ﺋﯩﻤﺘﯩﻬﺎﻧﻐﺎ ﺗﯩﺰﯨﻤﻠﯩﺘﯩﺶ
2007- ﻳﯩﻠﻰ ﺋﻪﺩﻟﯩﻴﻪ ﺋﯩﻤﺘﯩﻬﺎﻧﯩﻐﺎ ﺗﻮﺭﺩﺍ ﺋﺎﻟﺪﯨﻦ ﺗﯩﺰﯨﻤﻼﺵ 6- ﺋﺎﻳﻨﯩﯔ 5-ﻛﯜﻧﯩﺪﯨﻦ 20-ﻛﯜﻧﯩﮕﯩﭽﻪ، ﺭﻩﺳﯩﻤﯩﻲ ﻳﯜﺯ ﺗﯘﺭﺍﻧﻪ ﺑﯧﻜﯩﺘﯩﺶ 7-ﺋﺎﻳﻨﯩﯔ 1- ﻛﯜﻧﯩﺪﯨﻦ 20- ﻛﯜﻧﯩﮕﯩﭽﻪ ﺑﻮﻟﺪﻯ. ﺋﺎﺩﻩﺗﺘﻪ ﻣﯘﺩﻩﺗﺘﯩﻦ ﺑﯘﺭﯗﻥ "ﺷﯩﻨﺠﺎﯓ ﮔﯧﺰﯨﺘﻰ" ﯞﻩ ﻫﻪﺭﻗﺎﻳﺴﻰ ﭼﻮﯓ ﻫﯚﻛﯜﻣﻪﺕ ﺗﻮﺭﻟﯩﺮﯨﺪﺍ ﺋﯧﻼﻥ ﻗﯩﻠﯩﻨﯩﺪﯗ. ﺋﻪﮔﻪﺭ ﺳﯩﺰ ﺗﻮﻟﯘﻕ ﻛﯘﺭﺱ ﺋﻮﻗﯘﺵ ﺗﺎﺭﯨﺨﯩﻐﺎ ﺋﯩﮕﻪ ﺑﻮﻟﺴﯩﯖﯩﺰ ﺩﯨﭙﻠﻮﻡ ﺑﯩﻠﻪﻥ ﻛﯩﻤﻠﯩﻜﻜﻪ ﺋﺎﺳﺎﺳﻪﻥ، ﻗﺎﻧﯘﻥ ﻣﻪﺧﺴﯘﺱ ﻛﯘﺭﺱ ﺋﻮﻗﯘﺵ ﺗﺎﺭﯨﺨﯩﻐﺎ ﺋﯩﮕﻪ ﺑﻮﻟﺴﯩﯖﯩﺰ ﻳﯘﻗﯩﺮﯨﻘﯩﻼﺭﺩﯨﻦ ﺑﺎﺷﻘﺎ ﻧﻮﭘﯘﺱ ﺩﻩﭘﺘﯩﺮﯨﻨﯩﻤﯘ ﻗﻮﺷﯘﭖ ﺋﯧﻠﯩﭗ ﺷﯘ ﯞﯨﻼﻳﻪﺕ (ﯞﯨﻼﻳﻪﺕ ﺩﻩﺭﯨﺠﯩﻠﯩﻚ ﺷﻪﻫﻪﺭ)ﺩﯨﻜﻰ ﺋﻪﺩﻟﯩﻴﻪ ﺋﯩﺪﺍﺭﯨﺴﯩﺪﺍ ﺗﯩﺰﯨﻤﻠﯩﺘﯩﺴﯩﺰ، ﺗﯩﺰﯨﻤﻼﺵ ﻫﻪﻗﻘﻰ 200 ﻧﻪﭼﭽﻪ ﻳﯜﻩﻥ. 2007- ﻳﯩﻠﻠﯩﻖ ﺋﯩﻤﺘﯩﻬﺎﻥ 9-ﺋﺎﻳﻨﯩﯔ 15-ﻛﯜﻧﯩﺪﯨﻦ 16-ﻛﯜﻧﯩﮕﯩﭽﻪ ﺋﯧﻠﯩﻨﺪﻯ.
ﺋﯩﻤﺘﯩﻬﺎﻥ ﺗﻪﻳﻴﺎﺭﻟﯩﻘﻰ
ﻣﻪﻗﺴﻪﺕ ﯞﻩ ﺋﯩﺮﺍﺩﻩ
ﺋﻪﺩﻟﯩﻴﻪ ﺋﯩﻤﺘﯩﻬﺎﻧﯩﺪﺍ ﺗﻪﻟﻪﻱ ﺳﯩﻨﺎﭖ ﺑﯧﻘﯩﺶ ﻗﻪﺗﺌﯩﻲ ﺋﺎﻗﻤﺎﻳﺪﯗ. ﺷﯘﯕﺎ ﭼﻮﻗﯘﻡ ﻣﻪﻗﺴﻪﺕ ﺋﯧﻨﯩﻖ ، ﺋﯩﺮﺍﺩﻩ ﭼﯩﯔ ﺑﻮﻟﯘﺷﻰ ﻛﯧﺮﻩﻙ. ﻣﯘﻧﺪﺍﻗﭽﻪ ﻗﯩﻠﯩﭗ ﺋﯧﻴﺘﻘﺎﻧﺪﺍ، ﺗﻪﻳﻴﺎﺭﻟﯩﻖ ﻗﯩﻠﻐﯘﭼﯩﺪﺍ "ﻣﻪﻥ ﺑﯘ ﺋﯩﻤﺘﯩﻬﺎﻧﻨﻰ ﺑﯧﺮﯨﭗ ﭼﻮﻗﯘﻡ ﺋﯚﺗﯜﺷﯜﻡ ﻛﯧﺮﻩﻙ، ﺋﯚﺗﻜﻪﻧﺪﯨﻦ ﻛﯧﻴﯩﻦ ﻫﺎﻳﺎﺗﯩﻤﺪﯨﻜﻰ ﻣﯘﻧﯘ ﻣﯘﻫﯩﻢ ﻧﯩﺸﺎﻧﯩﻤﻨﻰ ﺋﻪﻣﻪﻟﮕﻪ ﺋﺎﺷﯘﺭﯗﺷﯘﻡ ﻛﯧﺮﻩﻙ، ﺑﯘﻧﯩﯔ ﺋﯜﭼﯜﻥ ﭼﻮﻗﯘﻡ ﻛﯜﻧﯩﮕﻪ ﻣﯘﻧﭽﯩﻠﯩﻚ ﻣﺎﺗﯧﺮﯨﻴﺎﻝ ﻛﯚﺭﯛﭖ، ﺑﯩﺮ ﺋﺎﻱ ﺋﯩﭽﯩﺪﻩ ﻣﺎﯞﯗ ﻗﺎﻧﯘﻧﻨﻰ ﺗﯜﮔﯩﺘﯩﺸﯩﻢ ﻛﯧﺮﻩﻙ!" ﺩﯦﮕﻪﻥ ﻧﯩﻴﻪﺕ ﯞﻩ ﺋﯩﺮﺍﺩﻩ ﺑﻮﻟﯘﺷﻰ ﻛﯧﺮﻩﻙ. ﻣﻪﻥ ﺋﯩﻤﺘﯩﻬﺎﻥ ﺗﻪﻳﻴﺎﺭﻟﯩﻘﻰ ﺟﻪﺭﻳﺎﻧﯩﺪﺍ ﻛﯜﻧﺪﻩ ﺩﯦﮕﯜﺩﻩﻙ ﺋﯚﺯﯛﻣﻨﯩﯔ 29 ﻳﯩﻠﻠﯩﻖ ﻫﺎﻳﺎﺗﯩﻤﻨﻰ ﺋﻪﺳﻠﻪﭖ ﭼﯩﻘﺘﯩﻢ. ﺋﯚﺯﯛﻣﻨﯩﻤﯘ، ﺋﯚﺯﮔﯩﻨﯩﻤﯘ ﺧﯘﺵ ﻗﯩﻼﻻﻳﺪﯨﻐﺎﻥ، ﺋﯚﺯﯛﻣﻨﻰ ﺋﯩﭙﺎﺩﯨﻠﯩﻴﻪﻟﻪﻳﺪﯨﻐﺎﻥ ﺑﯩﺮ ﺋﯩﺶ ﻗﯩﻠﻐﯘﻡ ﻛﻪﻟﺪﻯ، ﺑﯘﻧﻰ ﺋﺎﺩﯞﯗﻛﺎﺗﻠﯩﻖ ﺩﻩﭖ ﺋﻮﻳﻠﯩﺪﯨﻢ، ﺑﯘ ﻧﯩﻴﻪﺕ ﻣﻪﻧﺪﻩ ﭼﯩﯔ ﺋﯩﺮﺍﺩﻩ ﭘﻪﻳﺪﺍ ﻗﯩﻠﺪﻯ. ﻫﻪﺭ ﻗﯧﺘﯩﻢ ﻛﯩﺘﺎﺑﻨﻰ ﻗﻮﻟﯘﻣﺪﯨﻦ ﭼﯜﺷﯜﺭﻣﻪﻛﭽﻰ، ﺋﺎﺭﺍﻡ ﺋﺎﻟﻤﺎﻗﭽﻰ ﺑﻮﻟﻐﺎﻧﺪﺍ، ﺯﯦﺮﯨﻜﻜﻪﻧﺪﻩ، ﯞﺍﻗﯩﺖ ﺑﯩﻬﯘﺩﻩ ﺋﯚﺗﻜﻪﻧﺪﻩ ... ﻣﺎﻧﺎ ﺷﯘﻻﺭﻧﻰ ﺋﻮﻳﻠﯩﺪﯨﻢ، ﺋﯚﺯﯛﻣﭽﻪ ﻳﺎﺳﯩﯟﺍﻟﻐﺎﻥ ﻛﯧﻠﻪﭼﻪﻛﻨﻰ ﻛﯚﺯ ﺋﺎﻟﺪﯨﻤﻐﺎ ﻛﻪﻟﺘﯜﺭﺩﯛﻡ.
ﺑﯘ ﺑﯩﺮ ﺋﯘﺯﯗﻥ ﺟﻪﺭﻳﺎﻥ! ﺋﯘﻧﻰ ﺗﯩﻞ ﺑﯩﻠﻪﻥ ﺗﻪﺳﯟﯨﺮﻟﻪﭖ ﺑﯧﺮﯨﺸﻜﻪ ﺋﺎﺟﯩﺰﻟﯩﻖ ﻗﯩﻠﯩﻤﻪﻥ. ﺋﯘﻧﯩﯔ ﺋﯜﺳﺘﯩﮕﻪ ﻫﻪﺭ ﺷﻪﺧﺴﻨﯩﯔ ﻛﻪﭼﻤﯩﺸﻰ ﻫﻪﺭﺧﯩﻞ ﺑﻮﻟﯩﺪﯗ، ﻫﻪﺭﻛﯩﻤﻨﯩﯔ ﺋﯩﺮﺍﺩﯨﺴﻰ ﺋﯚﺯ ﺋﯩﭽﯩﺪﯨﻦ ﺗﺎﯞﻻﻧﻐﺎﻥ ﺑﻮﻟﯩﺪﯗ. ﻗﯩﺴﻘﯩﺴﻰ، ﻗﺎﺗﺘﯩﻖ ﭼﯩﯔ ﺋﯩﺮﺍﺩﻩ ﺑﻮﻟﻤﯩﻐﺎﻧﺪﺍ ﺗﻪﻳﻴﺎﺭﻟﯩﻘﻨﻰ ﭘﯘﺧﺘﺎ ﻗﯩﻠﻐﯩﻠﻰ ﺑﻮﻟﻤﺎﻳﺪﯗ. ﻟﯧﻜﯩﻦ ﺑﯩﺮﻛﯩﻤﻨﯩﯔ ﺋﯩﺮﺍﺩﯨﺴﯩﻨﻰ ﺗﻪﺳﯩﺮﺍﺕ، ﺗﻪﺟﺮﯨﺒﻪ ﺳﯚﺯﻟﻪﺵ ﺋﺎﺭﻗﯩﻠﯩﻖ ﭘﻪﻳﺪﺍ ﻗﯩﻠﻐﯩﻠﻰ ﺑﻮﻟﻤﺎﻳﺪﯗ. ﺋﺎﻟﻐﺎ ﺋﯩﻨﺘﯩﻠﯩﺪﯨﻐﺎﻥ ﺋﺎﺩﻩﻡ ﺋﯚﺯﯨﻨﯩﯔ ﻛﯧﻠﻪﭼﯩﻜﯩﻨﻰ ﻳﻮﺭﯗﺗﯘﺵ ﻳﻮﻟﯩﺪﺍ ﺋﯘﻧﺪﺍﻕ-ﻣﯘﻧﺪﺍﻕ ﻗﯩﻴﯩﻨﭽﯩﻠﯩﻘﻼﺭﻏﺎ ﺋﯚﺯﯨﻨﻰ ﺋﯘﺭﺍﻻﻳﺪﯗ، ﺑﯘ ﺑﻪﻟﻜﯩﻢ ﺋﺎﺯ-ﺗﻮﻻ ﻏﯩﺪﯨﻘﻼﺷﻨﯩﯔ ﺗﯜﺭﺗﻜﯩﺴﯩﺪﻩ ﺑﻮﻟﯘﺷﯩﻤﯘ ﻣﯘﻣﻜﯩﻦ.
