قوشاق يىغىمەن.

ubul0998

	كېپىنەك بۇلۇپ ئۇچارسىز، گۈل-غۇنچىگە قۇنارسىز. غېرىپ بۇلۇپ قالسىڭىز، مېنى ئەسلەپ قۇيارسىز. سېرىق ھەرە توپلۇشۇپ، تاللاپ يەيدۇ ئۈزۈمنى. سەن مېنىڭ يارىم تۇرۇپ، ئاڭلىمايسەن سۆزۈمنى. دولان دەريا سۇلىرى، بۇ يىل يەنە تاشقىدەك. كىشىلەردىن ئاڭلىسام، يارنىڭ كۆڭلى باشقىدەك. ئېرىقتىكى لاي سۇنى، باشلىمىغىن ئۇ قاشقا. مەيلىڭ بولسا كەل يارىم، ئۆمۈر بويى ئويناشقا. ۋاي قاغىلار، قاغىلار، تاغقا بارماي قايتىڭمۇ؟ ئۆزى كەتكەن نادانلار، بىزنى يەنە تاپتىڭمۇ؟ يارىم كۆڭلەك كېيىپتۇ، ياڭزا-ياڭزا تاۋاردا. ئاخشاملىققا چىق يارىم، سېنى كۈتەي تالادا. ئەتلەس كۆينەك كېيىپسەن، تۇپا قونمىسۇن دەيمەن. ماڭا كەلگەن دەرد-ئەلەم، ساڭا كەلمىسۇن دەيمەن. ئاۋارىمەن، ئاۋارە، يار دەردىڭدە ئاۋارە. ماڭا قىيا باقمايسەن، يۈرەك-باغرىم مىڭ پارە. يالاڭباشتاق بولۇپ قاپسەن، چىگەرگە ياغلىقىڭ يوقمۇ؟ غېرىپ-مىسكىن بۇلۇپ قاپسەن، يۈرۈشكە ئامرىقىڭ يوقمۇ؟ مەن بۇ يەردە ناخشا ئېيتسام، سەن ئۆيۈڭدە تىڭشايسەن. سەن ئۆزۈڭ جۇۋان خۇتۇن، قاچان قىزغا ئوخشايسەن. تام تۈۋىدە ئولتۇرۇپ، تام باستىمىكىن يارنى. چىرايى سارغىيىپ قاپتۇ، غەم باستىمىكىن يارنى. دەردىڭنى ماڭا ئېيتساڭ، سېنىڭ ھالىڭغا مەن يەتسەم. ئۆزۈمنىڭ ئىلكىدە بولساڭ، باياۋانلارغا ئېلىپ كەتسەم. ئېگىز تاغقا مەن چىقىپ، يول تېپىپ چۈشەلمىدىم. چىرايىڭغا كۆيدۈم كۆپ، ساڭا ئېرىشەلمىدىم. يارىمنىڭ قارا چېچى، چۈشۈپتۇ زاڭاقىغا. يارنىڭ دەردىدە يىغلاپ، ئۆلەيمۇ فىراقىغا. قولىدا چىكەن ياغلىق، يار كەتتى يىراقلىشىپ. بىر سائەت ياتارمەنمۇ، يار بىلەن قۇچاقلىشىپ. يارىمغا ساراي سالسام، گۈل بىلەن مۇنار سالسام. ئۆزى بىلسە بولمامدۇ، ھەر قانچە گۇناھ قىلسام. قېشىڭىزنىڭ قارىسىنى، قارا- خەتكە ئوخشىتاي. ئەتە ئاخشام چىقمىساڭ، خۇيۇڭنى كىمگە ئوخشىتاي. بۇلبۇل سايرىدى كەتتى، كاككۇك سايرىدى كەتتى. سىز يارىمنىڭ دەردىدە، يۈرىكىمگە ئوت كەتتى. ئاق ئالمىنىڭ شاخلىرى، ئېگىلىدۇ ئېگىز-پەس. سىز يارىمنىڭ ئوتلىرى، كۆيۈپ تۇرار پەسلىمەس. باغدا ئالما شېخىدا، بۇلبۇل تولا سايرايدۇ. يارىم سىزنى كۆرگەندە، يۈرەكلىرىم يايرايدۇ. بېشىڭدىكى دوپپاڭنىڭ، تۆپىلىكى شايىكەن. كېلىڭ يارىم ئوينايلى، گۈلنىڭ تۈۋى سايىكەن. ئاسماندىكى ئايىمسىز، چەينەكتىكى چېيىمسىز. دوڭبۇيى يېزا ئىچىدە، تاللاپ سۆيگەن يارىمسىز. ئېگىز تېرەك بويىدا، بۇلبۇل ئويناپ سايرايدۇ. سىزگە كۆيگەن يۈرەكتە، چۈگۈن قويسا قاينايدۇ. ئالما ئاتقۇم كېلىدۇ، چالما ئاتقۇم كېلىدۇ. يارىم بىلەن ئايرىلماي، كۈندە ياتقۇم كېلىدۇ. سائىتىمنىڭ چوڭ تىلى، بەلگىلەيدۇ مىنۇتنى. ھېچقانداق ئۈزەلمىدىم، سىز يارىمدىن ئۈمىدنى. ئۆيىڭىزدە مەرىگەن، ئوغلاقمىدى، قويمىدى. سىز بىزدىن قاچقان بىلەن، سىزگە يۈرەك تويمىدى. سۈزۈك سۇنىڭ تېگىدە، ئالىچىپار تاش. يۈرىكىمنى كۆيدۈرگەن، جېنىم قارا قاش. جىزىلگۈلنىڭ چېچىكىنى، ئوتقا سېلىپ قۇرۇتاي. سەن يارىمنىڭ گەپلىرىنى، قانداق چاغدا ئۇنۇتاي ئالمىلىق باغقا كېرىپ، ئالما ئاتقان قارا كۆز. تال چىۋىقتەك ئېگىلىپ، جاننى ئالغان قارا كۆز.

