ئۇچراشقاندا
(ئابدۇرېھىم ئۆتكۈر)
سەھەر كۆرگەن چېغىم كۆزۈڭ سۇلتانىنى،
دېدىم سۇلتانمۇ سەن ؟ ئۇ دېدى ياق-ياق.
كۆزلىرى يالقۇنلۇق، قوللىرى خېنىلىق،
دېدىم چولپانمۇ سەن ؟ ئۇ دېدى ياق-ياق.
دېدىم ئىسمىڭ نىمە؟ دېدى ئايخاندۇ،
دېدىم يۇرتۇڭ قەيەر ؟ دىدى تۇرپاندۇر.
دېدىم باشىڭدىكى ؟ دىدى ھىجراندۇر،
دېدىم ھەيرانمۇسەن ؟ ئۇ دېدى ياق-ياق.
دېدىم ئايغا ئوخشار، دېدى يۈزۈممۇ؟
دېدىم يۈلتۈز كەبى، دېدى كۆزۈممۇ؟
دېدىم يالقۇن چاچار، دېدى سۆزۈممۇ؟
دېدىم ۋولقانمۇسەن ؟ ئۇ دېدى ياق-ياق.
دېدىم قىياق نەدۇر ؟ دېدى قاشىمدۇر،
دېدىم قۇندۇز نەدۇر ؟ دېدى ساچىمدۇر.
دېدىم ئون بەش نەدۇر ؟ دېدى ياشىمدۇر،
دېدىم جانانمۇسەن ؟ ئۇ دېدى ياق-ياق.
دېدىم دېڭىز نەدۇر ؟ دېدى قەلبىمدۇر،
دېدىم رەنە نەدۇر ؟ دېدى لېۋىمدۇر،
دېدىم شېكەر نەدۇر ؟ دىدى تېلىمدۇر،
دېدىم بىر ئاغزىمە ؟ ئۇ دېدى ياق-ياق.
دېدىم زەنجىر تۇرار، دېدى بوينۇمدا،
دېدىم ئۆلۈم باردۇ، دېدى يولۇمدا.
دېدىم بىلەيزۈكچۇ ؟ دېدى قولۇمدا،
دېدىم قۇرقارمۇسەن ؟ ئۇ دېدى ياق-ياق.
دېدىم نىچۈن قورقماسسەن؟ دېدى تەڭرىم بار،
دېدىم يەنىچۇ ؟ دېدى خەلقىم بار.
دېدىم يەنە يوقمۇ ؟ دېدى روھىم بار،
دېدىم شۇرانمۇسەن ؟ ئۇ دېدى ياق-ياق.
دېدىم ئىستەك نەدۇر ؟ دېدى گۈلۈمدۇر،
دېدىم چېلىشماققا ؟ دېدى يولۇمدۇر.
دېدىم ئۆتكۈر نىمەڭدۇر ؟ دېدى قولۇمدۇر،
دېدىم ساتارمۇسەن ؟ ئۇ دېدى ياق-ياق.
بۇ يازمىنى ئاخىرىدا bilqut تەھرىرلىگەن. ۋاقتى 2014-2-11 07:26 PM