يېڭى ھايات

ئاپتورى:ئورخان پامۇك

باھاسى:20.00

2008-يىلى 7-ئاي1- نەشرى

2008-يىلى 7-ئاي 1-بېسىلىشى

تىراژى:0001-4000

ISBN:9787105091898

«يېڭى ھايات» رومانى ھەققىدە

“بىر كۈنى بىر كىتاب ئوقۇدۇم ، شۇنىڭدىن باشلاپ پۈتۈن ھاياتىم ئۆزگەردى.“

ئورخان پامۇكنىڭ جۇشقۇن ، لىرىك ۋە سېھىرلىك رومانى «يېڭى ھايات » مۇشۇ جۈملە بىلەن باشلىنىدۇ. ئۇ ئوقۇغان كىتابىدىن زىلزىلىگە كېلىپ ئۇنىڭغا ئەسىر بولغان ، كىتاب بەتلىرىدىن ھەر دەم چېچىلغان نۇرغا پۈتۈن ھاياتىنى بېغىشلىغان ۋە كىتابتا تەسۋىرلەنگەن يېڭى ھاياتىنى قوغلاشقان بىر قەھرىماننىڭ ئاجايىپ ھېكايىسىدۇر ، ئۇ كىتابنىڭ سېھرىي كۈچىگە سەۋدايىلارچە بېرىلىدۇ ، بىر قىزغا ئاشىق بولىدۇ ، ئۇنىۋېرسىتېت ھاياتىدىن يېراقلىشىدۇ ، ئىستانبۇلدىن ئايرىلىپ ، ئاپتوبۇس بىلەن ئۇزۇن سەپەرگە چىقىپ ، چەت شەھەرلەرنى كېزىدۇ . ئۇنىڭ بىلەن بىرلىكتە رومان ۋەقەلىكىگە ئىچكىرىلەپ كىرگەن ئوقۇرمەن باش پېرسوناژ ئوقۇغان سېھىرلىك كىتابقا ئەمەس ، ئۆز بېشىدىن ئۆتكەنلەرگە دىققەت قىلغاچ ئۆزىمىزگە خاس بىر قايغۇ – ئەلەمنىڭ ۋە شىددەتلىك تۇيغۇنىڭ نەق مەركىزىدە ئۆزىنى كۆرىدۇ . رەڭسىز تېلېۋىزورى بار قەھۋەخانىلارغا ، ۋىدىيوسى ئاپتوبۇسلارغا ، قاتناش ۋەقەلىرىگە ، سىياسىي سۇيىقەست ۋە جىنايەتلەرگە ، بايلار تەشكىلاتىغا ، ئاقماس نەزەرىيىلەرگە ، سەزگۈر مۇخبىرلارغا ، يوقالغان كونا نەرسىلەرنىڭ ئىلھام تىۋىشلىرىغا ، چەت جايلارنىڭ ھەسرەت – خاپىلىقلىرىغا قەدەر كەتكەن بۇ ئاجايىپ سەپەر ئورخان پامۇكنىڭ مودېرنىزم دۇنياسى رومانچىلىقىنىڭ ئەڭ خاسلىققا ئىگە يازغۇچىلىرىدىن بىرى ئىكەنلىكىنى يەنە بىر قېتىم ئىسپاتلايدۇ . بۇ بىر تەرەپتىن ، ھاياتنىڭ تەڭداشسىز پەيتلىرىنىڭ ، ئۆلۈمنىڭ ، ئەسەرنىڭ ھادىسىنىڭ سىرلىرىغا ، بىر تەرەپتىن بالىلىققا ئائىت رەسىملىك رومانلارغا بىر كۆرۈنۈپ ، بىر يوقايدىغان پەرىشتىگە ، دانتې نىڭ ، رىلكې نىڭ شېئىرلىرىغا قۇچاق ئاچقان ئۆزگىچە بىر رومان .

بىزگە خاس قايغۇ – ھەسرەتنىڭ ۋە شىددەتلىك تۇيغۇنىڭ مەركىزىگە سەپەر قىلغان رومان .

«يېڭى ھايات» كىشىگە ۋالتېر بېنجامىن نىڭ :بارلىق ئۇلۇغ ئەدەبىي ئەسەرلەر بىر شەكلىنى ئاخىرلاشتۇرىدۇ ياكى يېڭى بىرىنى باشلىتىدۇ ، يەنى ئۇلار ئۆزگىچە ۋەقەلەردۇر ، دېگەن سۆزنى ئەسلىتىدۇ. «يىڭى ھايات» ئۆزگىچە بىر ۋەقە.

ئەنگلىيە.

