چىش ئاغرىقى

چىش ئاغرىقىسەۋەبى: بۇ كېسەللىك، مىجەزنىڭ ماددىلىق ۋە ماددىسىز بۇزۇلۇشى، قۇرت چۈشۈش، ياللۇغلىنىش، چىش تۈۋى تازىلىقىنىڭ ناچارلىقى، ناچار ئوزۇقلىنىش ئادىتى ۋە سۈپەتسىز يېمەكلىكلەر، ئاشقازاندىن ئۆرلىگەن قويۇق يەل ۋە كېسەللىكلەرنىڭ ئاسارىتى سەۋەبىدىن كېلىپ چىقىدۇ.

ئالامىتى: چىشنىڭ تۈۋى قىزىرىش، ئىششىش، ئاغرىش، شۇنداقلا چىش مىلىكى، ئېغىز ئىچى، چىش يىلتىزى لوقۇلداپ ئاغرىش، بەزىدە ئېڭەك قوشۇلۇپ ئاغرىش ۋە ئىششىپ قېلىش، بەزىلەردە ئاغرىق ئورۇن يىرىڭ يىغىش، باشمۇ قوشۇلۇپ ئاغرىشتەك ئالامەتلەر بىلەن ئىپادىلىنىدۇ.

1-رېتسېپ

تەركىبى: ئالما ياغىچى ئىككى گىرام، زەنجىۋىل توققۇز گىرام، ھىندى تۇزى توققۇز گىرام.

تەييارلاش ئۇسۇلى: دورىلارنى يۇمشاق سوقۇپ، ئەلگەكتىن ئۆتكۈزۈپ، تالقان تەييارلىنىدۇ.

ئىشلىتىش مىقدارى: كۈنىگە 2 ~ 3 قېتىم ئاغرىۋاتقان چىشقا بېسىلىدۇ.

2-رېتسېپ

تەركىبى: سىركە 300 مىللىلىتىر، يەرلىك تۇز، زەمچە 15 گىرامدىن، يالپۇز، سېرىقچېچەك، زىرە 10 گىرامدىن، سۇ بىر لىتىر.

تەييارلاش ئۇسۇلى: سىركىدىن باشقا دورىلارنى قاينىتىلغان سۇغا بىر سوتكا چىلاپ، ئاندىن سۇس ئوتتا سۈيىنىڭ يېرىمى قالغۇچە قاينىتىپ، دورا تىرىپلىرىنى سۈزۈۋېتىپ، سۈيىگە سېركىنى ئارىلاشتۇرۇپ تەييارلىنىدۇ.

ئىشلىتىش مىقدارى: كۈنىگە 3 ~ 4 قېتىم ئېغىز چايقىلىدۇ.

3-رېتسېپ

تەركىبى: قۇندۇز قەھرى، ھىڭ، مۇرمەككى، پىلپىل، كۆكنار ئۇرۇقى، مىڭدىۋانە ئۇرۇقى تەڭ مىقداردا، سۇ مۇۋاپىق مىقداردا.

تەييارلاش ئۇسۇلى: دورىلارنى يۇمشاق سوقۇپ، ئەلگەكتىن ئۆتكۈزۈپ، سۇدا يۇغۇرۇپ، پۇرچاقتەك چوڭلۇقتا كۇمىلاچ تەييارلىنىدۇ.

ئىشلىتىش مىقدارى: كۈنىگە 1 ~ 2 قېتىم ئاغرىق چىشقا بېسىلىدۇ. 

چىش ئاغرىقىنى يەرلىك ئۇسۇلدا داۋالاش

بىر چىمدىم كۈچىلا تالقىنى بىلەن بىر چىمدىم سامساقنى پوستىنى ئېزىپ تاماكىغا ئوخشاش يۆگەپ، ئۇنىڭغا ئوت يېقىپ، ئۇنىڭ تۈتۈنىنى شوراپ ئېغىز بوشلۇقىدا ئايلاندۇرغاندا، چىش ئاغرىقى بىر سائەت ئىچىدە پەسىيىدۇ ھەمدە ئاغرىش قايتا قوزغالمايدۇ. تۈتۈننى ئېغىز ئىچىدىلا ئايلاندۇرۇش، ئىچىگە شورىماسلىق لازىم.

بىر دانە توخۇ ئۆتىنى بىر ئاز ئاق ھاراق بىلەن ئارىلاشتۇرۇپ، پەلكۈچ بىلەن ئاغرىغان چىشقا تەگكۈزۈلسە ئۈنۈم بېرىدۇ.

تېتىتقۇنى چوكىنىڭ ئۇچىغا تەگكۈزۈپ، ئاغرىغان چىشقا تەگكۈزسە چىش ئاغرىقى توختايدۇ.

ھۆل زەنجىۋىلنى ياپراقچە قىلىپ كېسىپ ئاغرىغان چىشقا قويۇپ چىشلىسە ئاغرىق پەسىيىدۇ. بۇنى قايتىلاپ بەرسىڭىز ئۈنۈمى تېخىمۇ يۇقىرى بولىدۇ.^[0]