دەز (ھېكايە )

marziyya

	داۋامىنى كۆرۈشكە ھەممىمىز ئالدىراۋاتىمىز . تىزراق يوللىسىڭىز بوپتىكەن

bihlan2

	ۋاي ۋوي... نىمىشقىمۇ يۇققاندۇ بۇ نىجىس كىسەل. خۇدايم ھەر بىر بەندىسىنى سالامەت قىلسۇن

mehriya

	سورۇن ھېچ ئاياقدىشىدىغان ئەمەس ، قىزلارمۇ تاڭسا ئويناپ ھارسىمۇ ، سېسىق ھاراقنىڭ پۇرىقىدىن سەسكەنسىمۇ ،قايتايلى دېگەن سۆزنى قىلالماي ، باشلىقنىڭ كۆزىگە قارايتتى . بىر چاغدا بايامقى قىز يەنە ئالدىمغا كېلىپ مېنى تاڭسىغا تەكلىپ قىلدى . شۇ چاققىچە ئۆز خىياللىرىم بىلەن بۇلۇپ كېتىپ بىرەسىنىمۇ تاڭسىغا تەكلىپ قىلماپتىمەن . - ئەسلىدە مەن تەكلىپ قىلسام توغرا بۇلاتتى ، سەت بولدى -ھە !،-دېدىم قىزغا . - ھېچقىسى يوق ئاكا ، قارىسام سىز باشقىلارغا ئوخشۇمايدىكەنسىز ، شۇڭا تاڭسىغا تەكلىپ قىلغاچ ئىككى ئېغىز پاراڭلىشاي دېگەن ئىدىم - نېمە گېپىڭىز بار ئىدى ؟ -سىزدىن ئۈتۈنەي ئاكا ، مېنى بۇ يەردىن ئەپكەتكەن بولسىڭىز - مەن ؟ -، قىزنىڭ بۇ سۆزىدىن سەل ھەيرانلىق ھېس قىلدىم . - شۇنداق ئاكا ، ئۆيدە ئانام يالغۇز ، ھەم كېسەل ئىدى ، بالدۇرراق قايتمىسام ، ئەنسىرەپ قالىدۇ .پەقەت سىز مەن بىلەن سىرتقا چىقىپ ئايلىنىپ كېرەي دەپلا ماڭسىڭىز ، باشلىقتىن قۇتۇلۇپ قالىمەن . سىزدىن ئۆتۈنەي ئاكا ،ماڭا ياردەم قىلىڭ . قىزنىڭ چىرايىدىن چىقىپ تۇرغان ئەندىشىدىن ئۇنىڭ ئالدىراۋاتقانلىقى بىلىنىپ تۇراتتى . مەن ئارتۇق گەپ سوراپمۇ يۈرمىدىم ، ئۆزەمنىڭمۇ بۇ سۆرۇندىن تېزراق كەتكىسى بولغاچ قىزغا ماقۇللۇقىمنى بىلدۈردۈم . مۇزىكىمۇ تۈگەپ جوزىغا كېلىپ ئولتارغاندىن كېيىن ،باشلىققا قاراپ ؛ - سىلەر ئولتۇرۇپ ئىچىڭلار مەن چىقىپ ھاۋا يەپ كېرەي ،-دەپ ئورنۇمدىن تۇردۇم - ھوي ئاغىنە ئۆزەڭ يالغۇز چىقامسەن ؟بۇ يەردە چىل بورە بار يالغۇز چىققانلارنى جۈپتىڭ بىلەن چىقماپسەن دەپلا يەپ كېتىدۇ ، ۋەيت !!! -دەپ قىقاس قىلدى ئارىدىن بىرى . باشلىق خېلىلا تەڭشىلىپ قالغان ئىدى ، سامان قوساق يېزا ھۆكۈمەت باشلىقى بىلەن بىر نىمىلەرنى دەپ تەكەللۇپ قىلىشىپ ئولتۇراتتى ، مەنمۇ پۇرسەتنى غەنىمەت بىلىپ ،چاقچاق قىلغان بۇلۇپلا ؛ - مەنمۇ يالغۇز چىقىمەن دىمىدىمغۇ ،-دەپ بايامقى قىزغا قارىدىم . - ھە ئەسلىدە مۇنداقمىدى ، ھە بوپتۇ ،چىقىپ ھاۋا يەپ كېرىڭلار ، ھاۋانى يەپ بۇلۇپ ، سۇ ئىچكىلى باشقا ياققا كېتىپ قالساڭلارمۇ مەيلى دەيمىز . بۇ گەپ بىلەن پۈتۈن جوزىدىكىلەر كۈلۈشۈپ ،ئالىتاغىل چوقۇرۇشۇپ كەتتى ، مەن قىزغا كۆزۈم بىلەن ئىشارەت قىلىپ قۇيۇپ سىرتقا ماڭدىم . قىزمۇ كەينىمدىن ئەگىشىپ چىقتى . ئەتراپ قاراڭغۇ ئىدى ، بۇ يەردىن چوڭ يولغا چىقىش ئۈچۈن خېلى ماڭدۇق ، شۇ جەرياندا بۇ قىزدىن يېزىلىق ھۆكۈمەتتە نىمە خىزمەت قىلىدىغانلىقىنى سورۇدۇم ، قىز ئۆزىنىڭ تەشۋىقات ئىشخانىسىدا ئىشلەيدىغانلىقىنى ، خىزمەتكە قاتناشقىنىغا ئىككى يىل بۇلۇپ قالغانلىقىنى ، بۇنداق سورۇنلاردىن تولىمۇ بىزار بولغانلىقىنى ، ياۋاتقان ئېشىدىن ئايرىلىپ قالماسلىق ئۈچۈن ، سامان قوساق باشلىقنىڭ بۇنداق  ئورۇنلاشتۇرۇشلىرىغا بارماي ئامالسىز ئىكەنلىگىنى سۆزلەپ بەردى . ھاراقنىڭ كۈچىدىنمۇ ئىشقىلىپ قىز يىغلاپ كەتتى . مەن نىمە دەپ بەزلەشنى بىلمەيلا قالدىم ، پەقەت قىزنىڭ يىغىسىدىن ئۇنىڭ نۇرغۇن خورلۇق تاتقانلىقىنى بىلگىلى بۇلاتتى . قىز يىغلاپ كىملەرنىدۇ تىللايتتى. ھاراقنىڭ كۈچى قىزغا شامالدا تەسىر قىلىۋاتقان ئىدى . مەن ئۇنى يۆلىۋالدىم ، كاللامدا تېزراق چوڭ يولغا چىقىپ تاكسى كەلسە ،  ئۆيىگە ئېسىنى بىلدىغان چاغدا ئاپىرىپ قۇياي دەپ ئالدىرايتتىم . بەزىلەر ھاراق ئىچسە پۇتىدىن ، بەزىلەر كاللىسىدىن كېتىدۇ دەپ ، بۇ قىز پۇتىدىن كەتكەن ئىدى ، يەرنى ئوڭشاپمۇ دەسسىيەلمەيتتى . ئۇنى يۈلەشتۈرۈپ يۈرۈپ چوڭ يولغىمۇ چىقتۇق . يېزا يېرى بولغاچ تاكسى ئاز ئىدى  ، شۇڭا كەلگەنلىكى ماشىنلارنى توسىدىم . بىر چاغدا بىر ماشىن كېلىپ توختىدى . شوپىرغا مىڭ مەرتىۋە رەھمەتلەرنى ئېيتىپ ماشىنغا ئۇ قىزنى يۈلەپ چىقاردىم . ئۇ قىزدىن ئۆيىنىڭ نەلىكىنى سورىسام ، چالا -پۇچۇقلا بىر يەرنى دېگەن ئىدى ،شوپۇر بىلىمەن ئۇ يەرنى دەپلا ماڭدى .  كېچىدە بىر قىزنى مەس ھالەتتە سۆرەپ يۈرگىنىمدىن شوپۇردىن خىجىل بۇلۇپ قالغان ئىدىم . شوپۇرمۇ بۇنى چۈشەنگەندەك ، گەپمۇ  قىلماي ماڭدى . يولدا قانچىلىك ماڭدۇق بىلمىدىم ، توساتتىن ئالدىمىزدا  كېتىۋاتقان يۈك ماشىنسىنىڭ شوپىرى مۈگدەپ قالدىمۇ ماشىن يولدىن چىقىپ كەتتى .  ئىتتىك كىلىۋاتقان ماشىننى شوپۇر تورمۇز قىلىپمۇ  توختۇتالماي ، رولنى يولنىڭ چېتىگە بۇرىغان ئېدى  ،رولنىڭ قاتتىق بۇرۇلىشىدىن ماشىن يانچە ئۆرۈلۈپ ، يولنىڭ ياقىسىدىكى دەرەققە بېرىپ تاقىشىپ  توختىدى. تەلىيىمگە قۇلۇم نەگە تەگدىكىن ، ياكى ئەينەك قىيۋەتتىمۇ ئالقىنىمدىن  قان چىققاندىن باشقا ، باشقا جايلىرىم ساق ئىدى ، شوپۇرمۇ ساق ھېچنىمە بولماپتۇ .ئەمما ھېلىقى قىز ماشىنا ئۆرۈلگەن تەرەپتە ئولتۇرغاچقا ، ماشىنىنىڭ ئەينىكى چېقىلىپ، يۈزى قانغا بۇيۇلۇپ كەتكەن ئىدى . مەن قورقۇپ كەتكىنىمدىن قىزنى نىمە قىلىشنى بىلمەي قاراپ تۇرۇپتىمەن ، بىر چاغدا شوپۇرنىڭ ‹نېمىگە قاراپ تۇرىسىز ئۇنى ماشىندىن چۈشۈرىڭ دوختۇرخانىغا ئاپىرايلى› دېگەن سۆزىدىن ئېسىمنى يىغىپ ،قىزنى ماشىندىن چۈشەردىم ،ئۇ ھىچنىمىنى بىلمەي ياتاتتى . قوللىرىم بىلەن ئۇنىڭ يۈزلىردىكى قاننى سۈرتۇپ ،قان چىققان يەرنى مەھكەم  تۇتىۋالدىم . ئەمما ئەينەك ئۇنىڭ بېشىنى چوڭقۇر قىيىۋەتكەن بۇلۇپ قان توختايدىغاندەك ئەمەس ئىدى . شۇ چاغدا  بىر ماشىنا كېلىپ توختاپ  بىزنى دوختۇرخانىغا ئېلىپ ماڭدى  . قوللىرىم  كىيىملىرىم پۈتۈنلەي قان بۇلۇپ كەتكەن ئىدى . قىزنى جىددى قۇتقۇزۇش ئۆيىگە ئەكىرىپ كەتتى . قانداق قىلىشنى بىلمەي گاڭگىراپلا قالدىم . باشلىقلارغا تېلفۇن قىلاي دېسەم ئۇلار شۇ تاپتا ئىچىپ مەس بۇلۇشۇپ كەتكەن ئىدى . قىزنىڭ ئۆيىدىكىلىرىنى تېخى تۇنۇمىسام ، نېمە قىلىشنى بىلمەي ئۇياقتىن -بۇياققا مېڭىپ يۈردۈم . بىر چاغدا دوختۇر چىقىپ ، يارا ئېغىزىنى تىكىپ قاننى توختاتقانلىقىنى ،باشقا مەسىلە يوقلىغىنى  ياتاقتا يېتىپ بىر نەچچە كۈن ئۇكۇل سالدۇرسىلا تېزدىن ياخشى بۇلۇپ كېتىدىغانلىقىنى ئېيتتى . خۇداغا شۈكرى دېدىم شۇ چاغدىلا .شوپۇرمۇ كەتمەي شۇ يەردە ئالاقزادە بۇلۇپ يۈرگەن ئىدى ،ئۇنىڭ كۆڭلىمۇ خېلى تىنجىدى بولغاي ، قۇلۇمغا قاراپ ،مېنىمۇ تەكشۈرتۈپ بېقىڭ دېگىلى تۇردى . مېنىڭ ھېچقىسى يوق دەپ ئۇنىمىغىنىمغا  قارىماي ،دوختۇرنىڭ ئالدىغا باشلاپ كىردى . يېزىدىكى ئادەملەر ھەقىقەتەن ئاق كۆڭۈل كېلىدىكەن ، شوپۇر بىزنىي ياخشى كۆڭلى بىلەن ماشىنسىغا ئېلىۋالغان ، ئەمدى بۇ كېلىشمەسلىك بىلەن ئۇنىڭ خاتىرجەملىكى بۇزۇلدى ، ئەمىليەتتە ئادىمىلىكتىن سۆز ئاچساق ، بۇ ئىشنىڭ كېلىپ چىقىشىدا شوپۇرغا ئېغىرلىقىمىزنى سالماسلىقىمىز كېرەك  .