مايۈننىڭ ئىگىلىك تىكلەش دەرىسخانىسى

WWW.UYHQT.COM

	ئۈچۈنچى دەرس  ئۈچۈنچى پارگىراف كىشىلىك مۇناسىۋەتتىن پايدىلىنىپ مەبلەغ جۇغلاش    مايۈن مۇنداق دىگەن: «بىر ئىگىلىك تىكلىگۈچىنىڭ چوقۇم بىر تۈركۈم دوستلىرى بولۇشى كېرەك، بۇ دوستلىرىڭىز سىزنىڭ كۆپيىللاردىن بۇيانقى ئىشەنچىلىكلىكىڭىز سەۋەبلىك جۇغلانغان بولۇشى كېرەك، قانچە كۆپ جۇغلانسا شۇنچە ياخشى.»    كىشىلىك مۇناسىۋەت مەڭگۈ بىر يوشۇرۇن مەبلەغ، شەكىلسىز بايلىق. يۈزەكى قارىغاندا، ئۇ ھەرگىزمۇ بىۋاستە بايلىق ئەمەس، ئەمما ئۇ بولمىسا سىزنىڭ ھەقىقىي بايلىققا ئېرىشەلىشىڭىز ناھايىتى تەس. گەرچە سىزنىڭ ناھايىتى مول بولغان كەسپى بىلىملىرىڭىز بولسىمۇ، يىتۈك ناتىقلىق ئىقتىدارىڭىز بولسىمۇ، ئەمما بىر قېتىملىق سودىنى مۇۋەپپەقىيەتلىك قىلالىشىڭىز ناتايىن. بىراق، بىر ئاچقۇچلۇق شەخس سىزگە ياردەم قىلسا، سىز ئۈچۈن گەپ قىلسا ياكى سىزنى بىۋاستە مەبلەغ بىلەن تەمىنلىسە، ئۇنداقتا سىز ئىگىلىك تىكلەش يولىدا ئۇچرايدىغان ئاۋارىچىلىقلار ئاز بولىدۇ.    ئۇنىڭدىن باشقا، كىشىلىك مۇناسىۋىتىڭىز قانچە مول بولسا پۇل تاپىدىغان يولىڭىزمۇ شۇنچە كەڭرى بولىدۇ؛ سىزنىڭ كىشىلىك مۇناسىۋەت قاتلىمىڭىز قانچە يۇقىرى بولسا سىزنىڭ پۇل تاپمىقىڭىز تىز ھەم كۆپ بولىدۇ. بۇ ئاللىقاچان ئىسپاتلانغان ئەمەلىيەت!    «ئەلى بابا»نى ئېلىپ ئېيىتساق، «ئەلى بابا» نىڭ CFO(باش مالىيە ئەمەلدارى) سا چوڭشىن كېلىشتىن بۇرۇن، «ئەلى بابا» دەل قىيىنچىلىقتا تۇرغان مەزگىلى بولۇپ، ساچوڭشىن مەبلەغ جەھەتتىن «ئەلى بابا» نى قۇتقۇزۇپ قالغان.    ساچوڭشىن ئەسلىدە شىۋېتسىيە Investor ABمەبلەغ سېلىش شىركىتىنىڭ مۇئاۋىن لېدىرى بولۇپ ،مەبلەغ سېلىش شىركىتىگە ۋاكالىتەن مايۈن بىلەن مەبلەغ توغرۇلۇق سۆھبەتلىشىش ئۈچۈن كەلگەن كەلگەن ئىدى، نەتىجىدە مايۈن ئۇنى ئۆزىنىڭ شىركىتىگە جەلپ قىلىپ شىركىتىنىڭ باش مالىيە ئەمەلدارى قىلىۋالغان.    «ئەلى بابا»غا سالغان تۇنجى قېتىملىق مەبلەغ ناھايىتى كۆپ پايدا ياراتقان، بۇ ساچوڭشىننىڭ مۇناسىۋىتى ئارقىلىق بارلىققا كەلگەن ئىدى. 1999 – يىلى 8 – ئايدا، ساچوڭشىن «ئەلىبابا» ئۈچۈن مەبلەغ سالغۇچى ئىزدەۋاتقان كۈنلەردە، بىر مېھمانخانىدا كونا دوستىلىن خانىم بىلەن ئۇچرىشىپ قالغان. لىن خانىم خەلقئاراغا داڭلىق مەبلەغ سېلىش شىركىتى بولغان «گاۋشىڭ» شىركىتىنىڭ شاڭگاڭ رايونىدىكى مەبلەغ سېلىش لېدىرى بولۇپ،ئۇ سا چوڭشىننىڭ ئوقۇغۇچىلىق دەۋرىدىكى كونا دوستى ئىدى. ئۇلار تېخى ئوقۇغۇچى ۋاقىتلىرىدا ئامېرىكىدىن تەيۋەنگە قايتىش يولىدا ئايروپىلاندا تونۇشۇپ قالغان بولۇپ، ناھايىتى ياخشى دوستلاردىن بولۇپ قالغان ئىدى. كىيىن، ئۇلار مەبلەغ سېلىش بانكىسىدا خىزمەت قىلغان بولۇپ، كەسپىمۇ ئوخشاش ئىدى، شۇڭا ئىزچىل دوستانە مۇناسىۋەتنى ساقلاپ كەلگەن، ئالاقىسىمۇ ناھايىتى قويۇق ئىدى.    ئىككەيلەن ئوزۇن ۋاقىتتىن كىيىن قايتا كۆرۈشكەن بولغاچقا، تەبئىيلا ناھايىتى خۇشال بولغان.پاراڭلىشىش جەريانىدا، لىن خانىم ئۆزىنىڭ مەبلەغ سالىدىغان تۈر ئىزدەۋاتقانلىقىنى ئېيىتقان. ئەينى ۋاقىتتا، «گاۋشىڭ» شىركىتىنىڭ نەزىرى ئاللىقاچان يېڭىدىن گۈللىنىۋاتقان ئېنتىرنىت كەسپىگە چۈشكەن بولغاچقا، سا چوڭشىن لىن خانىمدىن «گاۋشىڭ»شىركىتىنىڭ «ئەلى بابا» شىركىتىگە مەبلەغ سېلىشقا قىزىقىدىغان –قىزىقمايدىغانلىقىنى سورىغان.    لىن خانىم بېرىپ تەكشۈرۈشكە ۋەدە بەرگەن، نەتىجىدە «ئەلى بابا» دىن ناھايىتى رازى بولغان.