گىلاس

گىلاس ئەتىرگۈل ئائىلىسىدىكى كۆپ يىللىق، ياغاچ غوللۇق يوپۇرماق تاشلايدىغان، نەشپۈتكە ئۇرۇقداش دەرەخ بولۇپ، يوپۇرمىقى سوقىچاق، گۈلى ئاق ياكى سۇس قىزغۇچ ئاق، مېۋىسى شار شەكىللىك، رەڭگى قىزىل، چۈچۈمەل تاتلىق، ئادەتتە مېۋىسى ئىستېمال قىلىنىدۇ.

كۆكرەكنى بوشىتىش، ئىچنى يۇمشىتىش، بۆرەك ۋە دوۋساقتىكى تاشنى چۈشۈرۈش، سەپرا ۋە قاننىڭ ئۆتكۈرلۈكىنى پەسەيتىش، ئاشقازان ۋە جىگەرنى قۇۋۋەتلەش، تۇتۇش ۋە پارقىرىتىش خۇسۇسىيىتىگە ئىگە.

دورىلىق قىسمى

گىلاسنىڭ مېۋىسى دورىغا ئىشلىتىلىدۇ.

تەبىئىتى

تاتلىق گىلاس ھۆل ئىسسىق، چۈچۈمەل گىلاس قۇرۇق سوغۇق.

ئىشلىتىش مىقدارى

ئەھۋالغا قاراپ 2 ~ 3 تال ئەتراپىدا ئىشلىتىلىدۇ.

بۇ ئۆسۈملۈكنىڭ مېۋىسىنى پىشقاندا يىغىۋېلىپ، ئاپتاپتا قۇرۇتۇپ تەييارلىنىدۇ. دورىغا ھۆل ھالەتتىمۇ ئىشلىتىلىدۇ.

شىنجاڭ ئۇيغۇر ئاپتونوم رايونى نىڭ ھەرقايسى جايلىرىدا ئۆسىدۇ.

قۇرۇتۇلغان تاتلىق گىلاسنى رۇم بەدىيان بىلەن قوشۇپ ئىستېمال قىلىپ بەرسە، ھەيزنى راۋانلاشتۇرۇپ، دوۋساق ۋە بۆرەكتىكى تاشنى چۈشۈرىدۇ. 

گىلاسنىڭ سىقىپ چىقىرىلغان سۈيىنى يۈزگە سۈرۈپ بەرسە، چىراينى پارقىرىتىدۇ. 

يېڭى تاتلىق گىلاسنى ئىستېمال قىلىپ بەرسە، كۆكرەك، گالنىڭ يىرىكلىكى، يۆتەل ۋە قەۋزىيەتكە مەنپەئەت قىلىدۇ. 

چۈچۈمەل گىلاسنى ئىستېمال قىلىپ بەرسە، سەپرا ۋە قاننىڭ ئۆتكۈرلۈكىنى پەسەيتىپ، كۆڭۈل ئېلىشىش ۋە قۇسۇشنى توختىتىدۇ.^[0]