NASA: بىر ئالەم ئۇچقۇچىسىنىڭ دېگەنلىرى

Algol1991

كۈندە بىر يۇلتۇز ( 21-سان )

2015-يىل 3-ئاينىڭ 15-كۈنى كېچە
ئەل تايىر ( پادىچى يىگىت يۇلتۇزى ) : بۈركۈت يۇلتۇز تۈركۈمى ئەلفا يۇلتۇزى .
牛郎星（天鹰座α），Altair ( Aquila α )
كۆرۈنمە يورۇقلۇق دەرىجىسى ( 0.77 ) .
چىقىش ۋاقتى : ئەتىسى سەھەر 2:30 ، ئورنى شەرق .
كۈن چىقىش ۋاقتى : ئەتىسى چۈشتىن بۇرۇن 7:00 ، ئەل تايىرنىڭ ئورنى شەرقىي جەنۇب .
قوللىنىلغان ۋاقىت : شەرقىي 6- رايون ( UTC+6 ) .

ئەل تايىر ئاسماندىكى ئون ئىككىنچى يورۇق يۇلتۇز . بۈركۈتنىڭ بېشىنى ئىپادىلەيدۇ ، بىز بىلەن بولغان ئارلىقى 16.77 يورۇقلۇق يىلى . ئۇ يۇلتۇزنى جۇڭگودا يەنە ھەشقىپىچەك يۇلتۇز ياكى ئۇلۇغ سانغۇن دەپمۇ ئاتايدۇ ، ياپونىيەدە تالىپ يۇلتۇزى دەپ ئاتايدۇ . بۇ يۇلتۇز يازلىق ئۈچبۇلۇڭنىڭ جەنۇبىي چوققىسى ( قالغان ئىككىسى توقۇمىچى قىز ۋە دېنېب ) . بۇ يۇلتۇزنىڭ ئىسمى ئەرەبچىدىن كەلگەن بولۇپ ( النسر التائر ) تازقارا ( ئۇچۇۋاتقان ) دېگەن مەنىدىكەن . بۇ يۇلتۇزنىڭ ئېغىرلىقى قۇياشنىڭ 1.7 ھەسسىسىگە تەڭ . چوڭلۇقى قۇياشنىڭ 6 ھەسسىسىگە تەڭ . بۇ يۇلتۇزنىڭ سىرىئۇس بىلەن ئوخشاشلىقى ئىنتايىن كۆپ .

جۇڭگودىكى بۇ يۇلتۇز توغرىلىق ھېكايىنى سۆزلەشنىڭ ھاجىتى يوق . ئەل تايىرنىڭ ئىككى تەرىپىدىكى يورۇقراق ئىككى يۇلتۇز جۇڭگو رىۋايەتلىرىدە پادىچى يىگىت بىلەن توقۇمىچى قىزنىڭ ئىككى بالىسى سۈپىتىدە تەسۋىرلىنىدۇ ( ئاسماندا بىر قانچىلىغان داڭلىق ئۈچ قاتار يۇلتۇز بار ، بۇ ئۈچى شۇلارنىڭ بىرى ) . غەرب رىۋايەتلىرىدە بۇ يۇلتۇز ئۆمىلىگۈچى ھايۋانلار بىلەن مۇناسىۋەتلىك ئاپەتنىڭ سىمۋولى . ئەل تايىرنى تېپىش ئۇسۇلى : ئەتىگەن سائەت بەشلەردە شەرقتىن سەل جەنۇبقا قىيپاش يۆنىلىشتە ئېگىز بولمىغان ئورۇندا بىر يورۇقراق يۇلتۇز بار ، بۇ دەل ئەل تايىر ( ئالتىنچى چېسىلادىكى توقۇمىچى قىزنى تونۇشتۇرغاندىمۇ دېگەن ) .

1983 يىلى ياپونىيە ئەل تايىرغا ئېلېكتىر سىگىنالى قويۇپ بەردى ، بۇ ياپونىيەنىڭ مىتاي ( سىرتقى ھاياتلىقنى ئىزدەش پىلانى ) تۈرىگە قاتناشقاندىن كېيىنكى تۇنجى ئىشى ( ئەلۋەتتە قايتۇرما سىگىنال كەلگەن تەقدىردىمۇ ئەڭ بالدۇر بولغاندا 2017 يىلى كېلىدۇ ) . 1978 يىلى ئەل تايىرنىڭ تۆت كەررىلىك يۇلتۇز ئىكەنلىكى ئېنىقلانغان ، لېكىن 2007 يىلى ناسا بۇنى ئىنكار قىلدى ، يەنى ئەل تايىر ئوپتىكىلىق تۆت كەررىلىك يۇلتۇز بولۇپ ، بۇ تۆت يۇلتۇزنىڭ فىزىكىلىق مۇناسىۋىتى يوق ، شۇڭا ئەل تايىر بىر كەررىلىك يۇلتۇز . ئەل تايىر ئاسمان ئېكۋاتورىنىڭ شىمالىدا ، ئۇپۇقتىن ئېگىز ۋاقتى 13 سائەت .

