( مەسەل )
جەم بولۇپتۇ بىر كۈن ھەممە كېپىنەكلەر ،
خۇش -پۇراقلار چاچار ئىكەن گۈل - چىچەكلەر .

كۆرسىتىشكە بىر - بىرىگە ئۆز بىڭسىنى ،
سۆزلەشمەكچى بولۇشۇپتۇ كەچمىشىنى .

ھەممە بىردەك تەقەززادا ئولتۇرۇپتۇ ،
قىسقا مەھەل سۈكۈت ئىچرە ئويلۇنۇپتۇ .

ئاق كېپىنەك چىقىپ شۇ چاغ ئوتتۇرىغا ،
مەغرۇرانە نەزەر ساپتۇ دوستلىرىغا .

قاناتلىرىن كېرىپ كۆز - كۆز قىلىپتۇ ئۇ ،
بەكمۇ شىرىن ھىس تۇيغۇغا چۆمۈپتۇ ئۇ .

دەپتۇ :«مەندەك چىرايلىقتىن ئاراڭلاردا
بولسا قېنى كۆرسۈتۈڭلار ھەدەڭلارغا  .

بۇ جاھاندا ھىچكىم مەندەك ئوينىيالماس ،
گۈل بەرگىدە سائەت - سائەت ئۇخلىيالماس .

باھار بىلەن تەڭ ماڭىمەن شوخ سەيلىگە ،
ھەر بىر گۈلنى قويۇۋەتمەي ئۆز مەيلىگە .

گۈلدىن گۈلگە توختىماستىن قونۇپ يۈرۈپ ،
بۇ ھاياتىم ئۆتتى خوشال ئويناپ - كۈلۈپ .

بۈگۈنگىچە دىشۋارى يەپ قاخشىمىدىم ،
ئاۋارىكەش پەرۋانىغا ئوخشىمىدىم .

ئېيتىڭلارچۇ قېنى مەندەك ئوينايدىغان ،
ئويناپ - ئويناپ ھەم ئويۇنغا تويمايدىغان .

بارمىكىنە مەندەك دانا  ئاراڭلاردا ،
مەن يۈرمەيمەن قۇرۇق خىيال ئارمانلاردا .

ئۈگۈنەمسىز ھەر بىرىڭىز ئىشلىرىمنى ،
جاۋاپ بېرىڭ ئويلاپ بېقىپ سۆزلىرىمنى .»

رەڭدار قانات تۈگىشىگە ئەمدى گەپنىڭ ،
ئۆتۈپ دەرھال ئالدىغا ئۇمېڭىپ سەپنىڭ.

ئاچچىقلىنىپ دەپتۇرەنجىپ قولىن سىلكىپ، 
«ئاڭلىدۇق بىز سۆزلىرىڭنى سەۋىر  قىلىپ .

خىسلەتلەرى كۆرۈنمەمدۇ ساڭا خەقنىڭ،
قاراڭلارچۇ گەپلىرىنى ماۋۇ سەتنىڭ.

قونار يىرىپ چەللە- باراڭ ھەشقىپىچەك ،
تەڭداشسىز دەپ ماختىغىنىڭ سۇلغان چىچەك .

قايسى چاغدا كەزگەن ئىدىڭ چىمەنلىكنى ،
ئوھۇي ....تېخى سەن بىلەمسەن گۈزەللىكنى .

ئۆمرۈڭ بويى بىزگە ئوخشاش بولالمايسەن ،
بىز قونغان گۈل ياپرىغىغا قونالمايسەن .

نەچچە باھار -ياز چىمەنلەر ئارىسىدا ،
راھەتلەندىم گۈل - بەرگىنىڭ سايىسىدا .

جاپا چېكىش رىيازەتنى ھىچ بىلمەيمەن ،
تەقدىرىمدىن قىلچە ۋايىم غەم يىمەيمەن .

ۋاپاسىزنى مەن ئۆزۈمگە دوست كۆرمەيمەن ،
ئىدرىكى يوق ھاماقەتنى مەن سۆيمەيمەن .

قوشۇلساڭلار سەردار بولاي ھەممىڭلارغا ،
داغدام يوللار ئېچىپ بېرەي بەختىڭلارغا .

قېنى مەندەك  ھەقىقەتنى ياقلاپ تۇرۇپ ،
دانىشمەنلەر چىقالامدۇ كۆكرەك ئۇرۇپ .»

قارىغاندا ئۇ سۆزىنى تامام قىلىپ ،
كۆپچىللىككە ئۈمۈد بىلەن نەزەر سېلىپ .

توپ ئىچىدە كۆتۈرۈلۈپ كۆپ غۇلغۇلا ،
دەپتۇ بىرى «لاۋزا گەپنى قىلدى تولا .»