qaplin

	باغرا بۇيلۇق يولىدا ئالتە مۇجاڭ پەن تاتۇر كونا مۇنبەر دەردىنى يىڭى مۇنبەر تەڭ تاتۇر مۇنبەر دەپ ئادا بولدۇم غەمگە مۇپتىلا بولدۇم بىر كۆرۈپ مۇنبەرلەرنى ئاشىق بىقارار بولدۇم قۇشقاچ دگەن جانىگەر دان بار يەردە توختايدۇ مىسرانمىنىڭ قىزلىرى قىزىلگۈلگە ئوخشايدۇ دان بەرسىڭىز شۇ قىزغا سىزنى پات-پات ماختايدۇ ماختاپ قويسا ھالى چوڭ ئەيبىنى ئاچسا قاقشايدۇ  [s:181]  [s:181]

ubul0998

	ئاقسۇنىڭ يوللىرىدا، كۆرۈپ قالدىم ھەر تاشنى. باغرىمغا باساي دەيمەن، ئاشنامنى ـ قەلەمقاشنى. ئالتە قاغا، يەتتە قاغا، قوندى تېرەككە. يىراقتىكى يارنىڭ ئوتى، تەگدى يۈرەككە. قىش پەسلى كېلىپ قاپتۇ، دەريا ياقىسى توڭلاپ. يۈرىكىمگە ئوت كەتتى، يارنىڭ ئۈنىنى ئاڭلاپ. بۇ يولچە ماڭماسمەن دەپ، ماڭدىم پىيادە. يار ساڭا تولا كۆيدۈم، ئاندىن زىيادە. كەپتىرىم كۆرۈنمەيدۇ، كەپتەرۋاز تۇتۇۋالدى. غۇنچە بويلۇق قاشا قاش، كۆڭلۈمنى ئۇتۇۋالدى. تاڭ سەھەردە باغقا كەل، مەي باغلىغان ئۈزۈم بار. ئۈزۈم بارىڭى ئاستىدا، ساڭا ئېيتتار سۆزۈم بار. مەن ئاۋاتقا ماڭغانتىم، تاپىنىمغا تاش پاتتى. ئارلىقىمىز يىراقكەن، كۆرۈشەلمەي باش قاتتى. كۆرۈشكەندە ئالدىراپ، ئېيتىپ سالدىم بىر سۆزنى. ئۇخلىغاندا چۈشۈمدە، سۆيدۇم سەن قارا كۆزنى. تۇخۇم كۆمدۈم ئۇچاققا، ئېتىلغاندۇ بۇ چاغقا. يىراقتىكى شۇ يارىم، سېغىنغاندۇ بۇ چاغقا. دەريادىكى بېلىقلار، ئوينار سۇغا چۆمۈلۈپ. يارىم سەندىن ئايرىلىپ، كەتتى باغرىم بۆلۈنۈپ. ھۆل ئۇچاققا ئوت قالاپ، يۈزلىرىم قارا بولدى. يارىمنى تولا ئويلاپ، يۈرىكىم يارا بولدى. ئاخشىمى قاراڭغۇدا، بەلگە قىلىمەن جاينى. يار يادىمغا يەتكەندە، ئىچمەي قۇيىمەن چاينى مەن يارىمغا خەت يازسام، باتۇر بىلەك تالمايدۇ. يارنى بىر كۆرۈپ ئالسام، مەندە ئارمان قالمايدۇ. دەرياغا كۆۋرۈك سالدىم، يارىم كەلسە ئۆتسۇن دەپ. مەن يارىمغا خەت يازدىم، مېنى ئەسلەپ تۇرسۇن دەپ. باردىم دەريا كەچكىلى، ئولتۇردۇم سۇ ئىچكىلى. مەن يارنى سېغىنغاندا، قاناتىم بولسا ئۇچقىلى. يېڭى باغدا يېمىش يوق، كونا باغدا شاپتۇل يوق. سېنى ئويلاپ غەم باستى، كېچە-كۈندۈز ئۇيقۇ يوق. يارىم يىراققا كەتتى، كەينىگە يانارمىكىن. سوغۇققىنە سۇ بەرسە، يۈرىكىم قانارمىكىن. دەردكە دەرمان بولغىدەك، بىر ئاداشىم يوق مېنىڭ. سورىغىدەك ھالىمنى، قارا قاشىم يوق مېنىڭ. تۇخۇ ئۇخلاپ قالسىمۇ، تاڭ سۈزۈلۈپ ئاتمايدۇ. يارنى يار سېغىنغاندا، ناخشىسىغا قاتمامدۇ؟ باغدا بۇلبۇل سايرايدۇ، قىزىلگۈلگە قونسام دەپ. ياتسام ئۇيقۇم كەلمەيدۇ، سىز يارىمنى سۆيسەم دەپ. ئەجەپمۇ ياراشىپتۇ، ئالا ئاتنىڭ تۇمارى. كېچە بولسا ئۇيقۇ يوق، سىز يارىمنىڭ خۇمارى. ئازنا كۈنى چۈش كۆردۈم، چىرايلىقىم كەلدى دەپ. سەكرەپ قوپتۇم ئورنۇمدىن، ئاھ!...يۈرىكىم كۆيدى دەپ. ھويلاڭدىكى تۇنۇردا، يۇلغۇن ئوتى كۆيۈپتۇ. مېھىربان يار سۆزلىرى، يۈرىكىمدە تۇرۇپتۇ. يارىم كېلۇر گۈل قىسىپ، شىپۇن ياغلىق بېشىدا. يار مېنى سېغىنغاندا، بىللە بولسا قېشىمدا.

