ئوغلۇمنىڭ مۇھەببىتى-قابىلجان

uyol

	Qabiljan يوللىغان ۋاقتى  2013-12-28 11:02 PM قەيسەر بىلەن ھېلىقى قىزنىڭ ئىشى قانداق بولدى،ھازىرمۇ  ... باشتىالا پەرەز قىلغانتىم......قېنىى ئاخىرنى كۈرۈپ باقايلى

Qabiljan

	uyol يوللىغان ۋاقتى  2013-12-29 12:14 PM توغرا دېدىڭىز قېرىندىشىم مەن ئالدىنقى ئىنكاسىمدا مۇھەببەتتە چوڭقۇرلاپ كەتكەن  كىشىنىڭ بەئەينى مەسكىلا ئوخشاپ قالىدىغانلىقى، نورمال ئەقلى ھۇشىنى يوقۇتۇپ، نومۇس تۇيغىسىدىن ھالقىپ ئۆتۈپ مۇھەببەت سەۋدالىقىدا ئادەتتىكى ئادەملەر قىلمايدىغان بەزى سۆز ھەركەتلەرنى قىلىدىغانلىقى ھەققىدە ئىنكاس يازدىم. مەن بۇ پوۋېستنى ئۇ باش پېرسۇناژنى ۋە دادىنى مەدھىيەلەش،ھەممەيلەن شۇنداق قىلىڭلار دېگەن تەشۋىقاتنى قىلىش ئۈچۈن يازمىدىم. ئەقلىڭىز نورمال،چۈشىنىش ئىقتىدارىڭىز ياخشىراق بولسا باش تەرىپىدىكى ئىزاھاتنى ئوقۇپ بېقىڭ. سىز ئەدەبىيات دەرسلىكىدە ‹‹مەرگىزى ئىددىيە›› دېگەن ئاتالغۇنى ئاڭلاپ باققان بولغىيتىڭىز؟ بۇ پوۋېستنىڭ مەرگىزى ئىدىيەسىمۇ بالدۇر مۇھەببەتلىشىش،مۇھەببەتىكى ساددىلىق،باشقىلارغا زىيادە ئىشىنىپ كېتىش،ئوقۇغۇچىلىق دەۋرىدە ۋاقىتنى ،زېھنىنى كۆڭۈل ئىشىغا ئىسراپ قىلىۋېتىشنىڭ ئېلىپ كېلىدىغان خەتەرلىك ئاقىۋىتىنى تونۇتۇش، شۇنداقلا بىر قىسىم ئاتا -ئانىلاردىكى بالىلىرىغا زىيادە كۆيۈنۈش،كۆيۈنۈش ئۇسۇلى توغرا بولماسلىق ،چىڭ تۇتماسلىق،نىشان بۇرىلىپ كەتكەندە ۋاقتىدا نىشااننى توغرىلىماسلىق، ئۇنىڭدىن كېلىپ چىقىدىغان يامان ئاقىۋەتلەر ھەققىدە پىكىردە ئورتاقلىشىپ پەرزەنت تەربەيسى ۋە ئوقۇغۇچىلىق دەۋرىدىكى پائالىيەت ھەققىدە ئورتاق پىكىرگە كېلىشتىن ئىبارەت. مەن سىزنىڭ كىچىك تۇرۇپلا ئالىي ئەزا بولالىغانلىقىڭزنى مۇبارەكلەيمەن. ئىنكاسلاردىكى بىر قىسىم توغرا قاراشلىرىڭىزنىمۇ قوللايمەن. لېكىن سىزگە شۇنىمۇ دەپ قويايكى ياخشى نىيەت ساپ بولۇشى، ئۇنىڭغا تىرناقچىلىكمۇ كىر ئارىلىشپ قالماسلىقى كېرەك.ئىنكاسلىرىڭىزنىڭ ئورامىدىن قارىغاندا سىزنىڭ قارشى تۇرۇۋاتقىنىڭىز ئەسەردىكى پېرسۇناژ ئەمەس باشقا بىرسىدەك قىلىدۇ.   سىز، مەن قەشقەر  6-ئوتتۇرا مەكتەپنىڭ تولۇق2-يىللىق ئوقۇغۇچىسىمەن دەپ ئىنكاس يېزىپسىز. بۇ دەۋردە بۇنچىلىك بىلىم قابىلىيەتكە ئېرىشىش ئاسان ئەمەس.شۇڭا بۇ تەرەپتىن سىزگە زوقۇم كېلىدۇ. لېكىن ئالدىنقى كۈنلەردىكى بەزى ئىنكاسلارنى يازغان ۋاقتىڭىز كەچلىك مۇزاكىر پەيتى ياكى دەرس ۋاقتى دېگەندەك بەزى ۋاقىتلارغا توغرا كېلىپ قالىدىكەن. ئۇ مەكتەپتە بۇرۇن بىر تۇققىنىمىزنىڭ قىزى ئوقۇغان.ھازىرمۇ بىزنىڭ يۇرتتىن نۇرغۇن بالىلار ئوقۇيدۇ.شۇڭا ئۇ يەرنىڭ تۈزۈملىرىنى ياخشى بىلىمەن.ئۇ يېرىم ھەربىي تۈزۈمدە شەھەر بويىچە ئەڭ چىڭ باشقۇرۇلىدىغان مەكتەپ شۇنداق ئىكەن سىز مەكتەپ تۈزۈملىرىگە ئاڭلىق بويسۇنىشىڭىز،دەرس مۇزاكىر ۋاقىتلىرىدا توغا چىقماسلىقىڭىز ۋاقتىڭىزنى قەدىرلىشىڭىز كېرەك. قۇرسىقىڭىزدا غۇم بولمىسىلا سىز بىلەن پايدىلىق پىكىر جقەھەتتە داۋملىق مۇنازىرلىشىشنى خالايمەن.

Qabiljan

	uyol يوللىغان ۋاقتى  2013-12-29 12:21 PM ئەسسالامۇ ئەلەيكۇم قېرىندىشىم، تېمىڭىزغا يازغان ئىن ... مەن دېمىدىممۇ سىز تېخى بالا،جەمىيەتنى،ئادەملەرنى  چۈشىنىشىڭىز يېتەرسىز دەپ، ئەدەبى ئەسەرلەردىكى ۋەقەلىكەر پۈتۈنلەي ئويدۇرما بولمايدۇ.ئۇ رېئال تۇرمۇشتىكى ۋەقەلىكلەرنىڭ مەلۇم دەرىجىدە پىششاقلانغاندىن كېيىنكى يازغۇچى قەلىمىدىكى ئىنكاسى.ئەسەردىكى پېرۇسۇناژارنىڭمۇ ھەممىسى سۇن مايمۇندەك توقۇپ چىقىرىلغان بولمايدۇ.پېرسۇناژلارنىڭ رېئال تۇرمۇشتا مەلۇم بىر ياكى ئىككى پىروتوتىپى بولىدۇ. ھازىر جەمىيەت مۇرەككەپ،بەزى ئادەملەرنىڭ ئېيتقان سۆزى بىلەن قىلغان قىلىقى بىر بىرىگە ماس كەلمەيدۇ.بۇ ئەسەردىكى گۈلقىزنىڭ پىروتوتىپىنىڭ  ئائىلىسىدىكىلەرنىڭ ئەھۋالى ئاساسەن مۇشۇ ئەسەردە تەسۋىرلەنگەندەك. ئۇلار دىنىي ئېتىقادى كۈچلۈك ئائىلە تۇرۇپ ساغلاملىق بۇيۇملىرى ۋە ھۆسىن تۈزەش مەھسۇلاتلىرى دۇكىنى ئاچقان.ھەتتا قىزىنى تەتىلدە شۇ دۇكان ئىشىغا قاراشتۇرغان. بۇنداق ئىشلار جەمىيەتتە نۇرغۇن. بەزى يۇرتلاردا ئازنى مىچىتنىڭ ئىمامىنىڭ ئوغلى ھاراقكەش ۋە داڭدار قىمارۋاز چىقىپ قالىدىغان،ھە دېسە ئۆيدىن قېچىپ ئۆي بىساتلىرىنى سېتىپ ئاتا ئانىسىنى قان يىغلىتىدىغان،بەزى مۆتىبەر ھاجىملارنىڭ بالىلىرى بازاردىكى دۇكانلىرىنى ئاشپەز ناۋايلارغا بەرمەي پۇلنى كۆپ تاپىمىز دەپ مەيپۇرۇش خەنزۇلارغا سېتىپ بېرىپ  يۇرتتىكى ياشلارنىڭ ھاراقكەش زابۇي بولۇپ يېتىشىپ چىقىشىغا ھەسسە قوشىدىغان ئەھۋاللار  بار.شۇڭا دىنى ساھەدىكىلەرنىڭ ئكزىدىن تارتىپ بالا-چاقىلىرىغىچە ھەممىسى توغرى،باشقا ساھەدىكىلەرنىڭ ھەممىسى ئېتىقادسىز ئوغرى دەپ قارىساق رېئاللىققا ئۇيغۇن كەلمەيدۇ.

