دۇنيا بىلوگى

بۇرۇت كاشالىسى)ئاۋازلىق ئەسەر)
ئاپتۇرى ئابدۇقادىر جالالىدىن

ھەقىقەت ساداسى يىتىپ قۇلاققا ،
ئەقىل ۋە غورۇرغا يەتمىسە ئەگەر
ئۈلگۈرمەي قالىسەن ئاچچىق ساۋاققا
بوسۇغاڭ ئالدىغا كەلگەندە خەتەر .

شاراپنىڭ كەينىدە يارالغان چۆلدە ،
دەرۋىشكە ئايلىنار خاقانسىز شائىر .
قەلەمنى تىگىشەر سۇنۇق تاۋاققا ،
ئاۋات رەستىلەردە ماكانسىز شائىر .

ئاتلار تۇيىقىدىن چاچرىغان سۆزلەر ،
ئاداشقان نەسلىمگە بولىدۇ چولپان .
مەن پۈتكەن ھەركالام
                                  ھەتتا ،چىكىت ، پەش،
مىڭ يىللىق سۇلالە ياكى بىر زامان .

تىلىم ئامان بولسا ئەجدادىم ئامان ،
مەھشەر ئوتلىرىدا ئەۋلادىم ئامان .
يىشىلىپ پۇتلىرغا چىرماشقان تۈگۈن ،
ئۆزگە ئىقلىملارغا يوللىرى راۋان .

ئابدۇقادىر داموللام ئوتتۇرا ئاسىياغا ، جۈملىدىن غەربى ئاسىياغا تۇنۇلغان كاتتا ئالىم ، ئۇستا ناتىق ، ماھىر مۇنازىرچى ، مىللەت پەرۋەر مائارىپچى ، تالانتلىق شائىر ۋە پاراسەتلىك ئۇستاز . شۇنداقلا يۈكسەك غورۇرغا ئىگە ، ئازئۇچرايدىغان ئىنسان بۇلۇپ ،xx ئەسىرنىڭ باشلىرىدا قەشقەر جەمىئىيىتىدە ئاجايىپ ۋەقەلەرنىڭ يۈز بىرىشىگە تۈرۈتكە بولغان. ئابدۇقادىر داموللام 1862-يىلى ئاتۇشنىڭ مەشھەد يىزىسىدا ئابدۇلۋارىس ئىسىملىك بىر ۋەتەنپەرۋەر كىشىنىڭ ئائىلىسىدە دۇنياغا كەلگەن . مەشھەد - قارا خانىيلار خاقانلىرى ئارىسىدا ئۆزىنىڭ سىياسى ۋە ھەربىي تالانتى بىلەن دۇنياۋى شۆھرەت قازانغان مەشھۇر خاقان - سۇلتان ساتۇق بۇغراخان بىلەن ئۇنىڭ ئۇستازى ئەبۇ نەسىر سامانى دەپنە قىلىنغان مەشھۇر جاي . تارىختا كىشىلەر سۇلتان ساتۇق بۇغرا خان ۋە ئەبۇ نەسىر سامانىينىڭ ھۆرمىتى ئۈچۈن قەبرىگاھ يېنىغا مەسجىد ، مەدرىس ، خانقا لارنى بىنا قىلغان . ئابدۇقادىر داموللام باشلانغۇچ مەلۇماتىنى مانا مۇشۇ مەشھەد تىكى << ھەزرىتى سۇلتانىيە مەدرىسى >> دە ئالغان .