ئەردەشىر ۋە گۇلنار ھەققىدە قىسسە(‹‹شاھنامە›› 9-بۆلۈم)

Qabiljan

	-ئەي ئەقىلسىز،شۇ تاپتا نىمىلەرنى دەۋاتقىنىڭنى،ئۆزۈڭنى چوڭ چاغلاپ كىملەرنى كەمسىتىۋاتقىنىڭنى بىلمەيۋاتامسەن؟ ئەسلى بۇ ئىشتا ئۆزۈم ئەيىپلىكمەن.مەن ھە دېسىلا شېرىن سۆزلەرنى قىلىپ،سېنى كەلسە-كەلمەس ماختاپ ئۇچۇرۇپ ئۆزۈڭنى بىلەلمەيدىغان،ئۆزۈڭنى ھەممىدىن قالتىس چاغلايدىغان قىلىپ قويدۇم.سېنى ھەدىسىلا ئەتىۋارلىشىم،كېچە-كۈندۈز يېنىمدىن ئايرىماي ئەگەشتۈرۈپ يۈرۈشۈم زادى نىمە ئۈچۈن؟! مەن سېنى شۇنچىۋالا ئەزىزلەۋاتسام نىمىشقا ئۆزۈڭنى سورىمايسەن؟ نىمىشقا قۇرۇق شان- شۆھرەت تالىشىپ ئوغلۇمنى يالغانچى قىلماقچى بولىسىەن؟! مەن سېنى ھەددىدىن ئاشۇرۇپ قەدىرلىۋېتىپتىمەن، سەن تۇرۇشقا مۇناسىپ بولغان  ئورۇندا قويماپتىمەن.ئەسلى سەن شاھلار سورۇنىغا ئەمەس، ئاتخانىغا لايىق نېمىكەنسەن.بۇرۇن ئەزىز بولغان بولساڭ ،بۇندىن كېيىن پەس بول.شاھ سارىيىمدىن كۆچۈپ چىقىپ ئاتخانىدىن ماكان تۇت.مىراخور بولۇپ كېچە-كۈندۈز  ئاتلىرىمنىڭ ھالىدىن خەۋەر ئال! سەن مەن بىلەن ئەمەس، قۇل چاكارلىرىم بىلەن بىرگە يۈرۈشكە،شۇلار قاتارىدا ئات- كالا بېقىشقا مۇناسىپ كېلىدىكەنسەن.

Qabiljan

	ئەردەشىر كۆزلىرىگە لىققىدە ياش ئالغان ھالدا ئۈن-تۈن چىقارماي دەرھال شىكار مەيدانىدىن ئوردا ئاتخانىسىغا قايتىپ كەلدى.ئۇ يولدا  كېتىۋېتىپ ئۆزىگە ئۆزى دەيتتى: -ئەردەۋان ماڭا شاتلىق ئورنىغا غەم سوۋغا قىلدى.ئۇ بۇنىڭلىق بىلەن ھەرگىز بولدى قىلمايدۇ. ئۇنىڭ جېنى  ماڭا بۇنچىلىك ئازار بېرىش بىلەنلا دەرتتىن قۇتۇلالمايدۇ.بۇ تېخى ئىشنىڭ باشلىنىشى،بۇندىن كېيىن نى-نى كۈلپەتلەرگە يولۇقۇشۇم مۈمكىن. شۇندن كېيىن ئەردەشىر سارايدىن قوغلىنىپ قۇل -چاكار قىلىپ قويۇلدى.راھەت تۇرمۇشتىن ئايرىلىپ ئاتخانىدىكى جاپاكەش  مىراخورلار قاتارىدا ئات بېقىش بىلەن شۇغۇللاندى.تامىقىغىمۇ ئات باقارلار قاتارىدا قارا ئاشلىقتىن قىلىنغان ناچار يېمەكلىكلەرنى يىيىشكە مەجبۇر بولدى.