Qabiljan

	داۋامى يازلىق تەتىل شۇ تەرىقىدە ئۆتۈپ كەتتى،مەن بۇ جەرياندا  قەيسەردىن گۈلقىزنىڭ نىمە قىلىۋاتقانلىقى، بۇندىن كېيىن يەنە قانداق قىلماقچى بولۇۋاتقانلىقى،ئۆيىدىكىلەرنىڭ ئۇنىڭغا قانداق پوزىتسىيە تۇتۇۋاتقانلىقى دېگەندەك قىز تەرەپ ھەققىدىكى يېڭى -يېڭى خەۋەرلەرنى ئۇقۇشۇپ تۇردۇم.ئۇ قىز دەسلەپ ئالىي مەكتەپ ئىمتىھانىدا ئالغان نومۇرىنىڭ تۆۋەنلىكىنى(255نومۇر ئالغان ئىكەن)،شۇڭا كۆڭۈلدىكىدەك بىرەر ئالىي مەكتەپتىن چاقىرىق قەغىزى كېلىشىنىڭ مۈمكىن ئەمەسلىكىنى، ھامان ئوقۇغاندىكىن بىر يىل قايتا ئوقۇپ كېلەر يىلى قايتا ئىمتىھان بەرگىسى بارلىقىنى،بۇ ئارزۇسىنى ئەمەلگە ئاشۇرۇش ئۈچۈن ئەسلىدىكى مەكتىپىدە ئوقۇماستىن قەشقەردىكى نۇقتىلىق ئوتتۇرا مەكتەپلەردىن بىرىگە بېرىپ  ئوقۇغۇسى بارلىقىنى  ئېيتىپتۇ.لېكىن ئۆيىدىكىلەر قوشۇلماپتۇ.(ئۇلار بارا –بارا قەيسەر بىلەن قىزى ئوتتۇرىسىدىكى مۇناسىۋەتنى بىلىپ قېلىشقان ئىكەن)ئۇلارنىڭ نەزىرىچە بولسا قىزىنى قەشقەردە ئوقۇتسا ئۇنىڭغا قەيسەر بىلەن ھەر كۈنى كۆرۈشۈپ تۇرىدىغان پۇرسەت چىقىپ ،ھەر ئىككىلىسى ئوقۇشقا ئەمەس مۇھەببەتكە بېرىلىپ كېتىپ مەكتەپتە ياخشى ئوقۇيالماي قالىدىكەن.ھەتتا بۇ جەرياندا  ئىككى ياش كۆڭۈلنىڭ كەينىگە كىرىپ،شەيتان ئارىلىشىپ  بەزىبىر ناشايان ئىشلارنى قىلىپ قويۇشى،شۇنىڭ بىلەن قىزىنىڭ  ئىستىقبالىغا تەسىر يېتىشى مۈمكىن ئىكەن.شۇڭا ئۇنى  ئوقۇتۇپ قالسا قەشقەردىن باشقا يەردە ئوقۇتىدىكەن،بولمىسا ئوقۇشىنى توختۇتۇپ ھېلىقى گىرىم بويۇملىرى دۇكىنىنى داۋاملىق ئېچىۋېرىشىنى قوللايدىكەن. بۇ مەنمۇ ئويلىغان ۋە ئەنسىرىگەن ئىش بولغاچقا  ئۇلارنىڭ تاللىشىدىن بەكمۇ رازى بولدۇم.لېكىن چاندۇرمىدىم.چۈنكى بۇنداق خەۋەردىن خوش بولسام ئوغلۇم مەندىن رەنجىپ قالاتتى. تەتىل توشۇپ قەيسەر مەكتىپىگە ئوقۇشقا كەتتى.ئۇ ئەمدى تولۇق ئىككىنچى يىللىقنى تاماملاپ تولۇق ئۈچىنچى يىللىققا چىققان ئېدى.بۇ ئۇلارنىڭ تولۇق ئوتتۇرا مەكتەپتىكى ئاخىرقى ئوقۇش يىلى بولغاچقا ئوقۇشى جىددى بولىدىغان ۋە ئۆمۈرلۈك ئىستىقبالىغا تەسىر كۆرسۈتىدىغان قىممەتلىك بىر يىلى ئېدى.مەن ئۇنىڭ بۇ بىر يىلدا ئوقۇشتىن باشقا ھەرقانداق ئارزۇ-ھەۋەسلەرنى چۆرۈپ تاشلاپ پۈتۈن زېھنىنى ۋە ۋاقتىنى ئۆگىنىشكە قارىتىپ ئۆزىگە گۈزەل ۋە پارلاق بىر ئىستىقبال ھازىرلىشىنى ئۈمىد قىلاتتىم.لېكىن بالىنىڭ زېھنىنى بىر بۇيرۇق بىلەنلا ئۆگىنىشكە مەرگەزلەشتۈرگىلى،يەنە بىر بۇيرۇق بىلەنلا مۇھەببەتتىن ۋازكەچتۈرگىلى بولمايتتى.چۈنكى ئۇ ماىشىنا ئادەم ئەمەس ھىسسىياتلىق ئادەم ئېدى.ئوغلۇمنڭ كۆڭلىگە كىرىپ چىقسام ‹‹گۈلقىز››ئۇنىڭ نەزىرىدىكى يۈكسەك غايىگە ئايلانغان بولۇپ ئۇنىڭغا تېزراق ئېرىشىش ئۈچۈن ئكزى ئۈچۈن ئەۋزەل بولۇۋاتقان باشقا ھەرقانداق نەرسىنى قۇربان قىلىۋېتىشكە تەيياردەكلا  قىلاتتى.بۇ مۇھەببەتنىڭ ئەقىلنى كەسكەنلىكى،كەلگۈسى ئىستىقبالىنى كۆرمەيدىغان قەلبى كور ئەماغا ئايلاندۇرۇپ قويغانلىقى بىلەن باراۋەر ئېدى.بۇنداق ئادەمگە قانچە نەسىھەت قىلسىمۇ كار قىلمايتتى.بەلكى قانچە نەسىھەت قىلغانسېرى نەسىھەت قىلغۇچى شۇنچە سەت،شۇنچە يىرگىنىشلىك،شۇنچە دۈشمەن كۆرۈنۈپ ئۇنىڭدىن يىراقلىشىپ قالاتتى. شۇڭا مەن نەسىھەتنىمۇ قىلىشقا تېگىشلىك جايدا ۋە ۋاقىتتا قىلىپ، باشقا ۋاقىتتا ئۇنىڭ كۆزىگە بەك كىرىۋالمىدىم.ئۆزىنىڭ رايىغا،ئەقلىي تالللىشىغا قويدۇم.تېگىشلىك پەيتلەردە ئۇلۇغ پەرۋەردىگاردىن ئوغلۇمغا ئەقىل،ئەخلاق،گۈزەل ئىستىقبال،توغرا يول،ئىمان،ئىنساپ،تىلىدىم.ئالەمنى شۇنچە مۆجىزىلىك،ھەممە تەڭشەلگەن،بىر -بىرىگە ماسلاشقان،ئوخشىشى ۋە تەڭدىشى يوق،ئۇندىكى بارلىق شەيئىلەرگە ئەۋزەل قىلىپ يارىتالىغان بۈيۈك زات ياخشى بەندىسىنىڭ چىن تىلىكىنى يەردە قويمايدىغانلىقىغا ئىشىنەتتىم. داۋامى بار

