مەن كۆرگەن گېرمانىيە (رەسىملەر) ( 1 )

uyghari

مەن كۆرگەن گېرمانىيە ( 1 )

تۇرسۇن ياسىن

       2012-يىلى 8-ئاينىڭ 10-كۈنى، بۇ بىزنىڭ گېرمانىيەدىكى تۇغقان يوقلاش ساياھىتىمىزنىڭ تۇنجى پەردىسى ئېچىلغان كۈن ئىدى. بىز ئايرۇپورتتىن چىقىپ، بۆك-باراقسان ئورمان، ياپيېشىل چىمەنزارلىق ئىچىدە گېرمانىيەنىڭ 3-چوڭ شەھىرى-ميۇنخېن شەھەر رايونىغا قاراپ يول ئالدۇق.
       يېشىللىق قاپلىغان بۇ شەھەرنىڭ مۇھىتى تولىمۇ گۈزەل ئىكەن، قەيەرگىلا قارىسا بۆك-باراقسان ئورمانلار، ياپيېشىل چىمەنزارلىقلار، رەڭگارەڭ گۈل-چىچەكلەرگە ئورالغان چىرايلىق ھويلا-ئاراملار كۆزگە چېلىقىپ تۇرىدىكەن. شەھەر رايونىدا ئەتراپىنى ئورمانلار ئوراپ تۇرغان تەبىئىي كۆل ۋە سۇنئىي كۆللەر خېلى كۆپ بۇلۇپ، ئاققۇ، غاز، ئۆردەك قاتارلىق تۈرلۈك-تۈمەن سۇ قۇشلىرى بۇ كۆللەردە بەھۇزۇر، خاتىرجەم ياشايدىكەن. ياۋروپادىكى مەشھۇر دوناي دەرياسىنىڭ ميۇنخېن شەھرىنى كىسىپ ئۆتىدىغان تارماق ئېقىنى بولغان ئېسار دەرياسى قويۇق تەبىئىي ئورمانلار بىلەن ئورالغان ئىكەن. تەبىئىي ئورمانلار مەيلى شەھەر ئىچىدە ياكى شەھەر ئەتراپىدا بولسۇن، ھىچقانداق بۇزغۇنچىلىققا ئۇچرىماي ئەسلى ھالىتى بۇيىچە ساقلىنىپ قاپتۇ. بۇ ئورمانلار كىشىلەرنىڭ سەيلە قىلىش، ئارام ئېلىش، تەبىئەت گۈزەللىكىدىن ھۇزۇرلىنىش ئېھتىياجىنى قاندۇرۇپلا قالماستىن، بەلكى ھاۋانى ساپلاشتۇرۇپ، كىشىلەرگە ساغلاملىق ئاتا قىلىدىكەن. بىز بۇنىڭدىن گېرمانىيەلىكلەردىكى تەبىئەتنى سۆيۈش، تەبىئەتنى قوغداش، تەبىئەت بىلەن ئىناق ئۆتۈش كەيپىياتىنىڭ ناھايتى قويۇقلىقىنى ھېس قىلدۇق. بۇ شەھەرنىڭ ئورمانلاشقان، باغچىلاشقان، ساپ ھاۋالىق گۈزەل مۇھىتى ئادەمگە بەكمۇ يېقىشلىق ئىكەن.
      تۆۋەندە  مەن ئەشۇ چاغدا تارتىۋالغان بىر قىسىم سۈرەتلىرىمنى تورداشلارنىڭ ھۇزۇرلىنىشىغا سۇندۇم.

orkex

ئادەم 5-6 يىل موشۇنداقراق يەرلەردە ،ياشاپ باقسا ....

chaqmaq137

ئادەم كۈندە بېرىپ ساياھەت قىلسىمۇ قانمىغۇدەك

قەبرە

گېرمانلار ھەققەتەن تۇرمۇشتىن ھۇزۇرلىنىشنى بىلىدىكەن. نىمىدىگەن گۈزەل!

