تۇرمۇش  قايناملىرىغا  شۇڭغۇپ  كىرمىگەن  ئادەم  ھاياتنىڭ  قىممىتىنى  چۈشەنمەيدۇ،قولۋاققا  قارا،ئۇ ھەر ۋاقىت  تېپ-تېنچ  مېڭىشنى ئىزدەيدۇ،بىراق  قاينام  كۆرمىگەن  قولۋاقنىڭ دەريادا قانچىلىك  ئۈزەلەيدىغانلىقىنى ھۇشى بىلەن ياشايدىغان ئادەملەرنىڭ  ھەممىسى  بىلىدۇ،چۈنكى  قاينام  قولۋاقنى  ھەم  قولۋاقچىنى  سىنايدۇ...
     ئەنسارىدىن  شەرققە  قاراپ سۈرلۈك  ھۆكۈرەپ،يەر  بېغىرلاپ  ماڭغان،تولىمۇ  ئۇزۇن  بۇ  ‹‹مەخلۇق››نىڭ  ئۈچەي  باغرىغا  تىقىلغان  ئىندەك    ئولتۇرغان  ھەر قىسما  ئادەملەر  بىلەن،ئىس-تۈتەك،سېسىقچىلىققا  تولغان  ۋاگوندا  ئولتۇرۇپ،يىراقتا  قېلىۋاتقان ئانا  تاغلار   بىلەن  مۇڭدىشىشنى داۋاملاشتۇردى.بۇ  ئۇنىڭ  بۇ  ئانا تاغلار  بىلەن  خوشلاشقانلىقى  ئەمەس  بەلكى  مەڭگۈلۈك  ئەسلىمىلىرىگە  گۇۋاھ  بولىۋاتقان  بۇيۈكلۈكتە  قەد  كۆتۈرگەن  تاغلارغا  ئۆزىنىڭ  ھەسرەت  نىدالىرىنى  ئىزھار  قىلىشى ئىدى،چۈنكى  بۇ  تاغلار  ئۇنى ئۆز  باغرىدا  باغاشلىغان،ئۇنىڭغا  ئادەم  بولىشنىڭ  يوللىرىنىمۇ،ئازاپ ئوقۇبەتلىك  ،قىسمەتكە  تولغان  ئەسلىملەرنىمۇ  ئۈن تۈنسىز  تەقدىم  ئەتتى،ئۇ  بۇ  تاغنىڭ بەشىنچنى  ئەۋلات  ۋارىسى،ئۇنىڭ   ئۇلۇغ  بوۋا-مومىلىرى ۋە  ئاتا-ئانىلىرىمۇ  مانا مۇشۇ قورام  تاشلار  بىلەن ئۆزىنىڭ  جىلۋىسىنى  ياراتقان  بۇ  مېھرى  ئىللىق،ئەمما  باغرى  قاتتىق  بۇ  زىمىننىڭ  قوينىدا  مەڭگۈلۈك  خاتىرجەملىككە  كەتكەن،ئۇلار    بۇ  زىمىنغا  خۇددى  شۇ  زىمىنغا يىلتىز  تارتقان  قارىغايلاردەك  مۇستەھكەم  يىلتىز  تارتقان،زىمىننىڭ  قەھرىمۇ  ،زەھرىمۇ  ۋە  جەھلىمۇ  ئۇلار  ئۈچۈن  بەك  سۆيۈملۈك  ئىدى،ئۇلار  بۇ  زىمىندا  نۇرغۇن  قېتىم  ھايات-ماماتلىق كۈرىشىنى  ئۆتكۈزدى،ھەتتا  بىر قىسىم ياۋايى  ھايۋانلار  بىلەن  يەكمۇ يەك ئېلىشتى، قار  كۆچۈپ  خۇددى  ئەزرائىل  كەلگەندەك  ئۆلۈم  ۋەھىمىلىرىنىمۇ  ئۆتكۈزدى،يەنە تاغ  پالگانلىرى  بىلەن  بىرلىكتە  بۇ مۇققەددەس  زىمىننى  ئوق-دورىغا  تۇتماقچى  بولغان  يات تىلدىكى  چېرىكلەر  بىلەنمۇ  ئېلىشتى...
    ئەنسارىدىن  بوۋىلىرىنىڭ  ئېغزىدىن  بۇ  زىمىننىڭ  ئۆتمۈشى  ھەققىدە  نۇرغۇن  ھېكايىلەرنى  ئاڭلىغان،شۇنداقلا  كېيىنكى  يېڭى  ھېكايىلەرنىڭ    سەۋەپكارىمۇ  بولغان.ئۇ  ئۆزىدىن  تولىمۇ يىراقلاپ كېتىۋاتقان   تاغلارغا  مۇڭسىراپ  قاراپ  يەنە  تېگى  يوق  خىياللارغا  بەنت  بولدى...
 ئۇنىڭ   30   ياشلاردىن   ھالقىغان، ياشلىق    باھارى   ئۇرغۇپ تۇرىۋاتقان،بىر  ئۆينى  بېشىغا  كىيگەن  ۋاقىتلىرى  ئىدى؛ئۇ ھەم چاققان،ھەم  تىرىشچانلىقى بىلەن،شۇنداقلا مىجەز-خاراكتىرىدىكى ئوچۇق-يورۇقلىقى،باشقىلارغا  بولغان  قىزغىنلىقى  بىلەن   يۇرت ئىچىدە  خېلىلا  ھۆرمەتكە   سازاۋەر  ئىدى،ۋە يەنە  تېرە-_-تىۋىت  سودىسى  بىلەن  يۇرتتىكى  ئالدىن بېيىغان  ياشلار  قاتارىغىمۇ  كىرىپ  قالغان  ئىدى.ئۇنىڭ يەنە  چىرايلىق  ،ناخشا-ئۇسۇلغا  ھېرىسمەن،شەھلا  كۆزلىرى،ئۇزۇن  سۇمبۇل  چاچلىرى،تال-چىۋىقتەك  بەللىرى  بىلەن   مۇشۇ  تىمتاس  مەھەلىدىكىلا  ئەمەس  خوشنا  مەھەلىدىكىلەرنىڭمۇ  يۈرەكلىرىگە   ئوت  ياققان،قانچىلىغان  ياشنى  ئازاپ-ھەسرەت  دېڭىزىغا  غەرق  قىلغان  ئايالىمۇ،ئوماق  بىر ئوغلىمۇ بار  ئىدى.ماينىڭ ئاخىرلىرى ،ئەنسارىدىن  دوستى سۇلتان  بىلەن  يىغقان  تېرە-تىۋىتلەرنى  ماشىنىسىغا بېسىپ  ئادىتى  بويىچە  ئۆيىدىكىلەر  بىلەن  ئاددىلا  خوشلاشتى،
_ ماقۇل ئەمىسە،  سودىنى  تۈگىتىپلا  قايتىپ  چىقىمىز،بىزدىن ئەنسىرەپ  كەتمەڭلار _، دېدى  ئۇ  ئۆزىگە  تەلمۈرۈپ،ئايرىلىشقا  قىيالماي تۇرغان ئايالىغا  قاراپ.
ئەمدىلا تۆت  ياشقا  كىرگەن ئوماق  ئوغلى  دادىسىنىڭ  قولىنى  تۇتۇپ  تۇرۇپ  چۈچۈك  تىللىرى  بىلەن  سۆزلەشكە  باشلىدى:
-_  داد،  دادا  ماڭا  بازايدىن  جىققىدە  ئويۇنچۇق  ئېچىقىپ  بېيىسەن_-ھە؟
_ ماقۇل    ئوغلۇم،بۇ  قېتىم  ساڭا  سەن  ئەڭ ياخشى  كۆرىدىغان  ئويۇنچۇقلارنى  ئېلىپ  چىقىمەن،ئاپاڭنىڭ  سۆزىنى  ئاڭلا_ھە؟  قوزام.
_  ئاڭلايمەن  دادا...
ئايالىنىڭ  ياشلىق كۆزىدە  يەنە  ياش  ئەگىدى،گەرچە  ئۇلارنىڭ  سودا  ئۈچۈن  شەھەرگە  كىرىپ-چىقىشى  نورمال  ئىش  بولسىمۇ  لېكىن  بۇ قېتىم  نېمىشقىدۇر ئايالىنىڭ قەلبىدە   مالىمانچىلىق تۇمانلىرى  ئەگىۋاتاتتى.
_ خوش  ئەمىسە،يوللاردا دىققەت  قىلىڭلار،ئىشىڭلار  تۈگىسىلا  قايتىپ  چىقىڭلار.
ئەنسارىدىن  بىلەن  سۇلتان  ماشىنىغا  چىقىپ   شەھەرگە  قاراپ يول  ئالدى،ئۇلارنىڭ  بۇ  قېتىم يىغقان  ماللىرى  خېلىلا  جىق  بولۇپ  ،بۇ  قېتىم يىغقان ماللىرىدىن  كۆڭلى  خۇرسەن   ئىدى.شۇڭلاشقىمۇ  كۆڭۈللىرىدە  قىلغان  ھېساۋات،پىلانلىرى  ھەققىدە  پاراڭغا  چۈشۈپ كەتتى.