Qabiljan

	ئارىدىن بىرنەچچە ئاي ۋاقىت ئۆتتى.ئەردەشىر بۇ ئازاپ- خورلۇقلارغا زادىلا بەرداشلىق بېرەلمىدى.شۇڭا شاھ ئاتىسى بابەككە خەت يېزىپ بۇ يەردە بولغان ھەممە ئىشلاردىن ئۇنى خەۋەردار قىلدى. خەت بابەكنىڭ قولىغا يېتىپ باردى.ئۇ ئوغلىنىڭ ئەھۋالىنى ئۇقۇپ ئىنتايىن ئېچىنغان،كۆڭلى ئەردەۋاندىن قاتتىق ئازار يېگەن بولسىمۇ لېكىن، بۇ خەتنى سىر تۇتۇپ ھىچ ئىشنى بىلمىگەن قىياپەتكە كىرىۋالدى.كېيىن ئوغلىغا دىنار ئەۋەتىپ بېرىپ  دىنارنىڭ كۈچى بىلەن ئۇنىڭ تۇرمۇش شارائىتىنى ياخشىلاپ بەرمەكچى بولدى.شۇڭا خەزىنىسىدىن ئون مىڭ دىنار پۇل چىقاردى.ئاندىن ئەردەشىرغا ئاتاپ بىر پارچە خەت يازدى.خەت بىلەن دىنار تەييار بولغاندىن كېيىن بىر كىشىنى ئەلچىلىككە تەيىنلەپ ئۇچقۇر ئات بىلەن ئەردەشىرغا ئەۋەتىپ بەردى.ئەۋەتىلگەن دىنار ئەردەشىرنى خۇشال قىلغان بولسىمۇ لېكىن، خەتتىكى ئۆزىنى ئەيىپلەپ يېزىلغان قۇرلار ئۇنىڭ كۆڭلىنى تولىمۇ يېرىم قىلدى.خەتتە مۇنداق دېيىلگەن ئېدى:‹‹ئەي نادان ئوغلۇم،سەن ئۆزۈڭنىڭ نەدە تۇرۇۋاتقانلىقىڭنى،كىمگە تايىنىپ ياشاۋاتقىنىڭنى ئۇنتۇپ قالغانمىدىڭ؟شىكاردا شاھ ئەردەۋانغا نېمە دېدىڭ؟نىمە ئۈچۈن  ئۇنىڭ ئوغلىنى ئەل- خالايىق ئالدىدا يالغانچىلىقتا ئەيىپلەپ يۈزىنى چۈشۈرمەكچى بولدۇڭ؟نىمە ئۈچۈن ئۇنىڭ ئوغلىدىن ئۆزۈڭنى چوڭ تۇتتۇڭ؟ نىمە ئۈچۈن ئۆزۈڭنىڭ ئۇنىڭ ئوغلى ئەمەسلىكىڭنى ئۇنۇتتۇڭ؟! بۇ ئىشتا بارلىق گۇناھنىڭ سېنىڭدىن ئۆتكەنلىكى راست.بۇندىن كېيىن مەيلى قانداقلىكى ئىش قىلساڭ ھىسسىياتقا تايىنىپ ئەمەس، ئەقىلگە تايىنىپ قىل.ئەي ئوغلۇم،ئەردەۋان مېنىڭدىن ئۈستۈن تۇرۇدىغان بۇيۈك پادىشاھتۇر.بىز ئۈچۈن ئۇنىڭ بىلەن قارشىلىشىش تۈپتىن خاتادۇر. شۇڭا ھەرۋاقىت ئۇنىڭ ئىتائىتىدە بولۇپ پەرمانىغا ئەمەل قىلغىن.پۇرسەت تېپىپ ئۇنى شاد قىلىشقا،سەندىن قالغان كۆڭلىنى قايتۇرۇۋېلىشقا تىرىشقىن.ساڭا بولغان كۆڭلۈمنى ئىزھار قىلىپ نۇرغۇن دىنار ئەۋەتتىم.ئۇلارنىھەر كۈنى  خىراجەت قىلىپ تۇرمۇش شارائىتىڭنى ياخشىلىۋالغىن.ئەگەر بۇ دىنارلار تۈگەپ كېتىپ قالسا تارتىنماي يەنە تەلەپ قىل.قانچلىك كېرك بولسا يەنە ئەۋەتىپ بېرىمەن.››