Algol1991

كۈندە بىر يۇلتۇز ( 22-سان )

2015-يىل 3-ئاينىڭ 16-كۈنى كېچە
ئەكرېست ( ئەلفا كرېست ) :جەنۇبىي كرېست يۇلتۇز تۈركۈمى ئەلفا يۇلتۇزى .
十字架二（南十字座α）    Acrux （Crux α）
كۆرۈنمە يورۇقلۇق دەرىجىسى ( 0.77 ) .
چىڭقى چۈش ۋاقتى :ئەتىسى سەھەر 1:24 ، ئۇپۇقتىن ئېگىزلىكى 14 - گرادۇس .
27-پاراللېلنىڭ شىمالىدا ئۇپۇقتىن ئۆرلىمەيدۇ .
قوللىنىلغان ۋاقىت : شەرقىي 6- رايون ( UTC+6 ) .

ئەكرېست ئاسماندىكى ئون ئۈچىنچى يورۇق يۇلتۇز ، بۇ يۇلتۇز جەنۇبىي كرېست يۇلتۇز تۈركۈمىدىكى تۆت ئاساسىي يۇلتۇزنىڭ ئەڭ يورۇقى . جەنۇبىي كرېست يۇلتۇز تۈركۈمى جەنۇبىي قۇتۇبنى كۆرسىتىپ بېرىدىغان ئىنتايىن مۇھىم بەلگە بولۇپ ، مۇھىملىقى شىمالىي قۇتۇپ يۇلتۇزىدىن قېلىشمايدۇ . جەنۇبىي يېرىم شاردىكى نۇرغۇن دۆلەتنىڭ بايرىقىغا بۇ يۇلتۇز تۈركۈمىنىڭ رەسىمى چۈشۈرۈلگەن . ئەكرېستنىڭ بىز بىلەن بولغان ئارلىقى 320 يورۇقلۇق يىلى ، ئۇ ئۈچ كەررىلىك يۇلتۇز ، بۇ ئۈچ يۇلتۇزنىڭ ئىككىسىنىڭ ئارلىقى ئىنتايىن يېقىن بولۇپ 150 مىليون كىلومېتىر ئەتراپىدا ، ئۆزئارا ئايلىنىش دەۋرى 76 كۈن ، بۇ گەۋدە بىلەن يەنە بىرسىنىڭ ئارلىقى ، 65 مىليارد كىلومېتىر ، ئۆزئارا ئايلىنىش دەۋرى 1500 يىلدىن ئارتۇق . بىرىنچى دەرىجىلىك يۇلتۇز ئىچىدە ئەڭ جەنۇبقا جايلاشقىنى دەل ئەكرېست . ئەلۋەتتە بۇ يۇلتۇزنى ئىزدەش ئۇسۇلىنى سۆزلەپ ئولتۇرغاننىڭ ئەھمىيىتى يوق .

kurt01

ئاسماندىكى يۇلتۇزلار تۈگىگىچە بۇ خىزمەتنى داۋاملاشتۇرىشىڭىزنى ئۈمۇت قىلىمىز. ئەجرىڭىزنى ئاللا نەرسۇن.

Algol1991

كۈندە بىر يۇلتۇز ( 23-سان )

2015-يىل 3-ئاينىڭ 17-كۈنى كېچە
ئەل دېباران : سەۋر ( تورپاق ) يۇلتۇز تۈركۈمى ئەلفا يۇلتۇزى .
毕宿五（金牛座α），Aldebaran ( Taurus α )
كۆرۈنمە يورۇقلۇق دەرىجىسى ( 0.86 ) .
كۈن ئولتۇرۇش ۋاقتى : كەچ 6:33 ، ئەل دېباراننىڭ ئۇپۇقتىن ئېگىزلىكى 61 گرادۇس ، ئورنى غەربىي جەنۇب .
پېتىش ۋاقتى : ئەتىسى سەھەر 0:26 ، ئۇپۇققا پېتىش ئورنى غەرب .
قوللىنىلغان ۋاقىت : شەرقىي 6- رايون ( UTC+6 ) .

ئەل دېباران ئاسماندىكى ئون تۆتىنچى يورۇق يۇلتۇز ، بىز گە كۆرۈنۈشتە ئەل دېباران سەۋر يۇلتۇز تۈركۈمىدىكى سەۋر يۇلتۇزلار توپى يۆنىلىشكە توغرا كېلىپ قالغان ، شۇڭا ئىلگىرى ئالىملار بۇ يۇلتۇزنى سەۋر يۇلتۇزلار توپىغا تەۋە دەپ قارىغان ، لېكىن كېيىن بايقالدىكى ئەل دېباراننىڭ ھەرىكەت يۆنىلىشى سەۋر يۇلتۇزلار توپىدىكى باشقا يۇلتۇزلارغا ئوخشىمايدۇ . ئۈلكەرنىڭ شەرق تەرىپىدە تەخمىنىي V شەكلىنى تۈزىدىغان بىر ئوچۇم يۇلتۇز بار ، ئەڭ يورۇق بىرسى دەل ئەل دېباران ، بۇ ئوچۇم يۇلتۇزنىڭ ئەل دېباراندىن باشقا ھەممىسى سەۋر يۇلتۇزلار توپىنىڭ ئەزاسى . ئەل دېباراننىڭ بىز بىلەن بولغان ئارلىقى 65.1 يورۇقلۇق يىلى .