تار  ھەم  ئۇششاق تاشلىق  تاغ  يولى  ئۇلارنى تاراقشىپ  تۇرۇپ  ئۇزىتىپ  قويدى،ئۇلار  بۇ  يوللاردا  قانچىلىك  ماڭغانلىقىنى  ئۆزلىرىمۇ  بىلمەيدۇ،چۈنكى  بۇ يوللار  ئۇلارنىڭلا  ئەمەس  ئاتا-_بوۋىلىرىنىڭمۇ  نۇرغۇن  يىراق-يېققىن سەپەرلىرىگە  ھەمدۇ سانا  ئوقىغان،ۋە  ئۇلارغا   ئاسائىشلىق  ئاتا  قىلغان  ئىدى.  بۇ  يول  تار  جىرالارنى،سانسىزلىغان  ۋە  تۇتاش  كەتكەن  ئەگرى_-بۈگرى  تاغ  قاپتاللىرىنى،تىك،-ھەيۋەت  چوققىلارنى،كۆكنى  تىرىگەن  قوييۇق،زىچ  قارىغايلار بىلەن  قاپلانغان  تاغ  باغىرلىرىنى  ھالقىپ  ئۆتىدۇ،بۇ  يەرنىڭ  ھاۋاسى  شۇنداق  ساپ  ھەم سۈزۈككى   ھەرقانداق  ئادەمنىڭ  ۋۇجىدىنى خۇددى  گۈزەل  جانان  ئەسىر  قىلىۋالغاندەك  بىردەمدىلا  ئەسىر  قىلىۋالىدۇ،تاغ  ھاۋاسىنى  قېنىپ-_قېنىپ  سۈمۈرىسەن،سۈپ-سۈزۈك  سۈيىنى     قانچە ئىچسەڭ  شۇنچە  ھوزۇر  بېغىشلايدۇ.ئادەملىرىنى دېمەيلا  قوي  بىر-_بىرىدىن  ئاق  كۆڭۈل،مېھماندوست،كۆڭلى  خۇددى  ئېلىپتەكلا  تۈز،ئۆيىدە  نېمىسى  بولسا  شۇنى  تۆكۈپلىۋېتىدۇ،ئەتىسى  نېمە يىيىشى بىلەن ھېساپلاشمايدۇ،شۇڭلاشقىمۇ  بۇ  يەرگە  چىققانلار  ئاچ  قېلىشتىن  غەم  قىلمايدۇ،مانا بۇ  يىگىتلەر مۇشۇنداق  خاسىيەتلىك  زىمىننىڭ  ئەركەك  سۈيىنى  ئىچىپ  چوڭ  بولغان،ئىسسىق_-سوغنى  تەڭ  تارتىشقان  ئەزىمەتلەر.
     تاغ  يولى   پۈتۈنلەي  ياسىلىپ  بولمىغاچقا ئەنسارىدىنلار  3 سائەت  ئەتراپىدا  يول  يۈرگەندىن كېيىنلا  شەھەرگە  كىردى،  ۋە  دائىم  كىرىدىغان  بىر  ئاشپۇزۇلغا  كىرىپ  قوساقلىرىنى  توقلىغاندىن كېيىن  ئالدىن كېلىشىپ  قويغان  سودىگەرلەر  بىلەن  تېلفۇنلاشتى،قارشى  تەرەپتىكىلەر  تۇرپاندىن يولغا  چىقىپ  پىچانغا  كەلگەندە  ماشىنىسىدىن  چاتاق  چىقىپ  قالغانلىقىنى،شۇڭا  سەل  ھەيەل  بولۇپ قالىدىغنالىقىنى،  بىر  كۈن  ساقلاپ  تۇرۇشى  كېرەكلكىنى  ئېيتتى.ئۇلار ماللىرىدىن  ئەنسىرەپ    شەھەردىكى  يېققىن   دوستى  ئەكبەرلەرنىڭ  ئۆيىگە  كەلدى،ۋە  ماشىنىنى  ئۇلارنىڭ ھويلىسىغا  توختىتىپ   قويغاندىن  كېيىنلا  كۆڭلا  ئارامىغا  چۈشتى.ئۇلار  كەچتە  ئەكبەرنىڭ    بىرقانچە  دوستى بىلەن  پاراڭلىشىپ  ئولتۇرۇپ،ئەتىسى    سەھەر  ئورنىدىن  تۇرۇپلا  يەنە  سودىنىڭ  ئىشلىرى  بىلەن  ئالدىراش  بولۇپ  كەتتى،تۇرپاندنىن  كېلىۋاتقانلارمۇ  چۈشكە  يېققىنلاشقاندىلا  يېتىپ  كەلدى.  ئۇلارنىڭ   بۇ  قېتىمقى  پايدىسى  خېلىلا ياخشى  بولۇپ،ئۇلار  ئاياللىرى  ۋە  بالىلىرىغا يىمەك-ئىچمەك  ۋە  كيىم-كېچەك ئېلىۋېلىپ،ماشىنىغا  ماي قاچىلىغاندىن  كېيىن  يەنە تاغقا  قاراپ  يول  ئالدى،ماشىنا تاغ يولىغا  ياماشتى،ماشىننىڭ  ئوچۇق  دېرىزىلىرىدىن   كەچ باھارنىڭ  غۇر-_غۇر  شامىلى  كىرىشكە  باشلىدى،شامال  ئەنسارىدىن بىلەن  سۇلتاننىڭ  قاپ-قارا  چاچلىرىنى ئەركىلىتىپ  سىلايتتى،سىرتتا  بولسا  ئۇۋىسىغا  كىرىۋالغان  قۇشلارنى  سالقىنلىتىشقا  چاقىرۋاتقاندەك  ‹‹غۇر_-غۇر ››  قىلىپ    ئاۋاز  چىقىراتتى.
  شەھەرگە  كىرگۈچە  سۇلتان ماشىنا ھەيدىگەن بولسا  ئەمدى  ئەنساردىن  رولغا  ئولتۇرغان  ئىدى،ماشىنا  داۋانلارغا  يامىشاتتى،داۋانلاردىن  ئاستا  چۈشەتتى،يەنە  داۋانلارغا  يامىشاتتى،ئۇلار  بىلەن تەڭ قۇياشمۇ  ئۆز  يولىنى داۋام  ئەتمەكتە  ئىدى،ئۇلار  تاغ  يولىنىڭ  ئوتتۇرىسىدىكى  داۋاندىن  چۈشىۋاتقاندا  ماشىنىنىڭ  ئوتى  ئۆچۈپ،  تۇيۇقسىز  توختاپ  قالدى، داۋاندىن  چۈشكەندە  ماشىنىنى  ئوبرۇتتا  ھەيدەشكە  بولمايدىغانلىقىنى  ئۇلار  ئوبدان بىلەتتى،شۇڭلاشقا  نېمە  بولغىنىنى  بىلەلمەي  ماي  تەپكىسىنى  دەسسەپ  باقتى،ماشىنا  ئوت  ئالمىدى،ئۇلار  ھەرخىل  ئاماللارنى  قىلىپ  باقتى،ماشىنا  قوزغىلىدىغاندەك  قىلمايتتى،بۇ  چاغدا  قۇياشمۇ  غەرپكە  باش  قويۇپ  تاغ  يولىنى  تىمتاس   گۇگۇم  سۈرىگە  چۆمدۈرگەن  بولۇپ،قاتمۇ قات  كۆكۈچ تاغ  چوققىلىرى    قۇياشنىڭ  بىر  پارچىسىلا  قالغان  پايانسىز  ئاسمانغا  بوي  سوزۇپ  تۇراتتى،تاغ  شامىلى  تەنلەرنى  يېنىك  تىتىرتەتتى،گەرچە  ئەنساردىنلار  بۇنداق  مۇھىتلارغا  كۆنۈك  بولسىمۇ  لېكىن ماشىنىنىڭ  دەل  داۋاندىن  چۈشىۋاتقاندا  توختاپ  قالغانلىقىىدىن  ئىچى تىتىلدايتتى،قېيىشقاندەك  يولدىن  يا  بىرەر  ماشىنا  ئۆتمىدى،ئاخىرى  ئىچى  كۈچلۈك  ئەنسارىدىن ماشىنىدىن چۈشتى.
_  نېمە  قىلىسەن؟_سورىدى  سۇلتان.
_  تورمۇزلىرىنى  كۆرۈپ باقاي  _ دېدى  ،كۇلۇچ  ۋە ئەتۋىركا  ئېلىۋالغان  ئەنسارىدىن.
_ئەمىسە  مەن  ماشىننىڭ  ئىچىدە  بۇيرۇقىڭنى  كۈتەي_دېدى  سۇلتان ماشىنا  ئىچىدە  ئولتۇرۇپ،ۋە يېنىدىن  بىر تال  تاماكا ئېلىپ تۇتاشتۇردى.
ئەنسارىدىن  ماشىنىنىڭ  تېگىگە  كىرىپ كەتتى،ۋە ماشىنىڭ  تورمۇزىنى  بىجىكتىر  سېلىپ  كۆردى،  ئۇ ئويلىغانىدەك  ئالدى  تورمۇز قىسىلىپ  قالغان    ئىدى  .
_  ئالدى تورمۇز  قىسىلىپ  قاپتۇ،سەن رولنى  ئوبدان  تۇتۇپ  تورمۇزغا  ئوبدان  قارا_ دېدى ئەنسارىدىن.
_ماقۇل  ،دىققەت  قىل_-ھە؟!    