Qabiljan

	بۇ خەت ئەردەشىرنى ئۇيقۇدىن ئويغاتتى.بۇ خەتتە ئېنىق ئېيتىلمىغان بىلەن نۇرغۇن ھىكمەت يوشۇرۇنغان ئېدى.بۇ خەت ئۇنىڭغا ھەرقانداق چاغدا ئۆزىگە تايىنىش،ئەقىل بىلەن ئىش قىلىش،ساددىلىق-دۆتلۈكتىن يىراق بولۇش،كىم بىلەن بىرگە ياشىسا ئۇنىڭ خارەكتىر -خۇسۇسىيەتلىرىنى ئىگەللەپ ئۇنىڭ بىلەن بولغان ئىناقلىق ئىتتىپاقلىقنى ساقلاش،تۈرلۈك ئاماللار بىلەن ئۇنىڭ بىلەن ياخشىلىشىپ دۈشمەنلىشىپ قېلىشتىن،شۇ سەۋەپلىك ئۇنىڭ زىيانكەشلىكىگە ئۇچراپ قېلىشتىن ساقلىنىش كېرەكلىكىنى بىلىۋالدى.ئەينى چاغدا ئۇ ھەقىقەتەن خاتا قىلغان ئېدى.‹‹ئوقنى مەن ئاتتىم ››دەپ شاھنىڭ ئارزۇلۇق ئوغلى بىلەن قۇرۇق شۆھرەت تالاشقاننىڭ ئورنىغا ‹‹ۋاھ ،شاھزادىمىز نىمىدىگەن باتۇر،نىمىدىگەن ئۇستا مەرگەن-ھە؟ مەن يەنە 4-5 يىل مەشىق قىلساممۇ مۇنچىلىك ئوق ئاتالمايمەن!ئەي شاھزادە پېقىر ئەرزىمەس قۇللىرىنى شاگىرتلىققا قوبۇل قىلىپ كارامەت ھۈنەرلىرىدىن ماڭىمۇ ئۆگىتىپ قويالارلىمۇ؟!››دەپ يالغاندىن ماختاپ ئۇچۇرۇپ قويغان بولسا شاھمۇ شاھزادىمۇ شاتلىنىپ كۈلمەسمىدى؟! ئابرۇي ئېتىبارىمنى تېخىمۇ بەك قىلىپ داۋاملىق شاھزادىلەرچە تۇرمۇشتىن بەھرىمەن قىلماسمىدى.؟! بۇرۇن ئۇستازى شىر كۆندۈرۈش ھەققىدە ھىكمەتلەر سۆزلەپ بەرگەن ئەمەسمىدى.ئەردەۋانغا ئوخشايدىغان شاھلار بەئەينى بىر يىرتقۇچ شىر،ئۇنىڭ بىلەن بىرگە بىخەتەر ياشاش ئۈچۈن تېرىكتۈرۈشكە، غەزەپلەندۈرۈپ قويۇشقا ھەرگىز بولمايدۇ.شىرنىڭ بېشىنى سىلاپ قويسا يۇۋاشلاپ قالغاندەك،شۆھرەتخۇمار شاھلارنىمۇ قۇرۇقتىن- قۇرۇق ماختاش،ئۆزىدە يوق سۈپەتلەر بىلەن مەدھىيەلەپ ئۇچۇرۇپ ئۆزىگە يېقىن قىلىۋېلىش كېرەك ئىكەن.

Qabiljan

	‹‹يېقىملىق شىرىن سۆز ۋە ماختاش - مەدھىيەلەش پادىشاھلار ئۈچۈن ئۈنۈملۈك سېھىر- ئەپسۇندۇركى،ئۇ شاھلارنى بىخۇدلاشتۇرىدۇ،شىرىن سۇخەن كىشىگە يېقىنلاشتۇرىدۇ. بۇ ئارقىلىق تۇيدۇرمايلا ئۇنىڭدىن پايدىلانغىلى بولىدۇ. ھەتتا ئاستا-ئاستا يېقىنلىشىپ گېزى كەلگەندە سىرتماقمۇ سېلىۋالالايسەن.››دېگەن ئىدى دانىشمەن ئۇستازى. -بولدى،مەن ئەمدى ھىچكىمدىن رەنجىمەيمەن،خاتالىق ھەقىقەتەن ئۆزۈمدىن ئۆتۈپتۇ.ئەمدى قانچىلىك ئاھ ئۇرساممۇ بىكار، پۇشايمان ئوتىدا ئازاپلىنىپ يۈرگەندىن كۆرە ئۆزۈمنى خۇشال تۇتۇپ،بوۋام ئە ۋەتپ بەرگەن دىنارلارنى خەشلەپ تۇرمۇش شارائىتىمنى ياخشىلىۋالاي،ئوردىدىكى چاغدىكىدەك ياشىيالمىساممۇ  پۇلدارباي سودىگەرلەردەك باياشاد تۇرمۇش كەچۈرۈپ تۇرساممۇ بولىدىغۇ؟‹‹پۇل بولسا جاڭگالدا شورپا›› دېگەن بىكار گەپ ئەمەس-تە؟!  ئەردەشىر ئۆزىگە- ئۆزى شۇنداق دەپ خىتاپ قىلغاندىن كېيىن تىنىچلىنىپ ،ئۆزىنى بۇرۇنقىدىن كۆپ يەڭگىل ۋە خۇشال سەزدى.