«گاۋشىڭ» شىركىتىنىڭ خەلقئارا ئارقا كۆرۈنۈشى ۋە مەبلەغ سېلىش ساھەسىدىكى ئورنىنى ئويلىغان، مەبلەغ سېلىش سودىگەرلىرىگە قارىتا ئىزچىل ناھايىتى سەزگۈر بولۇپ كەلگەن مايۈن «گاۋشىڭ» شىركىتىنىڭ مەبلەغ سېلىش شەرتلىرىنى قوبۇل قىلىشنى، ئۇلار بىلەن ھەمكارلىشىشنى قارار قىلغان. شۇنداق قىلىپ، ساچوڭشىننىڭ ياردىمى ئاستىدا،ئاللىقاچان قىيىنچىلىقلارغا پاتقان «ئەلى بابا» تۇنجى قېتىملىق مەبلەغ – 5 مىليون ئامېرىكا دوللىرى – غا ئېرىشكەن.    ماقال –تەمسىللەردە <دوست كۆپ بولسا يولمۇ كۆپ بولىدۇ> دىيىلگەن. بىر ئادەم مۇۋەپپەقىيەت قازىنىشنى ئويلىغاندا، پەقەتلا ئۆزىنىڭ كۈچىگە تايانغان بىلەن ئىش پۈتمەيدۇ، چوقۇم باشقىلارنىڭ كۈچىدىن پايدىلىنىش كېرەك. بىز ئەتراپىمىزدىكى مۇۋەپپەقىيەت قازانغان كىشىلەرگە قارايدىغان بولساق، ئۇلار نورمال خىزمەت ۋە سودا بىلەن ئالدىراش بولغاندىن سىرت، يەنە كۆپ قىسىم بوش ۋاقىتلىرىنى دوست تۇتۇشقا سەرپ قىلىدۇ. چۈنكى دوست – ئۇچۇر مەنبەسى، سودا پۇرسىتى، يېڭىلىق يارىتىش، باشلامچى،تەكلىپلىك مۇتەخەسسىس، ئىلھام، بايلىق... – قاتارلىق نۇرغۇن نەرسىلەرگە ئېرىشتۈرىدۇ.    «جۇڭگودىكى غەلبە»پروگراممسىدا جېن خانىم ئىسىملىك بىر ماھىر بولۇپ، ئۇ ئىلگىرى داڭلىق سېتىقچى ئىدى، ھەمدە ساقلىقنى ساقلاش بويۇملىرى ۋە ئاق ھاراق كەسپىدە داڭق چىقارغان ئىدى.كىيىن ئۇ ئۆزى ئىگىلىك تىكلەشنى باشلىغان، ئۇنىڭ شىركىتىنىڭ تەشكىلىي قۇرۇلمىسى ناھايىتى ئاددى ئىدى: ئەڭ يۇقىرى قاتلامدا مۇدىرىيەت يىغىنى ۋە CEO (باش ئىش بېجىرگۈچى) تۇراتتى، ئۇنىڭ تۆۋىنىدە ھاراق زاۋۇتى ۋە سېتىشقا مەسئۇل ئۈچ شىركەت بار ئىدى. سېتىشقا مەسئۇل شىركەت سېتىش كەسپى، سېتىش خادىملىرى، كادىرلار ئىشلىرى، سېتىش نىشانى ۋە كارخانا مەدەنىيىتى قاتارلىق تەرەپلەرگە مەسئۇل ئىدى، ئۆزى بولسا مالىيە باشقۇرۇشقا مەسئۇل ئىدى.    ھالبۇكى، ئۇ ئۆزىمۇ ئويلاپ باقمىغان بىر قىسىم مەسىلىلەرگە ئۇچرىغان: ئىلگىرى ئۇنىڭ ھەمكارلاشقۇچى ۋە دوست بولۇپ ئۆتكەن شىركەتلەر ئۇنىڭغا ئورا كولاپ، ئۇنىڭ خىزمەتچىلىرىنى يۇقىرى ئىش ھەققى بېرىپ تارتىۋالغان؛ ئۇنىڭ تەمىنلىگۈچى سودىگىرى ئۇنىڭغا قارىتا ئىشەنچىنى يوقىتىپ، ئۇنىڭدىن ئالدىن پۇل تاپشۇرۇشنى تەلەپ قىلغان؛بانكىدىن قەرز ئېلىشتىنمۇ ئۈمىد قالمىغان، چۈنكى دۆلەت ئىچىدىكى كارخانىلار جىن خانىمنىڭ كارخانىسىغا ئوخشايدىغان ئوتتۇرا – كىچىك كارخانىلارغا قەرز بېرىشنى خالىمىغان...، جىن خانىم ھەر تەرەپتىن قىيىنچىلىقلارغا ئۇچراشقا باشلىغان.    بۇ ۋاقىتتا،مايۈن ئۇنىڭغا قارىتا باھا بېرىپ مۇنداق دىگەن: «جىن خانىم بىر خاتالىق ئۆتكۈزگەن،يەنى ئۇ دەسلەپتىلا مالىيەگە مەسئۇل بولۇپ، ئۆزەمدە سېتىقچىلىق تېخنىكىسى ۋە مالىيە باشقۇرۇش ئىقتىدارى بولغاچقا نۇرغۇنلىغان مەسىلىلەرنى بىر يولىلا ھەل قىلۋىتىمەن دەپ ئويلىغان. بىراق CEO (باش ئىش بېجىرگۈچى) نىڭ ئەڭ مۇھىم ۋەزىپىسى ئىستىراتىگىيە بەلگىلەش، بۇنىڭدا ئىككى خىل يادرولۇق مەزمۇن بار: بىرى ئادەم، يەنە بىرى ئىقتىساد، ئەمما بۇنىڭدا ئادەم ئەڭ مۇھىم ئامىل. پۈتكۈل ئىگىلىك يارىتىش جەريانىدا كوللىكتىپ ئەڭ مۇھىم، كوللىكتىپ بولغاندىلا پۇلنى ياخشى باشقۇرغىلى، مەھسۇلاتلارنى ياخشى پىلانلىغىلى بولىدۇ،ئەمما جىن خانىم پەقەت پۇلنى چىڭ تۇتقاچقا، ئادەملەر تارقاقلىشىپ كېتىپ، مەسىلە چوڭىيىپ كەتكەن.»    مايۈن يەنە شۇنداق كۆرسەتكەن: بىر CEO ۋە بىر ئىگىلىك تىكلىگۈچىگە نىسبەتەن ئېيىتقاندا ئەڭ مۇھىم، ئەڭ چوڭ بايلىق بولسا كىشىلىك مۇناسىۋەت ۋە سەمىمىيلىك. ئۇ مۇنداق دىگەن: «ئەگەر مەن بۈگۈن شىيوڭ شىياۋگې ياكى ۋۇيىڭ (كارخانىچىلارنىڭ ئىسمى) دىن ئون مىليون يۈەن سورىسام، ئۇلاردا پەقەت پۇل بولسىلا ماڭا بېرىپ تۇرىدۇ، بۇ بىزنىڭ ئادەتتىكى ۋاقىتلاردىكى چۈشىنىش ۋە ئىشەنچىمىزنىڭ ئۈستىگە قۇرۇلغان. ئەگەر ئۇلار تونۇشمايدىغان ئادەملەر بولسا 10 مىڭ يۈەن قەرز بېرىدىغان ئىش بولسىمۇ ئۇلار قوشۇلمايدۇ.»    