Qabiljan

	سىنتەبىر ئايلىرىنىڭ ئوتتۇرلىرىدا ئوغلۇم قەيسەر  بىلەن تېلىفۇنلىشىپ گۈلقىز ھەققىدە يېڭى خەۋەرگە ئېرىشتىم.بۇ خەۋەر مېنى ھەم خۇشال قىلدى،ھەم تىنىچلاندۇردى. ئىككى ھەپتە بۇرۇن گۈلقىزغا ئۈرۈمچىدىكى خېلى نامى بار بىر ئىنىستىتوتتىن چاقىرىق قەغىزى كەپتۇ.ئۇ ‹‹ئوقۇيمەن››دەپ چىڭ تۇرۇۋالغان بولغاچقا ئۆيىدىكىلەر نائىلاج ئۇنىڭ رايىغا بېرىپ ئۈرۈمچىگە ئوقۇشقا بېرىشىغا قوشۇلۇپتۇ. ئۇ قىز ئاللىقاچان ئۈرۈمچىگە بېرىپ ئالىي بىلىم يۇرتىغا  ئورۇنلىشىپ بولغان بولۇپ  ئارزۇسىغا بىنائەن ھەقىقىي ئالىي مەكتەپ ئوقۇغۇچىسىغا ئايلىنىپتۇ.مەن قەيسەردىن گەپ كوچىلىدىم،ئۇ مەندىن قىلچە گەپ يوشورمايتتى: -ئۇ قىزنىڭ بەختى بار ئىكەن،خېلى ياخشى مەكتەپكە ئۆتەلەپتۇ.كېلەر يىلى سەنمۇ ئالىي مەكتەپ ئىمتىھانىدىن ياخشى نومۇر بىلەن ئۆتۈپ شىنجاڭ ئۇنۋېرستىتىغا ياكى شىنجاڭ تىببى ئۇنۋېرستىتىدەك بىرەر ياخشى مەكتەپكە ئۆتەلىسەڭ مەنمۇ سەندىن خاتىرجەم بولغان بولار ئېدىم.قانداق ئىشەنچىڭ بارمۇ؟! -ئىشەنچىم بار، لېكىن مەنمۇ گۈلقىز ئوقۇغان مەكتەپتە ئوقۇيمەن! -نىمىشقا؟! -ئىككىمىز بىر مەكتەپتە ئوقۇساق كۈندە كۆرۈشۈپ تۇراللايمىز،بىر بىرىمىزگە كۆيۈنۈپ،ئك-ئارا ئىلھام بېرىپ بىرگە ئالغا باسالايمىز.بولمىسا كۆزدىن يىراق كۆڭۈلدىن يىراق دېگەندەك بولۇپ قېلىشى مۈمكىن. -بالام،ئادەم دېگەن بىر ئىش قىلىشتىن ئاۋال ياخشى ئويلىنىشى،تۆۋەنگە ئەمەس يۇقۇرىغا ئىنتىلىشى، بۇرنىنىڭ ئۇچىنىلا كۆرمەستىن ئەتراپلىق تەپەككۇر قىلىپ نۇرغۇن تەرەپلەرنى نەزەرگە ئېلىشى كېرەك.ئادەم ئۈچۈن كەسىپ بەكمۇ مۇھىم.سەن ئارزۇ جەدۋىلى تولدۇرغاندا  مەن دېگەن مەكتەپلەرنى تاللاپ شۇ يەرلەردىن بىرىگە جەزمەن ئۆتۈشنى باش نىشان قىلغىن.شۇنداق قىلالىساڭلا ئىستىقبالىڭ بولىدۇ.شۇنى ئۇنۇتمىغىنكى، تەننىڭ يېقىنلىقىدىن قەلبنىڭ يېقىنلىقى ئەۋزەل.شۇنداق بولغاندىلا ئادەملەر بىر بىرى بىلەن ھەر كۈنى  يېقىن ئارىلىقتا ياشىمىسىمۇ ئىناق،ئىتتىپاق،ئامراق بولۇپ ئۆتەلەيدۇ.نىشانى ئوخشىمايدىغان، پىكىرداش،قەلبداش بولمىغان،بىر بىرىنى چۈشەنمەيدىغان ۋە ئىشەنمەيدىغان كىشىلەرنى مىڭ كۈن بىرگە قويساڭمۇ قېرىنداش، يولداش بولالمايدۇ،ئىناق، ئىتتىپاق ئۆتەلمەيدۇ. -چۈشەندىم دادا،بەك ياخشى سۆز قىلىپ بەردىڭىز.مەن سىز دېگەندەك قىلىمەن،ئارزۇ قىلغىنىمىزدەك نۇقتىلىق،ئىستىقباللىق ئالىي مەكتەپلەردىن بىرىگە ئۆتەلىسەم خۇدايىمنىڭ بەرگىنى شۇ.سىزمۇ خوش بولىسىز،مەنمۇ خش بولىمەن.ئىستىقبالىممۇ بولىدۇ.شۇنداق بولغاندا گەرچە مەكتىپىمىز بىر بولمىسىمۇ قەلبىمىز بىر بولغاندىكىن راست،بىزنى ھىچكىم ئايرىۋېتەلمەيدۇ.بىر شەھەردە بولغاندىكىن كۈندە كۆرۈشمىسەكمۇ ھەپتىدە بىر بولسىمۇ كۆرۈشەلەيمىز.ھە راست دادا، سىزدىن بىر ئىشنى سورىسام بولامدۇ؟ -ھە قېنى سورىغىن. -باشقىلاردىن ئاڭلىسام ئالىي مەكتەپ ئوقۇغۇچىلىرىنىڭ ئۆز ئارا بىرگە تۇرۇشىغا ھەتتا توي قىلىشىغىمۇ يول قويارمىش، مۇشۇ گەپ راستمىدۇ؟! -مەنمۇ شۇنداقراق ئاڭلىغانتىم،بۇنى سوراپ قالدىڭغۇ؟! -مەنمۇ ئۈرۈمچىگە نۇقتىلىق داشۆگە ئۆتەلىسەم،گۈلقىزنىڭ ئۆيىدىكىلەرنىڭمۇ باشقا قارشى پىكرى چىقمىسا، سىلەر بىزنىڭ تويىمىزنى قىلىپ قويساڭلار ۋە ئۈرۈمچىدىن ئۆي ئىجارە ئېلىپ بەرسەڭلار بولاتتى. -بالام،ئۇ ئىشلارغا تېخى بىر يىل بار،بىر يىلغىچە نىمە ئىشلار بولىدۇ بۇنى خۇدادىن باشقا  ھېچكىم بىلمەيدۇ.شۇڭا ھازىر ئۇ ئىشنىڭ غېمىنى قىلماي ئوقۇشنىڭ غېمىنى قىلغىن.لېكىن شۇنى ئېسىڭدە تۇتقىنكى ئىككىڭلار بىر بىرىڭلاردىن زېرىكىپ ئايرىلىپ كەتمىسەڭلارلا دېگىنىڭدەك قىلىپ بېرىمەن.قىزنىڭ ئۆيىدىكىلەر  قارشى چىقمىسىلا مەن ئەلۋەتتە قوشۇلىمەن. -گېپىڭىز راست ھە؟ -ئەلۋەتتە راست! -ھەم تويۇمنى قىلىشقا،ھەم بىزنى ئالىي مەكتەپتە ئوقۇتۇشقا ئىقتىزادىمىز يار بېرەرمۇ؟! -بالام،ھەر قانداق ئىش ئاللاھنىڭ ئىلكىدە،ئاللاھ ئىرادا قىلغان ئىش ئۆز لايىقىدا،ئۆز يولىدا ۋە ئۆز يارىشىقىدا بولىدۇ.بۇنداق قاملىشىپ كەلگەن ئىشقا بەندە قىلچە زورىقىپ قالمايدۇ.ئۇنىڭ ئەكسىچە بولغان بولسا بەندە ھەرقانچە زورۇقسىمۇ بىرنى ئىككى قىلالمايدۇ.سەن ھازىرچە ئۇ ئىشلاردىن خاتىرجەم بولۇپ ئوقۇشۇڭنى ياخشى ئوقۇغىن.ئىشلار سەن دېگەندەك بولۇپ قالسا مەن سېنى ھەرگىز يەرگە قاراتمايمەن! ھە سەندىن بىر ئىشنى سورىسام بولامدۇ؟ -بولىدۇ دادا. -ئالدىنقى ھەپتىلەردە كونا تېلىفۇن نومۇرۇڭغا تېلىفۇن قىلىپ سەن بىلەن ئالاقىلەشكىلى بولمىدى.ئۇ تېلىفۇن ئۇلاندىيۇ لېكىن ئالىدىغان ئادەم چىقمىدى.كېيىن سەن بىزگە باشقا نومۇردىن تېلىفۇن قىلدىڭ. تېلىفۇنۇڭ يۈتۈپ كەتمىگەندۇ؟! -ياق،يۈتۈپ كەتمىدى. -ئەمىسە بۇ قانداق ئىش؟ -بىز تېلىفۇن كارتىمىزنى ئالماشتۇردۇق. -كىم بىلەن؟ -گۈلقىز بىلەن. -نىمىشقا؟ -كونا ساۋاقداشلىرى ۋە كەينىگە كىرىۋالغان بەزى بېزەڭ يىگىتلەر تولا تېلىفۇن قىلىپ گۈلقىزنى ئارامىدا قويماپتۇ.شۇڭا كارتىمىزنى ئالماشتۇردۇق. -ئۇنداقتا ئۇلار سېنى ئاۋارە قىلمىدىمۇ؟ -ئاۋارە قىلدى،ئەمما مەن ‹‹كەچۈرۈڭ،خاتا ئۇرۇپسىز،مەن بۇ كارتىنى يېڭىدىن بىجىرگەنتىم،بۇرۇنقى ئىگىسىنى تونىمايدىكەنمەن›› دەپ جاۋاپ بېرىپ يۈرۈپ ھەممىسىنى زېرىكتۈردۈم. -ئۇ قىز مېڭىشتىن بۇرۇن كۆرۈشكەنمىتتىڭلار؟ -شۇنداق،گۈلقىز  ئۈرۈمچىگە مېڭىشتىن بۇرۇن قەشقەر پويىز ئىستانسىسىدا كۆرۈشكەن ئېدۇق. -پۇل يوللۇق تۇتالىدىڭمۇ؟ -ياق،مەن بىر نامرات ئوقۇغۇچى تۇرسام، قانداقمۇ ئۇنداق قىلالايمەن.پەقەت ئاددىيغىنە سوۋغا بېرىپ ئۇزۇتۇپ قويدۇم. -توغرا قىپسەن،ئۇمۇ ئوقۇغۇچى بولغاندىكىن سېنى توغرا چۈشىنىدۇ.رەنجىمەيدۇ.ئەمدى سەن زېھنىڭنى يىغىپ پۈتۈن ۋاقتىڭنى ئوقۇشقا قاراتقىن.گۈلقىزمۇ،بىزمۇ سېنىڭ ياخشى ئوقۇشۇڭنى،ئەلا نەتىجە بىلەن نوقتىلىق ئالىي مەكتەپلەردىن بىرىگە ئۆتەلىشىڭنى ئۈمىد قىلىمىز.بۇنىڭ ئۈچۈن تېلىفۇندا ئاز سۆزلەش،سالامەتلىكىڭنى ئاسرا! داۋامى بار

