تارىختىكى ئەڭ كۆپ زېمىننى بويسۇندۇرغان ئون شەخس
1. چىڭگىزخان
(1162- 1227)
1206- يىلىدىن 1227- يىلىغىچە موڭغۇللاردىن كېلىپ چىققان چىڭگىزخان تەخمىنەن 4 مىليون 860 مىڭ كۇۋادىرات ئېنگىلىز مىلى زېمىننى بويسۇندۇردى. ئۇ بويسۇندۇرغان زېمىنلار شەرقتە تىنچ ئوكيان قىرغاقلىرىدىن غەرپتە كاسپى دېڭىزىغىچە بولۇپ، ئۇنىڭ ئېمپىرىيىسى جۇڭگونىڭ شىمالىي يېرىمى، جەنۇبىي سىبىرىيە ۋە ئوتتۇرا ئاسىيانى ئۆز ئىچىگە ئالغان.
2. ئېمپىراتور ئالكساندىر (ئىسكەندەر زۇلقەرنەيىن)
(مىلاىديەدىن بۇرۇنقى 356- يىلىدىن مىلادىيەدىن بۇرۇنقى 323- يىلىغىچە)
ئېمپىراتور ئالېكساندېر مىلادىيەدىن بۇرۇنقى 334- يىلىدىن مىلادىيەدىن بۇرۇنقى 326- يىلىغىچە ماكېدونىيە ئېمپىرىيىسىنىڭ تەختىدە ئولتۇرغان مەزگىلدە جەمىي 2 مىليون 180 مىڭ كۇۋادىرات ئېنگىلىز مىلى زېمىننى بويسۇندۇرغان. ئۇنىڭ ئېمپىرىيىسى بالقان يېرىم ئارىلىنىڭ جەنۇبىي قىسمى، كىچىك ئاسىيا، مىسىر ۋە ئوتتۇرا شەرقتىن تاكى ھىندى دەرياسىغا قەدەر كېڭەيگەن. 3. ئىمپېراتور تۆمۈر (ئاقساق تۆمۈر، تۆمۈرلەڭ)
(1336- 1405)
ئىمپېراتور تۆمۈر 1370- يىلىدىن 1402- يىلىغىچە بولغان ۋاقىت ئىچىدە 2 مىليون 140 مىڭ كۇۋادىرات ئىنگىلىز مىلى زېمىننى بويسۇندۇرغان بولۇپ، پۈتكۈل ئوتتۇرا شەرق، ۋە ھىندى دەرياسىدىن تارتىپ تاكى ئوتتۇرا دېڭىزغىچە بولغان رايونلار ئۇنىڭ ئېمپىرىيىسىنىڭ تەۋەلىكىدە ئىدى.
4. ئېمپىراتور خىسراۋ
(مىلادىيەدىن بۇرۇنقى 600- يىلىدىن مىلادىيەدىن بۇرۇنقى 529- يىلىغىچە)
ئېمپىراتور خىسراۋ مىلادىيەدىن بۇرۇنقى 559- يىلىدىن مىلادىيەدىن بۇرۇنقى 529- يىلىغىچە پېرسىيە ئېمپىرىيىسىنىڭ شاھى بولۇپ تۇرغان مەزگىلدە، تەخمىنەن 2 مىليون 90 مىڭ كۇۋادىرات ئېنگىلىز مىلى زېمىننى بويسۇندۇرغان. ئۇنىڭ زېمىنى شەرقتە ئىران ئىگىزلىكىدىن غەرپتە كىچىك ئاسىيانىڭ كەڭ رايونلىرىغىچە بولۇپ، ئوتتۇرا ئاسىيا ۋە باكتېرىيە (ھازىرقى ئافغانىستان) رايونىمۇ ئۇنىڭ تېرىتورىيىسىدە ئىدى.
5. ئاتتىلا
(406- 453)
ئاتتىلا ھۇنلارنىڭ خاقانى بولۇپ، 433- يىلىدىن 453- يىلىغىچە تەرەپ - تەرەپكە قوشۇن تارتىپ، كىشىلەر تەرىپىدىن " تەڭرىنىڭ قامچىسى " دەپ ئاتىلىپ، 1 مىليون 450 مىڭ كۇۋادىرات ئىنگىلىز مىلى زېمىننى بويسۇندۇرغان. ياۋروپانىڭ شەرقىي ۋە ئوتتۇرا قىسمى ۋە روسىيە تۈزلەڭلىكىنىڭ غەربىي قىسمى ئۇنىڭ تېرىتورىيىسى دائىرىسىدە ئىدى.