ubul0998

	يولنى سالدىن تاغلاققا، گۈلنى ئۈزدۈم ياغلىققا. كۈندە قاراپ تويمىدىم، سىز يارىم چىرايلىققا. ئاققىنا كەپتەر بۇلۇپ، كەپتەرخانىدا سايرىسام. ئەتىگەن سەھەر تۇرۇپ، ماڭغان يولۇڭغا قارىسام. سايراپ-سايراپ ھارمىدى، بىزنىڭ باغدا سېغىزخان. سەن ئۇ يەردە سېغىنساڭ، مەن بۇ يەردە سېغىنغان. ئالما سۇندۇم قولۇڭغا، شايى كىيگەن بويۇڭغا. ئۈچ كۈن بولدى كەلمەيسەن، قاراپ قالدىم يولۇڭغا. كاككۇك ئاشىقى زەينەپ، بىرى تاغدا، بىرى باغدا. كۆرۈشۈشكە مىڭ تەشنا، قالدۇق ئىنتىلىپ داغدا. شاپتۇل شېخىدەك پەسكە، ئېگىلىپ قالدىم بۈگۈن. مېھىربان يار قايدا دەپ، سېغىنىپ قالدىم بۈگۈن. توشقان چىقتى ئۇۋىدىن، قارچىغىنى قۇشلايمەن. بەكمۇ يامان يار دەردى، كېچە-كۈندۈز يىغلايمەن. گۈللەر ئېچىلىپ قاپتۇ، ئۆستەڭ بويى قىرغاقتا. نېمىشقىدۇر بىلمىدىم، يار كەلمىدى بۇياققا. ئاھ، خېنىم رەھىم قىلىپ، ھالىمنى سورىساڭ نىم بۇلار. مېنى مۇنچە قىينىماي، جېنىمنى ئالساڭ نىم بۇلار. كۆيگىنىمگە پۈتمىسەڭ، سىناپ باقساڭ نىم بۇلار. يۈرىكىمنىڭ قېتىنى، يېرىپ باقساڭ نىم بۇلار. بۇلبۇل تىنماي سايرايدۇ، يارنىڭ بېغى گۈلشەندە. يۈرىكىم جىغىلدايدۇ، سىز يارىمنى كۆرگەندە. ئاينى يانغا تارتقۇچە، يارىمنى يانغا تارتارمەن. سىز يارىمنىڭ دەردىدە، گۈل تۈۋىدە ياتارمەن. مانتا ئەتتىم قاسقاندا، بىللە يەيمىز داستىخاندا. ئەجەپمۇ كۆرۈشەلمىدۇق، يېڭىدىن تېپىشقاندا. شامال چىقسا لىڭشىيدۇ، ئاۋات يولىدا تېرەك. ئانچە-مۇنچە كەپ تۇرسىلا، چىدىمايدىكەن يۈرەك. ئېتىڭنى يېزىپ قويدۇم، خاتىرەمنىڭ بېشىغا. بىر بارسام دەپ ئويلايمەن، سىز يارىمنىڭ قېشىغا. تاڭ سەھەردە بۇلبۇلدەك، تۇمۇچۇقۇم ئويغاتتى. يار ئوتى يامان ئىكەن، مېنى ئەجەپ يىغلاتتى. يولنى ماڭسام باغ ئارا، كېچە ماڭا كۈندۈزدۇر. مېنى ھەرگىز توسماڭلار، يارىم  ئۆيدە يالغۇزدۇر. ئات مىندىم ئىگەر بىلەن، باشبېغى يۈگەن بىلەن. مەن ساڭا تولا كۆيدۈم، گەپ قىلماي يۈرگەن بىلەن. ئۆستەڭ بۇيىدا ئولتۇرسام، كاككۇك قوندى بېشىمغا. يار يادىمغا يەتكەندە، ئېتەك تولدى يېشىمغا. تاغ ئېگىز-پەس بولىدۇ، كۈن چىقىپ كەچ بۇلىدۇ. سىز ئۇ يەردە، مەن بۇ يەردە، كۆرۈشمەك تەس بۇلىدۇ. باغقا كېرىپ گۈل تەردىم، تولدۇرۇپ ئېتىكىمنى. ئىشقى ئوتۇڭنى سالدىڭ، كۆيدۈرۈپ يۈرىكىمنى.