Qabiljan

	ئەردەشىر شۇ كۈنىلا ئاتخانا يېنىدىكى سارايلاردىن ئەڭ ئىسىل ۋە پاكىز سارايدىن بىرنى سېتىۋېلىپ شۇ سارايغا جايلىشىۋالدى.ئۇ يەرگە تۈرلۈك ئىسىل بىساتلارنى سېتىۋېلىپ ساراينى بېزىدى.قۇۋۋەتلىك،قىممەت باھالىق  تائاملارنى، ئىسىل شاراپلارنى سېتىۋېلىپ يەپ ئىچتى داڭلىق سازەندە-ناىشىچى ئۇسۇلچىلارنى تەكلىپ قىلىپ كىرىپ،  شاتلىق بەزمىلىرىنى تۈزۈپ، تۇرمۇش ھوزۇرىنى سۈردى.ئۇچىسىغىمۇ پەقەت باي زەردارلارلا كىيەلەيدىغان قىممەت باھالىق ئىسىل كىيىم –كېچەكلەرنى سېتىۋېلىپ كىيىپ بايۋەتچىلەردەك تۇرمۇش كەچۈردى.بىرنەچچە قۇل سېتىۋېلىپ ئۇلارنى ئاتخانىدىكى ئۆزى قىلىشقا تېگىشلىك ئىشلارغا سېلىپ قويدى.مىراخورلار باشلىقى بىلەن دوست بولۇۋېلىپ،نەگە بارسا كەينىگە سېلىۋېلىپ ئانچە –مۇنچە نەپ بېرىپ تۇرغاچقا ئۇمۇ  ئەردەشىرنى ئەتىۋارلاپ ھۆرمىتىنى قىلىپ جاپاسىنى يوقاتتى.شاھقا چېقىشتۇرۇپ كىرىدىغان ناچار  ئىشلارنى قىلمىدى.بەلكى گېزى كەلسە ‹‹ئۇ بەك ئىشچان بالىكەن،ياخشى ئىشلەۋاتىدۇ›› دەپ مەلۇمات سۇنۇپ قويدى.

