ئەركىم: كۆرەلمەسكە بىر غەزەل

arkim

كۆرەلمەسكە بىر غەزەل

مۇجىبۇل راخمان ئەركىم

دىلى زەھەر، تىلى بال بولۇر بارچە كۆرەلمەس،

كۆرسە يەلنى دەر شامال قوتۇر بارچە كۆرەلمەس.

ئۇچساڭ كۆكتە بىر دەقىق، پۇچۇلۇنۇپ تەنلىرى،

مازار ئىزلەپ ئۇ زوۋال، ئوقۇر بارچە كۆرەلمەس.

تاجىڭ بىلەن تەختىڭگە چاڭ سالىدۇ چاندۇرماي،

بولۇپ ھۇقۇش شۇم ئوسال چوقۇر بارچە كۆرەلمەس.

قىلتاق، پىچاق قەلبىدە، ساڭا تەييار رەندىسى،

ھاياتىڭغا ئېچىپ پال توقۇر بارچە كۆرەلمەس.

ئوي خىيالى پۇتلىسا، سېنى يالغان قۇتلىسا،

كۆرسە كىمنى بىماجال سوقۇر بارچە كۆرەلمەس.

ئىچى ئۇنىڭ ئوغۇدۇر، ئېغىزلانغان پوقىدۇر،

غەپلىتىڭدە سىقىپ گال بوغۇر بارچە كۆرەلمەس.

ئۇ چېقىمچى، سۇخەنچى، نەسلى خائىن، بىقىنچى،

ۋۇجۇدىڭنى قىپ قامال يونۇر بارچە كۆرەلمەس.

كۆرەلمەسلەر كۆرسە گەر بۇ غەزەلنى شۇ دەمدە،

بۇ مەن ئەمەس دەپ خوشال بولۇر بارچە كۆرەلمەس.

2015-يىلى 6-مارت  قومۇل

marxa2

ناھيىتى ياخشى يېزىپسىز، ئەجرىڭىزگە كۆپ رەخمەت! مۇشۇنداق ياخشى تىمىلارنى ئايىمىغايسىز.

xarwaz

مۇنبەردە شۇنداق بىر كۆرەلمەسلەر پەيدا بولدىكى ، ئۇلار ھەتتا دىيارىمىزدىكى بىرەر يۇرتنىڭ ياخشى گىپى چىقسىمۇ ئولتىرالماي قالىدۇ .
ياخشى يېزىپسىز ئەركىم .

nurqi

يارايسىز.

humaltag

مۇنبەردە بىرەر ئېسىل تېمىنى ھەتتا سۈپەتلىك چىققان بىرەر ئىنكاسنى كۆرسىمۇ ،ئۇنىڭدىن زوق ئېلىۋاتقان تۇرۇپ رەھمەت دېيىشتە يوق ،ئىچىدىكى ھەسەتخورلۇق زەھىرى قايناپ كېتىدىكەن ،،،بولۇپ مۇ بۇقېتىمقى ئېلى مۇئەللىم مۇنازىرىسىدە بۇنداق كۆرەلمەس ،ھەسەتخورلار ئۆزىنى تولۇق ئاشكارىلىدى .غەزەل ياخشى چىقىپتۇ ،رەھمەت .

yagurqak

پاھ يارايلا ئەركىم ، ئۆزلە قومۇلنىڭ باغداشنىڭ ئازراقلا ۋىجدانى بار مىللىتىمىزنىڭ كۆزى .... مەنمۇ دەل مانا مۇشۇنداق بىر تېمىنىڭ ئۇيغۇرلارنىڭ نوپۇزلۇق مۇنبىرى باغداشتا روياپقا چىقىشىنى چىن دىلىمدىن ئۈمىت قىلىپ كېلەتتىم ، مانا بۈگۈن بۇ ئارزۇيۇم ئىنتىزارىم ئەمەلگە ئاشتى . بولسا بارلىقكى مۇشۇنداق كۆكلىگەننى كۆرەلمەس چۆپچىلەرنىڭ ئاغزى بىر بېسىقسۇن ...... قۇشقاچتەك ھەم شاتۇتتەك نەپىس جانلىق تىللىرى ، قەلەم تەۋرەتكەن ئەگرى شۇ قوللىرى ھەرگىز دەرت كۆرمىسۇن ......... تېخىمۇ ياخشى تېمىلارنى ۋۇجۇتقا چىقىرىشلىرىغا ھەممىمىز تورداشلار ھەم بارلىقكى ئوقۇرمەنلەر تىلەكداشمىز ، تەقەززامىز ھەم مەدەتكارمىز !  چۈنكى ، بىر ئەقلىيە سۆز : ‹‹ يالغۇز ئاتنىڭ چېڭى چىقماس ، چېڭى چىقسىمۇ دېڭى چىقماس ›› شۇڭا ھەممىمىز بىر بىرىمىزنى كوچىلاشماي بىر ياقىدىن باش ، بىر يەڭدىن قول چىقىرايلى قېرىنداشلار !

kuhun

ياخشى چىقىپتۇ

sheydai

كۆرەلمەس
ئىشىڭ بەركەت تاپماستا پەرۋانىدۇر كۆرەلمەس،
ئىشىڭ ئوڭدىن كەلگەندە قان قۇسىدۇ كۆرەلمەس.
يولدىن ئازسانڭ ماختايدۇ،كۆككە تاقاپ بېشىڭنى،
ئۆز يولۇڭنى تاپقاندا شۇئان مۆكەر كۆرەلمەس.

تاپقىنىڭدا ئابرويىڭ ئاشسىز قالار كۆرەلمەس،
ئازمىغاندا يولۇڭدىن باشسىز قالار كۆرەلمەس،
ئۇچراتقاندا ئۆتمەك تەس يولۇڭدىكى داۋاننى،
شۇئان دەركار يېڭىدا بەلسىز بولار كۆرەلمەس.

ئۇخلىماستىن تۈنلىرى پىتنە يىغىپ كۆرەلمەس،
ئىزلەپ ئاجىز دۈشمىنىڭ پايە پېتەك كۆرەلمەس.
تاپقىنىدا بىرەر مۇق ئىزلىرىڭدىن ئۇ  تېرىپ،
خەلقى ئالەم ئالدىدا چاچماي ئۇنى يۈرەلمەس.

سەن ئىگىزدە تۇرغاندا پىنھاندىدۇر كۆرەلمەس،
شۇل ئىگىزدىن چۈشكەندە يېنىڭدىدۇر كۆرەلمەس.
ئاشسىز قالساڭ بەزىدە ناۋا قىلار كۆرەلمەس،
بۇنداق ناكەس ئىپلاسلىق تېنىڭدىدۇر كۆرەلمەس.

يول تاپقاندىن زارلايسەن پىتنە توقۇپ كۆرەلمەس،
يولىن بۇزماق ئەيلەيسەن دۇرۇت ئوقۇپ كۆرەلمەس.
شۇنداق يولدا قاترىغان يۇندىخورسەن كۆرەلمەس،
يۇندا ئىچمەك ئادىتىڭ  قېنىڭدىدۇر كۆرەلمەس.
                          مۇھەممەد تۇرسۇن ئابدۇكېرىم شەيدائى