ئەنسارىدىن  تورمۇزنىڭ قىسىلىپ  قالغان  يېرىنى  ئاز  ئازدىن  كۆشەپ  ئىتىرىشكە  باشلىدى،بىراق  ئۇنى  مىدىرتىش  بەك  تەس  ئىدى،شۇنداقتىمۇئۇ  ئاستا_ئاستا  كۆشەپ بەردى،ئەتراپنى تېخىمۇ  قوييۇق  قاراڭغۇلۇق  قاپلاشقا،يۇلتۇزلار  بولسا  تېخىمۇ  چاقناشقا باشلىدى،بىر  چاغدا ماشىنا خۇددى  غايىپ  بىر  كۈچتىن  ئىتىرىلگەندەك  قوزغىلىپ  كەتتى.
_ -ئەنسارىدىن  دىققەت  قىل !_دېگەن  ئەنسىز  ئاۋاز  ئاڭلاندى.
5توننىلىق،بۇ رەھىمسىز، تىلسىز  ‹‹مەخلۇق›› ئەنسارىدىننىڭ  بەللىرىنى  غاراسلىتىپ داۋاندىن  چۈشۈشكە  باشلىدى.‹‹ۋايجان،ئاللا  خۇدا !!››دېگەن  دەھشەتلىك  ئاۋاز جىمجىت،سۈرلۈك  تاغ  باغرىنى  زىل-زىلىگە  كەلتۈردى  ،ماشىنا  20_-30  مېتىر ماڭغاندىن كېيىنلا  سۇلتان  ماشىنىنى  ئاران توختاتتى.ۋە  ماشىنىدىن  چۈشۈپ  ئەنساردىننىڭ  يېنىغا  يۈگۈردى.
ئەنسارىدىن    يەردە  ۋايجانلاپ   ئىڭراپ  ياتاتتى،جاننى  ئالغۇچى  ئاغرىق  ئۇنى  رەھىمسىزلارچە  قىينىماقتا  ئىدى،ئۇنىڭ  پۈتۈن  بەدىنى  ئاغرىق  دەستىدىنمۇ  ئەيتاۋۇر  توختىماي  تىترەيتتى،ئۇلارنىڭ تەلىيىگە  ئۇلار    ماڭغان تەرەپكە    بىر  كىچىك  ماشىنا  چۈشۈپ  كەلدى.سۇلتان  ماشىنى  توستى  ۋە  ماشىنا  ئىگىسىنىڭ  ياردىمىدە  ئەنساردىننى كىچىك  ماشىنىڭ  كەينىگە  سېلىپ  مەھەلە  دوختۇرخانىسىغا  يۈرۈپ  كەتتى،چۈنكى  ماشنىنىڭ  ئىگىسى  بەكمۇ  جىددىي  ئىش  بىلەن  چىققاچقا  كەينىگە  يانالمايدىغانلىقىنى  ئېيىتىپ  ئۆزرە  سورىغان  ئىدى.ئەنساردىننىڭ  ئىڭراشلىرى  بارغانسېرى  كۈچىيىشكە باشلىدى...
قاراڭغۇلۇقتىىكى تاغ يولىدا  مېڭىشمۇ  ئۇنچىلىك  ئاسان   بولمىغاچقا  ئىككى  سائەتلەردىن كېيىنلا  ئۇلار  يېزا   شىپاخانىسىغا  يېتىپ  چىقتى.
شىپاخانىدىكىلەر  ئەنساردىننى  ماشىدىن  نوسۇلكىغىلا  چۈشۈرۈپ كېسەل  كۆرۈش  ئۆيىگە  ئېلىپ  كىردى،ۋە  بىر  قۇر  تەكشۈرگەندىن  كېيىن  مۈمكىن بولسا  بۈگۈن  ھېچ  بولمىسا  ئەتە  سەھەردىلا  شەھەردىكى چوڭ  دوختۇرخانىلارغا  ئېلىپ  بارمىسا  بولمايدىغانلىقىنى  ئېيتتى.سۇلتنغا  ئايان ئۇلارنىڭ  بۇ يېزىسىدا  ماشىنا  بەك  ئاز،قاتناش  ئۈچۈن  مېڭىۋاتقان  ماشىنا  قەيەرگىدۇر  توي  كۆچۈرۈپ  كەتكەن  بولۇپ،ئەتە  كېلەرمىش،ئۆزلىرىنىڭ ماشىنىسى بولسا تېخى  ئوڭشالماي تۇرۇپلا بۇ  ئىش  بولدى.
سۇلتان كېچىچە  ئەنساردىننىڭ  يېنىدا بولدى،ئەنسارىدىن  بەكلا  ئازاپلىنىپ  كېتىۋاتاتتى،دوختۇرلار  ئاخىرى  چىدىيالماي  سۇلتاننىڭ تەلىپى بىلەن  ئۇنى   قول  قويدۇرۇپ  ئەنساردىنگە  بىر ناركۇز  ئوكۇلى  ئۇرۇپ  قويدى،ئەنسارىدىن  بىرازدىن  كېيىن  ئاستا-ئاستا  ئېڭىراپ  ئۇخلاپ  قالدى،ئۇنىڭ يۈزلىرى تاتىرىپ  كەتكەن  ئىدى.
قورقۇنچلىق  كېچە  ھەممەيلەننى  ۋەھىمىگە  سېلىپ  قويۇپ  ئۆتۈپ  كەتتى،بۇ  جەرياندا  ئەنسارىدىن نەچچە  ئويغىنىپ،بەكلا  قىينىلىپ  كەتتى،ئەتىسى  ئۇلار  ئەنسارىدىننى ئېلىپ  چىققان  ماشىنا  ئىگىسىگە  يالۋۇرۇپ  يۈرۈپ  ئەنساردىننى  شەھەردىكى  ئەڭ ياخشى  دوختۇرخانىغا  ئېلىپ  باردى،ئەنساردىن  ئۈچۈن  بۇ  قېتىمقى  يول  ئازابى  ئۆلۈمدىنمۇ  ئېغىرراق  بولدى،  ئۇ  ھەتتا  ئاغرىق  ئازابىغا  چىدىماي  ئۆزىگە  ئۆلۈم  تىلەپ  كەتتى.
ئۇلار دوىتۇرخانىغا  كېلىپلا  ئەنساردىدىننى  جىددى  قۇتقۇزۇش  بۆلۈمىگە  ئېلىپ  كىرىپ  كەتتى.
دوختۇرلار  ئىنچىكە تەكشۈرۈش  ئارقىلىق  ئەنساردىننىڭ  بەل  ئومۇرتقىسىدىن  6تالنىڭ،ئوڭ  پۇت  يوتىسىنىڭ  سۇنغانلىقىنى  ئېنىقلىدى،ۋە  يەنە  دەرھال 30 مىڭ يۈئەن  پۇل  تاپشۇرمىسا  بولمايدىغانلىقنى ئېيتتتى،سۇلتان  سودىدىكى17  مىڭ يۈئەن  پۇلنى  تاپشۇرۇپ  تۇردى، ۋە ياتاققا  ئالغۇزۇپ  تېزراق  ئوپىراتسىيە  قىلىشى  ھەققىدە  مەسلىھەت  سورىدى.
ئەنساردىننىڭ ئايالى  جەمىلە  ۋە  بالىلىرى  ئەتىسى دوختۇرخانىغا  كېلىپ  ئەنسارىدىننى  كۆرۈپ ئۆزىنى تۇتىۋالالماي  بۇقىلداپ يىغلاپ كەتتى.
ئەنسارىدىن  شۇنداق  قىلىپ  بۇ دوختۇرخانىنىڭ يەنە  بىر  جىددى  داۋالىمىسا  بولمايدىغان  بىمارى  بولۇپ  قالدى،بىرقانچە  كۈندىن  كېيىن  ئەنساردىننى  ئوپېراتسىيە  قىلدى،ئوپىراتسىيە  ئاساسەن  ئوڭۇشلۇق  بولغاندەك  قىلاتتى،بىراق  ئوپىراتسىيىدىن كېيىنمۇ  ئۇنىڭدىكى  ئاغرىق يەنىلا  پەسىيىدىغاندەك  قىلمايتتى،ئۇنىڭ  ئۈستىگە  پۇت  ۋە بەللەردىن قاتۇرۋەتكەچكە  ئازراق  قىمىراشمۇ  ئۇنىڭغا  بەك تەس  كېلەتتى،شۇنداق  بولغاچقىمۇ  ئۇ  ھەتتا  ئۆزىنىڭ  ھايات  قالغىنىغا  پۇشايمان  قىلىپ  ئازاپلىناتتى،باشقىلارنىڭ  ئازراق بەرداشلىق  بېرىشى  كېرەكلىكى ھەققىدىكى  سۆزلىرى  قەتئىي  قۇلىقىغا  كىرمەيتتى،شۇنداق  ئازاپلىق  كۈنلەر  خېلىلا  داۋاملاشتى،دوختۇرغىمۇ  ئىنتايىن  كۆپ  پۇل  خەجلەپ،قەرز  ئالغۇدەكمۇ  ئورۇن  قالمىدى،ئۇلار  ئاخىرى  ياتاقتىن  چىقىشقا  مەجبۇر  بولدى  ۋە  قاتۇرما   تېڭىق   پېتى  ياتاقتىن  چىقتى،بۇ  جەرياندا  ئەنساردىن  ئۆزىنى يېرىم جاندەكلا  ھېس  قىلىپ  قالدى،ئۇنىڭ  چوڭ-كىچىك  تەرەتلىرىمۇ  ئورنىدا  ئىدى . 
 