Qabiljan

	ئەردەۋان ناھايىتى ئىگىز ۋە ياسىداق بىر قەسىر ياساتقان بولۇپ ئۇ قەسىردە ئۇنىڭ بىر تاللا ئارزۇلۇق قىزى گۈلنار تۇراتتى.گۈلنار ئىسمى- جىسمىغا لايىق گۈل يۈزلۈكلەر شاھنشاھى بولۇپ يەتتە ئىقلىمدا گۈزەللىكتە ھىچقانداق بىر مەلىكە ئۇنىڭ بىلەن تەڭلىشەلمەيتتى.بۇ قىز ھۆسۈن جامالدىلا يىگانە بولۇپ قالماي ئەقىل پاراسەتتىمۇ ھىچكىم ئۇنىڭ بىلەن تەڭلىشەلمەيتتى.ئىنتايىن قابىل، تەدبىرلىك ئېدى.شۇڭا ئەردەۋان ئۇنى ئۆزىگە ۋەزىر قىلىۋالغان ئېدى.شاھ ئۇنى جېنىدىن ئەزىز كۆرەتتى.شۇنداقلا شۇنداق بىر قىزى بولغىنىدىن پەخىرلىنەتتى. بىر كۈنى گۈلنار قەسىرىنىڭ پەنجىرىسىدىن ئەتراپنى تاماششا قىلىۋېتىپ يولدىن ئۆتۈپ كېتىۋاتقان ئەردەشىرنى كۆرۈپ قالدى.ئەردەشىرنىڭ بۇ يەرگە كەلگىنىگە شۇنچە ۋاقىت بولغان بولسىمۇ لېكىن، ئۇلار تېخىچە بىر-بىرىنى كۆرۈپ بېقىشمىغان ئېدى.گۈلنار بۇ نەۋقىران ياش يىگىتنى بىر كۆرۈش بىلەن تەڭ ئۇنى چىن دىلىدىن ياخشى كۆرۈپ قالدى. ئەردەشىرمۇ گۈلنارنى كۆرگەن ئېدى.ئۇ قۇياشتەك نۇرلۇق،سۆيگۈسى يالقۇنلۇق بۇ گۈل يۈزلۈك سەنەمنى بىر كۆرۈپلا ئۇنىڭغا غايىۋانە باغلىنىپ قالدى.شۇڭا خۇش تەبەسسۈم بىلەن كۈلۈمسىرىگەچ ئىزىدا توختاپ مەلىكىنىڭ ھۆسنىنى تاماششا قىلدى.  بۇ خىل مۇھەببەتلىك بېقىشىش ئىككى يۈرەكنى بىر بىرىگە مەھكەم باغلىۋەتتى.شۇ تاپ ئۇلار ھىچكىم دەخلى- تەرۈز قىلمىسا  بىر بىرىگە قانغۇچە قارىشىپ تۇرۇشىۋالغان بولاتتى.لېكىن كۈپ كۈندۈزدە شاھنىڭ ئىپپەت پەردىسىدىكى قىزى بىلەن ھاياسىزلارچە قارىشىپ تۇرۇۋېرىش ھەر ئىككىلا تەرەپ ئۈچۈن خەتەرلىك ئاقىۋەت كەلتۈرىدىغانلىقى ئېنىق ئىدى.گۈلنار بۇ نوقتىنى تونۇپ يېتىپ ئوماققىنە بىر تەبەسسۈم قىلىپ قويدى -دە ئالدى بىلەن ئۆزىنى چەتكە ئالدى.

Qabiljan

	.ئەردەشىر ئۇنى قايتا كۆرگۈسى كېلىپ بىردەم تەلمۈرۈپ قاراپ تۇرۇپ بېقتى. قىز قايتا كۆرۈنمىگەندىن كېيىن ئوتلۇق ئۇھ تارتقىنىچە سارىيى تەرەپكە قاراپ ماڭدى.گۈلنارنىڭ قەسىرى قەۋەتلىك ئىگىز قەسىر بولغاچقا ئۈستۈنكى قەۋەتنىڭ دەرىزىسىدىن ئەتراپنى كۈزەتكىلى بولاتتى.مەلىكە ئۆزىنى پىنھانغا(پەردە كەينىگە) يوشۇرغان بىلەن ئەردەشىرنىڭ ھەممە ھەركىتىنى يوشۇرۇن كۈزىتىپ تۇرۇۋاتاتتى.ئۇ كۆڭلىگە مەلۇم مەقسەدنى پۈكۈپ ئەردەشىرنىڭ نەگە ماڭغىنىنى،قايسى سارايغا كىرىپ كەتكىنىنى ئېنىق كۆرۈۋالدى. نۇرلۇق قۇياش تاغ كەينىگە پىنھان بولۇپ، تۈن قاغىسى قاپقارا سېھىرلىك قاناتلىرى بىلەن ئالەمنى زۈلمەتكە چۆمدۈرگىنىدە مەلىكە گۈلنار ئەردەشىرنىڭ يېنىغا بارماق بولۇپ قەسىر تېمىغا ئارقان تاشلىدى.ئارقاننىڭ چىگىلمىلىرى تام ئۈستىدىكى كۈنگۈرىگە مەھكەم چىگىلگەندىن كېيىن مايمۇندەك چاققانلىق بىلەن قەسىر تېمىغا يامىشىپ چىقتى.ئەتراپنى بىردەم كۈزىتىپ بېقىپ ئادەم شەپىسى ئاڭلانمىغاندىن كېيىن يەنە ئارقان بىلەن قەسىرنىڭ سىرتىدىكى يولغا سېيرىلىپ چۈشتى.ئەتراپتا ئادەم كۆرۈنمەيتتى.مەلىكە خاتىرجەم بولۇپ  تېنىدىن ئەتراپقا خۇش بۇي ھىدلارنى تارقاتقىنىچە كۈندۈزى كۆرۈۋالغىنى بويىچە ئەردەشىرنىڭ سارىيى تەرەپكە قاراپ تېز يۈرۈپ كەتتى.

