سەن يىغلاۋاتاتتىڭ ! شۇنداق ئوماق ، ئاجايىپ شوخ قىز ئىدىڭ!كۈلۈشكىلا يارالغاندەك ئىدىڭ . نېمە بولدى دوستۇم ساڭا! يىغلاۋاتىسەن!، يىغلاپ ،  ئېسەدەپ گىپىڭنىمۇ قاملاشتۇرالمايۋاتىسەن . يىغاڭ يۈرىكىمنى ئىزىپ ، مېنىمۇ يىغلاتتى . ساڭا نېمىدەپ تەسەللى بېرىشنى بىلمەيۋاتاتتىم ، چۈنكى سەن بىز بىر توپ قىزلارنىڭ ‹‹مۇھەببەت يارىمىز››نىڭ ئەڭ داۋالىق مەلھىمى ئىدىڭ ! بىزنىڭ يىغىلىرىمىزنىڭ ئاخىرىنى كۈلكە بىلەن چىقىراتتىڭ . قىزىقچىلىق قىلىپ ، بىردەم بولسىمۇ شۇ كۆڭۈلسىزلىكلەرنى ئۇنتۇلدۇراتتىڭ . كەيپىياتىمىز تۇراقلاشقاندا ، ئاندىن رەت قىلىپ بولماس تەكلىپلەرنى بېرەتتىڭ ، سىنىڭ تەكلىپىڭ بىلەن ئىش كۆرۈپ ، زىيان تارتىپ باقمىغان ئىدۇق . يىگىتلىرىمىزمۇ بىرەر ئىشقا مەسلىھەت بېرەلمەي قالسا‹‹زۇلپىيەدىن سوراپ باقە؟نېمە دەيدىكىن! ›› دەيتتى .
    شۇنداق ، تولىمۇ سوغۇققان ، ئەقىللىق قىز ئىدىڭ ! سەن بار يەر كۈلكە بار يەر ، سەن بار يەر ئىللىقلىق بار يەر ئىدى . لېكىن ، بۈگۈن سەن يىغلاۋاتاتتىڭ ..
بۇرۇنقى يىگىتىڭ سىنى شۇنچىلىك ياخشى كۆرەتتى ، ئۇنىڭ ساڭا بولغان مۇھەببىتىگە قاراپ بىز ھەۋەس قىلاتتۇق‹‹مۇشۇ دوستىمىز مۇشۇ خىل مۇھەببەتكە لايىق . ئۇنىڭغا قانچىلىك قىلسا ئەرزىيدۇ›› دەپ ، يەنە ‹‹ئەجەبمۇ تەلەيلىك يىگىت ئىكەن ئاشۇ ئەركىن ، زۇلپىيەنى كەلتۈرۈۋالدى دېسە بىلەن››دەيتتى بەزىلەر .
سەن تولىمۇ ئەركە قىز ئىدىڭ ، تېخى مۇشۇ تەتىلدە ، داداڭنىڭ قۇچىقىدا ئولتۇرۇپ تاماق يېگىنىڭنى ، ئاپاڭنىڭ سېنىڭ كۆزۈڭگە تەلمۈرۈپ تۇرۇپ ‹‹نېمە قىلىپ بېرەي قىزىم!›› دېيىشلىرىنى كۆرۈپ ، سەندىكى ئىشەنچ ، خۇشاللىق ، شوخلۇق ، كۈلكە......لەرنىڭ مەنبەسىنى تېخىمۇ ئېنىق چۈشەنگەن ئىدىم .
