قىزىل سايۋا ئۈزۈم

قىزىل سايۋا ئۈزۈم ئاپتونۇم رايۇنىمىزنىڭ تۇرپان ، پىچان ، قۇمۇل ۋە شىخەنزە قاتارلىق جايلاردا كۆپىرەك ئۆستۈرۈلىدۇ .  ئائىلىلەردە باراڭغا ئېلىپ مۇۋاپىق تەربىيىلىسە ناھايىتى كۆركەم كۆرۇنىدۇ . بۇ سورتنىڭ ئۆسۈش كۈچى كۈچلۈك باشقۇرۇش ئوڭاي ، بىراق بىر يىلى كۆپ ، بىر يىلى ئاز مېۋە بىرىدۇ . مەھسۇلاتى ئوتتۇراھال يۆتكەشكە ئەپسىز. سۇ ، ئوغۇتقا قويغان تەلىپى يۇقىرى ، كېسەللىككە قارشى تۇرۇشچانلىقى ئوتتۇراھال ، نەملىك ئېشىپ كەتسە مېۋە يېرىلىش ئەھۋالى كۆرۇنىدۇ . 8 - ئاينىڭ ئاخىرلىرى ، 9 - ئاينىڭ باشلىرى پىشىدۇ ، ھۆل يىيىشكە تازىمۇ مۇۋاپىق كېلىدۇ .

قىزىل سايۋا ئۈزۈم گۈلى قوش جىنىسلىق گۈل . بىر ساپاق ئۈزۈمنىڭ ئېغىرلىقى 350 -1000 گرام كېلىدۇ . ساپاق شەكلى يۇمىلاق كونۇس شەكلىدە ، مېۋىلىرى شالاڭ ، تەكشى ئورۇنلاشقان ، مېۋە دانىسى چوڭ ياكى ناھايىتى چوڭ . ئوتتۇرىچە يەككە ئېغىرلىقى 3.95 گرام ، ئەڭ چوڭ بولغاندا 6 گرام كېلىدۇ . مېۋە دانىسى پىشقاندا ئوچۇق قىزىل ياكى جىگەررەڭگە ئۆزگىرىدۇ ، ناھايىتى كۆركەم كۆرىنىدۇ . مېۋە پوستى نېپىز ، ئېتى چۈرۈك ، شىرنىسى كۆپ ، تەمى تاتلىق ، ھەر دانە مېۋىسى ئىچىدە 2 -3 تال ئۇرۇقى بار ، سۈپىتى ناھايىتى ياخشى قەنت مىقدارى %23 - 22 ، مېۋىسى ئاسان تۆكۈلمەيدۇ .^[0]