Qabiljan

	شۇ سۆھبەتتىن كېيىن مەن خېلى خاتىرجەم بولۇپ قالدىم.ئەمما بىر ھەپتىدىن كېيىن يېڭى مەسىلە پەيدا بولۇپ يەنە بېشىمنى ئاغرىتىشقا باشلىدى.ئارىلىق يىراقلىقى يىراقلىق ئەمەس ئىكەن.ئاساسى مەسىلە كۆڭۈلدە بولىدىكەن.بۇرۇن گۈلقىز يۇرتتىكى چاغدا قەيسەر تېلىفۇندا  ھەرقانچە سۆزلەشسىمۇ ئايلىق سۆزلىشىش ھەققى 50-60 يۈئەندىن ئېشىپ كەتمەيتتى،مانا ئەمدى رايۇن ھالقىغان بولغاچقا  ئۇلارنىڭ ھەپتىلىك سۆزلىشىش ھەققىلا يۈز يۈئەندىن ئېشىپ كېتىپ ئوغلۇمغىمۇ،ماڭىمۇ ئىقتىسادىي بېسىم پەيدا قىلدى.قەيسەر مەن بەرگەن ھەپتىلىك تۇرمۇش خىراجەت پۇلىنى قىسىپ تېجەپ ئۇزۇن يوللۇق تېلىفۇن ھەققىگە تۆلەۋېرىپ،پۇلى ئاز قالغاندا تۇرمۇشتا قىينىلىپ،يە ماڭا قايتا پۇل دېيەلمەي  كۈندىلىك تۇرمۇشتا غورىگۈل يۈرۈپ قاپتۇ. شۇڭلاشقىمۇ بىر ئىككى ھەپتىدىلا بىر ئىككى يىل كېسەل تارتقان ئادەمدەك ياداپ، جۈدەپ كەتتى.كېيىن مەن بۇ ئەھۋالنى ئۇققاندىن كېيىن خېلى كايىپ ئۇزاق نەسىھەت قىلدىم،سۆزۈمگە ‹‹ماقۇل›› دېيىلسىمۇ ئەمەل قىلىنمىغاندىن كېيىن  نائىلاج ھەپتىلىك خىراجىتىنى 50يۈئەندىن يۈز يۈئەنگىچە ئاشۇرۇپ بېرىشىمگە توغرا كەلدى.شۇنداق قىلمايمۇ باشقا ئامالىم يوق ئېدى.چۈنكى ئارىلىىمىز يىراق،ھە دېگەندە تېلفنىنى مەن باشقۇرۇپ بېرەلمەيمەن –دە؟! بونداق كېتىۋەرسە ئوغلۇم ناچار ئوزۇقلىنىش سەۋەبىدىن كېسەلچان بولۇپ قېلىشى مۈمكىن ئېدى.ئۇنداقتا ھازىر ئۇنىڭدىن  ئايىغان پۇللۇرۇمنى دوختۇرخانىغا ھەسسىلەپ تاپشۇرۇپ بىر مەزگىل داۋالىتىشقا توغرا كېلىدىغاندەك قىلاتتى.تېلىفۇنىنى تارتىۋالاي دېدىميۇ ئۇنىڭ كاج مىجەزىنى بىلگەچكە ئىچ ئاغرىتىپ ئۇنداق قىلمىدىم. قەيسەرنىڭ يېنىدا بۇلتۇر 500يۈئەنگە سېتىۋالغان لىيەنشاڭ ماركىلىق تېلىفۇن بار ئېدى.بۇ ئوقۇش مەۋسۈمى باشلانغاندا ئۇ تېلىفۇنى ئۆزىگە يارىماي قالدى.سەۋەبى ئۇنىڭ تېلىفۇندا تورغا چىقىپ گۈلقىز بىلەن كىيۇ-كىيۇدا ياكى ئۈندىداردا ئالاقىلىشىپ تۇرۇش ئېھتتىياجىنى بۇ تېلىفۇن قامدىيالماي قالغان ئېدى.ئۇ ھەر كەلگەندە مېنىڭ يېنىمدىكى 1000يۈئەنلىك Lenovo A820Tتىپلىق3G  تېلىفۇننى سوراپ ئېلىپ ھەۋەس بىلەن ئىشلىتىپ كېتەتتى. بۇ ھالنى كۆرۈپ يەنە چىداپ بولالماي تېلىفۇنۇمنى ئۇنىڭ تېلىفۇنىغا ئالماشتۇرۇپ بەردىم.ئۇ قەۋەتلا خوش بولۇپ كەتتى.ئەمدى قاچانلا تورغا چىقىپ كىيۇ كىيۇنى ئاچسام ئۇنىڭ كىيۇ كىيۇسىنىڭ ئوچۇق تۇرغانلىقىنى كۆرەتتىم. ئۇنىڭ ھالىنى بىلىپ تۇرۇش ئۈچۈن مەن ھەركۈنى كەچتە ئۆيدىكى كومپىيۇتېر بىلەن تورغا چىقىپ قەيسەر بىلەن كىيۇ-كىيۇدا سۆزلىشىپ تۇردۇم: -بالام،قاچانلا قارىسام كىيۇ-كىيۇرۇڭ ئوچۇق تۇرىدۇ،سەن دەرس ۋاقتىدىمۇ تورغا چىقىپ ئاساسى زېھنىڭنى مۇھەببەتكە قارىتىۋالدىڭمۇ قانداق؟! -ياق دادا،تېلىفۇننى كىيۇ-كىيۇدا كېچە كۈندۈز ئېچىپ قويسا تور ھەققىگە كۆپ پۇل كەتمەيدۇ،مەن كۆچمە خەۋەرلىشىش كارتامنى ھەر ئايدا  300مىنۇت سۆزلەشكىلى بولىدىغان ۋە 300مېگا بايت تور ئېقىمى بىلەن تەمىنلەيدىغان قىلىپ ئاچتۇرۇۋالدىم.شۇڭا كۆپ پۇل كېتىشتىن ئەنسىرىمەيمەن.تور ئېقىمى كەڭرى يېتىدۇ. -تور ئېقىمى كەڭرى يەتكەن بىلەن سېنىڭ قىممەتلىك ئۆگنىش ۋاقتىڭ ئىسراپ بولۇپ كەتسە  ئۆگىنىشكە تېگىشلىك دەرسلەرنى ئۆگىنىپ بولۇشقا يەتمەي قالىدۇ.ئۇنداقتا كەلگۈسى ئىستىقبالىڭنى ئىسراپ قىلغان، بولمامسەن؟مەن تېلىفۇننى سېنى دەرسخانىدىمۇ تورغا چىقسۇن دەپ بەرمىگەن! -دادا،نىمانداق چۈشەنمەيدىغانسىز،مەن دەرسخانىدا ھەرگىز تورغا چىقمايمەن،مەكتىپىمىزنىڭ تۈزىمى بەك چىڭ.دەرسخانىغا ھەرگىز تېلىفۇن ئېلىپ كىرەلمەيمىز.ئېلىپ كىرسەكمۇ ھەرگىز ئالالمايمىز.ئوقۇتقۇچىلار دەرسخانىدا تېلىفۇن ئىشلەتكىنىمىزنى كۆرۈپلا قالسا ئۇنىڭ قانچىلىك قىممەت تېلىفۇن بولۇشىدىن قەتئىي نەزەر مۇسادىرە قىلىۋېلىپ ھەرگىز  قايتۇرۇپ بەرمەيدۇ. -ئۇنداقتا تېلىفۇننى قانداق چاغدا ئىشلىتەلەيسىلەر؟ -كەچلىك مۇزاكىردە مۇئەللىم كىرمىگەندە ياكى كەچلىك مۇزاكىردىن يېنىپ ياتاقتا ئارام ئالغاندا ئاندىن ئىشلىتەلەيمىز. -‹‹مىز››دەيسەنغۇ،باشقىلارمۇ سەندەك سەۋدايى بولۇپ كەتتىمۇ؟! -سىز ھازىرقى جەمىيەتنى چۈشەنمەيدىكەنسىز،قالغان ساۋاقداشلىرىم تولۇقنىڭ بىرىنچى يىللىقىدىن باشلاپلا ئۆز-ئارا مۇھەببەتلىشىشكە باشلىغان،مەن تېخى ئەڭ كىيىن  قالغىنى.‹‹ئۈرۈك ئۈرۈكنى كۆرسە ئالا بوپتۇ›› دېگەندەك جاھان، مۇھىت شۇنداق بولۇپ كەتكەندىكىن مەنمۇ شۇ خەقنى دوراپ قاپتىمەن. -ئۇنداقتا پۇشايمىنىڭ بار ئىكەندە؟ مەن سېنى ئوقۇتىمەن دەپ ئاۋارە بولغۇچە تولۇقسىزدىن ئاجرتىۋېلىپلا ئۆيلەپ قويۇپ ئېتىز ئىشلىرىغا ياردەملەشتۈرسەم، جاپايىمنى يېنىكلەتسەم بوپتىكەن! -خاپا بولمىڭە دادا،مەن شۇ سىزگە بەكلا ئامراق، سەمىمى بولغاندىكىن يېقىن،سىردىشىم،مۇڭدىشىم دادام دەپ،نېمىنى سورىسىڭىز ئىچىمدە بارنى دەپ سالىدىكەنمەن. -مەنمۇ مۇشۇ تەرىپىڭنى ياقتۇرىمەن،بوپتۇ ئۆتكەنگە سالىۋات،ئەمدى مىڭ قىلساقمۇ ئورنىغا كەلمەيدۇ. دېمەكچىمەنكى، بىزنىڭ سېنى نەقەدەر چوڭ ئارزۇ-ئارمانلار بىلەن ئوقۇتۇۋاتقانلىقىمىزنى،سېنى خىراجەتتە سۇندۇرۇپ قويماسلىق ئۈچۈن نەقەدەر كۆپ جاپا بىلەن پۇل تېپىپ ئەۋەتىپ بېرىۋاتقانلىقىمىزنى چۈشەنسۇن، ئۇنتۇپ قالمىسۇن دەيمەنغۇ؟ -دېمىسىڭىزمۇ بۇلارنى بىلىمەن دادا، مەن سىلەردىن بەكمۇ رازى،تولىمۇ مىننەتدار،ھەركىمنىڭ ئاتا -ئانىسى ياخشى بولار سىلەرچە بولار.مەن سىلەردەك مىھرىبان،كۆيۈمچان،سىردىشالايدىغان ئاتا-ئانام بولغىنىدىن،ماڭا ھەر جەھەتتىن ئەتراپلىق كۆڭۈل بۆلگىنىڭلاردىن پەخىرىلىنىمەن. داۋامى بار