شۇڭا دوختۇرخانا رەسمىيەتلىرىنى ئۇنى ئۆتىگىلى قويمىساممۇ ،ئاق كۆڭۈل شوپۇر ئۇنىمىغانغا ئۇنىماي رەسمىيەتنى ئۆتىدى . دادام دائىم ماڭا ماشىناڭغا يولدا تۇرغان قېرى ، بالا كۆتەرگەن ئادەملەرنى ئۆزەڭ توختاپ سېلىۋال ، سۇۋاپ بۇلىدۇ دەيدىغان ، قاراپ باقسام ھازىر بۇرۇنقىدەك شوپۇرلار قالمىدىمۇ ياكى سەۋەپ مۇشۇنداق بىزدەك يولىچىلاردىمۇ ، بەزىدە جىددى ئىشىڭىز چىقىپ قالغاندا قولىڭىزنى كۆتۈرۈپ ماشىن توسىسىڭىز ، شوپۇرلار قاراپمۇ قويماي كېتىپ قالىدۇ . شۇڭا ھازىر بۇ ئىشلارغىمۇ ھەيران قالغىلىمۇ ، يامان دېگىلىمۇ بولمايدىغان بۇلۇپ كەتتى . قۇلۇمنى تاڭدۇرۇپ بۇلۇپ قىزنىڭ يېنىغا كىردۇق ، ئۇ تېخىچە ئېسىگە كەلمىگەن ئىدى . ئۇنى ئايرىم ياتاققا ئورۇنلاشتۇرۇپ بولغاندىن كېيىن شوپۇرنى قايتىپ كېتىڭ دېسەم ،كەتكىلى ئۇنىمىدى ، ھەر ئىككىمىز قىزنىڭ ھوشىغا كېلىشىنى كۈتۈپ ئولتاردۇق . تاڭ يۇرۇشقا ئازقالغان چاغدىلا قىز كۆزىنى ئاچتى ھەم يىغلاپ تۇرۇپ ؛ -كەچۈرۈڭ ئاكا ، سىزگە ئاۋارىچىلىق تېپىپ بەردىم،- دېدى . مەنمۇ ؛ - ھېچقىسى يوق ، بۇنداق بۇلىشىنى كىم ئويلۇغان سىڭلىم ،ھېلىمۇ خۇدايىم بىر ساقلىدى ، ھەممىمىزنىڭ پىشانىمىز ئوڭ ئىكەن ، ئەمدى ئۆيىڭىزدىكىلەرگە خەۋەر قىلىپ قۇيايلى . بىزمۇ ئەسلىدە بۈگۈن چۈشتىن كېيىن قايتماقچى ئىدۇق ،ئەمدى بۇ ئىش يۈز بەردى ، بۇ ئىشلارنى بىر تەرەپ قىلىۋېتىپ ئاندىن قايتارمىز ،- دېدىم . قىز يىغىسىنى توختۇتۇپ شوپۇرغا ؛ - ئاكا ، سىز قايتىۋېرىڭ ، بۇ ئىش ئۈچۈن سىز بىلەن ھېساپ -كىتاب قىلىشىپ ئولتۇرمايمەن ، ياخشى نىيەتلىك ئادەم ئىكەنسىز ، تۈنۈگۈن كەچتىكى ئاشۇ ئەپتىم ئۈچۈن ئۆزەمدىن نەپرەتلىنىمەن .نىمىشقىمۇ قىز بالا بۇلۇپ قالغاندىمەن دەپ نۇرغۇن قېتىم پۇشايمان قىلىپ كەتتىم ، ئەمما رىياللىقنى ئۆزگەرتىشكە ئامالىمىز يوقكەن . قىزنىڭ بۇ سۆزلىرىدىن ، ئۇ قىزغا ھەقىقەتەن ئىچىم ئاغرىپ قالدى . بەزى ئىشلارنى دېمەك ھەم  چۈشەنمەكمۇ تەس ئىكەن دەپ ئويلاپ كەتتىم . شوپۇر ئۇ قىزنىڭ زورلىشى بىلەن تېلفۇن نۇمۇرىنى قالدۇرۇپ قۇيۇپ قايتىپ كەتتى  . سائەتمۇ ئونلار بولدى ، مەن باشلىققا تېلفۇن قىلىپ ، بۇ ئىشلارنى دېدىم . بىردەمدىن كېيىن ئۇلارمۇ يېتىپ كەلدى ، ئۇلارنىڭ ئارىسىدا سامان قوساق باشلىقمۇ بار ئىدى . قىزنىڭ ئەھۋالىنىڭ يامان ئەمەسلىكىنى كۆرگەن سامان قوساق باشلىقمۇ كۆڭلى جايىغا چۈشۈپ ، بۇ ئىشلارنى ئەتراپلىق ھەل قىلىدىغانلىقىنى  ئېيتىپ بىزنى خاتىرجەم  كېتىۋېرىشكە ئۈندىدى . بىزنىڭ باشلىقمۇ ئەھۋالنىڭ ئېغىر ئەمەسلىكىنى كۆرۈپ قايتىپ كېلىشكە ماقۇل بولدى ، ئۇ قىز بىلەن خوشلۇشۇپ مەن كىيىملىرىمنى ئالماشتۇرۇش ئۈچۈن  ئۇدۇللا ياتاققا ماڭدىم . ئىشلىرىمنى تۈگۈتۈپ بۇلۇپ ئەمدىلا ياتاقتىن چىقاي دەپ تۇرسام ، سامان قوساق باشلىق ياتاققا كىرىپ كەلدى . ھەم مەندىن ئاخشام نېمە ئىشلار بولغىنىنى سوراپ كەتتى ، مەن بولغان ئىشلارنى سۆزلەپ بەرسەم ، ئۇ ھېچ ھېيىقماستىن ،ئۇ قىز بىلەن باشقىچە غەيرى مۇناسىۋەتتە بولمىغانسىز دەپ سورىدى ، مەن ئاچچىقىمدا تاس قالدىم مۇش بىلەن ئۇنىڭ چىرايىغىلا سالغىلى ، لېكىن يەنىلا ئۆزەمنى تۇتىۋېلىپ ،ئۇنداق ئىش بولمىغانلىقىنى ئېيتسام ؛ - ھېلىمۇ سىزنى شەيتان ئازدۇرۇپ ،ئۇ قانچۇقنىڭ دامىغا چۈشمەپسىز ، بولمىسا تۈگۈشەتتىڭىز ،- دېدى . مەن ھەيران قالدىم ؛ - بۇ نېمە دېگىنىڭىز ئەمدى ؟ - ئۇنىڭچۇ ئەيدىس كېسىلى بار . ئۇنىڭ بۇ ئىشىنى مەن ھېچكىمگە تىنمىغان ، ئەسلىدە بۇرۇنلا ئىدارىدىن ھەيدىۋېتەي دېگەن بولمىسا . ئانىسى كېلىپ يالۋۇرۇپ تۇرۋالمىغان بولسا ، ئاللىقاچان كەشىنى توغرۇلۇتۇپ بۇلاتتىم . بۇ گەپلەرنى ئاڭلاپ پۇت -قوللىرىم بوشىشىپلا كەتتى . كۆز ئالدىمغا بايامقى قىزنىڭ چىرايى كەلدى . قارىماققا ئۇ قىز ئەخلاقسىز قىزلارغا ئوخشۇمايتتى . توساتتىن كاللامغا كەلگەن قان بىلەن كاللام پېقىراپ كەتتى . چۈنكى مەن يارلىنىپ قان چىقىۋاتقان ئاشۇ قۇلۇم بىلەن ئۇ قىزنىڭ بېشىدىكى يارا ئېغىزىنى چىڭ تۇتۇپ دوختۇرخانىغا ئاپارغان ئەمەسمۇ ؟! - ئاھ  خۇدا  !-  دېگىنىمچە ئولتۇرلۇپ قالدىم . شۇ كۈندىن باشلاپ چېۋىن ياۋالغان ئادەمدەك غەشلىكە يۈردۈم ، توردىن ئەيدىس كېسىلىگە ئائىت نۇرغۇن بىلىملەرنى كۆردۈم . دوختۇرخانىغا بېرىپ قان  تەكشۈرتتىم ، ئەمما ھېچ قانداق نورمالسىزلىق ئەھۋالى كۆرۈلمىدى . توردىكى بىلىملەردىن ئەيدىس ۋىروسىنىڭ يۇقۇملىنىپ بايقىلىشى 3 ئايدىن 6  ئايغىچە ئارلىقتا بۇلۇدۇ دېگىنى بويىچە 3 ئاي بولغاندا يەنە تەكشۈرەتتىم ، لېكىن يەنە نورمال چىقتى . بۇنىڭدىن خوشال بۇلاي دېسەم ، بەزىلەرنىڭ بىر يىلدىن كېيىن  ، يەنە بەزىلەرنىڭ يەتتە سەككىز يىلدا بايقىلىدۇ دېيىلگەن  . ئۆزەمنىڭ گوشىنى ئۆزەم يىگۈدەك بۇلۇپ كەتتىم . چۈنكى  ئەيدېس كېسىلىنىڭ ئالدىنى ئېلىش ، قانداق ئامىللاردىن يۇقۇدىغانلىقى ، يۇقۇملانغانلارغا قانداق مۇئامىلە قىلىش توغرۇلۇق ھەر يىلى خەلقارا ئەيدېس كۈنى پائالىيىتىدە تەشۋىقات ئېلىپ بېرىلۋاتقان بۈگۈنكى كۈندە ، بۇنچىلىك ئىشتىن مېنىڭچە ھەممە ئادەمنىڭ خەۋىرى بار دەپ قارايمەن . ئادىل جىمىپ قالدى ، دېمەك ئادىلنىڭ ھېكايىسى ئاخىرلاشقان ئىدى . ئەمما ھېكايىنىڭ ئاخىرقى قىسمىدىكى مەزمۇنلارماڭا  ئۇنىڭ ئەيدېس كېسىلى بۇلۇپ قالدىم دېگىنىنىڭ دەلىلى ئەمەستەك تۇيۇلدى . - ئادىل سىز شۇنىڭغا ئاساسەنلا ئۆزىڭىزنى ئەيدېس بۇلۇپ قالدىم داۋاتامسىز ؟ - شۇنداق ، بۇ رىياللىق ھامان يۈز بېرىدۇ . - ناۋادا يۈز بەرمەي قالسىچۇ ؟ - بۇ مۇمكىن ئەمەس ، ئىشەنمىسىڭىز توردىن بۇ كېسەلگە دائىر مەزمۇنلارنى كۆرۈپ بېقىڭ - ھەي ئادىل ، ھەي ئادىل . يۈرىكىم مېنىڭ مال تۇنۇيدۇ دېسەم سىز ئىشەنمەي كۈلۈپ كېتەتتىڭىز ، سىزنىڭ بۇنداق كېسەل ئەمەسلىكىڭىزگە يۈرىكىم جاۋاپ بېرىپ بولدى . - نېمىگە ئاساسەن شۇنداق دەيسىز ؟ - مېنىڭچە ئۇ قىز ،ھە راست ئىسمى نېمە ئۇ قىزنىڭ ؟ - مەنمۇ سورىماپتىمەن ، ھېلىقى سامان قوساق باشلىق نېمە دېگەنتى ئىسمىنى ، ھەي ئېسىمدە قالماپتۇ . - ئۇ قىز ئەيدېس كېسىلى ئەمەسمىكىن . - قانداق دەيسىز ؟ - ئويلاپ بېقىڭ ، ئۇ قىزنىڭ بۇنداق كېسەللىكىنى يېزىلىق ھۆكۈمەتنىڭ باشلىقى قانداق بىلىدۇ ؟ ئۇ نېمە ئۈچۈن مەن بۇنى باشقىلارغا دېمىدىم دەيدۇ ؟ ھەم نېمىشقا ئۇ سىزنىڭ كەينىڭىزدىن ياتاققا كىرىپ بۇلغان  ئىشلارنى سورايدۇ ؟  مېنىڭچە چوقۇم بۇ يەردە بىر گەپ بار .پەرىزىم توغرا چىققاي ئىلاھىم . مېنىڭ بۇ گەپلىرىمنىڭ تەكتىگە  يەتكەن گۈلزار خوشاللىقتىن سەكرىۋەتتى ؛ - ماھىرە سىز بەك ئەقىللىق ئىكەنسىز ، ئۆتكەندە ئادىل بۇ ئىشلارنى بىرەقۇر سۆزلەپ بەرگەندە ، مەن ھەم ئەكبەر ئىككىمىزمۇ بۇنچىلىك چوڭقۇر ئويلىمىغان ئىكەنمىز . ناۋادا سىز ئادىلنى خاتا چۈشۈنىپ ئاجىرشىپ كەتكەن بولساڭلار ، يۈرىكىڭلەردىكى دەز مەڭگۈ شۇ پېتىچە قالاتتىكەن . - مەن ئەقىللىقمۇ ئەمەس گۈلزار  ، پەقەت مەنمۇ پەرىزىم توغرا چىقسىكەن ، ئائىلىمىزدە ئادىلنىڭ بۈرۈنقىدەك كۈلكىسىنى ئاڭلىسام  دېگەن ئۈمۈتتىمەن . -  پەرىزىڭىزنىڭ توغرا ياكى خاتالىقىنى ئەتىلا بېرىپ ئىسپاتلاپ كېلەيلى . - شۇنداق گۈلزار . ئەتە ۋاقتىڭىز بولسا بىز بىلەن بېرىشىپ بېرىڭ . ئادىلنىڭ چىرايىدىكى غەمكىنلىك ئاستا -ئاستا يوقاپ ،چېھرىدىن ئۈمۈت ، خوشاللىق نۇرلىرى چاقناشقا باشلىدى . گۈلزارمۇ ئەتە تېلفۇن قىلىدىغان بۇلۇپ خوشلۇشۇپ ماڭدى . ھەممىمىزنىڭ چىرايىدىن  بىر خىل ئىپادىلەپ بەرگۈسىز خوشاللىق ئەكىس ئېتەتتى . قىزىم ئەركىيەنىڭ يىغىسىدىن ئادىل ھەر ئىككىمىز ئىچكىركى ئۆيگە يۈگەردۇق .