ئىككى ئاخماق باش بولماقچى ھەممىمىزگە ،
سالغىنىچۇ خىسلىتىنى سەمىمىزگە .

ئېغىر ئىكەن ماختاشلارغا سەۋرى قىلىش ،
بارمۇ - يوقمۇ دوستلارنىمۇ كۆزگە ئىلىش .

يەنچىپ تاشلاپ ئىككىسىنى يوقۇتايلى ،
كۆپچىللىكنىڭ كۈچىنى بىر تونۇتايلى .

«ھاي - ھاي » دەپتۇ بىرى شۇندا قاتتىق قىلىپ ،
قىلسا بولماس بۇنداق ئىشنى ئاچچىق قىلىپ .

قاراڭلارچۇ ماڭا ئەمدى نەزەر سېلىپ ،
بېرەي مەنمۇ ھاياتىمنى بايان قىلىپ .

چىقىپ كەپتۇ بىر كېپىنەك زەر تون كىيىپ ،
كۆپچىللىكنىڭ ئارىسىدىن ئاقساپ مېڭىپ .

قولىدا بار بولغاشقىمۇ بىر ھاسىسى ،
كۈلۈشۈپتۇ زاڭلىق قىلىپ گاھىلىرى .

كۆپچىللىككە ئېچىنىپ ئۇ نەزەر سېلىپ ،
ھەسرەت بىلەن كۆزلىرىگە لىق ياش ئېلىپ .

سۆزلەپتۇ ئۇ :«ياش ئىدىم دەپ بىر چاغلاردا ،
سىلەردەك ھەم ئوينىغانمەن گۈل - باغلاردا .

نەچچە يىللار ئىلگىرى بىر  گۈل باھاردا ،
سەھەر پەيتى كىرگەنىدىم بىر گۈلزارغا .

تۇرغان ئىكەن گۈللەر شۇنچە ئۇز ئېچىلىپ ،
ھەممە يانغا خۇش - پۇراقلار تەڭ چېچىلىپ .

ياقۇت كەبى يالتىرايتتى گۈلدە شەبنەم ،
خەندان ئۇرۇپ سايرىشاتتى بۇلبۇلمۇ ھەم .

ئۇ گۈزەللىك ئالىمىنى كۆرۈپ توۋا ،
ھۇسسىزلىنىپ كەتتىم جاھان بولۇپ غۇۋا .

شەيدالىقتا ئەقىل ھىسسىم يوقاپ كەتتى ،
سەۋىر قىلىپ تاقىتىمنىڭ چېكى يەتتى .

ئالمان - تالمان قىزىلگۈلگە ئۆزۈم ئاتتىم ،
نىمە بولدۇم جانسىزلىنىپ يەردە ياتتىم .

ئەس ھۇشۇمغا كېلىپ بىلسەم ئەسلى مېنى ،
چېقىۋاپتۇ گۈلنىڭ تىلى  (گۈل تىكىنى ) .

مانا ئەمدى ياخشىراقمۇ ماڭالمايمەن ،
گۈللەر ئارا يۈرەكلىكرەك قونالمايمەن .

بىر پۇتۇمدىن ئايرىلدىممەن شۇندىن بۇيان ،
دىلنى ئۆرتەر پۇشايمان ھەم دەرتلىك پىغان .

بۈگۈنگىچە ئۇنداق گۈلنى سۆيگۈنۈم يوق ،
شۇنداق گۈزەل مەنزىرىنى كۆرگۈنۈم يوق .

ئۇ گۈل ۋەسلى بۇلبۇلغىلا تەئەللۇقكەن ،
چىن مۇھەببەت ئەسلى بىلسەم بەك ئۇلۇغكەن .»

بۇنى ئاڭلاپ كېپىنەكلەر بوپتۇ خىجىل ،
«تىرىشقانغا بۇ ھاياتمۇ ئەمەس بېخىل » .

شۇندا ئۇلار قىلمىشىنى ئويلاپ قاپتۇ ،
يېلىنغاندەك ئاقساقجانغا قاراپ قاپتۇ .

دەپتۇ ئۇمۇ كۆپكە قاراپ سېزىپ شۇ چاغ ،
ياقايلى بىز  ئىشقىمىزدىن نۇرلۇق چىراق .

ئۆتمىسۇن بۇ ھاياتىمىز ئاتلاپ - تاخلاپ ،
ئۆزگەرمىسەك قالاركەنمىز بىر كۈن ئاقساپ .

پاك گۈللەرنىڭ قۇربان بولار ئاشىغى بار ،
نىسىپ بولماس بىزگە ئۇلار چاققىغى بار .

