خۇشاللىق قوغلاشمايدىغان كىم بار ؟

huxhal

	ئامەت دېگەن ئاجايىپ بولىدىكەن ، بەزىلەر ئۇنى بىر ئۆمۈر قوغلىشىپمۇ يېتەلمەيدىكەن ، بەزىلەر قوغلاشقانسېرى ئامەت ئۇنىڭدىن قاچىدىكەن ، لېكىن بەزىلەرگە بىر ئۆمۈر ھەمراھ بولىدىكەن ، ئۇلارنى ئەگىپ كېتەلمەيدىكەن . فەررۇخقىمۇ ئامەت كېلىۋەردى ، ئىشلىرى ئوڭغا تارتىۋەردى ، مانا ئەمدى سودىسىنى چەتئەللەرگىچە كېڭەيتتى . چەتئەلدە تۇرالغۇلىرىمۇ بار بولدى . بۇ بەزىلەر ھەتتا خىيالىغىمۇ سىغدۇرالمايدىغان ئىشلار ، لېكىن فەررۇخ ئۈچۈن ئانچە كۈچ سەرپ قىلمايدىغان ئىش . ھازىر ۋەتەنگىمۇ ئانچە كۆپ قايتمايدۇ ، چۈنكى ئۇنىڭ لالەگە دىيىشىچە ، ئۇنىڭ تىجارەت ئىشلىرى بەكمۇ ئالدىراش ئىكەن . بىر نەچچە دۆلەت ئارىسىدا توختىماي چېپىپ يۈرەرمىش . ئائىلە ئايالىغا ئايلانغان لالە قانچىلىغان كۈنى تۈنلەرنى ئۇنى سېغىنىش بىلەن ئۆتكۈزىدىغان بولدى . لېكىن نىمە ئامال ؟ ئۇمۇ مۇشۇ ئائىلىنى دەپ رىيازەت چېكىۋاتقان تۇرسا ، ئۇنى قوللىمىسا بولامدۇ ؟ فەررۇخقىمۇ تەس ، يات ئەللەردە بىزنى دەپ جاپا تارتىۋاتىدۇ ، مۇساپىر بولۇپ يۈرۈۋاتىدۇ ، نىمىلا دېگەن بىلەن لالە ئۆزىنىڭ تۇغۇلغان يېرىدە مېھرىبان يۇرتداشلىرى ، ئۇرۇق - تۇغقانلىرى بىلەن بىللە ياشاۋاتىدۇ ، بىراق فەررۇخچۇ ؟ ئۇ تەنھالىقتا ياشاۋاتىدۇ ....لالە ئويلىغانسېرى ئۇنى سېغىناتتى ، ئۇنىڭ يېنىغا بارغۇسى ، ئۇنىڭغا ھەمراھ بولغۇسى ، ئۇنىڭ بىلەن كۈندە بىللە بولۇپ ، ئۇنىڭ ھالىدىن خەۋەر ئالغۇسى ، ئۇنىڭغا ئۇ ياخشى كۆرىدىغان تاماقلارنى ئېتىپ بەرەۈسى كېلەتتى .