ئەل دېباراننىڭ چوڭلۇقى قۇياشنىڭ 55 مىڭ ھەسسىسىگە توغرا كېلىدىغان بولۇپ ، بىر قېرىپ قالغان يۇلتۇز ھېسابلىنىدۇ . ئەل دېباراننىڭ بىر ھەمراھ يۇلتۇزى بار ، شۇڭا بۇ ئىككى كەررىلىك يۇلتۇز ھېسابلىنىدۇ . ئامېرىكىنىڭ باشلامچى 10 ناملىق تەكشۈرۈش ئەسۋابى 2 مىليون يىلدىن كېيىن ئەل دېبارانغا يېتىپ بارىدۇ . ئەل دېباراننىڭ ئىسمى ئەرەبچىدىن كەلگەن بولۇپ ، ئەگەشكۈچى دېگەن مەنىدە ، چۇنكى بۇ يۇلتۇز ئۈلكەرنىڭ كەينىدىنلا يۈرىدۇ . ئەل دېباران ئاسمان ئېكۋاتورىنىڭ شىمالىدا ، ئېكلىپتىكىنىڭ جەنۇبىدا . بۇ يۇلتۇز ئېكلىپتىكىغا ئىنتايىن يېقىن بولۇپ شۇڭا ئېكلىپتىكىدىكى تۆت خان يۇلتۇزىنىڭ بىرى ئاتالغان ( ئەل دېباران ، ئانتارېس ، فومالگائۇت ياكى سىپىكا ، رېگۇل ) .

ئەل دېباران ئېكلىپتىكىغا يېقىن بولغاچقا قۇياشنىڭ ئەل دېبارانغا يېقىنلىشىش ، ئاينىڭ ئەل دېباراننى توسۇۋېلىش ھادىسىلىرىمۇ يۈز بېرىپ تۇرىدۇ . ئەل دېباراننىڭ ئۇپۇقتىن ئېگىز ۋاقتى 14 سائەت . بۇ مەن ئەڭ ئامراق يۇلتۇزنىڭ بىرى ، يەنە بىرسىگە مەن سەۋرنىڭ V شەكلىنىمۇ ئىنتايىن ياخشى كۆرىمەن .
مەن ئىلگىرى مۇنداق بىر ئىشقا ئۇرۇنۇپ باققان ئىدىم ، ئاينىڭ كەمتۈك قىسمىغا بىرەر يۇلتۇز كەلگەندە بۇ يۇلتۇز يوقاپ كەتسە ، ئاندىن تۆۋەندىكى ئىككى گەپكە شەرتسىز ئىشىنەتتىم ، بىرسى ، ئاسماندا ئاينى يەيدىغان نەرسە مەۋجۇت ئەمەسلىكىگە ، يەنە بىرسى ، يۇلتۇزنىڭ ئايدىن يىراق ئىكەنلىكىگە . بۇنىڭ ئۈچۈن قانداق قىلىش كېرەك ؟

