مايۈننىڭ ئىگىلىك تىكلەش دەرىسخانىسى

okoguqi9

	ئاپتورنىڭ ئەجرىگە رەھمەت!

WWW.UYHQT.COM

	بىرىنچى دەرس تۆتىنچى پارگىراف ۋاز كېچىش ئەڭ چوڭ مەغلۇبىيەت، قەتئىي داۋاملاشتۇرغاندىلا غەلبىنى قولغا كەلتۈرگىلى بولىدۇ    ئادەمنىڭ ھاياتىدا بىر قىسىم بوران –چاپقۇنلارنىڭ بولۇشى، ھەرخىل ئەھۋاللارغا دۇچار بولۇشى ۋە ئوڭۇشسىزلىققا ئۇچراپ مەغلۇب بولۇشىنىڭ ھەممىسى نورمال ئىش. ئەمما بىر قىسىم كىشىلەر خۇددى پارنىكتا ئۆسكەن گۈلگە ئوخشاش زەربىگە بەرداشلىق بېرەلمەيدۇ، ئوڭۇشسىزلىققا ئۇچرىغان ھامان ئۆزىنى يوقىتىپ قويۇپ ئورنىدىن تۇرالمايدۇ – دە، ئۆزىنى نابۇت قىلىدۇ. شۇنى بىلىشىمىز كېرەككى، بارلىق مەغلۇبىيەتلەرگە تاقابىل تۇرغىلى بولىدۇ. ئادەم بىر قېتىملىق مەغلۇبىيەت سەۋەبلىكلا ئۈمىدسىزلەنسە، ئارزۇسىدىن ۋاز كەچسە، ئۇنداقتا غەلبە قۇشى مەڭگۈ ئۇنىڭ بېشىغا قونمايدۇ.    بىر ئادەم بولۇپ، ئىگىلىك تىكلەيمەن دەپ ۋەيران بولۇپ ھەممە نەرسىسىدىن ئايرىلىپ قالغاچقا،ئامالسىزلىقتىن ئوغرىلىق قىلغان ھەمدە تۇتۇلۇپ قېلىپ ئۈچ يىللىق قاماق جازاسىغا ھۆكۈم قىلىنغان. جازا مۇددىتى توشۇپ قويۇپ بېرىلگەندىن كىيىنمۇ قىلدىغان ئىش تاپالماي، كۈندە ھاراق ئىچىپ يۈرگەن. ئۇنىڭ ئەتراپىدىكىلەر بۇنىڭغا چىداپ تۇرالماي ئۇنىڭدىن: «سەن تېخى ناھايىتى ياش تۇرساڭ، نېمىشقا ئازراق ئىش تېپىپ قىلمايسەن؟»دەپ سوراپتۇ.    بۇ ئادەم ئاچچىق كۈلۈپ تۇرۇپ: «مەن نېمە ئىشمۇ قىلالايىتتىم، ئىگىلىك تىكلەيمەن دەپ ھەممە نەرسەمدىن ئايرىلدىم، خىزمەت ئىزدىسەممۇ ھېچكىم مېنى كېرەك قىلمىدى. مەن بۇھاياتىمدا يەنە نېمە ئىش قىلالايىتتىم؟» دەپ جاۋاب بېرىپتۇ. تەخمىنەن بىر يىلدىن كىيىن، ئۇ دۆلەت مۇداپىئەسىدە ئىشلىتىلىدىغان ئېلېكتىر سىمىنى ئوغرىلىغانلىقى سەۋەبلىك مۇددەتسىز قاماق جازاسىغا ھۆكۈم قىلىنىپتۇ، بۇنىڭ بىلەن ئۇنىڭ ھاياتى توزغاقتەك توزۇپ كېتىپتۇ.   ئوڭۇشسىزلىققا ئۇچراش ھەرگىزمۇ ھاياتنىڭ ئاخىرلاشقانلىقىدىن دېرەك بەرمەيدۇ، بۇ سەۋەبلىك قايتا سىناشقا جۈرئەت قىلالماسلىق، ئۆزىنى يوقىتىپ قويۇش پەقەت سىزنىڭ ئاجىزلىقىڭىزنى كۆرسىتىپ بېرىدۇ، خالاس. شۇنى بىلىش كېرەككى، بارلىقئوڭۇشسىزلىق، مەغلۇبىيەتلەرنىڭ ھەممىسىگە تاقابىل تۇرغىلى بولىدۇ، پەقەت ئوڭۇشسىزلىققا ئۇچرىغاندىن كىيىن، تىزلىكتە پۇشايمان ۋە ئازاب ئىلكىدىن قۇتۇلۇپ چىقىش، مەغلۇبىيەتنىڭ سەۋەبىنى تېپىپ چىقىپ ھەمدە خاتالىقىنى تۈزىتىپ ئالغا ئىلگىرلىيەلىسىڭىز، ئۇنداقتا يېپ يېڭى ۋە مۇنەۋۋەر «سىز» دىن يەنە بىرنى بارلىققا كەلتۈرەلەيسىز.    مايۈن ئىگىلىك تىكلەشنى ئەمدىلا باشلىغان ۋاقىتلىرىدىمۇ نۇرغۇن قىيىن ئەھۋاللارنى باشتىن كەچۈرگەن. تۇنجى قېتىم خەيبو تەرجىمە جەمئىيىتىنى قۇرغاندا، ئۇنىڭ بىر ئايدا تاپقان بارلىق كىرىمى ئارانلا 700 يۈەن بولغان، ئەمما ھەر ئايلىق ئۆي ئىجارىسى2400 يۈەن ئىدى. ياخشى نىيەتلىك خىزمەتداشلىرى ۋە دوستلىرى ئۇنى قاراملىق قىلماسلىققا ئۈندىگەن، ھەتتا ئۇنىڭ ھەمراھلىرىنىڭمۇ ئىشەنچىسى تەۋرىنىشكە باشلىغان.    بىراق مايۈن ۋاز كېچىشنى ئويلاپ باقمىغان، تەرجىمە جەمئىيىتىنى داۋاملىق ساقلاپ قېلىش ئۈچۈن،مايۈن يەنە ئىچ كىيىم، سوۋغاتلىق بويۇم ۋە دورا قاتارلىقلارنى سېتىشنى باشلىغان،ئۇ نۇرغۇنلىغان خىزمەتچىلەرگە ئوخشاش ھەممە تەرەپكە چېپىپ يۈرۈپ سودا قىلغان،كەمسىتىش ۋە بوزەك قىلىنىشلارغىمۇ ئۇچرىغان.    تەرجىمە جەمىيىتى مايۈننىڭ بۇ كىچىك مەھسۇلاتلارنى سېتىشىغا تايىنىپ توپتوغرا ئۈچ يىل داۋاملاشقان. 1995 – يىلى، تەرجىمە جەمئىيىتى ئاخىرى پايدا ئېلىشنى باشلىغان.ھازىر، خەيبو تەرجىمىچىلىك جەمئىيىتى خاڭجۇدىكى ئەڭ چوڭ كەسپىي تەرجىمە ئاپپاراتىغا ئايلاندى، گەرچە ھازىرقى «ئەلى بابا» غا سېلىشتۇرغىلى بولمىسىمۇ، ئەمما خەيبو تەرجىمىچىلىك جەمىيىتى مايۈننىڭ ئىگىلىك تىكلەش ھېكايىسى ئىچىدىكى دەۋر بۆلگۈچ ئەھمىيەتكە ئىگە قۇرلار بولۇپ ھېسابلىنىدۇ.    ئىككىنچى قېتىملىق ئىگىلىك تىكلەش سەپىرىدە، مايۈن ۋە ئۇنىڭ ھەمراھلىرى بىرلىكتە يۈز مىڭ يۈەن جۇغلاپ بىر ئۇچۇر تور بېكىتىنى قۇرۇپ چىققان. نۇرغۇنلىغان كىشىلەر ئېنتېرنىت شىركىتى قۇرۇشتا نەچچە مىليون بولمىسا بولمايدۇ دېيىشكەن. مايۈن قۇرغان «جۇڭگو ئۇچۇر بېتى» گە نىسبەتەن، مەبلەغ ھەقىقەتەن ئىگىلىك تىكلەشنىڭ دەسلىپىدىكى مۇھىم مەسىلە ئىدى. چىقىم كۆپ، كەسپىي تۈرلىرى ئاز بولغاچقا، ئەڭ جىددى ۋاقىتلاردا شىركەتنىڭ ھېساباتىدا پەقەت 200 يۈەنلا قالغان ۋاقىتلارمۇ بولغان ئىدى. بىراق مايۈن ئۆزىنىڭ مەڭگۈ ۋاز كەچمەيدىغان روھىغا تايىنىپ نۇرغۇنلىغان قىيىنچىلىقلارغا خاتىمە بەرگەن ھەمدە تىجارەت سوممىسىنى 0 دىن نەچچە مىليونغا چىقارغان.    ئۈچىنچى قېتىم، يەنى كۆپچىلىككە ناھايىتى تونۇشلۇق بولغان «ئەلى بابا» تور بېكىتىنى قۇرۇپ چىققاندا، مايۈننىڭ بۇ قېتىمقى ئىگىلىكىنىڭ دەسلەپكى قەدەملىرىمۇ ناھايىتى تەستە ئېلىنغان. ئۇ ۋاقىتتا ھەربىر ئادەمنىڭ ئىش ھەققى پەقەت 500 يۈەن بولۇپ، مايۈن شىركەت چىقىمىغا ئىشلىتىلدىغان ھەربىر سېنىت پۇلنىمۇ ناھايىتى تېجەپ ئىشلىتەتتى.سىرتلارغا چىقىپ ئىش بېجىرمەكچى بولسىمۇ، «سىرتلاردا پىيادە مېڭىش» روھى بۇيىچە ماشىنىغا كۆپ ئولتۇرمايىتتى. ئېيتىشلارغا قارىغاندا، بىر قېتىم ھەمراھلار ھەممىسى بىرلىكتە چىقىپ نەرسە سېتىۋالغان، نەرسىلەر ناھايىتى كۆپ بولغاچقا ئۇلار ماشىنىدا ئولتۇرماقچى بولغان، بىراق ئۇلار «سانتانا» ماركىلىق ماشىنىدا ئولتۇرۇشنى رەت قىلىپ، داۋاملىق «شالى» ماركىلىق ماشىنىنى ساقلىغان، چۈنكى «شالى» نىڭ كىرا ھەققى ھەر كلومېتىردا 2 يۈەن ئەرزان ئىدى.    ھەتتا مەلۇم بىر مەزگىل ۋاقىتتا، «ئەلى بابا» تور بېكىتى مەبلەغ قىيىنچىلىقى سەۋەبلىك ئۆزىنى قامدىيالمايدىغان ھالەتكىمۇ كېلىپ قالغان. بىراق مايۈن ۋە ئۇنىڭ ئىگىلىك تىكلىگۈچى ھەمراھلىرىنىڭ بوشاشماس تىرىشچانلىقى ئارقىسىدا، ئۇلار ئاخىرىدا جۇڭگو ئېنتېرنىت ساھەسىدىكى ئەڭ چوڭ مۆجىزىنى ياراتقان.    مايۈن شۇنداق دىگەن: «بۈگۈن ناھايىتى ئازابلىق، ئەتە تېخىمۇ ئېچىنىشلىق، كەلگۈسى بولسا ناھايىتى گۈزەل، بىز چوقۇم تىرىشىپ كەلگۈسىدىكى شان – شەرەپكە ئىگە بولۇشىمىز كېرەك!» بۇنىڭدىن كۆرۈۋالغىلى بولىدۇكى، ئىگىلىك يارىتىش جەريانىدا ئوڭۇشسىزلىق ۋە مەغلۇبىيەتتىن ساقلانغىلى بولمايدۇ، شۇڭا بىز تىرىشىشىمىز، قەتئىي داۋاملاشتۇرۇشىمىز، بۈگۈنكى تىرىشچانلىقىمىز ۋە ئەتىدىكى تېخىمۇ تىرىشچانلىقىمىز ئارقىلىق كەلگۈسىدىكى غەلبىنى قولغا كەلتۈرۈشىمىز كېرەك. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

ئامان1

	ئەسسالامۇ - ئەلەيكۇم:     مەن بۇ تورداش يوللىغان «بايلار بۆرە تەبىئەتلىك، نامراتلار قوي تەبىئەتلىك» ناملىق كىتابنى تولۇق ئوقۇدۇم، ئۇ كىتابتىكى پىرسۇناژلارنىڭ ئىگىلىك يارىتىش روھى ئادەمنى قايىل قىلىدىكەن. ئەمدى مايۈن ھەققىدە يېزىلغان بۇ كىتابنى ئوقۇۋاتىمەن. مايۈننىڭ جۇڭگو تور سودىسى ساھەسىدىكى زور رولىنى ھېچكىم ئىنكار قىلالمايدۇ، شۇڭا ئۇنىڭ ئىگىلىك تىكلەش كەچۈرمىشىگە قىزىقىدىغان قېرىنداشلارنىڭ بۇ كىتابنى كۆرۈپ قويۇشىنى تەۋسىيە قىلىمەن.    تەرجىمىگە ئۇيۇشتۇرغان ۋە تەرجىمە قىلغانلارنىڭمۇ ئۆزىنىڭ ئەجرىگە لايىق ھوسۇل ئېلىشىغا تىلەكداشمەن. رەھمەت سىلەرگە!

