ئاۋاز پۈتۈپ قېلىش

ئاۋاز پۈتۈپ قېلىشسەۋەبى: بۇ كېسەللىك، مىجەز بۇزۇلۇش، زۇكامنىڭ نەزلىسى تەستە ساقىيىش، گالنىڭ قۇرغاقلىقى ئېشىپ كېتىش، سىرتتىن سوغۇق ۋە زىيادە غىدىقلىغۇچىلارنىڭ تەسىر قىلىشى سەۋەبىدىن كېلىپ چىقىدۇ.

ئالامىتى: گال ئىچى قىچىشىپ، قۇرۇپ تۇرۇش، بەزىدە گال قوشۇلۇپ ئاغرىش، سۆزلىگەندە ئاۋاز تولۇق چىقماي، خىرقىراپ قېلىش قاتارلىق ئالامەتلەر بىلەن ئىپادىلىنىدۇ.

1-رېتسېپ

تەركىبى: كەتىرا، نىشاستە، سەمغى ئەرەبى، رۇببىسۇس، قاپاق ئۇرۇقى مېغىزى، تەرخەمەك ئۇرۇقى مېغىزىدىن باراۋەر مىقداردا.

تەييارلاش ئۇسۇلى: تەرخەمەك ئۇرۇقى مېغىزىدىن باشقا دورىلارنى يۇمشاق سوقۇپ، ئەلگەكتىن ئۆتكۈزۈپ، تەرخەمەك ئۇرۇقى مېغىزىنىڭ شىرىسى بىلەن ئارىلاشتۇرۇپ، پۇرچاقتەك چوڭلۇقتا كۇمىلاچ تەييارلىنىدۇ.

ئىشلىتىش مىقدارى: كۈنىگە بىر قېتىم، ھەر قېتىمدا 4 ~ 6 تالدىن ئىستېمال قىلىنىدۇ (بالىلارغا ئازايتىلىدۇ) .

2-رېتسېپ

ئاۋاز پۈتۈپ قېلىشتەركىبى: زىغىر ئۇرۇقى، ئاچچىق بادام مېغىزى، رۇمبەدىيان، رۇببىسۇس، ئەرەب يېلىمى ئۈچ گىرامدىن.

تەييارلاش ئۇسۇلى: دورىلارنى يۇمشاق سوقۇپ، ئەلگەكتىن ئۆتكۈزۈپ، بېھى ئۇرۇقى شىرىسى بىلەن خېمىر قىلىپ، نۇقۇتتەك چوڭلۇقتا كۇمىلاچ تەييارلىنىدۇ.

ئىشلىتىش مىقدارى: كۈنىگە ئۈچ قېتىم، ھەر قېتىمدا ئۈچ تالدىن شۈمۈلىدۇ.

3-رېتسېپ

تەركىبى: زىغىر 90 گىرام، قەردمانە 30 گىرام، ھەسەل مەلۇم مىقداردا.

تەييارلاش ئۇسۇلى: دورىلارنى يۇمشاق سوقۇپ، ئەلگەكتىن ئۆتكۈزۈپ، ھەسەل بىلەن ئارىلاشتۇرۇپ مەجۈن تەييارلىنىدۇ. 

ئىشلىتىش مىقدارى: كۈنىگە بىر قېتىم، ھەر قېتىمدا يەتتە گىرام دورا مۇۋاپىق مىقداردا ئەرەقى بەدىيان بىلەن قوشۇپ ئىستېمال قىلىنىدۇ.