داۋامى بار

         ھېكايىڭىزنى بەكمۇ ياخشى باشلاپسىز ، ،ھېكايىنىڭ بېشىدىكى ئوخشۇتۇشلارنى ياقتۇردۇم.

        بۇ ھېكايىنىڭ داۋامى قانداق بولار ،ئەنسارىدىن ساقىيپ كىتەرمۇ ياكى پالەچ بولۇپ قالارمۇ ؟ بۇ ئائىلىنىڭ تەقدىرى قانداق بولار ؟ بەكمۇ قىزىقىپ قالدىم داۋامىنڭ تېزراق يوللارسىز.

گۇگۇمدىكى ۋەھىمە(داۋامى)
ئەنساردىن ئۆيگە ئېلىپ چىقىلغاندىن كېيىن ئۇنى دوختۇرخانىغا بېرىپ يوقلىيالمىغانلار ئۆيىگە كېلىپ يوقلاپ تۇردى،دەسلەپ ئەر- ئاياللار بىللە كېلىپ يوقلىغان بولسا كېيىن ئەرلەر پات-پات كېلىپ يوقلاپ تۇرۇشنى داۋاملاشتۇردى،ئەنسارىدىن دەسلەپ ئۇلارنىڭ بۇ يوقلاشلىرىدن تەسىرلىنىپ كۆزىگە ياش ئالغانمۇ بولدى،ھەتتا ئايالىنى جاپاغا قويغانلىقىنى شىپى كەلتۈرۈپ ئايالىنىڭ ياخشى گەپلىرىنى قىلىپ ئۇنى كەلگەنلەرگە ماختاپمۇ ئۈلگۈردى.بىراق ۋاقىت ئۇزارغانسېرى جەمىلەگە ئەنساردىننىڭ ھالىدىن خەۋەر ئېلىش ئېغىر كېلىۋاتقاندەك قىلاتتى،شۇڭا ئۇ ئاشخانىغا كىرىپ ھەيەل ئۆتمەيلا تاراق-تۇرۇق،جاراڭ-جۇرۇڭنى باشلىۋېتەتتى،ئەنساردىننىڭ ئالدىغا تاماق ئەكىرگەندىمۇ تارقشىتىپ قويىدىغان بولىۋالدى،ئەنساردىن بۇلارغا دەسلەپ ئانچە پەرۋا قىلماسلىق نەزىرىدە مۇئامىلە قىلدى،چۈنكى ئۇ ئۆزىنىڭ ئايالىغا ھەقىقەتەن ئېغىرچىلىق سېلىپ قويغانلىقىدىن خىجىل بولىۋاتاتتى،ئۇ بۇنداق چاغلاردا ئۆزىگە تەسەللى بېرىپ‹‹ بۇ كۈنلەرمۇ ئۆتۈپ كېتەر،خۇدا خالىسا ساقىيىپ قالسام ئۇنىڭ بۇ ياخشىلىقلىرىنى قايتۇرارمەن ...›› دەيتتى ئىچىدە پىچىرلاپ،ئۇنىڭ يېرىم جان ھالەتتە خوتۇنىنىڭ يۆلەشلىرى بىلەن ئۇيان بۇيانغا ئۆرلىشى ۋە تەرىتىنىمۇ خوتۇنىنىڭ ياردىمدە ئادا قىلىشى ئۇنى جاندىن ئۆتكۈدەك قىيناشلاردا قىينايتتى، ئۆزىنىڭ ئەرلىك غۇرۇرى قانداقتۇر پايخان بولىۋاتقاندەك ھېس قىلىدىغان بولىۋالدى، بۇ چاغلاردا ئۇ ئۆزىنى ‹‹ماشىنا نېمىشقىمۇ مېنى بىراقلا ئۇ دۇنياغا ئېلىپ كەتمىگەندۇ؟!›› دەپ ئزتىراپلىق ئويلارغا غەرق بولاتتى ۋە ئايالىغا چاندۇرماي يوتقان ئىچىگە بېشىنى تىقىۋېلىپ ئۆكسىيتتى،بىراق ئايالى بۇلارنى سەزمەيتتى، ئەكسىچە ئېرىدىن بىزار بولىدىغان،ھەتتا بەزىدە ئېرىنى يالغۇز تاشلاپ قويۇپ توي-تۆكۈنلەرنى باھانە قىلىپ سىرتقا چىقىپ كېتىدىغان،ئاش-توق قويىدىغان بولىۋالدى.ئەنساردىن بۇنداق چاغلاردا يەنە ئۆزىگە تەسەللى بېرەتتى.بىر كۈنى ئۇ ئەتتىگەنلىك ناشتلىقىنى بېرىپلا سىرتقا ماڭغان ئايالىغا يالۋۇرغاندەك قىياپەتتە:
_ خوتۇن،سىرتقا چىقساڭمۇ تېزراق قايتىپ كەل،مەن بەك يالغۇزسىراپ قالىدىكەنمەن،ئۇنىڭ ئۈستىگە بالىمۇ سىرتتىن ئۆيگە كىرمەيدۇ..._دېدى ناھايتى تەستە.ئۇنىڭ ئايالى گەپ-سۆز قىلماي چىقىپ كەتتى.بۇ ئۇنىڭغا بەكمۇ ئېغىر كەلدى،شۇنداقتىمۇ دەردىنى ئىچىگە يۇتۇپ قالدى،ئۇنىڭغا بۇنىڭدىن باشقا ئامالمۇ يوق ئىدى.ئۇنىڭ يېتىۋېرىپ بەل-بېقىنلىرى تېشىلىپ كېتەيلا دېدى،ھەر تەرەپتىن كېلىۋاتقان ئازاپ ئۇنى بەكمۇ قىينايتتى،ئۇنى يوقلايدىغانلاردىن ھازىر ئەرلەرلا قالدى،بۇلارنىڭ بىر قىسىملىرى ئۇنىڭ يېققىن ئەل-ئاغىنىلىرى بولسا بىر قىسىملىرى كەنتنىڭ،ئەترەتنىڭ كالتە-كۇستاڭ باشلىقلىرى ئىدى.جەمىلە بەزىدە ئۇلارنى ئۇزۇتىپ چىقىپ ھەيەل بولۇپ قالاتتى،بولۇپمۇ كەنت رەھبىرىنى ئۇزۇتۇپ چىققاندا ئۇزۇندىراق كىرىدىغان بولىۋالدى. ۋە كىرىپلا ئەنساردىن سورىمىسىمۇ :
_ مەن سېنىڭ ئەھۋالىڭ ھەققىدە پاراڭلاشتىم،كەنتنىڭ بىزگە ياردەم قىلىدىغان بولدى،خاتىرجەم بول ئۇلار ياردەم قىلسىلا ياخشى بولۇپ كېتىسەن..._ دەپ سۆزلەپلا كېتەتتى.