ﺋﯚﮔﯩﻨﯩﺶ
ﺋﯚﮔﯩﻨﯩﺶ ﺋﯘﺳﯘﻟﯩﻨﻰ ﺋﯚﮔﻪﺗﻜﯩﻠﻰ ﺑﻮﻟﯩﺪﯗ، ﻟﯧﻜﯩﻦ ﺗﻪﭘﻪﻛﻜﯘﺭ ﯞﻩ ﺗﻪﺳﻪﯞﯞﯗﺭﻧﻰ ﺋﯚﮔﻪﺗﻜﯩﻠﻰ ﺑﻮﻟﻤﺎﻳﺪﯗ.
ﺋﻪﺩﻟﯩﻴﻪ ﺋﯩﻤﺘﯩﻬﺎﻧﻰ ﺋﯩﻤﺘﯩﻬﺎﻥ ﺑﻪﺭﮔﯜﭼﯩﻨﯩﯔ ﺑﯩﻠﯩﻢ ﺳﻪﯞﯨﻴﯩﺴﻰ ﯞﻩ ﺗﻪﺩﺑﯩﻘﻼﺵ ﺋﯩﻘﺘﯩﺪﺍﺭﯨﻨﻰ ﺳﯩﻨﺎﻳﺪﯗ. ﺗﻪﺩﺑﯩﻘﻼﺵ ﺋﯩﻘﺘﯩﺪﺍﺭﻯ ﺗﻪﭘﻪﻛﻜﯘﺭ ﯞﻩ ﺗﻪﺳﻪﯞﯞﯗﺭﺩﯨﻦ ﻛﯧﻠﯩﺪﯗ، ﺷﯘﻧﺪﺍﻗﻼ ﺋﻪﻣﻪﻟﯩﻲ ﺗﻪﺟﺮﯨﺒﯩﺪﯨﻨﻤﯘ ﻛﯧﻠﯩﺪﯗ، ﻟﯧﻜﯩﻦ ﺋﻪﻣﻪﻟﯩﻲ ﺗﻪﺟﺮﯨﺒﯩﻨﻰ ﺑﯘ ﺋﯩﻤﺘﯩﻬﺎﻧﺪﺍ 30 ﭘﺮﺳﻪﻧﺘﺘﯩﻦ ﺋﺎﺭﺗﯘﻕ ﺭﻭﻝ ﺋﻮﻳﻨﺎﻳﺪﯗ، ﺩﻩﭖ ﻗﺎﺭﯨﻤﺎﻳﻤﻪﻥ، ﻣﻪﻥ ﺋﯚﻣﺮﯛﻣﺪﻩ ﭘﻪﻗﻪﺕ ﺋﯩﻜﻜﯩﻼ ﺳﻮﺗﻨﻰ ﺋﺎﯕﻼﭖ ﺑﺎﻗﻘﺎﻥ، ﻳﻪﻧﻪ ﻛﯧﻠﯩﭗ ﻛﯧﻴﯩﻨﻜﻰ ﺳﻮﺕ 2- ﺳﻮﺕ ﺑﻮﻟﻐﺎﭼﻘﺎ، ﺋﺎﺳﺎﺳﻪﻥ ﺑﯩﺮ ﻧﯧﻤﯩﻨﻰ ﭼﯜﺷﻪﻧﻤﯩﮕﻪﻥ ﺋﯩﺪﯨﻢ. ﻣﯧﻨﯩﯔ ﺳﻮﺗﻨﻰ ﻛﻪﻡ ﺋﺎﯕﻠﯩﻐﯩﻨﯩﻤﻨﯩﯔ ﺯﯨﻴﯩﻨﻰ ﺑﻮﻟﻤﯩﺪﻯ ﺋﻪﻣﻪﺱ، ﺑﻮﻟﺪﻯ، 4- ﻗﻪﻏﻪﺯﺩﯨﻦ ﺋﺎﻟﻐﺎﻥ ﻧﻮﻣﯘﺭﯗﻡ ﺑﺎﺷﻘﯩﻠﯩﺮﯨﻐﺎ ﻗﺎﺭﯨﻐﺎﻧﺪﺍ ﺗﯚﯞﻩﻥ ﺑﻮﻟﺪﻯ.
ﺑﯩﺮ ﻗﯩﺴﯩﻢ ﺳﯘﺋﺎﻟﻼﺭﺩﺍ ﺗﻪﭘﻪﻛﻜﯘﺭ ﯞﻩ ﺗﻪﺳﻪﯞﯞﯗﺭ ﻫﻪﻗﯩﻘﻪﺗﻪﻥ ﻣﯘﻫﯩﻢ ﺋﻮﺭﯗﻧﺪﺍ ﺗﯘﺭﯨﺪﯗ. ﺋﻪﺩﻟﯩﻴﻪ ﺋﯩﻤﺘﯩﻬﺎﻧﯩﺪﺍ ﺳﯩﺰﮔﻪ ﻣﯘﻧﺪﺍﻕ ﺳﯘﺋﺎﻟﻼﺭ ﻗﻮﻳﯘﻟﯩﺪﯗ: ﺳﯩﺰ ﺋﯘ ﺳﯘﺋﺎﻟﻨﻰ ﻛﯚﺭﮔﻪﻧﺪﯨﻦ ﻛﯧﻴﯩﻦ ﺩﻩﺭﻫﺎﻝ ﻣﯘﻧﺎﺳﯩﯟﻩﺗﻠﯩﻚ ﻗﺎﻧﯘﻥ ﻣﺎﺩﺩﯨﻠﯩﺮﯨﻨﻰ ﺋﻪﺳﻠﻪﺷﻜﻪ ﺗﯩﺮﯨﺸﯩﺴﯩﺰ، ﻟﯧﻜﯩﻦ ﻧﻪﻕ ﺑﯩﺮ ﺑﻪﻟﮕﯩﻠﯩﻤﻪ ﺋﯧﺴﯩﯖﯩﺰﮔﻪ ﻛﻪﻟﻤﻪﻳﺪﯗ، ﺋﻪﻣﻤﺎ ﺑﯘ ﺳﯘﺋﺎﻝ ﺳﯩﺰﮔﻪ ﻛﯜﻧﺪﯨﻠﯩﻚ ﺗﯘﺭﻣﯘﺷﺘﺎ ﺋﯘﭼﺮﺍﭖ ﺗﯘﺭﯨﺪﯗ. ﺑﯘ ﻣﻪﺯﻛﻮﺭ ﺳﯘﺋﺎﻟﻨﻰ ﭼﯩﻘﺎﺭﻏﯘﭼﻰ ﻗﺎﻧﯘﻥ ﺋﺎﺳﺎﺳﯩﻨﻰ ﺋﻮﻳﻠﯩﻤﯩﻐﺎﻥ ﺋﻪﻣﻪﺱ، ﺑﻪﻟﻜﻰ ﺋﻮﻳﻠﯩﻐﺎﻥ، ﻟﯧﻜﯩﻦ ﺋﯘﻧﻰ ﺑﺎﻏﻼﺵ ﺑﯩﺮ ﻗﻪﺩﻩﺭ ﻣﯘﺭﻩﻛﻜﻪﭖ ﺑﻮﻟﯩﺪﯗ، ﻣﯘﻧﺪﺍﻗﭽﻪ ﺋﯧﻴﺘﻘﺎﻧﺪﺍ ﺳﯩﺰ ﻧﻪﭼﭽﻪ ﻳﯜﺯ ﻗﺎﻧﯘﻥ، ﻧﻪﭼﭽﻪ ﻳﯜﺯ ﺋﻪﺩﻟﯩﻴﯩﻠﯩﻚ ﺋﯩﺰﺍﻫﺎﺗﻨﯩﯔ ﻗﺎﻳﺴﯩﻨﯩﯔ ﺑﯘ ﻣﯩﺴﺎﻟﻐﺎ ﻣﺎﺱ ﻛﯧﻠﯩﺪﯨﻐﺎﻧﻠﯩﻘﯩﻨﻰ ﺷﯘ ﺳﯘﺋﺎﻟﻐﺎ ﻛﯧﺘﻪﺭﻟﯩﻚ ﺑﯩﺮﻧﻪﭼﭽﻪ ﻣﯩﻨﯘﺕ ﺋﯩﭽﯩﺪﻩ ﺋﻮﻳﻼﭖ ﺑﻮﻟﻐﯩﻠﻰ ﺑﻮﻟﻤﺎﻳﺪﯗ، ﻳﻪﻧﻪ ﻛﯧﻠﯩﭗ ﺑﯘ ﻣﯩﺴﺎﻝ ﺑﯩﺮﻧﻪﭼﭽﻪ ﻗﺎﻧﯘﻥ، ﺑﯩﺮﻧﻪﭼﭽﻪ ﺋﻪﺩﻟﯩﻴﯩﻠﯩﻚ ﺋﯩﺰﺍﻫﺎﺗﻘﺎ ﺗﻪﯕﻼ ﭼﯧﺘﯩﻠﯩﺸﻰ ﻣﯘﻣﻜﯩﻦ. ﻗﺎﻧﺪﺍﻕ ﻗﯩﻠﯩﺶ ﻛﯧﺮﻩﻙ؟ ﻣﯧﻨﯩﯔ ﻗﺎﺭﯨﺸﯩﻤﭽﻪ، ﺋﯩﻤﺘﯩﻬﺎﻥ ﻣﻪﻳﺪﺍﻧﯩﺪﯨﻼ ﺋﻪﻣﻪﺱ، ﺑﻪﻟﻜﻰ ﺋﺎﺩﻩﺗﺘﯩﻜﻰ ﯞﺍﻗﯩﺘﺘﯩﻤﯘ ﺳﯩﺰﻧﯩﯔ ﺋﺎﻟﺪﯨﯖﯩﺰﻏﺎ ﺑﺎﺭﻟﯩﻖ ﻗﺎﻧﯘﻥ ﻛﯩﺘﺎﺑﻠﯩﺮﯨﻨﻰ ﺩﯙﯞﻟﻪﭖ ﻗﻮﻳﯘﭖ، ﺑﯩﺮ-ﺋﯩﻜﻜﻰ ﻛﯜﻥ ﯞﺍﻗﯩﺖ ﺑﻪﺭﺳﯩﻤﯘ ﺋﯘﻧﻰ ﺩﻩﻝ ﻗﺎﻧﯘﻥ ﻣﺎﺩﺩﯨﻠﯩﺮﯨﺪﯨﻦ ﺗﺎﭘﺎﻟﯩﺸﯩﯖﯩﺰ ﻧﺎﺗﺎﻳﯩﻦ. ﺑﯘ ﭼﺎﻏﺪﺍ ﺋﻪﺳﻘﺎﺗﯩﺪﯨﻐﯩﻨﻰ ﻳﻪﻧﯩﻼ ﺗﻪﭘﻪﻛﻜﯘﺭ ﯞﻩ ﺗﻪﺳﻪﯞﯞﯗﺭ. ﺑﯘ ﻳﯩﻠﻠﯩﻖ ﺋﻪﺩﻟﯩﻴﻪ ﺋﯩﻤﺘﯩﻬﺎﻧﯩﻨﯩﯔ 3- ﻗﻪﻏﻪﺯ 1- ﺳﯘﺋﺎﻟﯩﻐﺎ ﻗﯩﺰﯨﻘﺎﺭﻟﯩﻖ ﺑﯩﺮ ﺳﯘﺋﺎﻝ ﭼﯩﻘﺘﻰ، ﻣﻪﻥ ﺋﯘﻧﻰ ﺋﯩﺸﻠﯩﻤﻪﻱ ﺋﺎﻕ ﻗﻮﻳﺪﯗﻡ، 49 ﺳﯘﺋﺎﻟﻨﻰ ﺋﯩﺸﻠﻪﭖ ﺑﻮﻟﻐﺎﻧﺪﯨﻦ ﻛﯧﻴﯩﻦ 1- ﺳﯘﺋﺎﻝ ﻫﻪﻗﻘﯩﺪﻩ ﺋﻮﻳﻼﻧﺪﯨﻢ، 5 ﻣﯩﻨﯘﺗﻠﯘﻕ ﺋﻮﻳﻠﯩﻨﯩﺸﺘﯩﻦ ﻛﯧﻴﯩﻦ ﻛﻪﺳﻜﯩﻦ ﻫﺎﻟﺪﺍ ﺑﯩﺮﻧﻰ ﺗﺎﻟﻠﯩﺪﯨﻢ، ﻛﯧﻴﯩﻦ ﺋﻪﺩﻟﯩﻴﻪ ﻣﯩﻨﯩﺴﺘﯩﺮﻟﯩﻜﻰ ﺋﯧﻼﻥ ﻗﯩﻠﻐﺎﻥ ﺋﯚﻟﭽﻪﻣﻠﯩﻚ ﺟﺎﯞﺍﺑﻘﺎ ﻗﺎﺭﯨﺴﺎﻡ، ﻣﯧﻨﯩﯔ ﺗﺎﻟﻠﯩﻐﯩﻨﯩﻢ ﺗﻮﻏﺮﺍ ﺑﻮﻟﯘﭖ ﭼﯩﻘﺘﻰ. ﺑﯘ ﺳﯘﺋﺎﻝ ﻣﯘﻧﺪﺍﻕ:
ﻣﻪﻟﯘﻡ ﻳﯘﻟﺘﯘﺯ ﺩﻩﺭﯨﺠﯩﻠﯩﻚ ﻣﯧﻬﻤﺎﻧﺨﺎﻧﯩﻨﯩﯔ ﻳﺎﺗﯩﻘﯩﺪﺍ ﭘﺎﺭﭼﻪ ﻳﯧﻤﻪﻛﻠﯩﻚ، ﺋﯩﭽﯩﻤﻠﯩﻚ ﻗﺎﺗﺎﺭﻟﯩﻖ ﻧﻪﺭﺳﯩﻠﻪﺭ ﺧﯧﺮﯨﺪﺍﺭﻻﺭﻧﯩﯔ ﺗﺎﻟﻼﭖ ﺋﯩﺸﻠﯩﺘﯩﺸﻰ ﺋﯜﭼﯜﻥ ﺗﯩﺰﯨﭗ ﻗﻮﻳﯘﻟﻐﺎﻥ ﺑﻮﻟﯘﭖ، ﺋﯘﻻﺭﻧﯩﯔ ﺑﺎﻫﺎﺳﻰ ﺑﺎﺯﺍﺭﺩﯨﻜﻰ ﺋﻮﺧﺸﺎﺵ ﺗﯜﺭﺩﯨﻜﻰ ﺗﺎﯞﺍﺭﻧﯩﯔ ﺑﺎﻫﺎﺳﯩﺪﯨﻦ ﻛﯚﺭﯛﻧﻪﺭﻟﯩﻚ ﻳﯘﻗﯩﺮﻯ، ﻣﯧﻬﻤﺎﻧﺨﺎﻧﯩﻨﯩﯔ ﺧﯧﺮﯨﺪﺍﺭﻯ ﺗﯘﺭﻏﯘﻧﻨﯩﯔ ﺗﻪﺟﺮﯨﺒﯩﺴﻰ ﻛﻪﻣﭽﯩﻞ، ﺋﯘﻧﯩﯔ ﺋﯜﺳﺘﯩﮕﻪ ﺑﺎﻫﺎ ﻛﺎﺭﺗﻮﭼﻜﯩﺴﯩﻐﺎ ﺗﺎﺯﺍ ﺩﯨﻘﻘﻪﺕ ﻗﯩﻠﻤﯩﻐﺎﭼﻘﺎ، ﺋﯘ ﻧﻪﺭﺳﯩﻠﻪﺭﻧﻰ ﺋﯘﻗﯘﺷﻤﺎﻱ ﻣﯧﻬﻤﺎﻧﺨﺎﻧﺎ ﻣﯧﻬﻤﺎﻧﻼﺭﻧﯩﯔ ﻫﻪﻗﺴﯩﺰ ﺋﯩﺸﻠﯩﺘﯩﺸﻰ ﺋﯜﭼﯜﻥ ﻗﻮﻳﯘﭖ ﻗﻮﻳﻐﺎﻥ ﺋﻮﺧﺸﺎﻳﺪﯗ، ﺩﻩﭖ ﺋﻮﻳﻼﭖ ﺑﯩﺮ ﺑﻮﺗﯘﻟﻜﺎ ﭼﻪﺕ ﺋﻪﻝ ﻫﺎﺭﯨﻘﯩﻨﻰ ﺋﯩﭽﯩﯟﯦﺘﯩﺪﯗ. ﻫﯧﺴﺎﺑﺎﺗﻨﻰ ﺋﯜﺯﯛﺵ ﯞﺍﻗﺘﯩﺪﺍ، ﻣﯧﻬﻤﺎﻧﺨﺎﻧﺎ ﺋﯚﺯﻟﯩﺮﻯ ﺑﻪﻟﮕﯩﻠﯩﮕﻪﻥ ﺑﺎﻫﺎ ﺑﻮﻳﯩﭽﻪ ﻫﻪﻕ ﺋﺎﻟﻤﺎﻗﭽﻰ ﺑﻮﻟﯩﺪﯗ، ﺗﯘﺭﻏﯘﻥ ﭘﯘﻝ ﺗﯚﻟﻪﺷﻨﻰ ﺭﻩﺕ ﻗﯩﻠﯩﺪﯗ. ﺗﯚﯞﻩﻧﺪﯨﻜﯩﻠﻪﺭﻧﯩﯔ ﻗﺎﻳﺴﻰ ﺗﻮﻏﺮﺍ؟
:Aﺗﯘﺭﻏﯘﻥ ﻣﯧﻬﻤﺎﻧﺨﺎﻧﺎ ﺑﻪﻟﮕﯩﻠﯩﮕﻪﻥ ﺑﺎﻫﺎ ﺑﻮﻳﯩﭽﻪ ﭘﯘﻝ ﺗﯚﻟﯩﺸﻰ ﻛﯧﺮﻩﻙ
:Bﺗﯘﺭﻏﯘﻥ ﺑﺎﺯﺍﺭ ﺑﺎﻫﺎﺳﻰ ﺑﻮﻳﯩﭽﻪ ﭘﯘﻝ ﺗﯚﻟﯩﺸﻰ ﻛﯧﺮﻩﻙ
:C ﺗﯘﺭﻏﯘﻥ ﭘﯘﻝ ﺗﯚﻟﯩﻤﻪﺳﻠﯩﻜﻰ ﻛﯧﺮﻩﻙ
D :ﺗﯘﺭﻏﯘﻥ ﻣﯧﻬﻤﺎﻧﺨﺎﻧﺎ ﺑﻪﻟﮕﯩﻠﯩﮕﻪﻥ ﺑﺎﻫﺎﻧﯩﯔ ﻳﯧﺮﯨﻤﻰ ﺑﻮﻳﯩﭽﻪ ﭘﯘﻝ ﺗﯚﻟﯩﺸﻰ ﻛﯧﺮﻩﻙ
ﻳﯘﻗﯩﺮﯨﻘﻰ ﺳﯘﺋﺎﻟﺪﺍ ﻣﻪﻥ ﺩﯨﻘﻘﻪﺕ ﻗﯩﻠﻐﺎﻥ ﺋﯜﭺ ﻧﯘﻗﺘﺎ ﺑﺎﺭ. ﺑﯩﺮﻯ، "ﻳﯘﻟﺘﯘﺯ ﺩﻩﺭﯨﺠﯩﻠﯩﻚ" ﺑﯘ ﻧﯘﻗﺘﺎ ﻣﯧﻨﻰ "ﺑﺎﻫﺎﻧﯩﯔ ﻗﯩﻤﻤﻪﺗﺮﻩﻙ ﺑﻮﻟﯘﺷﯩﻐﺎ ﻳﻮﻝ ﻗﻮﻳﯩﺪﯗ، ﭼﯜﻧﻜﻰ ﺋﯘ ﻳﻪﺭﺩﻩ ﺷﯘﻧﯩﯖﻐﺎ ﻻﻳﯩﻖ ﻣﯘﻻﺯﯨﻤﻪﺗﻤﯘ ﺑﺎﺭ" ﺩﯦﮕﻪﻥ ﺋﻮﻳﻐﺎ ﻛﻪﻟﺘﯜﺭﺩﻯ، ﺋﯩﻜﻜﯩﻨﭽﯩﺴﻰ، " ﺋﯘﻻﺭﻧﯩﯔ ﺑﺎﻫﺎﺳﻰ ﺑﺎﺯﺍﺭﺩﯨﻜﻰ ﺋﻮﺧﺸﺎﺵ ﺗﯜﺭﺩﯨﻜﻰ ﺗﺎﯞﺍﺭﻧﯩﯔ ﺑﺎﻫﺎﺳﯩﺪﯨﻦ ﻛﯚﺭﯛﻧﻪﺭﻟﯩﻚ ﻳﯘﻗﯩﺮﻯ" ﺩﯦﮕﯩﻨﯩﻨﻰ ﻣﻪﻥ "ﺳﯘﺋﺎﻝ ﭼﯩﻘﺎﺭﻏﯘﭼﻰ ﻣﯧﻨﻰ < ﺗﯘﺭﻏﯘﻥ ﺑﺎﺯﺍﺭ ﺑﺎﻫﺎﺳﻰ ﺑﻮﻳﯩﭽﻪ ﭘﯘﻝ ﺗﯚﻟﯩﺸﻰ ﻛﯧﺮﻩﻙ> ﺩﯦﮕﻪﻥ ﺟﺎﯞﺍﺑﻨﻰ ﺗﺎﻟﻼﺷﻘﺎ ﻳﯧﺘﻪﻛﻠﻪﯞﺍﺗﯩﺪﯗ" ﺩﻩﭖ ﺋﻮﻳﻠﯩﺪﯨﻢ، ﺷﯘﻧﺪﺍﻗﻼ ﺑﯘﻧﻰ ﺑﯩﺮ "ﻗﯩﻠﺘﺎﻕ" ﺩﻩﭖ ﻫﯚﻛﯜﻡ ﻗﯩﻠﺪﯨﻢ، ﺋﯜﭼﯩﻨﭽﻰ ﻧﯘﻗﺘﺎ- "ﺑﺎﻫﺎ ﻛﺎﺭﺗﻮﭼﻜﯩﺴﯩﻐﺎ ﺗﺎﺯﺍ ﺩﯨﻘﻘﻪﺕ ﻗﯩﻠﻤﯩﻐﺎﭼﻘﺎ"، ﺩﯦﻤﻪﻙ، ﺑﯘ ﻳﻪﺭﺩﻩ ﺑﯩﺮ ﺑﺎﻫﺎ ﻛﺎﺭﺗﯩﺴﻰ ﺑﺎﺭ، ﺋﯘﻧﻰ ﻛﯚﺭﺳﯘﻥ-ﻛﯚﺭﻣﯩﺴﯘﻥ، ﻣﯧﻬﻤﺎﻧﺨﺎﻧﺎ ﺧﯧﺮﯨﺪﺍﺭﻧﻰ ﻗﺎﻗﺘﺎ-ﺳﻮﻗﺘﻰ ﻗﯩﻠﯩﭗ، ﺑﺎﻫﺎﺳﯩﻨﻰ ﭼﺎﭘﻠﯩﻤﺎﻳﻼ ﻗﻮﻳﯘﭖ ﻗﻮﻳﻤﺎﺳﺘﯩﻦ، ﺑﻪﻟﻜﻰ ﺑﺎﻫﺎ ﻛﺎﺭﺗﯩﺴﻰ ﻗﻮﻳﯘﭖ ﻗﻮﻳﻐﺎﻥ، ﺗﯘﺭﻏﯘﻥ ﺑﯘ "ﺗﻪﻛﻠﯩﭗ" ﻧﻰ ﻗﻮﺑﯘﻝ ﻗﯩﻠﻐﺎﻥ، ﺩﯦﻤﻪﻙ، "ﺗﻮﺧﺘﺎﻡ"ﻧﻰ ﻗﻮﺑﯘﻝ ﻗﯩﻠﻐﺎﻥ. ﺗﯘﺭﻏﯘﻥ ﺑﯩﻠﻪﻥ ﻣﯧﻬﻤﺎﻧﺨﺎﻧﺎ ﺋﻮﺗﺘﯘﺭﯨﺴﯩﺪﺍ ﺳﯧﺘﯩﺶ-ﺳﯧﺘﯩﯟﯦﻠﯩﺶ ﻣﯘﻧﺎﺳﯩﯟﯨﺘﻰ، ﺗﻮﺧﺘﺎﻡ ﻣﯘﻧﺎﺳﯩﯟﯨﺘﻰ ﺷﻪﻛﯩﻠﻠﻪﻧﮕﻪﻥ. ﺑﯘ ﻳﻪﺭﺩﻩ ﺋﯘﻧﯩﯔ ﺩﯨﻘﻘﻪﺕ ﻗﯩﻠﻤﯩﻐﺎﻧﻠﯩﻘﯩﻨﻰ ﻣﯧﻬﻤﺎﻧﺨﺎﻧﯩﺪﯨﻦ ﻛﯚﺭﯨﺸﯩﻤﯩﺰﮔﻪ ﺋﺎﺳﺎﺱ ﻳﻮﻕ. ﺋﻪﮔﻪﺭ ﺑﯘ ﻧﯘﻗﺘﯩﻨﻰ ﺭﯦﺌﺎﻟﻠﯩﻘﺘﯩﻜﻰ ﺑﯩﺮ ﺗﺎﻻﺵ-ﺗﺎﺭﺗﯩﺶ ﺳﯜﭘﯩﺘﯩﺪﻩ ﺋﻮﻳﻠﯩﺴﺎﻕ، ﺋﯘ ﻳﻪﺭﺩﻩ ﺑﺎﻫﺎ ﻛﺎﺭﺗﯩﺴﻰ ﻣﻪﯞﺟﯘﺗﻼ ﺑﻮﻟﯩﺪﯨﻜﻪﻥ، ﺗﯘﺭﻏﯘﻥ ﺋﯚﺯﯨﻨﯩﯔ ﺋﯘﻧﻰ ﻛﯚﺭﻣﯩﮕﻪﻧﻠﯩﻜﯩﻨﻰ ﺋﯩﺴﭙﺎﺗﻼﭖ ﺑﯧﺮﻩﻟﻤﻪﻳﺪﯗ، ﻟﯧﻜﯩﻦ ﻣﯧﻬﻤﺎﻧﺨﺎﻧﺎ ﺋﯚﺯﯨﻨﯩﯔ ﺑﺎﻫﺎﻧﻰ ﺋﯧﻨﯩﻖ ﺋﻪﺳﻜﻪﺭﺗﻜﻪﻧﻠﯩﻜﯩﻨﻰ ﺋﯩﺴﭙﺎﺗﻼﭖ ﺑﯧﺮﻩﻟﻪﻳﺪﯗ. ﺗﯘﺭﻏﯘﻥ ﺋﯘﻧﻰ ﻛﯚﺭﯛﺷﻰ ﻛﯧﺮﻩﻙ. ﻣﯘﻧﺪﺍﻗﭽﻪ ﺋﯧﻴﺘﻘﺎﻧﺪﺍ، ﺳﯩﺰ ﺋﺎﭘﺘﻮﻣﻮﺑﯩﻞ ﻫﻪﻳﺪﯨﮕﻪﻧﺪﻩ ﻳﻮﻟﺪﯨﻜﻰ ﺳﯜﺭﺋﻪﺕ ﭼﻪﻛﻠﻪﺵ ﺗﺎﺧﺘﯩﺴﯩﻐﺎ ﺩﯨﻘﻘﻪﺕ ﻗﯩﻠﻤﺎﻱ، ﺟﻪﺭﯨﻤﺎﻧﻪ ﺗﯚﻟﻪﻳﺪﯨﻐﺎﻥ ﭼﺎﻏﺪﺍ "ﻳﻮﻟﺪﯨﻜﻰ ﺗﺎﺧﺘﯩﻐﺎ ﺩﯨﻘﻘﻪﺕ ﻗﯩﻠﻤﺎﭘﺘﯩﻤﻪﻥ" ﺩﯦﮕﯩﻨﯩﯖﯩﺰﮔﻪ ﺳﺎﻗﭽﻰ ﻫﻪﺭﮔﯩﺰﻣﯘ ﺋﯘﻧﯩﻤﺎﻳﺪﯗ.
ﻳﯘﻗﯩﺮﯨﻘﯩﻼﺭﺩﯨﻦ ﺑﺎﺷﻘﺎ، ﻣﻪﻥ ﺑﯘ ﺳﯘﺋﺎﻝ ﻫﻪﻗﻘﯩﺪﻩ ﻳﻪﻧﻪ ﻣﯘﻧﺪﺍﻕ ﺋﻮﻳﻠﯩﺪﯨﻢ: ﺟﯘﯕﮕﻮﺩﺍ ﺑﯘﻧﺪﺍﻕ ﻗﯩﻤﻤﻪﺕ ﺑﺎﻫﺎﻟﯩﻖ ﻧﻪﺭﺳﯩﻨﻰ ﻳﺎﺗﺎﻗﻘﺎ ﻗﻮﻳﯘﭖ ﻗﻮﻳﯩﺪﯨﻐﺎﻥ ﻧﻪﭼﭽﻪ ﺋﻮﻧﻤﯩﯔ ﻣﯧﻬﻤﺎﻧﺨﺎﻧﺎ ﺑﻮﻟﯘﺷﻰ ﻣﯘﻣﻜﯩﻦ، ﺋﻪﮔﻪﺭ ﺗﯚﻟﯩﻤﻪﺳﻠﯩﻚ، ﻳﯧﺮﯨﻢ ﺑﺎﻫﺎﺩﺍ ﺗﯚﻟﻪﺵ، ﺑﺎﺯﺍﺭ ﺑﺎﻫﺎﺳﯩﺪﺍ ﺗﯚﻟﻪﺷﻨﻰ ﺗﻪﻟﻪﭖ ﻗﯩﻠﯩﺶ (ﺧﺎﺗﺎ ﺋﯜﭺ ﺟﺎﯞﺍﺏ) ﻧﯩﯔ ﺑﯩﺮﻩﺭﺳﻰ ﺗﻮﻏﺮﺍ ﺑﻮﻟﯩﺪﯨﻐﺎﻥ ﺑﻮﻟﺴﺎ، ﺋﯘﻧﺪﺍﻗﺘﺎ ﻧﯧﻤﯩﺸﻘﺎ ﺗﺎ ﻫﺎﺯﯨﺮﻏﯩﭽﻪ ﻧﻰ-ﻧﻰ ﻗﺎﻧﯘﻧﺸﯘﻧﺎﺳﻼﺭ، ﺋﻪﻣﻪﻟﺪﺍﺭﻻﺭ ﯞﻩ ﺑﺎﺷﻘﯩﻼﺭ ﻳﻪﻧﯩﻼ ﻣﯧﻬﻤﺎﻧﺨﺎﻧﺎ ﺑﯧﻜﯩﺘﻜﻪﻥ ﺑﺎﻫﺎﺩﺍ ﺗﯚﻟﻪﻳﺪﯗ؟ ﻧﯧﻤﯩﺸﻘﺎ ﺑﯘﻧﺪﺍﻕ ﻳﯘﻗﯩﺮﻯ ﺑﺎﻫﺎ ﺑﯧﻜﯩﺘﯩﺶ ﺑﯩﻜﺎﺭ ﻗﯩﻠﯩﻨﻤﺎﻳﺪﯗ؟
ﺩﯦﻤﻪﻙ، ﻣﻪﻥ " ﻣﯧﻬﻤﺎﻧﺨﺎﻧﺎ ﺑﻪﻟﮕﯩﻠﯩﮕﻪﻥ ﺑﺎﻫﺎ ﺑﻮﻳﯩﭽﻪ ﭘﯘﻝ ﺗﯚﻟﯩﺸﻰ ﻛﯧﺮﻩﻙ" ﺩﯦﮕﻪﻧﻨﻰ ﺗﺎﻟﻠﯩﺪﯨﻢ.
ﻗﺎﻧﯘﻥ ﺋﯚﮔﻪﻧﻤﯩﮕﻪﻥ ﺩﻭﺳﺘﻼﺭﻏﺎ ﺷﯘﻧﻰ ﺋﻪﺳﻜﻪﺭﺗﯩﭗ ﺋﯚﺗﯜﺵ ﺯﯙﺭﯛﺭﻛﻰ، ﻗﺎﻧﯘﻥ ﺯﯨﻴﺎﺩﻩ ﺳﯩﺮﻟﯩﻖ ﻧﻪﺭﺳﻪ ﺋﻪﻣﻪﺱ، ﻣﯘﻧﺪﺍﻗﭽﻪ ﺩﯦﮕﻪﻧﺪﻩ، ﺳﯩﺰﮔﻪ ﺩﻩﭖ ﺑﻪﺭﺳﻪ ﺳﯩﺰ ﻳﺎﻗﯩﯖﯩﺰﻧﻰ ﭼﯩﺸﻠﻪﭖ ﻫﻪﻳﺮﺍﻥ ﻗﺎﻟﻐﯘﺩﻩﻙ، ﺋﻪﻗﯩﻠﮕﻪ ﺳﯩﻐﻤﯩﻐﯘﺩﻩﻙ ﺑﯩﺮﻩﺭ ﻗﺎﻧﯘﻧﻨﻰ ﺗﺎﭘﻤﺎﻕ ﺗﻪﺱ. ﺋﯘ ﺋﻮﻣﯘﻣﻪﻥ ﺗﯘﺭﻣﯘﺷﻘﺎ ﻳﯧﻘﯩﻦ ﺗﯜﺯﯛﻟﮕﻪﻥ. ﻗﺎﻧﯘﻥ ﻫﻪﺗﺘﺎ ﺋﻪﺧﻼﻕ، ﺋﯚﺭﭖ-ﺋﺎﺩﻩﺗﻨﯩﻤﯘ ﺋﯧﺘﯩﺮﺍﭖ ﻗﯩﻠﯩﺪﯗ. (ﺋﻪﺧﻼﻕ- "ﺟﯘﯕﺨﯘﺍ ﺧﻪﻟﻖ ﺟﯘﻣﻬﯘﺭﯨﻴﯩﺘﻰ ﺋﺎﺳﺎﺳﯩﻲ ﻗﺎﻧﯘﻧﻰ"ﻧﯩﯔ 53- ﻣﺎﺩﺩﯨﺴﻰ، "ﻫﻪﻕ ﺗﻪﻟﻪﭖ ﻗﺎﻧﯘﻧﯩﻨﯩﯔ ﺋﻮﻣﯘﻣﻰ ﻗﺎﺋﯩﺪﯨﺴﻰ"7- ﻣﺎﺩﺩﯨﺴﻰ ؛ ﺋﯚﺭﭖ-ﺋﺎﺩﻩﺕ- ﺋﺎﺳﺎﺳﯩﻲ ﻗﺎﻧﯘﻧﻨﯩﯔ 4- ﻣﺎﺩﺩﯨﺴﻰ) ﻣﯘﻧﺪﺍﻗﭽﻪ ﺩﯦﮕﻪﻧﺪﻩ، ﻫﻪﻕ ﺗﻪﻟﻪﭖ ﺗﺎﻻﺵ-ﺗﺎﺭﺗﯩﺸﯩﺪﺍ، ﻗﺎﻧﯘﻥ ﯞﻩ ﺋﻪﺩﻟﯩﻴﯩﻠﯩﻚ ﺋﯩﺰﺍﻫﺎﺗﺘﯩﻦ ﺋﺎﺳﺎﺱ ﺗﺎﭘﺎﻟﻤﯩﻐﺎﻧﺪﺍ، ﺋﺎﺩﻩﺕ ﯞﻩ ﺋﯩﺠﺘﯩﻤﺎﺋﯩﻲ ﺋﻪﺧﻼﻗﻘﺎ ﺋﺎﺳﺎﺳﻪﻥ ﻫﯚﻛﯜﻡ ﭼﯩﻘﯩﺮﯨﺸﻘﺎ ﺑﻮﻟﯩﺪﯗ. ﭼﯜﻧﻜﻰ ﻫﻪﺭ ﺋﯩﻜﻜﯩﺴﻰ ﻗﺎﻧﯘﻥ ﭼﯩﻘﯩﺮﯨﺸﻘﺎ ﺋﺎﺳﺎﺱ ﺑﻮﻟﻐﺎﻥ.