شۇ سەۋەبتىن، بۈگۈنكى كۈندە بىز EMBA(ئالىي دەرىجىلىك باشقۇرغۇچىلارنى تەربىيلەش)، لېدىر تەربىيلەش سىنىپى قاتارلىقلارنىڭ بارغانسىرى كۆپىيۋاتقانلىقىنى، گولف توپ تۈرىدىكى ھەرخىل ئاقسۆڭەكلەرچە كۆڭۈل ئېچىش كۇلۇبلىرىنىڭمۇ بارغانسىرى كەڭ تارقىلۋاتقانلىقىنى كۆرەلەيمىز. نېمىشقا كىشىلەر نەچچە ئون مىڭ، ھەتتا نەچچە مىليون خەجلەپ كۆپچىلىك ھەممىسى چۈشىنىدىغان نەرسىلەرنى ئۆگىنىدۇ؟ نېمىشقا ھەشەمەتلىك كۆڭۈل ئېچىش سورۇنلىرىغا بارىدۇ؟ ئەمەلىيەتتە ئۇلارنىڭ بۇنچە كۆپ پۇل خەجلەشتىكى مەقسىتى ھەرگىزمۇ دەرسلىك ياكى كۆڭۈل ئېچىش ئۈچۈن ئەمەس، ئەكسىچە كىشىلىك مۇناسىۋەت ئۈچۈندۇر. ئەڭ مەنىلىك بولغان بىر ئەھۋال شۇكى، ئادەتتىكى كىشىلەرنىڭ قارىشىچە،قانچە مۇۋەپپەقىيەت قازانغان كىشى كىشىلىك مۇناسىۋەتكە شۇنچە ئېتىبار بېرىدۇ.ئەمەلىيەتتە ئەھۋال بۇنىڭ دەل ئەكسىچە، بۇ كىشىلەر كىشىلىك مۇناسىۋەتكە ئەھمىيەت بەرگەچكە مۇۋەپپەقىيەت قازىنالىغان.    شۇنىڭ ئۈچۈن، ئىگىلىك يارىتىپ مەبلەغ توپلاش جەريانىدا، بىز شۇنداق بىر جۈملە سۆزنى ئېسىمىزدە تۇتۇشىمىز كېرەك: «ئەگەر سىز 100 نەپەر مىليادىرنى تونۇسىڭىز، ئۇنداقتا سىزگە ياردەم قىلالمايدىغان ئادەمنىڭ يوقلۇقىدىن يەنە ئەنسىرەمسىز؟» مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

ئامان1

	بىرسى مەندىن بۇ كىتابنى نېمىشقا ئوقۇيمەن دەپ سورىغان ئىدى. مەن مۇنداق جاۋاب بەردىم: «سەن پەقەت ئوقۇپ قويساڭلا بولدى، كىتاب ئۇ ئوغۇت ۋە دېھقانلىرىمىز ئىشلىتىدىغان قىغ (پوق) قا ئوخشايدۇ، ھەزىم قىلىشنىڭ ھاجىتى يوق، ئۇ ساڭا ئۆزلۈكىدىن تەسىر قىلىدۇ.» تورداشلىرىمىز، سىلەرچە بۇ جاۋابىم قانداق بولغاندۇ؟

WWW.UYHQT.COM

	ئۈچۈنچى دەرس  تۆتىنچى پارگىراف ئەھۋالىمىز ئەڭ ياخشى ۋاقىتتا مەبلەغ توپلىشىمىز كېرەك    مايۈن «جۇڭگودىكى غەلبە» پروگراممىسىداباھالىغۇچى بولغاندا، ئىگىلىك تىكلىگۈچىلەرگە قارىتا مۇنداق تەكىتلىگەن: «سىز ئەڭنامرات ۋاقىتلىرىڭىزدا بېرىپ مەبلەغ توپلاشقا، باشقىلاردىن پۇل سوراشقا بولمايدۇ،مەڭگۈ ئەھۋالىڭىز ئەڭ ياخشى ۋاقىتتا بېرىپ مەبلەغ توپلىشىڭىز، كارخانىنىڭ ئەڭ ياخشى تەرەققىيات باسقۇچىدا تەڭشەش ئېلىپ بېرىشىڭىز كېرەك!» بۇ مايۈننىڭ تەجرىبىسى. ئەينى ۋاقىتتا مايۈن مەبلەغ توپلىغاندا، ئۇ ئەڭ ياخشى پەيتنى تۇتىۋالغاچقا، «ئەلى بابا» نى تېخىمۇ تەرەققىي قىلدۇرۇشتا زۆرۈر بولغان مەبلەغكە ئېرىشەلىگەن.    «ئەلى بابا»قۇرۇلۇپ ئوزۇن ئۆتمەستىن ئېنتىرنىت تورىنىڭ تەرەققىياتى «باھار پەسلى» گە كىرگەن،بارلىق مەبلەغ سالغۇچىلار بۇ ساھەگە مەبلەغ سېلىشنى باشلىغان. ئۇنىڭ ئۈستىگە،ئەينى ۋاقىتتىكى «ئەلى بابا» گەرچە ئەمدىلا تىجارەت باشلىغان بولسىمۇ، بىراق ئۇچقاندەك تەرەققىياتقا ئېرىشىپ، زىيارەت قىلىنىش سانى ۋە خېرىدارلىرى ناھايىتى تىز سۈرئەتتە يۇقىرى كۆتۈرۈلۈپ، ئىنتايىن ياخشى بولغان تەرەققىيات باسقۇچىدا تۇرۋاتاتتى.    دەل مۇشۇنداق ياخشى ۋەزىيەت ئارقىسىدا، ساچوڭشىننىڭ مۇناسىۋىتى ئارقىلىق «ئەلى بابا» ئۆزىنىڭ تۇنجى مەبلىغىگە ئېرىشكەن. قايتا – قايتا تەكشۈرۈش ئارقىلىق، «گاۋشىڭ»شىركىتى «ئەلى بابا»نى 5 مىليون ئامېرىكا دوللىرى مەبلەغ بىلەن تەمىنلىگەن، بۇگەرچە كۆپ پۇل بولمىسىمۇ، بىراق «ئەلى بابا» نىڭ تەرەققىياتىغا زور تۆھپىلەرنى قوشقان.    