ubul0998

	يارىم كەتكۈدەك ئەمدى، مەن ئالدىنى تورايمۇ؟ يار كەلگۈچە تاقەت يوق، مەن سېغىنىپ تۇرايمۇ؟ تاش ئۆستەڭلەر تاش بىلەن، سىڭدۈرمەيدۇ تامچە سۇ. ئۇزۇن يىللىق ئارزۇيۇم، سېنىڭ بىلەن قانسىچۇ. قاچان سايىسى چۈشەر، يېڭى تىككەن جىرىمنىڭ. جاندىن ئۆتتى كۆيەكى، يىراقتىكى خېنىمنىڭ. قاراقاش سېنىڭ ئۈچۈن، ياخشى كۈنۈم يامان بولدى. يۈرەك باغرىم ئۆرتىنىپ، چىرايىم سامان بولدى. غېرىپ بولدى مېنىڭ باشىم، تىنماي ئاقار كۆز ياشىم. كېلىپ ھالىمنى بىر سوراڭ، قارا كۆز قەلەم قاشىم. خامىنىڭدا قېپقاپتۇ، خامان سورىغان ئارا. چۈشۈمگە كېرىپ قاپتۇ، بىللە ئوينىغان يارلار. يىراق يولدىن قورقمايمەن، شامال يەتمەس ئېتىم بار. لېۋەن يارغا ئۈچبۈرچەك، قاتلاپ قويغان خېتىم بار. قارا قاش كەتكەن بىلەن، ئوت پىراقى كەتمىدى. مەن يارىمغا يىغلىسام، يار ھالىمغا يەتمىدى. گۈلدەستە تىزىپ قويدۇم، رەڭگا-رەڭ چېچەكلەردىن. يار كەلسە تۇتاي دەيمەن، سېغىنغان يۈرەكلەردىن. ئېلىخۇ دېگەن شەدە، مەن بارمىغان باغ تولا. دەردىڭىزنى ئەجەپ تارتتىم، يۈرىكىمدە داغ تولا. ئاي يۈزۈڭنىڭ ئاقلىقى، داۋانغا چۈشكەن قارچە بار. كىرپىكىڭىز سايىسى، باغدىكى بوستانچە بار. كىچىككىنە قارا كۆز، كەتتى ئەنجان يولىغا. ئەجەپقىنا كۆيىمەن، تالچىۋىقتەك بويىغا. قىزىلگۈلنى گۈل دەيمەن، ئەتىرگۈلنى گۈل دەيمەن. ئون سەككىز مىڭ ئالەمدە، سەن يارىمنى بىر دەيمەن. ئېگىز تاغنىڭ بېشىدا، جەرەن، ئۆچكە يۈرۈشكەن. بۇ دۇنيادا بارمىدۇ، سىز يارىمدەك كېلىشكەن. ئۈرۈمچىنىڭ كوچىسى، ھەر دوقمۇشتا مۇنچىسى. ئاۋاتتا بىر يارىم بار، قىزىلگۈلنىڭ غۇنچىسى. مەن ئەمدى قانداق قىلاي، دەردكە تولغان باشىمنى. كەتكىلى ئۇزۇن بولدى، سېغىندىم ئاداشىمنى. ھاۋا تۇتۇلۇپ قاپتۇ، تۇمان بىلەن ھەم مانان. چۈشۈمگە كېرىپ قاپتۇ، بىللە ئوينىغان جانان. چاپقان ئاتلار ئىچىدە، يارنىڭ مىنگىنى يورغا. يارنى كەلگۈدەك دەيدۇ، چىقىپ تۇرىمەن يولغا. ھەسرەت چېكىمەن دائىم، كۆز يېشىم قۇرۇمايدۇ. ئوتىڭىز يامان ئىكەن، يۈرىكىم چىدىمايدۇ. ئۆيۈڭنىڭ تېگى تاختا، كەلمەيسەن دېگەن ۋاقتا. كەلمىسەڭ ئەگەر يارىم، يىغلايمەن سەھەر ۋاقتا.