ﻳﯘﻗﯩﺮﯨﻘﯩﻼﺭﻧﻰ ﺩﯦﻴﯩﺸﺘﯩﻦ ﻣﻪﻗﺴﻪﺕ ﺷﯘﻛﻰ، ﺳﯩﺰ ﺗﻪﺳﻪﯞﯞﯗﺭﻏﺎ ﺗﺎﻳﯩﻨﯩﭗ ﺋﻪﻗﯩﻠﮕﻪ ﻣﯘﯞﺍﭘﯩﻖ ﺑﯩﺮ ﺟﺎﯞﺍﺑﻨﻰ ﺗﺎﻟﻠﯩﺴﯩﯖﯩﺰ، ﺋﯘ ﺗﻮﻏﺮﺍ ﭼﯩﻘﯩﺸﻰ ﻣﯘﻣﻜﯩﻦ، ﭼﯜﻧﻜﻰ ﻗﺎﻧﯘﻥ ﺋﻪﻗﯩﻠﮕﻪ ﻣﯘﯞﺍﭘﯩﻖ ﻗﯩﻠﯩﭗ ﺗﯜﺯﯛﻟﮕﻪﭼﻜﻪ ﯞﻩ ﺗﯘﺭﻣﯘﺷﻘﺎ ﻳﯧﻘﯩﻦ ﺑﻮﻟﻐﺎﭼﻘﺎ.
ﻟﯧﻜﯩﻦ ﺗﻪﭘﻪﻛﻜﯘﺭ ﯞﻩ ﺗﻪﺳﻪﯞﯞﯗﺭ ﻳﻪﻧﯩﻼ ﻗﺎﻧﯘﻥ ﻣﺎﺩﺩﯨﻠﯩﺮﯨﻨﻰ ﺋﯚﮔﯩﻨﯩﺶ ﺋﺎﺳﺎﺳﯩﺪﺍ ﺑﻮﻟﯘﺷﻰ ﻛﯧﺮﻩﻙ. "ﻣﯧﻨﯩﯔ ﺗﻪﭘﻪﻛﻜﯘﺭﯗﻡ ﺳﺎﺯ، ﺗﻪﺳﻪﯞﯞﯗﺭﯗﻡ ﻣﻮﻝ" ﺩﻩﭖ ﭘﯘﺧﺘﺎ ﺋﯚﮔﯩﻨﯩﺶ ﻗﯩﻠﻤﯩﺴﺎ ﻳﻪﻧﯩﻼ ﻧﻮﻣﯘﺭ ﺋﺎﻟﻐﯩﻠﻰ ﺑﻮﻟﻤﺎﻳﺪﯗ. ﺋﻪﺩﻟﯩﻴﻪ ﺋﯩﻤﺘﯩﻬﺎﻧﻰ ﻗﯩﻴﯩﻦ، ﺋﯘﻧﺪﺍﻗﺘﺎ ﺯﺍﺩﻯ ﻗﺎﻧﺪﺍﻕ ﻳﯧﺮﻯ ﻗﯩﻴﯩﻦ؟ ﻣﻪﻥ ﺋﯚﺯ ﺋﻪﻣﻪﻟﯩﻴﯩﺘﯩﻤﺪﯨﻦ ﻣﯘﻧﺪﺍﻕ ﺑﯩﺮ ﻳﻪﻛﯜﻧﻨﻰ ﭼﯩﻘﺎﺭﺩﯨﻢ: ﺑﯩﺮﻯ، ﺋﻪﺩﻟﯩﻴﻪ ﺋﯩﻤﺘﯩﻬﺎﻧﯩﺪﯨﻜﻰ ﺳﯘﺋﺎﻟﻼﺭﻧﯩﯔ ﻛﯚﭖ ﻗﯩﺴﻤﯩﺪﺍ ﻗﺎﻧﯘﻥ ﻣﺎﺩﺩﯨﻠﻠﯩﺮﻯ ﺑﯩﯟﺍﺳﯩﺘﻪ ﺳﯩﻨﺎﻟﻤﺎﻳﺪﯗ. ﻳﻪﻧﻰ "ﭘﺎﻻﻧﻪ ﻗﺎﻧﯘﻧﻨﯩﯔ ﻣﺎﻧﭽﯩﻨﭽﻰ ﻣﺎﺩﺩﯨﺴﯩﺪﺍ ﻧﯧﻤﻪ ﺩﯦﻴﯩﻠﮕﻪﻥ" ﺩﯦﮕﻪﻧﺪﻩﻙ ﺳﯘﺋﺎﻟﻼﺭ ﺑﻮﻟﻤﺎﻳﺪﯗ، ﺑﻪﻟﻜﻰ ﻛﯩﭽﯩﻜﻜﯩﻨﻪ ﺑﯩﺮ ﺳﯘﺋﺎﻟﺪﺍ ﺑﯩﺮﻧﻪﭼﭽﻪ ﻗﺎﻧﯘﻥ، ﺋﻪﺩﻟﯩﻴﯩﻠﯩﻚ ﺋﯩﺰﺍﻫﺎﺗﻨﯩﯔ ﺑﯩﺮ ﻧﻪﭼﭽﯩﺴﻰ ﻣﺎﺩﺩﯨﺴﯩﻐﺎ ﺩﺍﺋﯩﺮ ﻣﻪﺯﻣﯘﻧﻼﺭ ﺗﻪﯕﻼ ﺳﯩﻨﯩﻠﯩﺪﯗ. ﻳﻪﻧﻰ، ﺳﯩﺰ ﺋﯘ ﺳﯘﺋﺎﻟﻐﺎ ﺗﻮﻏﺮﺍ ﺟﺎﯞﺍﺏ ﺑﯧﺮﯨﺶ ﺋﯜﭼﯜﻥ ﻫﻪﻡ ﺟﯩﻨﺎﻳﻰ ﺋﯩﺸﻼﺭ ﻗﺎﻧﯘﻧﯩﻨﯩﯔ ﻣﻪﻟﯘﻡ ﻣﺎﺩﺩﯨﺴﯩﻨﻰ ﻫﻪﻡ ﺷﯘ ﻣﺎﺩﺩﯨﻐﺎ ﺩﺍﺋﯩﺮ ﺋﻪﺩﻟﯩﻴﯩﻠﯩﻚ ﺋﯩﺰﺍﻫﺎﺗﻨﻰ ﻫﻪﻡ ﺟﯩﻨﺎﻳﻰ ﺋﯩﺸﻼﺭ ﺩﻩﯞﺍ ﻗﺎﻧﯘﻧﯩﻨﯩﯔ ﻣﻪﻟﯘﻡ ﻣﺎﺩﺩﯨﺴﯩﻨﻰ ﺑﯩﻠﯩﺸﯩﯖﯩﺰﮔﻪ، ﺷﯘ ﺳﯘﺋﺎﻟﻐﺎ ﺗﻪﺩﺑﯩﻘﻠﯩﺸﯩﯖﯩﺰﻏﺎ ﺗﻮﻏﺮﺍ ﻛﯧﻠﯩﺪﯗ. ﻫﻪﺗﺘﺎ ﺑﯘ ﻣﻪﺳﯩﻠﻪ ﻣﯘﺭﻩﻛﻜﻪﭘﻠﯩﺸﯩﭗ ﺟﯩﻨﺎﻳﻰ ﺋﯩﺸﻼﺭ ﺩﻩﯞﺍ ﻗﺎﻧﯘﻧﯩﻐﺎ ﺩﺍﺋﯩﺮ ﺋﻪﺩﻟﯩﻴﯩﻠﯩﻚ ﺋﯩﺰﺍﻫﺎﺗﻘﺎ ﭼﯧﺘﯩﻠﯩﭗ ﻗﯧﻠﯩﺸﯩﻤﯘ ﻣﯘﻣﻜﯩﻦ. ﺩﯦﻤﻪﻙ، ﺑﯘﻧﺪﺍﻕ ﭼﺎﻏﺪﺍ "ﻫﻪﻣﻤﯩﻨﻰ ﭘﯘﺧﺘﺎ ﻛﯚﺭﯛﺵ" ﺋﻪﺳﻘﺎﺗﯩﺪﯗ. ﺋﯩﻜﻜﯩﻨﭽﯩﺴﻰ، ﺋﻪﺩﻟﯩﻴﻪ ﺋﯩﻤﺘﯩﻬﺎﻧﯩﻐﺎ ﭼﯩﻘﻘﺎﻥ ﺑﻪﺯﻯ ﺳﯘﺋﺎﻟﻼﺭﻧﯩﯔ ﺗﯚﺕ ﺗﺎﻟﻼﺵ ﺟﺎﯞﺍﺑﻰ ﺑﯧﺮﯨﻠﮕﻪﻥ ﺑﻮﻟﯩﺪﯗ، ﺗﻪﻟﻪﭘﺘﻪ "ﭘﻪﻗﻪﺕ ﺑﯩﺮﻧﯩﻼ ﺗﺎﻟﻼﯓ" ﺩﯦﻴﯩﻠﮕﻪﻥ ﺑﻮﻟﯩﺪﯗ. ﻟﯧﻜﯩﻦ ﺳﯩﺰ ﻗﺎﺭﯨﺴﯩﯖﯩﺰ ﺑﯘﻻﺭﻧﯩﯔ ﻫﻪﻣﻤﯩﺴﻰ ﺗﻮﻏﺮﺍ! ﻧﯧﻤﯩﺸﻘﺎ؟ ﭼﯜﻧﻜﻰ ﺑﯧﺮﯨﻠﮕﻪﻥ ﺟﺎﯞﺍﺑﻼﺭ ﺷﯘ ﺳﯘﺋﺎﻟﺪﺍ ﺩﯦﻴﯩﻠﮕﻪﻥ ﻣﻪﺯﻣﯘﻧﻐﺎ ﻳﯧﻘﯩﻨﻼ ﺑﯩﺮ ﻣﻪﺳﯩﻠﯩﻨﯩﯔ ﺗﻮﻏﺮﺍ ﺟﺎﯞﺍﺑﻰ ﺑﻮﻟﻐﺎﻥ ﺑﻮﻟﯩﺪﯗ. ﺋﺎﺩﺩﯨﻲ ﻗﯩﻠﯩﭗ ﺋﯧﻴﺘﻘﺎﻧﺪﺍ "ﺗﯚﺕ ﻛﯧﺰﻩﻙ ﻣﻪﺳﯩﻠﻪ"ﻧﯩﯔ ﺑﯩﺮﯨﻨﻰ ﺳﯘﺋﺎﻟﻐﺎ ﭼﯩﻘﯩﺮﯨﭗ، ﺟﺎﯞﺍﺑﯩﻐﺎ ﺷﯘ "ﺗﯚﺕ ﻛﯧﺰﻩﻙ ﻣﻪﺳﯩﻠﻪ"ﻧﯩﯔ ﻫﻪﻣﻤﻪ ﺗﻮﻏﺮﺍ ﺟﺎﯞﺍﺑﯩﻨﻰ ﺗﯩﺰﯨﭗ ﻗﻮﻳﻐﺎﻥ. ﺑﯘ ﺋﺎﺭﯨﺪﺍ ﭘﻪﻗﻪﺕ "ﻗﯩﻠﭽﯩﻠﯩﻚ" ﻻ ﭘﻪﺭﻕ ﺑﺎﺭ. ﻣﻪﺳﯩﻠﻪﻥ، ﺑﯘ ﻳﯩﻠﻠﯩﻖ ﺋﻪﺩﻟﯩﻴﻪ ﺋﯩﻤﺘﯩﻬﺎﻧﻰ 4- ﻗﻪﻏﻪﺯﻧﯩﯔ 2- ﺳﯘﺋﺎﻟﻰ ﻣﻪﻳﻠﻰ ﺋﻪﻣﻪﻟﯩﻴﻪﺗﺘﻪ ﻳﺎﻛﻰ ﺗﻮﺭﺩﺍ ﻧﺎﻫﺎﻳﯩﺘﻰ ﻛﯚﭖ ﺗﺎﻻﺵ-ﺗﺎﺭﺗﯩﺶ ﭘﻪﻳﺪﺍ ﻗﯩﻠﺪﻯ. (ﺳﯘﺋﺎﻟﻨﯩﯔ ﺋﯚﺯﻯ:
http://www.legalinfo.gov.cn/misc/2007-09/16/content_699092.htm) (ﺋﯘﻳﻐﯘﺭﭼﯩﺴﻰ