ئارقىدىنلا،1999 – يىلى 10 – ئايدا، ئەينى ۋاقىتتىكى ئېنتىرنىت ساھەسىدە داڭلىق بولغان ياپۇنىيەنىڭ مەبلەغ سېلىش شىركىتى «رۇەنيىن» مۇ «ئەلى بابا» نىڭ ئىشىكىنى قاققان، مەبلەغ سېلىش ئۇستىسى سۈنجېڭيى 6 مىنوتتىلا «ئەلى بابا» غا مەبلەغ سېلىشنى قارار قىلغان، ھەمدە40 مىليون ئامېرىكا دوللىرى چىقارماقچى بولغان. ئەمما بۇ ۋاقىتتا مايۈن ناھايىتى قەتئىيلىك بىلەن «رۇەنيىن» شىركىتى بىلەن باھا تالىشىپ، ئۇدا ئۈچ قېتىم «NO» (ياق) دىگەن، ھەمدە سۈنجېڭيىنىڭ مەبلەغ سوممىسىنى 20 مىليون ئامېرىكا دوللىرىغا چۈشۈرگەن. مايۈننىڭ سۈنجېڭيىنىڭ 40 مىليون مەبلىغىنى رەت قىلىشىدىكى سەۋەب، گەرچە مايۈن ئاللىقاچان مەبلەغ سالغۇچىلارنى ئۆزىگە جەلپ قىلىپ مەبلەغكە ئېرىشكەن بولسىمۇ، بىراق مەبلەغنىڭ بەك كۆپ بولۇپ كېتىشى ياخشى ئەمەس ئىدى، شۇڭا چوقۇم ئۆزىگە بىر چەك بېكىتىش كېرەك ئىدى.    مەبلەغكە ئېرىشكەندىن كىيىن، مايۈن بىزنىڭ ئەستايىدىل ئۆگىنىشىمىزگە ئەرزىيدىغان يەنە بىرخۇلاسىگە كەلگەن: «مەبلەغ سالغۇچىلارنىڭ ئەڭ قورقىدىغىنى كىشىلەرنىڭ ئۇنىڭدىن پۇل سورىشى، ئۇنىڭ ئەڭ ياخشى كۆردىغىنى بولسا سىزنىڭ پۇل سورىشىڭىز ئەمەس، بەلكى تەشەببۇسكارلىق بىلەن پۇلنى سىزگە بېرىش! مەبلەغ سالغۇچىلارنى ئۆزىڭىزگە تەشەببۇسكارلىق بىلەن پۇل بېرىدىغان قىلىشنىڭ ئەڭ ياخشى ئۇسۇلى بولسا، ئۇلارغا ئۆزىڭىزنىڭ ئىشەنچلىك ئىكەنلىكىڭىزنى، تاللىغان تۈرىڭىزنىڭ پارلاق ئىستىقبالى بارلىقىنى ۋە ئۇلار ئۈچۈن پۇل تېپىپ بېرەلەيدىغانلىقىنى ھېس قىلدۇرۇش!»    مەبلەغ سالغۇچىلارنىڭ مەبلىغى پۇل تېپىشنى مەخسەت قىلغان، شۇڭا ئۇلار پۇلنى ئاكتىپلىق بىلەن ئەھۋالى ئەڭ ياخشى شىركەتلەرگە بېرىدۇ.    شۇنىڭ ئۈچۈن، شىركەتنىڭ ئەھۋالى ئەڭ ياخشى ۋاقىتتا مەبلەغ توپلىغاندا، مەبلەغكە ئېرىشىش مۇمكىنچىلىكى ئەڭ يۇقىرى بولىدۇ.    ئەلۋەتتە،ئوخشىمىغان مەبلەغ سالغۇچىلارنىڭ ئىگىلىك تىكلىگۈچىلەرگە بولغان تەلىپىمۇ ئوخشاش بولمايدۇ. ئەگەر ئىگىلىك تىكلىگۈچى قەرز ئېلىش شەرتى بىلەن مەبلەغكە ئېرىشسە،مەسىلەن: بانكا ئارقىلىق ياكى باشقا يوللار ئارقىلىق قەرز ئالسا، قەرز بەرگۈچى ئىگىلىك تىكلىگۈچىنىڭ قەرز مۇددىتى ئىچىدە قەرز قايتۇرۇش ئىقتىدارى ۋە ئۆسۈم تۆلەش ئىقتىدارىغا بەكرەك كۆڭۈل بۆلىدۇ. شۇنىڭ ئۈچۈن، قەرز بەرگۈچى يېڭىدىن قۇرۇلغان كارخانىلارنىڭ سودا پۇرسىتى ۋە خىيىم – خەتىرىگە قارىتا سېلىشتۇرۇپ تەھلىل ئېلىپ بېرىشى كېرەك.    ئەگەر ئىگىلىك تىكلىگۈچى مەبلەغ سالغۇچىلار ئارقىلىق ئۆزىنىڭ تۈرىگە مەبلەغ جەلپ قىلىشنى ئويلىسا، ئۇنداقتا مەبلەغ سالغۇچى ھوقۇق – مەنپەئەتكە ئېرىشىش ئۈچۈن يۇقىرى سوممىلىق مەبلەغ بىلەن تەمىنلەيدۇ – دە، بۇ مەبلەغتىن ئېرىشىدىغانلىرىنىڭ كۆپرەك بولۇشىنى ئۈمىد قىلىدۇ، ھەمدە مۇئەييەن ۋاقىت ئىچىدە مەبلەغ ھاسىلاتىنى قايتۇرۇپ ئېلىپ كېلىشنى تەلەپ قىلىدۇ، شۇڭا مەبلەغ سالغۇچىلار قەرز بەرگۈچىلەرگە قارىغاندا ئىگىلىك تىكلىگۈچىنىڭ سالاھىيىتىگە تېخىمۇ بەك كۆڭۈل بۆلىدۇ. ئۇلار كۆپ ۋاقىت سەرپ قىلىپ ئىگىلىك تىكلىگۈچىنىڭ ئارقا كۆرۈنۈشىنى تەكشۈرىدۇ، ئۇنىڭ ئىقتىسادىي ئەھۋالىغا كۆڭۈل بۆلۈپلا قالماستىن، يەنە ئىككى تەرەپنىڭ ھەمكارلىقىنىڭ كۆڭۈللۈك بولۇش – بولماسلىقى قاتارلىق كۆپ تەرەپلەردىن ئويلايدۇ.    