WWW.UYHQT.COM

	بىرىنچى دەرس بەشىنچى پارگىراپ قاخشىماستىن ئاكتىپ روھى ھالەتنى ساقلاش، مەڭگۈ كۈلۈمسىرەش كېرەك    مايۈن مۇنداق دىگەن: «كۆپ يىللىق ئىگىلىك تىكلەش ۋە نۇرغۇنلىغان كىشىلەر بىلەن ئارلىشىش ئارقىلىق شۇنى ھېس قىلدىمكى، پوزىتسىيەسى پاسسىپ كىشىلەرنىڭ مۇۋەپپەقىيەت قازىنىشى مۇمكىن ئەمەس، ئۇلار ئىگىلىك تىكلەشكە يارىمايدۇ.»    ئەمەلىيەت شۇنى ئىسپاتلىدىكى، نۇرغۇنلىغان كىشىلەر قىيىنچىلىق، ئوڭۇشسىزلىققا ئۇچرىغان ھامان ئۆزىگە پۇرسەت كەلمىگەنلىكىدىن، قوللايدىغان كىشىلەرنىڭ يوقلۇقىدىن ۋە مەبلەغنىڭ يىتەرلىك بولمىغانلىقىدىن قاخشايدۇ. ئۇلار دائىم ئۆزلىرىنى ئۆزى ياسىغان «تۈرمە» گە قامىۋېلىپ، خۇشال بولۇشقا پېتىنالماسلىق بىلەن بىر ۋاقىتتا، مۆجىزە يارىتىشقا بولغان ھەركەتلەندۈرگۈچ كۈچ ۋە ئىشەنچىسىنى يوقىتىپ قويغان.    ئەمەلىيەتتە، ھەرقانداق غەلبە قازانغۇچى ئۆزىنىڭ نىشانىغا مۇنداقلا يەتكەن ئەمەس، بىز زەربىگە ئۇچرىغانسىرى ئاكتىپ روھى ھالىتىمىزنى شۇنچە جارى قىلدۇرۇشىمىز كېرەك، قەدىمكىلەر توغرا ئېيىتقان: «روھى چۈشكۈنلەشسە ئادەمنىڭ ئېتىمۇ چاپالمايدۇ؛ روھ كۆتۈرەڭگۈ بولغاندا ھەممە جاي ئالتۇن كۆرۈنىدۇ.»    شۇ سەۋەبتىن، ھەقىقىي جىگىرى بار كىشىلەر ئوڭۇشسىزلىققا ئۇچرىغان ۋاقىتتا سالماقلىقنى ساقلايدۇ، ئەتراپتىكى كىشىلەرگە ئۆزىنىڭ بەختسىزلىكىدىنمۇ دەرت تۆكمەيدۇ؛ ئۇلار ئېھتىمال ئادەتتىكىگە قارىغاندا تېخىمۇ ئويچان بولۇپ قېلىشى مۇمكىن، بىراق ئۆزىنىڭ غايىسىدىكى تۇرمۇشقا بولغان قوغلىشىشىنى ھەرگىزمۇ بوشاشتۇرمايدۇ؛ ئۇلار ھەممە ئىشلارنىڭ ياخشى بولۇپ كېتىدىغانلىقىغا، ئۆزلىرىنىڭ ھامان بىر كۈنى باش كۆتۈرۈپ چىقىدىغانلىقىغا ئىشىنىدۇ. ئەمەلىيەتتىمۇ دەل شۇنداق، سىز پەقەت ئىزچىل ئۆزىڭىزنىڭ ئەقىدىسىگە ئىشەنسىڭىزلا، مۇۋەپپەقىيەت سىزگە يېقىنلاپ كېلىدۇ.    «ئەلى بابا» ئەمدىلا قۇرۇلغان ۋاقىتتا، پايدا ئالالمايلا قالماستىن، خىزمەتچىلەرنىڭ ئىش ھەققىنىمۇ پۇل قەرز ئېلىپ تارقاتقان. ئۇ ۋاقىتتا خىزمەتچىلەر ناھايىتى ئۈمىدسىزلەنگەن بولۇپ، ئۇلار ھەتتا «ئەلى بابا» بىر شىركەتكىمۇ ئوخشىمايدىكەن دەپ قارىغان.    2001 – يىلى، دۇنيا ئىقتىسادىنىڭ چېكىنىشى ۋە تور سودىسىنىڭ كۆپۈكلىشىش تەسىرى سەۋەبلىك، جۇڭگونىڭ ئېنتېرنىت تورى كەسپى خەتەرلىك باسقۇچقا كىرىپ قالغان. بۇ مەزگىلدىكى بىر قىسىم داڭلىق ئېنتېرنىت شىركەتلىرى، مەسىلەن: «شىنلاڭ»، «ۋاڭيى» قاتارلىقلارنىڭ ئەھۋالىمۇ ناھايىتى يامان بولۇپ، «8848» تورى ھەتتا سوت تەرىپىدىن پېچەتلەنگەن، بىر قىسىم پىشىپ يىتىلمىگەن شىركەتلەرمۇ تۈركۈملەپ ۋەيران بولغان.    گەرچە ئەھۋال مۇشۇنداق قىيىن بولسىمۇ، مايۈن ئىزچىل مۇنداق دەپ قارىغان: كىشىلىك ھاياتتا چوقۇم بىر قىسىم ئەسەبىي غايىلەر ئارقىلىق ئۆزىمىزنى ئىلھاملاندۇرۇپ تۇرۇشىمىز كېرەك، «ئەلى بابا» نى قۇرۇشتىكى مەخسەت ھەرگىزمۇ ئۇنىڭ كەلگۈسىنىڭ پارلاقلىقى سەۋەبلىك ئەمەس، بەلكى ئۇنىڭدا بىر بۈيۈك غايىنىڭ بولغانلىقىدا.    2002 – يىلى ئېنتېرنىت ئىقتىسادىنىڭ كۆپۈكلىشىشى چېكىگە يەتكەن دەۋر بولغان، مايۈن «ئەلى بابا» نىڭ ئۇ ۋاقىتتىكى تەرەققىيات باش تېمىسىنى «ھايات قېلىش» دىگەن سۆزگە يىغىنچاقلاپ، شىركەت خىزمەتچىلىرىنىڭ بەرداشلىق بېرىشىنى، گۈللىنىش دەۋرىنىڭ ھامان كېلىدىغانلىقىغا ئىشىنىشىنى ئۈمىد قىلغان. بۇ ۋاقىتتا، ئۇلار نۇرغۇنلىغان كىچىك كارخانا خېرىدارلىرىنىڭ رەھمەت خېتىنى تاپشۇرۋالغان، بۇ رەھمەت خەتلىرىدە شۇنداق يېزىلغان: «ئەلى بابا» بولغاچقىلا، بىز زاكاس قوبۇل قىلالىدۇق، ھەمدە يېڭى خىزمەتچىلەرنى قوبۇل قىلىپ شىركەت كۆلىمىنى كېڭەيتەلىدۇق. بۇ چاغدا مايۈن مۇنداق دىگەن: «بۇ ماڭا شۇنداق بىر ئىشنى ھېس قىلدۇردى، مەن ھازىر 10 كىچىك كارخانىغا ياردەم قىلدىم، كەلگۈسىدە 100 گە ياردەم قىلىمەن، يىراق كەلگۈسىدە بولسا 100 مىڭ كارخانا بىزنىڭ ياردىمىمىزنى ساقلاۋاتقان بولىدۇ، شۇڭا بۇ بازار چوقۇم مەۋجۇتلۇقىنى ساقلايدۇ.»    شۇ يىلنىڭ كىيىنكى يېرىمىدا، «ئەلى بابا» مۆجىزىلەرچە ئامان قالغان ۋە پايدىمۇ ياراتقان.    «ئەلى بابا» نىڭ ئەڭ قىيىن ۋاقىتلىرىدا، مايۈن ۋە ئۇنىڭ ھەمراھلىرى ئاۋۋالقىدەكلا ئاكتىپ پوزىتسىيەدە بولغان، ئۇ مۇنداق دىگەن: «ئۇ ۋاقىتتا بىز ھەر قېتىم بىر ئۇچۇرنى تەھرىرلىسەك، ئۆزىمىزگە شۇنداق دەيتۇق: ئېھتىمال بۇ ئۇچۇر بىر خېرىدارنى، بىر كارخانىنى قۇتۇلدۇرۇپ قېلىشى مۇمكىن، ئېھتىمال (تاۋباۋ) دىكى بىر زاكاس بىر ئادەمنىڭ ھاياتىنى ئۆزگەرتىۋېتىشى مۇمكىن.» بۇ خىلدىكى ئۆزىگە تەسەللىي بېرىش ۋە ئۆزىنى ئىلھاملاندۇرۇشنىڭ تۈرتكىسى ئاستىدا، ئۇلار قىيىن ئۆتكەلدىن ئۆتۈپ كەتكەن.    خۇددى 2005 – يىللىق جۇڭگونى تەسىرلەندۈرگەن شەخس خوڭ جەنخۇينىڭ ئېيىتقىنىدەك: «قىيىنچىلىق ئالدىدا، بىزنىڭ ئۇنىڭغا يۈزلىنىش ۋە ھەل قىلىش مەسئۇليىتىمىز بار.» يېڭى دەۋرنىڭ ياشلىرى بولۇش سۈپىتىمىز بىلەن، بىز مەغلۇبىيەتنىڭ قورقۇنچلۇق ئەمەسلىكىنى چۈشىنىشىمىز كېرەك، خۇددى بىز ھەمىشە جاسارەت بىلەن: «جاپانى چەكمىگەن ئاشىق، جاناننىڭ ۋەسلىگە يەتمەس>>دەپ ناخشا توۋلىغاندەك ؛<<ھەر قانداق ئادەمنىڭ مۇۋەپپەقىيىتى مۇنداقلا كېلىپ قالمىغان.» دىگەن روھى ھالەتتە مەغلۇبىيەتكە يۈزلىنىشىمىز كېرەك.    شۇنىڭ ئۈچۈن، ئىگىلىك تىكلەشكە ئىرادە باغلىغان ئادەم چوقۇم مۇنداق بىر نۇقتىنى چۈشىنىشى كېرەك: ئىگىلىك تىكلەش جەريانىدا مەيلى قانداق قىيىنچىلىققا دۇچار بولۇشىدىن قەتئىينەزەر، چوقۇم ئاكتىپ روھى ھالەتنى ساقلاش كېرەك. ئاكتىپ روھى ھالەت روھنى ئۇرغۇتۇپلا قالماستىن، يەنە باشقىلارنىمۇ يۇقۇملاندۇرۇپ، ئۇلارنىڭ سىز بىلەن بولغان ھەمكارلىقىنى ئىلگىرى سۈرىدۇ.    خۇددى مايۈن ئېيىتقاندەك: «ئاكتىپلىق ئۆزىگە – ئۆزى تەسەللىي بېرىش، سول قول ئارقىلىق ئوڭ قولنى ئىسسىتىش بولۇپلا قالماستىن، يەنە باشقىلار بىلەن ئۆزىنىڭ خۇشاللىقىدىن تەڭ بەھرىمان بولغىلى بولىدۇ.» ئىگىلىك تىكلىگۈچى ئۆزىنى خۇشال قىلىپلا قالماستىن، يەنە باشقىلارنى خۇشال قىلىشى، باشقىلارغا ئۆزىنىڭ قىممىتىنى ھېس قىلدۇرۇشى كېرەك. باشقىلارغا ئۆز قىممىتىنى ھېس قىلدۇرالىغان ئادەم تېخىمۇ يىراققا بارالايدۇ، ماڭغان قەدەملىرى تېخىمۇ مۇستەھكەم بولىدۇ.»    