www.kanun.cn) ﺋﻪﯓ ﺗﺎﻻﺷﻠﯩﻖ ﻧﯘﻗﺘﺎ " ﺧﺎﻟﯩﻘﻨﯩﯔ ﺋﻮﺳﻤﺎﻧﻨﻰ ﺗﯘﺗﯘﯞﯦﻠﯩﭗ ﺋﯘﻧﯩﯖﺪﯨﻦ 100 ﻣﯩﯔ ﻳﯜﻩﻥ ﺗﻪﻟﻪﭖ ﻗﯩﻠﻐﺎﻥ ﻗﯩﻠﻤﯩﺸﯩﺪﯨﻦ ﻗﺎﻧﺪﺍﻕ ﺟﯩﻨﺎﻳﻪﺕ ﺷﻪﻛﯩﻠﻠﯩﻨﯩﺪﯗ؟ ﻧﯧﻤﻪ ﺋﯜﭼﯜﻥ؟" ﺩﯦﮕﻪﻥ ﺳﯘﺋﺎﻟﺪﯨﻦ ﺋﯩﺒﺎﺭﻩﺕ. ﻣﻪﻥ ﺑﯘ ﺳﯘﺋﺎﻟﻨﻰ ﻛﯚﺭﮔﻪﻧﺪﯨﻦ ﻛﯧﻴﯩﻦ ﻣﯘﻧﺪﺍﻕ ﺋﯩﻜﻜﻰ ﺧﯩﻞ ﻗﺎﺭﺍﺷﻘﺎ ﻛﻪﻟﺪﯨﻢ:
1- ﺑﯘ ﺳﯘﺋﺎﻟﺪﺍ ﺗﯩﻠﻐﺎ ﺋﯧﻠﯩﻨﻐﺎﻥ ﺟﯩﻨﺎﻳﻰ ﻗﯩﻠﻤﯩﺸﻨﯩﯔ ﺷﻪﻛﻠﻰ ﺗﯘﺗﻘﯘﻥ ﻗﯩﻠﯩﺶ ﺟﯩﻨﺎﻳﯩﺘﯩﮕﻪ ﺗﺎﻣﺎﻣﻪﻥ ﺋﻮﺧﺸﺎﭖ ﻛﯧﺘﻪﺗﺘﻰ. ﺷﻪﻛﻠﻰ ﺗﯘﺗﻘﯘﻥ ﻗﯩﻠﯩﺶ ﺟﯩﻨﺎﻳﯩﺘﯩﮕﻪ ﺋﻮﺧﺸﯩﻐﺎﻥ ﺑﯩﺮ ﺳﯘﺋﺎﻟﻨﻰ ﺋﺎﺗﺎﻳﯩﻦ ﭼﯩﻘﯩﺮﯨﭗ، ﻳﻪﻧﻪ ﻧﯧﻤﯩﺸﻘﺎ "ﻗﺎﻧﺪﺍﻕ ﺟﯩﻨﺎﻳﻪﺕ ﺷﻪﻛﯩﻠﻠﯩﻨﯩﺪﯗ؟" ﺩﻩﭖ ﺳﻮﺭﺍﺷﻨﯩﯔ ﺋﯚﺯﻯ ﻗﺎﻧﺪﺍﻕ ﻣﻪﻧﺘﯩﻘﻪ؟ ﻳﻪﻧﻪ ﻛﯧﻠﯩﭗ ﺳﯘﺋﺎﻟﻨﯩﯔ ﺋﯚﺯﯨﺪﯨﻤﯘ "ﺗﯘﺗﻘﯘﻥ ﻗﯩﻠﯩﯟﯦﻠﯩﭗ" ﺩﯦﮕﻪﻥ ﺳﯚﺯ ﺑﺎﺭ، ﺩﯦﻤﻪﻙ، ﺳﯘﺋﺎﻝ ﭼﯩﻘﺎﺭﻏﯘﭼﯩﻨﯩﯔ ﺑﺎﺷﻘﺎ ﺑﯩﺮ ﻣﯘﺩﺩﯨﺌﺎﺳﻰ ﺑﺎﺭ. ﻳﻪﻧﻰ ﺋﻪﮔﻪﺭ ﺑﯘ ﺗﯘﺗﻘﯘﻥ ﻗﯩﻠﯩﺶ ﺟﯩﻨﺎﻳﯩﺘﻰ ﺑﻮﻟﺴﺎ، ﺑﯘ ﺳﯘﺋﺎﻟﻨﻰ ﭼﯩﻘﺎﺭﻣﯩﻐﺎﻥ ﺑﻮﻻﺗﺘﻰ. ﺳﯘﺋﺎﻝ ﭼﯩﻘﺎﺭﻏﯘﭼﻰ ﺋﯩﻨﺘﺎﻳﯩﻦ ﻧﺎﺯﯗﻙ ﺑﯩﺮ ﻣﻪﺳﯩﻠﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﭖ، ﺋﯩﻤﺘﯩﻬﺎﻥ ﺑﻪﺭﮔﯜﭼﯩﻨﯩﯔ ﻛﯩﭽﯩﻜﻜﯩﻨﻪ ﺑﯩﺮ ﻳﯧﺮﯨﻨﻰ ﺳﯩﻨﺎﯞﺍﺗﯩﺪﯗ. ﺷﯘﯕﺎ ﺑﯘ ﺗﯘﺗﻘﯘﻥ ﻗﯩﻠﯩﺶ ﺟﯩﻨﺎﻳﯩﺘﻰ ﺋﻪﻣﻪﺱ، ﭼﯜﻧﻜﻰ ﺑﯘ ﺋﯩﻤﺘﯩﻬﺎﻧﻤﯘ ﺋﺎﺩﻩﺗﺘﯩﻜﻰ ﻗﺎﻧﯘﻥ ﺳﺎﯞﺍﺗﻠﯩﺮﯨﻨﻰ ﺋﻮﻣﯘﻣﻼﺷﺘﯘﺭﯗﺵ ﺋﯩﻤﺘﯩﻬﺎﻧﻰ ﺋﻪﻣﻪﺱ.
2- ﮔﻪﺭﭼﻪ ﻣﻪﻥ ﻳﯘﻗﯩﺮﯨﻘﻰ ﺧﯩﻴﺎﻟﻨﻰ ﻗﯩﻠﻐﺎﻥ ﺑﻮﻟﺴﺎﻣﻤﯘ، ﻟﯧﻜﯩﻦ ﻳﻪﻧﯩﻤﯘ ﺑﯩﺮ ﻗﻪﺩﻩﻡ ﺋﯩﻠﮕﯩﺮﯨﻠﻪﭖ، ﺑﯘ ﻗﺎﺭﯨﺸﯩﻤﻨﻰ ﻗﺎﻧﯘﻥ ﻣﺎﺩﺩﯨﻠﯩﺮﻯ ﺑﯩﻠﻪﻥ ﺋﯩﺴﭙﺎﺗﻼﺷﻘﺎ ﺗﯩﺮﯨﺸﺘﯩﻢ. ﺑﯘ ﻗﺎﻧﯘﻥ ﻣﺎﺩﺩﯨﻠﯩﺮﯨﺪﺍ ﺑﯩﯟﺍﺳﯩﺘﻪ ﺋﻪﻛﯩﺲ ﺋﻪﺗﻤﻪﻳﺪﯗ، ﺋﻪﺩﻟﯩﻴﯩﻠﯩﻚ ﺋﯩﺰﺍﻫﺎﺗﻼﺭﺩﺍ ﻛﯚﺭﯛﻟﯜﺷﻰ ﻣﯘﻣﻜﯩﻦ. ﻣﯧﻨﯩﯔ ﻛﺎﻟﻼﻣﻐﺎ "ﺗﯘﺗﻘﯘﻥ ﻗﯩﻠﯩﺶ ﺑﯩﻠﻪﻥ ﺑﯘﻻﯕﭽﯩﻠﯩﻖ ﺟﯩﻨﺎﻳﯩﺘﯩﻨﯩﯔ ﭘﻪﺭﻗﯩﻨﯩﯔ ﺑﯩﺮﻯ، ﺋﻪﮔﻪﺭ ﻗﯩﻠﻤﯩﺸﭽﻰ ﺑﯩﺮﺍﯞﻧﻰ ﻗﺎﻧﯘﻧﺴﯩﺰ ﺗﯘﺗﯘﯞﯦﻠﯩﭗ، ﺋﯜﭼﯩﻨﭽﻰ ﻛﯩﺸﯩﺪﯨﻦ ﻣﺎﻝ-ﻣﯜﻟﯜﻙ ﺗﻪﻟﻪﭖ ﻗﯩﻠﺴﺎ، ﺗﯘﺗﻘﯘﻥ ﻗﯩﻠﯩﺶ ﺑﻮﻟﯩﺪﯗ، ﺋﯚﺯﯨﺪﯨﻦ ﺗﻪﻟﻪﭖ ﻗﯩﻠﺴﺎ ﺑﯘﻻﯕﭽﯩﻠﯩﻖ ﺑﻮﻟﯩﺪﯗ" ﺩﯦﮕﻪﻥ ﻫﯚﻛﯜﻡ ﺑﻮﻟﺪﻯ. ﻣﻪﻥ ﺑﯘ ﻫﯚﻛﯜﻣﻨﻰ ﺟﯩﻨﺎﻳﻰ ﺋﯩﺸﻼﺭ ﻗﺎﻧﯘﻧﯩﻨﯩﯔ ﻳﯧﺸﯩﻤﯩﺪﻩ، ﺋﻪﺩﻟﯩﻴﯩﻠﯩﻚ ﺋﯩﺰﺍﻫﺎﺗﺘﺎ ﻳﺎﻛﻰ 万国 <
http://www.wanguoschool.net>(
http://www.wanguoschool.net) ﻧﯩﯔ ﻛﯩﺘﺎﺑﯩﺪﯨﻜﻰ ﺗﻪﻫﻠﯩﻠﻠﻪﺭﺩﻩ ﻛﯚﺭﮔﻪﻧﻠﯩﻜﯩﻤﻨﻰ ﺋﻪﺳﻠﯩﻴﻪﻟﻤﯩﺪﯨﻢ، ﻧﯧﻤﯩﻼ ﺑﻮﻟﻤﯩﺴﯘﻥ، ﺷﯘﻧﺪﺍﻕ ﺑﯩﺮ ﻫﯚﻛﯜﻡ ﺧﺎﺭﺍﻛﺘﯧﺮﻟﯩﻚ ﺗﻪﻫﻠﯩﻠﻨﻰ ﻛﯚﺭﮔﻪﻧﻠﯩﻜﯩﻢ ﺋﯧﺴﯩﻤﺪﻩ، ﺷﯘﻧﯩﯔ ﺑﯩﻠﻪﻥ ﻣﻪﻥ ﺋﯘﻧﯩﯔ ﺧﺎﺭﺍﻛﺘﯧﺮﯨﻨﻰ "ﺑﯘﻻﯕﭽﯩﻠﯩﻖ" ﺩﻩﭖ ﺑﯧﻜﯩﺘﺘﯩﻢ، ﺑﯘ ﺟﺎﯞﺍﺑﯩﻢ ﺑﯩﻠﻪﻥ ﻣﯩﻨﯩﺴﺘﯩﺮﻟﯩﻚ ﭼﯩﻘﺎﺭﻏﺎﻥ ﺋﯚﻟﭽﻪﻣﻠﯩﻚ ﺟﺎﯞﺍﺏ ﺑﯩﺮﺩﻩﻙ ﺑﻮﻟﯘﭖ ﭼﯩﻘﺘﻰ. ﻟﯧﻜﯩﻦ ﺑﯘ ﺟﺎﯞﺍﺏ ﻳﻪﻧﯩﻼ ﻧﯘﺭﻏﯘﻥ ﻛﯩﺸﯩﻠﻪﺭﻧﯩﯔ ﻛﺎﻟﻠﯩﺴﯩﺪﯨﻦ ﺋﯚﺗﻤﻪﻛﻠﯩﻚ.