بۇنىڭدىن بىز كۆرۈۋالالايمىزكى، مەيلى قايسى يوللار ئارقىلىق مەبلەغ جۇغلاش بولسۇن يەنى يېقىن دوستلاردىن قەرز ئېلىش، بانكىدىن قەرز ئېلىش، مەبلەغ سالغۇچىلارنى ئىزدەش قاتارلىقلارنىڭ قايسىسى بولسۇن، ئاۋال ئۇلارنىڭ سىزگە بولغان ئىشەنچىسىنى قولغا كەلتۈرۈشىڭىز كېرەك. مەبلەغ سالغۇچى بىلەن كۆرۈشكەن ۋاقىتتا، تۆۋەندىكى ئۈچ مەسىلىنى چۈشەندۈرۈش كېرەك: بىرىنچى، بازار بوشلۇقىنىڭ قانچىلىك ئىكەنلىكى، بۇنى ئوبيېكتىپ سانلىق مەلۇماتلار ئارقىلىق چۈشەندۈرۈش كېرەك؛ ئىككىنچى، مەبلەغ سالغۇچى نېمىشقا سىزنى تاللىشى كېرەك، نېمىشقا سىز مەن بۇ ئىشنى ياخشى قىلالايمەن دەپ ئويلايسىز؛ ئۈچىنچى، سىزنىڭ تىجارەت شەكلىڭىز قانداق. پەقەت مەبلەغ سالغۇچىلارغا سىزنىڭ شىركىتىڭىز ۋە تۈرىڭىزنى تولۇق چۈشەندۈرەلىسىڭىزلا، ئۇلار ئاندىن ئاكتىپلىق بىلەن پۇل چىقىرىدۇ.    ئىگىلىك تىكلىگۈچى مەبلەغ توپلىغان چاغدا، چوقۇم مەبلەغ توپلاش شەكلىنىڭ ئالاھىدىلىكلىرىنى ئەتراپلىق ئويلىنىشى، ھەمدە ئۆزىنىڭ كارخانىسىنىڭ ئەمەلىي ئەھۋالى بىلەن بىرلەشتۈرۈشى كېرەك، بۇنىڭغا قارىتا مۇۋاپىق مەبلەغ توپلاش تەدبىرىنى تۈزىشى كېرەك. مەسىلەن: مەلۇم بىر بەلگىلىك مۇھىتتا، كارخانا بەلكى پاي تارقىتىش شەكلى بىلەن مەبلەغ توپلاشقا ماس كەلمەسلىكى مۇمكىن، بىراق بانكىدىن قەرز ئېلىشقا ماس كېلىشى مۇمكىن؛ كارخانا ئېھتىمال مەلۇم بىر رايوندا زايوم تارقىتىپ مەبلەغ جۇغلاشقا ماس كەلمەسلىكى مۇمكىن، بىراق يەنە بىر رايوندا ئىنتايىن ماس كېلىشى مۇمكىن.    ئۇنىڭدىن باشقا، يەنە ئالدىن كۆرەرلىك بولۇشى كېرەك. دۆلەت ئىچى ۋە سىرتىدىكى پايدا نىسبىتى، پېرېۋوت نىسبىتى قاتارلىق ئاكسىيە بازارلىرىنىڭ ھەرخىل ئۇچۇرلىرىغا ۋاقتىدا ئېرىشىش؛ دۆلەت ئىچى – سىرتىدىكى ماكرو ئىقتىسادىي يۈزلىنىشنى ، دۆلەت پۇلى ۋەمالىيە سىياسىتىنى ھەمدە دۆلەت ئىچى – سىرتىدىكى سىياسىي مۇھىت قاتارلىق ھەرخىل تاشقى ئامىللارنى چۈشىنىش؛ كارخانىنىڭ مەبلەغ جۇغلىشىغا تەسىر قىلدىغان ھەرخىل پايدىلىق ۋە پايدىسىز شارائىت، ھەمدە كېلىپ چىقىش مۇمكىنچىلىكى بولغان ھەرخىل ئۆزگىرىش يۈزلىنىشلىرىنى چۈشىنىش، بۇ ئارقىلىق ئەڭ ياخشى بولغان مەبلەغ توپلاش پەيتى ۋە تەدبىرىنى تېپىپ چىقىش كېرەك. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	ئۈچۈنچى دەرس  بەشىنچى پارگىراف بىز بېخىللىقىمىزدىن پەخىرلىنىشىمىز كېرەك    يەھۇدىيلارنىڭ باي سودىگىرى ياكېد مۇنداق دىگەن: «يەھۇدىيلار ئورتاق ئېتىراپ قىلىدىغان باي بولۇش پىرىنسىپى بولسا: ئۆزىنىڭ چىقىمىنى كىرىمىدىن ئاشۇرۋەتمەسلىك كېرەك. ئەگەر چىقىم كىرىمدىن ئېشىپ كەتسە، بۇ نورمالسىز ئەھۋال بولۇپ ھېسابلىنىدۇ، بۇنداقتا باي بولۇشتىن ئېغىز ئاچقىلى بولمايدۇ.» ھەقىقىي سودىگەرلەرگە خاس  روھقا ئىگە بىر ئادەمگە نىسبەتەن ئېيىتقاندا، پۇل «بىر تىيىن – بىر تىيىندىن» جۇغلانغان.ھەقىقىي بايلار قاتارىدىن ئۇرۇن ئېلىش ئۈچۈن قەدەم باسقان  بىر ئادەم ھەرگىزمۇ پۇلىسىنىڭ ئاز بولۇپ قالغانلىقى سەۋەبلىك نىشانىدىن ۋاز كەچمەيدۇ، ئۇلار ھەرقانداق مۇۋەپپەقىيەتنىڭ كىچىكلىكتىن،ئاددىيلىقتىن جۇغلىنىپ چىققانلىقىنى بىلىدۇ، ئەگەر ئادەمدە بۇنداق پوزىتسىيە بولمىغاندا تېخىمۇ كۆپ بايلىققا ئېرىشىش مۇمكىن ئەمەس. مايۈنمۇنداق دىگەن: «(ئەلى بابا) ئېلان بەرمەيدۇ، ئۇ نۇرغۇنلىغان ئىشلارنى قىلمايدۇ، ئۇ پۈتۈن يەرشارىدىكى ئەڭ بېخىل شىركەت.» ئۇ يەنە مۇنداق دىگەن: «بىز ھەركۈنى ئەڭ ئاز پۇل بىلەن ئەڭ ئۈنۈملۈك ئىشنى قىلىشقا كۆڭۈل بۆلىمىز.» «جۇڭگو ئۇچۇر بېتى» ئەمدىلا قۇرۇلغاندا، مايۈن ئۆزىنىڭ خىزمەتچىلىرىنى تاكسىدا  ئولتۇرۇشقا ئىلھاملاندۇرمىغان، ھەتتا ئاممىۋى ئاپتوبۇسقا ئولتۇرۇشتىمۇ تىجەشچانلىق بىلەن ئىش كۆرگەن، سىرتلارغا چىقىپ ئىش بېجىرسىمۇ دائىم پىيادە ماڭغان. مايۈن «ئەلى بابا» سودا تورىنى قۇرۇپ چىققاندا،ھەشەمەتچىلىك قوغلاشماي  ھەممە ئىشتا ئاددى–ساددا بولۇشنى تەرغىپ قىلغان. چۈنكى ئۇ زۆرۈر بولمىغان چىقىملارنى چوقۇم تېجەش كېرەك دەپ قارايىتتى. ئۇنىڭدىن