زىرىق

زىرىققا ئۇرۇقداش چاتقال بولۇپ، ئېگىزلىكى 2 ~ 1.5 مېتىر كېلىدۇ، كۆپ شاخلىنىدۇ؛ يىلتىزى توم ۋە ئۇزۇن، رەڭگى سېرىق، تەمى ئىنتايىن قېرىق؛ يوپۇرماقلىرى قىسقا، شاخلىرىغا توپلىشىپ ئۆسىدۇ، شەكلى تەتۈر تۇخۇم شەكىللىك بولۇپ، تولۇق گىرۋەكلىك، كىچىك ۋە قىسقا كېلىدۇ، شاخ تۈۋىنىڭ تاشقى تەرىپىدە ئۈچ ئاچىلىق تىكىنى كۆپ، ئوتتۇرىسىدىكى ئۇزۇن، ئىككى تەرىپىدىكىلىرى قىسقا بولىدۇ؛ ئومۇمىي گۈل رېتى بولۇپ، گۈلى كىچىك، سېرىق؛ مېۋىسى شىرنىلىك، شار شەكلىدە بولىدۇ، پىشقاندا قارىيىدۇ. مېۋىسى «زىرىۋ» نامىدا دورىغا ئىشلىتىلىدۇ.

مېۋىسى

ئۈنۈملۈك تەركىبى

تەركىبىدە گلۇكوزا، مېۋە قەنتى، ئالما كىسلاتاسى، كاروتىن ۋە پىگمېنت خىلىدىكى ماددىلار بار، ئۇرۇقىنىڭ تەركىبىدە مايلىق ياغ بار.

ئۆت، جىگەر ۋە ئاشقازاننى قۇۋۋەتلەش، ئۆت سۇيۇقلۇقىنى راۋان قىلىش، قان بېسىمنى چۈشۈرۈش، غەيرىي تەبىئىي سەپرا ۋە قان خىلىتىنى تەڭشەش، قۇرۇق ئىسسىق ۋە ھۆل ئىسسىق كەيپىياتنى تەڭشەش، ئۇسسۇزلۇقنى پەسەيتىش، ئاشقازان ۋە جىگەرنىڭ ھارارىتىنى پەسەيتىش، قىزىتما قايتۇرۇش، قۇرۇق ھۆنى يوقىتىش، سەپرانى پەسەيتىش.

جىگەر، ئاشقازان ۋە ئۈچەي ياللۇغى، ئىچى سۈرۈش، ھەزىمنىڭ ناچالىشىشى، ئۇسسۇزلۇق، ۋىتامىن C نىڭ يېتىشمەسلىكى، يۇتقۇنچاق ياللۇغى، كالپۇك يېرىلىش، يۈرەك رېتىمسىزلىقى، قۇرۇق ھۆ بولۇش، يۇقىرى قان بېسىم قاتارلىقلارغا ئىشلىتىلىدۇ.

1. ئىشتىھانى ئاچىدۇ، قىزىتما ياندۇرىدۇ.

2. باكتېرىيىگە قارشى تۇرىدۇ ۋە تورمۇزلايدۇ.

3. قاننىڭ تېزلىكىنى پەسەيتىپ، قان بېسىمىنى چۈشۈرىدۇ.

4. ئۆت سۇيۇقلۇقىنى راۋان قىلىدۇ.

5. ئاق قان ھۈجەيرىسىنىڭ سانىنى ئۆرلىتىدۇ.

خاس تەسىرى

ئۆتنى قۇۋۋەتلىگۈچى دورا.

ئورۇنباسارى

 قىزىلگۈل، ئاق سەندەل.

ئەكىس تەسىرى

سوغۇق مىزاج كىشىلەردە باش ئاغرىقى پەيدا قىلىدۇ.

تۈزەتكۈچىسى

قەلەمپۇر، دارچىن، شېكەر.

يىغىش

بۇ ئۆسۈملۈك كۈزدە مېۋىسى پىشقاندا يىغىۋېلىندۇ .

ساقلاش 

ئاپتاپتا قۇرۇتۇپ ساقلىنىدۇ. ھۆل پېتى دورىغا ئىشلەتسىمۇ بولىدۇ.^[0]