شۇنداق، كىشىلەر دائىم < تەڭرى سىز ئۈچۈن بىر ئىشىكنى ئېتىپ قويغان بولسا، ئۇ چوقۇم سىز ئۈچۈن يەنە بىر دېرىزىنى ئېچىپ قويغان بولىدۇ>، دېيىشىدۇ. بىراق ئىگىلىك تىكلەش جەريانىدا، تەڭرى ئېھتىمال سىز مەغلۇب بولغاندىن كىيىن ئاندىن سىزگە دېرىزىنى ئېچىپ بېرىشى مۇمكىن. سىزنىڭ ئاخىرىغىچە بەرداشلىق بېرەلىشىڭىز دەل سىزنىڭ ئوڭۇشسىزلىق ۋە قىيىنچىلىققا ئاكتىپ روھى ھالەتتە يۈزلىنىش – يۈزلىنەلمەسلىكىڭىزگە باغلىق.    ئەلۋەتتە، بۇ سىزنىڭ قارىغۇلارچە ئىش قىلىشىڭىزدىن دېرەك بەرمەيدۇ، سىزدە چوقۇم غەلبە قىلىشقا بولغان ئىشەنچ بولۇشى، بىراق ئېچىنىشلىق رېئاللىققا تېخىمۇ باتۇرلۇق بىلەن يۈزلىنىشىڭىز كېرەك. پەقەت شۇنداق قىلغاندىلا، سىز ئاندىن ئىگىلىك تىكلەش جەريانىدا يولۇققان تۈرلۈك قىيىنچىلىقلارغا خاتىمە بېرىپ ۋە ھەل قىلىپ، ئاخىرىدا «زۇلمەتتىن كىيىنكى شەپەق» نى كۆرەلەيسىز. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تەرجىمان:ئابدۇللا ئۆمەر تور بەت ئادرېسى:WWW.UYHQT.COM تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	بىرىنچى دەرس ئالتىنچى پارگىراپ قەلب ئازابقا بەرداشلىق بېرەلەيدۇ    مەيلى تېلېۋېزىيە سۆھبەت پروگراممىلىرىدا بولسۇن ياكى تور ساھەسىدىكى غالبىيەتچىلەر قاتارىدا بولسۇن، بىز مايۈننىڭ ھەرخىل ئوبرازلىرىنى كۆرەلەيمىز. ئۇ كىشىلەر تەرىپىدىن «ئىگىلىك تىكلەش ئاتىسى» دەپ ھۆرمەت قىلىنىدۇ، ئۇ يەنە خارۋارد، سىتەنفورد، بېيجىڭ ئۇنىۋېرسىتىتى قاتارلىق دۇنياغا داڭلىق مەكتەپلەردە نۇتۇق سۆزلەشكە تەكلىپ قىلىنغان، بىلايىر، كېلىنتون قاتارلىق سىياسىي ساھەدىكى داڭلىقلار بىلەن چۈشلۈك تاماق يىيىش شەرىپىگە ئېرىشكەن، ھەتتا «فوربىس» ژورنىلىنىڭ مۇقاۋىسىغىمۇ چىققان، بۇلارنىڭ ھەممىسى مايۈننىڭ ئىززەت – ھۆرمىتىنى ئاشۇرغان.    شۇنى بىلىش كېرەككى، ھەربىر مۇۋەپپەقىيەت قازانغۇچى نۇرغۇنلىغان ئاچچىق كۆز – ياش، بوزەك قىلىنىش ۋە ئازابلارنى باشتىن كەچۈرىدۇ، مايۈنمۇ بۇنىڭ سىرتىدا ئەمەس.    جان ساقلاش، ئوزۇن مەزگىللىك تەرەققىيات، مەبلەغكە ئېرىشىش ۋە يۆلەنچۈك تېپىش ئۈچۈن، 1996 – يىلى يىل بېشىدا، مايۈن «جۇڭگو ئۇچۇر بېتى» بىلەن ««شىخۇ» تورىنى بىرلەشتۈرۈشنى قارار قىلغان. «جۇڭگو ئۇچۇر بېتى» %30 پاينى، «شىخۇ» تورى تەۋە بولغان جەنۇب شىركىتى %70 پاينى كونترول قىلىدىغان بولغان. مەبلەغ بىرلەشتۈرۈلگەندىن كىيىنكى پاي چەكلىك شىركىتىدە مايۈن يەنىلا باش لېدىر بولغان، بىراق جەنۇب شىركىتى چوڭ پايچىك ئورنىدا تۇرغان.    مەبلەغ جەھەتتىكى قوللاشقا ئېرىشكەن «جۇڭگو ئۇچۇر بېتى» نىڭ كەسىپ كۆلىمى كېڭىيىشكە باشلىغان. 1996 – يىلى يىل ئاخىرغا كەلگەندە، «جۇڭگو ئۇچۇر بېتى» پايدا يارىتىپلا قالماستىن، يەنە سودا سوممىسىنى 7 مىليونغا يەتكۈزگەن.    ئەمما ياخشى كۈنلەر ئوزۇنغا بارمىغان. بىر نەچچە ئايدىن كىيىن مايۈن ھەمراھلىرىنى باشلاپ سىرتقا كەسىپ كېڭەيتىشكە چىقىپ، قايتىپ كەلگەندىن كىيىن ئەھۋالدا ئۆزگىرىش بولغانلىقىنى بايقىغان. جەنۇب شىركىتى ئۆزلىرىنىڭ تولۇق مەبلەغتىكى بىر شىركىتىنى تىزىمغا ئالدۇرۇپ، ئۇنىمۇ «جۇڭگو ئۇچۇر بېتى» دەپ ئاتىغان ئىدى.    «جۇڭگو ئۇچۇر بېتى» ئاللىقاچان ئىگە بولغان ماركا داڭقىدىن پايدىلىنىش ئۈچۈن، جەنۇب شىركىتى «chinesepage.com» ناملىق تور بېكىتىنى قۇرۇپ، «جۇڭگو ئۇچۇر بېتى» نىڭ «chinapage.com» بىلەن يېقىنلاشتۇرغان. شۇنداق قىلىپ، خاڭجۇدا ئىككى دانە «جۇڭگو ئۇچۇر بېتى» تەڭ ساقلانغان.    يېڭى ئۇچۇر بېتى كونا ئۇچۇر بېتى ئاچقان يول ئارقىلىق مايۈننىڭ ئۇچۇر بېتىنىڭ بازىرىنى ئىگەللىمەكچى بولغان، بۇ ئىككى تور بەت بازار تالىشىپ قاتتىق رىقابەتلەشكەن. تورنىڭ ئاساسىي بېتى پۈتكەندىن كىيىن، ئۇلار ئۆز – ئارا مەنپەئەت تالاشقان. بۇ ۋاقىتتا، مايۈن ئاندىن ئۆزىنىڭ يەنە ئالدانغانلىقىنى ھېس قىلغان، قارشى تەرەپ مۇنداق دىگەن: « سىلەر بىلەن رىقابەتلىشىپ بولالمىغاچقا، شۇڭا سىلەر بىلەن ھەمكارلاشقان. مەبلەغنى بىرلەشتۈرۈشتىكى مەخسەت ئاۋال سىلەرنى سېتىۋېلىپ كۆزدىن يوقىتىش، ئاندىن پۈتۈنلەي ئۆزۈمگە تەۋە بولغان (جۇڭگو ئۇچۇر بېتى) نى قۇرۇش ئىدى.» بوزەك قىلىنغان مايۈن «ئۇچۇر بېتى» نى ساقلاپ قېلىش ئۈچۈن قارىشى تەرەپنى «يېڭى ئۇچۇر بېتى» نى تاقىۋېتىشكە مەجبۇرلىغان ھەمدە ئاچچىقلانغانلىقتىن ئىستىپا بەرگەن.    «جۇڭگو ئۇچۇر بېتى» دىن ئايرىلىش مايۈنگە نىسبەتەن ئېيىتقاندا ئۆزىنىڭ يولىنى ئەتكەنلىك ئىدى. ئىشقىلىپ، «جۇڭگو ئۇچۇر بېتى» ئۇنىڭ ئىلگىرىكى ئىشلىرى ۋە كەلگۈسى، ئۇنىڭ بارلىق ئۈمىدى ۋە غايىسى ئىدى.    گەرچە ئېغىر زەربىگە ئۇچرىغان بولسىمۇ، بىراق مايۈن ئۆزىنى يوقىتىپ قويمىغان. ئۇ ئىگىلىك تىكلەشكە باشلىغاندىن تارتىپ ئۇچرىغان كەمسىتىش ۋە مەسخىرىلەر ساناپ تۈگەتكۈسىز ئىدى، ئۇ مۇنداق دىگەن: «بۇنداق ئىشلار ناھايىتى كۆپ بولۇپ كەتتى. ھەر قېتىملىق زەربە ئادەمنى تېخىمۇ كۈچلەندۈرەتتى. مەن يەنە شۇنداق ئويلايمەن، ئۈمىد قانچە چوڭ بولغانسىرى، ئۈمىدسىزلىك شۇنچە چوڭ بولىدىكەن. شۇنىڭ ئۈچۈن مەن دائىم ئۆزۈمگە ئەتە تېخىمۇ نەس باسىدۇ، تېخىمۇ نەس باسىدىغان ئىشلار يۈز بېرىدۇ دەپ تۇرىمەن، ئۇنداقتا ئەتە ھەقىقەتەن زەربە كەلسىمۇ، مەن ھېچقانچە قورقۇپ قالمايمەن. سىز ماڭا زەربە بېرىشتىن باشقا يەنە مېنى نېمە قىلالايسىز؟ كېلە قىيىنچىلىق! مەن ساڭا روبىرو تۇرىمەن. زەربىگە قارىشى تۇرۇش ئىقتىدارى يۇقىرى كۆتۈرۈلگەن ئىكەن، ھەقىقىي ئىشەنچمۇ پەيدا بولىدۇ.»    بىر ئىگىلىك تىكلىگۈچى بولۇش سۈپىتى بىلەن، مايۈن نۇرغۇن قېتىملاپ بوزەك قىلىنىشلارغا ئۇچرىغان. ئۇ دوستلىرىنىڭ خاتا چۈشىنىشىگە ئۇچرىغان، «ئالدامچى» دىگەن تۆھمەتلەرگە بەرداشلىق بەرگەن. كىشىلەرنىڭ ئالدامچىلىقىغا ئۇچرىغان... ئەلۋەتتە، مايۈنلا ئەمەس، يەنە نۇرغۇنلىغان ئىگىلىك تىكلىگۈچىلەر ئۆزلىرىنىڭ ئىگىلىك تىكلەش سەپىرىدە بۇنداق ئوڭۇشسىزلىق، مەغلۇبىيەت، ئازاب ۋە بوزەك قىلىنىشلارغا ئۇچرىغان. بىر قىسىم ئىگىلىك تىكلىگۈچىلەر بۇلارغا بەرداشلىق بېرەلمىگەچكە ناھايىتى بالدۇرلا ۋاز كېچىپ مەغلۇب بولغان؛ پەقەت قەتئىي داۋاملاشتۇرالايدىغان ئاشۇ كىشىلەرلا ئاخىرقى غەلبىنى قولغا كەلتۈرگەن.    