ساقلىدىم
تۇرغۇن راخمان ( كەمتەر )

تالاي كېچە ، ئاي پاتقىچە ساقلىدىم ،
سۈرۈپ خىيال ، تاڭ ئاتقۇچە زارلىدىم ،
ھېچ يوق خەۋەر ، ئەسرا بولدى تۇيغۇلار ،
بىر كەلمىدىڭ ، يولۇڭ قاراپ قاخشىدىم .

چۈشلىرىمگە ھەمراھ قىلىپ ساقلىدىم ،
پەرۋاسىزلا يۈرسىڭىزمۇ يانمىدىم ،
غېرىپلىقتا قېينالدىمغۇ كەلمىدىڭ ،
ھېچ بىلمىدىڭ ، لىكىن سەندىن چانمىدىم .

گۈللىرىڭنى پەرۋېش قىلغاچ ساقلىدىم ،
ئانچە - مۇنچە ياۋا گۈللەر تاقلىدىم ،
ئۆچمىدىغۇ يانغان ئوتلار چوغلۇنۇپ ،
بىر سەن ئۈچۈن ، يەنە بىرگە باقمىدىم .

بىلساڭ جانان ، چىن دىلىمدىن ساقلىدىم ،
مۆلدۈرلەرگە پەرۋا قىلماي ساقلىدىم ،
ئۆلۈپ كەتمەي ئارمانلاردا ، بىل نىگار ،
ئايلار پېتىپ ، تاڭ ئاتقۇچە ساقلىدىم .

بۈگۈن يەنە مۇڭغا پېتىپ ساقلىدىم ،
ھېچ كەلمىدىڭ ، تۈنتەڭگىچە ساقلىدىم ،
ئويغان ئەمدى چۈشلىرىڭدىن ئەي نادان ،
ئۈزمەي ئۈمۈد ، بۈگۈنگىچە ساقلىدىم .
     

مۇھەررىر: ئابدۇقەييۇمجان ئابدۇسادىرى 

ئۈندىدار :2041420589