مايۈننىڭ ئىگىلىك تىكلەش دەرىسخانىسى

WWW.UYHQT.COM

	Ay.sadap يوللىغان ۋاقتى  2014-11-9 02:36 PM كۆپ رەھمەت، خەلقىمىزنىڭ ئىقتىسادى ئېڭىنىڭ يۈكسىلىشى  ... رەھمەت .بىز پەقەت  قىلىشقا  تىگىشلىك  ئىشلارنى قىلىۋاتىمىز، ھەممىمىز تىرىشساقلا خەلقىمىزنىڭ ئىقتىسادى ئېڭى چۇقۇم كۈچىيىدۇ.

WWW.UYHQT.COM

	ئىككىنچى دەرس ئىككىنچى پارگىراف سودا پۇرسىتىنى بايقاشقا ماھىر بولۇش كېرەك    مايۈن ئىلگىرى مۇنداق دىگەن: «مەن مۇۋەپپەقىيەت قازىنالىغان ئىكەنمەن، %80 ياشنىڭ مۇۋەپپەقىيەت قازىنالىشىدا مەسىلە يوق!» ئۇنداقتا، نېمىشقا نۇرغۇنلىغان كىشىلەر مۇۋەپپەقىيەت قازىنالمايدۇ؟ ئىگىلىك يارىتىشقا بولغان قىزغىنلىق ۋە جاپاغا چىدايدىغان روھ بولغاندىن باشقا، مايۈننىڭ مۇۋەپپىقىيىتى يەنە ئۇنىڭ ئۆزىگە خاس بولغان سودا پۇرسىتىنى بايقاشقا ماھىرلىقى بىلەن مۇناسىۋەتلىك.    مايۈن جېجىياڭ ئۆلكىسىنىڭ خاڭجۇ شەھىرىدە دۇنياغا كەلگەن. ئۇ جاي جۇڭگودىكى ئىقتىسادىي ئەڭ تەرەققىي قىلغان ئۈچ بۇرجەك ئىقتىسادىي رايونىغا جايلاشقان، جۇڭگودىكى تاشقى سودا بىلەن شۇغۇللىنىدىغان ئەڭ چوڭ ئوتتۇرا – كىچىك كارخانىلار توپى جۇغلاشقان بولۇپ، پۇقراۋى ئىگىلىكتىكى ئىقتىساد ئەڭ گۈللەنگەن جاي ئىدى.    بىر خاڭجۇلۇق بولۇش سۈپىتى بىلەن، مايۈندە ئوتتۇرا – كىچىك كارخانىلارنىڭ ئېھتىياجىغا نىسبەتەن ناھايىتى چوڭقۇر چۈشەنچە بار ئىدى: تىجارەتتە ئالاقىنىڭ كەمچىللىكى، ئىشلەپچىقىرىش ئۇچۇرلىرىنىڭ ماسلاشماسلىقى، خەلقئارا كەسىپ ۋە ترانزىت سودا ئاساس قىممىتىنىڭ يۇقىرى بولۇشى قاتارلىقلار بۇ جايدىكى ئوتتۇرا – كىچىك كارخانىلارنىڭ خوجايىنلىرىنىڭ بېشىنى قاتۇرۋاتقان مەسىلە بولۇپ، ئىزچىل ھەل قىلىنماي كەلگەن ئىدى.    مايۈن بۇ ئارقىلىق سودا پۇرسىتىنى كۆرۈۋالغان: ئوتتۇرا – كىچىك كارخانىلارنىڭ ئېلېكترونلۇق سودىنى قوللىنىشى بولسا كەلگۈسىدىكى بىر يۈزلىنىش. مايۈن شۇنىڭغا چوڭقۇر ئىشەنگەن: «ئېنتېرنىت تورى تەرەققىي قىلۋاتقان دۆلەتلەرگە نىسبەتەن بىر پۇرسەت، ئوتتۇرا – كىچىك كارخانىلارغا نىسبەتەنمۇ شۇنداق، ئېنتىرنىت تورى ئارقىلىق كىچىكنى چوڭايىتقىلى، قۇدرەت تاپقىلى بولىدۇ. رىقابەت تېخىمۇ كۆپ كارخانىلارنى ئېنتىرنىت تورىدىن پايدىلىنىپ سودا قىلىشقا مەجبۇرلايدۇ. توردىن پايدىلىنىشنى بىلمەيدىغان كارخانا قېرىيدۇكى ھەرگىز زورايمايدۇ.»    شۇنداق قىلىپ، مايۈن بېيجىڭدىكى ئاساسى خېلىلا چىڭدىلىپ قالغان ئىگىلىكىنى تاشلاپ خاڭجۇغا قايتىپ كەلگەن، ھەمدە «ئەلى بابا» نى قۇرۇشنى باشلاپ ئاخىرىدا چوڭ غەلبىگە ئېرىشكەن.    مايۈننىڭ مۇۋەپپەقىيەت قازىنىش كەچۈرمىشلىرى بىزگە شۇنى ئېيتىپ بېرىدۇكى، بىر ئادەمنىڭ مۇۋەپپەقىيىتى ھەرگىزمۇ تاسادىبىيلىق ئەمەس، ئەكسىچە ئۇنىڭ ئۆزىگە خاس بولغان نەزەر – دائىرىسى ۋە يىراقنى كۆرەرلىكى ئۇنىڭ ئاخىرقى غەلبىنى قولغا كەلتۈرۈشىگە ياردەم قىلغان.    رېئال تۇرمۇشتا، كىشىلەر سودىنى ئىشەنچلىك ئادەملەر بىلەن قىلغاندا ئاندىن خاتىرجەم بولىدۇ. بىراق ئېنتېرنىت تورىدىكى «ئەلى بابا» دا، كىممۇ ئۆزىنىڭ قانداق ئادەم بىلەن سودا قىلىۋاتقانلىقىنى بىلەلىسۇن؟ بۇنداقتا ئادەم قانداقمۇ خاتىرجەم بولالىسۇن؟    مايۈن بۇنىڭدىنمۇ سودا پۇرسىتىنى بايقىغان. مايۈن ئېنتىرنىتتىكى سودا دۇنياسى ۋە رېئال دۇنيادىكى سودىنى بىرلىككە كەلتۈرمەكچى، بۇ ئارقىلىق كىشىلەرنىڭ ئىشەنچىسىگە ئېرىشمەكچى بولغان.    2001 – يىلى، مايۈن «سەمىمىيەت راۋانلىقى» سېستىمىسىنى يولغا قويغان. ئۇنىڭ بارلىققا كېلىشى تور سەمىمىيلىكى دەۋرىنىڭ يىتىپ كەلگەنلىكىدىن دېرەك بەردى – بۇ پۈتۈن دۇنيادىكى تۇنجى ئالاقە خاراكتېرلىك سەمىمىيەت باشقۇرۇش سىستېمىسى ئىدى.    بەزىلەر شۇنداق دەيدۇ،< مايۈن ئىگىلىك تىكلىگەندە مۇھىت ۋە پۇرسىتى بىزگە قارىغاندا ياخشى ئىدى، ئۇنىڭ تەلىيى بار، شۇڭا مۇۋەپپەقىيەت قازاندى، بىراق بىزدە بۇنداق پۇرسەت يوق>. ئەمەلىيەتتە، بۇ بىر باھانە خالاس، بۇ دۇنيا ھەر ۋاقىت سىزگە پۇرسەت بېرىدۇ، مەسىلە سىزنىڭ ئۇنى تۇتۇش – تۇتالماسلىقىڭىزدا. مىكروسوفت ئوتتۇرىغا چىققاندا، كىشىلەر ھېچكىم ئۇنىڭ ئالدىغا ئۆتەلمەيدۇ دەپ قارىغان، ئەمما كىيىن «ياخو» ئوتتۇرىغا چىقتى؛ كىشىلەر «ياخو» نىڭ ئالدىغا ھېچكىم ئۆتەلمەيدۇ دېيىشكەندە، كىيىن eBay ئوتتۇرىغا چىققان؛ كىشىلەر eBay ناھايىتى قالتىسكەن دىيىشىۋاتقاندا، «گۇگىل» ئوتتۇرىغا چىققان؛ كىشىلەر «گۇگىل» نى قۇياشقا تەققاسلاپ ھېچكىم ئۇنىڭ ئالدىغا ئۆتەلمەيدۇ دېيىشىۋاتقاندا، ھازىر يەنە Facebook ئوتتۇرىغا چىققان.    ئەمەلىيەتتە، دۇنيادىكى نۇرغۇنلىغان شەيئىلەرگە كەلگۈسىنى بەلگىلەيدىغان بىر قىسىم ئامىللار يوشۇرۇنغان بولىدۇ، تىجارەتمۇ دەل شۇنداق. ئىگىلىك تىكلەش جەريانىدا، ئەگەر بازارغا قارىتا سەزگۈرلۈكنى ساقلىيالىساق، جانلىق بولغان بازار سېزىمى يىتىلدۈرەلىسەك، ئۇنداقتا بازارنى تېخىمۇ ياخشى تەھلىل قىلغىلى، بازارغا تېخىمۇ ياخشى مەبلەغ سالغىلى، ئاخىرىدا بازارغا ئېرىشكىلى بولىدۇ.    ئالىي مەكتەپنى پۈتتۈرۈش ھارپىسىدا، لۇ گۇاڭمىڭ بىر سودا مەيدانىدا مال ساتقۇچى بولغان. بىر قېتىم، بىر خېرىدار ھاۋا ساپلاشتۇردىغان ۋە مىكروب ئۆلتۈردىغان ئەسۋاب سېتىۋالماقچى بولغان، شۇنىڭ بىلەن، لۇگۇاڭمىڭ ئۇنىڭغا بازىرى ناھايىتى ئىتتىك بولۇۋاتقان ئوزونلۇق دېزىنفىكسىيە ئەسۋابىنى تەۋسىيە قىلغان. ئەمما، خېرىدار يەنىلا ھاۋا ساپلاشتۇرۇش ۋە مىكرو زەررىچىلەرنى تازلاش رولى بار ئەسۋابنى ئالماقچى بولغان. لۇگۇاڭمىڭ ئۇنىڭغا يەككە ھاۋا ساپلاشتۇرۇش ماشىنىسىنى تونۇشتۇرغان، ئەمما خېرىدار يەنە پۇل خەجلەپ بىر ئەسۋابنى ئارتۇق ئېلىپ ئۆيدە ئورۇن ئىگەللىتىشكە قىيالمىغان، ئۇنىڭ ئۈستىگە باھاسىمۇ قىممەت ئىدى. ئاخىرىدا خېرىدار ھېچنىمە سېتىۋالماي ئەپسۇسلىنىش ئىلكىدە كېتىپ قالغان.    خېرىدار كەتكەندىن كىيىن، لۇگۇاڭمىڭنىڭ كۆز ئالدى يورۇپ كەتكەن. سودا مەيدانىدىكى بىر قىسىم ھاۋا ساپلاشتۇرغۇچ بىلەن ھاۋا دىزىنفىكسىيەلەش ماشىنىلىرىدا پەقەت بىرلا خىل ئىقتىدار بولۇپ، ئەگەر كۆپ خىل ئىقتىدارنى بىرلا ماشىنىغا يىغىنچاقلىغىلى بولسا، خېرىدارلار كۆپ خىل ئەسۋابنى تەڭ سېتىۋىلىپ ئۆيدىكى يەرنى ئىگەللەپ كېتىدىغان مەسىلە چىقمايىتتى، ھەمدە تەننەرخىمۇ تۆۋەن بولاتتى، بۇنداقتا خېرىدارلارمۇ مەنپەئەت ئالاتتى. بۇ ئوي لۇگۇاڭمىڭدا بۇ تۈردە ئىگىلىك تىكلەشكە بولغان ئىشەنچنى تۇرغۇزغان. شۇنىڭ بىلەن، ئۇ ماتېرىيال كۆرۈشنى باشلاپ، بۇ خىيالىنى رېئاللىققا ئايلاندۇرماقچى بولغان.    لۇگۇاڭمىڭ HEPA سۈزۈش تېخنىكىسى، مەنپىي ئىئون، ئوزون تېخنىكىسى قاتارلىقلارنى بىرلەشتۈرۈپ كۆپ ئىقتىدارلىق ھاۋا ساپلاشتۇرغۇچنى لايىھەلەپ چىققان. مەھسۇلاتنىڭ تېخنىكىسى مۇكەممەللەشتۈرۈلگەندىن كىيىن، لۇگۇاڭمىڭ ئەسۋابنىڭ ئەۋرىشكىسىنى ئېلىپ ھەمكارلاشقۇچى زاۋۇت ئىزدىگەن. شاڭگاڭلىق سودىگەر لىن ئەپەندىم ھەمكارلىشىشنى خالايدىغانلىقىنى بىلدۈرگەن، بىراق ئۇ مەھسۇلاتقا قارىتا بازار ئىنكاسى بولغاندىن كىيىن ئاندىن مەبلەغ سالىدىغانلىقىنى بىلدۈرگەن. لۇگۇاڭمىڭ ئاۋۋال مەھسۇلاتنى لىن ئەپەندىمنىڭ سودا تورىغا قويۇپ جامائەت پىكىرى جۇغلاشنى ئويلىغان.    بىر ھەپتىدىن كىيىن، توردا خېرىدارلارنىڭ مەھسۇلاتقا قارىتا ئىنكاسى كۈرۈلۈشكە باشلىغان: شاڭگاڭدىكى بىر نەچچە شىركەت ۋە ياۋروپا ئىتىپاقىدىكى بىر قىسىم شىركەتلەر ئېلخەت يوللاپ سۈرۈشتۈرگەن، ئامېرىكىدىكى بىر شىركەت يەنە بىر پارچە ئېلخەت يوللاپ، بۇنداق ئەسۋابتىن 500 دانە زاكاس قىلىشنى ئۈمىد قىلدىغانلىقىنى بىلدۈرگەن ئىدى.    شۇ يىلى، لۇگۇاڭمىڭ بىلەن لىن ئەپەندىم ھەمكارلىشىپ بىر ئېلېكترونلۇق مەھسۇلاتلار شىركىتىنى تىزىمغا ئالدۇرغان، ھەمدە ناھايىتى تىزلا ئىشلەپچىقىرىشقا كىرىشتۈرۈپ نۇرغۇن پايدا ئالغان.    مەشھۇر باشقۇرۇش ئۇستىسى بېد.دىرۇك ئىگىلىك تىكلىگۈچىلەرگە مۇنداق تەبىر بەرگەن: «ئىگىلىك تىكلىگۈچىلەر ئۆزگىرىش ئىزدەيدىغان ۋە ئاكتىپ ئىنكاس قايتۇردىغان، ھەمدە ئۇنى پۇرسەت قاتارىدا ئۈنۈملۈك پايدىلىنالايدىغان ئادەم» .شۇنداق، ئىگىلىك تىكلەشتىكى يەككە – يىگانە پۇرسەتنى بايقاش -ئىگىلىك تىكلىگۈچىلەردە بولۇشقا تىگىشلىك قابىلىيەت، يەنە ئىگىلىك تىكلەشنىڭ باشلىنىش نۇقتىسى. مەلۇم مەنىدىن ئېلىپ ئېيىتقاندا، ئىگىلىك تىكلەش پۇرسىتىنى بايقاش ئىگىلىك تىكلەپ يېرىم غەلبە قازانغانغا باراۋەر.    ھالبۇكى، ئىگىلىك تىكلەش پۇرسىتىنى بايقاش ئاسان ئىش ئەمەس، ئەمما ئۇنىڭدا پايدىلىنىشقا بولىدىغان قائىدىلەر بار.بۇ قائىدىلەر بازاردىكى پۇرسەتنىڭ تۇتۇلۇشى ،ئىشەنچنىڭ تۇرغۇزۇلۇشى، مۇستەقىل يېڭىلىق يارىتىش قارشىنىڭ بولۇشى، ئوڭ – تەتۈر تەپەككۈرنىڭ ئالمىشىشى ۋە يېڭى تېخنىكىنىڭ قوللىنىلىشى قاتارلىقلارنى ئۆز ئىچىگە ئالىدۇ، بۇلارغا ئىگە بولغاندىن كىيىن، سىز پۇرسەتنىڭ ھەممىلا جايدا مەۋجۇت ئىكەنلىكىنى بايقايسىز. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

WWW.UYHQT.COM

	ئىككىنچى دەرس ئۈچۈنچى پارگىراف رىقابەتچىدىن بىر قەدەم ئالدىدا مېڭىپ ياخشى تۈرلەرنى بايقاش كېرەك بەزىلەر شۇنداق دىيىشىدۇ، ئەگەر مەبلەغ ۋە بايلىق مەنبەسىنى سانائەت جەمئىيىتىدىكى ئەڭ مۇھىم رىقابەت ئامىلى دەپ قارىساق،ئۇنداقتا، ۋاقىت ئەۋزەللىكى بولسا ئۇچۇر دەۋرىدىكى ئەڭ مۇھىم رىقابەت ئىستىراتىگىيە قورالىدۇر. شۇنداق، ھازىرقى دەۋردە ئىگىلىك تىكلەش سېپىگە قوشۇلۇۋاتقان كىشىلەر بارغانسىرى كۆپىيىۋاتىدۇ، بۇنداق ئەھۋالدا سىز ئىگىلىك يارىتىش تۈرىڭىزنى تاللاپ بولۇپمۇ يەنە دەرھال ھەركەتكە كەلمىسىڭىز، ئۇنداقتا رىقابەتچىڭىزنىڭ بىر قەدەم ئارقىدا قالىسىزدە – دە، سىزنىڭ مۇۋەپپەقىيەت قازىنىش پۇرسىتىڭىزمۇ ئازلاپ كېتىدۇ. سودا پۇرسىتىنى تۇتۇش ئىگىلىك تىكلىگۈچىگە نىسبەتەن ناھايىتى مۇھىم، ئۇ ئىگىلىك تىكلىگۈچىنىڭ غەلبە قىلىپ مۇۋەپپەقىيەت قازىنىشىنىڭ ئاچقۇچى. ئۇنداقتا، سودا پۇرسىتى قايسى ۋاقىتنى كۆرسىتىدۇ؟ سودا پۇرسىتى ھەرگىزمۇ بارلىق كىشىلەر «يۈگۈرەشكە تەييارلىنىپ بولغان ۋاقىت» نى كۆرسەتمەيدۇ، مايۈن مۇنداق دىگەن: «ئەگەر پەيت پىشىپ يىتىلگەن بولسا، ئۇنداقتا بۇ ئىشنى قىلىش ماڭا نىسىپ بولمايدۇ!» ئەكسىچە، كۆپ قىسىم كىشىلەر «كۆرەلمىگەن»، «ئېنىق كۆرەلمەيۋاتقان» ۋە «چۈشەنمىگەن» ۋاقىتلا ئەڭ ياخشى سودا پۇرسىتى بولۇپ ھېسابلىنىدۇ. مايۈن «ئەلى بابا» نى قۇرغان ۋاقىتتا،نۇرغۇنلىغان كىشىلەر ئادەمنىڭ قارىسىنى كۆرگىلى بولمايدىغان بىر سەھنىنىڭ كىشىلەرگە پۇرسەت ۋە ئىشەنچ ئېلىپ كېلىدىغانلىقىغا ئىشەنمىگەن. دەل مۇشۇنداق ئەھۋال ئاستىدا، مايۈن «سەمىمىيەت راۋانلىقى» نى ئوتتۇرىغا چىقاردى، بۇ ئەينى ۋاقىتتا كىشىلەر ئەنسىرەۋاتقان مەسىلىنى ھەل قىلىپلا قالماستىن، يەنە جۇڭگونى يېپيېڭى بىر تور ئالاقە دەۋرىگە باشلاپ كىردى. كىشىلەر دائىم ئاجىزلار  پۇرسەت كۈتىدۇ،كۈچلۈكلەر پۇرسەت يارىتىدۇ دىيىشىدۇ. بولۇپمۇ مۇشۇنداق بىر ئۇچۇر دەۋرىدە تۇرۋاتقان ئىگىلىك تىكلىگۈچىلەرگە نىسبەتەن ئېيىتقاندا، ۋاقىت ۋە پەيت سودا پۇرسىتى دىمەكتۇر، سودا پۇرسىتى بولسا مۇۋەپپەقىيەتتىن دېرەك بېرىدۇ. ھەممەيلەنگە تونۇشلۇق بولغان «نوكىيا» نى ئېلىپ ئېيىتساق، ئۇنىڭ كۆپ يىللاردىن بېرى يانفون ساھەسىدىكى باشلامچىلىق ئورنىنى ساقلىيالىشىدىكى سەۋەبنى ئۇنىڭ تىز سۈرئەتتىكى تېخنىكا يېڭىلاش ئىقتىدارىدىن ئايرىپ قارىغىلى بولمايدۇ. «نوكىيا» نىڭ قارىشىچە، كەسكىن بازار رىقابىتىدە پۇت دەسسەپ تۇرۇش ئۈچۈن چوقۇم مەڭگۈ باشقىلارنىڭ ئالدىدا مېڭىش، مەڭگۈ باشقىلاردىن بىر قەدەمنى تىز ئېلىش كېرەك. شۇڭا «نوكىيا» توختىماستىن يېڭى مەھسۇلاتلارنى ئېچىش قەدىمىنى تىزلىتىپلا قالماستىن، يەنە ھەر يىللىق ئومۇمىي تىجارەت سوممىسىنىڭ توققۇز پىرسەنتىنى يېڭى مەھسۇلاتلارنى ئېچىشقا ئىشلىتىدىغانلىقىغا ۋەدە بەرگەن. نۆۋەتتە، ئۇنىڭ يېڭى مەھسۇلاتلارنى تەتقىق قىلىپ چىقىش دەۋرىيلىكى ئارانلا 35 كۈن بولۇپ، يانفون كەسپىدىكى ئوتتۇرىچە سەۋىيەدە تۇرۇش ۋاقتى يېرىم يىل، ھەتتا ئۇنىڭدىنمۇ ئوزۇن بولغان. ئۇنىڭ بىلەن سېلىشتۇرغاندا، جۇڭگو يانفون ساھەسىدىكى ئۆزگىرىشمۇ بارغانسىرى تىزلەشمەكتە، ھەرقايسى چوڭ يانفون زاۋۇتى خوجايىنلىرى يېڭى مەھسۇلاتلارنى ئېچىش قەدىمىنى تىزلىتىۋاتقان ۋاقىتتا، «دوڭجى»يانفونىنىڭ يېڭى مەھسۇلاتلارنى ئېچىش قەدىمى ناھايىتى ئاستا بولغان، ھەمدە بۇ سۈرئەت ئاستىلىقى «دوڭجى» يانفونلىرىنىڭ نۇرغۇنلىغان بازار پۇرسىتىدىن ئايرىلىپ قېلىشىنى كەلتۈرۈپ چىقارغان. گەرچە «دوڭجى» جۇڭگودا ئەڭ ئاۋال تۆۋەن تېمپراتۇرىدا كىرىستاللاشتۇرۇلغان يانفون ئېكرانى، CCD كامېرا، يانفوننىڭ سۈرەت ئېلىش ئىقتىدارى قاتارلىقلارنى بارلىققا كەلتۈرگەن بولسىمۇ، بىراق بۇ مەھسۇلاتلار كارخانىنىڭ ۋاقىت ئەۋزەللىكىنى يوقىتىشىدىن كېلىپ چىققان پاسسىپ ۋەزىيەتنى ئەسلىگە كەلتۈرەلمىگەچكە، ئاخىرىدا شاللىنىشقا مەجبۇر بولغان. شۇنى بىلىش كېرەككى، بۈگۈنكى سودا قائىدىسى ھەرگىزمۇ «چوڭ بېلىق كىچىك بېلىقنى يېيىش» ئەمەس، بەلكى «تىز بېلىق ئاستا بېلىقنى يېيىش» تىن ئىبارەت. ئېنتېرنىت تورىنى ۋەكىل قىلغان يېڭىچە ئىقتىساد دەۋرىدە ئەھۋال تېخىمۇ شۇنداق. سودا پۇرسىتىنى تۇتۇۋېلىشتا چوقۇم ئىدىيە ۋە ھەركەت جەھەتتىكى تەييارلىقنى ياخشى قىلىش كېرەك، بۇ تۆۋەندىكى بىر نەچچە تۈرنى ئۆز ئىچىگە ئالىدۇ:    بىرىنچى، ئاۋال قول سېلىشتەك ۋاقىت قارىشى بولۇش كېرەك. ئىگىلىك تىكلىگۈچىلەرگە نىسبەتەن ئېيىتقاندا،ۋاقىت پۇل ۋە بايلىق دىمەكتۇر. شۇنىڭ ئۈچۈن چوقۇم «ۋاقىت – سودا پۇرسىتى دىگەنلىكتۇر.» دىگەن قاراشنى تۇرغۇزۇش، تىزلىك ئارقىلىق غەلبىنى قولغا كەلتۈرۈش،ۋاقىت ئۈنۈمى يارىتىش، ھەرقانداق پۇرسەتنى ئاسانلىقچە قولدىن بەرمەسلىك كېرەك، شۇندىلا ،ئاندىن بازاردىكى پۇرسەتنى ۋاقتىدا قولغا كەلتۈرگىلى بولىدۇ. خۇددى مايۈن ئېيىتقاندەك: «ئېنتېرنىت تورى بىلەن شۇغۇللىنىش دولقۇن تېيىلىشقا ئوخشايدۇ، پۇرسەت يېنىڭىزدىلا بولىدۇ. بىراق سىز ھەرگىزمۇ دولقۇن كۆتۈرۈلگەن ۋاقىتتا ئاندىن تېيلىسىڭىز بولمايدۇ، سىز چوقۇم دولقۇنغا ئەگىشىپ كۆتۈرۈلۈشىڭىز، شامالغا ئەگىشىپ ئۆزگىرەلىشىڭىز كېرەك.»ئەمەلىيەتتە، ھەر قانداق كەسىپتە شۇنداق بولىدۇ، ئەگەر ئىگىلىك تىكلىگۈچىدە ئاۋۋال قول سېلىشتەك رىقابەت قىزغىنلىقى بولمىسا، ئاخىرىدا يەنىلا كەسكىن رىقابەتكە تولغان سودا قاينىمىدا شاللىنىپ كېتىدۇ. ھازىرقى دەۋردىكى كارخانىلار بازار ئېھتىياجىنى يادرو قىلىدۇ، ئەمما بازار «72 خىل ئۆزگىرىپ تۇرىدۇ.» شۇ سەۋەبتىن،پەقەت پۇرسەتنى چىڭ تۇتۇپ ۋاقىتتىن ئۇتالىغاندىلا ئاندىن ئەۋزەللىككە ئېرىشكىلى،خەتەردىن ساقلانغىلى، ھەمدە رىقابەتتە ئۇتۇپ چىققىلى بولىدۇ. ئىككىنچى، ناھايىتى سەزگۈر بولغان ئۇچۇر قارىشىغا ئىگە بولۇش كېرەك.    كارخانا چوقۇم ئۇچۇرغا ئەھمىيەت بېرىش،ئۇچۇردىن يىتەرلىك پايدىلىنىشنى يىتەكچى ئىدىيە قىلىش لازىم. بازار ئۇچۇرى بازارغا ئائىت ئۇچۇر ۋە ئەھۋاللارنى كۆرسىتىدىغان بولۇپ، ھازىرقى زامان كارخانىلىرى بازار پائالىيىتى يۈرگۈزۈشتىكى ئاساسلىق بايلىق مەنبەسى. كارخانىنىڭ بارلىق پائالىيەتلىرى، يەنى ئىستىراتېگىيىلىك يۆلىنىشنىڭ بەلگىلىنىشىدىن تارتىپ نىشانلىق بازارنىڭ تاللىنىشىغىچە، مەھسۇلاتنىڭ لايىھىلىنىشىدىن تارتىپ مەھسۇلاتنىڭ سېتىپ چىقىرىلغاندىن كىيىنكى مۇلازىمەتكىچە ھەممىسىدە ئۇچۇرنى باشلامچى ۋە ئاساس قىلىشى كېرەك. ئۇچۇرنىڭ بۇ خىل رولى شەك – شۈبھىسىز ھالدا ئۇچۇر قارىشىنىڭ مۇھىم ئورنىنى بەلگىلىگەن. ئۇچۇر – باشقۇرغۇچىنىڭ «كۆزى ۋە قۇلىقى»، بازار پۇرسىتىنى تۇتۇشتا چوقۇم ھەرقايسى تەرەپلەردىن كەلگەن ئۇچۇرلارنى ئىگەللەش، ئۆزىنىمۇ ۋە ئۆزگىنىمۇ بىلىش كېرەك، مۇشۇنداق بولغاندىلا غەلبە قازىنىش تەسكە چۈشمەيدۇ. ئۈچىنچى، مۇۋاپىق بولغان ئۈنۈم قارىشىغا ئىگە بولۇش كېرەك.   ھازىرقى زامان بازار پائالىيىتى دەۋرىدە،«تىزلىك» بىر چوڭ ئالاھىدىلىك. بازار پۇرسىتى تىز كېلىپ، تىز كېتىپ قالىدۇ،ئىستىمالچىلارنىڭ ئېھتىياجىنىڭ ئۆزگىرىشىمۇ ناھايىتى تىز، رىقابەتچىلەرنىڭ باش كۆتۈرۈپ چىقىشىمۇ ناھايىتى تىز بولىدۇ، بۇلارنىڭ ھەممىسى كارخانىدىن ئۇچۇرنىڭ تىز،تەدبىرنىڭ تىز، سېتىشنىڭ تىز بولۇشىنى تەلەپ قىلىدۇ، بۇلارنى ياخشى قىلىش كارخانىنىڭ ئىشلەپچىقىرىش ئۈنۈمىنىڭ يۇقىرى بولۇشىنى شەرت قىلىدۇ. يۇقىرى ئۈنۈم ئەمگەك چىقىمىنى ئازايتىپ،تەننەرخنى تۆۋەنلىتەلەيدۇ – دە، ئۈنۈملۈك تەدبىر ئۈچۈن شارائىت ھازىرلايدۇ. ئۈنۈم قارىشىنى تۇرغۇزۇشتا چوقۇم تىز ھەركەت، تۆۋەن تەننەرخ، يۇقىرى ئۈنۈم ئارقىلىق بازار رىقابىتىنى تۇتۇش، تەشەببۇسكارلىق ھوقۇقىنى ئىگەللەش كېرەك.    تۆتىنچى، تىز  پۈكمەيدىغان رىقابەت قارىشىغا ئىگە بولۇش لازىم. بازار پۇرسىتىنى تۇتۇشتا چوقۇم ئاكتىپلىق بىلەن بازار رىقابىتىگە قاتنىشىش، بازاردىكى خېرىدار، سۈپەت ۋە ئۈنۈمنى قولغا كەلتۈرۈش زۆرۈر. رىقابەت قانۇنىيىتى بازار ئىقتىسادىي تەرەققىياتىدىكى زۆرۈر قانۇنىيەت ۋە ئوبيېكتىپ تەلەپ.   بەشىنچى، خەتەرگە بەرداشلىق بېرەلەيدىغان پىسخىكىلىق ساپاغا ئىگە بولۇش لازىم. ئىگىلىك ياراتقۇچى چوقۇم خەتەرنى ئۆز –ئۈستىگە ئېلىشقا پېتىنالىشى، خەتەردىن ساقلىنىش، خەتەرنى ئازايتىش، خەتەرنى يوقىتىشقا ماھىر بولۇشى، ھەمدە خەتەرنى پۇرسەتكە ئايلاندۇرۇشنى يىتەكچى ئىدىيە قىلىشى كېرەك، شۇندىلا باشقىلارنىڭ ئالدىدا ماڭغىلى، باشقىلارغا رەھبەرلىك قىلغىلى بولىدۇ. «سىك» نىڭ باش لېدىرى چەمبېر ئۆزىنىڭ«سۈرئەتكە تايىنىپ مۇۋەپپەقىيەت قازىنىش نەزىرىيىسى» دىگەن كىتابىدا مۇنداق دىگەن:«بىز ئاللىقاچان پۈتۈنلەي يېڭىچە بولغان رىقابەت دەۋرىگە كىردۇق. بۇ خىلدىكى يېڭى رىقابەت ئەندىزىسى ئاستىدا، چوڭ شىركەتلەرنىڭ كىچىك شىركەتلەرنى يېڭەلىشى ناتايىن،ئەمما سۈرئىتى تىز شىركەتلەر چوقۇم سۈرئىتى ئاستىلارنى يېڭەلەيدۇ، سىزنىڭ كۆپ مىقداردا مەبلەغقە ئېرىشىشىڭىزنىڭ ھاجىتى يوق، چۈنكى قەيەردە پۇرسەت بولسا مەبلەغ شۇ جايدا ناھايىتى تىزلا قايتىدىن توپلىنىدۇ. سۈرئەت ناھايىتى تىزلا بازار ئۈلۈشى،پايدا نىسبىتى ۋە تەجرىبىگە ئايلىنىدۇ.» خۇددى چەمبىر ئېيىتقاندەك، ئېنتىرنىت تورىنىڭ توختىماستىن تەرەققىي قىلىشى ۋە تەرەققىياتىنىڭ چوڭقۇرلىشىشىغا ئەگىشىپ، بازار رىقابىتى ئاللىقاچان يېڭى بىر دەۋرگە كىردى. ئىلگىرى كارخانىلارنىڭ رىقابەتتە يېڭىپ چىقىشتا تايىندىغانلىرى تەننەرخ، سۈپەت، تېخنىكا ۋە ئۇسۇل ئىدى، بىراق ھازىر بۇلار ئاللىقاچان بىردىنبىر ئەۋزەللىك بولماي قالدى. ئىگىلىك ياراتقۇچىلار چوقۇم پۇرسەتنى ئالدىن ئىگەللىشى، سۈرئىتى تىز بولۇشى كېرەك، شۇنداق قىلغاندىلا غالىبلار قاتارىغا ئۆتەلەيدۇ. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تەرجىمان:ئابدۇللا ئۆمەر تور بەت ئادرېسى:WWW.UYHQT.COM تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	ئىككىنچى دەرس تۆتىنچى پارگىراف ئۆزگىچە ئوبراز تىكلەش،مەڭگۈ كۆپ سانلىقلار قاتارىغا ئۆتۈپ قالماسلىق كېرەك قەدىمكىلەر  : «باشقىلاردا يوق بولغىنى مەندە بولۇشى،باشقىلاردا بار بولغاننىڭ ياخشىسى مەندە بولۇشى، باشقىلاردا ياخشىسى بولغاندا مەندە ئۆزگىچىسى بولۇشى كېرەك.» دەيدىغان سودا قىلىشتىكى ئون ئىككى خەتلىك دەستۇرنى خۇلاسىلەپ چىققانمايۈننىڭ قارىشىچە، سودا قىلىشتا كىچىك سودىنى قىلسىمۇ چوقۇم ئۆزگىچە خاسلىق بىلەن قىلىش، ئۆزىنىڭ يولىدا مېڭىش لازىم، مەڭگۈ باشقىلارنىڭ ئارقىدىن مېڭىش بولسا سودىدا ھەزەر ئەيلەشكە تىگىشلىك ئەڭ چوڭ پەرھىز. ئىگىلىك تىكلىگۈچى پۇل تېپىش ئۈچۈن چوقۇم ئۆزىگە خاس ئوبراز تىكلەپ خېرىدارلارنى جەلپ قىلىشى كېرەك. قانداق قىلىپ خېرىدارلارنى جەلپ قىلالايمىز؟ ئۆزگىچە بولغان تىجارەت خاسلىقى ۋە ئۇسۇلى ھەمدە تاۋارنىڭ جەلپكارلىقى ۋە خاسلىقىغا تايىنىپ خېرىدارنى جەلپ قىلالايمىز. ئۇنىڭ ئۈستىگە، مايۈننىڭ «ئەلى بابا» ئېلېكترونلۇق سودا تورىنى قۇرۇش كەچۈرمىشلىرى بىزگە بۇ نۇقتىنى تولۇق ئىسپاتلاپ بەرگەن. 1999 – يىلى - ئېنتىرنىت تورىنىڭ گۈللىنىش يىلى. ئۇ ۋاقىتتا، بىر ئاي ئىچىدىلا نۇرغۇنلىغان ئېنتىرنىت تورى شىركەتلىرى بارلىققا كەلگەن. خۇڭ شاۋگاڭنىڭ تەبرىك فىلىمى «تاۋاق» دىكى مۇنداق بىر جۈملە كىلاسسىك سەھنە سۆزى ئۇ ۋاقىتتىكى ئېنتىرنىت تورىنىڭ تەرەققىياتىنى ناھايىتى توغرا تەسۋىرلەپ بەرگەن: «سىز پۇل خەجلەپ بىر تور بېكىتى قۇرسىڭىز، بۇ خەجلىگەن بارلىق پۇللىرىڭىزنىڭ ئارقىسىغا بىر تال «0» نى قوشۇپ باشقىلارغا سېتىپ بەرگىنىڭىز بىلەن باراۋەردۇر.» بىراق، ئەينى ۋاقىتتىكى كۆپ قىسىم تور بېكەتلىرىنىڭ شەكلى «شىنلاڭ» ۋە «سوسو» دىن پەرقلەنمەيىتتى. مايۈنمۇ بۇنداق شەكىلنى قوللاپ كەتمەيىتتى: كۆپ قىسىم ئوتتۇرا – كىچىك كارخانىلارنىڭ خوجايىنلىرىنىڭ مەدەنىيەت سەۋىيىسى يۇقىرى ئەمەس، ئەگەر ئۇلار ئابونىتلار تورىنى ئىشلەتسە، بۇ ئۇلارنىڭ ئىشلىتىشىگە تەسىر كۆرسىتەتتى. مايۈن كۆڭلىگە ئاللىقاچان ئېلېكترونلۇق سودا جەھەتتە چوڭ ئىش قىلىشنى پۈككەن، ھەمدە ئۆزىنىڭ مۇلازىمەت ئوبيېكتىنىمۇ ئايدىڭلاشتۇرۇپ بولغان، بۇ خىلدىكى ئىستىراتىگېيىلىك مەسىلىلەر ئاللىقاچان ئېنىقلاشقان بولۇپ، پەقەت قانداق قىلىش ۋە قانداق قىلىپ تىجارەتنى يۈكسەلدۈرۈش مەسىلىسىلا قالغان ئىدى. بېيجىڭدىكى خىزمىتىنى تاشلاپ خاڭجۇغا قايتىدىغان ۋاقىتتا، مېڭىشنىڭ ئالدىدا ئازراق خاتىرە قالدۇرۇش ئۈچۈن مايۈن ۋە ئۇنىڭ ھەمراھلىرى سەددىچىن سېپىلىغا ساياھەتكە چىققان. سەددىچىن سېپىلىدا مايۈن نۇرغۇنلىغان «پالانى بۇ جايغا ساياھەتكە كەلگەن» دىگەندەك سۆزلەرنى ئۇچراتقان. بۇ سۆزلەر مايۈننىڭ ئىلھامىنى قوزغاتقان. شۇنداق قىلىپ، مايۈن BBS شەكلىنى قوللىنىپ، «ئەلى بابا» نى«توردىكى بازارلار جۇغلانمىسى»غا ئايلاندۇرۇشنى قارار قىلغان، بۇنداقتا كۆرۈنۈشى سۆلەتلىك بولمىسىمۇ ئەمما ناھايىتى قوللىنىشچان بولاتتى. ئەمەلىيەت مايۈننىڭ قارارىنىڭ توغرىلىقىنى ئىسپاتلىغان. نەچچە يىلدىن كىيىن، «ئەلى بابا» ھەممەيلەنگە تونۇشلۇق بولۇپلا قالماستىن، يەنە ئىزچىل ئېنتىرنىت دۇنياسىنىڭ ئالدىنقى سېپىدە مېڭىپ، بىر –بىرىدىن گۈزەل «رىۋايەت» لەرنى بارلىققا كەلتۈرگەن! ياپونىيە كارخانا ساھەسىدە ئىلگىرى مۇنداق بىرشۇئار بارلىققا كەلگەن: «باشقىلار قىلمىغان ئىشنى قىلىش كېرەك.» يەنە ئېلىپ ئېيىتساق، ئىگىلىك تىكلەپ سودا قىلىشتا، ئىستىقبالى يوق دەپ قارىلىپ باشقىلار قىلمىغان خاس يوللاردا مېڭىش كېرەك. مايۈن يەنە مۇنداق دىگەن: «بىر تۈر ۋە بىر ئوينىڭ خاسلىقى بولمىسا، باشقىلارنى جەلپ قىلىشى ناھايىتى تەسكە چۈشىدۇ.» شۇنداق، ئۇچۇرلار ناھايىتى مول، سودا قىلغۇچىلار ناھايىتى كۆپ بولغان، رىقابەت ۋە جەڭ ئېلان قىلىشقا تويۇنغان دەۋردە،بارلىق ئىگىلىك تىكلىگۈچىلەردە «بۈگۈنكى كۈندە سودا قىلىش، پۇل تېپىش تەس» دىگەن تۇيغۇ بار. بىراق سودا قىلىش تەس بولغانسىرى، يەنە پۇل تاپالايدىغان كىشىلەر كۆپىيىدۇ، چۈنكى ئۇلار ھەمىشە يىراقنى كۆرۈپ، ئۆزلىرىنىڭ ئۆزگىچە مەھسۇلاتى ۋە مۇلازىمىتى ئارقىلىق خېرىدارلارنى جەلپ قىلىدۇ. تىجارەتتىكى مەھسۇلاتلار قانچە يېڭىچە، قانچە ئۆزگىچە بولسا شۇنچە ياخشى، بۇ سودا قىلىشتىكى بۈيۈك پاراسەت. ئەگەر سىزنىڭ مەھسۇلات ياكى مۇلازىمىتىڭىزنىڭ شۇ كەسىپتە ئۆزىگە خاس ئورنى بولسا، ياكى ئالدىنقى قاتاردا تۇرسا، ئۇنداقتا سىز چوقۇم سودىڭىزنى ئاقتۇرالايسىز! ۋۇيۆ ئىلگىرى  شىنجىندىكى بىر مېھمانخانىدا مۇلازىمەتچى بولغان. بىر كۈنى، ۋۇيۆ كومپيۇتېر شىركىتىدە ئىشلەيدىغان ئوغۇل دوستىغا چۈشلۈك تاماق ئاپىرىپ بەرگىلى بارغان، ئۇ تاماق قېپىنى شۇنداق ئېچىشىغا ئەتراپقا تارقالغان مەززىلىك پۇراق ئۇنىڭ ئوغۇل دوستىنىڭ خىزمەتداشلىرىنى جەلپ قىلىۋالغان. ۋۇيۆ خۇشاللىق ئىچىدە تۇيۇقسىز شۇنداق ھېسىياتقا كەلگەن: ھازىرقى زامان كىشىلىرىنىڭ تۇرمۇش رىتىمى ناھايىتى تىز، خىزمەت بېسىمى چوڭ، بىنالاردا خىزمەت قىلىدىغان ئاقياقىلىقلارنىڭ چۈشلۈك تاماققا تەييارلىق قىلىدىغان ھەپسىلىسى يوق بولغاچقا، ھەمىشە خالىغانچە ئۇششاق – چۈششەك نەرسىلەر بىلەن قورساق توقلايدۇ ياكى«مەكدونالد»، «كېنتاكى» قاتارلىق غەربچە تىز تاماقخانىلارغا بارىدۇ، بۇنداقتا ئۇلارنىڭ چىقىمىمۇ ئېشىپ كېتىدۇ. ئەگەر كۆڭۈل قويۇپ تەييارلانغان يۈرۈشلۈك تاماق ۋە ئوزۇقلۇق قىممىتى يۇقىرى بولغان، ھورى چىقىپ تۇرغان ئۆي تاماقلىرىنى خىزمىتى ناھايىتى ئالدىراش بولغان بۇ كىشىلەرگە ۋاقتىدا يەتكۈزۈپ بېرەلىسە چوقۇم بازار تاپىدۇ! ۋۇيۆ بۇ خىيالىدىن ناھايىتى خۇشال بولۇپ،ئۆزىنىڭ يىتۈك ئاشپەزلىك ھۈنىرىگە تايىنىپ شىركەتلەر كۆپ جۇغلاشقان بىر سودا كوچىسىدا ئاشخانا ئاچماقچى بوپتۇ. ئەمما ئاۋات جايلاردىكى ئۆي ئىجارىسى ناھايىتى قىممەت بولۇپ،  ئانچە چوڭ بولمىغان بىر دۇكاننىڭ ئايلىقىلا 20 مىڭ يۈەن ئىدى،بۇنداقتا ئۇ دۇكان ئېچىپ ئاختۇرالماي قالسىلا ئۇنىڭ كىچىك دۇكىنىمۇ ئوزۇنغا بەرداشلىق بېرەلمەسلىكى مۇمكىن ئىدى. بۇ ۋاقىتتا، ئۇنىڭ ئوغۇل دوستى ئۇنىڭغا تەكلىپ بېرىپ، <مەبلەغ سېلىشنىڭ ھاجىتى بولمىغان بىر تىجارەت ئۇسۇلى بولۇپ، خوجايىن بولۇشنى خالايدىغان، ئەمما مەبلىغى بولمىغان ياشلارغا ناھايىتى ماس كېلىدىغانلىقى >نى ئېيىتقان، بۇ دەل «توردا دەسمايىسىز ئىگىلىك تىكلەش» ئىدى. «كۆز ئالدى تۇيۇقسىز يورۇپ كەتكەن» ۋە ئېنتىرنىت تورىغا نىسبەتەن ناتونۇش بولمىغان ۋۇيۆ ئوغۇل دوستىنىڭ تەكلىپىنى ئاڭلىغاندىن كىيىن دەرھال ھەركەتكە كەپتۇ. شۇنداق قىلىپ ۋۇيۆ مېھمانخانىدىكى خىزمىتىدىن ئىستىپا بېرىپ، «توردىكى خوجايىن» بولۇشقا بەل باغلاپتۇ. ئۇ كۆپ مىقداردىكى تاماق تىزىملىكىنى كۆرۈپ سېلىشتۇرۇپ ھىساپلاش ئارقىلىق، خېرىدارلار ئۈچۈن   ماسلاشتۇرۇلىشى مۇۋاپىق بولغان ئوخشىمىغان تەمدىكى 20 نەچچە خىل يۈرۈشلۈك تاماقلارنى تاللاپ چىقىپتۇ، ئوغۇل دوستى ئۇنىڭ ئۈچۈن ناھايىتى كۆركەم بولغان تور بەت لايىھەلەپ بېرىپتۇ. يېرىم ئايدىن كۆپرەك تىرىشچانلىق كۆرسىتىش ئارقىلىق بىر «تور تىز تاماقخانىسى» ئاخىرى تىجارەت باشلاپتۇ. ئۈچ ئايدىن كىيىن، ۋۇيۆنىڭ تاماقخانىسىنىڭ تىجارىتى ئاستا – ئاستا ئېقىشقا باشلاپتۇ. چۈشلۈك تاماق ۋاقىتى بولۇشى ھامانلا ئۇنىڭ تېلفۇنى جىرىڭلاشقا باشلاپ زاكاس قوبۇل قىلىپ ئۈلگۈرگىلى بولمايدىغان ، خېرىدارلارنىڭ تاماق زاكاس  قىلغان ئېلخەتلىرى ئۇنىڭ ئېلخەت ساندۇقىغا توشۇپ كېتىدىغان بوپتۇ! ئىگىلىك تىكلەش بىر قەدەر مۇرەككەپ جەريان،يەنە كېلىپ بىر يېڭىچە، جانلىق ۋە ھاياتىي كۈچى ئۇرغۇپ تۇرىدىغان جەريان. شۇنىڭ ئۈچۈن، ئىگىلىك تىكلەپ مۇۋەپپەقىيەت قازىنىشتا ھەرگىزمۇ توختىماستىن باشقىلارنىڭ يولىدا مېڭىشقا، باشقىلارنىڭ ئىدىيىسىنى كۆچۈرۈپ ئەكىلىشكە بولمايدۇ، ئۇنداق بولغاندا مەغلۇبىيەت مۇقەررەرلىشىدۇ. بىز ئىنچىكىلىك بىلەن كوچىلاردىكى دۇكانلارغا قاراپ باقساق بولىدۇ، بىر «يۈننەن ياۋا موگو ساماۋەر شورپىسى» ئاشخانىسى ناھايىتى ئاسانلا بېيجىڭدا پۇت تىرەپ تۇرالىغان ھەمدە تىزلىكتە تەرەققىي قىلالىغان، ئەمما كوچىلارغا تولۇپ كەتكەن «چۇڭچىڭ ساماۋەر شورپىسى» ئاشخانىلىرىنىڭ سودىسى ناھايىتى كاساتلاشقان؛ ئۆزىگە خاس ھالدا «مال ئىزدەش دۇكىنى» دەپ ۋېۋىسكا ئاسقان تاللا بازىرى ناھايىتى تىزلا خېرىدارلارنى جەلپ قىلالىغان، ئەمما چوڭ – كىچىك كوچىلارغا تولۇپ كەتكەن باشقا تاللا بازارلىرىنىڭ ئىشىك ئالدى دائىم قۇرۇق تۇرغان ...