سوزۇلما ئۈچەي ياللۇغى

سوزۇلما ئۈچەي ياللۇغىسەۋەبى: بۇ كېسەللىك، كۆپىنچە ئۆتكۈر ئاشقازان-ئۈچەي ياللۇغىدىن كېيىن تولۇق داۋالانماسلىق ياكى ئۇزاق داۋاملاشقان ئىچ سۈرۈشلەرنىڭ ئۈچەي دىۋارىنى زەخىملەندۈرۈشى نەتىجىسىدە كېلىپ چىقىدۇ.

ئالامىتى: ئۇزاق مۇددەت داۋاملاشقان قورساق غولدۇرلاش، ئاغرىتماي تەرەت كۆپ قېتىم كېلىش، بەزىدە يەڭگىل قورساق ئاغرىش قاتارلىق ئالامەتلەر بىلەن ئىپادىلىنىدۇ.

1-رېتسېپ

تەركىبى: ئاق لەيلى ئۇرۇقى 100 گىرام، گاۋزىبان ھىندى، قىزىلگۈل بەرگى چېچىكى، شۇمشا ئۇرۇقى 30 گىرامدىن.

تەييارلاش ئۇسۇلى: دورىلارنى يۇمشاق سوقۇپ، ئەلگەكتىن ئۆتكۈزۈپ، تالقان تەييارلىنىدۇ.

ئىشلىتىش مىقدارى: كۈنىگە ئىككى قېتىم، ھەر قېتىمدا مۇۋاپىق مىقداردا ئىستېمال قىلىنىدۇ.

2-رېتسېپ

تەركىبى: ئۈزۈم ئۇرۇقى 90 گىرام، ھەببۇلئاس 180 گىرام، خەرنۇپ، ئانارگۈلى، گەزمازەج، جويۇز 30 گىرامدىن، كۇندۇر، جۇۋىنە، سۆئدى كۇپى، سۇمبۇل، مەستىكى 15 گىرامدىن، شېكەر 730 گىرام.

تەييارلاش ئۇسۇلى: دورىلاردىن ئۈزۈم ئۇرۇقىنى بىر كېچە-كۈندۈز سىركىگە چىلاپ سۈزۈۋېلىپ، سايىدا قۇرۇتۇپ، چالا قورۇپ يۇمشاق سالايە قىلىپ، قالغان دورىلارنى يۇمشاق سوقۇپ، شېكەرنى ئەرىقى گۇلابتا قىيام قىلىپ، دورىلارنى ئارىلاشتۇرۇپ تەييارلىنىدۇ.

ئىشلىتىش مىقدارى: كۈنىگە بىر قېتىم، ھەر قېتىمدا سەككىز گىرامدىن ئىستېمال قىلىنىدۇ (بالىلارغا ئازايتىلىدۇ) .

3-رېتسېپ

تەركىبى: سىقىلغان بېھى سۈيى بىر كىلوگرام، شېكەر ئىككى كىلوگرام.

تەييارلاش ئۇسۇلى: بېھىنى توغراپ، سىقىپ سۈيىنى ئېلىپ، شېكەر بىلەن قاينىتىپ قىيام قىلىپ تەييارلىنىدۇ.

ئىشلىتىش مىقدارى: كۈنىگە ئىككى قېتىم، ھەر قېتىمدا 50 ~ 100 گىرامدىن ئىستېمال قىلىنىدۇ (بالىلارغا كۆرۈنەرلىك ئازايتىلىدۇ) .