     بۇ يىلنىڭ بېشىدا سەن يىگىتىڭدىن ئايرىلىپ كەتتىڭ ، بىزنى ھەيران قالدۇرۇپ شۇ قارارنى چىقاردىڭ ، بىچارە يىگىتىڭمۇ ، بىزمۇ سېنىڭ سەن ئىكەنلىكىڭگە ، ھېلىقى جۈرئەتلىك زۇلپىيە ئىكەنلىكىڭگە ئىشىنىشكە ئامالسىز ئىدۇق . ‹‹ئاتا–ئانام قوشۇلمىغان توي ئىشىغا مەنمۇ قوشۇلمايمەن ، ئانام بىلەن دادامنىڭ بەخت تىلىشى بىلەن ئۆيدىن چىقمىسام ، كىيىنلىكىم ياخشى بولمايدۇ›› دەپ گەپنى تۈگەتتىڭ . سەن شۇنداق قىلدىڭ . ئاتا–ئاناڭ يىگىتىڭنى سودىگەركەن ، قىزىمىز مۇقىم تۇرمۇشتا ياشىسىكەن دەيمىز ، دەپ رەت قىلدى . شۇ چاغدىمۇ سەن بىزنىڭ ئالدىمىزدا يىغلىمىغان ،‹‹ سەن يىغلاشنىمۇ بىلەمسەن ، توشقىنىم ؟›› دېسەم ، كۈلۈپ تۇرۇپ ، ‹‹راست گەپ قىلسام ، ئەركىننىڭ ئالدىدا بىر يىغلاپلا ئىچىم بوشاپ قالدى ، ئۇنىڭ بىلەن دوست بوپقالسام بولىدىكەن ، ئاتا–ئانام ماڭا باقىۋەندە ئەمەس، ئۇلانى رازى قىلاي ›› دېدىڭ . شۇنداق قىلىپ سىلەر ئايرىلىپ كەتتىڭلار...........لېكىن ، ئۇ يەنىلا سەندىن ئۈمىدۋار ئىدى  .
      ‹‹بۇنداق يۈرسەم بولمىغۇدەك ، مېنى قوغلىشىۋاتقانلارنىڭ ئارىسىدىن ئىشەنچلىكرەك بىرىنى تاللاپ ، ئازراق چۈشىنىشىپ توي قىلسام ، ئاندىن مەنمۇ ، ئۇمۇ بەختلىك بولغىدەك ››  دېدىڭ . بىزمۇ سېنى قوللىدۇق ، چۈنكى سېنى قوغلىشىۋاتقانلار كۆپ ئىدى ، يەنە كېلىپ مەكتىپىمىزنىڭ ياش ئوقۇتقۇچىلىرىدىن بىرى ، ئېنىستىتۇتىمىزنىڭ كېلىشكەن يىگىتىدىن بىر–ئىككىسى ، يۇرتىمىزنىڭ بۇ يەردە قېلىپ ياخشى خىزمەت ئورۇنلىرىدا ئىشلەۋاتقان بالىلىرىدىن بىر نەچچىسى سېنى قوغلىشىۋاتقان ئىدى . سەن شۇلارنىڭ بىرىنى تاللىساڭ ، ئېنىقكى ، بەختىڭنى تاپاتتىڭ ، چۈنكى سەن باشقىلارنى بەختلىك قىلالايدىغان ھەم بەختكە ئېرىشىشكە سالاھىيىتىڭ توشىدىغان قىز ئىدىڭ ................ئەپسۇس ، سېنى قارا باستى دوستۇم!!
      سەن يىغلاۋاتىسەن ئوماق دوستۇم! ‹‹ئاشۇ چاغدا نېمىشقا سېنى تىللاپ بولسىمۇ توسمىغاندىمەن؟›› دەپ مەنمۇ يىغلاۋاتىمەن . سېنىڭ قارا باسقاندەك بىر ئىشقا يولۇققىنىڭغا مەنمۇ سەۋەبچىدەك ، ئۆزەمنى ئەيىبلەپ ئولتۇرىمەن . شۇ كۈنلەردە سەن بىر شىركەت ئېچىش خىيالى بار ، قەددى–قامىتى ناھايىتى ئادەتتىكىچە بىر يىگىت بىلەن يېقىنلىشىپ كەتتىڭ ، سەن بىلەن بىر قېتىم تاماققا بىللە چىققاندا ئۇنى كۆرۈپ ‹‹بىر يەرلىرى ھىيلىگەر ئىكەن بۇ بالىنىڭ ، بەك ئىش كۆرۈپ كەتكەندەك قىلىدۇ ، يەنە كېلىپ بەك چوڭ چىرايكەن ،(سەن ئوماق بالىلارغا بەك ئامراق ئىدىڭ) بولدى قىلە بۇ بالىنى...>> دېسەم ، كۈلۈپ كېتىپ ‹‹ئىچى يامان ، چىدىمايۋاتىسەن–ھە!››دەپ گەپنى باشقا ياققا بۇرىۋەتتىڭ .