بىز مۇنداق كۈرۈنۈشلەرنى ھەممىلا جايدا ئۇچىرىتالايمىز.مانا بۇ ھال سىزنىڭ ئۆزگىچە خاسلىقىڭىزنىڭ بار-يوقلىقىنىڭ نەتىجىسى. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تەرجىمان:ئابدۇللا ئۆمەر تور بەت ئادرېسى:WWW.UYHQT.COM تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	ئىككىنچى دەرس بەشىنچى پارگىراف كىچىكتىن باشلاپ قول سېلىش، ئۇششاق تاۋارلاردىنمۇ چوڭ ئىشلارنى ۋۇجۇدقا چىقارغىلى بولىدىغانلىقىغا ئىشىنىش كېرەك    ئىگىلىك يارىتىش توغرۇلۇق گەپ بولغاندا،نۇرغۇنلىغان كىشىلەر ئاز بولغاندا نەچچە ئون مىڭ، كۆپ بولغاندا نەچچە مىليون،ھەتتا نەچچە يۈز مىليون مەبلەغ بولغاندا ئاندىن ئىش باشلىغىلى بولىدۇ، دەپ قارايدۇ. ھالبۇكى، دۇنيادا نۇرغۇنلىغان بايلار قۇرۇق قول ئىش باشلاپ نەچچە يۈز مىڭ، ھەتتا نەچچە يۈز مىليونغا ئىگە بولغان. نېمىشقا؟ بۇنىڭدىكى سەۋەبلەرنىڭ بىرى ، ئۇلار كىچىك ئىشلارنى قىلىشتىن نومۇس قىلمىغان، ئىشنى «كىچىك» تىن باشلىغان. ھەممەيلەنگە تونۇشلۇق بولغان «مەكدونالد» نى ئېلىپ ئېيىتساق، نۇرغۇنلىغان كىشىلەر ئۇنىڭ پۈتۈن دۇنيادىكى ھەرقايسى دۆلەتلەرگە تارقالغانلىقىنى، دۇنياغا داڭلىق چوڭ تىپتىكى زەنجىرسىمان تاماقخانا ئىكەنلىكىنى بىلىدۇ. ئەمما كىممۇ «مەكدونالد» نىڭ قۇرغۇچىسى لېي.كىرىكنىڭ ئەينى ۋاقىتتا لېمون سۈيى سېتىشتىن ئىش باشلىغانلىقىنى تەسەۋۋۇر قىلالىسۇن؟ شۇنىڭ ئۈچۈن، ئىگىلىك تىكلىگۈچىلەر سېپىگە يېڭىدىن قوشۇلغان كىشىلەرگە نىسبەتەن ئېيىتقاندا، ئەگەر ۋاقتىنچە پۇل بولماسلىق ياكى پۇل ئاز بولۇش سەۋەبىدىن ماشىنىسازلىق، پولات – تۆمۈر، نېفىت قاتارلىق چوڭ كۆلەمدىكى مەبلەغ ئېھتىياجلىق بولغان كەسىپلەرنى قىلىشقا ئامال بولمىغاندا،ئەتراپتىكى كىچىك ئىشلاردىن باشلاپ ئاستا – ئاستا زورىيىش لازىم، بۇمۇ ناھايىتى پەملىك ئۇسۇل. پەقەت تىجارەت قىلىشنى بىلگەندىلا، ھەرقانچە كىچىك تىجارەتتىنمۇ پۇل تاپقىلى بولىدۇ. ئەينى ۋاقىتتا، بارلىق تور سودا بېكەتلىرى دىگۈدەك نىشاننى چوڭ كارخانا، چوڭ شىركەتلەرگە قويغان ۋاقىتتا، مايۈن ئەكسىچە قىلىپ مۇنداق دىگەن: «باشقىلار چوڭ لەھەڭلەرگە ئەگىشىپ مېڭىۋەرسۇن، بىز پەقەت كىچىك راكلارنى تۇتساقلا بولدى. بىز ناھايىتى تىزلا 500 مىڭ نەپەر ئىمپورت –ئېكىسپورت سودىگىرىنى جۇغلىيالايمىز، ئۇلاردىن بىزگە نەپ تەگمەسلىكى مۇمكىنمۇ؟» 1999 – يىلىنىڭ بېشىدا، نەزەر – دائىرىسى ئېچىلغان مايۈن خاڭجۇغا قايتىپ كېلىپ ئىككىنچى قېتىملىق ئىگىلىك تىكلەش سەپىرىنى باشلىغان، ئۇ ئېلېكترونلۇق سودىغا قاراپ قەدەم ئېلىشنى قارار قىلغان ئىدى.ئوتتۇرا – كىچىك كارخانىلارنىڭ قىيىنچىلىقىنى ئېنىق بىلگەچكە، ئۇ كەسكىنلىك بىلەن «چوڭ لەھەڭدىن ۋاز كېچىپ كىچىك راكلارنى تۇتۇشنى، %15 چوڭ كارخانىلاردىن ۋاز كېچىپ، %85 ئوتتۇرا – كىچىك كارخانىلار ئۈچۈن سودا قىلىش» نى قارار قىلغان.    «ئەگەر كارخانىنىمۇ باي ۋە نامرات دەپ ئايرىغىلى بولسا، ئۇنداقتا ئېنتىرنىت تورى دەل نامراتلارنىڭ دۇنياسى. چۈنكى چوڭ كارخانىلارنىڭ ئۆزىنىڭ مەخسۇس ئۇچۇر يولى، زور سوممىدىكى ئېلان ھەققى بار، ئوتتۇرا– كىچىك كارخانىلاردا بۇلاردىن ئېغىز ئاچقىلى بولمايدۇ، شۇڭا ئۇلار ئېنتىرنىت تورىغا ئېھتىياجلىق كىشىلەر.» مايۈن ئوتتۇرا – كىچىك كارخانىلارنىڭ بايلىققا ئېرىشىشىگە يول كۆرسىتىدىغان ئادەمگە ئايلىنىشنى قارار قىلغان، ئۇنىڭ قىلىدىغىنى بولسا بىر سەھنە تەمىنلەپ، پۈتۈن يەرشاردىكى ئوتتۇرا – كىچىك كارخانىلارنىڭ ئىمپورت – ئېكىسپورت ئۇچۇرلىرىنى بىر يەرگە جۇغلاش ئىدى. شۇنداق قىلىپ، 1999 – يىلى 9 – ئايدا مايۈننىڭ«ئەلى بابا» تور بېكىتى دۇنياغا كۆز ئاچقان.    ئىگىلىك تىكلەش ئادەم بولۇش سەپىرىگە ئوخشايدۇ: «ياخشى ئىشلارنى كىچىك بولسىمۇ قىلىش، ئەسكى ئىشلارنى كىچىك بولسىمۇ قىلماسلىق كېرەك.» تاۋۇز چوڭ بولسىمۇ، رىقابەتچىلىرى كۆپ ۋە كۈچلۈك بولغاچقا،ئۇتۇپ چىقىشى تەس؛ كۈنجۈت كىچىك بولسىمۇ، بىراق ئۇ ئۇچرايدىغان رىقابەت بەك كەسكىن ئەمەس. شۇ سەۋەبتىن، پەقەت سىز «كىچىك ئىشلارنى ياراتماي قالمىسىڭىزلا»بايلىق ئىشىكىنى ئاچالايسىز. ئىگىلىك تىكلىگۈچى چوقۇم مۇنداق بىر جۈملىنى ئىسىدە تۇتۇشى كېرەك: «تاما – تاما كۆل بولار.»    دۇنياغا داڭلىق كاتتا كارخانىچى، موتوسىكىلىت پادىشاھى خوندا زوڭيىلاڭ ئىلگىرى مۇنداق دىگەن: «ئاۋۋال بىر كىچىك نىشان بولۇش،بۇ نىشانغا يەتكەندىن كىيىن پۈتۈن كۈچنى توپلاپ چوڭراق نىشانغا قاراپ ئاتلىنىش لازىم. بۇ نىشانغا پۈتۈنلەي يەتكەندىن كىيىن تېخىمۇ چوڭ بولغان نىشان بەلگىلەش ھەمدە بۇ نىشانغا قاراپ پۈتۈن كۈچ بىلەن تىرىشىش لازىم. مەن بۇنداق ھالەتتە نەچچە ئون يىل كۆرەش قىلىش، بىر قەدەم – بىر قەدەمدىن پۇختىلاپ مېڭىش ئارقىلىق ئاندىن دۇنيا (موتوسىكىلىت پادىشاھى) غا ئايلانغان.» دۇنياغا داڭلىق شىركەتلەرنىڭ ئىگىلىك تىكلەش تارىخىغا نەزەر سالىدىغان بولساق، «ھەممىباب ئېلېكتىرى» ئەڭ دەسلەپتە لامپۇچكا ياساشتىن باشلانغان، ھەرگىزمۇ بۈگۈنكىدەك كەڭ تېخنىكا ساھەسىگە ئىگە ئەمەس ئىدى؛ «خوندا»دەسلەپتە بىر كىچىككىنە موتوسىكىلىت رېمونت قىلىش ئورنى بولۇپ، ھەرگىزمۇ بۈگۈنكىدەك موتوسىكىلىت ئىشلەپچىقىرىش سېخىغا ئىگە ئەمەس ئىدى؛ «سوڭشىيا» نىڭ دەسلەپكى مەھسۇلاتلىرى ئۇششاق ۋېكلىيۇچاتىل بولۇپ، ھازىرقىدەك باھاسى قىممەت بولغان توڭلاتقۇ، رەڭلىك تېلېۋېزور قاتارلىق ئائىلە ئېلېكتىر سايمانلىرىغا ئىگە ئەمەس ئىدى. «تاما – تاما كۆل بولار» دىگەندەك ،ئىگىلىك تىكلىگۈچىلەر تىجارەتتە پايدا ئېلىپ پۇل تېپىشتا چوقۇم «ئۇششاق» ئىشلاردىن باشلاش لازىم. ھەرگىزمۇ ئۇششاق تىجارەتلەرنى كۆزگە ئىلماسلىققا بولمايدۇ، ئازدىن كۆپنى بەرپا قىلىشقا ماھىر بولۇش،ئەمەلىيەتچىل بولۇپ، جاپاغا چىداش كېرەك، شۇندىلا ئاندىن چوڭ ئىشلارنى قىلىشقا بولىدۇ. «چوڭ» ئارقىلىقمۇ ئىش قىلغىلى بولىدۇ، «كىچىك»ئارقىلىقمۇ چوڭ ئىشلارنى قىلغىلى بولىدۇ. سودا مەيدانلىرىدا ئىگىلىك تىكلىگۈچىلەر چوقۇم ئەمەلىيەتنى چىقىش قىلغان ئاساستا نىشاننى توغرا تاللاش، بىر قەدەم – بىرقەدەمدىن يۇقىرىغا قاراپ يامىشىش كېرەك. «بىر كېچىدىلا باي بولۇش» قۇرۇق خام خىيال، ئۇ خىلدىكى ئۆزىنىڭ تېخنىكىسى، مەبلىغى ۋە ئىقتىسادىي ئەھۋاللىرىغا قارىماستىن، قارىغۇلارچە «چوڭ» نى قوغلىشىدىغانلار ئاخىرىدا «سۆگەتۋاي» غىمۇ ئېرىشەلمەيدۇ، «تېرەكباي» مۇ ئۇلارغا قاراپ قاراپ قويمايدۇ – دە، قۇرۇق قول قالىدۇ.    شۇنىڭ ئۈچۈن، ئىگىلىك تىكلىگۈسى بار ئەمما پۇلى يوق كىشىلەرگە نىسبەتەن، مايۈننىڭ «لەھەڭدىن ۋاز كېچىپ راك تۇتۇش» ئۇسۇلى ناھايىتى ماس كېلىدىغان ئىگىلىك تىكلەش يولى بولۇپ ھېسابلىنىدۇ. كىچىك شىركەت،كىچىك كەسىپ، ئۇششاق مەھسۇلات ياكى باشقىلار دىققەت قىلمايدىغان ساھەلەرنىڭ ھەممىسى ئىگىلىك تىكلەشتىكى ناھايىتى ياخشى بولغان تاللاش بولۇپ ،بۇلار ناھايىتى جانلىق، ھەركەتچان بولغان تۈرلەر بولۇپ ھېسابلىنىدۇ. پەقەت ئىگىلىك تىكلىگۈچى مۇرەككەپ بولغان ئىستىمال ھەركىتى جەريانىدىن ئىستىمال پۇرسىتى،ئىختىرا، ئىشلەپچىقىرىش قاتارلىقلارنى ۋاقتىدا بايقىيالىسا ؛يېڭى يوللارنى،قولايلىق تاۋارلارنى سېتىپ چىقىرالىسا؛ يېڭىچە ئىستىمال ئېھتىياجىغا ماسلىشالىسا ۋە يېڭىدىن بارلىققا كەلتۈرەلىسە، ئۇنداقتا تېخىمۇ كەڭرى بولغان پۇرسەتكە ئېرىشەلەيدۇ. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تەرجىمان:ئابدۇللا ئۆمەر تور بەت ئادرېسى:WWW.UYHQT.COM تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	ئىككىنچى دەرس ئالتىنچى پارگىراف ئۇچۇرلارنى يىغىشقا ماھىر بولۇش، ئۇچۇر ئارقىلىق ياخشى تۈرلەرنى بايقاش    كىشىلەر دائىم ۋاقىت – ئالتۇن دىمەكتۇر،دىيىشىدۇ. ئەمەلىيەتتە، سودا دۇنياسىدا ۋاقىتتىن باشقا ئۇچۇرمۇ بىر خىل بايلىق بولۇپ ھېسابلىنىدۇ. ئىگىلىك تىكلىگۈچىلەرنىڭ مۇۋەپپەقىيەت قازىنىش –قازىنالماسلىقى ھەمىشە ئۇلارنىڭ ئۇچۇر يىغىش ۋە ئۇنىڭدىن پايدىلىنىش ئىقتىدارىغا باغلىق بولىدۇ. مايۈننىڭ ئىگىلىك تىكلەش كەچۈرمىشلىرىگە قارايدىغان بولساق، بىز ئۇچۇرنىڭ ئىگىلىك تىكلىگۈچىلەرگە بولغان مۇھىم رولىنى تېخىمۇ چوڭقۇر ھېس قىلالايمىز. 