ﻧﯧﻤﯩﻨﻰ ﺋﯚﮔﯩﻨﯩﺶ
ﺋﻪﺩﻟﯩﻴﻪ ﻣﯩﻨﯩﺴﺘﯩﺮﻟﯩﻜﻰ ﻫﻪﺭﻳﯩﻠﻰ 3-ﺋﺎﻳﻼﺭﺩﺍ "ﺋﻪﺩﻟﯩﻴﻪ ﺋﯩﻤﺘﯩﻬﺎﻥ ﺗﯩﺰﯨﺴﻰ" ﻧﺎﻣﻠﯩﻖ ﺑﯩﺮ ﻛﯩﺘﺎﺏ ﭼﯩﻘﯩﺮﯨﺪﯗ، 6- ﺋﺎﻳﻼﺭﺩﺍ ﺋﯘﻳﻐﯘﺭﭼﯩﻐﺎ ﺗﻪﺭﺟﯩﻤﻪ ﻗﯩﻠﯩﻨﯩﺪﯗ. ﺑﯘ ﻫﯚﻛﯜﻣﻪﺕ ﺗﻪﺭﻩﭖ ﺗﻪﻣﯩﻨﻠﻪﻳﺪﯨﻐﺎﻥ ﺑﯩﺮﺩﯨﻨﺒﯩﺮ ﭘﺎﻳﺪﯨﻠﯩﻨﯩﺶ ﻣﺎﺗﯧﺮﯨﻴﺎﻟﻰ ﺑﻮﻟﯘﭖ، ﺋﯘﻧﯩﯖﺪﯨﻦ ﺑﺎﺷﻘﺎ ﺑﯩﺮﻩﺭ ﻛﯩﺘﺎﺏ-ﻣﺎﺗﯧﺮﯨﻴﺎﻝ ﭼﯩﻘﺎﺭﻣﺎﻳﺪﯗ ﯞﻩ ﺗﻪﯞﯨﺴﯩﻴﻪ ﻗﯩﻠﻤﺎﻳﺪﯗ. 2007-ﻳﯩﻠﻰ ﺑﯘ ﻛﯩﺘﺎﺑﻨﯩﯔ ﺋﯘﻳﻐﯘﺭﭼﯩﺴﻰ ﭼﻮﯓ 16 ﻛﻪﺳﻠﻪﻣﺪﻩ 406 ﺑﻮﻟﯘﭖ ﭼﯩﻘﺘﻰ. ﺩﯦﻤﻪﻙ، ﺋﻪﺩﻟﯩﻴﻪ ﺋﯩﻤﺘﯩﻬﺎﻧﻰ ﺑﯧﺮﯨﺶ ﺋﯜﭼﯜﻥ ﺋﯚﮔﯩﻨﯩﺪﯨﻐﺎﻥ ﻣﺎﺗﯧﺮﯨﻴﺎﻟﻼﺭﻧﯩﯔ ﻣﯘﻧﺪﻩﺭﯨﺠﯩﺴﻰ 406 ﺑﻪﺗﻠﯩﻚ ﺑﯩﺮ ﻛﯩﺘﺎﺏ ﺑﻮﻟﺪﻯ ﺩﯦﮕﻪﻥ ﮔﻪﭖ! ﺋﻪﮔﻪﺭ ﻣﻮﺷﯘ ﻛﯩﺘﺎﺑﺘﺎ ﺗﯩﺰﯨﻠﻐﺎﻥ ﻣﺎﺗﯧﺮﯨﻴﺎﻟﻼﺭﻧﻰ ﺑﯩﺮ-ﺑﯩﺮﻟﻪﭖ ﺗﯩﺰﺳﯩﯖﯩﺰ، ﺑﻪﻟﻜﯩﻢ ﻛﯩﺸﯩﻨﻰ ﭼﯜﭼﯜﺗﯩﺪﯨﻐﺎﻥ ﺑﯩﺮ ﺳﺎﻥ ﺑﻮﻟﯘﺷﻰ ﻣﯘﻣﻜﯩﻦ. ﻟﯧﻜﯩﻦ ﺋﻪﻧﺴﯩﺮﻩﺷﻨﯩﯔ ﻫﺎﺟﯩﺘﻰ ﻳﻮﻕ. ﺑﯘ "ﺗﯩﺰﯨﺲ" ﻗﺎ ﺗﯩﺰﯨﻠﻐﺎﻥ ﻣﺎﺗﯧﺮﯨﻴﺎﻟﻼﺭﻧﯩﯔ ﻫﻪﻣﻤﯩﺴﯩﻨﻰ ﻛﯚﺭﯛﭖ ﭼﯩﻘﯩﺶ ﺗﻪﺱ، ﻫﻪﻡ ﻫﺎﺟﯩﺘﯩﻤﯘ ﺑﻮﻟﻤﯩﺴﺎ ﻛﯧﺮﻩﻙ. ﻣﯘﻫﯩﻤﻰ- ﻧﯘﻗﺘﯩﺴﯩﻨﻰ ﺗﯘﺗﯘﺵ. ﻣﻪﻥ ﺑﯘ ﺋﯩﻤﺘﯩﻬﺎﻧﻐﺎ ﺗﻪﻳﻴﺎﺭﻟﯩﻖ ﻗﯩﻠﻐﯘﭼﯩﻼﺭﻏﺎ ﻳﻪﻧﯩﻼ 万国 ﻧﯩﯔ ﻳﯜﺭﯛﺷﻠﯜﻙ ﻛﯩﺘﺎﺑﻠﯩﺮﯨﻨﻰ ﺗﻪﯞﯨﺴﯩﻴﻪ ﻗﯩﻠﯩﻤﻪﻥ، ﺑﯘ ﻛﯩﺘﺎﺑﻼﺭ ﻫﻪﻗﯩﻘﻪﺗﻪﻥ ﻗﺎﻟﺘﯩﺴﻜﻪﻥ! ﺋﯘﻧﯩﯖﺪﺍ ﺳﯩﺰﻧﯩﯔ ﺋﻪﺩﻟﯩﻴﻪ ﺋﯩﻤﺘﯩﻬﺎﻧﯩﻐﺎ ﺗﻪﻳﻴﺎﺭﻟﯩﻖ ﻗﯩﻠﯩﺸﯩﯖﯩﺰ ﺋﯜﭼﯜﻥ ﻫﻪﻣﻤﻪ ﻧﯧﻤﻪ ﺑﺎﺭ ﺩﯦﺴﯩﻤﯘ ﺋﺎﺭﺗﯘﻕ ﻛﻪﺗﻤﻪﻳﺪﯗ. ﻣﻪﻥ ﻛﯚﺭﮔﻪﻥ ﺧﻪﻧﺰﯗﭼﻪ ﻧﯘﺳﺨﯩﺴﯩﻨﯩﯔ ﺋﯩﺴﻤﻰ: 2007年国家司法考试专题讲座系列
ﺑﯘ ﻛﯩﺘﺎﺏ ﺑﯘﻟﺘﯘﺭ ﺋﯘﻳﻐﯘﺭﭼﯩﻐﺎ ﺗﻪﺭﺟﯩﻤﻪ ﻗﯩﻠﯩﻨﯩﭗ ﺗﺎﺭﻗﯩﺘﯩﻠﺪﻯ، ﺟﻪﻣﺌﯩﻲ 10 ﻛﯩﺘﺎﺏ. ﺗﻪﺭﺟﯩﻤﯩﺴﯩﺪﻩ ﻗﯘﻣﺪﻩﻙ ﺧﺎﺗﺎﻟﯩﻘﻼﺭ ﺳﺎﻗﻼﻧﻐﺎﻥ! ﻣﯘﻧﺪﺍﻗﭽﻪ ﺩﯦﮕﻪﻧﺪﻩ، ﺳﯩﺰ ﻫﻪﺭ ﺑﯩﺮ ﺑﻪﺗﺘﯩﻦ 10 ﺩﯨﻦ ﺋﺎﺭﺗﯘﻕ ﺋﯩﻤﻼ ﺧﺎﺗﺎﻟﯩﻘﻰ، ﺑﯩﺮﺩﯨﻦ ﺋﺎﺭﺗﯘﻕ ﻣﻪﺯﻣﯘﻥ ﺧﺎﺗﺎﻟﯩﻘﯩﻨﻰ ﺗﺎﭘﺎﻻﻳﺴﯩﺰ. ﺑﻪﺯﻯ ﺟﺎﻳﻼﺭﺩﺍ ﻗﺎﻧﯘﻥ ﻣﺎﺩﺩﯨﻠﯩﺮﯨﻤﯘ ﺧﺎﺗﺎ ﺑﯧﺴﯩﻠﻐﺎﻥ، ﻣﻪﺳﯩﻠﻪﻥ، "ﺟﯩﻨﺎﻳﻪﺕ ﺑﻮﻟﯩﺪﯗ" ﺩﯦﮕﯩﻨﻰ "ﺟﯩﻨﺎﻳﻪﺕ ﺑﻮﻟﻤﺎﻳﺪﯗ" ﺩﻩﭖ ﺑﯧﺴﯩﻠﯩﭗ ﻗﺎﻟﻐﺎﻥ. ﻟﯧﻜﯩﻦ ﺋﻪﺳﻠﻰ ﻛﯩﺘﺎﺑﻨﯩﯔ ﻗﯘﺭﯗﻟﻤﯩﺴﻰ ﻳﺎﺧﺸﻰ ﺑﻮﻟﻐﺎﭼﻘﺎ، ﻣﻮﺷﯘ ﺧﺎﺗﺎﻟﯩﻘﻼﺭﻧﻰ ﺗﯜﺯﻩﺗﺴﯩﻼ ﻳﺎﺧﺸﻰ ﺑﯩﺮ ﻣﺎﺗﯧﺮﯨﻴﺎﻝ ﺑﻮﻻﻻﻳﺪﯗ. ﻣﻪﻥ ﺑﺎﺷﺘﺎ ﺑﯘ ﺋﯘﻳﻐﯘﺭﭼﻪ ﻛﯩﺘﺎﺏ ﺑﯩﻠﻪﻥ ﻗﺎﻧﯘﻥ ﻣﺎﺩﺩﯨﻠﯩﺮﻯ ﺑﯧﺴﯩﻠﻐﺎﻥ ﺑﺎﺷﻘﺎ ﺑﯩﺮ ﻣﺎﺗﯧﺮﯨﻴﺎﻟﻨﻰ ﺳﯧﻠﯩﺸﺘﯘﺭﯗﭖ ﻛﯚﺭﯛﭖ ﺋﯘ ﺧﺎﺗﺎﻟﯩﻘﻼﺭﻧﻰ ﺗﯜﺯﻩﺗﺘﯩﻢ، ﻛﯧﻴﯩﻦ ﺧﻪﻧﺰﯗﭼﯩﺴﻰ ﺋﻪﻛﻪﻟﺪﯛﺭﯛﭖ، ﺧﻪﻧﺰﯗﭼﯩﺴﯩﻐﺎ ﺳﯧﻠﯩﺸﺘﯘﺭﺩﯗﻡ، ﺑﻪﺯﻯ ﺟﺎﻳﻼﺭﻧﻰ ﭘﯜﺗﯜﻧﻠﻪﻱ ﺧﻪﻧﺰﯗﭼﯩﺪﯨﻦ ﻛﯚﺭﺩﯛﻡ. ﺋﯘﺳﯘﻟﯘﻡ:
ﻣﯩﺴﺎﻝ: ﺟﯩﻨﺎﻳﻰ ﺋﯩﺸﻼﺭ ﻗﺎﻧﯘﻧﻰ
1- ﺋﺎﯞﯞﺍﻝ ﺟﯩﻨﺎﻳﻰ ﺋﯩﺸﻼﺭ ﻗﺎﻧﯘﻧﯩﻨﯩﯔ ﺩﻩﻝ ﺋﯚﺯﯨﻨﻰ ﻣﺎﺩﺩﯨﻼﺭ ﺑﻮﻳﯩﭽﻪ ﭘﯘﺧﺘﺎ ﺋﻮﻗﯘﭖ ﭼﯩﻘﺘﯩﻢ.
2- "ﺟﯩﻨﺎﻳﻰ ﺋﯩﺸﻼﺭ ﻗﺎﻧﯘﻧﯩﻨﯩﯔ ﻳﯧﺸﯩﻤﻰ" ﺩﯦﮕﻪﻥ ﻛﯩﺘﺎﺑﻨﻰ ﺗﻪﭘﺴﯩﻠﯩﻲ ﺋﻮﻗﯘﭖ ﭼﯩﻘﺘﯩﻢ.
3- "ﺟﯩﻨﺎﻳﻰ ﺋﯩﺸﻼﺭﻏﺎ ﺩﺍﺋﯩﺮ ﺋﻪﺩﻟﯩﻴﯩﻠﯩﻚ ﺋﯩﺰﺍﻫﺎﺗﻼﺭ ﺗﻮﭘﻠﯩﻤﻰ" ﻧﺎﻣﻠﯩﻖ ﻛﯩﺘﺎﺑﺘﯩﻦ ﻣﻪﻣﻠﯩﻜﻪﺗﻠﯩﻚ ﺧﻪﻟﻖ ﻗﯘﺭﯗﻟﺘﯩﻴﻰ، ﺋﺎﻟﯩﻲ ﺳﻮﺕ، ﺋﺎﻟﯩﻲ ﺗﻪﭘﺘﯩﺶ، ﺝ ﺥ ﻣﯩﻨﯩﺴﺘﯩﺮﻟﯩﻜﻰ، ﺋﻪﺩﻟﯩﻴﻪﻣﯩﻨﯩﺴﺘﯩﺮﻟﯩﻜﻰ ﻗﺎﺗﺎﺭﻟﯩﻖ ﺋﻮﺭﯗﻧﻼﺭﻧﯩﯔ ﻣﯘﻧﺎﺳﯩﯟﻩﺗﻠﯩﻚ ﺋﯩﺰﺍﻫﺎﺗﻠﯩﺮﯨﻨﻰ ﺗﻪﭘﺴﯩﻠﯩﻲ ﻛﯚﺭﯛﭖ ﭼﯩﻘﺘﯩﻢ.