Qabiljan

	ھەش-پەش دېگۈچە بىر ئاي ۋاقىت ئۆتۈپ كېتىپ ئۆكتەبىر ئېيىنىڭ دەسلىپىدىكى بىر ھەپتىلىك ‹‹ئالتۇن ھەپتىلىك دەم ئېلىش›› كەلدى.قەيسەرمۇ بۇ دەم ئېلىش مۇناسىۋىتى بىلەن ئۆيگە كېلىپ بىز بىلەن جەم بولدى.ئۇ ئۆيدە ئىككى كۈن تۇرۇپلا ‹‹م››ناھىيەسىگە بېرىپ چوڭ ئانامنى يوقلاپ كېلىمەن دەپ ماڭدى.مەن گۇمانلىنىپ: -گۈلقىز كەپتىمۇ؟،-دەپ سورىسام ئۇ: -ياق كەلمەپتۇ،ئارىلىق بەك يىراق تۇرسا قانداقمۇ كېلەلىسۇن!،-دېدى.شۇنىڭ بىلەن مەن ئەندىشىنى قويۇپ ئۇنىڭ يالغۇز بېرىشىغا قوشۇلدۇم.ئەسلىدە ئۇ مېنىڭ ئەگىشىۋېلىشىمدىن قورقۇپ يالغان ئېيتقان ئىكەن.ئۇ قىز بايرامدىن بىر كۈن بۇرۇنلا ئۆيىگە كەلگەن ۋە ئاللىقاچان قەيسەر بىلەن تېلىفۇندا خەۋەرلىشىپ بولغان ئىكەن.بىر ئايدىن بېرى بىر-بىرىنى تولىمۇ سېغىنىشقان بۇ ئاشىق-مەشۇقلار بۇ پۇرسەتتە دەخلىسىز بىر كۆرۈشۈۋېلىشنى پىلانلاشقان بولسا كېرەك. قەيسەر ئىككى كۈندىن كېيىن خۇشال-خورام ھالەتتە قايتىپ كېلىپ تاپشۇرۇقلىرىنى ئىشلەشكە كىرىشىپ كەتتى.ئۇنىڭ ياتاق ئۆيىدە بۇرۇن يوق ئىككى يېڭى نەرسە پەيدا بولۇپ قالدى.بۇلارنىڭ بىرى تېلىفۇنغا توك قاچىلاشقا ئىشلىتىلىدىغان usb ئېغىزلىق توك ساقلىغۇچ،يەنە بىرى بولسا ئەينەك خىرىستالدىن ئىنتايىن نەپىس ياسالغان  ئەينەكلىك قوشماق ئاققۇ ھەيكىلى ئېدى.بۇ نەرسىلەرنى كۆرۈپ گۈلقىزنىڭ ئۆيىگە كەلگەنلىكىنى، بۇ قىممەتلىك بۇيۇملارنى قەيسەرگە سوۋغا قىلغىلى ئالغاچ كېلىپ سوېغا قىلغانلىقىنى بىلدىم. ئوغلۇم بۇ ھەقتە  ئېغىز ئاچمىغان بولغاچقا ، مەنمۇ ئارتۇقچە گەپ سۆز قىلىشنى ئىشنىڭ سەۋەبىنى كوچىلاپ سوراشنى خالىمىدىم.بايراملىق دەم ئېلىش ئاخىرلىشىشقا ئىككى كۈن قالغاندا قەيسەر ماڭا ئېغىز ئېچىپ: -دادا،شەھەرگە بىر بېرىپ كېلەي دېگەن پۇل بولسا بەرگەن بولسىڭىز،-دەپ قالدى.مەن: -بايراملىق دەم ئېلىشىڭلار تېخى توشمىدىغۇ، يەنە ئىككى كۈن تۇرۇپ ۋاقىت توشقاندا تايىنلىق بىراقلا ماڭمامسەن؟،-دەپ سورىدىم.ئۇ خىجىل بولغان قىياپەتتە يەرگە قاراپ: -دادا،ئۆتكەن كۈنى سىزنى يەنە ئاۋارە بولمىسۇن دەپ يالغان ئېيتقان ئېدىم.ئەمەلىيەتتە گۈلقىز بايراملىق دەم ئېلىشتا ئائىلە يوقلاپ كەلگەن ئىكەن،ئۇ ماڭا 300كوي قىممىتىدە ئىككى دانە قىممەتلىك سوۋغا ئېلىپ كەپتۇ.ئاڭلىسام بۈگۈن قەشقەردىن  ئاپتۇبۇسقا ئولتۇرۇپ مەكتىپىگە قايتىپ كېتىدىكەن،شۇڭا مەنمۇ ئۇنى ئۇزىتىپ بېرىپ  خوش دېگەچ سوۋغىسىغا سوۋغا بىلەن جاۋاپ قايتۇراي دەيمەن. -بۇ گېپىڭ جايىدا،ئادىمىگەرچىلىككە ئادىمىگەرچىلىك بىلەن جاۋاپ قايتۇرۇش كېرەك.بولۇپمۇ قىزلارنىڭ ئادىمىگەرچىلىكىگە ئۇنىڭدىن ئاشۇرۇپ جاۋاپ قايتۇرۇش كېرەك.نەچچە پۇل بەرسەم يېتىدۇ؟ -500كوي پۇل بەرسىڭىز يېتەرمىكىن؟! -ئۇنىڭدىنمۇ ئارتۇقراق ئېلىۋالغىن،ئەھۋالغا قاراپ ئىش قىلارسەن. -ماقۇل،رەھمەت سىزگە دادا! مەن ئۇنىڭ قولىغا 800يۈئەن پۇل تۇتقۇزۇپ شەھەرگە يولغا سېلىپ قويدۇم.ئەتىسى قايتىپ كەلگىنىدە نىمە ئالغىنى،قانچىلىك پۇل يوللۇق تۇتقانلىقنى سۈرۈشتە قىلمىدىم. ئونىنچى ئاي تىنىچقىنە  ئۆتۈپ كەتتى،بۇ جەرياندا قەيسەرلەر تەرەپتە  باشقىچە ئەھۋال يۈز بەرمىدى، لېكىن بىز تەرەپتە  ئايالىم ساقسىز بولۇپ قېلىپ كېچىسى بەل ئاغرىقىنىڭ دەستىدىن ئۇخلىيالماي قىينىلىدىغان بولۇپ قالدى.ئايالىم دېھقان ئېدى،ئۆيىمىز يېزىدا بولغاچقا 15مو يەر تېرىپ پايدىلىناتتۇق.بۇ دېھقانلار ئۈچۈن كۈزلۈك يىغىمنىڭ تازا ئالدىراش پەيتى بولغاچقا شۇنداقلا كەنىتنىڭ تۈرلۈك سېلىقلىرى تۈپەيلى چۆنتىكىمىز ئوبدانلا قۇرۇقدىلىپ قالغان چاغ بولغاچقا ھە دېگەندە ئايالىمنى دوختۇرغا ئاپىرالماي قىينىلىپ قالدىم.يېزىلىق دوختۇرنانىغا كۆرسەتسەم دوختۇرلار: -بەل ئاغرىقى سەل قارايدىغان كېسەل ئەمەس،ئۇنىڭ سەۋەبىنى يۇقۇرى دەرىجىلىك دوختۇرخانىلاردا  ct ئاپاراتىغا سېلىپ تەكشۈرتۈپ ئاندىن بىلگىلى بولىدۇ.قەشقەرگە ئاپىرىپ تەكشۈرتۈپ كېلىڭلار!،-دېدى. شۇ گەپكە ئاساسەن ‹‹قەشقەرگە بارايلى›› دېسەم ئايالىم ئۇنىمىدى: -كۈزدىكى باياشاتچىلىق تۈگەپ يانچۇقىمىز خېلىلا بوشاپ قالدى.بۇنداق چاغدا دوخىتۇرخانىغا بېرىپ كېسەل تەكشۈرتىمىز،دورا ئالىمىز دېسەك بىرەر-ئىككى مىڭ كوي پۇل كېتىپ قالىدۇ.بۇنداق قىلساق قەيسەرگە ھەپتىمۇ ھەپتە بېرىدىغان تۇرمۇش خىراجىتىدىن قىسىلىپ قالىمىز.بىزغۇ ئۆيدە ئاچ-توق قالمايمىز،لېكىن قەيسەر قەشقەردە ساۋاقداشلىرى ئالدىدا نۇرمال پۇل خەشلەپ،ياخشى  تاماقلارنى ئېلىپ يېيەلمەي چېنىپ قالسا بولمايدۇ.بېلىمنىڭ ئاغرىقىغا ئوچاق چالمىسى بىلەن قىزىق ئۆتكۈزۈپ،يەرلىك ئۇسۇلدا دورا قىلىپ يۈرۈپ چىداپ كېتىمەن.بولدى،ئۇ گەپنى قىلمىسىلا! شۇنىڭ بىلەن قەشقەرگە بارماس بولدۇق.ئائىلە دېگەندە تۈرلۈك چىقىملار ئۆكسىمەيدۇ.بىر چىقىمنى تېجىگەن بىلەن ئىككىنچىسى چىقىدىكەن. ئىككى كۈندىن كېيىن قەيسەردىن تېلىفۇن كەلدى: -دادا،مەكتىپىمىز 3-يىللىق ئوقۇغۇچىلارنىڭ ئاتا ئانىلىرىغا ئاتا-ئانىلار يىغىنى ئاچماقچى ئىكەن،شەنبە كۈنى بىرەرسىڭلار كەلمىسەڭلار بولمايدىغان ئوخشايدۇ. -ماقۇل بالام،چوقۇم بارىمىز! -يىغىننى ئەتتىگەن سائەت سەككىزدىلا باشلايدىكەن،ئارىلىق يىراق،ئۈلگۈرۈپ كېلەلمەي قالارسىلەرمىكىن،شۇڭا بىر كۈن بۇرۇن كەلگەن بولساڭلار بوپتىكەن. -ئۇ تەرىپىدىن خاتىرجەم بول. ئايالىمنىڭ بىر ئىنىسى قەشقەردە  مەلۇم ئىدارىدە مەمۇرى خىزمەتتە ئېدى.جۈمە كۈنى چۈشتىن كېيىن ئايالىمنى جابدۇتۇپ،قولىغا 800يۈئەن پۇل تۇتقۇزۇپ قەشقەرگە يولغا سالدىم: -قەشقەرگە بېرىپ،كەچتە  ئىنىڭلارنىڭ ئۆيىدە يېتىپ، ئەتىگەنلىككە قەيسەرنىڭ مەكتىپىگە چىقىپ يىغىنغا قاتنىشىڭلار،يىغىن تۈگىگەندە قەيسەر سىلىنى كېرەمباغ دوختۇرخانىغا ئېلىپ چىقىپ بېلىڭلارنى تەكشۈرتۈپ قويسۇن.شۇ باھانىدا كېسەل سەۋەبىنى ئۇققاچ دوختۇرلار  دورا بەرسە دورىسىنى،مەسلىھەت بەرسە مەسلىھەتىنى ئېلىپ كېلىڭلار. شەمبە كەچ ئايالىم قەشقەردىن قايتىپ كەلگەندە ئۇنىڭدىن ئەھۋال ئۇقۇشتۇم: -قەيسەرنىڭ مەكتىپىدە بالىلارنىڭ ئاخىرقى يىللىق ئوقۇشى ۋە ئالىي مەكتەپ ئىمتىھانىنىڭ تەييارلىقى توغرىلىق مۇھىم يىغىن ئېچىلدى.مۇشۇ ھەپتىدىن باشلاپ ئۇلارغا ھەپتىسىگە ئالتە كۈن دەرس ئۆتۈلۈپ بۇرۇنقى دەرسلەر تەكرار قىلىپ بېرىلىدىكەن.ھەتتا قىشلىق تەتىلدىمۇ دەرس ئۆتۈلىدىكەن.بۇنىڭ ئۈچۈن بىزنى ماسلىشىپ بېرىشكە،بالىلارغا ئائىلە تەرەپتىن بېرىلىدىغان ئىددىيەۋى تەربىيەنى كۈچەيتىشكە،ھە دېسىلا ئۆيگە چاقىرتىۋالماي پات-پات مەكتەپكە كېلىپ بالىلارنى يوقلاپ ئىلھام مەدەت بېرىپ تۇرۇشقا چاقىرىق قىلدى. -يەنىچۇ؟ -ئۇلارنىڭ مەكتىپى ئالىي مەكتەپ ئىمتىھان كۈنىگە بولغان يۈكسەك دىققىتىنى ئىپادىلەش ۋە تەييارلىقلارغا تولۇق ئەھمىيەت بېرىش ئۈچۈن كۈنلەرنىڭ  تەتۈر سانىقىنى باشلاپتۇ.ئىمتىھانغا يەنە 200نەچچە كۈن قالدى دەيدۇ،سىنىپ دوسكىلىرىغىمۇ،مەكتەپنىڭ كۆرىنەرلىك جايلىرىغىمۇ تەتۈر ساناق ئورنى تەسىس قىپتۇ. ئوقۇتقۇچى-ئوقۇغۇچىلارنىڭ ھەممىسى ھۇشيار بولۇپ، ۋاقىتنى ئالتۇندەك بىلىپ، ئىمتىھان تەييارلىقىغا كىرىشىپ كېتىپتۇ. -بىزنىڭ قەيسەر قانداقراق،ئۇمۇ جىددىيلەشكەندەكمۇ ياكى خىيالىدا يوق يۈرەمدۇ؟! -ئۇمۇ ھۇشيار تۇرۇپتۇ،ياخشى ئوقۇۋېتىپتۇ،مۇئەللىم ئىمتىھان نەتىجىسىنى كۆرسەتتى،سىنىپنىڭ ئالدى بولالمىسمۇ،50نەچچە بالىنىڭ ئىچىدە يەتتىنچى بولۇپ مېڭىۋېتىپتۇ. -ھە ئۇنچىلىك بولسا مەيلىغۇ،لېكىن نەتىجەڭ بەك ياخشىكەن دەپ ماختىماڭلار،قانائەتلىنىپ قېلىپ چېكىنىپ كەتمىسۇن.مۇھەببەتكە بېرىلمىگەن،ئۆزىنى تۇتۇۋالغان بولسا بىرنچى بولالمىسىمۇ ئۈچىنچى بولسىمۇ بولۇپ ماڭغىچىلىكى بار بالىتتى،ھەتتىگىنەي! ھە، يىغىندىن كېيىن دوختۇرخانىغا چىقتىڭلارمۇ؟ -ياق چىقمىدىم. -نىمىشقا؟ -دوختۇرنىڭ چوڭراق كېسەل تېپىشىدىن،پۇل يېتىشتۈرەلمەي غەم ئۈستىگە غەم تېپىپ بېرىشىدىن ئەنسىرىدىم. -ئۇنداق بولمايتتى،دوختۇرلار  ئۆزى كېسەل پەيدا قىلىپ قويمايدۇ،بەلكى تەكشۈرۈش ئارقىلىق بار كېسەلنى ئېنىقلاپ تاپىدۇ.نىمە كېسەل ئىكەنلىكىنى بىلىۋالساق يەڭگىل بولسا يەڭگىلچە،ئېغىر بولسا ئېغىرچە چارە قىلمىساق بولمايدۇ.سىز ئاڭلىمىغانمۇ؟ كېسەل يەڭگىل ۋاقتىدا يۇۋاش بولىدۇ،ئاز پۇل،ئادەتتىكى دورا بىلەن ساقىيىدۇ،كېسەل يەڭگىل ۋاقتىدا سەل قاراپ ئېغىرلاشتۇرۇپ قويساق چىقىممۇ ئېشىپ كېتىدۇ،كېسەلمۇ ئاسان ساقايمايدۇ.بۇ بىزنى ئايىغىنىڭلا بولمايدۇ بەلكى بىزنىمۇ ئۆزۈڭلارنىمۇ قەستلىگىنىڭلا بولىدۇ.چاتاق قىپسىلە خوتۇن! -بالىنى،سىلەرنى ئويلاپ شۇنداق قىپتىمەن،خاپا بولماڭلا بولدى. -بىر ئوبدان پۇرسەتنى قولدىن بېرىپسىلە،بۇ ئەسلى مەن بارىدىغان يىغىن ئېدى،سىلىنىڭ كېسىلىڭلىنى دەپلا سىلىنى ئەۋەتكەنتىم.بوپتۇ ئەمدى،كېلەر ھەپتىگىچە ئىشتىن قولۇم بوشاپ قالسا ئۆزۈم بىللە ئاپىرىپ تەكشۈرتۈپ كېلەرمەن. داۋامى بار