بىراق ئەنساردىن ئايالىنىڭ يېققىندىن بۇيان ئۆزىنى تۈزۈشتۈرۈپ يۈرىدىغان،ھەتتا ئانچە-مۇنچە گىرىممۇ قىلىدىغان بولىۋالغانلقىنى ھېس قىلغان ئىدى. بۇ ھەقىقەتەن ئۇنى ئەجەبلەندۈرمەي قويمىدى،چۈنكى ئەنساردىن دوختۇردىن ئېلىپ چىقىلغان دەسلەپكى نەچچە ئاي ئىچىدە ئايالىنىڭ ئۆي ئىشلىرى ۋە كېسەل كۈتۈش بىلەن بولۇپ كېتىپ ئۆزىگە ئانچە ئېتبار بەرمەيۋاتقانلىقىنى ھېس قىلغانىدى.
بىر كۈنى ئۇ چالا ئۇيقۇ ھالەتتە ياتاتتى،كىمدۇر بىرىنىڭ ئۆيگە كىرىپ ئايالىدىن ئۆزىنىڭ ئەھۋالىنى سورىغانلىقىنى خۇددى چۈشىدە ئاڭلىغاندەك ناھايتىمۇ سۇس ئاڭلىدى،ئۇلار بىردەم ھال-مۇڭ قىلىشقان بولدى،ۋە بىردەمدىن كېيىنلا تاشقىرقى ئۆيگە چىقىپ كېتىشتى،ئەنساردىن بۇ چاغدا خېلىلا سەگەكلىشىپ قالغان بولۇپ ئۇلارنىڭ ئاۋازىغا قۇلاق سالدى.
ئۇلار تۇرۇپلا پىخلداپ كۈلشسە،تۇرۇپلا كالتە-كۇستاڭ چاخچاقلارنى قىلىشپ پىچىرلىشاتتى،ئايالىنىڭ نازلىق كۈلكىلىرى ئەنساردىنغا ئېنىق ئاڭلىناتتى،ئۇلارنىڭ پىچىرلاش ۋە پىخىلداشلىرى ئەنساردىننىڭ جان-جېنىدىن ئۆتۈپ كەتتى.ئۇ ئاغرىق ئازابىدىمۇ بۇنچىلىك ئازاپلىنىپ كەتمىگەن ئىدى،ئۇ چىشىنى چىشلەپ جىمجىت يېتىپ باقماقچىمۇ بولدى،بىراق ئەرلىك غۇرۇرى بۇنىڭغا بوي سۇنمىدى شۇڭا ئۇ ئاۋازىنى چىقىرىپ قاتتىق بىر يۆتەلدى. بۇ ئاۋازدىن چۆچىگەن ئىككەيلەننىڭ پىخلداشلىرى بىردىنلا توختاپ قالدى. ئايالى دەرھال ئەنساردىننىڭ يېنىغا يۈگۈرۈپ كىردى ۋە كىرىپلا:
_ نېمە بولدى؟قورسىقىڭ ئاچتىمۇ؟نېمە تاماق يەيسەن؟ _ دەپ قۇشقاچ تىللىرى چىقىپ كەتتى .
_ نېمە قىلىۋاتىسەن؟تاشقىردا كىم بار؟
ئەنساردىننىڭ ئاۋازى بوغۇلۇپ دېگۈدەك چىقتى،ئۇنىڭ ئايالى ئەنساردىننى ھېچنىمىنى بىلمەيدۇ دەپ ئويلىغان ئىدى.شۇڭلاشقىمۇ ئۇ ئەنساردىننىڭ سۇئالىدىن بىرئاز تەڭقىسلىقتا قالدى بولغاي كېكەچلەپلا قالدى:
_ تاشقىردا ھېچ...ھېچ ھېچكىم يوق،مەن ئاشخانىغا چىقىپ كىرگەن_ دىيەلىدى تەسلىكتە.
_ شۇنداقمۇ؟ئەمىسە يېنىمدا ئولتا خوتۇن..._ دېدى ئەنساردىن بوش ئاۋازدا _ بىلىمەن خوتۇن،سەن بۇ كۈنلەدە بەك جاپا تارتىپ كېتىۋاتىسەن،مەن ساڭا ئېغىرچىلىقىمنى سەپ قويدۇم،خۇدا بۇيرۇپ ساقىيىپ قالسام سېنى ئوبدان رازى قىلىمەن...
_ بولدى،بولدى ئەمدى بۇنداق گەپلەرنى قىلما،سەن ساقىيىپ قالساڭلا مەن رازى...
ئۇلارنىڭ سۆھبىتى قىسقىلا داۋاملاشتى، چۈنكى ئەنساردىن بۇ خىل مەزمۇندىكى گەپنى ئايالىغا كۆپ قېتىم ئېيتقان ئىدى.ئايالى تاماق قىلىش ئۈچۈن چىقىپ كەتتى،ئەنساردىن ئايالىنىڭ كەيپىياتىدىن يەنە غەشلىككە چۆمدى.
ئۇنىڭ ئايالى ھەقىقەتەن ئۇنىڭدىن زېرىككەن ئىدى.
ئەنساردىننىڭ ئېغىر كۈنلىرى داۋاملاشماقتا ، ۋاقىت ئۇزارغانسېرى ئۇنى يوقلايدىغانلارنىڭ ،ئۇنىڭ بىلەن مۇڭدىشىدىغانلارنىڭ ئايىقى ئۈزۈۈلۈپ قېلىۋاتاتتى ،ئۇ يېتىۋېرىپ بەكمۇ زېرىككەن ئىدى،دەل شۇ كۈنلەردە ئۇنىڭ شەھەردىكى سودىگەر دوستلىرىدىن ئەكبەر ئۇنى يوقلاپ چىقتى،.ئەكبەر ئىلگىرى ئۇنى دوختۇرخانىدا ياتقان ۋاقىتلاردا پات-پات يوقلىغان بولسىمۇ لېكىن تاغقا ئېلىپ چىقىلغاندىن كېيىن ئۇنى بىرەر قېتىممۇ يوقلاپ چىقالمىغان ئىدى،شۇڭلاشقىمۇ ئەنساردىن بەكلا خۇش بولۇپ كەتكەن ئىدى .
_ قانداق ئەھۋالىڭ؟ بۇرادەر، بەل- بېقىنلىرىڭنىڭ ئاغرىقى ياخشىلاندىمۇ؟
_ قانداق بولاتتى،دوستۇم شۇ خۇدادىن شىپالىق تىلەپ،خوتۇننى جاپاغا سېلىپ قويۇپ ياتتىم،خۇدا بۇيرىسا ساقىيىپمۇ قالۇرمەن.
ئۇلار بىردەم ھال-مۇڭ قىلىشتى،ئۇنىڭغىچە جەمىلە ئوخشۇتۇپ لەغمەن ئېتىپ كىردى،تاماقلىرىنى يىيىشىپ بولۇپ يەنە كونا پاراڭلارغا چۈشۈپ كەتتى،ئەكبەر بۇ كېچىسى ئەنساردىن بىلەن مۇڭدۇشۇپ ئۇلارنىڭ ئۆيىدە قونۇپ قالدى. ۋە ئەتىسى ئەنساردىن ئويغانماستىلا كېتىپ قالدى.
_ئەكبەر قېنى؟_ دەپ سورىدى ئۇ ئايالىدىن.