ئەڭ ياخشى شارائىت مۇنداق ، بىرسى ئاي تولۇۋاتقان مەزگىل بولۇشى كېرەك ، چۈنكى ئاينىڭ يۇلتۇزلۇق بوشلۇققا نىسبەتەن يۆتكىلىش يۆنىلىشى غەربتىن شەرققە بولىدۇ ، بۇنداق بولغاندا يۇلتۇز ئاينىڭ قاراڭغۇ كىسمىغا بىۋاستە كىرىدۇ ، بۇنىڭدا ئىش ئاسان بولىدۇ ، ئەكىسچە بولسا يۇلتۇز ئاينىڭ يورۇق قىسمىدىن ئۆتۈپ ئاندىن قاراڭغۇ قىسمىغا كىرىدۇ ، بۇنداق بولغاندا بىزگە سەل ئاۋارىچىلىق پەيدا بولىدۇ ، ئۇنىڭ ئۈستىگە تولۇۋاتقان مەزگىلدە ئاي كەچقۇرۇن كۆرۈنىدۇ ، ئەكىسچە بولسا ئاي سەھەردە كۆرۈنىدۇ ، بۇمۇ بىزگە ئاۋارىچىلىق كەلتۈرىدۇ . يەنە بىرسى ئاي قانچە ئىنچىكە بولسا شۇنچە ياخشى ، قاراڭغۇ قىسمى كۆپ بولىدۇ ، نۇرى ئاجىز بولىدۇ ، يېنىدىكى يۇلتۇزنىڭ نۇرىنى ئاسانلىقچە كۆرۈنمەس قىلىپ قويالمايدۇ . ئاندىن توسۇلىدىغان يۇلتۇز يورۇقراق بولۇشى كېرەك ، بولمىسا ئاينىڭ يېنىغا كېلىپ بولغۇچە ھەيۋىسىنى يوقىتىپ قويىدۇ ، يەنە بىرسى يۇلتۇز ئېكلىپتىكا سىزىقىغا يېقىن بولۇشى كېرەك ( ئەمەلىيەتتە ئاي يولىغا يېقىن بولۇشى كېرەك ، لېكىن ئاي يولى مۇقىم بولمايدۇ ، لېكىن ئادەتتە ئېكلىپتىكىدىن ئانچە يىراقلاپ كەتمەيدۇ ، ئېكلىپتىكا دېگىنىمىز كۈن يولى ) . مەن ئىلگىرى بۇ شەرتلەرنىڭ بەزىلىرىنى ئويلىيالمىغانلىقتىن بىۋاستىلا تەلەي سىناپتىكەنمەن ، شۇنىڭ بىلەن خېلى ئۇزۇن ۋاقىت ھەپىلەشكەن ، لېكىن بىرەر قېتىممۇ كۆڭۈلدىكىدەك بولمىغانتى . كېيىن بىلدىمكى بۇنداق شەرتلەرگە چۈشىدىغان يۇلتۇزدىن پەقەت تۆتى باركەن ( ئەل دېباران ، ئانتارېس ، رېگۇل ، سىپىكا . بەزىلەر فومالگائۇتنىمۇ قۇشۇپ قويىدىكەن ، لېكىن مەن تازا ئىشەنمىدىم ) . بۇ تۆت يۇلتۇزنىڭ ئىچىدە ئەڭ ئېگىز ھەم ئەڭ يورۇقى دەل ئەل دېباران ！بۇ ئىشقىمۇ ئون يىلدىن ئاشتى ھازىر .

Algol1991

كۈندە بىر يۇلتۇز ( 24-سان )

2015-يىل 3-ئاينىڭ 18-كۈنى كېچە
ئانتارېس : قەۋس ( چايان ) يۇلتۇز تۈركۈمى ئەلفا يۇلتۇزى .
心宿二（天蝎座α），Antares ( Scorpius α )
كۆرۈنمە يورۇقلۇق دەرىجىسى ( 0.96 ) .
چىقىش ۋاقتى : ئەتىسى سەھەر 0:59 ، ئورنى شەرقىي جەنۇب .
چىڭقى چۈش ۋاقتى : ئەتىسى سەھەر 5:17 ، ئانتارېسنىڭ ئۇپۇقتىن ئېگىزلىكى 22 گرادۇس .
كۈن چىقىش ۋاقتى : ئەتىسى چۈشتىن بۇرۇن 6:40 ، ئانتارېسنىڭ ئۇپۇقتىن ئېگىزلىكى 19 گرادۇس ، ئورنى جەنۇب .
قوللىنىلغان ۋاقىت : شەرقىي 6- رايون ( UTC+6 ) .

ئانتارېس ئاسماندىكى ئون بەشىنچى يورۇق يۇلتۇز ، ئۇنىڭ ئۈستىگە ئۇ جايلاشقان قەۋس يۇلتۇز تۈركۈمى نامى چىققان يورۇق يۇلتۇز تۈركۈمى بولۇپ يورۇق يۇلتۇزلار كۆپ ( قەۋسنىڭ يورۇقلۇقى 88 نىڭ ئىچىدە بەشىنچى ئورۇندا ) . ئانتارېس شۇ چاياننىڭ يۈرىكىدۇر . ئانتارېس ھەم تۆت خان يۇلتۇزىنىڭ بىرى ، ئانتارېس ئاسمان ئېكۋاتورىنىڭ جەنۇبىدا . ئانتارېس ئېكلىپتىكىغا يېقىن بولغاچقا مارس بىلەن يېقىنلىشىپمۇ قالىدۇ ، ئانتارېسمۇ قىزىل مارسمۇ قىزىل ، يورۇقلۇقىمۇ ئاساسەن ئوخشاش ، شۇڭا بۇ ۋاقىتتا بۇ ئىككىسىنى ئوبدان بىلىدىغان ئادەم بولسا پەرق ئېتىش قىيىن ، مارس كۈشەندىسى ئانتارېس دېگەن گەپمۇ مۇشۇ يەردىن كەلگەن .