mehriya

	ئەتتىگەن سائەت ئون بىلەن گۈلزارمۇ تېلفۇن قىلىپ بىز بىلەن بىرگە بارىدىغانلىقىنى ئېيتتى ، ئادىلمۇ ئىدارىگە تېلفۇن قىلىپ بىر كۈنلۈك رۇخسەت سورىدى . شۇنىڭ بىلەن بالىنىڭ نەرسە كېرەكلىرىنى يىغىشتۇرۇپ ئادىل ئۈچۈمىز ئۇ يېزىغا قاراپ يولغا چىقتۇق . نەچچە سائەت يول يۈرگەندىن  كېيىن يېزىلىق ھۆكۈمەتنىڭ دەرۋازىسى ئالدىغا كېلىپ توختۇدۇق . ئادىل ماشىنىدىن چۈشمەي بالىنى تۇتۇپ ماشىندا تۇرۇپ تۇردى ، مەن گۈلزار بىلەن ئادىل دەپ بەرگەن بويىچە ھېلىقى قىز ئىشلەيدىغان تەشۋىقات ئىشخانىسىغا كىردۇق . ئىشخانىدا ئۈچ ئادەم بۇلۇپ ئىككىسى ئايال ئىدى . - بىرە ئىش بىلەن كەلگەنمىدىڭلار ،- دەپ سورىدى ئۇلارنىڭ ئىچىدىكى بىرسى . - بىز مۇشۇ بۆلۈمدە ئىشلەيدىغان بىر قىزنى ئىزدەيتتۇق  . - ھە ، ئايگۈلنى ئىزدەمتىڭلار ؟ - ھەئە ، ئۇ قىز بىر يەرگە چىقىپ كەتكەنمىدى ؟ ،- دەپ چاندۇرمايلا سۆرىدىم ، چۈنكى ئۇ ئىككى ئايالنىڭ ياش قۇرامى بىزدىن چوڭدەك قىلاتتى ، شۇڭا ئايگۈل دېگەن چوقۇم بىز ئىزدىمەكچى بولغان قىز دەپ پەرەز قىلغان ئىدىم . - ئايگۈل خىزمىتىدىن ئىستىپا بېرىپ كەتكىلى نەچچە ئاي بولدى ، قارىغاندا بۇنىڭدىن خەۋىرىڭلار يوق ئوخشايدۇ ، سىلەر ؟- دەپ سۇئال نەزىرىدە ھەر ئىككىمىزگە سىنجىلاپ قارىدى بايامقى ئايال . - ھە ، بىز شەھەرلىك تەشۋىقات  ئىشخانىسىدىن  ، خىزمەتكە مۇناسىۋەتلىك ئىشلار توغرۇلۇق ئۇ قىز بىلەن پىكىرلىشىپ باقايلى دېگەن ،- دېدى گۈلزارمۇ ئەقلىنى جورۇپلا . - ئايگۈل خىزمەتتە بەك ئاكتىپ ،تىرىشچان قىز ئىدى ، نېمە سەۋەپلىكىنى بىزمۇ ئېنىق ئۇقمىدۇق ، بىر كۈنى توساتتىنلا ئىشلىمەيدىغانلىقىنى ئېيتىپ ،نەرسە -كېرەكلىرىنى يىغىشتۇرۇپ كېتىپ قالدى . ئاڭلىساق ناھىلىك بازاردىن بىر دۇكان ئېلىپ ، ‹ئىخلاس › تاللا بازىرىدىن بىرنى ئېچىۋاپتۇدەك . خىزمىتىمىز ئالدىراش بولغاچ بىزمۇ بېرىپ كۆرۈپ كەلگۈدەكمۇ بولالمىدۇق . - ھە رەھمەت سىزگە ، ئۇنداقتا بىز قايتىلى . - ھېچقىسى يوق . بۇلىدۇ خوش ئەمىسە . - خوش بىز گەرچە بۇ يەردە ئۇ قىز بىلەن ئۇچۇرشالمىغان بىلەن ھەرھالدا ئۇ قىزنىڭ خەۋىرىنى ئېلىپ قايتىپ چىقتۇق . ھەم ئۇدۇللا ناھىيە بازىرىغا قاراپ ماڭدۇق . يېزىلاردا بازار ئاجايىپ قىزىيدىكەن  ، چارشەمبە بازىرى  ، جۈمە بازىرى ، يەكشەنبە بازىرى دەپ شۇ كۈنلىرى ھەرقايسى يېزىلاردا ئايرىم -ئايرىم بازار بۇلۇپ ، بارلىق سودا -سېتىق بىلەن شوغۇللىنىدىغان سودىگەرلەر يايمىلىرىنى ماشىنغا بۇسۇرۇپ بېرىپ ،بىر كۈنلۈك سودىسىنى قىلىپ كېلىشىدىكەن ،  نەرسە -كېرەكلەر ھەم سەرخىل ،ھەم شۇ يېزىدىكى كىشىلەرنىڭ تۇرمۇش سەۋىيىسىگە مۇۋاپىق بۇلۇپ ، شۇ كۈنى ئاشۇ يېزا ئادەم دېڭىزىغا ئايلىنىدىكەن .بۈگۈن پەيشەنبە بولغاچقا ، ناھىلىك بازارمۇ خېلى ئاۋات ئىدى ، بىز بازارنى ئارىلاپ ‹ئىخلاس › تاللا بازىرى دەپ ۋىۋىسكا ئاسقان بازارنىڭ ئاۋات يېرىگە جايلاشقان دۇكانغا كىردۇق . دۇكاندا خېرىدارلار خېلى كۆپ بۇلۇپ ، قارىماققا دۇكاننىڭ سودىسى ياخشىدەك قىلاتتى . - ئادىل ئاكا ، قايسى شامال ئۇچۇرتۇپ كەلدى سىزنى ؟،-دېدى پۇل يىغىش بىلەن ئالدىراش بۇلۇپ كەتكەن بىر قىز بېشىنى كۆتۈرۈپ كۈلۈمسىرەپ تۇرۇپ ؛ - دەل سىزنىڭ دوكىنىڭىزغىلا كىرىپتۇق ئەمەسمۇ سىڭلىم ، قانداق بۇلۇپ بۇ دۇكاندا ئىشلەپ قالدىڭىز ؟ خىزمىتىڭىزچۇ ؟،- ئادىلمۇ ھېچ ئىش بولمىغاندەك قىيەپەتتە ئۇ قىزدىن سورىدى . - ھەي ئاكا نىمىسىنى دەيسىز ، شۇ قېتىمقى ۋەقەدىن كىيىن خىزمىتىمدىن ئىستىپا بېرىپ ، بۇ دوكاننى دوستلىرىمنىڭ ياردىمىدە ئېچىۋالدىم ، ھازىر ئۆز خان ئۆز بەگ دەڭە ، باشلىقنىڭ چىرايىغا قارايدىغان ئىشلاردىنمۇ قۇتۇلۇپ قالدىم ،-دېدى قىز يەنىلا كۈلۈمسىرەپ تۇرۇپ ،ھەم گۈلزار بىلەن ئىككىمىزگە قاراپ ؛ - ئاكا بۇ بالا كۆتۈرۋالغان ھەدىمىز  ئوخشۇمامدۇ ، ئۆتكەندە ئايالىمنىڭ ئاي كۈنى يېقىنلىشىپ قالغان دەۋاتقانتىڭىز ؟ - ھە ، بۇياق ئايالىم ماھىرە ، بۇياق دوستىمىز گۈلزار بۇلىدۇ . - ئەسسالامۇ -ئەلەيكۇم ھەدە - ۋەئەلەيكۇم -ئەسسالام . - ئۆتكەندە ھەدە بەك سەت ئىش بولدى ، ئادىل ئاكامغا بىر مۇنچە ئاۋارىچىلىق تېپىپ بەردىم . ئەمما ئادىل ئاكام بەك ياخشى ئادەم ئىكەن . سىلەرگە كۆز تەگمىسۇن ھەدە . - رەھمەت سىڭلىم ، ئادىل ئاكىڭىزمۇ گېپىڭىزنى قىلىپ بەرگەن ئىدى . - ھەئە ، راست ئادىل ئاكا ، قۇلىڭىز ياخشى بۇلۇپ كەتكەندۇ-ھە ؟ - سىزنىڭ شۇنچە چوڭ يارىڭىزغا سېلىشتۇرغاندا قۇلۇمدىكى ئۇ  يارا قانچىلىكتى سىڭلىم  .سىز ياخشى بۇلۇپ كەتكەن يەردە مەن ياخشى بولماي قالامتىم . ئەمما ئۆز ۋاقتىدا ھەدىڭىزگە  بىرسىنىڭ موتۇسىنى مىنىپ باقاي دەپ يىقىلىپ چۈشتۈم دەپ يالغان سۆزلىگەن ئىدىم . - نىمىشقا ئەمدى ، ھەدەمنىڭ كۈنلەپ قېلىشىدىن قورقۇپما ، ئەمما قاراپ باقسام ھەدىمىز ئۇنداق ئەمەستەك قىلىدۇ ، شۇنداقمۇ ھەدە ؟ - شۇنداق سىڭلىم ، ئاكىڭىز ماشىنا  ئاۋارىيەسىگە ئۇچۇردۇم دېسە  مېنى قورقۇپ كېتىدۇ دەپ شۇنداق دەپ قۇيۇپتىكەن ، بوشىنىپ بولغاندىن كېيىن ھەقىقى ئەھۋالنى دەپ بەردى . سىزچۇ پۈتۈنلەي ياخشى بۇلۇپ كەتكەنسىز ؟ نىمىشقان خىزمىتىڭىزنى تاشلاپ بۇ يەرگە كېلىۋالدىڭىز ؟،- دېدىم مەنمۇ بۇ يەرگە تاسادىبى كېلىپ ئۇچۇرشۇپ قالغاندەك قىياپەتتە . چۈنكى بىر قىزدىن سىزدە ئەيدىز كېسىلى بارمۇ دەپ سوراش تولىمۇ بىئەپ بولغاچ ، يولدا كېلىۋېتىپ بۇ ھەقتە قىز بىلەن ئادەتتىكىدەك پاراڭلىشىپ ئولتۇۇرپ ،گېپىنىڭ ئورامىغا قاراپ باقايلى دەپ مەسلىھەت قىلىشۋالغان ئىدۇق . - ھەدە بىز تاماق يىگەچ پاراڭلىشايلى ، چۈشمۇ بۇلۇپ قاپتۇ ، سىلەرنى مېھمان قىلىۋالاي بۈگۈن ، ئادىل ئاكامنى ئىزدەپ بېرىپ رەھمىتىمنى ئېيتىۋېلىشىمغا پۇرسەت بولمايۋاتقان . بۈگۈن خۇدايىم نىسىپ قىلغان ئوخشايدۇ . بۈگۈن ماڭا بۇ پۇرسەتنى بەرسەڭلار ،-دېدى قىز مۇلايىملىق بىلەن . -  سىزنى ئاۋارە قىلامدۇق ئەمدى ،- دېدى ئادىل كۆزلىرىنى گۈلزار بىلەن ئىككىمىزگە قىسىپ قۇيۇپ . - بۇنداق دېمەڭلار ، سىلەرنى چىللاپمۇ ئەكەلگىلى بولمايدىغان ئەزىز مېھمانلار تۇرساڭلار ، سەل تۇرۇپ ئوغۇل دوستۇممۇ كەلمەكچى ، مەن ئۇنى سىلەرگە تۇنۇشتۇرۇپ قۇياي ، كېلەر ھەپتە تويىمىز بولىدۇ ،- قىز شۇنداق دەپ خىجللىقتىن قىزىرىپ يەرگە قارىۋالدى . بۇ گەپلەردىن پەرىزىمنىڭ توغرۇلىقىنى ھېس قىلدىم ،گۈلزارمۇ شۇنداق ئويلىدى بولغاي ماڭا قاراپ قويدى . دېمىسىمۇ نەچچە سائەتلىك يول يۈرگەچكە قوساقتىكى چاشقانلارمۇ ئاچلىقتىن ئۇياق -بۇياققا يۈگۈرۈشكە باشلىغان ئىدى  ، تارتىشىپ تۇرمايلا ئۇ قىز باشلىغان ئېسىل بېزەلگەن ئاشخانىغا كىردۇق ، ھەم ئۇنىمىغىنىمىزغا قارىماي بىر مۇنچە قورىمىلارنى بويرۇتتى . قىزنىڭ ھېكايىسىگە قىزىققىنىمدىن ،تاماقنىڭ چىقىشىنى ساقلاپ تۇرمايلا ؛ - سىڭلىم ، قېنى دەڭە ، ھوكۇمەت خىزمىتىدىن يەنىلا ئۆز ئالدىغا ئىش قىلغان ياخشىمىكەن ؟ - توغرا دەيسىز ھەدە ، بۇرۇندىنلا مۇشۇنداق ئۆز ئالدىمغا ئىش قىلىش ئويۇم بار ئىدى ، لېكىن ئۆيدە ئانام يالغۇز ھەم كېسەلچان ، دادام كىچىكىمدىلا تۈگەپ كەتكەن ، بىر ئىنىم بار ،ئۇ ھازىر ئىچكىردە ئالى مەكتەپتە ئوقۇيدۇ . بىچارە ئانام مېنى ئاز جاپالار بىلەن ئوقۇتمىدى ، مەكتەپ پۈتتۈرۈپ كېلىپ ئىمتىھان بېرىپ ،يېزىلىق ھۆكۈمەتكە ئىشقا چۈشتۈم ، بۇنىڭدىن دەسلەپتە شۇنداق خوش بولدۇم ، چۈنكى ئازراق بولسىمۇ ئائىلىمىزنىڭ يۈكىنى يىنىكلىتىدىغان بولدۇم دەپ ئۆز -ئۆزەمدىن پەخىرلىنىپ يۈردۈم . ئەمما بۇ خوشاللىقىم ئۇزۇنغا بارمىدى . بىر كۈنى ئىشتىن چۈشۈدىغان چاغدا باشلىق كېرىپ ، يۇقۇردىن تەكشۈرۈش ئەترىتى كېلىپتۇ . كەچتە مېھمان قىلىمىز ، شۇڭا سىزمۇ بىز بىلەن بىرگە بارىسىز دەپ قۇيۇپ چىقىپ كەتتى . يېڭىدىن ئىشقا چۈشكەچكە باشلىقنىڭ ئىستىلىنىڭ بۇزۇق ئىكەنلىكىنى بىلمىگەن ئىكەنمەن . كەچتە ئۇ سورۇنغا بېرىپ ،ئاشۇ ئادەملەردىن سەسكىنىپ كەتتىم ، باشقىلاردىن جەمىيەت ھازىر ئۇنداق -مۇنداق دەپ گەپ قىلىشلىرىغا كۆزۈم بىلەن كۆرگەندىن كېيىن ئىشەندىم . كېتىدىغان چاغدا باشلىق سىزنى ئۆيىڭىزگە ئاپىرىپ قۇياي دېسە ، ماقۇل دەپتىمەن ، كىم بىلسۇن ، بۆرىدىن قۇتۇلۇپ ،يولۋاسقا يۇلۇققىنىمنى . باشلىق شوپۇرغا ماشىننى بىر مېھمانخانىغا ھەيدەشنى ئېيتتى ، مەن بۇنىڭدىن چۆچۈپ كەتتىم ، ھەم سۇئال نەزىرىمدە باشلىققا قارىدىم ، باشلىق بۇنى سەزدى بولغاي ؛ - ھە قوقماڭ ئايگۈل ، كەلگەن مېھمانلارنى  مۇشۇ مېھمانخانىغا ئورۇنلاشتۇرغان ، كىرىپ قاراپ باقايلى ، قانداقراق ياتاقلارنى ئورۇنلاشتۇردىكىن ، بولمىسا ئەتە خىزمىتىمزىدىن مەسىلە چىقىرىپ يۈرمىسۇن ئۇلار ،-دېدى . مەن بۇ گەپنى ئارتۇق ئويلۇمايلا ،ماقۇل بۇلۇپ باشلىقنىڭ كەينىدىن بىر ياتاق ئۆيگە كېرىپتىمەن ، ئۇ ئىشىكنى يېپىپلا ماڭا پوخۇرلۇق قىلغىلى ئۇرۇندى . شۇ چاغدا بىلمەيمەن كاللامغا شۇنداق بىر ئەقىل نەدىن كەلدىكىن ؛ - ماڭا يېقىن كەلمەڭ ، مېنىڭ ئەيدىز كېسىلىم بار ،- دەپ ئۆزەمنى چەتكە ئالدىم . بۇ سۆزۈمدىن قورقۇپ كەتكەن باشلىقمۇ ، ئېسىنى يىغىپ ماڭا بىر ھازا قارىۋېتىپ ياتاقتىن چىقىپ كەتتى . شۇ ئىشتىن كېيىن باشلىقنى كۆرسەم تېنىم شۈركىندىغان بۇلۇپ قالدى . بىر كۈنى ئۇ مېنى ئىشخانىسىغا چاقىرتىپ ،مېنى ئىشتىن بوشاتماقچى بولغانلىقىنى ئېيتتى . مەن نېمە دىيىشىمنى بىلمەي بېشىمنى تۆۋەن سېلىپلا يېنىپ چىقتىم . چۈنكى مۇشۇ كۈنلەردە باشلىق توغرۇلۇق خېلى گەپلەرنىمۇ ئاڭلىدىم . ئۇ ئىدارىگە كەلگەنلىكى قىزلارنى كەچلىكلىرى ئېلىپ چىقىپ كېتىپ يېرىم كېچىدە ئەكىلىپ قۇيۇدىكەن . بۇنىڭغا بىچارە قىزلار كۆنمەيمۇ ئامالى يوق ئىكەن .