ۋۇجىيەنكاڭ بولسا جۇڭگودىكى تۇنجى 100 مېگابايىتلىق ئېلېكترونلۇق چاستوتا بىرىكتۈرگۈچنىڭ ئاساسلىق تەتقىقاتچىسى. ئۇ دۇنيادىكى تۇنجى ئادەم يۈزىنى پەرق ئېتىش سىستېمىسىنى تەتقىق قىلىشقا رىياسەتچىلىك قىلغان، ھەمدە جامائەت خەۋپسىزلىك ئورگانلىرىنىڭ سىناق ئىشلىتىشىدىن ئۆتكۈزگەن. ئۇ بۇ خىل تېخنىكىنى كۆچمەنلەر ئىدارىسىنىڭ چېگرىدىن كىرىپ – چىقىشنى باشقۇرۇش ئىشلىرىغا ئىشلىتىشنى ئۈمىد قىلغان، بىراق ئويلىمىغان يەردىن رەت قىلىنغان. ئۇنىڭدىن كىيىن، جىنايى ئىشلار خەۋپسىزلىك بۆلۈمىنىڭ بۇنىڭغا خېرىدار بولۇشىنى ئۈمىد قىلغان، بىراق بۇنىڭ نەتىجىسى ناھايىتى ئوزۇن ۋاقىت ساقلاش بىلەن تۈگەللەنگەن. يەككە قوللىنىش شەكلى، مۇقىملاشقان دۆلەت ئاپپاراتلىرى ئابونىتى، تىجارەتتە يېڭىلىق يارىتىش كەمچىللىكى قاتارلىق سەۋەبلەر بىزنىڭ ئادەم يۈزىنى پەرقلەندۈرۈش تېخنىكىمىزنى كەسىپلەشتۈرۈشنى دۇنيانىڭ ئارقىدا قالدۇرغان.    1998 – يىلى، سىنگاپور كېنىت رەقەم تېخنىكىسى تەتقىقات ئورنىنىڭ باش تەتقىقاتچىسى، مۇئاۋىن باشلىقى بولغان ۋۇجيەنكاڭ يىتەكچىلىكىدىكى تەجرىبىخانا كەسىپداشلىرى تەرىپىدىن «دۇنيا ئېلېكترون ساھەسىدىكى باشلامچى تەجرىبىخانىلارنىڭ بىرى» دەپ تەرىپلەنگەن. ئۇلار تەتقىق قىلىپ چىققان رەڭلىك خەرىتىنى رەقەملەشتۈرۈش مەھسۇلاتى ئەينى ۋاقىتتىكى ئەڭ تىز سودا يۇمشاق دېتالىدىن 20 ھەسسە تىز بولغان. ۋۇجىيەنكاڭ پۈتۈن دۇنيا مىقياسىدا بۇ خىل تېخنىكىنى ئۆتۈنۈپ بېرىش ئوبيىكتىنى ئىزدىگەن، ئامېرىكىدىكى بىر شىركەت دەسلەپكى قەدەمدە بۇنىڭغا نىسبەتەن مايىللىقىنى ئىپادىلىگەن، بىراق ئۇلار «ئاۋال تېخنىكىنى باھالىشىمىزغا ئۆتكۈزۈپ بېرىشى كېرەك» دىگەننى شەرت قىلغان.    بىلىم مۈلۈك ھوقۇقىنىڭ ساقلىنىشىغا بولغان ھەددىدىن زىيادە سەزگۈرلۈك سەۋەبلىك، بۇ رەھبەرلىك تەرىپىدىن رەت قىلىنغان. ئۇنىڭدىن كىيىن، بۇ خىل تېخنىكىغا قىزىقىدىغان بىر نەچچە شىركەت تېپىلغان بولسىمۇ، بىراق ھەرخىل سەۋەبلەر تۈپەيلىدىن ھېچقايسىسى ئەمەلگە ئاشمىغان. بازارغا بولغان تەكشۈرۈش ۋە تەھلىل، تىجارەت قارىشىدىكى يېڭىلىق يارىتىشنىڭ كەمچىل بولۇشى سەۋەبلىك، بازارغا ناھايىتى يېقىنلاشقان بۇ تېخنىكا ۋۇجىيەنكاڭنىڭ ھاياتىدىكى پۇشايمىنىغا ئايلانغان.    2001 – يىلى، ۋۇجىيەنكاڭ ئۆزىنىڭ ئېلېكترونلۇق ۋە قەغەزلىك ھۆججەتلەرنى ساقلاش بىر گەۋدىلەشكەن تېخنىكىسى ئارقىلىق جۇشىن پەن – تېخنىكا چەكلىك شىركىتىنى قۇرۇپ چىققان، ھەمدە باش لېدىرلىق ۋە قوشۇمچە مۇدىرلىق ۋەزىپىسىنى ئۈستىگە ئالغان. بىراق خېرىدار مۇقىم، مەبلەغ تولۇق، ھەممە ئىشلار جايىدا كېتىۋاتقان چاغدا، جۇشىن پەن – تېخنىكا چەكلىك شىركىتىنىڭ ئىچكى قىسىمىدا مۇنداق كۆز – قاراش پەيدا بولغان: ۋۇجىيەنكاڭ بىر ئىلىم ئەھلى تۇرۇپ كارخانا قۇرغان، بۇ كارخانىنىڭ دەسلىپىدە ناھايىتى ھالقىلىق نۇقتا، ھازىر شىركەت يىتىلىش باسقۇچىغا كىردى، شۇڭا چوقۇم بازارنى چۈشىنىدىغان بىرسى ۋەزىيەتكە يىتەكچىلىك قىلىشى كېرەك. ۋۇجىيەنكاڭنىڭ پېيى ئارانلا %10 نى ئىگەللىگەچكە رەت قىلىش ھوقۇقى يوق ئىدى، شۇنداق قىلىپ ئۇ مۇدىرىيەت ئۇيۇشمىسىنىڭ پىكىرىنى قوبۇل قىلىشقا مەجبۇر بولۇپ، شىركەتتىن ئايرىلىپ تەتقىقات ئورنىغا قايتىپ كەلگەن. كىيىنكى ئىككى يېرىم يىلدا، جۇشىن شىركىتى ھېچقانداق سودا قىلالمىغان، شىركەتمۇ ئاخىرىدا سېتىۋىتىلگەن.    2009 – يىلى، جۇڭگو پەنلەر ئاكادىمىيىسى ئاسپرانتلار ئورنى رەھبىرىنىڭ قوللىشى ۋە ئىلھاملاندۇرۇشى ئارقىسىدا، ۋۇجىيەنكاڭ ئىككىنچى قېتىم ئىگىلىك تىكلەشكە بەل باغلايدۇ. ئۇ ئۆيىنى سېتىپ ۋۇشى «ۋېيگەن» پەن – تېخنىكا چەكلىك شىركىتىنى قۇرۇپ چىقىدۇ. ئۇلار تەتقىق قىلىپ چىققان كۆپ يۆلىنىشلىك تەكشۈرۈش ۋە ئىز قوغلاش ئەسۋابىنىڭ بازار ئىستىقبالى پارلاق بولغاچقا، ۋۇجىيەنكاڭ ئىشەنچكە تولغان ھالدا شۇنداق دىگەن: «بىز چوقۇم كەسىپلەشتۈرۈشنى ئىلگىرى سۈرۈشىمىز لازىملىقىنى، ئۆزىمىزدە چوقۇم ئىگىلىك يارىتىشنى ئۆمۈرلۈك ئىشىمىز كۆرىدىغان كوللىكتىپ بولۇشى لازىملىقىنى ھېس قىلدۇق. بىز بىر ئۆمۈر تىرىشىشىمىز ۋە ئىگىلىكىمىزنى گۈللەندۈرۈشىمىز لازىم.»    بىر ئادەم ئىگىلىك تىكلەشتىن مۇۋەپپەقىيەت قازانغىچە بولغان ئارلىقتا، دائىم سانسىزلىغان مۈشكۈلات، ئازاب، ئوڭۇشسىزلىق ۋە مەغلۇبىيەتكە يولۇقىدۇ. ئۇچرىغان بارلىق ئازاب – ئوقۇبەت، مۈشكۈلات، بوزەك بولۇش ۋە زەربىلەرنى يېڭەلىسىڭىزلا، سىزمۇ غەلبىگە قاراپ يېقىنلىشىسىز.    شۇنىڭ ئۈچۈن، بۈگۈن ئۆزىنىڭ ئىگىلىك يارىتىش يولىغا تەييارلىق قىلىۋاتقان ئادەم جەزمەن مايۈن ئېيىتقان بۇ سۆزلەرنى ئېسىدە تۇتۇشى كېرەك: «قەلب ئازابقا بەرداشلىق بېرەلەيدۇ!>> مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تەرجىمان:ئابدۇللا ئۆمەر تور بەت ئادرېسى:WWW.UYHQT.COM تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	ئامان1 يوللىغان ۋاقتى  2014-11-7 06:15 PM ئەسسالامۇ - ئەلەيكۇم:     مەن بۇ تورداش يوللىغان «بايلا ... رەھمەت  سىزدەك ئىلىم سۈيەر لەرنىڭ ھەقىقى زەردارلارغا ئايلىنىشىغا تىلەكداشمەن

WWW.UYHQT.COM