Qabiljan

	ساراي ئىشىكى بوشقىنا چېكىلدى.تېخى ئۇخلىمىغان ئەردەشىر كۆڭلى قانداقتۇ بىرەر نەرسىنى تۇيغاندەك بولۇپ چاچراپ ئورنىدىن تۇرۇپ سىرتقا چىقتى.چىقتىيۇ كۆزىگە ئىشەنمەيلا قالدى.ئاسماندىكى تولۇن ئاي ئۇنىڭ ئىشىك تۈۋىدە ئىللىق كۈلۈمسىرەپ تۇراتتى.ئەردەشىر قاتتىق ھاياجاندىن  يۈرۈكى دۈپۈلدەپ سوققان ھالدا مەلىكىنى تېزدىن  ئۆيگە باشلىدى.گەرچە كېچە بولسىمۇ بۇلارنىڭ بىرگە تۇرغىنى يامان كۆزلەرگە چېلىقىپ قالسا بولمايتتى.ئۇلار ئۆيگە كىرگەندىن كېيىن خۇددى كونا تونۇش ئاشىق-مەشۇقلاردەك بىر بىرىگە يېقىن ئولتۇرۇشتى.بىر جۈپ نۇرلۇق چېھىر بار يەردە چىراقنىڭ نۇرىنىڭ ئاجىزلىقىمۇ چانمىدى.بۇ بىر جۈپ ئاشىق-مەشۇق بىر بىرىگە شەيدالارچە نەزەر سېلىشىپ بىر بىرىنىڭ ھۆسنىنى قانغۇچە تاماششا قىلىشتى.بىرازدىن كېيىن ئەردەشىر بۇ نازىنىن قىزنى باغرىغا مەھكەم بېسىپ تۇرۇپ ئۇنىڭدىن ئېھتىيات بىلەن سورىدى: -ئەي ئاي جامال نازىنىن،كىم بولۇرسىز؟ نەدىن كەلدىڭىز؟ كېچىدە پەرىشتىدەك پەيدا بولۇپ غەم تولغان دىلىمنى رۇشەن قىلدىڭىز،- مەلىكە  قىز تۇنجى كۆرۈشۈشتىلا ئۆزىنى ئاشكارىلاشنى خالىمىدى،

Qabiljan

	شۇڭا باشقىچىرەك جاۋاپ بەردى: -مەن نام -شەرىپىنى تىلغا ئېلىشقا ئەرزىمەيدىغان ئاددىيغىنە بىر كېنىزەك قىزمەن.كۈندۈزدە سېنى كۆرۈپ كۆڭلۈم چۈشۈپ قالدى.شۇڭا سەن ئۈچۈن جېنىمنى پىدا قىلغىلى كەلدىم.ئەگەر خالىساڭ ھەر كېچىسى كېلىپ يېنىڭدا ھەمراھ بولاي،قاراڭغۇ تۈنۈڭنى يورۇتۇپ كۆڭلۈڭنى شاتلاندۇراي! ... شۇنداق قىلىپ ئەردەشىر بىلەن گۈلنار شۇ تەرىزدە ھەر ئاخشىمى يوشۇرۇن كۆرۈشۈپ مۇھەببەتلىشىپ، ئىشىق پەيزىنى سۈرۈپ يۈردى.لېكىن ‹‹ئون كۈلكىنىڭ بىر يىغىسى بار›› دېگەندەك كۈنلەردىن بىر كۈنى ئەردەشىرنىڭ بېشىغا ئېغىر كۈلپەت كەلدى.ئەردەشىرنىڭ جاھانكەش تايانچىسى،جان جىگەر بوۋىسى بابەك بۇ دۇنيادا يەيدىغان رىزقىنى ئاخىرلاشتۇرۇپ  بارسا كەلمەس دۇنياغا سەپەر قىلدى.بۇ خەۋەر ئەردەشىرغا يەتكەندە ئۇ قاتتىق قايغۇ- ھەسرەتكە چۆمۈپ يارىلانغان شىردەك ھۆركىرەپ يىغلاپ كەتتى.ۋۇجۇدى قايغۇ ھەسرەتكە تولۇپ تۈنۇ-سەھەر غەمدىن نېرى بولالمىدى.