ئاران تەستە ئېرىشكەن تاماق قاچىسىنىڭ چېقىلىشىدىن قورققان قىزلار ،دەردىنى ئىچىگە يۇتۇپ ، باشلىقنىڭ كۆرسەتمىسىگە ماقۇل بولمايمۇ ئامالى يوق ئىكەن . ئەمدى قانداق قىلارمەن ، ئىنىم تېخى بۇ يىل ئالى مەكتەپكە كىرگەن ، بۇ خىزمىتىمدىن ئايرىلىپ قالسام ، ئۇنىڭ ئوقۇش مەسىلسىنى قانداق بىر تەرەپ قىلارمەن دېگەن خىياللار بىلەن ئۆيگە كېلىپ تاماق گېلىمدىنمۇ ئۆتمىدى . بۇنى ھېس قىلغان بىچارە ئانام مەندىن نېمە ئىش بولدى دەپ سوراپ تۇرىۋالدى . مەن  ئىشتىن بوشۇتۇلدۇم  دېدىم ، ئانام سەۋەبىنى سوراپ تۇرىۋالغاچقا ئامال قىلالماي ، ‹مېنى خىزمەتنى ياخشى ئىشلىمىدى › دېگەن سەۋەپ بىلەن ئىشتىن بوشاتتى دەپ يالغان سۆزلىدىم ، ئانام بۇنى ئاڭلاپ ئەتىسى سەھەردە باشلىقنىڭ ئىشخانىسىگە بېرىپ ،ئۇنىڭغا يالۋۇرۇپ مېنى ئىشلەيدىغان قىلىپ قۇيۇپ كەپتۇ . مەن بولسام بەرىبىز ئىشلىمىگەندېكىن دەپ ، تازا ئۇخلاپتىكەنمەن ، ئانام كېلىپ‹ تۇرە ئىشقا بارغىن بالام ›دېگەندىلا ئورنۇمدىن تۇردۇم . ئانامنىڭ سۆزلىرىنى ئاڭلاپ خوشالمۇ بولمۇدۇم ، گەرچە ئىشتىن بوشىتىلغىنىمغا قانداق قىلارمەن دېگىنىم بىلەن ، ئاشۇ باشلىقتىن قۇتۇلغىنىمغا راستىمنى دېسەم خوشال ئىدىم .  ئانامنىڭ زورلىشى بىلەن ئىدارىگە يەنە ئىشقا باردىم . ئۈچىلىمىز قىزنىڭ ھېكايىسىگە قىزىقىپ ، چىققان تاماقلارغىمۇ چوكا سالماي ،ئۇنىڭ ئاغزىغا قاراپ ئولتاردۇق ، ئەمما قەلبىمدىكى خوشاللىق  چىرايىمغا تېپىپ  چىقتى بولغاي ،گۈلزارنىڭ ئۈۈمتلۈك كۆزلىرىدىن قېچىپ قۇتۇلالمىدىم ؛ - ماھىرە ، تاماق يىگەچ ئاڭلىساقمۇ بولىدۇ ئاداش ، قارىغىنە ھېكايىنىڭ ئىچىگە كىرىپلا كەتكىنىڭنى ،- دەپ كۆزىنى قىسىپ قويدى . ئادىلنىڭمۇ ئەمدىكى چىرايى ئىلگىركى ماڭا تۇنۇش بولغان ھالىتىگە قايتقان بۇلۇپ  ، نەچچە ۋاقىتتىن بۇيان تارتقان ئازاپلىرى بىراقلا يۇيۇلۇپ كەتكەندەك تولىمۇ خوشال كۆرۈنەتتى . ئۇ ماڭا پات -پات قاراپ قۇياتتى . كۆزلىرىدىن چاقناپ تۇرغان ئۈمۈتكە تولغان مۇھەببەت نۇرلىرى خۇددى ئاشپۇزۇلنى بىر ھەسسە يۇرۇتىۋەتكەندەك ، توساتتىن قار -مۇزلار ئېرىپ ، باھار كەلگەندەكلا پۈتۈن دۇنيا تولىمۇ گۈزەل ، تولىمۇ ئىسسىق بېلىندى . گۈلزارنىڭ سۆزى بىلەن ئالدىمدىكى تاماققا چوكا ئۇزاتتىم . بۈگۈنكى بۇ تاماق ماڭا  ئاپام ئەتكەن نوۋرۇز ئېشىدەكلا تەملىك تېتىپ كەتتى . دېمەك قەلبىمىزنى ئازاپلاپ كېلىۋاتقان تۈگۈنلەر پۈتۈنلەي يېشىلىپ ، يۈرەكتىكى دەزلەرنى مېھرى -مۇھەببەت ، ئىپپەت -نۇمۇس ، ئەرلىك مەسئۇليەتتىن ئىبارەت مەلھەملەر  ساقايتماقتا ئىدى . بىز چوكا تەۋرەتكەچ يەنە قىزنىڭ ھېكايىسىگە قۇلاق سالدۇق ؛ - ئىدارىگە بېرىپلا باشلىقنىڭ ئىشخانىسىگە كىردىم . باشلىق تاماكىسىنى تۇتاشتۇرۇپ ئولتۇرۇپ؛ -  مەن ئاناڭنىڭ يېلىنىشىغا ئەمەس ، سېنىڭ ئوتتۇرىمىزدا بولغان ئاشۇ ئىشنى ئاناڭغا دېمىگەنلىكىڭدىن خوش بۇلۇپ قايتا ئىشلەشكە قوشۇلدۇم . ئۆزەڭ ئەسكى كېسەل بولغىنىڭ بىلەن كاللاڭ خېلى ئىشلەيدىكەن سېنىڭ ، تازنىڭ ئەقلى چۈشتىن كېيىن دەپ ، بەلكىم شۇ نىجىس كېسەلنى يۇقتۇرۋالغاندىن كېيىن ئەقلىڭنى تاپقام ئوخشايسەن ، ئالى مەكتەپتە قارىغاندا‹ ئۈچتە ھەمرا ›بۇلۇپ ئوقۇغان ئوخشۇمامسەن. بولمىسا ئاناڭ يالغۇز سېنى قانداق ئوقۇتۇپ بۇلاتتى . بولدىلا بۇ گەپلەرنى دەپ نېمە قىلامەن . بۇندىن كېيىن ئىشلەيسەن ،لېكىن مەن سېنى نەگە بار دېسەم بارىسەن ، مەسىلەن ئاشۇنداق سورۇنلارغا بار دېسەم بانە كۆرسۈتۈپ يۈرمە ، ئاناڭمۇ بۇندىن كېيىن ياخشى ئىشلىسۇن، مەندىن ئەنسىرمىسۇن، خىزمەتتىن كەچ قالسىمۇ مەيلى دەيدۇ سېنى، - دېدى  تاماكىسنىڭ ئىسىنى ئاسمانغا پوۋلەپ تۇرۇپ . باشلىقنىڭ  گەپلىرىنى ئاڭلاپ ئانامغا يالغان سۆزلىگەن سۆزىمنىڭ باشلىقنىڭ قولىدا بىر ساپاق بۇلۇپ قېلىشىنى ئويلۇماپتىمەن . شۇندىن كېيىن ئاشۇنداق بىرە يەردىن تەكشۈرۈش ،ياكى ئىدارە خىزمىتىگە مۇناسىۋەتسىز سورۇنلار بولسۇن باشلىق بىر نەچچىمىزنى سۆرەپ ئېلىپ ماڭغىنى ماڭغان بولدى . مەن بولدى ئىشلىمەيمەن دەي دېسەم ئويىمىزنىڭ ئەھۋالى ،ھەم ئانامنىڭ يالۋۇرۇشلىرى بىلەن چىشىمنى چىشلەپ ئىشلىدىم . ئەمما ئاشۇنداق سورۇنلاردىن باشلىق بىزنى ئۆزى ياندۇرۇپ كېلەتتى . بىز باشلىق قايتايلى دېمىگىچە قايتايلىمۇ دېيەلمەيتتۇق .مەن ئىپپەت -نۇمۇسىمنى ئەنە ئاشۇنداق يالغانچىلىق قىلىپ قوغداپ قالغان . مانا ئەمدى توي قىلىدىغان يىگىتىممۇ مەكتەپ پۈتتۈرۈپ قايتىپ كەلدى . ئۆتكەندە ئادىل ئاكام بىلەن ماشىن ئاۋارىيەسىگە ئۇچۇرغاندىن كېيىن يىگىتىم مېنى بۇ خىزمەتتىن ئىستىپا بېرىشنى ئېيتتى . مەنمۇ ياق دېمىدىم . شۇنداق قىلىپ ئۇنىڭ ياردىمىدە بۇ دۇكاننى ئاچتىم . ھازىر تاپاۋېتىم يامان ئەمەس . قىز مۇلايملىق بىلەن كۈلۈپكىنە بىزگە قارىدى . قىزنىڭ كۆزلىرىدىن بىر خىل خاتىرجەملىك ، جۇشقۇنلۇق چىقىپ تۇراتتى بىز قىز بىلەن خوشلىشىپ قايتتۇق . ھەممىمزىنىڭ قەلبىنى بىر خىل تەسۋېرلىگۈسىز خۇشاللىق ئېگىلىگەن ئىدى . ئىنسانى پەزىلەت بىلەن ئىپپەت نۇمۇست ئۆتتۇرسىدا يۈز بەرگەن تىرادىگىيەلەر قانچىلىغان پاك قەلپلەرنى دەپسەندە قىلىپ ، قانچىلىغان قەلپلەرنى زار يىغلاتقاندۇ ؟ قانچىلىك كىشىلىرىمىز مۇشۇ تېرادىگىيەنىڭ قۇربانى بۇلۇپ كەتكەندۇ -ھە ؟! قانچىلىغان بەختلىك ئائىلىلەر ۋەيران بولغاندۇ ؟....