Qabiljan

	بىر ھەپتىدىن كېيىنكى يەكشەنبىدە  قەيسەر بىلەن يەنە كىيۇ كىيۇدا پاراڭلىشىپ قالدىم: -دادا،سىزدىن بىر ئۆتۈنىشىم بار ئېدى،دېسەم بولارمۇ؟! -ھە قېنى دېگىن ئوغلۇم! -ئالدىمىزدىكى ھەپتىدىكى دەم ئېلىش كۈنىگە ئۈلگۈرۈپ ئۈرۈمچىگە بىر بېرىپ كېلەيمكىن دېگەنتىم،رۇخسەت بېرەمسىز؟ -نىمە قىلغىلى بارىسەن،گۈلقىز ئاغرىپ يېتىپ قاپتىمۇ؟! -ياق،ئۇ ساق.بىز كۆرۈشمىگىلى بىرەر ئايچە بولۇپ قالدى،ئۇ ھەر كۈنى ‹‹سىزنى بەك سېغىنىپ كەتتىم،غېرىپسىنىپ يىغلىدىم››دەپ ئۇچۇر قىلىدۇ.مېنىڭمۇ ئۇنى بەك كۆرگۈم كەلدى. -بالام،سىلەر كۆرۈشكىلى تېخى بىرنەچچە ھەپتىلا بولدىغۇ؟! نىمانچە چىدامسىز سىلەر؟ -مەنغۇ چىدايتتىم،بىراق گۈلقىز شۇنداق دېگەچكە مېنىڭمۇ بارغىم كېلىپ قالدى. -چىداڭلا بالام،كۈندۈزنىڭ كېچىسى،گۈلنىڭ تىكىنى،يازنىڭ قىشى بولغىنىغا ئوخشاش، مۇھەببەتنىڭمۇ ھىجرانى، ئازاپلىق كۈنلىرى بولىدۇ.بۇ ھىجران ۋە ئازاپلار خۇدا ئاشىقلارغا بەرگەن سىناقتۇر،رەھمەتتۇر.ئۇ مۇھەببەتنى پاكلايدۇ ۋە چېنىقتۇرىدۇ.ھىجران كۆرمىگەن،ئازاپ تارتمىغان،ياش تۆكۈپ باقمىغان مۇھەببەت خۇددى تەشتەكتىكى يۇمران گۈلگىلا  ئوخشايدۇ.بۇنداق مۇھەببەت بەكلا ئاجىز كېلىدۇ. ئازاپقا بەرداشلىق بېرەلمەيدۇ.سىناقتىن ئۆتەلمەيدۇ.شۇنىڭ بىلەن ئۆمرى ئۇزاققا بارمايدۇ.شۇڭا چىداڭلار،قەيسەر بولۇڭلار. چىدام ۋە سەۋر بىلەن پەقەت مۇشۇ بىر يىلنىلا ئۆتكۈزۈۋالساڭلار ئازاپلىق كۈنلىرىڭلار ئاخىرلىشىپ خۇشاللىق كۈنلىرىڭلار يېتىپ كېلىدۇ.‹‹جاپانىڭ كەينىدە راھەت›› دېگەن ناخشىدىكىدەك تارتقان ئازاپلىرىڭلارنىڭ راھىتىنى كۆرىسىلەر.شادلىق پەيزىنى سۈرۈپ، تۈگىمەس خۇشاللىقلارغا ئىگە بولىسىلەر. -ئۈرۈمچىگە بېرىشتىكى ھەقىقى مەقسەد ئۇ ئەمەس دادا! -ھە،ھەقىقى مەقسەد نېمە؟! -ئەسلى ئىش مۇنداق، مۇشۇ ئاينىڭ 15-كۈنى گۈلقىزنىڭ تۇغۇلغان كۈنى ئىكەن.ئۇ ھەپتىدىن بېرى ماڭا كۈندە تېلىفۇن قىلىپ :‹‹تۇغۇلغان كۈنۈمگە ئۈلگۈرۈپ ئۈرۈمچىگە كېلىپ بولۇڭ،تۇغۇلغان كۈنۈمنى بىرگە ئۆتكۈزەيلى!›› دەپ ھەر كۈنى سۈيلەپ كېتىپ بارىدۇ. -بەك چوڭ ئىش ئەمەس ئىكەنغۇ،ئۇنىڭ تۇغۇلغان كۈنى سېنىڭ ئىستىقبالىڭدىنمۇ مۇھىممىتتى؟! ئۇنداق كىچىككىنە ئىشقا ئاۋارە بولۇپ بارمىغىن! -نىمىشقا؟ -ئىككى سەۋەبى بار،بىرىنچى سەن ھازىر كۈنلەرنى تەتۈر ساناپ تۇرۇپ ئالىي مەكتەپ ئىمتىھانىغا تەييارلىق قىلىۋاتىسەن،سەن ئۈچۈن ھازىر نەچچە كۈن ئەمەس، بىرەر سائەت ۋاقىتمۇ ئالتۇندىن قىممەتلىك. شۇڭا بېرىشىڭغا بولمايدۇ.ئىككىنچىدىن ئائىلىمىزدە ھازىر پۇل قىس بولۇپ قالدى،سېنىڭ ئۈرۈمچىگە بېرىپ كېلىشىڭ ئۈچۈن كېتىدىغان بىرەر مىڭ كوي پۇلنى مەن چىقىرىپ بېرەلمەيمەن. -دادا،مەن سىزدىن بىرەر مىڭ كوي پۇل سورىمىدىم،پەقەت 500كويچە پۇل بولسىلا يېتەتتى. -يەتمەيدۇ بالام،سەن تېخى ئۈرۈمچىگە بېرىپ باقمىدىڭ،ئۈرۈمچى بىلەن قەشقەرنىڭ ئارىلىقى بىر يېرىم مىڭ كىلومېتىردىن ئاشىدۇ.بېرىش ئۈچۈن بىر كېچە كۈندۈز،كېلىش ئۈچۈنمۇ بىر كېچە كۈندۈز، جەمىئى يولغىلا 48 سائەت ۋاقىت كېتىدۇ.ئۇنىڭ ئۈستىگە ئۇ يەردە بىرەر ئىككى كۈن تۇرۇپ قالساڭ بىرەر ھەپتە ۋاقىت كەتتى دېگەن گەپ.بۇنچىۋالا كۆپ رۇخسەتنى مۇئەللىمىڭمۇ بەرمەيدۇ.ھەم 500كوي پۇلمۇ ساڭا بۇ سەپەردە سەي بولمايدۇ. -رۇخسەتنى شەمبە -يەكشەمبىگە توغرىلاپ،ئالدى كەينىدىكى ئىككى كۈننى قوشۇپ سورىسام مۇئەللىممۇ رۇخسەت بېرەتتى.پۇل مەسىلىسىگە كەلسەك،ئاپتۇۋۇزدا ماڭماي ئالدىن زاكاز قىلىپ  پويىز بېلىتى ئېلىۋالسام ئاپتۇۋۇزغا قارىغاندا كۆپ ئەرزان توختاپ 600كوي پۇل يېتىپمۇ قالاتتى. -بالام،سەن بەرىبىر بالىلىق قىلىۋاتىسەن.يەتمەيدۇ دېگەندىكىن يەتمەيدۇ.تۇغۇلغان كۈن دېگەننى بىر- ئىككى ئادەم يالغۇز ئۆتكۈزمەيدۇ،قىز بالا دېگەننىڭ دوستلىرى،ياتاقداشلىرى بولىدۇ.ئۇنىڭ ئۈستىگە چوڭ شەھەر دېگەننىڭ ئۆزىگە چۈشلۇق ھالى،يۇقۇرى ئىستىمال سەۋىيەسى بولىدۇ.ئۇ قىز ئولتۇرۇشنى بىرەر رېستۇراننىڭ ئايرىم خانىسىغا ياكى بىرەر كاتتا قورۇمىخىانىغا ئورۇنلاشتۇرۇپ دوستلىرىدىن 7-8نى چاقىرسا،بىر دانە تورت ۋە 5-6 خىل قورۇما ۋە تائاملارنى بۇيرۇتسا ئۇنىڭغا بىرەر مىڭ كوي پۇلمۇ يەتمەي قالىدۇ.ئۇ قىز ھەرقانچە باي،ھەرقانچە مەرت بولغان،ساڭا چىقىم قىلىش پۇرسىتى بەرمىگەن تەقدىردىمۇ سېنى ‹‹ئوغۇل دوستۇم›› دەپ تونۇشتۇرۇپ تۆرنىڭ كاللىسا ئولتۇرغۇزۇپ قويسا مەرتلىك كۆرسەتمەي،سورۇننىڭ پۇلىنى ئۆزۈڭلا ئۈستىڭگە ئالماي ئولتۇرالامسەن؟! بۇنداق قىلالماي تۇرۇپ بارغاندىن بارمىغىنىڭ ئەۋزەل. -ئەمىسە كۆپرەك پۇل بەرسىڭىزلا بولىدىكەنغۇ؟! -بالام،مەن بايا دېدىم،ئېسىڭدىن قاچقان بولسا كېرەك.كۈزدىكى باياشادچىلىق تۈگىدى.ئەمدى سېرىقتال كۈنگە قالدۇق.مېنىڭ مۇئاشىممۇ سېنىڭ خەجىڭ بىلەن ئۆينىڭ نورمال ئىستىمالىغا ئاران يېتىۋاتىدۇ.شۇڭا سېنىڭ ھەپتىلىك خىراجىتىڭنىمۇ تەستە ئۈلگۈرتۈپ تېپىپ بېرىۋاتىمىز.