-مۇھىم سودا ئىشى بار ئىدى دەپ ئەتتىگەندىلا مېڭىپ كەتتىغۇ_دېدى ئايالى.
_ نېمىشقا مېنى ئويغۇتۇپ قويمايسەن؟ _كايىدى ئەنساردىن.
_ قارىسام بەكمۇ تاتلىق ئۇخلاپ كېتىپسەن،ئۇنىڭ ئۈستىگە ئەسقەرمۇ سېنى ئويغىتىشقا ئۇنمىدى،مانا بۇ 500 يۈئەن پۇلنى قويۇپ-قويۇپ مېڭىپ كەتتى _دېدى.
_ ھەي ئىسىت ، ئۇنىڭ بىلەن خوشلىشۋالالماپتىمەن ئەمەسمۇ_ ئەنساردىن ئەپسۇسلانغادەك ئۇھسىراپ قويدى.
ئەنساردىن بىرقانچە كۈن ئەكبەرنىڭ پاراڭلىرىنى ھەزىم قىلىپ زېركىشلىرىنى بېسىپ تۇردى،ئەڭ يېققىن دوستى سۇلتانمۇ ھازىر سەل ئالدىراش بولۇپ قالغان ئىدى.ئەنساردىننىڭ دورىلىرىمۇ ئازلاپ قالدى،ئۇنى ئۇياق-بۇياققا ئۆرۈش،ۋە بەل- بېقىنلىرىنى ئۇۋىلاشلارمۇ ئازلاپ كەتتى،شۇنداقتىمۇ ئۇ ئۆزىنىڭ ھامان ساقىيىپ كېتىدىغانلىقىغا ئىشىنەتتى.بىرەر ھەپتە ئۆتكەندىن كېيىن ئەكبەر يەنە يوقلاپ چىقتى،ئۇ بۇ قېىتىم بەزى دورىلارنى ئېلىپ چىققان ئىدى. بۇنىڭدىن ئەنساردىن تولىمۇ خوش بولدى،ۋە شەھەردىكى دوستلىرىدىن تۇنجى بولۇپ ئەكبەردىن پەخىرلەندى.
ئەكبەر بۇ قېتىم چىقىپ ئىككى كۈن تۇردى.
تۇرمۇش ئۆز رېتىمىنى بۇزماستىن پېتى بىلەن كېتىۋاتاتتى،ئەنساردىننىڭ يېتىپ قالغىنىغىمۇ يېرىم يىلدىن ئاشتى،ئەمدى ئەكبەرنىڭ ئەنساردىننى يوقلىشى جىقلاپ قېلىۋاتاتتى.
ئەكبەر چىققان بىر كۈنى جەمىلە ئەنساردىننىڭ ئىچ كىيملىرىنى يۇيۇپ،قۇرۇتۇپ يېنىغا ئېلىپ كىرىپ قويۇپ ،تۇيۇقسىزلا يوقاپ كەتتى،ئەنساردىن ئوغلىدىن سورىدى،ئوغلى ئانىسىنىڭ سومكىسىنى ئېلىپ مەھەلە تەرەپكە كەتكەنلىكىنى ئېيتتى،كەچ كىردى،بىراق ئايالى قايتىپ كەلمىدى،ئەنساردىن ئوغلى بىلەن يېنىغىلا قويۇپ قويغان مانتىلاردىن يەپ كەچنىڭ غېمىنى قىلماقچى  بولدى ،بىراق  گېلىدىن تاماق ئۆتىدىغاندەك قىلمايتتى،ئەنساردىن ئايالىنى خېلى كەچكىچە ئۇخلىماي ساقلاپ باقتى ،لېكىن ئايالى قايتىپ كەلمىدى،ئۇ قاچاندۇر ئۇخلاپ قالدى.
ۋە كۈن نەيزە بويى ئۆرلىگەندىلا ئۇيقىدىن ئويغاندى،يېنىدىلا ئوماق ئوغلى تاتلىق ئۇخلاۋاتاتتى. بۇ كۈنمۇ،ئەتىسىمۇ ، ئۈگۈنىمۇ ئۇنىڭ ئايالى پەيدا بولمىدى،بۇ يىراق تاغلىقتا تېلفۇنمۇ تارتمايتتى،شۇڭا ئۇلاردا تېلفۇنمۇ يوق ئىدى،ئۆيىگە كەلگەن تونۇش بىلىشلىرىدىن سۈرۈشتە قىلىپ باقتى،لېكىن ئۇنىڭ ئايالى ھەققىدە بىلىدىغانلار چىقمىدى،شۇنداق قىلىپ ئۇلار خولۇم-خوشنىلار ئېلىپ كىرگەن تاماقلار بىلەن بىرقانچە كۈننى ئۆتكۈزدى،ئەنساردىننىڭ ئوغلى ئانىسىنىڭ جىدىلىنى قىلىپ،ئۇنىڭ بېشىنى ئاغرىتقىلى تۇردى ئەنساردىن ئوغلىنى ياشىنىپ قالغان ئاتا-ئانىلىرىنىڭ ئۆيىگە ئاپارغۇزۋەتتى-يۇ يالغۇزلۇقنىڭ دەردىنى تېخىمۇ قاتتىق تارتىشقا باشلىدى.ئۇ تۈرلۈك پەرەزلەرنى قىلىپ باقتى،ئەكبەرگە خېلىلا ئىشىنەتتى،شۇڭا ئۇ ئەكبەردىن گۇمانلىنىشنى ئۆزى ئۈچۈن گۇناھ ھېساپلايتتى،ئەپسۇس تولىمۇ ئەپسۇس بىرەر ھەپتە ئۆتكەندىن كېيىن مەھەلىدىكىلەردىن ئايالىنىڭ ئەكبەر بىلەن شەھەرگە كىرىپ كەتكەنلىكىنى ئاڭلىدى،بۇ شۇم خەۋەر ئۇنى خۇددى جۇدۇندىكى ياپراقتەك تىترىتىپ،ئوتتىكى قىلدەك تولغاندۇردى،ئۆكسۈدى،قاتتىق ئۆكسۈدى،ئۆزىنىڭ بېشىغا كېلىۋاتقان قىسمەتلەردىن زارلاندى...
بىر كۈنى ئۇنىڭ ئوتتۇرا مەكتەپتە بىللە ئوقۇغان،خوشنا مەھەلىدىكى ساۋقدىشى سەلىمە خۇددى ئاسماندىن چۈشكەندەكلا پەيدا بولدى.
ئەنساردىننىڭ يالغۇزلۇقتا سۈرۈۋاتقان خىيالىنى ئىشىكنىڭ غىچىرلاپ ئېچىلىشى بۇزدى،ئۇنىڭ يېنىغا ئاددى،ئەمما يارىشىملىق كىيىنگەن،چېھرىدىن ئىللىق تەبەسسۇم يېغىپ تۇرغان سەلىمە كىرگەن ئىدى.
_ قانداق ئەھۋالىڭ،ئۇزۇندىن بۇيان سېنى ھادىسىگە ئۇچراپ يېتىپ قالدى دەپ ئاڭلىغان بولساممۇ يوقلاپ كېلەلمدىم.سەۋبىنى ئۆزۈڭ بىلىسەن...

_ پاھ،قانداق شامال ئۇچۇرۇپ كەلدى سېنى،بېشىڭدىن ياغاچ ئوشتاي دېسەم ھالىم مۇشۇ.._ دىيەلدى كۆڭلى يېرىم بولغان ھالدا.
_ بولدى تەۋرىمە،مەن مەھەلىدىكىلەردىن سېنىڭ يالغۇز قالغانلىقىڭنى ئاڭلاپ كېلىشىم،قانداق كەلگىنىم بولماپتىمۇ يا؟_ سەلىمە شەيتانلىق بىلەن كۈلۈپ قويدى.

_ كەلگىنىڭدىن خوشمەن سەلىمە،بىراق ئالدىڭدا بەك خىجىلمەن،
_ بولدى،ئۇنداق گەپلەرنى قوي،مەن ئەمدى سېنىڭ ئۈچۈن يۈزۈمنى قېلىن قىلىپ كەلدىم،ھالىڭدىن ئازراق بولسىمۇ خەۋەر ئېلىشقا يارايمەن.
ئەنساردىننىڭ يۈزلىرى ئوت بولدى،يۈرىكىنى قانداقتۇر بىر قۇرۇت غاجىلاۋاتقاندەك ھېس قىلدى،چۈنكى سەلىمە ئەنساردىننى ئوتتۇرا مەكتەپتىن تارتىپلا ياخشى كۆرۈپ كەلگەن بولۇپ،ھەتتا ‹‹ئەنساردىنغا تەگمىسەم مەڭگۈ توي قىلمايمەن›› دەپ،ئەقىدىسىنى ئۆزىگە نېسىپ بولمىغان ئەنساردىنگە ئاتىۋەتكەن قىز ئىدى.
شۇنىڭدىن تارتىپ سەلىمە ئەنساردىننىڭ ھالىدىن خەۋەر ئېلىشقا باشلىدى،دەسلەپ سەلىمانىڭ ئاتا-ئانىسى ۋە قېرىنداش،دوست-بۇرادەر، خولۇم خوشنىلىرى ئۇنى ئەيىپلەپمۇ باقتى ،بىراق سەلىمە ئەنساردىننىڭ ئەھۋالىنىڭ ئىنتايىن ئېغىرلىقىنى ئېيتىپ ئۇلارنى ئازراق بولسىمۇ قايىل قىلدى.
سەلىمە ئەنساردىننىڭ تامقلىرىنى ئېتىپ بېرىشتىن سىرت يەنە ئۇنى ئۇايق-بۇياققا ئۆرۈش ۋە بەدەنلىرىنى سۈرتۈپ ئۇۋىلاش قاتارلىق ئىشلار بىلەن ئۇنىڭ ھالىدىن ناھايتى ياخشى خەۋە ئالدى،ئەنساردىننىڭ ئاتا-ئانىسىمۇ سەلىمەنىڭ بۇ ئىشلىرىنى توغرا چۈشەندى،ۋە ئوغلىنى ئېلىپ كېلىپ دادىسىنى كۆرسۈتىپ تۇردى. سەلىمەنىڭ پەرۋىشى ئەنساردىننى خېلىلا ياخشى قىلىپ قويدى،گەرچە ئەنساردىن جىسمانى جەھەتتە تولۇق ياخشى بولۇپ كېتەلمىگەن بولسىمۇ،لېكىن روھى جەھەتتە خېلى ياخشى بولۇپ قالدى.بىر كۈنى سۇلتان ئەنساردىننىڭ يېنىغا كىردى،ۋە ئۇنىڭغا بىر خۇش خەۋەرنى يەتكۈزدى:
_ ساڭا بىر خۇش خەۋەر،ئۈرۈمچىگە چەتئەلدىن داڭلىق سۆڭەك دوختۇرلىرى كەپتۇ،ئۇلار قىيىنچىلىقى بار كېسەللەرنى ھەقسىز ئوپراتسىيە قىلىدىكەن،مەن سېنى شۇ يەرگە ئېلىپ چىقايمىكىن دەپ ئويلاۋاتىمەن،سەنچە قانداق بولۇر؟
_ مەنغۇ ساقىيىشنى ئويلىسام ئوتتەك چىققۇم بار،بىراق مەن ئۇ يەرگە چىقسام،ئىقتىساد ۋە باشقا تەرەپلەردىن قىينىلىپ قالارمەنمىكىن؟
_ مەن دېدىمغۇ،ئۇ دوختۇرلار ھەقسىز ئوپراتسىيە قىلىدىكەن،ئۇ يەرگە ئېلىپ- چىقىش ۋە رەسمىيەتلەرگە مەن بار،خاتىرجەم بول _دېدى سۇلتان ئۇنىڭغا تەسەللى بېرىپ.
_ ھالىمدىن كىم خەۋەر ئالاركىن دەپ غەم يەپ كەتمە ،مەنمۇ چىقىمەن_ دېدى سەلىمەمۇ بۇ خۇش خەۋەردىن روھلىنىپ.
شۇنداق قىلىپ ئۇلار سەپەر تەييارلىقلىرىنى قىلىپ،ئاتا-ئانىسى بىلەن خوشلۇشۇپ ئۈرۈمچىگە چىقىپ كەتتى.
ئەنساردىننىڭ تەلىيى باركەن،ئۇلار ئۈرۈمچىگە چىقىپ ئۇزۇن ئۆتمەيلا ئوپراتسىيە نۆۋىتىگە ئېرىشتى ۋە ئوپراتسىيىمۇ ئوڭۇشلۇق بولۇپ،بىرەر ھەپتە تۇرغاندىن كېيىن يۇرتقا قايتىپ كەلدى،بۇ جەرياندا سەلىمە ئىزچىل ھالدا ئەنساردىننىڭ ھالىدىن خەۋەر ئالدى،ئوپراتسىيە قىلىپ بىرەر ئاي ئۆتكەندىن كېيىن ئەنساردىن پۇتلىرىنى ئازراق كۆتۈرەلەيدىغان ۋە ئۇياق-بۇياققا ئۆرۈلەلەيدىغان بولدى،ۋە ئاستا-ئاستا ئورنىدىن تۇرۇپ ھەركەت قىلىشنىمۇ ئۈگەندى،سەلىمە ئۇنىڭغا يېققىندىن ماسلاشتى.مۇشۇ چاغقىچە جەمىلە بىرەر قېتىممۇ ئۇنىڭ يېنىغا كېلىپ قويمىدى،بەلكى ئۇنىڭ ساقىيىپ كېتىشىگە كۆزى يەتمىگەن بولسا كېرەك.
شۇنداق قىلىپ قۇدرەتلىك تەڭرى بۇ بەندىسىنى بىر مەزگىللىك سىناقلاردىن كېيىن ئورنىدىن تۇرۇپ ماڭالايدىغان،ھەركەت قىلالايدىغان ھالىتىگە قايتۇردى،بۇنىڭدىن ئەنساردىنلا ئەمەس،ئوغلى،سەلىمە،سۇلتان ،ئاتا-ئانىىسى ۋە يۇرت مەھەلە خۇش ئىدى.
ئۇ ساقىيىپ ئىككى ئاي ئۆتكەندىن كېيىن ئۇنىڭ ئايالى جەمىلە تۇيۇقسىزلا پەيدا بولدى،ۋە كۆز ياشلىرىنى تۆكۈپ ئۆزىنىڭ پۇشايمىنىنى ئېيتىپ ئۆزىنى بىر قېتىم كەچۈرۈشنى ئۈمىد قىلىپ تۇرىۋالدى،ئەنساردىن ئوغلىنى يتىم قىلماسلىقنى ئويلاپ ئۇنى كەچۈرمەكچىمۇ بولدى،لېكىن ئۇنىڭ قىلغان ئەتكەنلىرىنى بىر-بىر ئويلاپ غۇرۇرىنىڭ يەنە قايتا دەپسەندە بولۇشىنى خالىمىدى بولغاي ئۇنى كەچۈرۈشنى راۋا كۆرمىدى،ئۇنىڭ ئۈستىگە سەلىمەنىڭ سىماسى ئۇنىڭ كۆز ئالدىدا زاھىر بولۇپ،ئۇنىڭغا قانداقتۇر سۇئاللارنى قويىۋاتقاندەك ھېس قىلاتتى.
ئۇنىڭ كۆڭۈل قەسىرىدە زىدىيەت كۈچىيىپ كەتتى،ئالدىدا قار-يامغۇر بولۇپ پۇشايمان ياشلىرىنى تۆكۈۋاتقان چىن مۇھەببىتىنىڭ مىۋىسى بولغان ئوغلىنىڭ ئانىسى،بىراق ئۇ‹‹ئەنساردىننى تاشلاپ قېچىپ كېىتپتۇ›› دېگەن نام بىلەن پۈتۈن يۇرتتا ئەنساردىننىڭ يۈزىنى تۆكۈپ بولغان.
قەلب تۆرىدە بولسا ئۆزىنىڭ ئېغىر كۈنلىرىدە ھالىدىن خەۋەر ئېلىپ مۇشۇنچىلىك ھالەتكە كەلتۈرگەن پاك،ساددا ئەمما،ئەقىدىسى جۇلالىنىپ تۇرىدىغان قىز.ئەنساردىن قەلبىگە ئىجازەت بېرىپ ئاخىرىقى ھۆكۈمنى چىقاردى.ئۇ ساقايغاندىن كېيىن يەنە سۇلتان بىلەن سودىسىنى داۋاملاشتۇردى،ھەتتا سودىسىنىڭ يولى كېڭىيىپ ئىچكىرى ئۆلكىلەردىكى شەھەرلەرگىمۇ بارىدىغان بولدى.مانا ئۇ بۈگۈن سۇلتاننىڭ تېلفۇنى بىلەن شېنجىنغا ماڭدى.
ئەنساردىن تەگسىز خىيالاردىن قايتىپ،ئۈچ كىشىلىك قاتتىق ئورۇندۇقتا يېتىپ ئاستا-ئاستا ئۇيقۇغا كەتتى...
تۈگىدى.
2011-يىل  15-ماي
  تورداشلىرىمنىڭ  ۋاقتى يار  بەرسە  تەنقىدى  پىكىرلەرنى  ئايىماي  بېرىشىنى  ئۈمىد  قىلىمەن.دوستانە  پىكىر  ئەڭ  ياخشى  ياردەم...

ھەقىقەتەن ياخشى يېزىلىپتۇ !    بەك ياخشى چىقىپتۇ ````    كەسپىڭىزگە ئۇتۇق تىلەيمەن ،ياقۇپ مۇئەللىم !`````

    ھېكايىڭىزنىڭ ۋەقەلىكى،تەرەققىياتى، ئوخشىتشلار ،مۇھىمى تۇرمۇشقا بەك يېقىنلاشقانلىقى قەلەم كۈچىڭىزنىڭ تېخىمۇ ۋايىغا يىتىۋاتقانلىقىنى ھېس قىلدۇردى.
    ئەنساردىننىڭ  سودىسى،بەخىتلىك ئائىلىسى،كۆز تەككەندەكلا كېلىشمەسلىككە ئۇچراپ بەل-پۇتلىرىنىڭ سۇنۇپ ئۇزۇن مەزگىل ئورۇن تۇتۇپ يېتىپ قېلىشى،ئۆمۈرلۈك ھەمرىيى  سانالغان ئايالى،ئوماق ئوغلىنىڭ ئانىسى جەمىلەنىڭ ئېغىر كۈنلەردە ئۇنىڭدىن يۈز ئۆرۈپ ئاغىنىسى بىلەن قېچىپ كېتىشى ،ساۋاقدىشى سەلىمەنىڭ پەيدا بولىشى،ياخشى كۈتۈشى...داۋالىنىپ  سالامەتلىكىنىڭ ئەسلىگە  كېلىشى،سودىغا قايتا كىرىشىپ سودىسىنىڭ روناق تېپىشى،جەمىلەنىڭ قايتا پەيدا بولىشى قاتارلىق ۋەقەلىكلەر ئارقىلىق نۆۋەتتىكى تۇرمۇشىمىزدا كۆرىلىۋاتقان ئائىلە،دوستلۇق،مېھرى-مۇھاببەتلەردىكى كۆڭۈل غەشلىكى بىلەن ئىللىقلىق،جاپا-مۇشاقەتكە چىداش بىلەن راھەت-پاراغەتكە بېرىلىش،خىيانەت بىلەن سەمىمىيەت ئىخچام ،ياخشى يورۇتۇپ بېرىلىپتۇ......
داۋاملىق نادىر ئەسەرلەرنى روياپقا چىقىرىڭ.....

    مۇشۇنداق  ياخشى  يېزىلغان  تېمىلارغا   پىكىر  ئىنكاس  يوق  ،   ئۆزىنىڭ  نېنىنى  يەپ  چەتئەللىكنىڭ   غېمىنى  يەيدىغان  تېمىلاردىكى  تالاش  تارتىشلارنى  كۆرۈڭ  .  

  ئۇيغانغان زىمىن ئەپەندى ئەمدى قىشلىق ئۇيقۇدىن ئۇيغۇنۇپسىز-دە  ،ھەمىمىزنى داۋاملىق مۇشۇنداق يۈرەكنى چىكىدىغان نادىر ئەسەرلىرىڭىز بىلەن پات-پات تەمىنلەپ تۇرىشىڭىزنى  ئۆمۈد قىلىمەن . بولمىسا ئاشۇ ئالماس قەلىمىڭىزنى بىزلەرگە ئارىيەتكە بىرىپ تۇرۇڭ.

   سىزنىڭ مۇشۇنداق ئىيسىل ئەسەرلىرىڭىزگە مۇھتاجمىز.

ئىشلىتىش

بۇ مەزمۇن 6قەۋەتتىكى anwarkapakدە2011-05-17 14:03يوللىغان يازمىسىغا نەقىل :
  ئۇيغانغان زىمىن ئەپەندى ئەمدى قىشلىق ئۇيقۇدىن ئۇيغۇنۇپسىز-دە  ،ھەمىمىزنى داۋاملىق مۇشۇنداق يۈرەكنى چىكىدىغان نادىر ئەسەرلىرىڭىز بىلەن پات-پات تەمىنلەپ تۇرىشىڭىزنى  ئۆمۈد قىلىمەن . بولمىسا ئاشۇ ئالماس قەلىمىڭىزنى بىزلەرگە ئارىيەتكە بىرىپ تۇرۇڭ.

 

كەينىدە يەنە نۇرغۇن ۋەقەلىكلەر بولىدىغاندەك قىلىپ ،شاپلا قىلىپ تۈگەپ قالدىغۇ ؟؟ ماڭا خۇددى ئۇزۇن بىر ھېكايە تېخى ئەمدىلا باشلانغاندەك تۇيۇلغان .داۋامى بارمۇ ؟

ئىشلىتىش

بۇ مەزمۇن 9قەۋەتتىكى بارخاندە2011-05-17 18:01يوللىغان يازمىسىغا نەقىل :
كەينىدە يەنە نۇرغۇن ۋەقەلىكلەر بولىدىغاندەك قىلىپ ،شاپلا قىلىپ تۈگەپ قالدىغۇ ؟؟ ماڭا خۇددى ئۇزۇن بىر ھېكايە تېخى ئەمدىلا باشلانغاندەك تۇيۇلغان .داۋامى بارمۇ ؟

رەھمەت  سىزگە،  قېرىندىشىم،سىزنى شۇنداق تۇيغۇغا  كەلتۈرەلىگەن  بولسا،ھېكايە  ئاخىرلاشتى،ئوقۇرمەنلىرىمنى يەكۈن چىقىرىشىغا  قالدۇردۇم.