mehriya

	يولدا كەلگۈچە مۇشۇنىڭدەك خىياللار ئىلكىدە ئادىلغا پات -پات قاراپ قوياتتىم . توساتتىن ئادىل مەندىن ؛ _ ماھىرە ، شۇنىڭغا ھەيرانمەن ، سىز نېمىشقا ئايگۈلنى ئۇنداق كېسەل ئەمەس دەپ جەزىملەشتۈرگەن ئىدىڭىز ؟ مەنمۇ ئۆزەمنى خېلى سەزگۈر دەپ چاغلايدىغان ئەمما بۇ ئىشقا كەلگەندە بەك قەيمۇقۇپ كەتتىممۇ ، ھەجەپ سىز ئويلۇغاندەك ئويلۇمىغان ئىكەنمەن . دەرۋەقە ئەھۋال سىز ئويلۇغاندەكلا چىقتى دېسە . يا خۇدايىمنىڭ بىزنى بەختسىز قىلغۇسى يوق ئوخشۇمامدۇ ؟ _ ھا ھا ھا ، ئادىل ئەمدى كېسىلىم يوقكەن دەپ خوشاللىقىڭىزدا نېمە دىيىشنى بىلمەي ،مۇشۇ گەپنى داۋاتامسىز ؟ بۇرۇنراقلا ماھىرەگە بۇ ئىشلارنى دېگەن بولسىڭىز ھەر ئىككىڭلار بۇنچىلىك ئەلەم تارتىپ ئۆزەڭلارنى بىھۇدە ئازاپلاپ يۈرمەيتتىڭلار ،كىشىلەر ئائىلىنى بىر چىنىغا ئوخشۇتىدىكەن ، ناۋادا ئۇ چېنە سۇنۇپلا كەتسە ، ھەر قانچە قىلسىمۇ دەز قالىدۇ ، ئەسلىگە كەلمەيدۇ دەيدىكەن ، سىلەرنى خۇدايىم بىر ساقلىدى ،ماھىرەنىڭ قەتئى پوزىتسىيىسى بۇ تىرادىگىيەنىڭ كېلىپ چىقىشىنى ساقلاپ قالدى ئادىل . شۇڭا ماھىرە بەك ئېسىل جۇما ،- دېدى گۈلزارمۇ چاقچاق ئارىلاش . _ ئېسىللىگىنى بىلگەچكە تاللاپ تۇرۇپ ئېلىۋالغان مەنمۇ ! _ ھا ھا ھا ،پو دېگەننى غۇلجىلىقتىن قالماي توننىلاپ ئاتىمىز دەڭ . _ ھە بوپتۇ گۈلزار ، ئادىلنىڭ پو ئېتىشىغا يول قۇيايلى ، ئۇنىڭ بۇنداق گەپلىرىنى ئاڭلىمىغىلى خېلى ئۇزۇن ۋاقىتلار بولغان ، مۇشۇنداق كۈنگە ئېرىشكىنىمدىن بۈگۈن ئۆزەمنى تولىمۇ بەختلىك ھېس قىلىۋاتىمەن . _ توغرا ئادىشىم ، ھايات يولى سىناقلارغا تولغان دەپ ، ئاللا ئېگەم ئىككىڭلارنى سىناپ باققاندەكلا بىر ئىش بولدى بۇ .  لېكىن بۇ ئىش ئارقىلىق ، بىر -بىرىگە سادىق يۈرەكنىڭ ئاسانلىقچە باشقىلار قۇلىدا مىجىلىپ كەتمەيدىغانلىقىنى ، ھەم ھەر قانداق مەسىلىگە سۇغاققانلىق بىلەن مۇئامىلە قىلىشنىڭ تولىمۇ مۇھىم ئىكەنلىكىنى ئىككىڭلار ماڭا ھېس قىلدۇردۇڭلار . بۇرۇندىن سىلەرگە مەسلىكىم كېلىدىغان . ئەمدى تېخىمۇ مەسلىكىم كېلىۋاتىدۇ . ئاراڭلاردىكى مۇھەببەت ئادەتتىكى مۇھەببەت ئەمەسكەن . مەنمۇ ئەمدى بەزى ھاكاۋۇرلۇقلىرىمنى تاشلاپ ، مۇھەببىتىمنى بەكرەك قەدىرلىسەم بولغۇدەك . - توغرا گۈلزار ، سىلەر ئاياللار ئەزەلدىن مېھرىبان ، قەلبى گۈزەل پەرىشتىلەر ئىدىڭلار . مۇشۇنداق بەزىبىر باشلىقلىرىمىز ، ئاداشقان ئەركەكلىرىمىز سىلەرنىڭ ئاشۇ نامىڭلارغا داغ تەككۈزمەكتە . مەن بىر كىتاپتىن ‹ناۋادا بىر ئەر بىر قىزنىڭ كۆڭلىنى ئاغرىتسا ، ئۇ قىز ئون ئەرنىڭ كۆڭلىنى ئاغرىتىدۇ › دەپ كۆرگەن ئىدىم ، جەمىيەتتىكى مۇشۇنداق ئىشلارنىڭ ككپىيىپ بېرىشىدا بىز ئەرلەرنىڭ باش تاترىپ بولمايدىغان مەسئۇليىتىمزى بار . ماھىرە مېنىڭ قەلبىمدە ئەخلاق ۋە باشقا جەھەتلەردە تۇلۇق يېتىشكەن پەرىشتە . ئۇنىڭ ھۇجودىدىن ئاياللارغا خاس گۈزەللىكنى ، ئانىلارغا خاش مېھرىبانلىقنى ، گۈدەكلەرگە خاس تاتلىقلىقنى ھېس قىلىۋالغىلى بۇلىدۇ . - ۋاي مەن ئۇچۇپ كەتمەي ئەمدى ، گۈلزار قېنى تېزراق تۇتىۋېلىڭە ! - ھا  ھا ھا ھا ھەمىمىز قانتتىق كۈلۈشۈپ ئۇخلاپ قالغان قىزىمنىمۇ ئۇيغىتىۋەتتۇق . ئادىلنىڭ سۇئالىغا جاۋاپ بەرمىگەن بولساممۇ ، ئەمما ئۈچ ئىلگىرى يۈز بەرگەن ئىش كۆز ئالدىمدا نامايەن بولدى . بۇندىن ئۈچ يىل ئىلگىرى توڭ قىشتا ئاپام كېچىدە توساتتىن قاتتىق ئاغرىپ ئۆزىنى ئىككى يانغا ئاتاتتى . شەبنە كۈنى بولغاچ مەنمۇ مەكتەپتىن ئۆيگە قايتىپ كەلگەن ئىدىم . دادام يۇرتقا كەتكەن بۇلۇپ ،ئۆيدە ئاپام بىلەن ئىككىمىزلا قالغان ئىدۇق . دەرھال 120مىگە تېلفۇن قىلىپ ئاپامنى دوختۇرخانىغا ئاپاردىم . دوختۇرلار ئاپامنى قۇتقۇزۇشقا كىرىشىپ كەتتى ، بىر چاغدا بىر سېستىرا كېلىپ رەسمىيەت ئۆتەڭ دېگەندىلا ، يېنىمدا ئۇنچىلىك پۇلنىڭ يوقلىغىنى ئېسىمگە ئالدىم ، ئالدىراشچىلىقتا ئويدىن پۇل ئېلىۋېلىشنى ئۇنتۇپ چىققان ئىكەنمەن . ئامال يوق ئۆيگە بېرىپ كېلىشكە توغرا كەلدى . تاكسى بىلەن ئۆيگە بېرىپ ، تاكسى شوپىرىغا ساقلاپ تۇرۇشنى ئېيتتىم ، ئويدىن چىققىچە شوپۇرمۇ ساقلاپ تۇرۇپتۇ . مەن يەنە دوختۇرخانىغا مېڭىشنى ئېيتقان ئىدىم ،ماشىن بىر دەم مېڭىپلا يۈلۈنىشىنى ئۆزگەرتىپ مېنى باشقا بىر ياققا ئېلىپ ماڭغىلى تۇردى . مەن ماشىننى توختات دەپ توۋلىساممۇ شوپۇر ھېچ بىر قۇلاق سالىدىغاندەك ئەمەس ماشىنىنى تېخىمۇتېز ھەيدەپ ماڭدى . مەن ئەھۋالنىڭ خەتەرلىك ئىكەنلىكىنى پەملەپ ، ئىشىكنى ئېچىپ ئۆزەمنى سىرتقا ئاتاي دەپ ئويلاپ ئىشىكنى ئاچسام ،ئېچىلمىدى . شوپۇر ئوتتۇز نەچچە ياشلار چاممىسىدىكى ئادەم بۇلۇپ ، ئۇيغۇرچىنى راۋان سۆزلىيەلمىگىنىدىن ئۇنىڭ خۇيزۇ ياكى خەنزۇ ئىكەنلىگىنىمۇ بىلەلمىدىم . بىر چاغدا ئۇ مېنى بىر دەرەخلىكنىڭ ئارىسىغا ئاپىرىپ توختىدى . ماشىنا توختىشى بىلەن ماشىندىن چۈشۈپ قاچاي دەپ ئويلۇدۇم ، ئەمما ماشىندىن چۈشۈشىمگە قاياقتىن پەيدا بولدىكىن ئىككى ئادەم پەيدا بۇلۇپ ئالدىمنى توسىدى . مەن قوققىنىمدىن غال -غال تىتىرەيتتىم . ئەتراپ قاراڭغۇ بولغاچ ، ئۇ ئادەملەرنىڭ چىرايىنى ئىنىقمۇ كۆرەلمىدىم ، پەقەت ئۇلارنىڭ قىلىشقان پاراڭلىرىدىن ئۇيغۇر ئىكەنلىكىنى بىلدىم . - قاچاي دەپ خام خىيال قىلما ، يېنىڭدىكى پۇل -پىچەكنىڭ ھەممىسىنى چىقار !،- دېدى سېمىزرەك بىرسى . - ھە ماقۇل ئاكا ، ھەممىنى سىلەرگە بېرەي ، ئەمما تېزراق دوختۇرخانىگە بارمىسام بولمايدۇ . ئاپام ئۇ ... - ئاپاڭ ئۆلۈپ قالمايدۇ ، ئالدىرمىساڭمۇ بۇلىدۇ ، ئالدى بىلەن بىزلەرنى رازى قىلىپ بۇلۇپ ئاندىن بارساڭمۇ ئۆلگۈرىسەن . ھا ھا ھا ... ئۈچەيلەن تەڭلا كۈلۈشۈپ كەتتى . قوققىنىمدىن ئەمدى ئاگزىمغا گەپمۇ كەلمەي قالغان ئىدى . سۇمكامدىن پۇلنى چىقىرىپ ئۇلارغا سۇندۇم ، بايامقى سېمىزنىڭ يېنىدا تۇرغان پاكار ئادەم  كېلىپ قۇلۇمدىن پۇلنى يۇلۇپلا ئالدى . - بۈگۈنكى ئولجا يامان ئەمەسكەن بۇرادەر  ، كاللاڭ خېلى ئىشلەيدۇ سېنىڭ ، بۇندىن كېيىن كوپرەك ھەمكارلىشايلى . -بۇلىدۇ ئاغىنە ، سەنمۇ دىيىشكىنىمىزنى ئۇنتۇپ قالما ، - دېدى شوپۇر راۋان بولمىغان ئۇيغۇر تىلىدا . - بۇ ئولجىمىز ھەقىقەتەن ياخشى ئولجا ، پېچىتى بۇزۇلمىغاندەك تۇرىدۇ تېخى ،دېيىشكىنىمىز بويىچە  ئالدى بىلەن مەندىن ئايلانسۇنمۇ ھى ھى ھى ... - ئايلانسۇن بۇرادەر ئايلانسۇن ، دىققەت قىلغىن ئەمىسە ،ئالدىنقى قېتىمقىدەك  پەشۋا يەپ كەتمىگىن ھا ھا ھا ئۇلار شۇنداق دېگىنىچە سەت چىقىرىشىپ كۈلۈشۈپ كەتتى ، خۇددى ‹مۇشۇككە ئۇيۇن ، چاشقانغا قېيىن › بولغاندەك ، ماڭا يىقىنلاپ كىلىۋاتقان ۋەھىمىلىك رىياللىقتىن قۇتۇلۇشنىڭ ئامالىنى ئىزدەيتتىم . - ۋاھ  خېلى كىلىشكەن تۇمۇچۇق ئىكەن بۇ ، - دېدى بايامقى سېمىز ئادەم  چاقمىقىنى ياندۇرۇپ  ،يۇزۇمگە يېقىن ئەكىلىپ تۇرۇپ .  