ھازىر بىزنىڭ ئۆيدە ‹‹كاناي ياغلىغىلى ياغ يوق،سۇناي ياغلىغىلى ياغ نەدە تۇرۇپتۇ›› دېگەن ماقالدىكىدەك ئەھۋال روي بېرىۋاتىدۇ. -كېپەز ساتقان پۇللار نەگە كەتتى دادا؟! -بالام،بانكا قەرزىنى تۆلەپتىمىز،ئۈچ چاقلىق موتسېكىلىت سېتىۋاپتىمىز،كەنىتتىكىلەرگە سۇ ھەققى،تاۋار يەر پۇلى،ھاشار پۇلى،باشقۇرۇش ھەققى دېگەندەك ھەقلەرنى تۆلەپتىمىز،سېنى ئوقۇتۇپتىمىز. شۇ چىقىملارغا  كېپەز ساتقان پۇللارنى بىر بىرلەپ  بېرىپ كەلسەم ئاخىرىدا قەرزىمىز ئېشىپ قاپتۇ.بىر ئۆي دېگەننىڭ ھەرە كۆنىكىنىڭ تۆشۈكلىرىدەك كۆپ چىقىملىرى بولىدىكەن بالام! -بىرەسىدىن قەرز ئالساقمۇ بولماسمۇ؟! -‹‹ھەممە يەردە قازاننىڭ قۇلىقى تۆت››دېگەندەك تۇققانلار بىلەن خوشنىلارنىڭ ھالىمۇ بىزدىن قېلىشمايدۇ بالام.ھازىر پۇل ساڭىلا ئەمەس بىزگىمۇ تازا زۆرۈر بولىۋاتىدۇ. -سىلەرگە پۇل نىمىگە زۆرۈر بولۇپ قالدى! -سورىمىساڭ بولاتتى،سېنىڭ غېمىڭنى ئاۋۇتمايلى دەپ دېمىگەنتۇق.ئەمدى دېمەي بولمىدى.ئاناڭ خېلى كۈنلەر بولدى ئېغىر كېسەل.ھەر كېچىسى بېلى ئاغرىپ تۈزۈك  ئۇخىيالمايدۇ. پۇل بولمىغاچقا  ئاناڭنىڭ كېسىلىنىمۇ داۋالىتالمايۋاتىمىز بالام. -ئۆتكەندە يىغىنغا كەلگەندە ماڭا ئۇ گەپنى دېمىگەنتىغۇ؟! -ئەسلى دېيىشى كېرەك ئېدى،مەن شۇ چاغدا ئۆزۈم كەلمەي شۇڭا ئاناڭنى ئەۋەتكەنتىم.ئۇ سەن  بىلەن دوختۇرخانىغا چىقىپ كېسىلىنى تەكشۈرتمەكچى،يەڭگىل بولسا دورا ئېلىپ قايتماقچى، ئېغىر بولسا ياتاققا ئېلىنىپ ياتاقتا ياتماقچى بولغان.لېكىن ئۇ ئۆينىڭ ۋە سېنىڭ غېمىڭنى قىلىپ ئۆزىنى ئۇنتۇپ گەپ سۆز قىلمايلا قايتىپ كەپتۇ. -بۇ بولماپتۇ،مەن ئانامنىڭ چىرايىدىكى سۇلغۇنلۇقنى كۆرۈپ شۇنچە ئەھۋال سورىساممۇ ‹‹بالام،ھېچگەپ يوق،بىراز چارچاپ قالغان بولسام كېرەك،ئۆيگە قايتپ بېرىپ بىرەر كۈن ئارام ئېلىۋالسام ياخشى بولۇپ قالىمەن›› دېسە راست دەپ ئىشىنىپتىمەن.بولدى،ئۈرۈمچىگە بارمىسام بارمىدىم.سىز ئەتىلا ئانامنى ئېلىپ قەشقەرگە كېلىڭ،ئۇنى چوڭ دوختۇرخانىدا ئۇستا دوختۇرلار،ئىلغار ئۈسكىنىلەردە تەكشۈرتەيلى، كېسىلى ئېنىقلانغاندىن كېيىن داۋالاتقۇزغۇدەك بولسا داۋالىتايلى. -بولىدۇ بالام،ئىنساۋىڭغا،بىزنى چۈشەنگىنىڭگە رەھمەت! مەن ئاناڭ بىلەن مەسلىھەتنى پۇشۇرۇپ، 2-3كۈن ئىچىدە ئۇنى ئېلىپ باراي. -ياق ،بۇنداق كېسەلنى كېچىكتۈرۈشكە قەتئىي بولمايدۇ،بۇنىڭ مەسلىھەتلەشكۈدەك يېرى يوق.سىز كەچكىچە پۇل تەييارلاپ ئانامنى ئەتىلا ئېلىپ كېلىڭ.داۋالىتىشقا توغرا كەلسە مال-چارۋىلارنى ساتساقمۇ،مەن ئوقۇشتىن توختاپ ئۆيدە ئىش قىلساممۇ بولىدۇ.قانچىلىك بەدەل كەتسىمۇ كەتسۇن،ئانامنى جەزمەن تېزراق داۋالىتايلى! قەيسەرنىڭ بۇنچىلىك تۈرگۈنلىكىنى ئويلىماپتىمەن،ئۇ ھەر كۈنى ماڭا تېلىفۇن قىلىپ سۈيلەپ يۈرۈپ ئاخىرى قەشقەرگە دوختۇرخانىغا بېرىش سەپىرىمىزنى تېزلەتتى.بىز ئۈچىنچى كۈنىلا يېتەرلىك پۇل تەييارلاپ قەشقەرگە باردۇق.قەيسەرمۇ ئوقۇتقۇچىسىدىن رۇخسەت سوراپ چىقىپ بىزنى ۋىلايەتلىك بىرىنچى خەلق دوختۇرخانىسى(كېرەمباغ دوختۇرخانىسى)غا باشلاپ باردى.بىز ئالدى بىلەن ئامبۇلتۇرىيەنىڭ ‹‹سۆڭەك كېسەللىكلىرى  تاشقى بۆلۈمى››دىكى ئۇيغۇر مۇتەخەسىسنىڭ يېنىغا كىرىپ كېسەل تەكشۈرتتۇق.دوختۇر ئايالىمنىڭ كېسەللىك ئەھۋالىنى بىر قۇر ئاڭلىغاندىن كېيىن: -بەل ئاغرىقىنىڭ نۇرغۇن سەۋەپلىرى بار.بەل ئومۇرتقىسىنىct ئاپاراتىدا تەكشۈرتۈپ بېقىڭلار، شۇندىلا بەلنىڭ نىمە سەۋەپتىن ئاغرىغانلىقى ئېنىقلىنىدۇ،-دەپ كۆرسەتمە  بەردى ۋە قوشۇلۇش پىكرىمىزدىن كېيىن تەكشۈرتۈشكە خەت يېزىپ بەردى.مەن بۇرۇن باشقىلاردىن ct تەكشۈرۈش ھەققىنىڭ بەك قىممەتلىكىنى ئاڭلىغان ئېدىم،لېكىن ئەمەلىيەتتە ئۇنچىۋالا قىممەتمۇ ئەمەس ئىكەن.بىز پەقەت 230يۈئەن پۇل خەشلەپلا ئايالىمنىڭ بەل ئومۇرتقىسىنى تەكشۈرتەلىدۇق.بىرلا يېرى تەكشۈرگەندىن تارتىپ نەتىجە چىققىچە 2-3 سائەت ساقلاپ تۇرۇشقا توغرا كېلىدىكەن.نەتىجىمۇ ئاخىرى چىقتى.ھېلىقى دوختۇر تەكشۈرۈش نەتىجىسىنى كۆرۈپ چىقىپ: -ئەنسىرىمەڭلار،ئانچە چوڭ مەسىلە يوق ئىكەن،-دېدى.مەن: -زادى نىمە كېسسەل ئىكەن،ئايالىم بالنىستىدا يېتىپ داۋالىنامدۇ ياكى دۇرا- ئوكۇل بىلەنلا ياخشلىنىپ كېتەمدۇ؟-دەپ سورىدىم.دوختۇر: -يىنىك دەرىجىدىكى بەل ئۇمۇرتقا تەخسىسى پولتىيىپ چىقىپ قېلىش كېسىلى ئىكەن.ياتاقتا يېتىش ھاجەتسىز،مەن دورىلىق چاپلاق ۋە قوشۇمچە دورا  يېزىپ بېرەي، شۇنى ئىشلەتسەڭلار ياخشى بولۇپ كېتىدۇ،-دوختۇر شنداق دەپ   正伤消痛膏 ناملىق چاپلاقنى ۋە 腰痛宁胶囊ناملىق دورىنى يېزىپ بەردى.بىز دوختۇرخانا ئالدىدىكى دۇرا ماگىزىنىدىن بۇ ئىككى خىل دۇرىدىن 850يۈئەنلىك سېتىۋېلىپ، قەيسەرگىمۇ بىر ھەپتىلىك تۇرمۇشىغا يەتكۈدەك پۇل بېرىپ ئۆيگە قايتىپ كەتتۇق. بۇ دۇرا ۋە چاپلاقنى بىر ھەپتىچە ئىشلەتكەندىن كېيىن ئايالمنىڭ كېسىلىدە خېلى ياخشىلىنىش بولۇپ كېچىسى بېلى ئاغرىمايدىغان،بۇرۇنقىدەكلا  ياخشى ئارام ئالالايدىغان بولدى. داۋامى كەچتە يوللۇنىدۇ.

