يەنە كەلدىڭ نورۇز ( نەسىر )
بارلىق قېرىنداشلارنىڭ نورۇز بايرىمىنى قىزغىن تەبرىكلەيمەن !
نورۇز ، يەنە كەلدىڭ ! تەبىئەتتىكى قار- مۇزلارنى ئىرىتىپ ، جانلىقلارنى ئويغۇتۇپ ، جاھاننى يېشىللىققا ، گۈل -چېچەككە پۈركەتكىلى ، ئىشچانلارغا تىرىشچانلىق ئاتا قىلغىلى يەنە كەلدىڭ !
مەرھابا ! قەدەملىرىڭگە نورۇز !
ئوغۇز ، سۇتۇق ئېتىنىڭ كىشنەشلىرىنى ، ئاماننىسانىڭ كۈيىنى ، مەختۇمسۇلانىڭ غورۇرىنى ، سادىرنىڭ چوقانلىرىنى ، مۇسابايىۋلارنىڭ گۈدۈك ئاۋازىنى ، ماناس دەرياسىنىڭ شاۋقۇنلىرىنى بىزگە ئەسلەتكىلى يەنە كەلدىڭ !
كومراجىۋانىڭ تىۋىشىنى ، << قۇتادغۇبىلىك >> نىڭ ئالماس قۇرلىرىنى ، ئالىپ ئەرتوڭانىڭ ، فارابىنىڭ ئىزتىراپلىرىنى ، مەھمۇد قەشقىرىنىڭ ، نەۋائىنىڭ ... يۈرەك سوقۇشلىرىنى بىزگە ئەسلەتكىلى ، بىزنى ئويغاتقىلى كەلدىڭ !
مەرھابا ئالتۇن قەدەملىرىڭگە نورۇز!
يەنە كەلدىڭ نورۇز ! خوتەن قەغەزلىرىنىڭ ھىدىنى ، ئۇيغۇر زەمبىرىكىنىڭ پۇرىقىنى ئەسلەتكىلى ، كروران ئانىنىڭ كۆزلىرىگە ،
رىزۋانگۈلنىڭ ئوچۇق كەتكەن كۆزلىرىگە قاراشنى ، تىكىلىپ قاراشنى دالالەت قىلىپ كەلدىڭ نورۇز!.
ئەتلەستە كۆينەك ، چىمەندە دوپپا ، ئوغۇزنىڭ روھىدا كەمەر ، نۇزۇگۇمنىڭ كۆز يېشىدا مارجان تەييارلاپ تەبىئەتنىلا ئەمەس ئوغۇل - قىزلىرىڭنى چىرايلىق كىيىندۈرگىلى يەنە كەلدىڭ نورۇز!.
ئاھ ، نورۇز !
بىزنى ئىسمى جىسمىمىزغا لايىق ياشاشقا ، روھىمىزنى ئويغىتىشقا ، تېخىمۇ ئويغىتىشقا كەلدىڭ يەنە نورۇز!.
بىزدىن ، ئوغۇزنىڭ ئەۋلاتلىرىدىن نۇرغۇن ئۈمىتلەرنى ، ئالەمچە گۈزەل ئارزۇ - ئارمانلارنى ، بارچە تىرىشچانلىق كۆرسىتىشىنى كۈتۇپ يەنە كەلدىڭ نورۇز!
مەرھابا ! قەدەملىرىڭگە نورۇز !
مەنبە : خىياللىرىم . مەنبەسىنى ئەسكەرتىپ خالىغان تور بەتكە يۆتكىسىڭىز بۇلىدۇ .يەنە كەلدىڭ نۇرۇز (نەسىر)
https://uyghur-archive.com/misranim/forum.ph ... 54&fromuid=8590