ئۇنىڭ ئاغزىدىن پۇراپ تۇرغان قاڭسىق ھاراقتىن سەسكەنگىنىمدىن ئارقامغا ئىككى قەدەم داجىپ كەتتىم . كەينىمدىن بىر قاتتىق قول كېلىپ ،بېلىمدىنلا قۇچاقلىۋالدى .  قورقۇنىمدىن چىقىراپ كەتتىم ، بۇ چاغدا ھېلىقى سېمىز ئادەم يوغان قوللىرى بىلەن ئاغزىمنى ئېتىۋالدى . مەن پۈتۈن كۈچۈم بىلەن يۇلقۇنۇپ ، پۇتۇم بىلەن ئالدىمدىكى سېمىزنى تېپىپ يىقىتۋەتتىم . جان -جەھلىم بىلەن كۈچىگەچكىمۇ ياكى ئېگىز پاشىنلىق ئايىقىمنىڭ كۈچىمۇ ھېلىقى سېمىز ئادەم كەينىچىلەپلاچۈشكەن ئىدى . ئەمما كەينىمدىن قۇچاقلىۋالغان قولدىن ھەرقانچە قىلىپمۇ ئۆزەمنى بوشىتالمىدىم . -خەپ جۇۋاينىمەك ،ئۆزەڭ جەينەكتەك بولغىنىڭ بىلەن كۈچۈك خېلى باركەن سېنىڭ ، ئەمدى سېنى قانداق قىلىمەنكىن كۆرۈپ قوي !،- دېگىنىچە ئورنۇدىن تۇرغان سېمىز ئادەم كېلىپلا چېچىمدىن قاماللىدى . ۋە شوپۇرغا ؛ -بولە ماۋۇنىڭ پۇتىنى باغلا ، سەنمۇ قويۇۋەتمەي چىڭ تۇت ، بۇنىڭغا قارشىلىقنىڭ تەمىنى تېتىتىپ قۇيايلى ،-دېگىنىچە قوسۇقۇمغا بىرنى تەپتى . - ئاكا ، سىلەردىن ئۈتۈنەي ، ئۇنداق قىلماڭلار ، مېنى كەتكىلى قۇيۇڭلار .سىلەرنىڭمۇ ئاناڭلار ، سىڭلىڭلار باردۇ ئاكا ، -ئاغزىڭنى يۇم جۇۋاينىمەك .  ئالدىرساڭ گېپىمىزنى ئاڭلاپ جىم يات ، ئىشلار تۈگۈگەندە كېتىسەن بۇيەردىن ، ئۇنداق ئاسان كېتىمەنمىكىن دەپ ئويلاپ قالما قانچۇق ! ،-دېدى سەت ئاۋازدا خىقىراپ . مەن بار ئاۋازىمدا‹ قۇتقۇزۇڭلار› دەپ ۋاقىردىم ،ئەمما ئاۋازىم قاراڭغۇ دەرەخلىق ئىچىگە سىڭىپ كەتتى . ئۈچەيلەن مېنى ئامبۇردەك قىسىپ ، قول –پۇتلىرىمنى باغلىدى ، ھەم  سۆرەپ دىگىدەك دەرەخلىكنىڭ ئىچىگە ئېلىپ ماڭدى . ئۇلارغا يېلىنىشلىرىم ، كۆزلىرىمدىن يېپى ئۈزۈلگەن مارجاندەك ئېقىۋاتقان ياشلار ئۇ تاش يۈرەك كىشىلەرنى توسۇپ قالالمىدى . ئاخىرى بىر خىلۋەت جايغا كىلىپ توختاشتى . - بۇرادەر ، دىيىشكىنىمىز بويىچە بۇ قانچۇق ساڭا مەنسۇپ بولدى . بىز سېنى ماشىننىڭ يېنىدا ساقلايمىز ، تېزراق بۇلاسەن ، ئۇ ۋاقىرسا ۋاقىراۋەرسۇن ، بۇ يەرگە ھېچ كىم كەلمەيدۇ .-دېدى پاكار كىشى . قوققىنىمدىن جۇلىقىم چىقىپ كەتتى ، ئۇلار ئىككىسى شوپۇرغا شۇنداق دېگىنىچە كېتىپ قېلىشتى . شوپۇر سەت پۇشۇلداپ ئالدىمغا كېلىپ ئولتۇردى ، شۇ چاغدا كاللامغا بىر ئەقىل كەلدى ؛ - ماڭا چېقىلغۇچى بولما ، مەن ماشىناڭنىڭ نۇمۇرىنى كۆرۈۋالدىم ، ئەتىلا ئۆزەڭنى تۈرمىدە كۆرىسەن ئەبلەخ ، - ئۇ دېگەن مېنىڭ ئاغىنەمنىڭ ماشىنىسى ، ھەتتا ئاغىنەممۇ بۈگۈن مېنىڭ بۇ ماشىنىنى ھەيدىگىنىمدىن خەۋەرسىز ، تولا مېنى قوقىتىمەن دېماي ، يۇۋاشراق بولغىن . بولمىسا جېنىڭدىن ئايرىلىپ قالىسەن . –دەپ قوينىدىن بىر پىچاقنى چىقاردى . -ھۇ دېتى يوق ئەبلەخ . يامان بولساڭ مېنى ئۆلتۈرۋەتكىن .مەنمۇ بۇ جاندىن جاق تۇيغان ، باشقىلارنىڭ ئەيدىز كېسىلى بار ئادەمگە قانداق مۇئامىلە قىلىدىغانلىقىنى بەلكىم سەنمۇ ئوبدان بىلىسەن .بۈگۈن ماڭا ياردەم قىلىپ ، قېنى مېنى بۇ ئازاپتىن قۇتقۇزغىن .قېنى بولمامسەن !! يىغا ئارىلاش كەسكىن ئېيتقان بۇ سۆزلىرىم ،باياتىنقى ياۋۇزلىقى چىقىپ تۇرغان شوپۇرنى بويسۇندۇردى . ئۇ قولىدىكى پىچاقنى يىغىشتۇرۇپ ؛ -سەن راسلا ئەيدىزما ؟ -ئىشەنمىسەڭ سىناپ باققىن ، مانا مەن ئالدىڭدا ياتمامدىم ، سىناشقا پېتىنالىساڭ مەن جىم تۇرۇپ بېرىمەن ، باياتىن شۇنچە قارشىلىق كۆرسۈتۈشىمنىڭ سەۋەبى ، باشقىلارنىڭ بۇ خورلۇققا قالماسلىقى ئۈچۈن ئىدى ، لېكىن سىلەر بۇ جازاغا لايىق ئىكەنسىلەر . بولسا ئاۋۇ دوستلىرىڭنىمۇ چاقىرغىن ! -ۋۇي بۇزۇق  ، چىرايىڭغا قارىسا خام يىگۈدەك بولغىنىڭ بىلەن ئىچىڭ سېسىق بىرنىمە ئىكەنسەن ئەسلىدە ، تۈفى  !،-شوپۇر شۇنداق دېگىنىچە كەينىگىمۇ قارىماي كېتىپ قالدى . توساتتىن كەلگەن بۇ ئەقلىم بەدىلىگە ئىپپەت نۇمۇسىمنى ساقلاپ قالغىنىم ئۈچۈن خوشال بولدۇم ، گەرچە ئاپام كىچىكىمدىن ‹ئادەم دېگەن راسچىل ، سەمىمى بۇلىشى كېرەك › دەپ تەربىيە قىلغان بولسىمۇ ، بۈگۈنكى ئېيتقان يالغان سۆزىم ئارقىلىق قىممەتلىك نەرسەمنى قوغداپ قالغىنىمدىن ،ئاپامغىمۇ يۈز كېلەلەيمەن دەپ ئويلۇدۇم . مۇشۇ  خىياللار بىلەن ئۆيگە كېلىپ قالغىنىمىزنىمۇ تۇيماپتىمەن . - ماھىرە ، نېمە بولدۇڭ  ، خىيالغا چۈكۈپلا كەتتىڭغۇ ، مۇشۇ دەقىقىلەردە ،خوشال بولساڭ بۇلۇدۇ  ئاداش. -مەن خوشال ئاداش ، بىر ئېغىز يالغان سۆز بەختلىك ئائىلەمنىڭ بېشىغا چىققىلى تاسلا قالدى ، بەخت ناخشىسىنى ئۈنلۈك توۋلاۋاتقان  ، دەرت –ئەلەمدىن مۇستەسنا تىنىچسىز قەلب دۇنيايىمنى قاراڭغۇلۇق بېسىپ ، روھىم تېنىمدىن سوغىرىلىپ ، ئۇلۇغ قۇياشتىن پاناھلىق تىلەپ ،چەكسىز ساماغا ئۇچۇپ كەتكىلى ئازلا قالغان ئىدىم . يۈرىكىمدىكى كۈندىن –كۈنگە چوڭىيىۋاتقان دەز ،مېنى ئارامىمدا قويمايتتى ،لېكىن، قەلبىم ئاسمىنىمدا گويا ئاقار يۇلتۇزدەك قىسقىلا چاقناپ ئۆچكەن قۇياشىمنىڭ مۇشۇنداقلا تۇمان ئىچىدە قاپسىلىپ قېلىشىغا يۈرىكىم يەنىلا  يول قويمايتتى.مانا ئەمدى كۆز ئالدىمدا يۈز بېرىشكە ئازلا قالغان رىياللىقتىن قۇتۇلدۇق . بۇنى مەن ھەم ئادىلنىڭ ئەمەس ،بەلكى قىزىمىز ئەركىيەنىڭ بەخت –سائادىتى دەپ قارايمەن . ھەر كۈنى چۈشكۈنلەشكەن چېغىمدا قىزىمنىڭ تاتلىق قىلىقلىرى ماڭا ئۈمۈت ئاتا قىلاتتى . ناۋادا قىزىم بولمىغان بولسا ، بۇ كۈنلەرنى قانداق ئۆتكۈزۈشنىمۇ بىلمەي ، بەلكىم ئۈمۈرلۈك پۇشايمانغا قالغان بۇلاتتىم ئاداش . شۇڭا قىزىمغا رەھمەت ،- دەپ قىزىمنىڭ مەڭزىگە سۈيۈپ قويدۇم . ئادىلمۇ بۇ سۆزلىرىمدىن خىجىللىق ھېس قىلدى بولغاي ؛ - ماھىرە ، ئالدى بىلەن سىزدىن يەنە بىر قېتىم كەچۈرۈم سورايمەن ، ئاندىن قىزىم بىلەن ئىككىڭلارغا كۆپتىن –كۆپ رەھمەت . ناۋادا سىز قەتئى تۇرۇۋالمىغان بولسىڭىز ،مەن ئاخىرقى ئۈمرۈمنى پۇشايمان ، ئازاپ ئىچىدە ئاياغلاشتۇراكەنمەن . بايام كېلىۋېتىپ ئويلاندىم ، مېنىڭ مۇھەببىتىم يەنىلا ئانا –بالا ئىككىڭلارنىڭ ماڭا ئاتا قىلغان مۇھەببىتىڭلارنىڭ قۇلىغا سۇ قۇيۇپ بەرمەيدىكەن . سىلەرنى بىر مەزگىل بەك ئازاپلىدىم . بۇندىن كېيىن ئۆز مەسئۇليىتىمنى تېخىمۇ ياخشى جارى قىلدۇرىمەن . ماڭا ئىشىنىڭ ماھىرە .قەلبىڭىزدە پەيدا بولغان دەزنى ،ئىللىق مۇھەببىتىم بىلەن مەلھەم ياساپ ساقايتىشقا تېرىشىمەن جېنىم . -ھاي –ھاي ،مېنى ئۇنتۇپ قالماڭلار ، قاراپ تۇرسام جېنىم دەپ كەتكىنىنى! -ھا ھا ھا ئۈچىمىز  تەڭلا كۈلۈشتۈق ، قۇچۇقۇمدىكى قىزىم ئەركىيەمۇ ، خۇددى گېپىمىزنى چۈشەنگەندەك ،بىزگە قاراپ تاتلىققىنە گۇڭراپ كەتتى . تۈگىدى   -

