ئانار پوستى

ئانار پوستى بولسا ئانار مېۋىسىنى كۈزدە پىشقاندا يىغىۋېلىپ، ئانار دانىلىرىنى ئايرىۋەتكەندىن كېيىنكى قۇرۇتۇلغان پوستىدىن ئىبارەت بولۇپ، «ئانار پوستى» نامىدا دورىغا ئىشلىتىلىدۇ. پوستى خىرومدەك قېلىن، رەڭگى قىزىل ياكى سېرىق رەڭدە، تەمى ئاچچىق، پۇرىقى سۇس كېلىدۇ .كۈزدە مېۋىسى پىشقاندا، يىغىۋېلىنىپ، ئانار دانىلىرىنى ئايرىۋېتىپ قالغان ئانار پوستى ئاپتاپتا قۇرۇتۇلىدۇ. شىنجاڭ ئۇيغۇر ئاپتونوم رايونىنىڭ ھەممە يەرلىرىدىن چىقىدۇ.

خۇسۇسيىتى

جاراھەت پۈتتۈرۈش، قان توختىتىش، ئارتۇق ھۆللۈكلەرنى قۇرۇتۇش، پەينى چىڭىتىش، بەد بۇيلىقنى يوقىتىش، قۇرت ئۆلتۈرۈش، ئىچ سۈرۈشنى توختىتىش، چىش مىلىكىنى چىڭىتىش، مەنىينى قويۇلدۇرۇش خۇسۇسىيىتى بار.

تەبىئىتى

ئىككىنچى دەرىجىدە قۇرۇق سوغۇق.

خىمىيىلىك تەركىبى

%21.3~ %10.4 تاننىن، تەخمىنەن %1 موم. %4.5 رىزىنا، %2.5 شېكەر، يىلىم، يېپىشقاق ماددا، %4 كىسلاتا، ئالما كېسلاتاسى، مېۋە يىلىمى ۋە كالتسىي ئوكسالات، مانتول قاتارلىقلار بار.

ئەكىس تەسىرى

قەۋزىيەت پەيدا قىلىدۇ.

فارماكولوگىيىلىك تەسىرى

(1) قۇرت ئۆلتۈرۈش تەسىرىگە ئىگە، ئانار پوستى ئىشقارى (Pelletierine) نىڭ قۇرت ئۆلتۈرۈش تەسىرى خېلى كۈچلۈك . (2) باكتېرىيىگە قارشى تەسىرى بار: بەدەن سىرتىدىكى تەجرىبە ئارقىلىق ئالتۇن رەڭلىك ئۈزۈمسىمان شارچە باكتېرىيىسى، قان ئېرىتكۈچى زەنجىرسىمان باكتېرىيىسى، خولېرا تاياقچە باكتېرىيىسى، تولغاق تاياقچە باكتېرىيىسى، ئۈچەي كېزىكى تاياقچە باكتېرىيىسى، پاراتىف تاياقچە باكتېرىيىسى، ئۆزگىرىشچان تاياقچە باكتېرىيىسى، چوڭ ئۈچەي تاياقچە باكتېرىيىسى، يېشىل يىرىڭ تاياقچە باكتېرىيىسى ھەمدە سىل تاياقچە باكتېرىيىسى قاتارلىقلارغا نىسبەتەن تورمۇزلاش رولىغا ئىگە ئىكەنلىكى ئىسپاتلانغان. بۇنىڭ مۇشۇنداق باكتېرىيىلەرنى تورمۇزلاش رولىنىڭ بولغانلىقى ئۇنىڭ تەركىبىدە تۇتقان تاننىن بىلەن مۇناسىۋەتلىك بولۇش مۇمكىن. (3) قورۇش رولى بار: كۆپ مىقداردىكى تاننىن ماددىسىنى ئۆز ئىچىگە ئالغان بولۇپ، شىللىق پەردە ۋە يارا يۈزى بىلەن تېگىشكەندىن كېيىن ئاقسىلنىڭ چۆكمىگە چۈشۈش ياكى ئويۇشىنى پەيدا قىلىپ، سىرتقى يۈزىدە بىر قەۋەت قوغداش قەۋىتى ھاسىل قىلىدۇ. بۇنىڭ بىلەن يارا يۈزىنىڭ ئەسلىگە كېلىشىنى ئىلگىرى سۈرىدۇ ياكى يەرلىك ئورۇننىڭ غىدىقلىنىشقا ئۇچرىشىنى توسىدۇ.

ئىشلىتىلىشى

ئۇزۇنغا سوزۇلغان ئىچى سۈرۈش، قانلىق تەرەت، مەقئەت چىقىپ قېلىش، مەنىي سۇيۇلۇپ كېتىش، ئاق خۇن كۆپىيىش، قان تۈكۈرۈش، چىش مىلىكى بوشاپ كېتىش، ئۈچەي مەددە قۇرتى، قان قۇسۇش، بالىياتقۇ قاناش قاتارلىقلارغا ئىشلىتىلىدۇ.

1. ئاچچىق ئانار پوستى 10 گرام، تاباشىردىن10گرامنى ئېلىپ يۇمشاق سوقۇپ 7 مىللىلىتىر، تۆمۈر داغمال سۈيى ئارىلاشتۇرۇپ ئىچسە غەيرىي تەبىئىي قان ۋە سەپرا خىلىتىدىن بولغان ئىچى سۈرۈشكە شىپا بولىدۇ. 2. ئاقاقىيا، بۇغا مۈڭگۈزى، ئەنجىباھار، ئانار پوستى قاتارلىقلارنىڭ ھەر بىرىنى10 گرامدىن ئېلىپ، يۇمشاق سوقۇپ جاراھەت بار ئورۇنغا سەپسە جاراھەتنى پۈتتۈرىدۇ. 3. ئانار پوستىدىن 100 گرام، فۇفەلدىن 20 گرام ئېلىپ، ئابزەن قىلىپ بەرسە مەقئەت چىقۇقى، ئاق خۇن كۆپىيىش قاتارلىقلارغا مەنپەئەت قىلىدۇ. 4. ئانار پوستىدىن 3 گرامنى 9 گرام سەرخىس بىلەن قاينىتىپ ئىچكۈزۈلسە تۆتۈ قۇرتىنى چۈشۈرىدۇ. 1 كلوگرام ئانار پوستىنى 6 گرام تازىلانغان شور بىلەن قاينىتىپ سۈيىگە شېكەر قوشۇپ ئىككى قېتىمغا بۆلۈپ ئىچكۈزۈلسە ئۈچەيدىكى سازاڭسىمان قۇرتنى چۈشۈرىدۇ.

مىقدارى

3~ 9 گرامغىچە.

ساقلاش

كۈزدە مېۋىسى پىشقاندا، يىغىۋېلىنىپ، ئانار دانىلىرىنى ئايرىۋېتىپ قالغان ئانار پوستى ئاپتاپتا قۇرۇتۇلىدۇ.

تۈزەتكۈچىسى

ھەسەل، زەنجىۋىل.

ئورۇنباسارى

ئانارگۈلى، ئانار يىلتىزى

سۇپۇپى ئەنجىباھار.

^[0]