	بىرىنچى دەرس يەتتىنچى پارگىراف مۇۋەپپەقىيەت تەدىرىجى پىشىپ – يىتىلىدۇ    كىشىلەر دائىم مۇۋەپپەقىيەتكە بارىدىغان ئۇدۇل يول يوق، ئۇ بىر قەدەم – بىر قەدەمدىن كېلىدۇ،دېيىشىدۇ. ئەمەلىيەتتىمۇ دەل شۇنداق، مايۈن نۇرغۇنلىغان ئىسسىق – سوغۇقلارنى باشتىن كەچۈرگەندىن كىيىن مۇنداق دىگەن: «بۈگۈن ناھايىتى ئازابلىق، ئەتە تېخىمۇ ئېچىنىشلىق، كەلگۈسى ئىنتايىن گۈزەلدۇر، بىراق مۇتلەق كۆپ قىسىم كىشىلەر ئەتە كەچتىلا بەربات بولىدۇ. شۇنىڭ ئۈچۈن ھەر بىر كىشىنىڭ بۈگۈندىن ۋاز كېچىشىگە بولمايدۇ.»    بەزىلەر مايۈننىڭ غەلبە قازىنىشىدىكى سەۋەب ئۇنىڭ پۇرسەتنى تۇتۇشقا ماھىر بولغانلىقىدا دەيدۇ. بىراق، پۇرسەتنى تۇتۇۋالغاندىن كىيىنمۇ ئىزچىل داۋاملاشتۇرغاندىلا ئاندىن ھەقىقىي غەلبىنى قولغا كەلتۈرگىلى بولىدۇ.    مايۈننىڭ ئەينى ۋاقىتتىكى ئېنتېرنىت تورى كۆپۈكلەشكەن ئىقتىساد دەۋرىگە كىرگەن چاغدىكى قىيىنچىلىق ۋاقىتلىرىنى ئېلىپ ئېيىتقاندىمۇ،ئۇ ۋاقىتتىكى ئېنتېرنىت تورى شىركەتلىرىنىڭ ماڭغانلىرى مېڭىپ، ۋەيران بولدىغانلىرى ۋەيران بولۇپ بولغان، ئىزچىل داۋاملاشتۇرغان بىر نەچچە شىركەتمۇ ئاخىرغىچە دوقاللارغا ئۇچراپ، ئۆزلىرىنى ئېنتېرنىت تورى شىركىتى دېيىشكىمۇ پېتىنالمايدىغان بولۇپ قالغان ئىدى.    بىراق مايۈن ئۆزىنىڭ قارارىنى ئىزچىل ئۆزگەرتمىگەن، ئۇ ئىزچىل ئېلېكتىرون سودا ئىشلىرى ئاخىرىدا پۈتۈن دۇنيانى يىتەكلەيدىغان يېڭى ئىقتىسادىي گەۋدىگە ئايلىنىدۇ دەپ قارىغان.    مايۈن مۇنداق دىگەن: «ئېلېكترون سودىسى بىزدىن ۋاز كەچمەسلىكنى تەلەپ قىلىدۇ، ۋاز كېچىش ئەڭ چوڭ مەغلۇبىيەتتۇر. ۋاز كېچىش ناھايىتى ئاسان، بىراق ئوڭۇشسىزلىق ئىچىدىن دەست تۇرۇش نۇرغۇنلىغان كۈچ تەلەپ قىلىدۇ. ئاخىرلاشتۇرۇشمۇ ناھايىتى ئوڭاي، بىراق شىركەتنى قۇتقۇزۇپ قېلىش ۋە زورايتىشقا قانچىلىغان بەدەللەر كېتىدۇ – ھە؟ ئوڭۇشسىزلىق كىمنىڭ قەھرىمان ئىكەنلىكىنى بەلگىلەيدۇ، چېكىنىش ھەقىقىي قومانداننى ئايرىپ چىقىدۇ.»    ھەقىقەتەن، ئەڭ قىيىن، ئەڭ ئازابلىق ۋاقىتلاردا ۋاز كېچىش ناھايىتى ئاسان، نۇرغۇن تور بېكەتلىرى مۇشۇنداق ۋاقىتتا ۋازكەچكەن، بىراق مايۈن ئىزچىل داۋاملاشتۇرغان ھەمدە «ئەلى بابا» نى ئاخىرقى غەلبىگە يىتەكلىگەن.    ئەتراپىمىزغا نەزەر سالىدىغان بولساق،مەغلۇبىيەتچىلەر بىلەن غالبىيەتچىلەرنىڭ ئەڭ چوڭ پەرقى: مەغلۇبىيەتچىلەر قىيىنچىلىققا ئۇچرىسىلا تۆگىقۇشقا ئوخشاش ئارقىغا چېكىنىدۇ، غالبىيەتچىلەر ھەرخىل تەدبىرلەر ئارقىلىق قىيىنچىلىققا خاتىمە بېرىدۇ ۋە ھەل قىلىدۇ، توختىماستىن تىرىشىش ۋە پىشىپ – يىتىلىش ئارقىلىق ئاخىرقى غەلبىنى قولغا كەلتۈرىدۇ.    قۇرۇق قول ئىگىلىك تىكلىگەن بىر زەردارئۆزىنىڭ ئىگىلىك تىكلەش كەچۈرمىشى ھەققىدە مۇنداق دەيدۇ: «مېنىڭ مەدەنىيەت سەۋىيەمتۆۋەن، قانداقتۇر ئالاھىدە ئىقتىدارىممۇ يوق، پەقەتلا شىنجىنغا كېلىپ جاھاندارچىلىق قىلىشنى ئويلىغان. < ئۆتۈش كارتىسى >بولمىغاچقا، مەن تاكسى ماشىنىنىڭ ئارقىدىكى ساندۇققا يوشۇرۇنۇپ شىنجىنغا كەلگەن. شىنجىنغا كەلگەندىن كىيىن، خىزمەت تاپالمىغانلىقىم سەۋەبلىك ئۈچ قېتىم شاڭگاڭغا چىقماقچى بولدۇم،بىراق يەنىلا تۇتۇلۇپ قالدىم. مەن تۇتۇپ تۇرۇش ئورنىدا تۇتۇپ تۇرۇلغاندا يېنىمدا ھېچنىمە قالمىغان بولۇپ، بىر تال يەر ياڭىقىنىمۇ يۈرەكلىك يەۋىتىشكە كۆزۈم قىيمايىتتى، ئۇنى شۈمۈپ ھەر بىر تامچە يېغىنى چىقىرىشقا تىرىشاتتىم.»   << كىيىن، مەن باشقىلارغا ياردەملىشىپ كۆكتات سېتىشقا باشلىدىم، ئۇ ۋاقىتلاردا كەچلىرى يايمىدىلا ئۇخلايىتتىم. ئازراق پۇللۇق بولغاندىن كىيىن، مەن مېۋە – چېۋە ساتتىم. مۇقىم ئورۇن يوق، سەييارە ساتقاچقا، كوچا باشقۇرغۇچىلىرىدىن پارتىزانلارچە قېچىپ يۈرەتتىم. بەزىدە جاپادا تاپقان پۇللىرىم قولۇمدا تېخى ئىسسىماستىنلا، جەرىمانىگە تۇتۇلاتتى. بىر قېتىم،مەن ئەمدىلا بىر تۈركۈم مېۋىلەرنى كىرگۈزۈپ تۇرۇشۇمغا يامغۇر يېغىپ مېۋىلەرنىڭ ھەممىسى ھۆل بولۇپ كەتتى، بۇلار سېتىلمىغاچقا ئاخىرى سېسىپ كەتتى، مەنمۇ ھېچنىمىسى يوق سالپى-ساياققا ئايلىنىپ قالدىم. كىيىن باشقىلاردىن شاڭگاڭلىقلار كۆپ توپلاشقان بىر جاينىڭ بارلىقىنى، ئۇ جايدا كۈجە ساتسا پۇل تاپقىلى بولىدىغانلىقىنى ئاڭلىدىم،ھەمدە ئازراق پۇل قەرز ئېلىپ كۈجە سېتىشقا باشلىدىم.    ئازراق پۇل توپلىۋالغاندىن كىيىن، مەن بىرەر دۇكاننىڭ ئالدىدىن بوش ئۇرۇندىن  بىرنى تېپىپ يەنەمېۋە – چېۋە سودىسى قىلماقچى بولدۇم. شۇنداق قىلىپ، شىنجىندىكى نۇرغۇنلىغان جايلارنى ئايلىنىپ بىر تاللا بازىرىنىڭ ئالدىدا مېۋە ساتىدىغانلارنىڭ يوقلۇقىنى بايقىدىم، شۇنىڭ بىلەن مەن ئۇ تاللا بازىرىنىڭ خوجايىنىنى ئىزدىدىم. مېنىڭ سەرگەردانغا ئوخشاش ساپما كەش كىيگەن ھالىتىمنى كۆرگەن خوجايىن گەپمۇ قىلماستىن قوغدىغۇچىلارنى چاقىرىپ مېنى ھەيدەپ چىقاردى.    ئىككىنچى كۈنى، مەن تۈزۈكرەك كىيىنىپ ئۇ خوجايىننى يەنە ئىزدىدىم. ئەينى ۋاقىتتا خوجايىن ھېچقانداق ئىپادە بىلدۈرمىدى،بىراق مەن چىڭ تۇرالىساملا يەنە ئۈمىد بارلىقىنى بىلەتتىم. شۇنداق قىلىپ، ئەتىسى مەن بىر ئاز مېۋە ئېلىپ، تاكسى ماشىنىدىن بىرنى ئىجارىگە ئېلىپ ئۇنىڭ ئۆيىگىچە ئىز قوغلاپ، ئۇنىڭغا ئازراق «پارە» بەرمەكچى بولدۇم. مەن تۆتىنچى قېتىم ئۇنىڭ ئۆيىگە كەلگەندە، ئۇ كۈلۈمسىرىگىنىچە مېنى ئۆيىگە باشلىدى. خوجايىن نەچچە كۈندىن بىرى مېنىڭ ئۇنىڭغا ئەگەشكەنلىكىمنى بىلىدىغانلىقىنى ئېيىتتى، يەنە ئىلگىرى نۇرغۇنلىغان كىشىلەرنىڭ ئۇنى ئىزدىگەنلىكىنى، بىراق ھېچقايسىسىدا ماڭا ئوخشاش سەۋىرچانلىقنىڭ يوقلۇقىنى ئېيىتتى. شۇنداق قىلىپ، ئۇ نەق مەيداندىلا مېنىڭ ئەتىلا تاللا بازىرى ئالدىدا مېۋە ساتسام بولىدىغانلىقىنى قارار قىلدى.    مېنىڭ ئاخىرى مۇقىم تىجارەت ئورنۇم بار بولدى،تىجارىتىممۇ ناھايىتى ياخشى ئىدى. بىر يىلدىن كىيىن بىر ياشانغان كىشى ماڭا شاڭگاڭلىقلارنىڭ جۇڭگو تىبابىتى دورىلىرىنى ياخشى كۆرىدىغانلىقىنى، ئۇنى ساتسا تېخىمۇ ياخشى بولىدىغانلىقىنى ئېيىتتى. مەن جۇڭگو تىبابىتى دورىلىرىنى چۈشەنمىگەچكە بۇ ياشانغان ئادەم بىلەن بىرلىشىپ تىجارەت قىلدىم ھەمدە سوداممۇ بارغانسىرى چوڭايدى. كىيىن، پىيادىلەر يىمەك – ئىچمەك كوچىسى تىجارەت باشلىدى،مەندە دەسمىي قىلدىغان پۇل بولغاچقا بۇ پۇرسەتنىمۇ چىڭ تۇتتۇم – دە، ئۇ كوچىنىڭ ئىچىدە رېستۇران ئېچىۋالدىم. شىنجىنلىقلار پىيادىلەر يىمەك – ئىچمەك كوچىسىنىڭ تىجارىتىنىڭ پۈتۈن شىنجىن بۇيىچە ياخشى ئىكەنلىكىنى بىلىدۇ، ئەلۋەتتە مەنمۇ بۇنىڭدىن نۇرغۇن پۇل تاپتىم. ھازىر مېنىڭ قول ئاستىمدا يەنە ئۆي – مۈلۈك شىركىتى،ئوقەتچىلىك شىركىتى ... قاتارلىقلار بار.»    