       ئويلىمىغان ئىكەنمەن ، ئاشۇ بالا بىلەن يۈرۈپ قالدىڭ  ، ‹‹نېمىشقا؟›› دېگەن سوئالىمغا سەۋەب كۆرسىتەلمىدىڭ ..‹‹بىلمەيمەن ئاداش ، تۇيغۇم بۇ بالىنى ماڭا يېقىنلاشتۇرۇپ تۇرىدۇ ››دەيتتىڭ . ئۇنىڭ مۇقىم خىزمىتى يوق ئىدى ، ساڭا باشقا يىگىتلەر ۋاي دىگەندەك ۋاي دېمەيتتى ، كىنوخانىغا بېرىپ كىنو كۆرۈشكە شۇنچىلىك ئامراق ئىدىڭ  ، لېكىن ئۇنىڭدىن باشقىلار سېنى تەكلىپ قىلاتتى ، ئۇ بۇ قاتاردا يوق ئىدى . يولدا ھارۋىدىن ، يايمىچىلاردىن بىر نەرسىلەرنى ئازۇر–كۆپتۇر ئېلىپ ماڭاتتىڭ ، ‹‹بۇلارنى بىز ئازراق بىر نەرسىسىنى ئېلىپ بولسىمۇ قوللاپ قويايلى››دەيتتىڭ ، سېنى قوغلاشقانلار جېنىدا ، سەن بىلەن بىللە ماڭسا سەندىن گەپ سوراپ ، سېنى كۈلدۈرۈپ ھارمايتتى . لېكىن ، ئۇ ئۇنداق قىلمايتتى . سېنى تولا يىغلىتاتتى . سېنىڭ قىلىقلىرىڭ قىزبالا بولغان مېنىڭمۇ ئىچىمنى كۆيدۈرەتتى . لېكىن ئۇ بالا ئۇنداق ئەمەس ئىدى ، پەقەت ئاغزىدا گېپىلا بار ئىدى . سەن ئۇنىڭغا قىزىققاندىن كېيىنلا ساڭا ھەر خىل يوللار بىلەن ئازار بىرىشنى باشلىغان ئىدى . بۇ گەپلەرنى ماڭا دەيتتىڭ ، مەن باشقا دوستلىرىمىزغا دەيتتىم . شۇڭا ھېچكىم سېنى قوللىمايتتى . ئىككىڭلارنىڭ بىللە ماڭغىنىنى كۆرگەن دوستلىرىمىز يۈزۈڭدىن–يۈزۈڭگە ‹‹چوڭ بىر ئادەم بىلەن كېتىۋېتىپتىكەنسەن ،كىم ئۇ ؟ خېلى نەزەرىڭ ئۈستۈن ئىدى  ، نېمە بولدۇڭ؟ ئەركىن كۆرسىمۇ زاڭلىق قىلىدۇ جۇمۇ سېنى!›› دەيتتى . لېكىن ، سەن يەنىلا سەۋەبسىز ھالدا ئۇنىڭ بىلەن ئىدىڭ . ئىچىم سىقىلاتتى . سېنى ساراڭ بولدىمىكىن دەيتتىم .
