ناخشا تېكىستىدىن ئۈچ پارچە
ئابدۇرېھىم ئابدۇراخمان
ئىلتىجا
سەن بىلەن تونۇشقان شۇ كۈندىن بۇيان،
يېنىڭدىن كېتەلمەي بولدۇم پەرۋانە.
تۇتاشقاچ يۈرەككە مۇھەببەت ئوتى،
قىينىلىپ بۇ جىنىم يۈردۈم سەرسانە.
ھەر كۈنى قىينايدۇ شۇ ئوتلۇق پىراق،
باغلانغاچ بۇ ئىشقىم ساڭىلا پەقەت.
ئەقىدەم مەڭگۈگە تەۋرەنمەس ئەسلا،
سېنىڭدىن باشقىنى سۆيمەسمەن ئەبەد.
كۆيگەچكە يۈرىكىم چىدىماي ئاخىر،
بىر ساڭا ئېيتقانتىم يۈرەك سۆزۈمنى.
سەن لېكىن يۈرىسەن پەرۋاسىز - بىغەم،
ئەجىبا بىلمەمسەن مېنىڭ كۆڭلۈمنى.
ئاخشىمى بارمايدۇ كۆزۈم ئۇيقۇغا،
كەچكىچە ياتالماي سېنىلا ئويلاپ.
كەتمىگەچ جامالىڭ كۆزۈم ئالدىدىن،
خىياللار سۈرىمەن يۇلتۇزغا قاراپ.
شۇ سەۋەب ئىلتىجا قىلاي سېنىڭدىن،
كۆڭلۈمنى چۈشەنگىن دەردىمگە يەتكىن.
ئوتۇڭدا كۆيدۈرۈپ ئازابقا سالماي،
يار بولۇپ مەڭگۈگە كۆڭلۈڭنى بەرگىن.
2000- يىلى ماي سېغىزكۆل
(2)
ئاشىقلىق
قۇندۇز دېسەم سۇمبۇل چېچىڭنى،
كۆزلىرىڭدۇر نۇر تۆككەن قۇياش.
ھارارىتى تۇرسا يېلىنجاپ،
يالقۇنىغا مۇمكىنمۇ چىداش.
باققىنىڭدا ماڭا تىكىلىپ،
ۋۇجۇدۇمنى كۆيدۈرىدۇ ئوت.
بىر سېھىر بار سەندە ئۆزگىچە،
پاك قەلبىمگە بولدۇڭ تەڭرىقۇت.
گەر يىنىمدا بولساڭ تەمتىرەپ،
ئالالمايمەن ئەركىنرەك نەپەس.
جىمغۇرلىشىپ قالدىم خېلىلا،
مەن بۇرۇنقى شوخ يېگىت ئەمەس.
2003- يىلى مارت شىنجاڭ ئۇنىۋېرسىتېتى
(3)
تويۇڭ بولغان كۈن
مەھەللىدە تويۇڭ بولغان كۈن،
يۈرىكىمنى ئۆرتىدى ھەسرەت.
بارالمىدىم كەچۈرگىن مېنى،
تەكلىپ قىلغان بولساڭمۇ كۆپ رەت.
مەھەللىدە تويۇڭ بولغان كۈن،
كېتىپ قالدىم يىراق - يىراققا،
بولالمىدىم شۇندىمۇ خۇشال،
چىدىيالماي ئوتلۇق پىراققا.
مەھەللىدە تويۇڭ بولغان كۈن،
يامغۇر بولۇپ تۆكۈلدى يېشىم.
كۆيگەنلىكىم ساڭا يۇشۇرۇن،
ھېچ ئېسىڭگە كىرمىدى بەلكىم.
2003- يىلى ماي شىنجاڭ ئۇنىۋېرسىتېتى
قوشۇمچە: ناخشىچى يولداشلارنىڭ بۇ تېكىستلەرگە مۇزىكا ئىشلەپ، نەشر قىلىشىگە قۇشۇلىمەن. لېكىن، ئاپتورغا چوقۇم ئۇقتۇرۇپ قويۇشى شەرت. يەنە 60 پارچىدەك تېكىست بار. ناخشا تېكىستىگە ئېھتىياجلىقلارنىڭ ئالاقىلىشىشىنى قارشى ئالىمەن.
يېڭى يازمىلىق سەھىپە 
ئادەتتىكى سەھىپە 
مەخپىي سەھىپە 