4- ﺟﯩﻨﺎﻳﻰ ﺋﯩﺸﻼﺭ ﻗﺎﻧﯘﻧﯩﻨﯩﯔ ﻣﺎﺩﺩﯨﻠﯩﺮﯨﻨﻰ ﻳﻪﻧﻪ ﺑﯩﺮ ﻗﯧﺘﯩﻢ ﻛﯚﺭﯛﭖ ﭼﯩﻘﺘﯩﻢ.
5- ﻳﯘﻗﯩﺮﯨﻘﻰ 10 ﻛﯩﺘﺎﺑﻨﯩﯔ ﻣﻮﺷﯘﻧﯩﯖﻐﺎ ﻣﯘﻧﺎﺳﯩﯟﻩﺗﻠﯩﻚ 3 ﻛﯩﺘﺎﺑﯩﻨﻰ ﻛﯚﺭﯛﭖ ﭼﯩﻘﺘﯩﻢ ﯞﻩ ﺑﯘ ﺋﺎﺭﯨﺪﺍ ﺟﯩﻨﺎﻳﻰ ﺋﯩﺸﻼﺭ ﻗﺎﻧﯘﻧﯩﻨﯩﯔ ﺑﻪﺯﻯ ﻣﺎﺩﺩﯨﻠﯩﺮﯨﻨﻰ ﻳﻪﻧﻪ ﻛﯚﺭﺩﯛﻡ. ﺋﻪﻣﻪﻟﯩﻴﻪﺗﺘﻪ ﺑﯘ ﻛﯩﺘﺎﺑﺘﯩﻤﯘ ﻣﯘﻫﯩﻢ ﻣﺎﺩﺩﯨﻼﺭ ﻧﻪﻗﯩﻞ ﺋﯧﻠﯩﻨﻐﺎﻥ.
ﺑﯘ ﺧﯩﻞ ﺋﯚﮔﯩﻨﯩﺸﻜﻪ ﺧﯧﻠﻰ ﻛﯚﭖ ﯞﺍﻗﯩﺖ ﯞﻩ ﺯﯦﻬﯩﻦ ﻛﯧﺘﯩﺪﯗ، ﺷﯘﻧﺪﺍﻗﺘﯩﻤﯘ ﭘﯘﺧﺘﯩﺮﺍﻕ ﺑﻮﻟﯩﺪﯨﻜﻪﻥ. ﻣﯧﻨﯩﯖﭽﻪ ﺑﺎﺷﻘﺎ ﻗﺎﻧﯘﻧﻼﺭﻧﯩﻤﯘ ﺷﯘﻧﺪﺍﻕ ﺋﯚﮔﻪﻧﺴﻪ ﺑﯩﺮ ﻗﻪﺩﻩﺭ ﻳﺎﺧﺸﻰ ﺋﯚﮔﻪﻧﮕﯩﻠﻰ ﺑﻮﻟﯩﺪﯗ. ﺑﻮﻟﯘﭘﻤﯘ ﻫﻪﻕ ﺗﻪﻟﻪﭖ ﻗﺎﻧﯘﻧﯩﻨﻰ.
ﺑﯘ 10 ﻛﯩﺘﺎﺏ (ﻳﺎﻛﻰ ﺧﻪﻧﺰﯗﭼﻪ ﻳﻪﺗﺘﻪ ﻛﯩﺘﺎﺏ) ﻧﯩﯔ ﻗﯘﺭﯗﻟﻤﯩﺴﻰ ﻣﯘﻧﺪﺍﻕ:
ﻣﯩﺴﺎﻝ: ﺷﯩﺮﻛﻪﺕ ﻗﺎﻧﯘﻧﻰ
1- ﺋﺎﻧﺎ ﻗﺎﻧﯘﻥ ﻣﺎﺩﺩﯨﻠﯩﺮﻯ:
ﻛﯩﺘﺎﺑﻨﯩﯔ ﺷﯩﺮﻛﻪﺕ ﻗﺎﻧﯘﻧﯩﻐﺎ ﻣﯘﻧﺎﺳﯩﯟﻩﺗﻠﯩﻚ ﻗﯩﺴﻤﯩﺪﺍ، ﺷﯩﺮﻛﻪﺕ ﻗﺎﻧﯘﻧﯩﺪﯨﻜﻰ ﺋﻪﯓ ﻣﯘﻫﯩﻢ ﺩﻩﭖ ﻗﺎﺭﺍﻟﻐﺎﻥ ﻣﺎﺩﺩﯨﻼﺭ ﻣﻮﺷﯘ ﺗﯧﻤﺎ ﺋﺎﺳﺘﯩﺪﺍ ﻧﻪﻗﯩﻞ ﺳﯜﭘﯩﺘﯩﺪﻩ ﺑﯧﺮﯨﻠﯩﺪﯗ. ﺑﯘ ﺋﺎﺩﻩﺗﺘﻪ ﺑﯩﺮ ﻧﻪﭼﭽﻪ ﻣﺎﺩﺩﺍ ﺑﯩﻠﻪﻧﻼ ﭼﻪﻛﻠﯩﻨﯩﺪﯗ.
2- ﻣﯘﻧﺎﺳﯩﯟﻩﺗﻠﯩﻚ ﻗﺎﻧﯘﻥ ﻧﻪﺯﻩﺭﯨﻴﯩﺴﻰ:
ﺑﯘ ﻗﯩﺴﯩﻤﺪﺍ ﺷﯩﺮﻛﻪﺕ ﻗﺎﻧﯘﻧﯩﻨﻰ ﭼﯩﻘﯩﺮﯨﺸﻨﯩﯔ ﻧﻪﺯﻩﺭﯨﻴﻪ ﺋﺎﺳﺎﺳﻰ ﺳﯚﺯﻟﯩﻨﯩﺪﯗ. ﺑﯘﻣﯘ ﺋﺎﻧﭽﻪ ﻛﯚﭖ ﺑﻮﻟﻤﺎﻳﺪﯗ، ﻟﯧﻜﯩﻦ ﻧﯘﻗﺘﯩﻠﯩﻖ، ﻣﯧﻐﯩﺰﻟﯩﻖ ﻣﻪﺯﻣﯘﻧﻼﺭ ﺑﻮﻟﯩﺪﯗ.
3- ﺑﯩﻠﯩﻢ ﻧﯘﻗﺘﯩﻠﯩﺮﻯ ﯞﻩ ﺋﻪﻣﻪﻟﯩﻲ ﻣﯩﺴﺎﻟﻼﺭ:
ﺑﯘﻧﯩﯖﺪﺍ ﻧﻪﺯﻩﺭﯨﻴﯩﻤﯘ، ﻗﺎﻧﯘﻥ ﻣﺎﺩﺩﯨﻠﯩﺮﻯ، ﻣﯩﺴﺎﻝ، ﺗﻪﺩﺑﯩﻘﻼﺵ، ﺋﯩﻤﺘﯩﻬﺎﻧﻐﺎ ﺗﺎﻗﺎﺑﯩﻞ ﺗﯘﺭﯗﺵ... ﻗﺎﺗﺎﺭﻟﯩﻖ ﻣﻪﺯﻣﯘﻧﻼﺭ ﺗﻮﻟﯩﻤﯘ ﺳﯩﺴﺘﯧﻤﯩﻠﯩﻖ، ﺗﻪﭘﺴﯩﻠﯩﻲ ﺋﺎﻧﺎﻟﯩﺰ ﻗﯩﻠﯩﻨﯩﺪﯗ.
4- ﺑﺎﻻ ﻗﺎﻧﯘﻥ ﻣﺎﺩﺩﯨﻠﯩﺮﻯ:
ﺷﯩﺮﻛﻪﺕ ﻗﺎﻧﯘﻧﯩﻨﯩﯔ "ﺋﺎﻧﺎ ﻗﺎﻧﯘﻥ ﻣﺎﺩﺩﯨﻠﯩﺮﻯ" ﺩﯦﮕﻪﻥ ﻗﯩﺴﻤﯩﻐﺎ ﺋﯧﻠﯩﻨﻤﯩﻐﺎﻥ، ﺧﯧﻠﻰ ﻣﯘﻫﯩﻢ ﺩﻩﭖ ﻗﺎﺭﯨﻐﺎ ﻣﻪﺯﻣﯘﻧﻠﯩﺮﻯ، ﻣﯘﻧﺎﺳﯩﯟﻩﺗﻠﯩﻚ ﺋﻪﺩﻟﯩﻴﯩﻠﯩﻚ ﺋﯩﺰﺍﻫﺎﺗﻼﺭﻧﯩﯔ ﻣﯘﻫﯩﻢ ﻧﯘﻗﺘﯩﻠﯩﺮﻯ ﺑﯘ ﺟﺎﻳﻐﺎ ﺑﯧﺮﯨﻠﯩﺪﯗ.
ﻣﯘﻧﺪﺍﻗﭽﻪ ﺩﯦﮕﻪﻧﺪﻩ، ﺳﯩﺰ ﻳﯘﻗﯩﺮﯨﻘﻰ ﺗﯚﺕ ﺑﯚﻟﻪﻛﻠﯩﻚ ﻟﯧﻜﺴﯩﻴﻪ ﺋﺎﺭﻗﯩﻠﯩﻖ ﺷﯩﺮﻛﻪﺕ ﻗﺎﻧﯘﻧﻰ ﻫﻪﻗﻘﯩﺪﻩ ﺋﻪﺗﺮﺍﭘﻠﯩﻖ ﭼﯜﺷﻪﻧﭽﯩﮕﻪ ﺋﯩﮕﻪ ﺑﻮﻟﯩﺴﯩﺰ. ﻟﯧﻜﯩﻦ ﻣﻪﻥ ﺷﯘﻧﻰ ﻳﻪﻧﻪ ﺗﻪﻛﯩﺘﻠﻪﻳﻤﻪﻧﻜﻰ، ﺑﯘ 10 ﻛﯩﺘﺎﺏ ﺑﻮﻟﺴﯘﻥ ﻳﺎﻛﻰ ﺧﻪﻧﺰﯗﭼﯩﺴﻰ ﯞﻩ ﻳﺎﻛﻰ ﺑﺎﺷﻘﯩﺴﻰ ﺑﻮﻟﺴﯘﻥ، ﺷﯘ ﻛﯩﺘﺎﺑﻨﻰ ﻗﻮﻟﻐﺎ ﺋﯧﻠﯩﺸﺘﯩﻦ ﺑﯘﺭﯗﻥ ﭼﻮﻗﯘﻡ ﺋﻪﺳﻠﻰ ﻗﺎﻧﯘﻥ ﻣﺎﺩﺩﯨﻠﯩﺮﻯ ﯞﻩ ﺋﻪﺩﻟﯩﻴﯩﻠﯩﻚ ﺋﯩﺰﺍﻫﺎﺗﻼﺭﻧﻰ ﺋﯩﻨﺘﺎﻳﯩﻦ ﺋﻪﺳﺘﺎﻳﯩﺪﯨﻞ ﻛﯚﺭﯛﺵ، ﺋﺎﻧﺪﯨﻦ ﺑﺎﺷﻘﺎ ﭘﺎﻳﺪﯨﻠﯩﻨﯩﺶ ﻣﺎﺗﯧﺮﯨﻴﺎﻟﻠﯩﺮﯨﻨﻰ ﻛﯚﺭﯛﺵ ﻛﯧﺮﻩﻙ.
万国 ﻧﯩﯔ ﻳﯘﻗﯩﺮﯨﻘﻰ ﺧﻪﻧﺰﯗﭼﻪ ﻛﯩﺘﺎﺑﯩﻨﯩﯔ ﻛﻪﻳﻨﯩﺪﻩ ﻳﻪﻧﻪ ﺑﺎﺷﻘﺎ ﻛﯩﺘﺎﺑﻼﺭﻧﯩﯔ ﺗﯩﺰﯨﻤﻠﯩﻜﯩﻤﯘ ﺑﺎﺭ ﻳﺎﻛﻰ ﺳﯩﺰ ﺑﯘ ﺗﻮﺭ ﺑﻪﺗﺘﯩﻦ ﻣﯘﻧﺎﺳﯩﯟﻩﺗﻠﯩﻚ ﺋﯘﭼﯘﺭﻻﺭﻏﺎ ﺋﯧﺮﯨﺸﻪﻟﻪﻳﺴﯩﺰ:
http://www.wanguoschool.net