قىزىلئۆڭگەچ راكى

سەۋەبى: بۇ كېسەللىك، كۈچلۈك غىدىقلىغۇچى نەرسىلەر ۋە كۆيدۈرگۈچى، زېدىلىگۈچى ئامىللار تەسىرىدىن قىزىلئۆڭگە زەخىملىنىش سەۋەبىدىن كېلىپ چىقىدۇ.

ئالامىتى: كۆپىنچە قىزىلئۆڭگەچنىڭ تارايغان ئۈچ يېرىدە پەيدا بولۇش بىلەن بارغانسېرى ئېغىرلىشىپ، يۇتۇش قىيىنلىشىش، ئۆسمە بار ئورۇندا توسۇلۇش يۈز بېرىش، ئاغرىش، ئاخىر بېرىپ ھېچنېمە ئۆتمەي، يۇتقان نەرسىلىرىمۇ شىلىمشىق ياكى قانلىق قۇسۇق بىلەن يېنىپ چىقىش، چىرايى سارغىيىپ، قان ئازىيىپ، ئورۇقلاپ ئاچ قېلىش ۋە سۇسىزلىنىش ئارقىلىق ئېغىر ئاقىۋەت كېلىپ چىقىش قاتارلىق ئالامەتلەر بىلەن ئىپادىلىنىدۇ.

1-رېتسېپ

تەركىبى: سەۋزە، شوخلا، كۆكمۇچ، كەرەپشە ھەر بىرى 200 گىرامدىن.

تەييارلاش ئۇسۇلى: دورىلارنى مەخسۇس ئۈسكۈنلەر بىلەن سىقىپ سۈيىنى چىقىرىپ تەييارلىنىدۇ.

ئىشلىتىش مىقدارى: كۈنىگە ئۈچ قېتىم، ھەر قېتىمدا 50 گىرامدىن ئىستېمال قىلىنىدۇ.

2-رېتسېپ

تەركىبى: مۇدەببەر كۇچۇلا 100 گىرام، يىلان گۆشى 360 گىرام، قىزىل سىر 60 گىرام، چايان 20 گىرام، ھەسەل ئۈچ ھەسسە.

تەييارلاش ئۇسۇلى: دورىلارنى يۇمشاق سوقۇپ، ئەلگەكتىن ئۆتكۈزۈپ، ئېرىتىلگەن ھەسەل بىلەن تەكشى ئارىلاشتۇرۇپ تەييارلىنىدۇ.

ئىشلىتىش مىقدارى: كۈنىگە ئۈچ قېتىم، ھەر قېتىمدا 10 گىرامدىن ئىستېمال قىلىنىدۇ.

3-رېتسېپ

تەركىبى: ئۇچقۇر پاقا پاراشوكى 120 گىرام، ئاق يىلان پاراشوكى 80 گىرام، ئوق يىلان پاراشوكى 25 گىرام، كابۇل ھېلىلە ئېتى، سېرىق ھېلىلە ئېتى 40 گىرامدىن، قارا ھېلىلە 30 گىرام، زەرچىۋە، بوزۇغا، جويۇز، ئاقمۇچ، كەتىرا، ئاقاقىيا، بۇغا مۈڭگۈز كۈلى، شاقاقۇل، كۇندۇر، بادام مېغىزى، تۇخۇمى خەشخاش، يالپۇز، موزا، قورۇلغان كىرپە تىكىنى، مۇدەببەر قىلىنغان بىخ مارجان، كاۋاۋىچىن، ھاڭگا تېرەك ئۇرۇقى 30 گىرامدىن؛ ئاقىرقەرھا، قورۇلغان ئادراسمان ئۇرۇقى 50 گىرامدىن؛ ئانار گۈلى، ئادەمگىياھ، سەمغى ئەرەبى، كۇچۇلا مۇدەببەر، پىلە غوزا كۈلى، پاكىزە چاچ كۈلى، مەرۋايىت، كات ھىندى، تازا ئامىلە، تۇخۇم تاشلىقى، ھاڭگا تېرەك ئۇرۇقى 20 گىرامدىن، ئىپار ئۈچ گىرام؛ ھەسەل جەۋھىرى مۇۋاپىق مىقداردا، سىماب (ئۆلتۈرۈلگەن) 20 گىرام.

تەييارلاش ئۇسۇلى: ئىپاردىن باشقا دورىلارنى يۇمشاق سوقۇپ، ئەلگەكتىن ئۆتكۈزۈپ، تەكشى ئارىلاشتۇرۇپ (سىمابنى زەھەرسىزلەندۈرۈلگەن 50 گىرام گۈڭگۈرتتە قايتا-قايتا ئۆلتۈرۈپ بولغاندىن كېيىن) ، ئىپارنى يېتەرلىك ھەسەل جەۋھىرىگە تەكشى ئارىلاشتۇرۇپ ئېرىتكەندىن كېيىن، سىماب بىلەن پاراشوك دورىلارنى ئارىلاشتۇرۇپ بولۇپ، پاراشوكلارنى ھەسەل جەۋھىرىگە سېلىپ قايتا قايتا ئارىلاشتۇرۇپ تەييارلىنىدۇ.

ئىشلىتىش مىقدارى: كۈنىگە ئىككى قېتىم، ھەر قېتىمدا 4 ~ 6 گىرام ئىستېمال قىلىنىدۇ.