ubul0998

	لەۋلىرى قىزىلگۈلدەك، گۈل باھارىم يېنىمدا. ھۆسنى گويا تۇلۇنئايدەك، دىل خۇمارىم يېنىمدا. سۇنى ياقىلاپ ماڭدىم، ئاچالدىكى قوناققا. ئويناپ تۇرغان كۆزۈڭنى، ئوخشىتىمەن بۇلاققا. باغ ئوتى، ئەمەن ئوتى، كۈز ئوتى گۈلنىڭ ئوتى. بۇ يۈرەكنى كۆيدۈرگەن، قارا كۆز قىزنىڭ ئوتى. قىر تۈۋىدىكى قىياقنى، ئۇرۇۋالغۇم كېلىدۇ. سىز چىرايلىق يارىمنى، سۆيۈۋالغۇم كېلىدۇ. ئىشىك ئالدى قارىياغاچ، پالتا چاپسام تېگى تاش. يۈرىكىنمى كۆيدۈرگەن، مەڭزى قىزىل قارا قاش. ئات مىندىم قارا قاشقا، چاپتۇردۇم شېغىل تاشقا. ھەركىمنىڭ يارى باشقا، ئوخشامدۇ قەلەمقاشقا. بېغىڭغا كېرىپ باقسام، ئۈرۈكۈڭ ئەقەپ تاتلىق. چۈشۈمگە كېرىپ قاپسەن، مېھىربان، سكزى تاتلىق. ئالتۇنمىكىن بويلىرى، كۈمۈشمىكىن بويلىرى. قايناپ تۇرغان بۇلاقتەك، ئويناپ تۇرار كۆزلىرى. يارنىڭ كۆيگەن كۆڭلىكى، قىزىل دۇردۇن-تاۋاردۇر. يارىمنىڭ كۈلۈشلىرى، يۈرىكىمگە داۋادۇر. ئاق يىگىت، ئاپئاق يىگىت، چىلگە پۇرايدۇ قوينىڭىز. ئەتە- ئاخشام كۆرمىسەم، قانداق چىدايدۇ كۆڭلىڭىز. سەھەر تۇرۇپ ئورنۇمدىن، ناخشا ئېيتىمەن ئاڭلا. ئىشقىم مېنىڭ سېنىڭدە، سەنمۇ كۆيسەك نېمە بولار؟ يارىممىكىن، ئەمەسمىكىن، بوستاندا ياتقان. قاش ئوينىتىپ، كۆز ئوينىتىپ، جاننى قاقشاتقان. گۈل بېغىمنىڭ ئىچىدە، بۇلبۇل بولۇپ سايرايمەن. سەن يارنى سېغىنغاندا ئاي-چولپانغا قارايمەن. يېڭى ئۆستەڭگە سۇ كەلسە، ھەر دوقمۇشتا توختايدۇ. يېڭىۋاشتىن يار تۇتسام، قىزىلگۈلگە ئوخشايدۇ. ھاۋا تۇتۇق، ئەجەپ سالقىن، يۈرەككە داۋا بولدى. قىزىلگۈلدەك ھۆسىنىڭىز، كۈيۈككە داۋا بولدى. يوقۇرىدىن شامال چىقسا، يار بۇرنۇمغا پۇرايدۇ. يارنىڭ ئېتى ھەسەلخان، چىلگە قۇغۇن پۇرايدۇ. ئاي قېشىدا بىر يۇلتۇز، كۆرۈنمەيدۇ بدشقىسى. مېنىڭ سۆيگەن شۇ يارىم، خۇددى ئاتنىڭ قاشقىسى. ئالتۇنگۈل ئۆيۈڭ نەدە؟ ئەتە كەچ باراي دەيمەن. چىرايىڭ تۇلۇنئايدەك، تويماستىن قاراي دەيمەن. كۆز يېشىمنى رەڭ قىلىپ، گۈلنى چەكتىم ياغلىققا. خەت يازدىن يۈرىكىمدىن، ئامرىقىم چىرايلىققا. ئىشىك ئالدى بېدىلىك، بېدىلىكتە جىگدىلىك. جىگدىلىكتە ئولتۇرغان، مېنىڭ يارىم مەززىلىك. يارىم كەتتى يىراققا، ماڭغان يولى بىر ئايلىق. سېنىڭ يارىڭ قانداقكىن، مېنىڭ يارىم چىرايلىق. غوروچۆلنى چۆل دەيدۇ، چۆل ئەمەس ئاۋات ئىكەن. بىزنىڭ يارنى قەنت دەيدۇ، قەنت ئەمەس ناۋات ئىكەن.