باشقا، ئۇ يەنە ئۆزىنىڭ بېخىللىقى ھەققىدىكى مۇنداق بىر ھېكايىنى ئېيتىپ بەرگەن: مايۈن «ئەلى بابا» نى ئەمدىلا قۇرۇپ چىققاندا،شىركەتنىڭ ئەھۋالى ياخشى ئەمەس ئىدى. ئەينى ۋاقىتتا ئۇنىڭ بىر تۇغقىنى تۇيۇقسىز ئىگىلىك تىكلىمەكچى بولۇپ مايۈندىن قەرز سورىغان. ئۇ ۋاقىتتا مايۈن ناھايىتى نامرات بولۇپ، بىر قىسىم نەرسىلىرىنى زىينىغا سېتىپ تۇغقىنىغا قەرز بەرگەن. مايۈن تۇغقىنىدىن قاچانلىققا قايتۇردىغانلىقىنى سورىغاندا، تۇغقىنى بىر يىلدىن كىيىن قايتۇردىغانلىقىنى ئېيىتقان. بىر يىلدىن كىيىن ئۇ تۇغقىنىمۇ ئىگىلىك تىكلەپ مۇۋەپپەقىيەت قازىنىپ پۇللۇق بولۇپ قالغان، ھەمدە مايۈننىڭ شىركىتىنىڭ ئەھۋالىمۇ ياخشىلانغان. بۇ ۋاقىتتا، مايۈن ئۇ تۇغقىنىنىڭ ماشىنا، ئۆي سېتىۋالغانلىقىنى بىلگەن، بىراق ئۇ تۇغقىنى قەرز قايتۇردىغان ئىشنى تىلغا ئالمىغان، چۈنكى ئۇ مايۈننىڭ كارخانىسى ياخشىلاندى، كۈنلىرىمۇ ياخشى ئۆتىۋاتىدۇ، ئۇنىڭدا پۇل كەم ئەمەس دەپ ئويلىغان.بىراق مايۈن ئۇنى ئىزدەپ بېرىپ پۇلنى قايتۇرۇشنى تەلەپ قىلغان. ئۇ تۇغقىنى ئۇنىڭدىن مۇنداق سورىغان: «سەن بۇ پۇللارنى نېمىگە ئىشلىتىسەن؟» مايۈن مۇنداق دىگەن: «ماڭا بۇ پۇللار لازىم، پۇلۇمنى قايتۇرۇپ بەر!» ئۇ تۇغقىنى مايۈننى ناھايىتى بېخىلكەنسەن دىگەن، مايۈن بۇنى ئىنكار قىلماستىن: «شۇنداق ،مەن ناھايىتى بېخىل، ماڭا پۇلۇمنى قايتۇرۇپ بەر!» دىگەن. كىيىن، «پۇلۇمنى قايتۇرۇپ بەر!» دىگەن سۆ توردا مودا بولۇشقا باشلىغان. بەزىلەر مايۈن ھەقىقەتەن بېخىلكەن، گەرچە تۇغقىنى قەرز ئالغان پۇل بولسىمۇ، مايۈندە پۇل كەم بولمىسا دىيىشكەن. ئەمەلىيەتتە،مايۈننىڭ بېخىللىقىنىڭ ئاساسى بار. بىرىنچىدىن، ئۇ تۇغقىنىنىڭ ئىزچىل سەمىمىي بولۇشىنى،  كىمدىنقانچىلىك پۇل قەرز ئالغان بولۇشىدىن قەتئىينەزەر قايتۇرىشىنى ئۈمىد قىلغان؛ ئۇنىڭدىن باشقا، بىر سودىگەر چوقۇم ھەر تەرەپتىن «بېخىللىق» قىلىشقاماھىر بولۇشى كېرەك. ئەگەر سىز ھەمىشە ئۇنىڭغىمۇ، بۇنىڭغىمۇ كۆڭۈل بۆلمىسىڭىز، بۇ جايدائازراق، ئۇ جايدا بىر ئاز زىيان تارتىۋەرسىڭىز، ئاخىرىدا غەلبە قىلىش پۇرسىتى بارغانسىرى ئازلاپ كېتىدۇ. 2010 – يىلى، شىۋاسىنگىر جۇڭگونى زىيارەت قىلغان، ئۇنىڭ بارلىق چىقىملىرىنى «ئەلى بابا» ئۆز ئۈستىگە ئالغان. بەزىلەر شىۋاسىنگىر كالفورنىيە شىتاتىنىڭ شىتات باشلىقى تۇرۇپ شۇنچە بېخىل بولامدۇ، جۇڭگودا زىيارەتتە بولسىمۇ جۇڭگو كارخانىلىرى پۇل چىقىرامدۇ؟ دىيىشكەن. شۇنى بىلىش كېرەك، كىرىمنىي جىلغىسى، لوس ئانژىلىس، سان فرانسىسكو قاتارلىق ئىقتىسادىي ئاساسى كۈچلۈك جايلارغا ئىگە بولغان كالفورنىيە شىتاتى ناھايىتى باي، ئۇنىڭ GDP (ئىچكى ئىشلەپچىقىرىش ئومۇمىي قىممىتى) بىر تىرىليون 850 مىليارىدئامېرىكا دوللىرى بولۇپ، دۆلەت بۇيىچە ھېسابلىغاندىمۇ پۈتۈن يەرشارىدا ئالدىنقى ئوننىڭ ئىچىگە كىرەلەيدۇ. ئۇنىڭدىن باشقا، شىۋاسىنگىرنىڭ جۇڭگوغا زىيارەتكە كېلىشىمۇ ھۆكۈمەت ئورۇنلاشتۇرۇشى بولۇپ، كالفورنىيە شىتاتىنىڭ ھەرخىل مەھسۇلاتلىرىنى جۇڭگوغا تونۇشتۇرۇش ئۈچۈن كەلگەن. بۇ ئۇنىڭ سىياسىي ئىستىقبالىغا بېرىپ تاقىلاتتى. ئامېرىكا چوقۇنىدىغان «چوڭ جەمئىيەت، كىچىك ھۆكۈمەت» شەكلىدە،سىياسىيونلار سايلىغۇچىلارنىڭ كۆڭلىنى ئۇتۇش ئۈچۈن باجنى ۋە ھۆكۈمەت چىقىمىنى ئازايتىشنى تەشەببۇس قىلاتتى. شۇ سەۋەبتىن، كالفورنىيە شىتاتىنىڭ ئىچكى ئىشلەپچىقىرىش ئومۇمىي قىممىتى ناھايىتى يۇقىرى بولسىمۇ، ئۇنىڭ ھۆكۈمەت چىقىمى دۆلىتىمىزدىكى بىر ئۆلكىگە يەتمەيىتتى. مۇناسىۋەتلىك تاراتقۇلارنىڭ نازارىتى ئاستىدا، ھەمدە سايلىغۇچىلارغا بولغان تەسىرىنى ئويلىشىپ، شىۋاسىنگىر