        ئارىدا سەن ماڭا ئۇنىڭ ، ھېلىقى ساڭا تاتلىق گەپلىرى بىلەن ئۆزىنى ئالىيجانابلىقتا چېكىگە يەتكۈزگەن ئادەمنىڭ توي قىلماي تۇرۇپ تاپقان بىر قىزى بار ئىكەنلىكىنى دېدىڭ . بېشىمدا چاقماق چاقتى دوستۇم ! ئەجىبا سەن كۆرىدىغان كۈنمۇ بۇ؟؟ دېيىشىڭچە ، ئۇ باشقا يۇرتلۇق بىر قىز بىلەن توي خېتى ئالماي بىر ئۆيدە تۇرۇپ ، ئاندىن بالىلىق بولۇپ قالغان ئىكەن . بۇ ئىشلارنى ھېچكىم ئۇقمايدىكەن . بالا تۇغۇلغاندا ئاندىن ئۇ بالىنىڭ ئانىسى بىلىپ قېلىپ ، ھېلىقى قىزنى ئۆيىگە ئەكىتىپ بېقىۋېتىپتۇ . دېمەك ئۇ بىر بالىنىڭ دادىسى ئىكەن . مەيلى نىكاھسىز بولسۇن ، ئۇ يەنىلا بىر بالا ئىدى . ئۇ بۇ ئىشلارنى ساڭا شۇنچىلىك توغرا چۈشەندۈرگەن ئىدىكى ، ئۇ ھېلىقى قىزنى پەقەت ياخشى كۆرمەيمىش ، پەقەت بىردەملىك ئېزىقتۇرۇش بىلەن شۇنداق بوپقاپتىمىش ، ئىككىسى ئەزەلدىن توي قىلىشنى ئويلاپ باقماپتىكەن ، بالىنى ئالدۇرىۋېتىدىغان چاغدا پۇل يوق بوپقېلىپ ، تۇغۇلۇپ قاپتىكەن . ئۇ بالىنى سەن باقساڭ ، ئۇ قىزنى رازى قىلىپ يولغا سەپ قويارمىش.......توۋا قىلدىم ، ياخشى كۆرمىسە بالا نەدىن پەيدا بولىدۇ دوستۇم؟ ئۇلار ھايۋان ئەمەسقۇ؟....سەنمۇ دۆتمۇ شۇ گەپلەرگە ئىشىنىدىغان؟ شۇ رەسۋاچىلىقلارنى ساڭا بىز دېگەن بولساق ، ئاچچىقلاپ ، بېرىپ شۇ ئادەم بىلەن ئۇرۇشاتتىڭ ، لېكىن ، سەن بۇ گەپلەرنى ناھايىتى توغرا چۈشىنىپ دەۋاتاتتىڭ . سېنى ، سەندەك قەدرىنى ، ئىززىتىنى بىلمىگەن دۆت دوستۇمنى ئۇرغۇم بار ئىدى . لېكىن ، بۇرۇندىن تارتىپ تىكلىگەن ئابرويۇڭ بىلەن ئۇنداق قىلىشقا پېتىنالمايتتىم ، سەن يەنىلا شۇ زۇلپىيە ئىدىڭ ، پەقەت بەك تاتلىق يالغان گەپلەر ، بىردەملىك ھېسسىيات سېنى ئازدۇرىۋاتاتتى . سەن ئازغان ئىدىڭ ، ئۆزەڭگە ياراشمايدىغان دەرىجىدە ئازغان ئىدىڭ . سەن كىم ئىدىڭ ، كىملەر ئۈچۈن كىم بولىۋاتىسەن دوستۇم؟؟
     سەن ئۇ قىز توغرىلىق ئويلاپ باقتىڭمۇ دوستۇم ؟ نىكاھسىز ، توي خېتىسىز ، ئاتا–ئانىسىنىڭ خەۋىرىسىز بىر ئەر بىلەن بىر ئۆيدە تۇرۇپ ، بالا تۇغالىغىدەك دەرىجىگە بارغان قىزنىڭ ئاشۇ ئادەمنى سەندەك بىر ساددا قىزغا ئېرىشتۈرۈشىگە يول قويىدۇ دەپ ئويلىغانمىدىڭ ؟ سەن بىلەن بىز ئاتا–ئانىمىزنىڭ خەۋىرىسىز شەھەر ئاتلاپ چىقالامدۇق؟؟ ياق دوستۇم ، بىزنىڭ ھەر بىر قەدىمىمىزگە ئۇلار ئىگە ....ئۇنداق بولمىغاندىمۇ بىزدە نەدىمۇ بىر ئەر بىلەن توي قىلماي تۇرۇپ ، بىر ئۆيدە تۇرۇش جۈرئىتى بولسۇن؟؟ گۈلدەك ۋاقتىڭدا ، ‹‹ئۆگەي ئانا›› دېگەن نامنى ئېلىپ يۈرگۈڭ بارمۇ ؟ سەن شۇ نامغا لايىقمۇ؟بىر ئۆي دېگەندە ۋارقىراش–جارقىراش بولمامدۇ ؟ ئۆز بالاڭ بولغىنىدا ، نېمە دىسەڭ ھېچكىمگە غەلىتە بىلىنمەيدۇ . لېكىن ، ئۇ خەقنىڭ بالىسى ..ھېچنىمە دېيىش ھوقۇقۇڭ يوق . ياخشى تەربىيىلەنسىغۇ بىر گەپ ، لېكىن كىممۇ ھازىرلا ئۇنىڭ كەلگۈسىدە ياخشى بىر قىز بولۇپ تەربىيىلىنىشىگە كېپىل بولالايدۇ؟ يەنە كېلىپ تومۇرىدا شۇ قەدەر قورقماس، ‹‹باتۇر›› ئانىنىڭ قېنى ئېقىپ تۇرسا...............