ئاپتور ھەققىدە

ئورخان پامۇك 1952-يىلى ئىستانبۇلدا تۇغۇلغان ، نىشانتاش تا «جەۋدەت بەگ ۋە ،ئۇنىڭ ئوغۇللىرى» ، «قارا كىتاب» ناملىق رومانلىرىدا تەسۋىرلەنگەن ئائىلىدە چوڭ بولغان ؛ نيۇ – يوركتا ئۆتكۈزگەن ئۈچ يىلنى ھېسابقا ئالمىغاندا ، ئاساسەن ئىستانبۇلدا ياشىغان ؛ ئوتتۇرا مەكتەپنى روبېرت كولىژىدە ئوقۇپ پۈتتۈرگەندىن كېيىن ئىستانبۇلدا تېخنىك ئۇنىۋېرسىتېتنىڭ ئاخباراتچىلىق ئىنستىتۇتىنى پۈتتۈرگەن . بالىلىق ۋە ياشلىقىدا رەسسام بولۇشنى ئويلىغان پامۇك 1974-يىلىدىن باشلاپ رەسمىي ھالدا يېزىقچىلىققا كىرىشكەن . ئۇنىڭ تۇنجى رومانى «جەۋدەت بەگ ۋە ،ئۇنىڭ ئوغۇللىرى» 1979-يىلى «مىللەتلەر نەشرىياتى رومان مۇكاپاتى» غا ئېرىشكەن . ئۈچ ئەۋلاد ئىستانبۇللۇق بىر سودىگەر ئائىلىسى ھېكايە قىلىنغان بۇ كىتاب 1983-يىلى «ئورخان كامال رومان مۇكاپاتى» غا ئېرىشكەن . شۇ يىلى تۇنجى نەشر قىلىنغان «جىمجىت ئۆي» رومانى 1984-يىلى ”مادارلىق رومان مۇكاپاتى“ غا ۋە بۇ كىتابنىڭ فرانسىيىدە چىققان تەرجىمىسى 1991-يىلى ”ياۋروپا ئىجادىيەت مۇكاپاتى“ غا ئېرىشكەن . 1985-يىلى نەشر قىلىنغان ، ۋېنېتسىيلىك بىر قۇل بىلەن ئوسمانلى ئالىمى ئارىسىدىكى ئىشلار بايان قىلىنغان تارىخىي رومان «ئاق قەلئە» پامۇكنى دۆلەت ئىچى سىرتىغا تېخىمۇ كەڭ تونۇتقان .«نيۇ-يورك ۋاقىت گېزىتى » “شەرقتە بىر يۇلتۇز پارلىدى“ دەپ مەدھىيىلەنگەن بۇ كىتاب ياۋروپادىكى ئاساسلىق تىللارنىڭ ھەممىسىگە تەرجىمە قىلىنغان . 1990-يىلى نەشر قىلىنغان «قارا كىتاب» مۇرەككەپلىكى، مەزمۇنىغا بايلىقى ، پىكىرنىڭ موللىقى بىلەن ھازىرقى زامان تۈرك ئەدەبىياتىدا ئەڭ كۆپ مۇنازىرە قوزغىغان ۋە ئەڭ كۆپ ئوقۇلغان رومانلارنىڭ بىرىدۇر . پامۇك 1992-يىلى ئۆمەر كاۋۇر رىژىسسورلۇق قىلغان «سىرلىق چىراي» فىلىمىنىڭ سېنارىيىسىنى كىتاب قىلىپ نەشر قىلدۇرغان . ئاجايىپ سېھىرلىك بىر سېھىرلىك بىر كىتابقا ئەسىر بولغان ستۇدېنت ياشلارنىڭ ھېكايىسى بايان قىلىنغان «يېڭى ھايات » رومانى 1994-يىلى نەشر قىلىنغاندا تۈرك ئەدەبىياتى ساھەسىدە زىلزىلە پەيدا قىلغان ۋە تۈركىيە تارىخىدا تېز سۈرەتتە سېتىلغان كىتاب بولۇپ قالغان . ئۇنىڭ 1998 – يىلى نەشر قىلدۇرغان ئوسمان ئىمپېرىيىسى نەققاشلىرىنىڭ ھاياتى ۋە سەنئەت ئەسەرلىرى ھەققىدىكى «مىنىڭ ئىسمىم قىزىل» ناملىق تارىخىي رومانى پەۋقۇلئاددە تەسىر قوزغىغان ؛ 2001-يىلى كۆپلىگەن دۆلەتتە نەشر قىلىنغان بۇ كىتاب شۇ دۆلەتلەردە شۇ يىللىق ئەڭ ياخشى چەت ئەل كىتابى سۈپىتىدە قارشى ئېلىنغان . پامۇك ياشلىق دەۋرىدىن تارتىپ يازغان خاتىرىلىرى ، گېزىت ژۇرناللارغا بېسىلغان ماقالىلىرى ، مەشىق ئەسەرلىرى ، ئوبزورلىرى ، خەۋەرلەر ۋە ساياھەت خاتىرىلىرىدىن ئەستايىدىل تاللانغان ئەسەرلىرىنى ، ئىلگىرى ئېلان قىلىنمىغان «دېرىزىدىن قاراش» ناملىق ئۇزۇن ھېكايىسىنى 1998-يىلى«باشقا رەڭلەر»ناملىق كىتاب قىلىپ جەملىگەن.2002-يىلى پامۇك كارس تا يۈز بەرگەن مۇھەببەت ۋە سىياسىي ئىشلار بىلەن مۇناسىۋەتلىك «قار» ناملىق رومانىنى نەشر قىلدۇرغان . ئورخان پامۇكنىڭ كىتابلىرى 40 نەچچە خىل تىلغا تەرجىمە قىلىنغان .

ئۇ ئەدەبىيات ساھەسىدە قازانغان ئاشۇنداق مول نەتىجىلىرى بىلەن 2006-يىللىق نوبېل ئەدەبىيات مۇكاپاتىغا ئېرىشتى . شۋېتسىيە ئەدەبىيات ئاكادېمىيىسى ئورخان پامۇكقا ”ئۇ ئۆز دىيارىدىكى غېرىب روھىنى ئىزدەش داۋامىدا مەدەنىيەتلەر ئوتتۇرىسىدىكى توقۇنۇش ۋە گىرەلىشىپ كەتكەن يېڭى سىمۋولىنى بايقىغان ”دەپ باھا بەردى.