سۆڭەك ئۆسۈپ قىلىش

سەۋەبى: بۇ كېسەللىك، ئومۇرتقا تەخسىلىرى ۋە چوڭ بوغۇملار ھەمدە تاپان قاتارلىق ئورۇنلاردا ناھايىتى كىچىك كۆمۈرچەكسىمان سۆڭەك ئۆسۈپ چىقىش سەۋەبىدىن كېلىپ چىقىدۇ.

ئالامىتى: نېرۋىلارنىڭ بېسىلىشى تۈپەيلىدىن ئوخشاشمىغان دەرىجىدىكى ئىزچىل ئاغرىق ۋە ھەرىكەتنىڭ قىيىنلىشىشى قاتارلىق ئالامەتلەر بىلەن ئىپادىلىنىدۇ.

1-رېتسېپ

تەركىبى: سېرىق ھېلىلە پوستى، سەبرە سۇقۇترى، سۆرۈنجان مىسىرى 20 گىرامدىن، پوستى ئاقلانغان تاتلىق بادام مېغىزى 32 گىرام، سانا، مەستىكى رۇمى، زەپەر تۆت گىرامدىن.

تەييارلاش ئۇسۇلى: دورىلارنى يۇمشاق سوقۇپ، ئەلگەكتىن ئۆتكۈزۈپ، ئەرەقى بەدىيان بىلەن ئارىلاشتۇرۇپ تەييارلىنىدۇ.

ئىشلىتىش مىقدارى: كۈنىگە بىر قېتىم، ھەر قېتىمدا 5 ~ 9 تالدىن ئۇخلاشتىن ئىلگىرى ئىستېمال قىلىنىدۇ.

2-رېتسېپ

تەركىبى: سۆرۈنجان، گۈلى بىنەپشە، بىستىپايەج، سېرىق ئوت، بادرەنجى بۇ، ئىتئۈزۈمى، شاھتەررە، قىزىلگۈل 15 گىرامدىن، بوزىدان، رۇم بەدىيان، دۇرۇنەج ئەقرەبى سەككىز گىرامدىن، گۈلقەنت 100 گىرام.

تەييارلاش ئۇسۇلى: دورىلارنى قايناق سۇغا مەلۇم ۋاقىت چىلاپ، ئاندىن سۈزۈپ، تىرىپلىرىنى ئېلىۋېتىپ قاينىتىپ تەييارلىنىدۇ.

ئىشلىتىش مىقدارى: كۈنىگە ئۈچ قېتىم، ھەر قېتىمدا 60 مىللىلىتىردىن ئىچىلىدۇ.

3-رېتسېپ

تەركىبى: سۆرۈنجان، گۈل بىنەپشە، بىستىپايەج، سېرىق ئوت، بادرەنجى بۇ، ئىتئۈزۈمى، شاھتەررە، قىزىلگۈلنىڭ ھەربىرىدىن سەككىز گىرامدىن، گۈلقەنتتىن 60 گىرام.

تەييارلاش ئۇسۇلى: دورىلارنى مەلۇم ۋاقىت قايناق سۇغا چىلاپ قويۇپ، ئاندىن قاينىتىپ، سۈزۈپ تەييارلىنىدۇ.

ئىشلىتىش مىقدارى: كۈنىگە ئۈچ قېتىم، ھەر قېتىمدا 60 مىللىلىتىردىن ئىستېمال قىلىنىدۇ.