ubul0998

	ئالتۇن قەپىسىم بولسا، بۇلبۇلنى باقاي دەيمەن. ئاي چوكان مېنىڭ بولسا، باغرىمغا باقاي دەيمەن ساي باغقا مۇنار سالدىم، كۆرمەمسەن مۇنارىمنى. ئىزدەپمۇ تاپالمايسەن، مېنىڭدەك مۇلايىمنى. بېغىڭدىكى ئالمىدىن، بىرنى ئۈزۈپ يەۋالاي. كۆڭلۈمدىكى گېپىمنى، خالىي جايدا دەۋالاي. ئاۋاتنىڭ كوچاسىدا، كۆينىكىڭ بارمۇ سېنىڭ. قېشى قارا، مەڭزى گۈل، سۆيگىنىڭ بارمۇ سېنىڭ. كەتتى دەيدۇ، كەلدى دەيدۇ، كەتكەنلەر قايسى؟ ئاشنا تۇتۇپ مۇرادىغا، يەتكەنلەر قايسى؟ خامان سورىماي تۇرسام، ئارىسى يوق دېدىڭمۇ؟ كۆيۈپ قالدىم دەپ قويسام، دورىسى يوق دېدىڭمۇ؟ تۈۋەندىن شامال چىقىپ، گۈل شېخىنى قايرىيدۇ. ۋەدىمىزدە چىڭ تۇرساق، قانداق دۈشمەن ئايرىيدۇ؟ كېچىلەردە ئاي تۇغدى، تاڭ سەھەردە چولپان قىز. سېنى دەپ تۇغۇلغان بىز، ئاچ قوينۇڭنى چوكان قىز. بۇلبۇل تولا سايرايدۇ، سايرام كۆلى بويىدا. بىرگە ئۇسسسۇل ئوينايمىز، ئىككىمىزنىڭ تويىدا. تۇمۇزدا ئېتىزلىقتا، كۈنلۈك بولاي بېشىڭغا، ئالدىرمىغىن ئومىقىم، مەن بارىمەن قېشىڭغا. سائىتىم چىك-چىك قىلىدۇ، ۋاقتىمۇ توشامدىكىن؟ بەكمۇ كۆيىمەن سىزگە، بىزنى خۇدا قوشامدىكىن؟ تېمىڭنىڭ كەينىدە كۆچەت، مەجنۇنتالمىكىن دەيمەن. قارىسام كۆز قىسىسىز، گېپى بارمىكىن دەيمەن. يارنىڭ مەيلىچە بولسا، قوپمىسام يار قېشىدىن. كېچە-كۈندۈز چۆرگىلەپ، پەرۋانە بولسام بېشىدىن. قارىسام كۆرۈنمەيدۇ، دەرياغا يېقىن ساڭلار. مېنىڭ تارتقان دەردىمنى، قارا كۆز قاچان ئاڭلار؟ بېغىڭغا كېرىۋىلىپ، توڭ غوراڭنى يەپتىمەن. گېپىمنى ئېغىر ئالما، ئويلىمايلا دەپتىمەن. يار دەيسەن، يەنە دەيسەن، يار قەدرىنى بىلمەيسەن. يار قەدرىنى بىلگەندە، تاڭ ئاتقۇچە يىغلايسەن. مېنى كۆرگەن دۈشمەنلەر، باشقا خەقنى كۆرمەيدۇ. دۈشمەن سۆزىگە كېرىپ، يارىم مېنى سۆيمەيدۇ. ئۆيىمىز شامالباغدا، بارسىلا تاپالايلا. ئىشىك بېشىدا ئاچقۇچ، ئىشىكنى ئاچالاملا؟ مەن ئۆزۈم ئۇستا بۇلۇپ، سالدىم ياغاچقا رەندىنى. كىمگە ئېيتىپ، كىمگە يىغلاي، ۋاپاسىزنىڭ دەردىنى. ھەي ئايلا، جېنىم ئايلا، مېنىڭ مەيلىمگە باقساڭچۇ؟ سېنىڭ مەيدەڭ داۋا بولدى، كېلىپ مەيدەمگە ياقساڭچۇ؟ يار دەيسەن ئىگىلمەيسەن، مەيدەڭسە تۆمۈر بارمۇ؟ ئاخشاملىققا كەل دەيسەن، خالىيدا ئۆيۈڭ بارمۇ؟ قاغا جىگدىسى قارىمۇ، يېمىش جىگدە سايىمۇ؟ سەن يارىم چىرايلىققا، تاۋار ئالايمۇ، شايىمۇ؟ بېشىڭدىكى دوپپاڭنى، قانچە پۇلغا ئالدىڭسەن. ماڭا سالغان شۇ ئوتنى، يەنە كىمگە سالدىڭ سەن؟ چاپىنىڭنىڭ يېڭىنى، باسما دەيدۇ، پۈرمىكىن. كۆڭلۈمدىكى يارىمنى، كەپتۇ دەيدۇ، راستمىكىن. قوشقۇدۇقنىڭ دەرىخى، ئېگىلەيمۇ دېمەيدۇ. بىزنىڭ يارلار تاش يۈرەك، بىر كېلەيمۇ دېمەيدۇ.