huxhal

	ھەر بىر كۈننى سېغىنىش ، كۈتۈش بىلەن ئۆتكۈزىدىغان لالە ئۈچۈن كۈنلەر تولىمۇ تەستە ئۆتكەندەك قىلسىمۇ لېكىن ئەمىلىيەتتە تولىمۇ تېز ئۆتۈۋاتاتتى ، چۈنكى ۋاقىت ھامان توختىماي داۋام قىلىدۇ . ھېچكىمنىڭ ئىرادىسىگە باقمايدۇ ، ئۇ گويا شامالدەك ئالدىغا قاراپ غۇيۇلداپ مېڭىۋېرىدۇ ، سەن چاچلىرىڭ ئاقىرىپ ، نالىلىرىڭ ئىڭىكىڭگە تاقاشقاندا ، ساڭا ناھايىتى ئاستا ئۆتكەندەك بىلىنگەن ھەر بىر كۈننىڭ تولىمۇ تەستە ئۆتكەنلىكىنى ھەيرانلىق بىلەن ھېس قىلىسەن .   نەفىسەمۇ خېلى چوڭ بولۇپ قالدى . مەكتەپكە ئۇقۇشىمۇ كىردى ، لالەنىڭ ئەمدىكى ئىشىغا نەفىسەنى ھەر كۈنى ماشىنا بىلەن مەكتەپكە ئاپىرىپ ئەكىلىش قوشۇلدى ، ئالدىراشلىق ئىچىدە ئۆتىدىغان خىزمەت ھاياتىدىن خوشلاشقىلى خېلى يىللار بولۇپ قالغان لالە ئۈچۈن ھەر كۈنى ئۆيگە بېكىنىپ ئولتۇرۇش تولىمۇ مەنىسىز تۇيۇلاتتى ، لېكىن نىمە ئامال ؟ بۇ خىل تۇرمۇشقىمۇ كۆنمەي نە ھاجەت ؟!   كۈنلەر شۇنداق زېرىشكىش ئىچىدە ئۆتىۋاتقان بىر كۈنى فەررۇختىن تېلفۇن كەلدى ، ئۇنىڭ دىيىشىچە ، مۇشۇ ئىككى كۈن ئىچىدە فەررۇى ۋەتەنگە كەلگىدەك ، لالە بىلەن نەفىسەنى ئېلىپ ئۆزى تۇرۇۋاتقان دۆلەتكە ئاپىرىپ ساياھەت قىلدۇرغۇدەك . لالە تولىمۇ شادلاندى ، چەتئەللەرگە بېرىپ ساياھەت قىلىش باشقا نۇرغۇن كىشىلەرگە ئوخشاش ئۇنىڭمۇ ئارزۇسى ئىدى ، بۇ دۇنيادا سەيلى - ساياھەتنى ياقتۇرمايدىغان ئادەم يوقتۇر ؟ لالە ئالدىراش تېنەش سەپەر تەييارلىقىنى باشلىۋەتتى ، نەقەدەر كۆڭۈللۈك ! _ دەپ ئويلايتتى ئۇ ، _ بىر ئائىلە كىشىلىرى جەم بولۇپ داڭلىق ساياھەت ئورۇنلىرىنى كۆرىدۇ ، بۇ ساياھەت بولۇپمۇ ئۆسۈپ يېتىلىۋاتان نەفىسە ئۈچۈن بەكمۇ ئەھمىيەتلىك ......   ئويلىغانسېرى لالە  ئېيتىپ تۈگەتكۈسىز خۇشاللىققا چۆمەتتى ، ئۈچەيلەن بىللە سەپەرگە ئاتلانغان ئاشۇ كۈنگە  ئىنتىزار بولاتتى ........     لالە ئىنتىزار بولغان كۈنمۇ يېتىپ كەلدى ، فەررۇخ  ۋەتەنگە كەلدى- دە ، ئەتىسىلا ئۇلارنى ئېلىپ چەتئەلگە قاراپ ئۇچتى . تولۇقلىما مەزمۇن (2014-11-29 01:47 PM): بىر كۈننىڭ تولىمۇ تېز