1995 – يىلى، مايۈن «خەيبو» تەرجىمانلىق ئورنىنى قۇرۇپ چىقىدۇ. خاڭجۇ شەھەرلىك ھۆكۈمەت بىلەن ئامېرىكىدىكى بىر شىركەتنىڭ يۇقىرى سۈرئەتلىك تاشيول ھەمكارلىقى سۆھبىتىگە ياردەم قىلىش سەۋەبلىك، مايۈن تۇنجى قېتىم ئېنتىرنىت تورى بىلەن ئۇچرىشىدۇ. << Jack (مايۈننىڭ ئېنگىلىزچە ئىسمى)، بۇ بولسا ئېنتىرنىت تورى، سىز ھەر قانداق خەتنى كىرگۈزۈپ مۇناسىۋەتلىك ئۇچۇرلارنى ئىزدىيەلەيسىز.» مايۈننىڭ سىئاتىلدىكى ئوقۇتقۇچى دوستى ئۇنىڭغا شۇنداق دەپتۇ. كومپيۇتېرنى بۇزۇپ قويۇشتىن قورققان مايۈن ناھايىتى تەسلىكتە beer (پىۋە) دەپ كىرگۈزۈپتۇ، نەتىجىدە گېرمانىيە، ئامېرىكا پىۋىلىرىغا ئائىت بىر دۆۋە ماتېرىياللار كۆرۈنۈپتۇ؛ ئۇ يەنە China (جۇڭگو) دەپ كىرگۈزۈپتۇ، بىراق no data (ماتېرىيال يوق) دىگەن خەت كۆرۈنۈپتۇ؛ مايۈن يەنە Chinese history (جۇڭگو تارىخى) دەپ كىرگۈزۈپتىكەن، «ياخو» تورىدا 50 خەتلىك ناھايىتى قىسقا بىر ئابزاس چۈشەندۈرۈش چىقىپتۇ. مايۈن بۇنى ناھايىتى ئەھمىيەتلىك ھېس قىپتۇ، بىراق نېمىشقا ئۇنىڭدا جۇڭگوغا ئائىت نەرسىلەر يوق؟ شۇنداق قىلىپ مايۈن دوستىدىن بۇنى قانداق ئىشلىتىدىغانلىقىنى سوراپتۇ. دوستى ئۇنىڭغا <<بىر ئاساسىي بەت (home page) قىلىپ، ئاندىن ماتېرىياللارنى تور ۋە ئىزدەش ماتورىغا قويساق بولىدۇ>>، دەپتۇ. مايۈن بۇنىڭدىن ئىلھاملىنىپ، دوستىغا خاڭجۇ«خەيبو» تەرجىمانلىق ئورنىنىڭ تور بېتىنى قىلدۇرۇپتۇ، نەتىجىدە ئۇ قىسقىغىنە ئۈچ سائەت ئىچىدە تېخىمۇ كۆپ ئۇچۇرلارنى تەمىنلەشكە ئائىت 6 پارچە  ئېلخەت تاپشۇرۋاپتۇ، مايۈن بۇنىڭدىن تورنىڭ سودا پۇرسىتىنى بايقاپتۇ. گەرچە، مايۈن ئېنتىرنىت تورىنى چۈشەنمىسىمۇ،چەتئەلدە ئوقۇپ باقمىغان بولسىمۇ، بىراق ئۇ ئۆزىنىڭ ئۇچۇرغا بولغان سەزگۈرلۈكىگە تايىنىپ ئەينى ۋاقىتتا ئامېرىكىدا تۇرۋاتقان لى يەنخۇڭ، جاڭ چاۋيەن قاتارلىقلار بىلەن ئېنتىرنىتنىڭ جەلپكارلىقىنى بىرلىكتە ھېس قىلغان، بۇ ھىس قىلىشنىڭ ئۇنىڭ ئېلېكترونلۇق سودىغا قەدەم ئېلىشىغا ياردىمى بولغان. ئەلۋەتتە، مايۈننىڭ سەرگۈزەشتىسى بىزگە شۇنى ئېيتىپ بېرىدۇكى، ئۇچۇرغا ئېرىشىشنىڭ ئۆزى يىتەرلىك ئەمەس، ئەڭ مۇھىمى ئۇنىڭدىن سودا پۇرسىتىنى بايقاشقا ماھىر بولۇش. ئەينى ۋاقىتتا، ئامېرىكىدا تۇرۇپ تور بىلەن ئۇچراشقانلار ناھايىتى كۆپ ئىدى، جۇڭگودىمۇ تور بىلەن ئۇچراشقانلار خېلى بارئىدى، مەسىلەن: جۇڭگو ئاكادىمىيىسى ئېنىرگىيە فىزىكىسى تەتقىقات ئورنىدىكى خادىملار. بىراق تور بىلەن ئۇچرىشىپلا كەلگۈسىدىكى تور دۇنياسىنى، تورنىڭ دۇنيانى ئۆزگەرتىشىدىكى غايەت زور رولىنى، تورنىڭ ئارقىسىغا يوشۇرۇنغان غايەت زور سودا پۇرسىتىنى كۆرگەنلەر ناھايىتى ئاز، كەلگۈسىنى ۋە سودا پۇرسىتىنى كۆرگەنلەر پەقەت مايۈن قاتارلىق ئاز ساندىكى ئادەملەر، خالاس. ھازىر بىز ئۇچۇر دەۋرىدە تۇرۋاتىمىز، ئۇچۇر بىزنىڭ تىجارىتىمىزنىڭ ئاساسىدۇر. شۇنىڭ ئۈچۈن، ئۇچۇرغا ئېرىشكەنلىك مۇۋەپپەقىيەت قازىنىدىغان پۇرسەتكە ئېرىشكەنلىك بولۇپ ھېسابلىنىدۇ. ئەمەلىيەتتە، رېئال دۇنيادىكى سودا پائالىيىتىدە، مايۈنگە ئوخشاش ئۇچۇردىن پايدىلىنىپ سودا پۇرسىتىگە ئېرىشكەن غالىبلار ناھايىتى كۆپ. بۇنىڭدىن ئۇچۇرنىڭ سودىغا بولغان مۇھىملىقىنى كۆرۈۋالغىلى بولىدۇ. ئۇنداقتا، قانداق قىلىپ ئۇچۇرغا ئېرىشىش كېرەك؟ بىرىنچى، تەشەببۇسكارلىق بىلەن ۋاقتىدا ئۇچۇرغا ئېرىشىش كېرەك. سىز چوقۇم تەشەببۇسكارلىق بىلەن ئۇچۇر ئىزدەيدىغان ئادەتنى يىتىلدۈرۈشىڭىز كېرەك، يەنى ئۇچۇرغا بولغان سەزگۈر كۈزىتىش ئىقتىدارىنى يىتىلدۈرۈشىڭىز، ئۇچۇر بايقالغان ھامان ئۇنىڭغا ئېرىشىش ۋە ساقلاپ قويۇشقا ماھىر بولۇشىڭىز كېرەك. ئەلۋەتتە، سىز ئۇچۇرنىڭ ۋاقىت ئۈنۈمىگە كاپالەتلىك قىلىشىڭىز، ۋاقتىدا ئەڭ يېڭى ئۇچۇرلارغا ئېرىشىشىڭىز كېرەك، چۈنكى كونا ئۇچۇرلار ھەمىشە پايدىلىنىش قىممىتىنى يوقاتقان بولىدۇ، ئەكسىچە بىر يېڭى ئۇچۇرغا دائىم مۇۋەپپەقىيەت پۇرسىتى يوشۇرۇنغان بولىدۇ. سىز ھەرقايسى تاراتقۇلاردىن پايدىلىنىپ ھەرخىل ئەڭ يېڭى ئۇچۇرلارنى يىغسىڭىز بولىدۇ، مەسىلەن: گېزىت، رادىئو، تېلېۋېزور، تور قاتارلىقلار. يەنە بازار تەكشۈرۈشى ئېلىپ بارسىڭىز، ئاكتىپلىق بىلەن باشقىلاردىن ئۇچۇر يىغسىڭىزمۇ بولىدۇ. ئىككىنچى، سىز نىشانلىق ھالدا ئۇچۇر توپلىشىڭىز كېرەك. ئوخشىمايدىغان تەرەققىيات باسقۇچىدا سىز ئېھتىياجلىق بولىدىغان ئۇچۇرلارمۇ ئوخشاش بولمايدۇ. سىزنىڭ ئېھتىياجىڭىزغا ئاساسەن نىشانلىق ھالدا ئۇچۇر يىغسىڭىز، دائىم يېرىم غەلبە قازانغان بولىسىز. ئۈچىنچى، سىز ئۆزىڭىزنىڭ ئۇچۇر چەمبىرىكىڭىزنى قۇرۇپ چىقىشىڭىز كېرەك. سىز چوقۇم ئۆزىڭىزگە لازىملىق ئۇچۇرلارغا قەيەردىن ئېرىشكىلى بولىدىغانلىقىنى بىلىشىڭىز، ئۇچۇرلارغا ئېرىشىشكە نىسبەتەن كىمنى تاپسا مۇۋاپىق بولىدىغانلىقىنى بىلىشىڭىز كېرەك. ئىشقىلىپ ساۋاقداش، دوست،خىزمەتداش ۋە ئۇلار تونۇشىدىغان ئادەملەرنىڭ ھەممىسى سىزنىڭ ئۇچۇر مەنبەيىڭىز بولالايدۇ. سىز پەقەت ئادەتتە ئۇلار بىلەن بولغان بېرىش – كېلىشنى قويۇقلاشتۇرسىڭىز، ئۇ كىشىلەرنى سىزنىڭ ئۇچۇر چەمبىرىكىڭىزگە ئېلىپ كىرسىڭىزلا نۇرغۇنلىغان شەكىلسىز ئۇچۇر بايلىقلىرىغا ئېرىشەلەيسىز. ئۆزىڭىزنىڭ ئۇچۇر چەمبىرىكىنى قۇرۇشتا،  مۇناسىۋەت دائىرىڭىزنى سىز نۆۋەتتە تونۇيدىغان كىشىلەر بىلەن چەكلەپ قويسىڭىز بولمايدۇ. باشقا گورۇپپىلارمۇ ھەرخىل ئۆگىنىش، مۇھاكىمە ۋە تەربىيلەشلەرنى ئۆتكۈزۈپ تۇرىدۇ، سىز بۇنداق پائالىيەتلەرگە قاتنىشىدىغان پۇرسەتنى چىڭ تۇتۇشىڭىز،بۇ ئارقىلىق شىركەتنىڭ ئىچكى قىسىمىدا ئېرىشكىلى بولمايدىغان ئۇچۇرلارغا ئېرىشىشىڭىز كېرەك. تۆتىنچى، ئۇچۇرنى ئۆزىگە قاراپ ئاقىدىغان قىلىش كېرەك. ئومۇمەن ئېيىتقاندا، ئۇچۇر دائىم ئۆزلۈكىدىن«جەلپكار كىشى» لەرگە قاراپ ئاقىدۇ. ئۇلار باشقىلارنى ھۆرمەتلەشنى بىلىدۇ، قارشى تەرەپنىڭ مەيدانى ۋە ھېسىياتىغا ھۆرمەت قىلىدۇ، ھەمدە سەمىمىي ئىنكاس قايتۇرىدۇ،قارشى تەرەپمۇ ئۇلار بىلەن ئالاقە قىلىشنى خالايدۇ. ھەددىدىن زىيادە شەخسىيەتچى كىشىلەر ھەمىشە باشقىلارنىڭ ئۆچلۈكىنى كەلتۈرۈپ قويىدۇ – دە، تەبئىيلا باشقىلاردىن ئۇچۇرغا ئېرىشىشكە ئامالسىز قالىدۇ. ئەگەر سىز ئۇچۇرلارنى ئۆزىڭىزگە قاراپ ئاققۇزماقچى بولسىڭىز، چوقۇم ھەرقانداق سورۇندىكى گەپ – سۆزلىرىڭىزگە دىققەت قىلىشىڭىز كېرەك. ئاۋال، سىز دائىم كۈلۈمسىرەپ تۇرۇشىڭىز، باشقىلارنىڭ ئالدىدا بىزار بولغان ياكى ئاچچىقلانغان ھالەتىڭىزنى  چىقارماسلىقىڭىز كېرەك؛ئاندىن، سىز كەمتەر بولۇشىڭىز، باشقىلارنىڭ تەكلىپىنى ئەستايىدىللىق بىلەن قوبۇل قىلىشىڭىز، ھەمدە مىننەتدار بولۇشنى بىلىشىڭىز كېرەك. بەشىنچى، «ئېقىم» ئۇچۇرلىرىنى قولدىن چىقىرىپ قويماسلىق كېرەك. مايۈن مۇنداق دىگەن: «ئىگىلىك تىكلىگۈچىنىڭ كىتابنى كۆپ ئوقۇماسلىقى ھېچقانچە مەسىلە ئەمەس، قورقۇنچلۇقى جەمئىيەتكە چىقىپمۇ كىتاب ئوقۇماسلىقى.» شۇنىڭ ئۈچۈن، بىز چوقۇم جەمئىيەتتىكى كۆپ مىقداردىكى ئۇچۇرلارنى يىغىشقا ئەھمىيەت بېرىشىمىز لازىم. ئەتراپىڭىزنى كۈزىتىشكە ماھىر بولۇشىڭىز، نۆۋەتتە ئەڭ ئېقىۋاتقان، غەلبىلىك بولغان كەسىپلەرنى، شىركەت ۋە مەھسۇلاتلارنى كۈزىتىشىڭىز كېرەك، بۇنداقتا سىزمۇ كېرەكلىك ئۇچۇرلارغا ئېرىشەلەيسىز. مەسىلەن: بەزىلەر پەقەت «چىداملىق تاشپاقا» (بىر كىنونىڭ ئىسمى،بۇنىڭ ياشلار ئارسىدا قارشى ئېلىنغان ئېلېكترونلۇق ئويۇنچۇقىمۇ بار،- تەرجىماندىن)غا تايىنىپلا مىليون ئامېرىكا دوللىرى پۇل تاپقان، يەنە بەزىلەر ئوزۇن يەڭ مايكا،سوۋغات قاپلىرىنىڭ ئۈستىگە كىچىك ئىت «سىنوبى» نىڭ سۈرىتىنى بېسىپلا، بۇمەھسۇلاتلارنىڭ سېتىلىشىنى نەچچە ھەسسە يۇقىرى كۆتۈرگەن. شۇ سەۋەبتىن، سىزمۇ ھەر ۋاقىت بۇ ئۇچۇرلارغا دىققەت قىلىشىڭىز، پۇرسەت پىشىپ – يىتىلگەندە ئۇلارنى ئۆزىڭىز ئۈچۈن خىزمەت قىلدۇرۇشىڭىز كېرەك. ئالتىنچى، سىز ئۇچۇرلارغا قارىتا كۆپ قاتلاملىق تەھلىل يۈرگۈزۈشىڭىز كېرەك. سىز ئېرىشكەن ئۇچۇرلارغا نىسبەتەن كۆپ قاتلاملىق تەھلىل يۈرگۈزۈشىڭىز، توغرا – خاتا، كېرەكلىك ۋە كېرەكسىزلىرىنى ئايرىشىڭىز كېرەك، يەنە ئاددى نەرسىلەردىن ئاددى بولمىغان نەرسىلەرنى بايقاشقا ماھىر بولۇشىڭىز كېرەك. ياپونىيە «نىشچى» شىركىتىنىڭ بىر ۋەيران بولغان شىركەتتىن دۇنياغا داڭلىق «زاكا پادىشاھى» غا ئايلىنالىشىدىكى سەۋەب، بۇ شىركەتنىڭ باش لېدىرى بىر نوپۇس تەكشۈرۈش ماتېرىيالىدىن پۈتۈن مەملىكەتتە ھەر يىلى 2 مىليون 500 مىڭ بوۋاق تۇغۇلىدىغانلىقىنى كۆرۈپ قالغانلىقىدىن ئىبارەت. ھەر قانداق مۇۋەپپەقىيەت تۇيۇقسىز كەلگەن ئەمەس،مۇۋەپپەقىيەت قازىنىش پۇرسىتى قېزىشقا مۇھتاج. بەزىدە كۆزگە بەك چېلىقىپ كەتمەيدىغان بىر ئۇچۇرغىمۇ چەكسىز سودا پۇرسىتى يوشۇرۇنغان بولىدۇ. شۇنىڭ ئۈچۈن،ئەگەر بىز ئۇچۇر توپلايدىغان ياخشى ئادەتنى يىتىلدۈرسەك، ھەمدە ئۇچۇرلارنى بايقاشقا ۋە پايدىلىنىشقا ماھىر بولساق، ئۇنداقتا مۇۋەپپەقىيەتكە باشلاپ بارىدىغان پۇرسەتنى تۇتۇۋالالايمىز – دە، ئىشلىرىمىزدا نەتىجە قازىنالايمىز. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تەرجىمان:ئابدۇللا ئۆمەر تور بەت ئادرېسى:WWW.UYHQT.COM تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	ئىككىنچى دەرس يەتتىنچى پارگىراف ئىگىلىك تىكلىگۈچىگە نىسبەتەن ئەڭ مۇھىمى ئۆزى قىلىۋاتقان ئىشنى ياخشى كۆرۈش كېرەك نۇرغۇنلىغان ئىگىلىك تىكلىگۈچىلەرنىڭ ئىگىلىك تىكلەشنى تاللىشىدىكى سەۋەب – تۇرمۇشنىڭ مەجبۇرلىشىدۇر، پەقەت ئۆزى ياخشى كۆرگەن كەسىپنى تاللاپ تىرىشقاندىلا، مۇۋەپپەقىيەت قازىنىدىغان پۇرسەتمۇ چوڭ بولىدۇ؛ يەنە بىر قىسىم كىشىلەر ھەقىقەتەن بىر ئىش قىلىشنى ياخشى كۆرىدۇ، بىراق ئېنىق نىشانى بولمىغاچقا، دائىم باشقىلارغا ئەگىشىدۇ، باشقىلار بۇنى قىلساڭ ياخشى دىسە ئۇ نىشانىنى شۇنىڭغا يۆتكەيدۇ، باشقىلار يەنە ئۇنى قىلساڭ ياخشى دىسە ئۇ نىشانىنى يەنە ئۆزگەرتىدۇ... ھالبۇكى، مايۈن ئىلگىرى بىر قىسىم ئىگىلىك تىكلىگۈچىلەرگە مۇنداق سەمىمىي ئاگاھلاندۇرۇش بەرگەن: ئىگىلىك تىكلىگۈچىلەرگە نىسبەتەن ئېيىتقاندا ئەڭ مۇھىمى -ئۆزى قىلىۋاتقان ئىشنى ياخشى كۆرۈش، چوقۇم قىلىۋاتقان ئىشنى ياختۇرۇپ قىلىش كېرەك، ھەرگىزمۇ باشقىلارنىڭ بىرەر ئېغىز گىپى سەۋەبلىك قىلماسلىق كېرەك. ئىگىلىك تىكلىگۈچى چوقۇم ئۇ ئىشنى ياخشى قىلىش، ئۇ ئىشنى ياخشى كۆرۈش، چۈشىدىمۇ بۇ ئىشتا قانداق مۇۋەپپەقىيەت قازىنىشنى كۆرۈش كېرەك. مايۈن يېڭى ئوقۇتقۇچىلىق قىلغان ۋاقىتتا، ھەر ئايلىق مائاشى 89 يۈەن ئىدى. كىرىمىنى ئاشۇرۇش ئۈچۈن مايۈن خاڭجۇدا تەرجىمانلىق قىلىشقا باشلىغان، ھەمدە ناھايىتى تىزلا خاڭجۇ تەرجىمانلىق ساھەسىدە ئانچە – مۇنچە نام چىقارغان. بۇ مايۈنگە سودىنىڭ تەمىنى تېتىتقان، شۇنىڭ بىلەن ئۇ سودا دېڭىزىدا شۇڭغۇپ بېقىشنى قارار قىلغان. بۇ ۋاقىتتا، سانائەت ئىنىستىتۇتىغا بېل ئىسىملىك بىر چەتئەللىك ئوقۇتقۇچى كەلگەن، ئۇ ئامېرىكىنىڭ سىئاتىل شەھىرىدىن ئىدى.ئۆز – ئارا تونۇشقاندىن كىيىن، مايۈن ۋە ئۇ ئېنتىرنىت تورىنىڭ پارىڭىغا چۈشكەن،مايۈن بۇنى ناھايىتى قىزىقىپ ئاڭلىغان، ھەتتا بېلدىنمۇ بەكرەك ھاياجانلانغان. بۇ مايۈننىڭ تۇنجى قېتىم ئېنتىرنىت تورى توغرۇلۇق ئاڭلىشى بولۇپ، ئۇنىڭدىن بۇرۇن تور بىلەن ئۇچرىشىپ باقمىغان، ھەتتا كومپيۇتېرنىمۇ تۇتۇپ باقمىغان ئىدى. شۇنىڭدىن باشلاپ، مايۈننىڭ قەلبىدە «تور» يىلتىز تارتىشقا باشلىغان، بىراق تور بىلەن ھەقىقىي ئۇچرىشىدىغان پۇرسەتكە ئېرىشەلمىگەن. كىيىن مايۈن بىر قېتىملىق تۇيۇقسىز پۇرسەتتە ئامېرىكىنىڭ سىئاتىل شەھىرىگە بېرىپ، بېلنىڭ كۈيئوغلى Sam نى ئىزدەپ تاپقان. Sam نىڭ يىتەكچىلىك قىلىشى ئارقىسىدا، مايۈن تۇنجى قېتىم ئېنتىرنىت تورى بىلەن ئۇچراشقان. ھالبۇكى، Enternit دەپ ئاتىلىدىغان بۇ قىزىقارلىق توردىن «جۇڭگو» غا ئائىت ھېچقانداق نەرسە تاپقىلى بولمىغان، مايۈن بۇنىڭدىن ناھايىتى ئۈمىدسىزلەنگەن. شۇنداق قىلىپ، ئۇ Sam دىن «خەيبو» تەرجىمانلىق ئورنىنىڭ بىر قىسىم ماتېرىياللىرىنى تورغا چىقىرىشنى تەلەپ قىلىپ، ئىنكاسنى سىناپ باقماقچى بولغان. مايۈننىڭ ناھايىتى قىزغىن بۇ ئامېرىكىلىق دوستى ئۇنىڭغا ياردەم قىلىپ «خەيبو» تەرجىمانلىق ئورنىنىڭ تور بېتىنى ياساپ بەرگەن. گەرچە تور بەت ناھايىتى ئاددى ، پەقەت خەتلىك چۈشەندۈرۈشلا بولۇپ رەسىم بولمىسىمۇ، ئۇنىڭ ئۈستىگە خەتلەرنىڭ كۆپ قىسىمى «خەيبو»تەرجىمانلىق ئورنىنىڭ تەرجىمانلار سانى ۋە باھاسىغا ئائىت بولغان بولسىمۇ، بىراق بۇ تور بەت يەنىلا شۇ كۈنى ئەتىگەن سائەت توققۇزدىن بۇرۇن تورغا چىقىرىلدى. ئۈچ سائەتتىن كىيىن، Sam كوچا ئايلىنىۋاتقان مايۈنگە تېلفۇن قىلىپ ئۇنىڭغا بەش پارچە ئېلخەت كەلگەنلىكىنى ئېيىتقان، ئېلخەتلەر ئامېرىكا، ياۋروپا ۋە ياپونىيەدىن ، يەنى بىر قىسىم ئورگان، شىركەت ۋە شۇ جايدىكى چەتئەللىك ئوقۇغۇچىلاردىن كەلگەن ئىدى.كۆپچىلىك ئېلخەتتە شۇنداق دىگەن:< بۇ جۇڭگو شىركىتىنىڭ بىز بايقىغان تۇنجى تور بېتى، سىلەر نەدە؟ بىز سىلەر بىلەن سودا سۆھبىتى قىلماقچى>. مايۈن بۇنى كۆرگەندىن كىيىن ناھايىتى خۇشال بولغان، ھەمدە جۇڭگودا ئېنتىرنىت تورى بىلەن شۇغۇللىنىشقا بولغان ئىرادىسىمۇ مۇستەھكەملەنگەن. شۇنداق قىلىپ، مايۈن بىر دانە 386 تىپلىق خاتىرە كومپيۇتېر سېتىۋالغان.كىيىنكى بىر نەچچە يىلدا، مەيلى قانداق قىيىنچىلىق ۋە ئوڭۇشسىزلىققا ئۇچرىغان بولۇشىدىن قەتئىينەزەر، مايۈن ئەزەلدىن ئېنتىرنىت تورىدىن ئايرىلىپ باقمىغان. چۈنكى ئۇنىڭ قارىشىچە، بۇ ئۇنىڭ ياخشى كۆردىغان كەسپى بولۇپ، ئۇ چوقۇم بۇ ساھەدە ئازراق ئىش قىلىشى كېرەك ئىدى. بىر ئادەم ئۆزى ياخشى كۆردىغان ئىشنى قىلغاندا، ھەمىشە ناھايىتى ئەستايىدىل بولىدۇ، يەنە ناھايىتى كۆپ زېھنىنى سەرپ قىلالايدۇ. ئۇنىڭدىن باشقا، بۇ ئىشنى ياخشى كۆرگەنلىك سەۋەبلىك، ئۆزىنىڭ يوشۇرۇن كۈچىنى تېخىمۇ ياخشى جارى قىلدۇرۇپ ئۇ ئىشنى ياخشى قىلالايدۇ. «جۇڭگودىكى غەلبە» پروگراممىسىدا، ئىلگىرى ۋۇپىڭ ئىسىملىك بىر ماھىر بولۇپ، ئۇ تاللىغان تۈر ھەركەتچان تارقىتىش ۋاستىلىرى ئىدى. ئۇ بۇ تۈرنى تونۇشتۇرۇپ شۇنداق دىگەن: «ئاۋال ئامېرىكىنىڭ يۇقىرى تېخنىكىلىق مۇھىت ئاسراش ماشىنىسىنى ئۇنىڭ ئاساسى قىلىمىز، ئۇنىڭ خاسلىقى ۋە ھەركەتچانلىقىغا تايىنىپ دۆلەت ئىچىدە يېڭىچە تارقىتىش ئورگانلىرىنى بارلىققا كەلتۈرىمىز،شۇنىڭ بىلەن دۆلەت ئىچى – سىرتىدىكى ئېلان خوجايىنلىرىنىڭ دۆلەت ئىچىدىكى تىجارىتى ئۈچۈن بىر يېڭىچە سەھنە ھازىرلاپ بېرىمىز، بىز بۇنداق ئېلېكترونلۇق ماشىنىنى ھەركەتچان تاراتقۇ ماشىنىسى دەپ ئاتايمىز.ئۇنىڭدىن باشقا، ھەركەتچان تاراتقۇنىڭ كىرىم قىلىش شەكلى بولسا ئېلان خوجايىنلىرىدىن ئېلېكترونلۇق تاراتقۇ ماشىنىسىنىڭ ئىجارە ھەققىنى يىغىش ۋە ئاخبارات ۋاستىلىرىنىڭ ئېلان تارقىتىش ھەققىنى يىغىشتىن ئىبارەت.نۆۋەتتە، جۇڭگونىڭ ئېلانچىلىق ساھەسى پۈتۈن دۇنيادا ئىككىنچى ئورۇندا تۇردىغان بولۇپ، تەخمىنەن 40 مىلياردلىق بازار ئۈلۈشى بار، ھەركەتچان تاراتقۇنىڭ نۆۋەتتىكى نىشانى 2009 – يىلىغا بارغاندا بۇ بازار ئۈلۈشىنىڭ مىڭدىن بىرىنى ئىگەللەش. 2006 –يىلى، ھەركەتچان تاراتقۇ كەسپىنىڭ كىرىمى 3 مىليون 800 مىڭ يۈەن بولغان، شىركەتنىڭ ئەمەلىي سالغان دەسمايىسى 900 مىڭ يۈەن بولۇپ، شۇ يىلىلا دەسمايىنى قايتۇرۇپ ئەكىلىپ پايدا ئېلىشنى ئەمەلگە ئاشۇرغان. ئۈچىنچىدىن، بىز بېيجىڭدا پۇت دەسسەپ تۇرۇپ ئولىمپىك مۇسابىقە پۇرسىتىنى چىڭ تۇتىمىز، ھەمدە شاڭخەي، گۇاڭجۇ، شىنجىن ۋە باشقا ئۆلكە – شەھەرلەردە ھەركەتچان تاراتقۇلارنى يولغا قويىمىز.» بۇنىڭغا نىسبەتەن، مايۈننىڭ بەرگەن باھاسى مۇنداق بولغان: «بۇ ماھىرنىڭ تۈرى تازا ئىشەنچلىك ئەمەس، ئېھتىمال بىزنىڭ ۋاقتىمىز ناھايىتى قىسقا بولغاچقا شۇنداق ئويلىغان بولىشىمىز مۇمكىن، بىراق بىز يەنىلا سىزنىڭ قىزغىنلىقىڭىز ۋە تىرىشچانلىقىڭىزدىن زوقلاندۇق. مېنىڭچە سىز بىر جەمئىيەتشۇناسقا ئوخشايدىكەنسىز، كوللىكتىپ خىزمەتلەرنى قىلىشىڭىز، پائالىيەتلەرنى تەشكىللىشىڭىز ناھايىتى ياخشى ئىكەن. مېنىڭچە بۇ تۈردە بىر قىسىم سودا قاراشلىرى كەمچىل بولغان، ئېھتىمال سىز جاڭ نەنچۈندىن <زەھەرلىنىپ> قالغان بولۇشىڭىز مۇمكىن.جاڭ نەنچۈننى كۆرگەندىن كىيىن، مەن كۆپچىلىك ھەممىسى ئۇنىڭ سودا ئېلانىدىكى مۇۋەپپەقىيەت قازىنىش شەكلىنى دوراۋاتقاندەك ھېس قىلدىم. ئىگىلىك تىكلىگۈچىلەر ئۈچۈن ئەڭ مۇھىم بولغىنى-ئۇلار قىلىۋاتقان ئىشىنى ئىنتايىن ياخشى كۆرۈشى كېرەك، ئۆز ئىشنى ناھايىتى ياخشى كۆرگەنلىكى سەۋەبلىك قىلىشى، ھەرگىزمۇ باشقىلارنىڭ بىرەر ئېغىز گىپى سەۋەبلىك قىلماسلىقى لازىم.» ھەقىقەتەن، ئىگىلىك تىكلىگۈچى تۈر تاللىغاندا چوقۇم ئۆزىنىڭ ياختۇرۇشىنى ئاساس قىلىشى كېرەك، چۈنكى بۇنداق بولغاندا تېخىمۇ قىزغىن بولغىلى، تېخىمۇ ئۇزاق داۋاملاشتۇرغىلى، بېسىملارغا تېخىمۇ سەۋرچان بولغىلى،قارارىنى تېخىمۇ مۇستەھكەم قىلغىلى بولىدۇ. خۇددى مايۈن ئېيىتقاندەك: «باشقىلار مېنىڭ ئۇسۇلۇمنى تەقلىد قىلسا بولىدۇ، ئەمما مېنىڭ ئازابىمنى، مېنىڭ قىزغىنلىقىمنى تەقلىد قىلالمايدۇ، بۇلارنى چوقۇم ئېسىمىزدە تۇتۇشىمىز كېرەك، بۇلار بىزنىڭ يادرولۇق رىقابەت كۈچىمىز.» دەل ئېنتىرنىت تورىغا بولغان قىزغىنلىق بولغاچقا، مايۈن پۈتۈن كۈچى بىلەن ئۇنىڭغا كىرىشكەن. ئەگەر سىز بۇ تۈرنى بەك ياختۇرمىسىڭىز، ئەكسىچە باشقا سەۋەبلەر تۈپەيلىدىن بۇ تۈر بىلەن شۇغۇللانغان بولسىڭىز، ئۇنداقتا، تېخىمۇ ياخشى تۈرلەر سىزگە ئۇچرىغان ۋاقىتتا، سىز ئىرادىڭىزنىڭ تەۋرەنمەسلىكىگە كاپالەتلىك قىلالمايسىز. سىزنىڭ ئىشەنچىڭىز تەۋرەنگەن ھامان سىزنىڭ بۇ ئىشتىكى مۇۋەپپەقىيەت قازىنىش نىسبىتىڭىزمۇ تۆۋەنلەپ كېتىدۇ.شۇنىڭ ئۈچۈن، ئۆزى ياختۇردىغان ئىشنى قىلىش ئىگىلىك تىكلىگۈچىلەر ئىگىلىك تىكلەش تۈرىنى تاللاشتىكى ئەڭ مۇھىم ئالدىنقى شەرت. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تەرجىمان:ئابدۇللا ئۆمەر تور بەت ئادرېسى:WWW.UYHQT.COM تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	ئۈچىنچى دەرس مەبلەغ نەدىن كېلىپ، نەگە كېتىدۇ 1. پارگىراپ :ئاۋال ئۆزىمىزنىڭ پۇلىنى ئىشلىتىشىمىز لازىم    نۇرغۇنلىغان ئىگىلىك تىكلىگۈچىلەر ئىگىلىك تىكلەش تۈرىنى تاللاپ بولغاندىن كىيىن، مەبلەغنى قوزغىتىشقا كۈچىمەيدۇ. بۇ مەسىلە قارىماققا بىر خىل يىتەرسىزلىكتەك كۆرۈنسىمۇ،ئەمما ئۇ ھازىرقى نۇرغۇنلىغان ئىگىلىك تىكلىگۈچىلەرنىڭ گاڭگىراپ قالغان ھالىتىنى ئەكىس ئەتتۈرۈپ بېرىدۇ.    