ئەسلىگە قايتىش
پاكلانماق بولغاندەك گۇناھكار جىسمىم ،
يامغۇرغا چېلىنىپ تۇرار دۇقمۇشتا
سايەم يوق ئەندىكىپ قالغاچقا ئايسىز ،
«ئاھ تەڭرىم!» دەۋەتتىم ئۆزەممۇ بىلمەي
مىڭ شۈكرى بار ئىكەن خۇدا يادىمدا
زەرداپقا چىلانغان يۈرەك - باغرىمدىن
ئاڭلىنار بىر سۈرەن «دەھشەتلىك » ھۇررا !
بولدى بەس ، ياراشماس ماڭا ئاسىيلىق
ئاسىيلىق تۈپەيلى بىر ئوبدان دۇنيا ،
ئۇنتۇغان خۇدانى ، نېمە ئۇ خۇدا ؟!
كاچاتلاپ مەڭزىمنى جۇدۇننىڭ قولى
سەگىتمەك بولدىمۇ مېنى خىيالدىن
قۇتۇلماق سەۋەبى مۇدھىش قامالدىن
تەمتىرەپ يىقىلىپ « ئانا!» دەۋەتتىم
ئاھ خۇدا ، بار ئىكەن ئانام يادىمدا
مازاردىن ئاڭلىدىم مۈشۈك يىغىسى
ھەقىقىي ئازاپتەك شۇنچىلىك تەبىئىي
يىغلىغۇم بار مېنىڭ بوزلاپ سەمىمىي
ۋە گۆدەك ، گۇناھسىز ئاسلاندەك سەبىي
يارالغۇم كەلمەكتە قايتىدىن بۈگۈن ....
مەنبە : قەلەم