مۇۋەپپەقىيەت قازىنىش ئاسان ئەمەس، بىراق قىلغىلى بولمايدىغان ئىشمۇ ئەمەس. قەدىمكىلەر ئاللىقاچان بۇ ھەقتە مۇنداق دىگەن:قىيىنچىلىق ئىچىدىن ئۈزۈپ چىقىش كېرەك. ئادەتتىكى كىشىلەر تارتمىغان جاپالارنى تارتىش، ئادەتتىكى كىشىلەر تاقابىل تۇرالمايدىغان قىيىنچىلىقلارغا بەرداشلىق بېرىش، مانا بۇلار مۇۋەپپەقىيەتنىڭ يولى. ئەمەلىيەتتە، ھەربىر مۇۋەپپەقىيەت قازانغان شەخىسنىڭ ئارقىسىدا قان – ياشلىق، جاپالىق تارىخ بار، پەقەت ئۇلارنىڭ غەلبىسى سىزگە ئۇلارنىڭ ئارقىسىدىكى «زۇلمەتلىك تارىخ» نى كۆرسەتمەيدۇ، خالاس.    ئەگەر سىز غەلبە قىلماقچى بولسىڭىز، ئۇنداقتا«ھەرخىل قازاندا قاينىشىڭىز كېرەك!» زېمىستان قىشتىن ئۆتسىڭىزلا باھارغا ئۇچرايسىز؛ باشقىلارغا قارىغاندا پىشىپ يىتىلسىڭىز، ئۇنداقتا سىز غەلبە مېۋىسىنى ئۈزەلەيسىز. بىر لاياقەتلىك ئىگىلىك تىكلىگۈچىنىڭ بېسىملاردىن ئاغرىنىدىغان، ئاسان يوللارنى چۈشەكەيدىغان ۋاقتى يوق، ئۇ پەقەت پۈتۈن كۈچى بىلەن مەسىلىلەرنى ھەل قىلىدۇ ھەمدە كىيىنكى قېتىملىق بېسىمنى جاسارەت بىلەن كۈتۈۋالىدۇ؛ بىر ھەقىقىي ياراملىق ئادەم چوقۇم سانسىزلىغان يىقىلىشلاردىن كىيىنمۇ ئورنىدىن دەست تۇرالايدىغان ئادەمدۇر. پىلە قۇرتىنىڭ كېپىنەككە ئايلىنىشى بىردەملىك ئىش ئەمەس،پەقەت قانچىلىك چوڭ قىيىنچىلىقلارغا ئۇچرىشىدىن قەتئىينەزەر ئىزچىل داۋاملاشتۇرالايدىغان ئاشۇ كىشىلەرلا ئۆزلىرىنىڭ غايىسىنى ئەمەلگە ئاشۇرالايدۇ. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تەرجىمان:ئابدۇللا ئۆمەر تور بەت ئادرېسى:WWW.UYHQT.COM تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	بىرىنچى دەرس سەككىزىنچى پارگىراف 8. مەغلۇبىيەتتىن ساۋاق ئېلىش، ئۇ ئارقىلىق غەلبە قىلىشنىڭ ئۇسۇلىنى ئىزدەش كېرەك    كىشىلەر مۇنداق دەيدۇ: «مەغلۇبىيەت بىر ئارغامچىغا ئوخشايدۇ، بەزىلەر ئۇنى ئېسىلىپ ئۆلۈۋالدىغان قورال قىلسا، يەنە بەزىلەر ئۇنى تېخىمۇ ئېگىز ۋە تىك بولغان تاغ چوققىسىغا چىقىش ئۈچۈن ئىشلىتىدۇ.»    بىر ئىگىلىك تىكلىگۈچىگە نىسبەتەن تېخىمۇ شۇنداق. مەغلۇبىيەت قورقۇنچلۇق ئەمەس، قورقۇنچلۇقى بىزنىڭ ئۇنىڭغا يولۇققانۋاقىتتىكى ئۆزىمىزنى قاچۇرىشىمىز ۋە ئۈمىدسىز ھالەتتىكى روھى ھالىتىمىز. شۇنىڭ ئۈچۈن، بىز پەقەت مەغلۇبىيەتكە توغرا قاراپ، ئۇنىڭدىن تەجرىبە – ساۋاقلارنى توپلىساقلا، «مەغلۇبىيەت غەلبىگە ھامىلدار بولىدۇ.»    شۇنىڭ ئۈچۈن، كىشىلەر مايۈننى غەلبە قازىنىش ھەققىدىكى تەسىراتلىرىنى ئورتاقلىشىشقا تەكلىپ قىلغاندا، مايۈن مۇنداق جاۋاببەرگەن: «مەغلۇبىيەت سىزنىڭ قانچىلىك قىلغانلىقىڭىزغا باغلىق ئەمەس، ئەكسىچە سىزنىڭ نېمە قىلغانلىقىڭىزغا، قانداق قىلغانلىقىڭىزغا باغلىق!» كارخانىنىڭ غەلبە قىلىشىدىكى بىر مۇھىم ئامىل – جاسارەت بىلەن مەغلۇبىيەتنى قوبۇل قىلىش ھەمدە ئۇنىڭدىن غەلبە قىلىشنىڭ يولىنى ئىزدەش.    2006 – يىلى 5 – ئاينىڭ 10 – كۈنى، «تاۋباۋ»تورى يېرىم يىل ۋاقىت سەرپ قىلىپ تەتقىق قىلىپ چىققان «بايلىق تىلەش» ناملىق باھا رىقابىتى رەت تەرتىپ مۇلازىمىتىنى يولغا قويدى. بۇ خىل مۇلازىمەت «تاۋباۋ»تورىدىكى پۇل تۆلەپ ئۆزىنىڭ سېتىش مىقدارىنى ئاشۇرۇشنى خالايدىغان ساتقۇچىلار ئۈچۈن يولغا قويۇلغان ئىدى. ھالبۇكى، بۇ مۇلازىمەت يولغا قويۇلۇپ 20 كۈندىن كىيىن،6000 دىن كۆپرەك ساتقۇچى توردا ئىمزا قويۇپ 6 – ئاينىڭ 1 – كۈنى كوللىكتىپ بازار تاشلايدىغانلىقىنى بىلدۈرگەن.    بۇ تۈرلۈك مۇلازىمەن كىشىلەرنىڭ ئېتىراپ قىلىشىغا ئېرىشمەيلا قالماستىن، يەنە بىر قاتار سورۇقچىلىقلارنى كەلتۈرۈپچىقارغان. مايۈن بۇ ئىشقا يۈكسەك ئېتىبار بېرىپ ئىمزالىق ماقالە ئېلان قىلغان ھەمدە «تاۋباۋ» بىلەن «تاۋباۋچىلار» ئوتتۇرىسىدىكى ئالاقىدە ساقلانغان مەسىلىلەر توغرىسىدا ساتقۇچىلاردىن كەچۈرۈم سورىغان. شۇنىڭ بىلەن بىر ۋاقىتتا، «تاۋباۋ» تورى«بايلىق تىلەش» مۇلازىمىتىنىڭ باھاسىغا قارىتا تەڭشەش ئېلىپ بارغان.    ئۇ «بايلىق تىلەش» مۇلازىمىتىنىڭ ئۈچ يىلغىچە ھەق ئالمايدىغانلىقىنى، بۇنىڭ ھەرگىزمۇ ھەق يىغىش ئۈچۈن ئەمەسلىكىنى خىتاب قىلغان.ئەينى ۋاقىتتا، «تاۋباۋ» تورىدا 28 مىليون خىل تۈرلۈك تاۋار بولۇپ، يېقىن كەلگۈسىدە 50 مىليونغا يېتىدىغانلىقى مۆلچەرلەنگەن ئىدى. ئەگەر مەھسۇلاتنىڭ تورغا چىقىرىلغان ۋاقتىغا ئاساسەن مەھسۇلاتنىڭ ئورنىنى بەلگىلەش توغرا كەلسە، ئۇنداقتا كىيىن تورغا چىقىرىلغان مەھسۇلاتلارنىڭ ئالماشتۇرۇلۇش نىسبىتى تۆۋەنلەپ كېتەتتى. «تاۋباۋ» بۇتۈرلۈك مۇلازىمەت ئارقىلىق نورمال بازار تەرتىپىنى ساقلىماقچى، بۇ «كۆرۈنمەس قول»بازار مۇھىتىنى ئەلالاشتۇرماقچى بولغان.    ئاخىرىدا، مايۈننىڭ سەمىمىيلىك بىلەن ناماقۇل بولۇشى ۋە تەدبىر قوللىنىشى ئارقىسىدا بۇ ئىش بېسىققان.    مايۈن مۇنداق دىگەن: «(ئەلى بابا) نىڭ ئەڭ چوڭ بايلىقى بىزنىڭ قانداق نەتىجىگە ئېرىشكەنلىكىمىزدە ئەمەس، ئەكسىچە بىزنىڭ شۇنچە كۆپ مەغلۇبىيەت ۋە خاتالىقلارنى باشتىن كەچۈرگەنلىكىمىزدە.» مايۈن ئىلگىرى «ئەلىبابا» ئۈچۈن بىر كىتاب چىقىرىپ، «ئەلى بابا» ئىلگىرى ئۆتكۈزگەن بارلىق خاتالىقلارنى خاتىرىلەپ قويدىغانلىقىنى ئېيىتقان.    ئەمەلىيەتتە بۇ خاتالىقلارنى ھەربىر ئادەم ناھايىتى ئاسانلا سادىر قىلىدۇ. ئەمما مايۈننىڭ قەدىرلەشكە تېگىشلىك جايى بولسا،ئۇ خاتالىققا ئاكتىپ يۈزلەنگەن ھەمدە بۇنىڭ سەۋەبىنى تېپىپ چىقىپ، بۇ ئارقىلىق خاتالىقنىڭ قايتا سادىر بولۇشىنىڭ ئالدىنى ئالغان. بۇ دەل مايۈننىڭ زور غەلبىگە ئېرىشىشىدىكى ئاچقۇچ.    ھەممەيلەن ئىگىلىك يارىتىشنىڭ خەتىرى بارلىقىنى بىلىدۇ. بەزىلەر ئىگىلىك يارىتىش جەريانىدا سانسىزلىغان مەغلۇبىيەتلەرگە يولۇقىدۇ، ھەتتا ۋەيران بولۇش ئېھتىماللىقىمۇ بار، بىراق ئەگەر سىز مەغلۇبىيەت ئارقىلىق غەلبە قىلىشنى بىلسىڭىز، يەنى مەغلۇبىيەتتىن تەجرىبە – ساۋاقلارنى قوبۇل قىلالىسىڭىز، سىزنىڭ تىجارەت ئىقتىدارىڭىزمۇ يۇقىرى كۆتۈرۈلىدۇ. تىجارەت ئىقتىدارى كۈچلۈك كىشىلەر قاتارىغا ئۆتكەندىن كىيىن، سىزنىڭ نەزەر – دائىرىڭىز ۋە تەجرىبىڭىزمۇ بارغانسىرى جۇغلىنىپ، «سان ئۆزگىرىشىدىن سۈپەت ئۆزگىرىشى» گە بولغان ھالقىشنى ئەمەلگە ئاشۇرالايسىز. شۇندىلا مۇۋەپپەقىيەت سىزدىن يىراقلىشىپ كېتەلمەيدۇ.    