ئۆزىنىڭ ھەركىتىگە ناھايىتى دىققەت قىلىشنى لايىق تاپقان، شۇڭا ئۇنىڭ بېخىللىق قىلىشىنىمۇ توغرا چۈشىنىشكە بولىدۇ. بىر ھەقىقىي مۇۋەپپەقىيەت قازانغان ئادەم ھەمىشە ناھايىتى ئېدىتلىق بولىدۇ، ئۇلار ھەربىر سېنىت پۇلنى خەجلەشكە تىگىشلىك جايغا خەجلەيدۇ، ھەمدە ئەزەلدىن ئىسراپ قىلمايدۇ. بىر سودىگەر بولۇش سۈپىتىڭىز بىلەن، پۇلنى ياخشى كۆرۈپلا قالماستىن، يەنە ئۇنى قەدىرلىشىڭىز كېرەك، مەيلى قانچىلىك پۇلدارلاردىن بولۇشىڭىزدىن قەتئىينەزەر، ھەرگىزمۇ بەتخەجلىك قىلىشقا بولمايدۇ.2006 – يىللىق «فوربىس» ژۇرنىلىدىكى يەرشارى بايلىرىنىڭ تۆتىنچى قاتارىغا تىزىلغان شىۋېتسىيە «قولايلىق ئائىلە» شىركىتىنىڭ قۇرغۇچىسى ئېدۋارىد.كەمپلېدنىڭ 30 دىن ئارتۇق دۆلەتتە 200 دىن كۆپرەك زەنجىرسىمان دۇكىنى بار بولۇپ، ئائىلەجابدۇقلىرى سېتىشتىكى بۇ كاتتا زەردار شىۋېتسىيەلىكلەر تەرىپىدىن «پىخسىق» دەپ ئاتالغان. «پىخسىق» دىگەن لەقەمگە نىسبەتەن، كەمپلېد ناھايىتى چوڭقۇر مەنىلىك قىلىپ مۇنداق جاۋاب بەرگەن: «مەن بېخىل بولغانلىقىمدىن پەخىرلىنىمەن.» ماددى بويۇملارغا بولغان ئېدىتلىق ئورۇنلاشتۇرۇش ھەمدە پۇلنى موچەنلەپ ھېسابلاش ۋە ئىشلىتىش بولسا سودىگەرچىلىك كەسپىنىڭ تەقەززاسى، دەل مۇشۇنداق «بېخىللىق» بولغاچقا ئۇلارنىڭ بايلاردىن بولالىغانلىقى ئېھتىمالدىن يىراق ئەمەس. ئەگەر سىز ئەتراپىڭىزدىكىلەرگە ئازراقلا دىققەت قىلسىڭىز، سىز چوقۇم تىجارەت بىلەن شۇغۇللىنىدىغان كىشىلەرنىڭ بېخىل ئىكەنلىكىنى بايقايسىز. بەزىلەر بېخىل سودىگەرلەرنى كۆزگە ئىلمايدۇ، بۇ بىرخىل بىلىمسىزلىكنىڭ ئىپادىسى. ئەكسىچە، بىز چوقۇم پىخسىق سودىگەرلەرنى ھۆرمەتلىشىمىز كېرەك، دەل شۇلارنىڭ تىجەشچانلىقى، ئويۇنغا بېرىلمەسلىكى، زېھنىنى پەقەت پۇل تېپىشقا قويۇپ پۇل خەجلەشكە قىزىقماسلىقى جۇڭگونى ئىچكى ئىشلەپچىقىرىش قىممىتى دۇنيادا ئىككىنچى ئورۇندا تۇردىغان دۆلەتكە ئايلاندۇرغان. يەھۇدىي سودىگىرى روكفېللېر مۇنداق دىگەن:«ھەمىيانىڭىزغا ئەستايىدىل قاراپ بېقىڭ، پۇلىڭىز يانچۇقىڭىزدىن خالىغانچە چىقىپ كەتمىسۇن، باشقىلارنىڭ سىزنى بېخىل دېيىشىدىن قورقماڭ. پەقەت سىز بىر سېنىت پۇل خەجلەپ ئىككى سېنىت تاپالايدىغان بولغاندا، سىز ئاندىن پۇل خەجلىسىڭىز بولىدۇ.» مۇنداق بىر گەپ بار: ئىنتايىن بېخىل بولغاندا ئاندىن ناھايىتى باي بولغىلى بولىدۇ. ئەگەر سىز بىر ھەقىقىي باي بولۇپ، سودا دۇنياسىدا ئۆزىڭىزنىڭ ئورنىنى تىكلىمەكچى بولسىڭىز، چوقۇم «ئىنتايىن بېخىل بولۇش»نى تىجارەت دەستۇرى قىلىشىڭىز كېرەك. تىرىشىپ پۇل تېپىش بولسا مەنبە، پۇلنى تىجەش بولسا ئېقىن بولۇپ ھېسابلىنىدۇ. غايەت زور بايلىققا ئېرىشىش ئۈچۈن تىرىشىش لازىم بولۇپلا قالماستىن، يەنە «بىر سىقىم – بىر سىقىم» دىن جۇغلاش كېرەك. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	تۆتىنچى دەرس مۇناسىۋەتنىڭ ئىشەنچىلىك بولۇشى ناتايىن، ئەڭ مۇھىمى بولسا ئۆز –ئارا ئىناۋەت تۆتىنچى دەرس بىرىنچى پارگىراف 1.دۇنيادا ئەڭ تايىنىشقا بولمايدىغان نەرسە - مۇناسىۋەت    جۇڭگولۇقلار ئىزچىل «مۇناسىۋەت» كە ناھايىتى ئېتىبار بېرىپ كەلگەن، مەسىلەن: ئىش بېجىرگەندە، كەمچىل نەرسىلەرنى سېتىۋالغاندا ۋە خىزمەت ئىزدىگەندە مۇناسىۋەتكە تايىنىش قاتارلىقلار. مەلۇم مەنىدىن ئېيىتقاندا،مول بولغان جەمئىيەت تەجرىبىسى ۋە ياخشى بولغان ئىجتىمائىي مۇناسىۋەت ھەقىقەتەن كىشىلەرنىڭ ئىش بېجىرىش ئۈنۈمىنى، مۇۋەپپەقىيەت قازىنىش نىسبىتىنى يۇقىرى كۆتۈرەلەيدۇ. ھالبۇكى، ئىگىلىك يارىتىپ سودا قىلىشتا، ئەگەر سىز ئىزچىل ھەممىدە مۇناسىۋەتكە تايىنىشنى ئويلىسىڭىز، ئىناۋەت ۋە مەھسۇلاتنىڭ سۈپىتىگە ئەھمىيەت بەرمىسىڭىز، ئۇنداقتا، سىز ئاخىرىدا چوقۇم «مۇناسىۋەت» كولىغان ئورىغا چۈشۈپ كېتىسىز.    