ھازىرمۇ ئانتارېسنىڭ يېنىغا ساتۇرن كېلىپ قاپتۇ . ئانتارېس قەۋس سېنتاۋر يۇلتۇزلار جەمىيىتىنىڭ ئەزاسى . ئانتارېسنىڭ ئېغىرلىقى قۇياشنىڭ ئون نەچچە ھەسسىسى ، لېكىن چوڭلۇقى قۇياشنىڭ 700 مىليون ھەسسىسى . بىز بىلەن بولغان ئارلىقى 470 يورۇقلۇق يىلى . ئانتارېسنىڭ بىر ھەمراھ يۇلتۇزى بار ، شۇڭا ئۇ ئىككى كەررىلىك يۇلتۇز . ئىككى يۇلتۇزنىڭ ئارلىقى 86 مىليارد كىلومېتىر . بۇ ھەمراھ يۇلتۇز 1819 يىلى 4 ئاينىڭ 13 كۈنى ئاي ئانتارېسنى توسۇۋېلىپ تېخى ھەمراھ يۇلتۇزى توسۇۋېلىنمىغان شۇ قىسقا پەيتتە بايقالغان . لېكىن شۇ ۋاقىتتا بەزىلەر بۇنى ئاينىڭ ئاتموسفېراسى كەلتۈرۈپ چىقارغان ئازغۇن ھالەت دەپ قارىغانتى ( ئۇ ۋاقىتتا ئايدا ھاۋا بار دەپ قارىلاتتى ) ، بۇ ھەمراھ يۇلتۇز 1846 يىلى رەسمىي ئىسپاتلاندى . بۇ ئىككى يۇلتۇزنىڭ بىر بىرىنى ئايلىنىش دەۋرى 878 يىل . ئانتارېس ئېكلىپتىكىغا يېقىن بولغاچقا ۋېنېرانىڭ ئانتارېسنى توسۇۋېلىش ھادىسىسىمۇ يۈز بېرىدۇ ، ئالدىنقى قېتىملىق بۇنداق ھادىسە مىلادىدىن بۇرۇنقى 523 يىلى يۈز بەرگەن ، كېيىنكى قېتىملىقى 2400 يىلى 11 ئاينىڭ 17 كۈنى يۈز بېرىدۇ . ئالدىنقى قېتىملىق ئاينىڭ ئانتارېسنى توسۇۋېلىش ھادىسىسى 2009 يىلى 7 ئاينىڭ 31 كۈنى يۈز بەرگەن . جۇڭگودا 4 مىڭ يىل بۇرۇن ئانتارېسنى كۆزىتىش ئورنى باركەنتۇق ، شاڭ سۇلالىسىدە يەنە ئانتارېسقا نەزىر بېرەتتىكەندۇق . ئانتارېس دېگەن ئىسىم گرېك تىلىدىن كەلگەنىكەن مەنىسى يەنىلا مارس كۈشەندىسى .

لېكىن بەزىلەر بۇ ئىسىمنى ئەرەب تىلىدىن كەلگەن ، مەنىسى ئەرەبلەرنىڭ مۇئەللەقەت بايرىمىدىكى ئەپسانىۋى قەھرىمان ئانتار ( ياكى ئانتاراھ ئىبىن شەدداد ) نىڭ ئىسمىدىن كەلگەن دەپ قارايدۇ . قەدىمى مېسسۇپوتامىيەدىمۇ بۇ يۇلتۇزنىڭ يامان جىق ئىسمى باركەن ، يازمىدىم بولدى . پېرسىيەدە بۇ يۇلتۇزنى ساتېۋىس دەپ ئاتايدىكەن . بابىلوندا بۇ يۇلتۇزنى گاباگىرتاب دەپ ئاتايدىكەن ، مەنىسى چاياننىڭ كۆكسى دېگەنلىك بولىدىكەن . يۇلتۇز تۈركۈمى چايانمۇ ( سكورپيۇس ) گىرېك تىلىدىن ئەرەبلەشكەن ، ئاندىن ئەرەب تىلىدىن لاتىنلاشقان ، ئاندىن لاتىن تىلىدىن ئىنگىلىزلاشقان ئىسىمكەن .

تۆۋەندىكى رەسىمنىڭ بىرى 2009 يىلى 7 ئاينىڭ 31 كۈنى ئېكۋاتوردا كۆرگەندىكى ئاينىڭ ئانتارېسنى توسۇۋېلىش ئالدىدىكى كۆرۈنۈشى ، يەنە بىرسى شۇ پەيتتىكى يۇرتىمىزدا كۆرۈنىدىغان ئەھۋال . يۇرتىمىز شىمالدا بولغاچقا ئاي ئانتارېسنىڭ كىچىككىنە جەنۇبىدىن ئۆتۈپ كېتىپ قاپتۇ . ئانتارېسنى تېپىش ئۇسۇلى : سەھەر سائەت بەشلەردە جەنۇبقا قارىسىڭىز ئېگىز بولمىغان جايدا ساتۇرننىڭ سول تەرەپ ئاستىدا بىر يورۇق يۇلتۇز بار ، بۇ دەل ئانتارېس .