       ‹‹ھېلىمۇ ئۆيدىكىلەرگە دېمىگەن ئىكەنمەن ، بولمىسا قانداق قىلار ئىدىم؟›› دەپ يىغلىدىڭ . شۇنداق ، سەن تېخى ئۇلارغا دېمىگەن ئىدىڭ ، لېكىن ئۇنى كۆڭلى خاتىرجەم بولسۇن دەپ ئۆيدىكىلەر قوشۇلدى دەپ قويغان ئىدىڭ . ‹‹ئۇنىڭغا بېسىم بولمىسۇن دەيمەن ، ۋاقتى كەلگەندە ئۆزەم قايىل قىلارمەن ئاپامنى›› دېگىنىڭدە ، مەن ‹‹ئۇنىڭ بىلەن توي قىلساق سەندەك دوستۇم يوق ، ئاپاڭغىمۇ دەيمەن ھەممە ئىشنى›› دېدىم ، بولدى دوستۇم ، ئەمدى يىغلىما ، سەن كۈلسەڭ بولىدۇ . ‹‹باشقىلار ئىككىمىزنىڭ بىللە ماڭغىنىنى كۆرگەن ، مەن جىق دوستلىرىمغا دېگەن ئىدىم...........›› قارا ، مېنىڭ يىشۇ دوستۇم ، بۇ باھانەڭنى!‹‹ياخشى گەپمۇ 3 كۈن ، يامان گەپمۇ 3 كۈن›› ، ماڭساڭ ، تۇرساڭ ، تاماق يېسەڭ نېمە بوپتۇ دوستۇم ؟ ۋىجدانىڭغا يۈز كېلەلمەيدىغان ئىشلار بولمىغان بولسىلا بولىدۇ. ھازىر خەقنىڭ گېپىدىن قورققىنىڭ بىلەن ، كېيىنكى تۇرمۇشنى ساڭا خەق ياشىشىپ بېرەلەمتى ! ئۇنىڭ دوستى بىلەن قىزىرىشىپ قاپسەن . ئۇ ساڭا ‹‹ئايالى بار ئادەمنىڭ كەينىگە كىرىۋېلىپ نېمە قىلاي دېگەن ؟›› دەپتۇ . يىغاڭمۇ شۇ سەۋەبتىن كۈچىيىپتۇ . كۆڭلۈڭگە كەلسىمۇ دەي دوستۇم . ساڭا بۇ ھەق بولدى . مانا مۇشۇنداق بىر زەربە بولمىغىچە ، سەن ھۇشۇڭنى تاپمايتتىڭ . ئەمدى بىلگەنسەن . ئۇ دوستىغا شۇنى پۇراتمىغان بولسا سېنى يۈرەكلىك ھالدا خەقنىڭ كەينىگە كىرىۋالغانغا چىقىرالامتى دوستۇم؟ مانا بۇ سەن ئىشەنگەن ئادەمنىڭ ساڭا كۆرسەتكىنى ..سېنى ئەركىننىڭ زارى تۇتتىمىكىن دەپمۇ ئويلاپ قالىمەن بەزىدە .