mehriya

	كۈچلۈك تەلىپىڭلار بويىچە ۋاقىت ئىچىدىن ۋاقىت ئاجىرتىپ ھېكايىنى يوللاپ بولدۇم ، لېكىن نۇرغۇن جايلىرىدا ئىملا خاتالىقى چوقۇم مەۋجۇت . شۇنداقلا نوقسانلار بار بۇلىشى مۇمكىن . شۇڭا تۈزۈتۈپ ئوقۇشۇڭلارنى ئۈمۈت قىلىمەن . شۇنداقلا ھېكايە ئۈستىدە ئويلانغانلىقىڭلارنى تەپسىلى ئىنكاستا بۇلىشىڭلارنى ئۈمۈت قىلىمەن . گەرچە ھېكايەم ئەخلەت بولسىمۇ ئەمما ئەخلەت ئىنكاستىن تولىمۇ بىزارمەن !

غوجا

	ياخشى يېزىپسىز، تىل ئىشلىتىشىڭىزمۇ ئەركىن ئىكەن. بىراق ئىملاغا سەل دىققەت قىلىپ قويۇڭ. مەسىلەن، تىنىش بەلگىللىرى باشتىن-ئاخىر بوشلۇق ئۇرۇلغاندىن كېيىن قويۇلۇپ قاپتۇ.

zulqinay

	ئىشەنچ _ مۇھاببەتنىڭ  ئۇلى!

bihlan2

	مەن بۇ ھىكايىنى بەكمۇ ياقتۇردۇم، لىكىن باش پىرسۇناژنى بەكمۇ ئەقىلىقلىق بەكمۇ ئاقىل يىزىۋەتتىڭىزمۇ قانداق، بۇنداق ئادەملەر ناھايتى ئاز، بولسىمۇ بارماق بىلەن سانىساق بارماقلىرىمىز ئىشىپ قالار