Algol1991

تېلىفۇندا رەسىم يوللىغىلى …

Algol1991

كۈندە بىر يۇلتۇز ( 25-سان )

2015-يىل 3-ئاينىڭ 19-كۈنى كېچە
سىپىكا : سۇنبۇلە يۇلتۇز تۈركۈمى ئەلفا يۇلتۇزى .
角宿一（室女座α，也称处女座），Spica ( Virgo α )
كۆرۈنمە يورۇقلۇق دەرىجىسى ( 1.04 ) .
كۈن ئولتۇرۇش ۋاقتى : كەچ 6:34 .
چىقىش ۋاقتى : كەچ 8:51 ، ئورنى شەرق .
چىڭقى چۈش ۋاقتى : ئەتىسى سەھەر 2:12 ، سىپىكىنىڭ ئۇپۇقتىن ئېگىزلىكى 37 گرادۇس .
كۈن چىقىش ۋاقتى : ئەتىسى چۈشتىن بۇرۇن 6:40 ، سىپىكىنىڭ ئۇپۇقتىن ئېگىزلىكى 8 گرادۇس ، ئورنى غەرب .
قوللىنىلغان ۋاقىت : شەرقىي 6- رايون ( UTC+6 ) .

سىپىكا ئاسماندىكى ئون ئالتىنچى يورۇق يۇلتۇز . بۇ پەسىلدە سۇنبۇلە يۇلتۇز تۈركۈمى بىلەن قۇياشنىڭ ئورنى ئۆز ئارا تەتۈر قەدەملىك بوپقالغاچقا ( قۇياش غەربكە ئولتۇرۇشىگە ئەگىشىپ سۇنبۇلە شەرقتىن چىقىدۇ ، سۇنبۇلەنىڭ غەربكە ئولتۇرۇشى بىلەنلا قۇياش شەرقتىن چىقىدۇ ، بۇنىڭ دەل ئەكىسچە ھازىر ھوت ، يەنى قوش بېلىق يۇلتۇز تۈركۈمى قۇياش بىلەن ماس قەدەمدىلا يۈرىدۇ ، قۇياش بىلەن تەڭ چىقىدۇ ، قۇياش بىلەن تەڭ ئولتۇرىدۇ ، شۇڭا ھازىرقى پەسىلدە ھوت يۇلتۇز تۈركۈمىنى كۆزىتىش مۇمكىن ئەمەس ) بۇنى ئالدىنقى يېرىم كېچىگە ياكى كېيىنكى يېرىم كېچىگە تەۋە قىلالماي ، كۈن ئولتۇرغاندىن تارتىپ كۈن چىققۇچە بولغان ۋاقىتنىڭ ھەممىنى يېزىپ سالدىم .

سىپىكا بىرىنچى دەرىجىلىك يۇلتۇزنىڭ ئىچىدە ئەڭ يالغۇز تۇرۇپ قالغان بىرى بولۇپ يەككە يېگانىلا چاقناپ تۇرىدۇ ، يېقىن ئەتراپىدا ئىككىنچى دەرىجىلىك يۇلتۇزمۇ تۈزۈك يوق ( سەل شىمالدىكى ئاركتۇرنى ھېسابقا ئالمىغاندا ) . سىپىكىنىڭ بىز بىلەن بولغان ئارلىقى 260 يورۇقلۇق يىلى . قەدىمىي يۇنان ئاسترونومى ھىپپاكيۇس سىپىكىنىڭ ئاسماندىكى يۆتكىلىشىگە ئاساسەن پرېتسېسسىيە ھەركىتىنى بايقىغان ( پرېتسېسسىيە ھەركىتى دېگىنىمىز يەر ئوقىنىڭ يۆنىلىش ئۆزگىرىش ھەركىتىدۇر ، بۇ ھەرىكەت ئىنتايىن ئاستا بولۇپ تەخمىنەن 26 مىڭ يىلدا بىر دەۋر ئايلىنىدۇ ، بۇ خۇددى بىز قامچىدا ئوينايدىغان نۇرنىڭ ئايلانغىنىغا ئوخشايدۇ ، مۇنداق ئىككى ئۇقۇم بار ، بىرى ئېكلىپتىكا قۇتۇبى ، بۇ ئۆزگەرمەيدۇ ، چۈنكى يەرشارىنىڭ قۇياشنى ئايلىنىش تەكشىلىكىنىڭ ئاسمان شارىغا نىسبەتەن يۆنىلىشى ئۆزگەرمەيدۇ ، شىمالىي ئېكلىپتىكا قۇتۇبى ئەجدىھا يۇلتۇز تۈركۈمى يۆنىلىشتە ، يەنە بىر ئۇقۇم ئاسمان قۇتۇبى ، بۇ بايا دېگەندەك ئۆزگىرىپ تۇرىدۇ ، شىمالىي ئاسمان قۇتۇبىنىڭ ئاسمان شارىدىكى يولىنى سىزساق بۇ بىر چەمبەر بولىدۇ ، بۇ چەمبەرنىڭ مەركىزى دەل شىمالىي ئېكلىپتىلا قۇتۇبى بىلەن ئۈستمۇ ئۈست چۈشىدۇ ، بۇ ئىككى قۇتۇپنىڭ ئاسمان شارىدىكى شار يۈزى ئارلىقى 23 يېرىم گرادۇس ، بۇ قىممەتمۇ ئەلۋەتتە ئۆزگەرمەيدۇ ، كۈن تۈن توختاش كۈنىدە قۇياشنىڭ 23 يېرىم گرادۇسلۇق پاراللېلغا تىك چۈشۈشى ، يەنى تروپىك سىزىقلىرىنىڭ ئېكۋاتور بىلەن 23 يېرىم گرادۇسلۇق بۇلۇڭ ھاسىل قىلىشىنىڭ سەۋەبى شۇ . شىمالىي ئاسمان قۇتۇبى بۇ چەمبەرنى بويلاپ 26 مىڭ يىلدا شىمالىي ئېكلىپتىكا قۇتۇبىنى ئايلانغانلىقتىن شىمالى قۇتۇپنى كۆرسىتىدىغان يۆنىلىشمۇ مۇشۇ چەمبەرنى بويلاپ ئايلىنىدۇ ، شىمالىي قۇتۇپ يۇلتۇزى ، توقۇمىچى قىز يۇلتۇزى قاتارلىقلار مۇشۇ چەمبەر سىزىقىغا يېقىن يورۇق يۇلتۇزلاردۇر ، يېقىنقى بىرەر مىڭ يىلدا شىمالىي ئاسمان قۇتۇبى شىمالىي قۇتۇپ يۇلتۇزىنىڭ يېنىدىن ئۆتىۋاتىدۇ ، بۇ يۇلتۇزنىڭ ئىسمى شۇڭا شۇنداق ئاتىلىپ قالغان . ) .

