خام سۈت ئەمگەن بەندىلەر

خام سۈت ئەمگەن بەندىلەر

ئاپتورى:غەيرەت ئاسىم

باھاسى:19.00

2003-يىلى 10-ئاي 1-نەشرى

2009-يىلى 3-ئاي 3-بېسىلىشى

ISBN:9787537146708

                                                              قىسقىچە مەزمۇنى

يىللار 1966-يىلىنىڭ دەرۋازىسىنى ئۈن – تىنسىز ئېچىۋەتتى …

شەھەر تەرەپتىن كەلگەن ئاپتوبۇس تەتۈر ئۆستەڭ بازىرىغا كېلىپ توختىدى . گۈلباھار ئاپتوبۇستىن ئەڭ ئاخىرىدا چۈشتى.

دوقمۇشتىكى كېچىلىك بازار بەكمۇ قىزىپ كەتكەنىدى ، زاسۈيپەزلەر ، ئاشلەمپۇڭچىلار ، كاۋاپچىلار ، … بىر – بىرى بىلەن بەسلەشكەندەك ئالىتاغىل ئاۋازلىرى بىلەن خېرىدار چاقىرىشاتتى . گۈلباھار يولنىڭ قارشى تەرىپىگە ئۆتكەندىن كېيىن ، قوللىرىدىكى سومكىلىرىنى يەرگە قويۇپ ، بىردەم تۇرۇۋالدى ، ئۇنىڭ غەمكىن كۆزلىرىگە يولنىڭ چېتىدە تۇرغان بىرنەچچە خادىك چېلىقاتتى ، ئۇنىڭ دىققىتى بىر بوۋاينىڭ خادىكىغا مەركەزلەشتى. گۈلباھار ئاشۇ بوۋاينىڭ خادىكىگە چۈشەي دەپ ئويلىدى ئىچىدە. گۈلباھار يەردىكى سومكىسىنى قولىغا ئېلىپ ، خادىكتا پەس ئاۋازدا ناخشا ئېيتىۋاتقان خادىكچى بوۋاينىڭ قېشىغا كەلدى.

– كېلىڭ ، قىزىم ، خادىكقا چىقىڭ ، قەيەرگە بارىسىز ؟-دەپ سورىدى بوۋاي كۆرۈپ خادىكتىن چۈشۈۋېتىپ .

– قارىياغاچ مەھەللىسىگە باراتتىم ، -دېدى گۈلباھار.

بوۋاي گۈلباھارنىڭ قولىدىكى سومكىنى ئېلىپ ،خادىكنىڭ ئۈستىگە قويدى .

– خادىكقا چىقىڭ ، قىزىم ، مەن سىزنى بىردەملا يەتكۈزۈپ قۇيىمەن ، – دېدى بوۋاي .

گۈلباھار خادىكقا چىقىپ ئولتۇردى ، خادىك قوزغىلىپ يولغا چۈشتى ، گۈلباھار سومكىسىنى بىقىنداپ يانتۇ ئولتۇردى.