huxhal

	بۇ بىر ئائىلە كىشىلىرىنىڭ تۇنجى بولۇپ چەتئەلگە ساياھەتكە چىقىشى ئىدى ، لالە قولىدىن ئىش كېلىدىغان ، ئەقىل - پاراسەتلىك ، ساداقەتمەن ئېرىنىڭ بولغانلىقىدىن تولىمۇ سۆيۈندى ،لالە تولا كۆردى ۋە ئاڭلىدى ، ئۇ تونۇيدىغان بەزى پۇلدارلار  ئۇزۇن يىل جاپادىمۇ ھالاۋەتتىمۇ بىللە   بولغان قەدىناس ئاياللىرىدىن يۈز ئۆرۈپ باشقا ئاياللارنى تېپىۋالدى ، بەزىلىرى ھەتتا يوشۇرۇنچە بىر نەچچە ئايال بىلەن نىكاھ ئوقۇتۇۋا لدى ، لېكىن فەررۇخچۇ ؟ پۇل تاپقان بىلەن بەزى ۋىجدانسىزلاردەك لالەگە يۈز كېلەلمەيدىغان ئىشلارنى قىلىپ باقمىدى ،مانا ئەمدى ئۇلارنى يىراق ئەللەرگە ئويناتقىلى ئېلىپ كېتىۋاتىدۇ ، فەررۇخ نىمە دېگەن ياخشى ئەر - ھە ؟ دوسلىرىم ئېيتقاندەك مېنىڭ ھەقىقەتەن تەلىيىم باركەن ، لالەنىڭ قەلبى ئويلىغانسېرى شادلىققا تولاتتى ............   ئۇلار ئايرۇپورتتىن چىقىشىتى - دە ، ئۆزلىرىنى كۈتۈپ تۇرغان ماشىنىغا چىقىشتى   _ دادا ، نەگە بارىمىز ؟ دېڭىز بويىغا بارامدۇق ؟ - سورىدى نەفىسە قىزىقىپ .   _ ئالدى بىلەن ئۆيىمىزگە بارىمىز ، دېڭىز بويىغا ئەتە بارىمىز ، قوزام .   ماشىنا بىرەر سائەتتەك يول يۈرۈپ ، بىر ئىگىز بىنانىڭ ئالدىغا كېلىپ توختىدى .   _دادا ، ئۆيىمىزگە كەلدۇقمۇ ؟   _ ھەئە ، كەلدۇق ، قوزام ، ئۆيىمىزگە ھازىرلا كىرىمىز . ئۇلار بىنانىڭ 3- قەۋىتىگە چىقىپ ، فەررۇخ بىر ئۆينىڭ ئىشىك قوڭغىرىقىنى بېسىۋىدى ، 22 ياشلار ئەتراپىدىكى تولىمۇ چىرايلىق بىر قىز ئىشىكنى ئاچتى .    - قېى كىرىڭلار - دىدى فەررۇخ ،- ئۆيگە كەلدۇق مانا .   بۇ كىمدۇ ؟ ئەجابا فەررۇخ .... ياق ، ياق ، مەن چوقۇم خاتا ئويلاپ قالدىم ... شۇلارنى ئويلاپ ئۈلگۈرگەن لالە كىرىسلوغا كېلىپ ئولتۇرغاچ ئەتراپقا نەزەر سالدى  ، ئۆيلەر تولىمۇ ئازادە بولۇپ ، بەكمۇ نەپىس بېزەلگەن ، دەرىزىلەرگە ئېسىل غەرپچە پەردىلەر تارتىلغان . ئۇھ ! ئەجەپ ھېرىپ كەتتىما ! _ فەررۇخ شۇنداق دېگەچ كىرىسلودا سوزۇلۇپ ئەمدى يېتىشى بىلەن قاياقتىندۇر ئىككى ياشلار چامىسىدىكى بىر كىچىك بالا يۈگۈرۈپ چىقتى .   _ دادا ، دادا ، دادام كەلدى .... بالا يۈگۈرۈپ كەلگەنچە فەررۇخقا ئۆزىنى ئاتتى . _ فىرات  كېچىدىمۇ تۈزۈك ئۇخلىمىدى ، دادام قېنى دەپ ، ئەجەپ سېغىندۇردىڭىز بىزنى جېنىم ، - دىدى لالەگە چاي سۇنۇپ بېرىۋاتقان بايىقى  ياش قىز  ئاخىرىدىكى ‹‹ جېنىم ›› دېگەن سۆزنى تولىمۇ ئۇرغۇلۇق تەلەپپۇز قىلىپ . فەررۇخ قانداقتۇر چۈشىنىپ بولغىلى بولمايدىغان بىر خىل ئىپادە بىلەن لالەگە لاپپىدە بىر قارىدى- دە ، كۆزىنى يەنە ئىتتىكلا قۇچىقىدىكى بالىغا يۆتكىدى . لالەنىڭ كۆز ئالدى قاراڭغۇلاشتى ، پۇت قوللىرى تىترىدى ، گويا بىرى ئۇنى ئاسمانغا ئېلىپ چىقىپ يەنە ئۇنى ئاسماندىن يەرگە  تاشلىغاندەك ، ئۇنىڭ پۈتۈن بەدىنى كۈكۈم - تالقان بولغاندەك  ، يۈرىكى  غەزەپ - نەپرەت ئوتىدا كۈيۈپ كۈلگە ئايلىنىپ كېتىۋاتقاندەك تۇيۇلدى ، ئۇنىڭ قولىدا  ئىستاكاننى تۇتۇپ تۇرغىدەكمۇ مادار قالمىغان ئىدى ، ئىستاكان  گىلەمگە چۈشتى ، قىزىق چاي پۇتىغا تۆكۈلدى .....  ئارىدا  نىمە ئىشلار بولغىنى نامەلۇم ، بىر چاغدا ناھايىتى يىراق بىر جايدىن فەررۇخنىڭ ‹‹ لالە ، لالە ››دەپ چاقىرغان ، نەفىسەنىڭ ‹‹ ئاپا ›› ، دەپ يىغلىغان ئاۋازى ئاڭلانغاندەك  بولدى ، لالە كۆزىنى ئاستا ئاچتى ، نەفىسىە يېنىدا يىغلاپ ئولتۇراتتى ، فەررۇى لالەنى ئىككى مۈرىسىدن تۇتۇپ ‹‹ لالە ، لالە ›› دەپ  ھەدەپ سىلكىمەكتە . لالەنىڭ كۆزلىرى ياشقا تولدى ، شۇ دەم ئۇ ئۆزىنى دۇنيادىكى ئەڭ بىچارە  ، ئەڭ دۆت ئادەم دەپ ھېس قىلدى ، ئىش مۇشۇ دەرىجىگە بېرىپ يەتكىچە ئۇ  ھېچنىمىنى  بىلمەي يۈرۈپتۇ ، فەررۇخنى پەقەت ماڭىلا مەنسۇپ ، ئۇ زىنھار ۋاپاسىزلىق قىلمايدۇ ، دۇنيادىكى ئەڭ ۋىجدانلىق ئەرلەرنىڭ بىرى دەپ يۈرۈپتۇ ، ئەسلىدە ئۇ بىر يۈزسىز ، ئىپلاسكەن ئەمەسمۇ !؟ ‹‹ چاڭ ›› قىلىپ  تۇيۇقسىز تەگكەن شاپىلاقتىن فەررۇخ چۆچۈپ كەتتى .   _ لالە ، مەن ساڭا چۈشەندۈرەي ، _ دىدى ئۇ قىزىرىپ كەتكەن يۈزىنى تۇتۇپ تۇرۇپ يېلىنغاندەك تەلەپپۇزدا .   _ چۈشەندۈرىمەن ؟ نىمىنى چۈشەندۈرىسىز ؟ ئېيتىڭە ! نىمىنى چۈشەندۈرىسىز ؟   _ لالە ، مېنى كەچۈر ، مەن ساڭا يۈز كېلەلمەيمەن ، يۈز كېلەلمەيمەن .   _ يوقال !