مىسىرنىڭ دىبىس شەھىرىدە مىلادىدىن بۇرۇنقى 3200-يىلى ئايال ئىلاھ خاسۇر ئۈچۈن سېلىنغان ، سىپىكا يۆنىلىش قىلىنغان ئىبادەتخانا بار ، بۇ يۆنىلىش ھازىر سىپىكىنى كۆرسىتەلمەيدۇ ، يەنە 21 مىڭ يىللاردىن كېيىن ئاندىن سىپىكا يۆنىلىشىنى كۆرسىتىدۇ . پولشا ئاسترونومى كوپېرنىك ئۆزى ياسىغان ئەسۋاپتا سىپىكىنى كۆپ قېتىم كۆزىتىش ئېلىپ بارغان ، بۇنىڭ سەۋەبى ئاساسلىق پرېتسېسسىيە ھەركىتىنى تەتقىق قىلىش ئۈچۈن . سىپىكا بىزگە ئەڭ يېقىن چوڭ ماسسىلىق قوش يۇلتۇز بولغانلىقتىن ئالىملار بۇ يۇلتۇز بىلەن جىق ھەپىلىشىدۇ . سىپىكا ئىككى كەررىلىك يۇلتۇز ، ئىككى يۇلتۇزنىڭ ئارلىقى ئاران 18 مىليون كىلومېتىر ، بىر بىرىنى ئايلىنىش دەۋرى 4 كۈندىن جىقراق .

سىپىكىنىڭ ئاساسى يۇلتۇزىنىڭ ئېغىرلىقى قۇياشنىڭ 10 ھەسسىسى ، چوڭلۇقى قۇياشنىڭ 350 ھەسسىسى ، ھەمراھ يۇلتۇزىنىڭ ئېغىرلىقى قۇياشنىڭ 7 ھەسسىسى ، چوڭلۇقى قۇياشنىڭ 47 ھەسسىسى . سىپىكا ئاسمان ئېكۋاتورىنىڭ جەنۇبىدا . بۇ يۇلتۇزمۇ ئېكلىپتىكا سىزىقىغا يېقىن بولۇپ ئاران 4 گرادۇس كېلىدۇ ، شۇڭا ئاي ۋە باشقا پلانېتلارنىڭ سىپىكىنى توسۇۋېلىش ھادىسىلىرىمۇ يۈر بېرىپ تۇرىدۇ . سىپىكىنىڭ يېقىنقى بىر قېتىملىق پلانېت تەرىپىدىن توسۇلۇش ھادىسىسى 1783 يىلى 11 ئاينىڭ 10 كۈنى يۈز بەرگەن ، توسقۇچى پلانېت ۋېنېرا ، كېيىنكى قېتىملىق توسۇلۇش ھادىسىسى 2197 يىلى 9 ئاينىڭ 2 كۈنى يۈز بېرىدۇ ، بۇ قېتىمقىدا توسقۇچى يەنىلا ۋېنېرا .

