كۆڭلۈم

 گۈلئاي

 چەكمىگىن پەريادلار بولدى بەس كۆڭلۈم،

 كىملەرنى ھەسرەتتە كۈتتۈڭ تەس كۆڭلۈم.

 قەدرىڭنى قىلغانغا پەرۋامۇ قىلماي،

 كىملەرنىڭ ئىشقىدا بولدۇڭ مەس كۆڭلۈم.

 تۆكمىگىن ئۈنسىز ياش مۇڭلانما كۆڭلۈم

 پۇشايمان ھەسرەتتە تولغانما كۆڭلۈم .

 غورىدىن ھالۋىمۇ پۈتەر بەزىدە،

 شەيتانغا جۆر بولۇپ بۇلغانما كۆڭلۈم.

 باھاردا گۈل بولۇپ ئېچىلغىن كۆڭلۈم،

 زىمىنغا نۇر بولۇپ چېچىلغىن كۆڭلۈم.

تىنىقىم قالغۇچە سوقۇپ دۈپۈلدەپ ،

ۋاپادار يۈرەككە قېتىلغىن كۆڭلۈم .