ubul0998

	سەنمۇ ئۆستەڭ بويىدا، مەنمۇ ئۆستەڭ بويىدا. ئۆلمىسەك كۆرۈشەرمىز، بېشىرىق ئۆستەڭ بويىدا. باغدا تۇرۇمتاي، كەپتەرنى ئالغاي. بىللە يۈرگىنىم، ئېسىڭدە قالغاي. ئالما بەرسەڭ يەپتىمەن، بېھى بەرسەڭ يەپتىمەن. سەن چىرايلىق يار بىلەن، ئايرىلماسمىز دەپتىمەن. ئېگىز تاغقا چىقتىممەن، تاپىنىمغا تاش قۇيۇپ. ئۆلمىسەك كۆرۈشەرمىز، بىر تەكيىگە باش قۇيۇپ. سىرلىق ساندۇق چاپتۇردۇم، مەخمەل كۆرپە ياپتۇردۇم. سىز چىرايلىق يارىمنى، خۇدايىمغا تاپشۇردۇم. قۇم سىيرىلدى قۇملۇققا، بىز سىيرىلدۇق گۈلباغقا. قانداق قىلىمىز جان دوستۇم، ئايرىلغاندا پىراققا. ئىشىك ئالدى كۆتۈرمە، ئاتلاپ قانداق ئۆتەرمەن. سىزدەك ياخشى يارىمنى، تاشلاپ قانداق كېتەرمەن؟ كېتەرمەنغۇ، كېتەرمەنغۇ، كۆزۈڭدىن يىتتەرمەنغۇ. ھەر قانچە يامان بولسام، ياغىڭغا يېتەرمەنغۇ. ئېگىز تاغقا مەن چىقىپ، ئۈرۈمچىگە قارايمەن. ساڭا بەرگەن كۆڭلۈمنى، يىراق شەگە پالايمەن. ناز بىلەن ياقتىڭ ماڭا، ئوتنى كۆپ ياقتىڭ ماڭا. سۈپسۈزۈك يامغۇر بۇلۇپ، شارقىراپ ئاقتىم ساڭا. مۇھەببەت بىلە سۆز قاتسام، جۇۋان بۇيىنى كۆرسەتتى. جۇۋان ئوتتى يامان ئىكەن، تىرىك دۇزاقنى كۆرسەتتى. باغقا رەيھان تېرىسام، ئۈنۈپ چىقتى بەشقۇلاق. سىز ماڭا كۆيگەن بىلەن، ئارىلىقىمىز بەك يىراق. ئالما-ئانارىم كېلىدۇ، قاش ئاتارىم كېلىدۇ. بېشىغا گۈلنى قىسىپ، يالغانچى يارىم كېلىدۇ. ئالىمان قارچىغام بولسا. قوندۇرسام بىلەكىمگە. ياخشى يار مېنىڭ بولسا، بىر تاڭسام يۈرەكىمگە. سەنمۇ ئاغارنىڭ دانىسىدەك، مەنمۇ ئانارنىڭ دانىسىدەك. يۈرىكىمدە ئوت كۆيىدۇ، تۈندە يانغان پانۇستەك. قۇشۇما قاش شۇ يارىمنىڭ، نەچچە يەردە بېغى بار. يېرىپ كۆرۈڭ يۈرىكىمنى، كۆيگىنىمنىڭ دېغى بار. ئوتمىدىڭ-ئاتەشمىدىڭ، قايدىن تۇتاشتىڭ سەن ماڭا. ماڭا سالغان ئوت پىراقنى، قايتۇرۇپ سالسا ساڭا. ياغلىمنىڭ ئۇچىغا، مىرزىگۈلنى باغلايمەن. يارىمنى كەتتى دېسە، كېچە-كۈندۈز ۈىغلايمەن. قاپقارا قوي كۆزلۈكۈم، جېنىم پىدا بولسا ماڭا. كۆرمىسەم تۇرالمايمەن، نېمە بالا بولدى ماڭا. ئالتا ئاي ياتتىم، يەتتە ئاي ياتتىم، مۈشكۈل زىنداندا. ئالتا ئايلىقىم بىر كۈنچە يوق، يارنى تاپقاندا. بارساڭمۇ بېرىپ تۇرغىن، ئارقاڭدىن يېتىشەرمىز. ئۈمىدنى ئۈزىۋەتمە، ئۆلمىسەك كۆرۈشەرمىز. رومالىڭنىڭ ئۇچىدىن، كېسىۋالاي تۇمارلىق. سېغىنغاندا بولسىڭىز، سۆيۈۋالاي خۇمارلىق.