خۇددى مايۈن ئېيىتقاندەك، ئىگىلىك تىكلەش -مەغلۇبىيەت ۋە قىيىنچىلىق بىلەن ئورۇغ – تۇغقان، شۇڭا ئىگىلىك تىكلىگۈچى چوقۇم مەغلۇبىيەتكە توغرا قاراش بىلەن بىر ۋاقىتتا، مەغلۇب بولۇشنىڭ سەۋەبىنى تەھلىل قىلىپ غەلبىگە بارىدىغان يولنى ئىزدەپ تېپىشى كېرەك.    1993 – يىلى، نامى مەشھۇر بولغان «گىگانت ئادەم» گورۇھىنىڭ سابىق لېدىرى شى يۈجۇ ئىستىراتىگىيىلىك خاتالىق ئۆتكۈزگەن،نەتىجىدە ئورنىنى تولدۇرۋالغۇسىز مەغلۇبىيەتكە ئۇچرىغان. دەسلەپتە، شى يۈجۇ ئۆزى ئۆتكۈزگەن خاتالىقنى تونۇپ يەتمىگەن، ئۆزىنىڭ مەغلۇبىيىتىگە توغرا قارىمىغان ۋە ئېتىراپ قىلمىغان، شۇنىڭ بىلەن مەبلەغنى بىرلەشتۈرۈش، قەرز قاتارلىقلار ئارقىلىق«گىگانت ئادەم» خىزمەت بىناسىنى قۇرۇپ ئەسلىدىكى كومپيۇتېر، دورىگەرلىك ۋە ئۆي –مۈلۈكتىن ئىبارەت ئۈچ چوڭ كەسىپنى قۇتۇلدۇرۇپ قالماقچى بولغان. نەتىجىدە مەغلۇبىيەتكە تېخىمۇ چوڭقۇرلاپ كىرىپ، ئاخىرىدا ھەممە نەرسىسىدىن ئايرىلىپلا قالماستىن، 300 مىليون يۈئەن قەرزگە بوغۇلغان. كىيىن، شى يۈجۇ ئۆزىنىڭ مەغلۇبىيىتىگە توغرا قاراپ ۋە بۇنىڭدىن تەجرىبە – ساۋاقلارنى قوبۇل قىلىپ، ھەممە ئىشلارنى باشتىن باشلاپ ئاخىرىدا باش كۆتۈرۈپ چىققان. نەتىجىدە، ئۇ قىسقىغىنە ئۈچ يىل ۋاقىت ئىچىدە يىللىق سېتىلىش سوممىسى بىر مىليارد بولغان «ناۋبەيجىن»مۆجىزىسىنى يارىتىپ، ئەينى ۋاقىتتىكى شان – شەرىپىدىنمۇ ئارتۇق شەرەپلەرگە ئېرىشكەن.    رىقابەت بارغانسىرى كەسكىنلىشىۋاتقان ۋە ئېچىنىشلىق بولىۋاتقان ھازىرقى زامان سودا جەمئىيىتىدە، بىر ئادەم مۇۋەپپەقىيەت قازىنىشنى ئويلايدىكەن، چوقۇم مەغلۇبىيەتنى قوبۇل قىلالايدىغان جاسارىتى بولۇشى كېرەك. پەقەت بىز ئاكتىپلىق بىلەن مەغلۇبىيەتكە يۈزلىنىشنى، مەغلۇبىيەت ئىچىدىن توختىماستىن ئۆگىنىشنى خالىساقلا، «بىر قېتىم چۈشكەن ئورەككە قايتا چۈشمەيمىز،»ھەمدە ئاخىرقى غەلبىنى قولغا كەلتۈرەلەيمىز. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تەرجىمان:ئابدۇللا ئۆمەر تور بەت ئادرېسى:WWW.UYHQT.COM تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	ئىككىنچى دەرس سىزنىڭ مەبلەغ سېلىشىڭىزغا ئەرزىيدىغان ياخشى تۈر زادى قايسى؟ ئىككىنچى دەرس بىرىنچى پارگىراف پۇلنى ئەڭ كۆپ تاپقىلى بولىدىغاننى ئەمەس، بەلكىسىزگە ئەڭ ماس كېلىدىغاننى تاللاڭ    ئىگىلىك تىكلەشكە تەييارلىق قىلىۋاتقان نۇرغۇن ئادەملەر دەسلەپتە قايسى تۈردە ئىگىلىك تىكلەشنى تاللىغاندا مۇنداق باش ئاغرىقىغا يولۇقىدۇ: قايسى كەسىپنى تاللاش كېرەك؟بەزى تۈرلەرگە ئەينى ۋاقىتتىكى كۆز بىلەن قارىغاندا ھەقىقەتەن پۇل تاپقىلى بولىدۇ،بىراق تەرەققىيات ئىستىقبالى ياخشى بولۇشى ناتايىن؛ بەزى تۈرلەر ئېھتىمال كىشىلەر تەرىپىدىن ياخشى دەپ قارالماسلىقى مۇمكىن، بىراق بازار ئىستىقبالى ناھايىتى ياخشى بولىدۇ. شۇنداق قىلىپ، كىشىلەر بۇ ئىككى خىل قىيىن ئەھۋاللار ئوتتۇرىسىدا تەڭقىسلىقتا قالىدۇ.    ئومۇمەن ئېيىتقاندا، ئىگىلىك تىكلەش تۈرىنى تاللاشتا ئاۋال ئۆزىنىڭ ئەمەلىي ئەھۋالى ۋە بازار ئېھتىياجى قاتارلىق كۆپ تەرەپلىمە ئامىللارنى بىرلەشتۈرۈپ ئويلاش كېرەك. تۈر تەۋە بولغان كەسىپ، تۇرۋاتقان قاتلام، تەرەققىيات ئىستىقبالى، تۈر ئەۋزەللىكى،ساقلانغان خەتەر، رىقابەتچىلەرنىڭ ئەھۋالى قاتارلىقلارغا نىسبەتەن بىر ئىلمىي تەھلىل يۈرگۈزۈش لازىم، يەنە تۈرنىڭ يۈرگۈزۈلۈشىگە قارىتا تەھلىل ئېلىپ بېرىش،قارىغۇلارچە ھەركەت قىلىشتىن ساقلىنىش كېرەك. پەقەت شۇنداق قىلغاندىلا ئىگىلىك تىكلەش جەريانىدىكى خەتەرنى ئازايىتقىلى بولىدۇ.    چېڭ جىچىيەن چاڭچۈندىكى بىر ۋاكالەتچىلىك دۇكىنىنىڭ خوجايىنى، ئۇ 2010 – يىلى «پىياۋلىيۇمۇ»كاناپلىرىغا ۋاكالەتچى بولۇشقا مەبلەغ سالغان بولۇپ، بۇ سودىدىن خېلىلا پايدا ئېلىپ قالغان ئىدى. بىر يىلغا يەتمىگەن ۋاقىت ئىچىدە، چېڭ جىچىيەن بىر ئادەتتىكى كارخانا خىزمەتچىسىدىن ئىقتىسادىي ئەمەلىي كۈچى كۈچلۈك خوجايىنغا ئايلانغان.ئىگىلىك تىكلەپ باي بولماقچى بولغانلارنىڭ ئىچىدە، ئۇ ئېنىقلا بىر قەدەر تەلەيلىك ھېسابلىناتتى. ئۇنداقتا، ئۇ قانداق قىلىپ ئىگىلىك تىكلىگەن؟ چېڭ جىچىيەن بىز بىلەن ئۆزىنىڭ ئىگىلىك تىكلەشتىكى كەچۈرمىشلىرىنى ئورتاقلاشتى.   «پىياۋلىيۇمۇ» كاناپلىرىنى تۇتۇشتىن بۇرۇن، ئۇ باشقا نۇرغۇنلىغان تۈرلەر بىلەن ھەپىلىشىپ باققان، ئۇ ھەربىر تۈرگە نىسبەتەن ئەستايىدىل تەھلىل ۋە تاللاش ئېلىپ بېرىپ، ئاخىرىدا نۇرغۇنلىغان تۈرلەر ئىچىدىن بەش تۈرنى تاللىۋالغان.    چېڭ جىچىيەننىڭ تونۇشتۇرۇشىغا ئاساسلانغاندا، ئەينى ۋاقىتتىكى جۇڭگونىڭ كاناپ بازىرىدا پەقەت بىر قىسىم ماركىسىز، سۈپەتسىز ماللار بولۇپ، ماركىلىق كاناپلار يوق دىيەرلىك ئىدى. شۇنداق دىيىشكە بولىدۇكى، «پىياۋلىيۇمۇ» كاناپلىرىنىڭ چىقىشى دۆلەت ئىچىدىكى كاناپ بازىرىنى مونوپول قىلىۋالغان. يەنە كېلىپ «پىياۋلىيۇمۇ» كاناپلىرى ھەربىي ئەسلىھەلەرنى ئېكىسپورت قىلىدىغان زاۋۇتتىن تەرەققىي قىلىپ چىققان بولغاچقا،لايىھەلەش كوللىكتىپىمۇ كۈچلۈك ئىدى، ۋاكالەتچى بولۇش ھەققىمۇ ناھايىتى تۆۋەن بولۇپ، پايدا بوشلۇقى يۇقىرى ئىدى، شۇ سەۋەبتىن بۇ ھەقىقەتەن ياخشى مەبلەغ سېلىش پۇرسىتى ئىدى.    يېقىنقى يىللاردىن بۇيان، كۆپچىلىكنىڭ مۇھىت ئاسىراش ئېڭىنىڭ يۇقىرى كۆتۈرۈلۈشىگە ئەگىشىپ،كۆن – خۇرۇم مەھسۇلاتلىرى يېڭىلىقنى قوغلىشىدىغان ئەر – ئاياللارنىڭ بىردىنبىر تاللىشى بولماي قالدى، مۇشۇنداق شارائىتتا كاناپ رەختلەر زامانغا ماسلاشقان،سىپتا، چىدامچان ۋە ئىشلىتىلىش يوللىرى كەڭ بولۇش قاتارلىق ئالاھىدىلىكلىرى بىلەن ياشلارنىڭ بۇ جەھەتتىكى ئېھتىياجىنى قاندۇرغان. بولۇپمۇ «پىياۋلىيۇمۇ» كاناپلىرىنىڭ لايىھەلىنىشى ئۆزگىچە، خاسلىق پۇرىقى كۈچلۈك بولغاچقا، مودا قوغلىشىدىغان كىشىلەرنىڭ تەلپىگە ناھايىتى ماسلاشقان. شۇ سەۋەبتىن، كاناپ چوقۇم مودىغا ئايلىناتتى.   بازارئەھۋالىدىن قارىغاندا، «پىياۋلىيۇمۇ» كاناپلىرى چېڭ جىچىيەن ياختۇرغان بەش تۈر ئىچىدىكى پۇلنى ئەڭ كۆپ تاپىدىغىنى ئەمەس، بىراق ئۇ بەش تۈر ئىچىدىكى يوشۇرۇن كۈچى ئەڭ زور بولغان تۈر ھېسابلىناتتى. شۇ سەۋەبتىن، چېڭ جىچىيەن قىلچە ئىككىلەنمەستىن«پىياۋلىيۇمۇ» كاناپلىرىنى ئۆزىنىڭ مەبلەغ سېلىش نىشانى قىلغان. ئۇ ئىگىلىك تىكلەشكە تەييارلىق قىلىۋاتقان كىشىلەرگە شۇنداق دەيدۇ: «پۇل تېپىشقا ئالدىرىماي،تەرەققىيات ئىستىقبالىنى كۆزلەش كېرەك.»    ئەمەلىيەت چېڭ جىچىيەننىڭ تاللىشىنىڭ توغرا ئىكەنلىكىنى ئىسپاتلىغان. نۆۋەتتە، «پىياۋلىيۇمۇ»كاناپلىرىنىڭ ۋاكالەتچىلىك دۇكىنى 100 دىن ئاشقان، پۈتۈن مەملىكەتتىكى ۋەكالەتچى دۇكانلارنىڭ ھەر بىرىنىڭ يىللىق تىجارەت سوممىسى 700 مىڭدىن بىر مىليونغىچە بولغان. باش شىتاب ئۈچ يىل ئىچىدە ۋاكالەتچىلىك دۇكىنىنى 500 گە يەتكۈزۈپ، ساندۇق ۋە سومكا كەسپىدىكى سەردارغا ئايلىنىشنى پىلانلىغان.    يېڭى ئىگىلىك تىكلەشنى باشلىغاندا، ئاۋال ئىگىلىكنىڭ تەرەققىيات ئىستىقبالى بار –يوقلۇقىغا قاراش كېرەك، شۇنىڭ ئۈچۈن ئىگىلىك تىكلىگۈچى شۇ جاينىڭ بازار ئەھۋالىنى كۆپرەك كۈزىتىش كېرەك. ئۇنىڭدىن باشقا، بارلىق تەرەققىيات تۈرلىرىنىڭ پايدا بوشلۇقى بار – يوقلىقىغىمۇ قاراش كېرەك. گەرچە بەزى تۈرلەرگە بولغان ئېھتىياج چوڭ بولسىمۇ، بىراق كېتىدىغان دەسمىي كۆپ، پايدا ئاز، ئۇزۇن ئاۋارىچىلىق تارتسىمۇ ئارانلا جاننى باققىلى بولىدۇ، ئەگەر بۇنداق تۈرلەر بولسا، چوقۇم ئەستايىدىل ئويلىشىشىڭىز كېرەك. بىراق نۇرغۇنلىغان ئۈمىدۋار ئىگىلىك تىكلىگۈچىلەر دائىم ئۆزىنى زورلاپ، نىشاننى ئېنىق قىلماستىن، قارىغۇچلارچە ئۆزىنىڭ غايىسىنى قوغلىشىدۇ.    ئۇنداقتا، بىز بىرلىكتە مايۈننىڭ قانداق قىلىپ«ئەلى بابا» نى پۈتكۈل مەملىكەت، ھەتتا دۇنيا مىقياسىدىكى ئېلېكترونلۇق سودا تور بەتلىرىنىڭ سەركىسى قىلىپ قۇرۇپ چىققانلىقىغا قاراپ باقايلى.    1997 –يىلى، مايۈن ئىلگىرىكى تاشقى – ئىقتىساد سودا مېنىستىرلىكى قارمىقىدىكى جۇڭگو خەلقئارالىق ئېلېكترونلۇق سودا مەركىزىدە بىر مەزگىل خىزمەت قىلغان، ئۇ ۋاقىتتىكى خىزمەت سەرگۈزەشتىلىرى مايۈنگە مۇنداق بىر ئەمەلىيەتنى ھېس قىلدۇرغان: بۈگۈنكى كۈندىكى ئاسىيا، بولۇپمۇ جۇڭگو دۇنيانىڭ پىششىقلاپ ئىشلەش زاۋۇتى، ياساش كەسپىنىڭ مەركىزى بولۇپ قالغان. گەرچە جۇڭگونىڭ ئوتتۇرا – كىچىك كارخانىلىرى مەركەزلەشكەن،سان جەھەتتىن ناھايىتى كۆپ بولسىمۇ، ئەمما ئۇلار سودا ساھەسىدە ئىزچىل «ئاجىز توپ»بولۇپ كەلگەن.    گەرچە غايەت زور خەلقئارا ۋە دۆلەت ئىچى بازىرى بولسىمۇ، بىراق كۆلەم، مەبلەغ، ئالاقە يولى قاتارلىق ئامىللار سەۋەبلىك، بۇ ئوتتۇرا – كىچىك كارخانىلار بازار كېڭەيتىشكە ئامالسىز قالغان. شۇ سەۋەبتىن، ئېكىسپورت يىتەكچىلىك قىلىنغان تىپتىكى ئىقتىسادنى ئاساس قىلغان ئاسىيادا، كىچىك ئېكىسپورت سودىگەرلىرىنىڭ بازار ئاچمىقى ناھايىتى تەس،دۆلەت سىرتى بازىرىنى ئېچىشمۇ ناھايىتى قىيىن بولۇپ، ئاخىرىدا بىر قىسىم چوڭ سودا شىركەتلىرى تەرىپىدىن سىقىپ چىقىرىلاتتى.    مايۈن جۇڭگونىڭ ئوتتۇرا – كىچىك تىپتىكى كارخانىلىرىنىڭ داۋاملىق «مۇھاسىرە» ئازابى تارتىۋېرىشىگە قاراپ تۇرالماي، ئۇلار ئۈچۈن چىقىش يولى تاپماقچى بولغان. ئەتراپلىق ئويلىنىش ئارقىلىق، مايۈن ئېنتىرنىت تورىنى ئۆزلىرى ئۈچۈن خىزمەت قىلدۇرماقچى بولغان. ئۇ بۇ ئوتتۇرا – كىچىك تىپتىكى كارخانىلار ئېنتىرنىت تورىغا ئەڭ ئېھتىياجلىق دەپ ئويلىغان. ئەگەر ئېنتىرنىت تورىنى ئۇلار ئۈچۈن خىزمەت قىلدۇرالىسا، ئۇلار پۈتكۈل يەر شارى مىقياسىدا خېرىدار ئىزدىيەلەيىتتى؛ پەقەت ئېنتىرنىت تورى ئارقىلىقلا، بۇ ئوتتۇرا – كىچىك تىپتىكى كارخانىلار ئۆزلىرىنىڭ مەھسۇلاتىنى دۇنيانىڭ بۇلۇڭ – پۇچقاقلىرىغىچە تونۇشتۇرالايىتتى... مايۈن ئۆزىنىڭ يۆلىنىشىنى تاپقان، شۇنىڭ بىلەن ئۇ بېيجىڭدىكى ئىشلىرىنى تاشلاپ، ھەمراھلىرى بىلەن بىرلىكتە خاڭجۇغا قايتىپ «ئەلى بابا» نىڭ قۇرۇلۇش ئىشلىرىنى باشلىغان.    ئومۇمەن ئېيىتقاندا، كەسىپ تاللاشتا چوقۇم ئۆزىگە ماس كېلىدىغىنىنى ۋە ئۆزى تونۇشلۇق بولغاننى تاللاش كېرەك، مەسىلەن: ئۆزىنىڭ كەسپى، تەجرىبىسى، قىزىقىشى،ئالاھىدىلىكى ۋە ئۆزىنىڭ خاراكتېرى قاتارلىقلارغا ماس كېلىدىغان تۈرلەرنى تاللاش كېرەك. ھەربىر ئىگىلىك تىكلىگۈچى ئۆزىنىڭ ئىقتىدارى ۋە ئەمەلىي كۈچىنى توغرا تونۇشى،ئۆزىنىڭ ئەۋزەللىكىنى يىتەرلىك جارى قىلدۇرۇشى كېرەك، پەقەت ئۆزىگە ئەڭ تونۇشلۇق بولغان تۈرنى تاللىغاندىلا ئاندىن كەسكىن رىقابەت قاينىمىدا پۇت دەسسەپ تۇرغىلى بولىدۇ.    ئۇنىڭدىن باشقا، چوقۇم ئەمەلىيەتنى چىقىش قىلىش، «ئاسماندىكى غازنىڭ شورپىسىغا نان چىلىماسلىق كېرەك.» مەسىلەن: مەلۇم بىر تۈرنى مۇقىملاشتۇرغاندىن كىيىن ئۇنىڭغا ئەڭ مۇۋاپىق ھالەتتە كىرىشىش، ئەڭ ئاز مەبلەغ بىلەن بۇ تۈرنى چۈشىنىپ بېقىش، بازارنى تونۇش،پۇرسەتنى تۇتىدىغان ئەڭ ياخشى پەيت كەلگەندە، مەبلەغنى كۆپەيتىپ بىراقلا ئاتلىنىش كېرەك.    ئەڭ ئاخىرىدا،يوشۇرۇن كۈچى زور بولغان تۈرلەر ئارقىلىق تەرەققىي قىلىش كېرەك. تۈر تاللىغاندا قارىغۇلارچە باشقىلارغا ئەگەشمەسلىك، ئەڭ مودا، پۇلنى ئەڭ كۆپ تاپىدىغان كەسىپلەرگە مەھلىيا بولماسلىق، ھەتتا ھىچقانداق تەكشۈرۈش بولمىغان ئەھۋال ئاستىدا قارىغۇلارچە ھەركەت قىلماسلىق كېرەك. شۇنى بىلىش كېرەككى، مودا بولغان كەسىپلەر ئاللىقاچان تويۇنۇشقا باشلىغان، رىقابەتمۇ ناھايىتى كەسكىن بولغان بولىدۇ، بازاردىكى شاللىنىپ كېتىش نىسبىتىمۇ ناھايىتى يۇقىرى بولىدۇ، گەرچە يەنە تەرەققىيات بوشلۇقى بولسىمۇ،بىراق ئىستىقبالىنىڭ ياخشى بولۇشى ناتايىن. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تەرجىمان:ئابدۇللا ئۆمەر تور بەت ئادرېسى:WWW.UYHQT.COM تەرجىمە تەھرىرى:ئەقىدە قاشگەرلىكىدىن رەيھانگۈل نىزام

Ay.sadap

	WWW.UYHQT.COM يوللىغان ۋاقتى  2014-11-8 08:21 PM ئىككىنچى دەرسسىزنىڭ مەبلەغ سېلىشىڭىزغا ئەرزىيدىغان  ... كۆپ رەھمەت، خەلقىمىزنىڭ ئىقتىسادى ئېڭىنىڭ يۈكسىلىشى ئۈچۈن توختىماي تېرىشىۋاتىسىز،ھارمىغايسىز!