يېتىلدۈرۈپ بىزمۇ دوستلار ئىسىل خىسلەت ،
قالدۇرمايلى زەررىچىلىك يامان ئىللەت .

شۇندىلا بىز يېتەلەيمىز گۈزەللىككە ،
ئېرىشەرمىز ھەقىقى چىن مۇھەببەتكە .»

قوشۇلۇپتۇ ھەممە بىردەك بۇ تەكلىپكە ،
قەلىبلىرى تولۇپ ئىشەنچ ھەم بەختكە .

لېكىن ئۇلار سۆزلىرىگە قىلماي ئەمەل ،
داغدا يۈرەر بۇرۇنقىدەك بەرمەي بەدەل .

كەسپى يەنە لاغايلاشتۇر ئەتىدىن - كەچ ،
نىسىپ بولدى شۇنىڭ ئۈچۈن سەت يۆگىمەچ .

..............................
ئوسال خۇي گەر سىڭىپ قالسا روھىڭ تامام ،
ئاقىۋەتتە كۆرەر كۈنۈڭ شۇنداق يامان .
...............................
ئۆز ئۆمرىدە يىسە دەشنام تالاي قېتىم ،
ئەپسۇس يەنە ئۆزگەرمىدى نائەھلىلەر .
ھەسەل ھەرە چاقسىمۇ گەر بەردى شەربەت ،
كېپىنەكتىن ئەلا بىزگە شۇ ھەرىلەر .............

ئاپتورى : مېھرىگىيا

ئەمدى توردىن چۈشەي دەپ تۇرسام بۇ مەسەلگە كۆزۈم چۈشۈپ قېلىپ باشتىن ئاياق ئوقۇپ چىقتىم،كېپىنەكلەرنىڭ دىئالوگى ئارقىلىق رىئاللىق ياخشى ئەكىس ئەتتۈرۈلۈپتۇ،رەھمەت.سالامەت بولۇڭ.

مىھرىگىيا ئاپىرىن !!!!يازمىللىرىڭىزدىن سۆيۇندۇم .بۇ تىما ئۈچۈن كۆپ ئەجىر سىڭدۇرۇپسىز .ئەجرىڭىز يەردە قالمىغاي !!!!بۇندىن كىيىنكى ئىجادىيىتىڭىزگە ئۇتۇق تىلەيمەن .تەپەككۇر ئۇرغۇپ تۇرسۇن قېرىندىشىم .

ئوسال خۇي گەر سىڭىپ قالسا روھىڭ تامام ،
ئاقىۋەتتە كۆرەر كۈنۈڭ شۇنداق يامان .

ئەزىزىم ئۇزاق بوپتىكەن  ئەسەرلىرىڭىزنى  كۆرمىگىلى  ،ھەقىقەتەن ياخشى چىقىپتۇ .ئىلھاملىرىڭىز  تېخمۇ  قۇدرەت تاپقاي!

ئاجايىپ ياخشى يېزىۋېتىپسىز~~~يەنە بولسا يوللاپ تۇرۇڭ `~~

نادىر تېمىلىرىڭىزنى ئايىماڭ ~~

ياخشى يىزىپسىز يەنىمۇ تىرىشىڭ ؛؛؛

رەخمەت سىزگە ؛؛؛؛؛؛؛؛

تەربىيىۋى قىممىتى ۋە بەدىئى قىممىتى يۇقىرى بولغان بۇ ئەسىرىڭىزنىڭ ھەممىمىزگە ئىلھام ۋە مەدەت شۇنداقلا ئىبىرەت مايىكى بولۇپ قىلىشىنى ئۈمىد قىلىمەن .

بۇ تىمىنى كۆرۇپ ھەقىقەتەن سۆيۇندۇم،ئويغاق تەپەككۇرلاردىن تامغان تامچىلار كىشى قەلبىنى لەرزىگە سالماي قالمايدۇ،مىھرىگىيا خانىم ئىجادىيىتىڭىزگە ئۇتۇق يار بولسۇن!

ئىسىل يازمىلىرىڭىزنى كۆرمىگىلى خىلى بوپتىكەن بۇنى ئوقۇپ، ھاردۇقۇم چىقىپ قالدى. ئۇھ..
رەخمەت سىزگە !

ماڭا ھەقىقەتەن كۆپ ئىلھام بېرىپسىلەر ، ھەممىڭلارغا رەھمەت قېرىنداشلىرىم .

بۇ شىئېرىڭىزنى بەك ياختۇرۇپ قالدىم ھەدە،  تىخىمۇ تىرىشىڭ ~

ھەقىقەتەن نادىرلىغۇدەك نادىر تېمىكەن ! قەلىمىڭىز بەرىكەتلىك بولسۇن !