      ئەمدى يىغلىما دوستۇم ، ھاياتقا ، رىئاللىققا قايتقىن . كىملىكىڭنى ، ئۆزلۈكىڭنى تاپقىن ، ئەتراپىڭغا قارىغىن.....ئوقۇشۇڭ قانداق مۇھىم-ھە؟ كېلەر يىلى ماگستىر ئاسپرانتلىقنى پۈتتۈرىسەن ، ئوقۇش پۈتتۈرۈش ماقالەڭنى ياخشى ياز! بىزگە دوكتۇرلۇق ئوقۇيمەن دېگەن ئىدىڭغۇ ! ئوقۇ دوستۇم! سەندە بار زېھىن، سەندىكى ئۆتكۈرلۈك بىزدە بولسا بىزمۇ ئوقۇيتتۇق ! ئاتا–ئاناڭنى ئويلا ! ئۇلار يۈرەك پارىسىنىڭ تولىمۇ ئەرزىمەس بىرى ئۈچۈن ياش تۆكىۋاتقىنىنى بىلسە قانچىلىك ئازابلىنار–ھە؟
    ئوقۇشۇڭ تۈگىگەندە ساڭا تەلمۈرىۋاتقان ، سەن بىلەن ئوخشاش ئورۇندىكى ، بۇرۇن ئائىلە ، بالا تەمىنى تېتپ باقمىغان ، سەن بىلەن بىر ۋاقىتتا ئائىلە ھوزۇرىنى سۈرىدىغان ، سېنى ھاياتىدىكى تۇنجىسى ھەم ئاخىرقىسى قىلالايدىغان ، ئاللاھ  ئاتا قىلغان ئوماق پەرزەنتىڭلارنى تەڭ ئەركىلىتىپ ، تەڭ تەربىيىلەپ چوڭ قىلىدىغان بىر كۆڭلى پۈتۈن ، ئىمانى پۈتۈن ئەركەكنى تاللىغىن . باشقا قىزلارنى قىزىقتۇرىدىغان ، ساڭىلا قىزىقىدىغان ئاشۇ يىگىتلەرگە قارىغىن . نۇرغۇن كۆڭۈل ئاغرىقىنى تىلەپ تاپما جېنىم ، سەن بەكمۇ بەختلىك بولۇشۇڭ كېرەك ، سېنىڭ مۇشۇ يىغاڭ يىغىلىرىڭنىڭ خاتىمىسى بولۇپ قالغاي ئىلاھىم!
      يېشىڭنى سۈرتۈپ دىللارغا ئارام بېغىشلايدىغان ، بەكمۇ تاتلىق كۈلكەڭنى باشلا . ئۇ ئەمدى چىرايىڭدىن ئۆچمىسۇن ، ئاللا ساڭا ، بىز قىزلارغا بەخت ئاتا قىلسۇن ، لېكىن بۇ بەخت پۈتۈن بەخت بولسۇن! قولۇڭنى بەر! مەن ساڭا بۇرۇنقى پارلاق يولۇڭنى كۆرسىتىپ قوياي! ئەمدى قايما دوستۇم !ئازماس ئاللاھتۇر! بىر ئازدىڭ ، ھەرھالدا ۋاقتىدا ياندىڭ ، لېكىن ئەمدى ئازما جانىم! كەل !كۆز يېشىڭنى سۈرتۈپ قوياي! قارا ! قاپىقىڭ ئىششىپ ، بەك سەتلىشىپ كېتىپسەن، بۇرۇندىنغۇ سەت ئىدىڭ ئەمدى........ھە! ياخشى ، مانا مۇشۇنداق كۈلە جان دوستۇم! قارا چۈشلەرنى ئۇنۇت! سەن يەنىلا بىزنىڭ پەخرىمىز ، ئامراق دوستىمىزسەن!

بەزىدە ئادەمنى ئاشۇنداق قارا بېسپ قالىدۇ.بۇنداق چاغدا ھەر قانداق ئەقىللىق ئادەممۇ ئازمايمەن دىيەلمەيدىكەن.يازمىڭىز ياخىشى چىقىپتۇ.   

<كۈڭۈل ياتقان يەردە ئىت ياتماپتۇ>دەپ قايسى ئۇلۇقلىرىمىز ئېيىتقان بولغىدى ھە!

تەسىرلىك تەسۋىرلەر ئىكەن. مۇنداق قىسمەتلەر بولۇپ تۇرىدۇ.

قىز بالا  دىگەن  ئوقتا  توختىماي  پوختا توختاپتۇ  ،دىگەن  مۇشۇدە  ئۇ قىزنىڭ   بالدۇراق  ھۇشىنى  تېپپىلىشىنى  بەكمۇ ئۇمۇت  قىلىمەن.

ئەجەپ مىجەزى ماڭا ئوخشايدىغان قىزكەنغۇ بۇ؟ ئىلاھىم تەقدىرىم ئوخشاپ قالمىغىيىتتى.......
  ئۇنىڭغا يەنە چېكىنىشكە پۇرسەت بار ئىكەنغۇ، ئاللا ئۇنىڭغا تېخىمۇ كامىل ئەقىل ئاتا قىلغاي.....