ئىگىلىك تىكلىگۈچىنىڭ قوزغاتما مەبلەغ مەسىلىسىگە نىسبەتەن، مايۈن مۇنداق بىر پىرىنسىپنى ئوتتۇرىغا قويغان: قوزغاتما مەبلەغ چوقۇم ئۆزىنىڭ يانچۇقىدىكى pocketmoney (ئېشىنچا پۇل) بولۇشى كېرەك،چۈنكى مەغلۇب بولۇش مۇمكىنچىلىكى ناھايىتى چوڭ بولغاچقا، ھەرگىزمۇ ئائىلىدىكىلەر،دوست – بۇرادەرلەردىن قەرز ئېلىشقا بولمايدۇ. بىز چوقۇم «ئەڭ نەس باسقان ئىش» نى قوبۇل قىلىش تەييارلىقىنى ياخشى قىلىشىمىز كېرەك.    «ئەلى بابا»قۇرۇلغان دەسلەپكى مەزگىلدە، مايۈن ھەرقانداق ئادەمدىن بىر پۇڭ قەرز ئالمىغان،ئەكسىچە ئۇ ئۆزىنىڭ بارلىق ھەمراھلىرىنى يىغىپ بارلىق نەرسىلىرىنى ئوتتۇرىغا تاشلىغان، ھەمراھلىرىمۇ ئۆزلىرىنىڭ يانچۇقلىرىنى ئاختۇرۇپ ئاخىرىدا 500 مىڭ يۈەن قوزغاتما مەبلەغ جۇغلانغان.    مايۈن ئەينى ۋاقىتتىكى قىيىنچىلىقلارنى ئەسلەپ ناھايىتى خۇشاللىق بىلەن شۇنداق دەيدۇ: «ئەينى ۋاقىتتا ھەقىقەتەن (غەلبە قىلالماي سورۇلۇپ كېتىدىغان) تراگېدىيىلىك ھېسىيات بارئىدى.»    ئىگىلىك تىكلىگۈچىلەرگە نىسبەتەن ئېيىتقاندا، ئەڭ ياخشى مەبلەغ بىرلەشتۈرۈش ئۇسۇلى -ئۆزىنىڭ پۇلىنى ئىشلىتىپ ئىگىلىك يارىتىش تۈرىنى تاللاش، ئەڭ بولمىغاندا باشلىنىش نۇقتىسىدا شۇنداق بولۇشى كېرەك. چۈنكى ئۆزىنىڭ پۇلىنى ئىشلەتكەندە تۆۋەندىكىدەك بىر قانچە تۈرلۈك پايدىلىق تەرىپى بار:    بىرىنچىدىن،بېسىم بولمايدۇ ياكى بىر قەدەر ئاز بولىدۇ. چۈنكى قوزغاتما مەبلەغ ئۆزىگە تەۋە بولغاچقا ئىگىلىك تىكلىگۈچى جەزمەن ئۆزىگە مەسئۇل بولىدۇ، ئىلگىرلەش – چېكىنىشكىمۇ ئۆزى مەسئۇل بولىدۇ، باشقىچە سادالار ئاز بولىدۇ، ئۆز پايدا – زىينىغا ئۆزى ئىگە بولىدۇ. غەلبە قىلسا ئېنىقلا خۇش بولىدۇ، ئەمما مەغلۇب بولسىمۇ بۇنىڭ ئۈچۈن تېخىمۇ كۆپ بېسىم ۋە ئازابنى ئۈستىگە ئېلىشنىڭ ھاجىتى يوق بولىدۇ. ئەمما سىرتقى مەبلەغ ئارقىلىق ئىگىلىك تىكلىگەندە، ئەمدىلا دۇنياغا كۆز ئاچقان كارخانا نۇرغۇنلىغان بېسىملارنى ئۆزىگە ئارتىۋالىدۇ.   ئىككىنچىدىن، ھوقۇق بۆلۈشۈش ئاۋارىچىلىقى بولمايدۇ. مەبلەغ تەننەرخى ياكى كارخانا تىجارىتىنى كونترول قىلىش نۇقتىسىدىن ئېلىپ ئېيىتقاندا، شەخسىي مەبلەغنىڭ تەننەرخى ئەڭ تۆۋەن بولىدۇ. ئەمما سىرتقى مەبلەغنىڭ كارخانىنىڭ تەدبىر بەلگىلەش ھوقۇقى، باشقۇرۇش ھوقۇقى قاتارلىقلارغا نىسبەتەن مەلۇم تەسىرى بولىدۇ، ھەتتا كارخانىنىڭ پارچىلىنىپ كېتىشىنى كەلتۈرۈپ چىقىرىشى مۇمكىن.    ئۇنىڭدىن باشقا، شەخسنىڭ مەبلىغى چەكلىك بولغاچقا دەسلەپتىكى ئىگىلىك يارىتىش كۆلىمىمۇ كىچىك بولىدۇ، بۇ خىيىم – خەتەرنى مۇئەييەن دەرىجىدە ئازايتالايدۇ. ئۇنىڭ ئۈستىگە،«كىچىك كېمىنى ئاسان بۇرىغىلى بولىدۇ.» تىجارەتتە خاتالىق كۆرۈلگەندە ناھايىتى تىز سۈرئەتتە يۆنىلىشنى ئۆزگەرتكىلى، زىياندىن ئەڭ يۇقىرى چەكتە ساقلانغىلى بولىدۇ.    «يوڭداۋ»سېتىقچىلىق شىركىتىنىڭ باش لېدىرى، «جۆدەي» شىركىتىنىڭ ھەمكارلاشقۇچىسى لوڭ پىڭجىڭ مۇنداق دىگەن: «بىز قەرز ئېلىشقا قارشى تۇرىمىز. ئىگىلىك تىكلىگۈچىلەرنىڭ قەرزئېلىپ ئىگىلىك تىكلەپ مۇۋەپپەقىيەت قازىنىشىنىڭ نىسبىتى يۇقىرى ئەمەس. مېنىڭ بىرنەچچە ھەمكارلاشقۇچى دۇكىنىمنىڭ ئىچىدە، يايما ئېچىپ ئىگىلىك تىكلەشنى باشلىغان بىر خوجايىننىڭ نەتىجىسى ھەممىدىن ياخشى. ئېھتىمال بۇ ئۇنىڭ ئۆزىنىڭ پۇلىسى بولغاچقا ئىشلىتىشتە ناھايىتى پەملىك بولغانلىقىدىن بولۇشى مۇمكىن.»    ئۆزىنىڭ تاپقان – تەرگەنلىرىگە تايىنىدىغان بولغاچقا،  دەسلەپكى قەدەمدە ئىگىلىك تىكلەش كۆلىمىنى بەك چوڭ قىلىۋىتىشكە بولمايدۇ، ئەگەر سىزدە 100 مىڭ يۈەن بولسا100 مىڭ يۈەن بىلەن، ئەگەر 500 مىڭ يۈەن بولسا 500 مىڭ يۈەن بىلەن ئىگىلىك تىكلەشنى باشلىسىڭىز بولىدۇ.    ئەگەر دەسلەپتە سىزدە ھېچقانداق مەبلەغ بولمىسا، قەرز ئالماي تۇرۇپمۇ ئىگىلىك تىكلىگىلى بولىدىغان يەنە بىر ئامال بار. مۇنداق بىر مىسال بار: كەسىپكە ناھايىتى پىشقان،ئىقتىدارلىق بىر خادىم بولۇپ، خوجايىن  قولىدىن ئىش كېلىدۇ دەپ قاراپ، ئۇنى ئەتىۋارلاپ ئىشلىتىپتۇ – دە، ئاخىرىدا بۇ خادىم شىركەتنىڭ پايچىكلىرىنىڭ بىرىگە ئايلىنىپتۇ. بۇمۇ ناھايىتى ياخشى بولغان ئىگىلىك تىكلەش ئۇسۇلى، ئۇ خادىم ھېچقانداق مەبلىغى بولمىغان ئەھۋال ئاستىدا تېخنىكا ۋە ئىقتىدارىغا تايىنىپ پايچىكلەرقاتارىغا كىرگەن. ھازىرقى نۇرغۇنلىغان تارماق دۇكانلارنىڭ خوجايىنلىرى دەل مۇشۇنداق ئۇسۇلغا تايىنىپ ئۆزلىرىنى يۈكسەلدۈرىدۇ، ئەگەر كىيىن ئۇلار ئۆز –ئالدىغا ئىش باشلىماقچى بولسىمۇ، ئۆزلىرىگە يىتەرلىك مەبلەغ جۇغلىۋالغان بولىدۇ.    ئەلۋەتتە،بۇ خىل ئۇسۇلدىن باشقا، ئىگىلىك تىكلەشكە ئىرادە باغلىغان كىشىلەر يەنە تۆۋەندىكى ئۇسۇللارنى سىناپ باقسا بولىدۇ:    ئاۋال،ئىگىلىك تىكلەش كۆلىمىنى ئازايتىش. ئەگەر ئۆزىمىزنىڭ مەبلىغى يىتەرلىك بولمىسا،ئەمما ئىقتىدارىمىزغا تايىنىپ ئىگىلىك تىكلىمەكچى بولساق، ئۇنداقتا ئەڭ ياخشى ئۇسۇل – مەبلەغنى ئازايتىش، مەبلەغنى ئۆزىمىز قوبۇل قىلالايدىغان دائىرىگە ئېلىپ كېلىش. مەسىلەن: ئىجارىسى قىممەترەك بولغان سودا مەركەزلىرىدىن ۋاز كېچىپ،ئەتراپتىكى ئىجتىمائىي ئاھالىلەر رايونى بىر قەدەر مەركەزلەشكەن رايونلاردا ئىش باشلاشقا بولىدۇ؛ دۇكاننى بېزىگەندە ئىمكانىيەتنىڭ بېرىچە تىجەشلىك ۋە پۇختا بولغان ماتېرىيال ۋە ئەسۋابلارنى ئىشلىتىش قاتارلىقلار. بۇنداقتا گەرچە كۆلەم،پايدا نىسبىتى قاتارلىق جەھەتلەردە ئەسلىدىكى پىلاندىن ئازراق كىچىك بولسىمۇ،بىراق سېلىنما مەبلەغ ئازراق بولغاچقا، خىيىم – خەتەرمۇ كىچىك بولىدۇ.    ئۇنىڭدىن باشقا، ئىگىلىك تىكلەش ۋاقتىنى كېچىكتۈرۈشكە بولىدۇ. ئەگەر ئىگىلىك تىكلىگۈچى تىكلىمەكچى بولغان ئىگىلىكنىڭ كۆلىمىنى ئۆزگەرتىشنى، ھەمدە سىرتتىن قەرز ئېلىشنى خالىمىسا، ئۇنداقتا، ئەڭ ياخشى ئۇسۇل ئىگىلىك تىكلەش ۋاقتىنى كېچىكتۈرۈشتىن ئىبارەت، يەنى ئۆزىنىڭ مەبلىغى يىتەرلىك بولغاندا ئاندىن ئىش باشلاش كېرەك.    مەسىلەن:سىز ئاۋال كەسپى خادىم بولۇپ ئىشلەپ باقسىڭىز بولىدۇ، بىراق شۇنى ئېسىڭىزدە تۇتۇشىڭىز كېرەك – تەمىناتى كۆپ ياكى نۇرغۇنلىغان كەسپى خادىملارنى قوبۇل قىلدىغان شىركەتلەردە ئىشلەشكە بولمايدۇ. چۈنكى ئالدىنقىسىدا خىزمەتنى قىلىش تەس، گەرچە ئىش ھەققى يۇقىرى بولسىمۇ، بىراق بازار تەلپى يۇقىرى ئەمەس ياكى ئاسانلىقچە باشقىلار تەرىپىدىن ئېتىراپ قىلىنمايدۇ؛ كىيىنكىسىدە ئىشلەشكە تېخىمۇ بولمايدۇ، ئۇ خىل خىزمەتلەر ئامىتىنى سىناپ باقىدىغان خىزمەتلەر، بىر ئادەم كۆپەيسە شۇ بىر ئادەم ئۆزىنىڭ ئامىتىنى سىناپ باقىدىغان گەپ. چۈنكى تىجارىتى ياخشى بولۇۋاتقان بىرشىركەتنىڭ چوقۇم ئۆزىنىڭ مالىيە سىستېمىسى بولىدۇ، شىركەتتە بىر ئادەم كۆپەيسە بىركىشىلىك مائاشنى كۆپ تارقىتىش كېرەك، ئەمما بازار چەكلىك بولىدۇ، قانچىلىك ئادەمنى ئىشلىتىش مەسىلىسىدە خوجايىننىڭ كۆڭلىدە ئاللىقاچان سان بولغان بولىدۇ.    كەسپى خادىم بولۇش جەريانىدا، بىز ئۆزىمىزنىڭ كەسپى قابىليىتىنى ئىزچىل يۇقىرى كۆتۈرەلەيمىز.مۇنەۋۋەر كەسپى خادىملار تەھلىل قىلىش ۋە خۇلاسىلەشكە، خېرىدارلار بىلەن مۇئامىلە قىلىشقا ماھىر بولىدۇ، ئۇلار خېرىدارلارنىڭ ئورنىدا تۇرۇپ مەسىلىلەرنى ئويلىيالايدۇ ۋە ئىش بېجىرىدۇ. ئەگەر سىز كەسپى خادىملىقتىن ئىبارەت بۇ ئىشنى ياخشى قىلالىسىڭىز، ئۆزىڭىزنىڭ كىيىنكى ئىگىلىكىڭىز ئۈچۈن تەجرىبە جۇغلاپ ۋەكىشىلىك مۇناسىۋىتىڭىزنى كېڭەيتىپلا قالماستىن، يەنە مەبلەغمۇ توپلىيالايسىز.    ئەڭ ئاخىرقى ئۇسۇل بولسا، بىر تەرەپتىن ئىگىلىك تىكلەپ بىر تەرەپتىن مەبلەغ جۇغلاش كېرەك.ئەگەر ئىگىلىك تىكلىگۈچى ئۆزىنىڭ ئىگىلىك تىكلەش ۋاقتىنى ئۇزارتىشنى خالىمىسا،ياكى تاللىغان تۈرىنىڭ ۋاقىتچانلىقى ناھايىتى كۈچلۈك بولۇپ، ۋاقىتنىڭ ئارقىغا سۆرىلىپ كېتىشى سەۋەبلىك ياخشى پۇرسەت قولدىن كېتىش خەۋپى بولسا، ئۇنداقتا بىرتەرەپتىن ئىگىلىك تىكلەپ بىر تەرەپتىن مەبلەغ جۇغلاشقا بولىدۇ.    مەسىلەن:مايۈن «خەيبو» تەرجىمانلىق ئورنىنى قۇرغاندا، گەرچە يېنىدا ھېچنىمىسى بولمىسىمۇ،بىراق يەنىلا بەرداشلىق بەرگەن. ئۇ ۋە ئۇنىڭ ھەمراھلىرى بىر تەرەپتىن تەرجىمانلىق ئورنىنىڭ تىجارىتىنى ئېلىپ بارسا، يەنە بىر تەرەپتىن ھۈنەر – سەنئەت بويۇملىرى،گۈل ۋە پايپاق قاتارلىق كىچىك مەھسۇلاتلارنى ساتقان. مۇشۇ تەرىقىدە ئۈچ يىل داۋاملاشتۇرغاندىن كىيىن، «خەيبو» پايدا يارىتىشقا باشلىغان، مايۈنمۇ ئۆزىنىڭ دەسلەپكى قەدەمدىكى ئىگىلىكىنى مۇقىملاشتۇرۋالغان.    شۇنداق ئېيتىشقا بولىدۇكى، ئىگىلىك يارىتىش مەبلىغىدە پۈتۈنلەي ئۆزىگە تايىنىشقا بولىدۇ،مەبلەغ يوق بولغان تەغدىردىمۇ تېخنىكا ۋە ئىقتىدارىغا تايىنىپ مەبلەغقە ئېرىشىشكە بولىدۇ، قەرز ئېلىشنىڭ ھاجىتى يوق. پۇل توپلاشتىن باشلاپ ئىگىلىك يارىتىش، بىرقەدەم – بىر قەدەمدىن مۇقىملىشىش كېرەك، بۇنداقتا مۇۋەپپەقىيەت قازىنىش نىسبىتى يۇقىرى بولىدۇ. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تەرجىمان:ئابدۇللا ئۆمەر تور بەت ئادرېسى:WWW.UYHQT.COM تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	3-دەرس  ئىككىنچى پارگىراپ ئىگىلىك يارىتىشنىڭ دەسلەپكى قەدىمىدە مەبلەغ قانچە كۆپ بولسا شۇنچە ياخشى بولىدۇ دەپ قاراش توغرا ئەمەس    نۇرغۇنلىغان كىشىلەر ئىگىلىك يارىتىشنىڭ دەسلەپكى قەدىمىدە مەبلەغ قانچە كۆپ بولسا شۇنچە ياخشى بولۇپ، مۇۋەپپەقىيەت قازىنىش نىسبىتىمۇ شۇنچە يۇقىرى بولىدۇ دەپ قارايدۇ. ئەمەلىيەت ھەقىقەتەن شۇنداقمۇ؟    بۇ خىل قاراشقا نىسبەتەن، مايۈن شۇنداق جاۋاب بەرگەن: «(ئەلى بابا) نىڭ بۈگۈنكىدەك ھالەتكە كېلەلىشىدىكى سەۋەب بىزدە پۇل يوق بولغانلىقىدا، نۇرغۇنلىغان كىشىلەر پۇل بەك كۆپ بولۇش سەۋەبلىك مەغلۇب بولىدۇ. ئىلگىرى پۇلىمىز يوق ۋاقىتلاردا بىز ھەربىر فۇڭ پۇلنىمۇ ناھايىتى ئەتراپلىق ئويلىشىپ خەجلەيىتتۇق، ھازىر بىزنىڭ پۇلىمىز بار بولسىمۇ، بىز يەنىلا ئىلگىرىكىدەك قىلىمىز، چۈنكى مەن بۈگۈن خەجلىگەن پۇللار خىيىم– خەتەرلەرگە مەبلەغ سېلىشتىن كەلگەن، شۇڭا بىز چوقۇم ئۇلارغا نىسبەتەن مەسئۇل بولۇشىمىز كېرەك.»    ئەلۋەتتە،مەبلەغنىڭ ئىگىلىك تىكلىگۈچىلەرگە بولغان مۇھىملىقىغا گەپ كەتمەيدۇ، پۇل بولمىسا ھېچقانداق ئىشنى قىلغىلى بولمايدۇ، ئىگىلىك يارىتىشتىنمۇ ئېغىز ئاچقىلى بولمايدۇ.خۇددى مايۈن ئېيىتقاندەك، ئىگىلىك يارىتىش بىز ئاز مەبلەغقە ئېھتىياجلىق، ئەگەرپۇل بولمىسا «تاماققا ھەر قانچە ئۇستا ئايالغىمۇ گۈرۈچ بولمىسا تاماق ئېتەلمەيدۇ»غا ئوخشاش ئىگىلىك يارىتىشمۇ قۇرۇق خىيالغا ئايلىنىپ قالىدۇ. بىراق، مايۈن ئىزچىل«پۇل بەك كۆپ بولسا بولمايدۇ» نەزىرىيىسىنى تەكىتلەپ كېلىۋاتىدۇ، ھەتتا ئۇ ئۆزىنىڭ بۈگۈنكى مۇۋەپپەقىيىتىنى ئىلگىرىكى مۇشەققەتلىك كۈنلىرى بەدىلىگە كەلگەن دەپ قارايدۇ. شۇنداق دىيىشكە بولىدۇكى، ئىگىلىك يارىتىشقا كېتىدىغان پۇل يىتەرلىك بولسىلا بولىدۇ. پۇلنىڭ بەك كۆپ بولۇپ كېتىشى كىشىلەرنى ئىش قىلغاندا بىخەستە ۋە قارىغۇلارچە قىلدىغان قىلىپ قويىدۇ، بۇ ھەرگىزمۇ ياخشى ئىش ئەمەس.    مايۈن«جۇڭگودىكى غەلبە» پروگراممىسىدا بىر ماھىرنى باھالاپ مۇنداق دىگەن: «سىزنىڭ تۈرىڭىز ناھايىتى ياخشى، ئۆزىڭىزمۇ ناھايىتى ئەستايىدىلكەنسىز. بىراق سىزگە پۇل بېرىشكە بولمايدۇ،چۈنكى سىزگە ھازىرلا پۇل بىرىۋەتسەك پۇل سىزگە زىيان يەتكۈزىدۇ.نۇرغۇنلىغان كىشىلەرنىڭ مەغلۇپ بولۇشىدىكى سەۋەب ھەرگىزمۇ پۇلنىڭ ئازلىقىدىن ئەمەس، بەلكى پۇلنىڭ ناھايىتى كۆپ بولۇپ كەتكەنلىكىدىن بولغان. باشلىنىشتا ئىشلارنى كىچىكتىن، بىر ئاز – بىر ئازدىن قىلىش سىزنى تېخىمۇ ئەستايىدىل، پۇختا قىلىدۇ. مەن بۈگۈن بۇ جايدىكى نۇرغۇنلىغان ماھىرلاردا بىر خىل ئورتاق نۇقتىنى ھېس قىلدىم، يەنى ئېغىزىنى ئېچىپلا پۇلنىڭ گېپىنى چىقىرىدۇ، ئەمما بۇنىڭغا قارىتا ھېچقانداق پىكىر يۈرگۈزۈپ باقمىغان، راسىتچىل ئەمەس، باھالىغۇچىلارلا ئەمەس،ھەرقانداق بىر مەبلەغ سالغۇچى ئۇلارنىڭ بۇنداق سۆزلىرىنى ئاڭلىسا چوقۇم جۇدۇنى ئۆرلەيدۇ.»    بەزى كىشىلەر ئىگىلىك يارىتىشنىڭ دەسلىپىدىلا كەسىپداشلىرىنىڭ قەدىمىگە يىتىۋېلىش ئۈچۈن نۇرغۇنلىغان مەبلەغ چىقىرىپ، ئاۋات جايلاردىن ئىشخانا تاللايدۇ، ئەڭ ياخشى ئەسلىھەلەرنى ئىشلىتىدۇ، نۇرغۇن پۇل خەجلەپ ئېلان بېرىدۇ، بىر قىسىم ئىش ھەققىنى كۆپ ئالىدىغان، ئەمما ئەمەلىي نەتىجە ھاسىل قىلالمايدىغان كىشىلەرنى قوبۇل قىلىدۇ.    ھالبۇكى مايۈننىڭ قارىشىچە، ئىگىلىك يارىتىشنىڭ دەسلىپىدە مەبلەغنىڭ بەك كۆپ بولۇپ كېتىشنىڭ ھاجىتى يوق، تېجەشكە بولىدىغانلىرىنى تېجەش كېرەك، ئارتۇقچە چوڭچىلىق قىلىشنىڭ ھاجىتى يوق، پۇلنى چوقۇم ئەڭ ئۈنۈملۈك جايلارغا ئىشلىتىش كېرەك. ئىگىلىك يارىتىشنىڭ دەسلىپىدە، پۇلنىڭ كۆپ بولۇشى ھەرگىزمۇ ياخشى ئىش ئەمەس، شۇنىڭ ئۈچۈن،ئىگىلىك تىكلەشنىڭ دەسلىپىدە يىتەرلىك مەبلەغنىڭ بولمىغانلىقى ئۈچۈن ئەنسىرەشكە،قورقۇشقا بولمايدۇ، ئەكسىچە ئۆزىنىڭ قابىليىتىگە تايىنىپ كىيىنكى مەزگىلدىكى مەبلەغقە ئېرىشىشنى ئويلاش كېرەك.    1996 –يىلى، مايۈن ئەمدىلا «جۇڭگو ئۇچۇر بېتى» نى قۇرۇپ چىققاندا، بىر قېتىملىق مائاش تارقىتالماسلىق مەسىلىسىگە دۇچ كەلگەن. خىزمەتچىلەرگە مائاش تارقىتىدىغان ۋاقىتقا يەنە ئۈچ كۈنلا قالغان بولۇپ، مايۈننىڭ ھېساۋاتىدا پەقەت 2000 يۈەندىن كۆپرەك پۇل قالغان، ئەمما ئۇ 8000 يۈەندىن كۆپرەك مائاش تارقىتىشى كېرەك ئىدى. گەرچە مايۈننىڭ قول ئاستىدىكىلەر ئىككى ئايلىق مائاشىنى ئالالمىسىمۇ يەنىلا مايۈنگە ئەگىشىدىغانلىقىنى ئىپادىلىگەن. بىراق مايۈن شۇنداق قارىغان: خىزمەتچىلەر ئىككى ئايلىق مائاشىنى ئالالمىساق ھېچقىسى يوق دىگەن تەغدىردىمۇ، قەرز ئېلىشقا بولىدۇكى،ھەرگىزمۇ خىزمەتچىلەرنىڭ مائاشىنى ئارقىغا سۈرۈشكە بولمايدۇ. مايۈن مۇنداق دىگەن: «سىزنىڭ قول ئاستىڭىزدىكىلەر ۋە بۇرادەرلىرىڭىز ھەممىسى سىزنى قوللاۋاتقاندا، سىز ئۆزىڭىز يۇقىرىغا يامىشالماي يىقىلىپ چۈشسىڭىز، ئۇنداقتا بۇ ئۆزىڭىزنىڭ شورى. بىراق، بىر توپ قېرىنداشلىرىڭىزنىڭ ئۈمىدىنى يەردە قويسىڭىز، ئۇنداقتا بۇ سىزنىڭ خاتالىقىڭىز.»    شۇنىڭدىن باشلاپ، مايۈن مەبلەغنى تىجەش ئۈچۈن «كىيىم ۋە ئاشلىقتىن پەرز تۇتقان» ھالەتتە تۇرمۇش كەچۈرۈشكە باشلىغان. ئۇ «ئەلى بابا» نى قۇرۇپ چىققاندا، بېيجىڭدىن خاڭجۇغا قايتىپ كېلىشىدىكى بىر سەۋەب، خاڭجۇدىكى چىقىم بېيجىڭغا قارىغاندا تۆۋەن ئىدى،خىزمەتچىلەرنىڭ مائاشى، ئۆي ئىجارىسى قاتارلىقلارمۇ بېيجىڭغا قارىغاندا تۆۋەن ئىدى. مايۈن خاڭجۇغا قايتىپ كەلگەندىن كىيىن ئۆزىنىڭ ئۆيىدىلا ئىشنى باشلاپ،چىقىمنى ئەڭ تۆۋەن چەككە چۈشۈرمەكچى بولغان. ھەمدە ئۆزىنىڭ ھەمراھلىرىغا ئېنىق قىلىپ شۇنداق دىگەن: ئايلىق مائاش پەقەتلا 500 يۈەن، تاكسىدا ئولتۇرۇشقا بولمايدۇ،تۇردىغان جاي مايۈننىڭ ئۆيىگە پەقەت 5 مىنوتلۇق يول بولۇشى كېرەك.    مەبلەغنىڭ قىس بولۇشى سەۋەبلىك ئۇچرىغان قىيىنچىلىقلار بۇنىڭلىق بىلەن توختاپ قالمىغان.ئەينى ۋاقىتتا، ئامېرىكىنىڭ «سودا ھەپتىلىكى» ژۇرنىلى مايۈننى زىيارەت قىلماقچى بولغان،ئەمما مايۈن بۇنىڭغا قەتئىي قوشۇلمىغان. كىيىن ئۇ بۇ ژۇرنالدىكىلەر بىلەن كېلىشىم تۈزۈپ، قارشى تەرەپنىڭ كۆرگەن ئەھۋاللىرىنى جامائەتچىلىككە ئاشكارلىۋەتمەسلىكنى شەرت قىلغان. ئاندىن، مايۈن مۇخبېرغا بىر ئادرىسنى بەرگەن –بۇ  مايۈننىڭ لۇپەن گۈللۈكىدىكى ئۆيى ئىدى. بىراق بۇ ئورۇن ناھايىتى مۇرەككەپ بولغاچقا، مۇخبېر رىۋايەتلەردىكى خان ئوردىسىغا كىرىپ قالغاندەك ناھايىتى ئوزۇن ئايلانغاندىن كىيىن ئاندىن بىر ئادەتتىكى ئاھالىلەر ئولتۇراق رايونىدىن ئۇلار «چۈشىدىمۇ كۆرۈشنى ئارزۇ قىلغان» «ئەلى بابا» شىركىتىنى ئىزدەپ تاپقان: بىر ئۆينىڭ ئىچىد ھەرخىل كەسىپتىكى يىگىرمە نەچچە ئادەم تىقىلىپ ئولتۇرغان بولۇپ، يەرگە پەقەت بىر سېلىنجىلا  سېلىنغان ئىدى...    مۇخبېر ھەيرانلىقتىن قېتىپ قالغان: پۈتۈن يەر شارىدا 20 مىڭدىن ئارتۇق سودا ئەزاسى بولغان«ئەلى بابا» مۇشۇ شۇمۇ؟ تەسىرلىنىش ياكى ھەيران قېلىش سەۋەبلىكمۇ، مۇخبېر مايۈن بىلەن تۈزگەن كېلىشىمگە ئەمەل قىلىپ، بۇ قېتىمقى زىيارەت جەريانىدا كۆرگەنلىرىنىئاشكارلىمىغان. تاكى مايۈن تۇنجى قېتىملىق مەبلىغىنى جۇغلاپ يېپيېڭى ئىش بېجىرىش ئورنىغا كۆچكەندىن كىيىن، مۇخبېر ئەينى ۋاقىتتا كۆرگەنلىرىنى پۈتۈن دۇنياغا ئاشكارلىغان.    مايۈن ھەرقېتىم ئەينى ۋاقىتتىكى ئەھۋالنى ئەسلىگەندە، مەبلەغنىڭ بىر كارخانىغا نىسبەتەن قانچىلىك مۇھىملىقىنى چوڭقۇر ھېس قىلىدۇ! ماقال – تەمسىللەردە شۇنداق دىيىلگەن:«ئاشلىق بولمىسا ئات يۈگۈرەلمەيدۇ.» ھەر قانداق بىر كارخانا دەسمىگە مۇھتاج، بۇ ئەڭ ئاز بولغان قوزغىتىش مەبلىغى ۋە بىر قىسىم ئاساسى چىقىملارنى ئۆز ئىچىگە ئالىدۇ.مەلۇم مەنىدىن ئېيىتقاندا شۇنداق دىيىشكە بولىدۇكى، مەبلەغ كارخانا تەرەققىياتىنىڭ جان – تومۇرى.    بىراق يەنە بىر جەھەتتىن ئېيىتقاندا، ئىگىلىك تىكلىگۈچىگە نىسبەتەن ئېيىتقاندا مەبلەغ قانچە كۆپ بولسا شۇنچە ياخشى بولۇشى ناتايىن. كارخانىغا مەبلەغ توپلىغان ۋاقىتتا مايۈننىڭ تەكىتلەيدىغىنى بولسا، پۇلنى قانچە كۆپ چىقارسا شۇنچە ياخشى ئەمەس، بەلكى«ئەڭ مۇۋاپىق ۋاقىتتا ئەڭ مۇۋاپىق پۇلنى چىقىرىش» ئەڭ ياخشى ئەھۋال بولۇپ ھېسابلىنىدۇ. چۈنكى پۇل كۆپ بولۇپ كەتكەندە، بىر تەرەپتىن ئىگىلىك تىكلىگۈچىدە بەتخەجلىك قىلدىغان يامان ئادەت يىتىلدۈرۈپ قويىدۇ، يەنە بىر تەرەپتىن ئىگىلىك تىكلىگۈچى بۇنىڭلىق بىلەن بىر قىسىم جاپالاردىن ساقلىنىپ قالىدۇ، بۇنداقتا ئىلگىرى قىيىنچىلىق ۋە مەغلۇبىيەتنى باشتىن كەچۈرۈپ باقمىغان ئادەم قانداقمۇ كەلگۈسىدىكى خەتەرگە تاقابىل تۇرالايدىغان ساپا ۋە ئىقتىدارغا ئىگە بولسۇن؟    شۇنىڭ ئۈچۈن، ئىگىلىك يارىتىشنىڭ دەسلەپكى قەدىمىدە بىر تەرەپتىن مەبلەغ جۇغلاش پىلانىنى ياخشى قىلىش، يەنە بىر تەرەپتىن «تىجەشلىك بولۇش» نى، پۇل كەمچىل ۋاقىتلارداھەر بىر سىنىت پۇلنىڭ رولىنى تولۇق جارى قىلدۇرۇشتىن ئىبارەت قائىدىنى چۈشىنىش كېرەك، ئۇنداق بولمايدىكەن، قايسىبىر مەبلەغ سالغۇچى سىزگە پۇل بېرىشنى خالايدۇ؟ مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام