تۇنجى مېتال ئومۇرتقا سېلىنغان ئادەم

ئەمدىلا 33 ياشقا كىرگەن ئامېرىكىلىق ئايال جېسسې توماسنىڭ ئومۇرتقىسىغا مۇشتۇمچىلىك سۆڭەك ئۆسمىسى ئۆسۈپ قالغان. دوختۇر ئۆسمە ئۆسكەن ئومۇرتقىنى داۋالاش ئېھتىياجىغا ئاساسەن كېسىۋەتكەن. ئوپېراتسىيىدىن كېيىن جېسسې توماس ئەركىن يۈرەلمەي، ئالاھىدە ياسالغان جازىدا كېچە-كۈندۈزلەپ يېتىشقا مەجبۇر بولغان. 1676-يىلى 17-ئىيۇلدا مېتال ئومۇرتقا سالغان. بۇ ئوپېراتسىيە مۇۋەپپەقىيەت قازىنىپ، جېسسې توماسنىڭ ئۆرە تۇرۇش ۋە مېڭىش ئىقتىدارى ئەسلىگە كەلگەن، شۇنىڭ بىلەن ئۇ دۇنيا بويىچە تۇنجى مېتال ئۇمۇرتقا سېلىنغان ئايال سانالدى.

ئەمەلىيەتتە، ئېلىمىزنىڭ شاڭخەي شەھەرلىك سۆڭەك بۆلۈمىنىڭ تەتقىقات ئورنى بىلەن رۈيجىڭ دوختۇرخانىسىنىڭ سۆڭەك بۆلۈمى 1970-يىلى ئىيۇندا ئۇمۇرتقا زور ھۆجەيرىلىك ئۆسمىسىگە گىرىپتار بولغان 27 ياشلىق ئەر كىشىنىڭ ئۆسمىسىنى ئېلىۋېتىش ئوپېراتسىيىسىنى ئىشلىگەندىن كېيىن، ئۇمۇرتقا كۆچۈرۈش ئوپېراتسىيىسىنى مۇۋەپپەقىيەتلىك ئىشلىدى. كۆچۈرۈلگەن بۇ ئۇمۇرتقا تېبابەتچىلىكتە ئىشلىتىدىغان دات باسمايدىغان پولاتتىن ئىشلەنگەن. ئوپېراتسىيە قىلىنىپ ئىككى ئايدىن كېيىن بېمارنىڭ پۇتىدىكى پالەچلىك تۈگىگەن. ئالتە ئايدىن كېيىن بىمار ئورنىدىن قوپقان. ھازىر ئۇنىڭ ئۆز خىزمىتىنى ئىشلەۋاتقىنىغا كۆپ يىللار بولۇپ قالدى.

بۇ تەتقىقات ئورنى بىلەن دوختۇرخانا 1970-يىلىدىن بۇيان بۇنداق ئوپېراتسىيىدىن تۆتنى ئىشلەپ ھەممسىدىلا مۇۋەپپەقىيەت قازاندى. ئەپسۇسكى، بۇ كىلىنكىلىق نەتىجە خەلقئارادا ۋاقتىدا ئالماشتۇرۇلمىغان، ئەمەلىي ئەھۋالدىن قارىغاندا، ئېلىمىز ئۇمۇرتقا كۆچۈرۈش ئوپېراتسىيىسىدە چەت ئەللەردىن ئىلگىرى مۇۋەپپەقىيەت قازانغان. 

مېتالنى ئادەم بەدىنىدە قوللىنىش مەسىلىسىنى نۇرغۇن ئالىملار تەتقىق قىلغان. تەتقىقات شۇنى ئوچۇق كۆرسەتتىكى، ئادەم بەدىنىدىكى بەزى قۇرۇلمىلار بۇزۇلغاندا، بەزى مېتاللار ئۇلارنىڭ ئورنىدا ئىشلىيەلەيدۇ، مەسىلەن، مېتال تانتال تاياقچىسى سۆڭەكنىڭ ئورنىدا ئىشلەيدۇ، مۇسكۇل تانتال تاياقچىسى ئۈستىدە ئۆسەلەيدۇ. سۇنغان سۆڭەكنى تىتان پلاستىنكىسى ۋە تىتان ۋېنتا بىلەن ئەسلىگە كەلتۈرگىلى بولىدۇ. سۆڭەك تىتان پلاستىنكىسىنىڭ تۆشۈكلىرىدە ۋە ۋېنتىنىڭ ئارىلىقلىرىدە ئۆسۈۋېرىدۇ. ئادەم بەدىنىدىكى بەزى قۇرۇلمىلارنىڭ ئورنىدا ئىشلەيدىغان بۇنداق مېتاللار «جانلىقلارغا مايىل مېتاللار» دەپ ئاتىلىدۇ