قۇملۇق

	ماۋۇ سىزدىكى نەدىن كەلگەن ئىلھام ~~~~  [s:151]  [s:151]

ubul0998

	يارىم ماڭا ناز قىلىپ، سۆزلىرىنى ساز قىلىپ. مېنى تاتلىق سۆيىدۇ، زىمىستاننى ياز قىلىپ. يۈرىكىم چاك-چاك بولدى، لېۋىڭدىن سۇ ئىچەي يارىم. كېتەر يولۇڭغا باش قۇيۇپ، ئەجەل يەتسە ئۆلەي يارىم. مەھەللەڭگە كېتىۋىتىپ، كۆزۈم چۈشتى تېرەككە. جاندىن ئەزىز چىمەنگۈل، ئوتۇڭ چۈشتى يۈرەككە. كۆك كەپتەرنىڭ ئوينىشى، ئاق سۆگەتنىڭ بېشىدا. ئىككىمىزنىڭ ئوينىشى، بۇ ئۆستەڭنىڭ قېشىدا. قەشقەرچە سۆزلەپ قويسام، ئەنجانچە كۈلۈپ ساللا. ئوتىمىز يامانىكەن، ئۆزلىرى كېلىپ قاللا. قىزىلگۈل ئۆسمەيدىكەن، شاخىنى كەسمەيدىكەن. باشقا ئوت ئۆچكە بىلەن، يار ئوتى ئۆچمەيدىكەن. قارىسام كۆرۈنمەيدۇ، تاغنىڭ كەينىدە يۇرتۇڭ. ئەجەپمۇ يامان ئىكەن، كۆيدۈردى سېنىڭ ئوتۇڭ. يېڭى سالغان قوتاننىڭ، تۆت ئەتراپى قوشاملىق. بىز ئىككىمىز بىرگە بولساق، نېمىدىگەن خوشاللىق. ئاسماندىكى ئاي، چايداندىكى چاي. كۆيدۈم سىلىگە، ۋاي يۈرىكىم ۋاي. ئالما ساتتىم بازاردا، ھەر دانىسى بەش تىيىن. كۆڭۈللۈك سۆيەي يارنى، ئايرىلمىقىم بەك قىيىن. مەن قۇملۇققا بارمايمەن، قۇملۇقتا ئىزىم قالغان. شۇنچە خەق ئاراسىدا، مەن سىزگە كۆيۈپ قالغان. يولۇڭغا قاراپ ھاردىم، ھەر كۈنى قاراڭ دەيدۇ. بىر سۆيۈپ قۇيۇڭ دېسەم، ئانامدىن سوراڭ دەيدۇ. يارىم كەلدى قول سېلىپ، توغرا-توغرا يول ئېلىپ. قەيەردىن چىقىپ كەللە، يۈرىكىمگە ئوت سېلىپ. ئىشىكىڭنى قىيا ئاچقىن، يۈزۈڭنى كۆرۈپ ئالاي. قولۇڭدىن تۇتۇپ تۇرۇپ، لېۋىڭگە سۆيۈپ ئالاي. ئات مىنسەممۇ ئوينايمەن، مىنمىسەممۇ ئوينايمەن. يارنىڭ ئۆيىگە بېرىپ، ئويناپ زادى ھارمايمەن. يارىم بەردى بەش ئالما، بەشىلىسى قوينۇمدا. ئۇخلاپ چۆچۈپ ئويغانسام، يارنىڭ قولى بوينۇمدا. يېڭى چاپقان ئۆستەڭدە، سۈزۈك سۇلار لايلىدى. سىز يارىمنى بىر كۆرۈپ، مېنىڭ بېشىم ئايلاندى. قارا-قارا قاشلارىڭغا، كۆيگۈم كېلىدۇ. قۇچىقىمغا توغرا ئېلىپ، سۆيگۈم كېلىدۇ. ئاق كۆڭلەك، يېشىل كۆڭلەك، يۇمىلاق جۇۋان دەيدۇ. كۆكسىڭىز قايان دېسە، مەيدەمنى سىيلاڭ دەيدۇ. كېتەرىڭنى بىلەر بولسام، يولدا تۇراتتىم. يىغلاپ-يىغلاپ قالغىنىمدىن، بىرگە باراتتىم. كۆزۈڭ شۇختۇر، كۆزۈڭ شوختۇر، كۆزۈڭدىن كىرپىگىڭ شۇختۇر. ئىزدەپمۇ تاپالمىدىم، سېنىڭدەك ياخشى يار يوقتۇر. ئىككى مېتىر بەلبېغىمنى، بەلگە مەھكەم باغلايمەن. كۆڭۈلدىكى يارىمنى، تاشلاپ زادى كەتمەيمەن. ناخشا ئېتسام تىڭشايسىز، ناخشامنىڭ ساداسى يوق. مەن مۇنداق يۈرگەن بىلەن، يۈرەكنىڭ تازاسى يوق. گۈل تېرىدىم كەلسىلە، ئوسما تېرىدىم كەلسىلە. بىر قۇيۇم ئوسما بېرەي، بوينۇمنى قايرىپ سۆيسىلە. كۈن-كۈنلەپ ئورما ئۇرۇپ، تالدى بىلىكىم. چوكان خېنىم سىلىنى كۆرۈپ، سالدى يۈرىكىم.