاش ئۇسۇلى: دورىلارنى يۇمشاق سوقۇپ، ئەلگەكتىن ئۆتكۈزۈپ، كۆپۈكى ئېلىنغان ھەسەل ئۈستىگە سېلىپ ئارىلاشتۇرۇپ تەييارلىنىدۇ.

ئىشلىتىش مىقدارى: كۈنىگە بىر قېتىم، ھەر قېتىمدا 1 ~ 2 گىرامدىن ناشتىدا ئىچىلىدۇ (بالىلارنىڭ ئىچىشىگە بولمايدۇ) .

3-رېتسېپ

تەركىبى: سېرىقچېچەك ئۇرۇقى، سۆرۈنجان 10 گىرامدىن، شېكەر 60 گىرام، سۇ مۇۋاپىق مىقداردا.

تەييارلاش ئۇسۇلى: شېكەرنى سۇدا قاينىتىپ، ئۈستىگە دورىلارنى سېلىپ تەييارلىنىدۇ.

ئىشلىتىش مىقدارى: كۈنىگە ئىككى قېتىم، ھەر قېتىمدا 30 مىللىلىتىردىن ئىچىلىدۇ.