Gvlmisal

	ياقتۇرۇپ ئوقۇدۇم.داۋامىنى تولۇق ئوقۇپ بولغاندا ئاندىن باشقا  مەزمۇندا ئىنكاس يازارمەن.

yingihayat

	ئەسىرىڭىزنى تۇلۇق كۆرۈپ چىقتىم ،سىز ئەدەبىي ئەسەر تۇرمۇشتىن ئېلىندۇ دەپسىز ،ئەمما ئەسرىڭىزدە توقۇلما جىقلاپ  كېتىپ تۇرمۇشتىن ئايرىلىپ قاپتۇ،ئەسرىڭىزدە ئەكىس ئەتكىنى ئۇيغۇرنىڭ تۇرمۇشى ئەمەس بەلكى كورىيانلانىڭ ھىندىلانىڭ تۇرمۇشى بۇلۇپ قاپتۇ ،بىزدە ئېتىقاد دەيدىغان نەرسەبار ،ئېتقادىمىز ئەسرىڭىزدىزدە تەسۋىلەنگەندەك ھالغا چۈشۈپ قالمىدى بۇلۇپمۇ يېزىلىرىمىزدا، مەنمۇ ئەتراپىمدا ھەقىقى يۈزبەرگەن ۋەقەنى سۆزلەپ بېرە بىزنىڭ مەھەللىدىكى بىرقىز بالا ئەسرىڭىزدىكىدەك مۇھاببەتكە ئاشىق بولغان ئۈيىدىكىلىرئۇقۇپ تەربىيەقىلىپ باقتى ،قىز ئۆزسەنىمىگە دەسسەپ يۈرىۋەردى ،كېيىن قاتىقراق  قىلىپ يەنەشۇنداق قىلىپ يۈرىدىغان  بولساڭ ئوشوقىڭنى چېقىۋىتىپ ئۆيدەباقىمىز سېنى دەپ بىرقانچە قېتىم تىزگىلەپ باقتى، قىزبۇنىڭغا ئۇنىماي يۈرىۋەردى تۇلۇقنىڭ ئاخىرقى مەۋسەمى قالغاندا ئۈيدىكىلىرى قىزنى تۇختىتىۋالدى ،قىز شۇيىگىت بىلەن توي قىلمىسام ئۆلىۋالمەن دەپ يۈردى، ئۈيدەكىلىرئۇقىزنى بىرەريىلدەك ئۆيىدىن چىقاتماي بېقىپ باشقا بىرسىگە ياتلىق قىلىۋەتتى... مىنىڭ دېمەكچى بولغىنىم بىزنىڭ ئاتا_ئانىلىرىمىز ئۇدەرىجىدە ھەمىگەيول قويىۋەرمەيدۇ،بىزلەرمۇ دادىمىزغا ھەرقانچە يېقىن بولساقمۇ ئۇنداق ئەركىن ئېغىز ئېچىپ كېتەلمەيمىز... ئەسرىڭىزنىڭ ئاخىرىنىڭ ياخشى چىقىشىغا تىلەكداشمەن...