كۈز پەسلى قۇياش سۇنبۇلە يۇلتۇز تۈركۈمىدىن ئۆتىدۇ ، بۇ ھال سىپىكىنىڭ مول ھوسۇلنىڭ سىمۋولى بولۇپ قېلىشىغا سەۋەب بولغان ، سىپىكىنىڭ ئىسمى لاتىنچىدىن كەلگەن ( سىپىكا ۋىرگىنىس ) بولۇپ ، قىزنىڭ قولىدىكى باشاق دېگەن مەنىدە . ئوتتۇرا ئەسىردە سىپىكا سىگان يۇلتۇزلىرىنىڭ بىرى دەپ قارالغان . سىپىكىنى تېپىش ئۇسۇلى : سەھەر سائەت تۆتلەردە غەربىي جەنۇبتا بىرى ئېگىزدە بىرى پەستە ئىككى يۇلتۇز بار ، ئۇستىدىكى يورۇقراقى ئاركتۇر ، پەستىكىسى دەل سىپىكا ، ياكى بولمىغاندا كەچ سائەت ئونلاردا شەرقىي جەنۇب تەرەپتە يورۇقراق بىر يۇلتۇز بار ، سىپىكا دەل ئۆزى . بۇ يۇلتۇزغا نىسبەتەن مېنىڭ ھېسىياتىم مۇرەككەپراق .

تىرناق ئىچىدىكىنى پۈتۈنلەي ئۆزۈم يازغان ، خاتالىق يوق دەپ كېسىپ ئېيتالمايمەن .

Algol1991

كۈندە بىر يۇلتۇز ( 26-سان )

2015-يىل 3-ئاينىڭ 20-كۈنى كېچە
پوللۇكىس : جەۋزە ( قوشكېزەك ) يۇلتۇز تۈركۈمى بېتا يۇلتۇزى .
北河三（双子座β），Pollux ( Gemini β )
كۆرۈنمە يورۇقلۇق دەرىجىسى ( 1.16 ) .
كۈن ئولتۇرۇش ۋاقتى : كەچ 6:37 ، پوللۇكىسنىڭ ئۇپۇقتىن ئېگىزلىكى 64 گرادۇس ، ئورنى شەرق .
چىڭقى چۈش ۋاقتى : كەچ 8:24 ، پوللۇكىسىنىڭ ئۇپۇقتىن ئېگىزلىكى 76 گرادۇس .
ئولتۇرۇش ۋاقتى : ئەتىسى سەھەر 4:14 ، ئورنى غەربىي شىمال .
قوللىنىلغان ۋاقىت : شەرقىي 6- رايون ( UTC+6 ) .

پوللۇكىس ئاسماندىكى ئون يەتتىنچى يورۇق يۇلتۇز . دىققەت قىلىشقا تېگىشلىك يېرى پوللۇكىس قوشكېزەكتىكى ئەڭ يورۇق يۇلتۇز ، ئەمما نامى بېتا . بۇنىڭ سەۋەبى ئەلفا يۇلتۇز بولغان كاستور بىر يورۇقلۇق ئۆزگىرىش دەۋرى 470 يىل بولغان ئۆزگىرىشچان يۇلتۇز ، ھازىر كاستورنىڭ ئاجىزراق مەزگىلى . كاستور ئىنتايىن مۇرەككەپ بىر يۇلتۇز ، بۇنى كېيىن دېيىشەيلى . پوللۇكىسنىڭ بىز بىلەن بولغان ئارلىقى 33.72 يورۇقلۇق يىلى .بۇ ئىككى يۇلتۇز  رىم ئەپسانىسىدىكى ئەڭ چوڭ ئىلاھ زېۋس بىلەن لىدانىڭ قوشكېزەك ئوغۇللىرى بولغان كاستور بىلەن پوللۇكىسقا ۋەكىللىك قىلىدۇ ، پوللۇكىسنىڭ ئىسمى مۇشۇ يەردىن كەلگەن . پوللۇكىس قىشلىق ئالتە تەرەپلىكنىڭ بىر چوققىسى .

پوللۇكىسنى تېپىش ئۇسۇلى : كەچلىكى يۇپىتېر بىلەن كاپېللانىڭ ئوتتۇرسىغىراق توغرا كېلىدىغان ئىككى يورۇق يۇلتۇز بار ، يۇپىتېرغا يېقىنراق يورۇقراقى پوللۇكىس ، يەنە بىرسى كاستور . قوشكېزەك يۇلتۇز تۈركۈمى ئېكلىپتىكا سىزىقى كېسىپ ئۆتىدىغان يۇلتۇز تۈركۈملىرىنىڭ ئىچىدە ئەڭ ئېگىز بىرسى ، بۇنىڭ ئىسپاتى قۇياش قوشكېزەك يۇلتۇز تۈركۈمىدىكى ۋاقىتتا ئەڭ ئېگىز نۇقتىغا يېتىدۇ ( يەنى ئالتىنچى ئايدا ) . بولمىسا پوللۇكىسمۇ ئېكلىپتىكىغا خېلى يېقىكەن . پوللۇكىس ئاسمان ئېكۋاتورىنىڭ شىمالىدا ، ئۇپۇقتىن ئېگىز ۋاقتى 16 سائەت .