جىنسىي ئاجىزلىق

سەۋەبى: بۇ كېسەللىك، بەدەن ئاجىزلىق، بۆرەك ئاجىزلىق، باشقۇرغۇچى ئەزالارنىڭ ئاجىزلىشىشى، سوزۇلما كېسەللىكلەرنىڭ ئاسارىتى، جىنسىي ئەزانىڭ مىجەزى ئىسسىقلىق ياكى سوغۇقلۇقتىن بۇزۇلۇشى، جىنسىي ئەزانىڭ پالەچلىنىشى ياكى ئۇرۇقداننىڭ زەخىملىنىشى، ئىچىملىك-چېكىملىكلەرنىڭ تەسىرى، روھىي زەربە ۋە پىسخولوگىيەلىك توسالغۇلار سەۋەبىدىن كېلىپ چىقىدۇ.

ئالامىتى: پەيدىنپەي ئېغىرلىشىپ بارىدىغان جىنسىي ئىنتىلىشنىڭ سۇسلىشىشى، رىغبەتنىڭ ئازىيىشى، لەززەتلىنىشنىڭ كەم بولۇشى، قوزغىلىشنىڭ بارا-بارا سۇسلىشىشى ۋە پۈتۈنلەي يوقىلىشى قاتارلىق ئالامەتلەر بىلەن ئىپادىلىنىدۇ.

1-رېتسېپ

تەركىبى: ئۈزۈم شىرنىسى 100 گىرام، سۈت 200 گىرام، بادام 20 تال.

تەييارلاش ئۇسۇلى: بادامنى يۇمشاق سوقۇپ، سۈتكە ئارىلاشتۇرۇپ ئۈستىگە ئۈزۈم شىرنىسىنى قۇيۇپ تەييارلىنىدۇ.

ئىشلىتىش مىقدارى: كۈنىگە ئىككى قېتىم، ھەر قېتىمدا مۇۋاپىق مىقداردا ئىستېمال قىلىنىدۇ.

2-رېتسېپ

تەركىبى: تاتلىق بادام مېغىزى 100 گىرام، سەۋزە ئۇرۇقى 20 گىرام، بۇقا چۈيىسىنىڭ قۇرۇتۇلغىنى 15 گىرام، پارپا، كۇچۇلا 10 گىرامدىن، ناۋات، سۇ مۇۋاپىق مىقداردا.

تەييارلاش ئۇسۇلى: ناۋاتتىن باشقا دورىلارنى يۇمشاق سوقۇپ، ئەلگەكتىن ئۆتكۈزۈپ، ناۋاتنى سۇدا قاينىتىپ قىيام قىلىپ، ئۈستىگە سوقۇلغان دورىلارنى سېلىپ مەجۈن تەييارلىنىدۇ.

ئىشلىتىش مىقدارى: كۈنىگە ئۈچ قېتىم، ھەر قېتىمدا مۇۋاپىق مىقداردا ئىستېمال قىلىنىدۇ.

3-رېتسېپ

تەركىبى: لاچىندانە، بەدىيان، قىزىلگۈل، ئاقاقىيا، بۇغا مۈڭگۈزى، زەپەر، ئىپار، قۇندۇز قەھرى تەڭ مىقداردا.

تەييارلاش ئۇسۇلى: دورىلارنى يۇمشاق سوقۇپ، ئەلگەكتىن ئۆتكۈزۈپ، سەندەل ئەرەقى بىلەن ئارىلاشتۇرۇپ مەجۈن تەييارلىنىدۇ.

ئىشلىتىش مىقدارى: كۈنىگە ئىككى قېتىم، مۇۋاپىق مىقداردا ئىستېمال قىلىنىدۇ.