6. ئادولىف ھىتلېر
(1889- 1945)
1933- يىلىدىن 1942- يىلىغىچە ناتسىستلارنىڭ ھەممىگە تونۇشلۇق بۇ رەھبىرى ئىلگىرى - ئاخىر بولۇپ، 1 مىليون 370 مىڭ كۇۋادىرات ئىنگىلىز مىلى زېمىننى ئىگەللىگەن بولسىمۇ، لېكىن قىسقىغىنە ئۈچ يىل ئىچىدە يەنە بارلىق زېمىنىدىن ئايرىلىپ قالدى، ناتسىستلار رەھبەرلىكىدىكى 3- ئېمپىرىيە ئەڭ كۈچەيگەن چاغدا پۈتكۈل ياۋروپا زېمىنى يەنى شەرقتە موسكۋا بوسۇغىسىدىن ئەنگىلىيە بوغۇزىغىچە، جەنۇپتا شىمالىي ئافرىقىدىن شىمالدا نورۋېگىيەگىچە بولغان كەڭ زېمىنغان ھۆكۈمرانلىق قىلغان.
7. ناپولىئون بوناپارت
(1769- 1821)
1796- يىلىدىن فىرانسىيە 1- ئېمپىرىيىسى گۈللەنگەن 1810- يىلىنىڭ ئالدى - كەينىدە فىرانسىيە پادىشاھى دەپ ئاتالغان بۇ كىشى، تەخمىنەن 720 مىڭ كۇۋادىرات ئېنگىلىز مىلى زېمىننى بويسۇندۇرغان، ئەينى چاغدا ئۇ قۇرغان ئېمپىرىيە فىرانسىيە، بېلگىيە، گوللاندىيە، شىۋىتسارىيە ۋە ئىسپانىيە قاتارلىق دۆلەتلەرنى ئۆز ئىچىگە ئالاتتى.
8. سۇلتان مەھمۇت
(971- 1030)
غەزنەۋىلەر خاندانلىقىنىڭ سۇلتانى بولغان سۇلتان مەھمۇت غەزنەۋى 680 مىڭ كۇۋادىرات ئىنگىلىز مىلى زېمىننى بويسۇندۇرغان بولۇپ، زېمىنى ئافغانىستان، ھىندىستان، ئىران قاتارلىق ئەللەرنى ئۆز ئىچىگە ئالغان.
9. پىسارو
(1470 - 1541)
1531- يىلىدىن 1541- يىلىغىچە ئىسپانىيەلىك بۇ مۇستەملىكىچى 480 مىڭ كۇۋادىرات ئىنگىلىز مىلى زېمىننى بويسۇندۇرۇپ، ئىنكا ئېمپىرىيىسىنى يوقاتتى، ئېكۋادور ئارقىلىق ئاندىس تاغ تىزمىسىدىن ھالقىپ ئۆتۈپ، بولىۋىيەدىن ئىبارەت كەڭ بىر پارچە زېمىننى ئىسپانىيە خەرىتىسىگە كىرگۈزدى.
10. كورسىتو
(1485 - 1547)
1519- يىلىدىن 1526- يىلىغىچە ئىسپانىيەلىك بۇ مۇستەملىكىچى كىچىككىنە بىر تارماق قوشۇنغا باشچىلىق قىلىپ، 315 مىڭ كۇۋادىرات ئىنگىلىز مىلى زېمىننى بويسۇندۇرۇپ، زوراۋانلىق ۋە ئالداش قاتارلىق ۋاستىلەرنى قوللىنىپ، ئازتىكلار ئۈستىدىن غەلىبە قىلىپ، مىكسىكىنىڭ ئوتتۇرا ۋە جەنۇبىي قىسمىنى ئىگەللەش بىلەن بىرگە، گۋاتېمالا ۋە ھوندۇراسنى ئىشغال قىلدى ۋە بۇ رايونلارنىڭ ھەممىسىنى ئىسپانىيە خەرىتىسىگە كىرگۈزۈپ، ئۆزى بۇ رايونلارنىڭ باش ۋالىسى بولدى.
خەنزۇچە " تەتقىقاتچىلار " مۇنبىرىنىڭ تارىخ سەھىپىسىدىن تەرجىمە قىلىندى. يۆتكىسەڭ مەنبەسىنىڭ ئورخۇن ئىكەنلىكىنى ئەسكەرتىڭ.