ulughyar

نېمە دېگەن گۈزەل، تەبئىي مەنزىرىلەر بۇ، نەگىلا قارىسا يېشىلچىلىق. بىزنىڭ بۇ يەرلەر ئەكسىچە، يېشىلچىلىق ئاز، تەبئىيلىكتىن سۆز ئېچىشقۇ ئەسلا، ئادەمنى بىزار قىلىدىغان چاڭ- توزان، تاش- شېغىل. زامانىۋىيلاشتۇق، رەتكە سالىمىز دەپ، ھە دېسىلا تەبئىي مۇھىتقا تەسىر يەتكۈزۋاتقان ئىشلارنى قەدەمدە بىر ئۇچرىتىپ، تۇرۋاتىمىز.
مەنمۇ جەنۇبىي شىنجاڭنىڭ چەت بىر يېزىسىدا (ھازىرقى تۇرۇشلۇق جايىم) چوڭ بولغان، ئۇ زامانلاردا يوللار ھازىرقىدەك قاتۇرۇلمىغان، ھويلا- ئاراملار ھازىرقىدەك پىششىق خىشتىن سېلىنمىغان بولسىمۇ بىراق ئەتراپ شۇنچە تەبئىي، ھاۋالىق ئىدى، ئېتىز- ئېرىقلىرىمىز بۈك- باراقسانلىق، يېشىلچىلىق ئىدى، مەھەللىگە ئانچە يىراق بولمىغان جايدا يۇلغۇن، سۆكسۆك، قومۇش قاتارلىق قىممەتلىك يېپىنچا ئۆسۈملۈكلەر، قوچاق يەتكۈسىز ھەيۋەتتىكى كونا قارا ياغاچ، تېرەكلىك بار ئىدى، قىشتىن باشقا پەسىلدە شۇنداق يېقىملىق ئىدىكى، شۇ توپىلىق يولدا تايچاقتەك چېپىپ ئويناپ چوڭ بولغان ئىدىم، كىشىلەر كونا بولسىمۇ ھويلا- ئاراملىرىغا گۈل- گىياھلارنى تېرىپ ئۆستۈرۈپ، خۇددى باغچىدەك ياساندۇرۋىتەتتى، ئىشىك ئالدىدىكى كىچىك ئېرىقتا (بىز ئۆستەڭ دەپ ئاتايتۇق)، ئاساسەن دېگۈدەك سۇ ئۆكسىمەي شىلدىرلاپ ئېقىپ تۇراتتى.... قىسقىسى مەن دىيارىمىزنىڭ ھازىرقى بىرقىسىم چەكتىن ئاشقان تەرەققىيات ئەندىزىسىدىن تولىمۇ بىزار، ھە دېسىلا ئۇنى- بۇنى باھانە قىلىپ دەرەخلەرنى كېسىپ تۈزلىۋىتىپ بارغان، ئارام ئالىدىغان يېشىلچىلىق دېگەنلەردىن قىلچە ئەسەر يوق. يېشىلچىلىق، گۈل- گىياھ دېسە شۇ ھويلىمىزغا- دەرىزە تەكچىلىرىمىزگە قويىۋالغان بىرنەچچە تەشتەك گۈلگە قاراپ ھوزۇرلىنىدىغان، شەھەرلەرگە بېرىپ قالساق، تەبئىي ۋە ئىجتىمائىي مۇھىتى بۇلغانغان، يانچۇقىمىزدىكى ئاقچىغا قاراشلىق ئاتالمىش باغچىلاردىن ئانچە- مۇنچە ھوزۇر ئالىمىز (ئەلۋەتتە بۇ ھوزۇر يەنە شۇ ھېلىقى ئاقچىغا باغلىق)، ئۇنىڭدىن باشقا تېلېۋىزور- تورلاردىكى مانا مۇشۇنداق سۈرەتلەرگە قاراپ ئېغىزىمىزنى تامچىتىپ قاراپ تۇرىمىز.
قىسقىسى، ئەشۇ سۈرەتتىكى زېمىندا ياشاۋاتقانلارمۇ، مۇشۇ زېمىندا ياشاۋاتقان بىزلەرمۇ ئوخشاشلا ئىنسان، ھەجەبا ئوخشاش بىر ئىنسان، ئوخشاش بىر پىلانتتا ياشاپ تۇرۇپ، ھىچ بولمىغاندا تەبىئەتنىڭ ئەشۇ نىمەتلىرىدىنمۇ بەھوزۇر پايدىلىنالمايۋاتىمىز، مەنپەئەت ئۈچۈن تەبىئەتتىن ئىبارەت بۇ ئانا تۇپراقنى ئۆز قولىمىز بىلەن بۇلغاۋاتىمىز، ۋەيران قىلىۋاتىمىز، ئاخىرىدا بېرىپ، مانا بىزلەر مۇشۇنداق بىچارە ھالغا چۈشۈپ، باشقىلارنىڭ ھوزۇرلۇق تۇرمۇشىغا ئېغىز تامشىتىپ تۇرۋاتىمىز.
بىزمۇ قاچان ئۆز دىيارىمىزنى مانا مۇشۇنداق باغچىغا ئايلاندۇرالارمىز، دانا ھۆكۈمىتىمىز قاچانمۇ ئۈنۈملۈك، كەسكىن تەدبىرلەرنى قوللىنىش ئارقىلىق ئانا تۇپراقنى- بىزنى كۆتۈرۈپ تۇرۋاتقان مۇشۇ زېمىننى ھەقىقىي تۈردە قوغداپ ۋە ئاسىراپ، يېشىلزارلىق، ساپ مۇھىت ئارقىلىق بىزگە كۆتۈرەڭگۈ روھ، ساغلام تەن بىلەن ياشايدىغان پۇرسەتنى بېرەر؟!

uyghur819

بېزنىڭ مەكتەپكە ئوخشايدىكەن،گېرمانىيە!ھاھا..

يادىكار

         ھەي، ئالىمكا، تۇرپانمۇ سەن دېگەندەك ناچار جاي ئەمەس جۇمۇ!! باغۇ-بوستانلىق، تەھلىك-ئورمانلىق، سۈپ-سۈزۈك كارىز سۇلىرى، باغ-ۋارانلىق قەدىمىي ساياھەتچىلىك، بۇلارنىڭ ھەممىسى سېنىڭ يۇرتۇڭدا، خۇددى جەننەتنىڭ ئۆزىغۇ؟! يۇرتۇڭدىن ئۇنچىۋالا كۆڭۈلسىز بولۇپ كەتمە جۇمۇ!! پىچاندىكى خەلق ناخشىچىسى غۇنچەم ئايلامنىڭ «تۇرپانغا كەل» دېگەن ناخشىسىنى تۈنۈگۈنلا ئاڭلىدىم مەن دۆڭكۆرۈك رېستۇرانىدا، سەن مۇنداق دەپ يۈرسەڭ قاملاشمايدۇ ئالىمكا!!

tikan

ئەسسالامۇئەلەيكۇم تۇرسۇن ئاكا
سىزنىڭ يازمىلىرىڭىزنى بېشىدا مىسرانىم مۇنبىرىدە ئوقۇغان ئىدىم.
سىزنىڭ نەچچە بالىڭىز چەتئەلدە نىمە ئىشلارىن قىلىۋاتىدۇ،بولوسا پەرزەنت تەربىيلەش جەھەتتىكى يازمىلىرىڭىزنى ئوقۇپ باقساق؟