2008 – يىلى4 – ئاينىڭ 6 – كۈنى، «يېڭى شەرق» مەكتىپىنىڭ مەكتەپ مۇدىرى يۈمىنخوڭ «ئىگىلىك يارىتىش قەھرىمانى» پروگراممىسىدا نۇتۇق سۆزلەپ ئىگىلىك تىكلىگۈچىلەرنى مۇنداق ئىلھاملاندۇرغان: «بۇ جەمئىيەتنىڭ مۇناسىۋەتكە تايىنىدىغانلىقىدىن زارلىنىشقا بولمايدۇ، جەمئىيەتنىڭ ئادالەتسىزلىكىدىن قاخشاشقا بولمايدۇ، ئەگەر ھەممە ئىشتىن ئادالەت كۆتۈرۈلۈپ كەتكەن بولسا، ئۇنداقتا، مەن ۋە مايۈن قانداق قىلىپ مۇۋەپپەقىيەت قازىنالايىتتۇق؟»    ئوخشاشلا،مايۈنمۇ «جۇڭگودىكى غەلبە» پروگراممىسىدا ئىگىلىك تىكلىگۈچى ماھىرغا مۇنداق باھا بەرگەن: «مېنىڭ مۇناسىۋىتىممۇ، پۇلۇممۇ يوق ئىدى، مەن ئىشلىرىمنى  قۇربىمنىڭ يېتىشىچە بىر ئاز – بىر ئازدىن قىلالىغان. مەن (مۇناسىۋەت) نىڭ ناھايىتى ئىشەنچسىز ئىكەنلىكىگە ئىشىنىمەن، سودا قىلىشتا (مۇناسىۋەت) كە تايىنىشقا بولمايدۇ، ئۇستاتلىق قىلىشقىمۇ بولمايدۇ، سودا قىلىشتا ئەڭ مۇھىمى سىز خېرىدارلارنىڭ نېمىگە ئېھتىياجلىق ئىكەنلىكىنى بىلىشىڭىز،قىممەت يارىتىشىڭىز ۋە ئىزچىل داۋاملاشتۇرۇشىڭىز كېرەك. بۇ دۇنيادا ئەڭ ئىشەنچىسىز بولغىنى دەل مۇناسىۋەت.»    مايۈننىڭ بۇنداق دىيىشىنىڭ ھەقىقەتەن ئاساسى بار، ئېھتىمال بۇ مايۈننىڭ كۆپ يىللاردىن بۇيان خۇلاسىلەپ چىققان تەجرىبىسى بولۇشى مۇمكىن.   ئەمەلىيەتتە، «ئەلى بابا» نىڭ تەرەققىياتىدا، شاڭخەي ۋە گۇاڭدوڭدىن ئىبارەت ئىككى ئۆلكە مايۈنگە ناھايىتى ئەھمىيەت بەرگەن، بۇنداق مۇناسىۋەت قارىماققا مايۈنگە پايدىلىقتەك كۆرۈنەتتى. ئەمەلىيەتتە، مايۈنمۇ مۇناسىۋەتكە تايىنىپ «ئەلى بابا» نى تەرەققىي قىلدۇرۇشنى ئويلاپ باققان. شۇنداق قىلىپ، ئۇ شاڭخەينىڭ جۈنخەي يولىدىن ناھايىتى چوڭ بىر ئىشخانىنى ئىجارىگە ئېلىپ، ناھايىتى چىرايلىق قىلىپ بېزىگەن. ھالبۇكى، ئىش باشلانغاندا، مايۈن كارخانا تەرەققىياتىدىكى مۇھىم ئامىل بولغان ئىختىساسلىقلارنى تېپىشنىڭ ناھايىتى تەسلىكىنى ھېس قىلغان. ئاخىرىدا مايۈن شاڭخەيدىن ئايرىلىپ خاڭجۇغا قايتىشنى قارار قىلغان.    مايۈن مۇنداق دىگەن: ئەينى ۋاقىتتىكى شاڭخەي بىزدەك يېڭى قۇرۇلغان شىركەتلەردىن قورقاتتى. مايۈنيەنە مۇنداق دىگەن: «شاڭخەي دۆلەت ھالقىغان شىركەتلەرنى ياختۇراتتى، دۇنيادىكى 500 كۈچلۈكنىڭ ئىچىگە كىرگەن كارخانىلار بولسا شاڭخەيدە تەرەققىيات پۇرسىتى زور ئىدى.بىراق ئەمدىلا ئىش باشلىغان پۇقراۋى كارخانىلار ئەڭ ياخشىسى شاڭخەيگە كەلمىگىنى تۈزۈك».شاڭخەيدەمايۈنگە تەسىرى ئەڭ چوڭقۇر بولغىنى –مايۈننىڭ سۈزى بويىچە ئېيتقاندا <<شاڭخەيلىكلەرگە نىسبەتەن بىز ھەممىمىز سەھرالىق!» ئىدۇق.    ئەلۋەتتە،ئۇنىڭدىن بۇرۇنمۇ بىر قېتىم مايۈن مۇناسىۋەتكە تايانغانلىقى سەۋەبلىك دەككىسىنى يىگەن.    ئۇ 1996 –يىلىنىڭ بېشى ئىدى. بۇ ۋاقىتتا «جۇڭگو ئۇچۇر بېتى» مەبلەغ، تەجرىبە ۋە ئۇچۇر كەمچىل بولۇشتىن ئىبارەت قىيىنچىلىقلارغا ئۇچرىغان ، ھەتتا خىزمەتچىلەرنىڭ مائاشىنىمۇ تارقىتالمايدىغان كۈنگە قالغان ئىدى. «جۇڭگو ئۇچۇر بېتى» ئىچكى – تاشقى قىيىنچىلىقتا تۇرغاندا، مايۈن ھايات قېلىش ئۈچۈن ئۆزىگە بىر ئارقا تىرەك تاپماقچى بولغان، ھەمدە خاڭجۇ تېلگراف شىركىتى بىلەن ھەمكارلاشقان. 1996 – يىلى 3 – ئايدا،«جۇڭگو ئۇچۇر بېتى» مال – مۈلۈكلىرىنى 600 مىڭ يۈەنگە سۇندۇرۇپ، %30 پاينى كونترول قىلغان، خاڭجۇ تېلگراف شىركىتى بىر مىليون 400 مىڭ يۈەن مەبلەغ سېلىپ %70 پاينى ئىگەللىگەن.    بىراق ئوزۇن ئۆتمەستىن، ئىككى تەرەپتە ئۆز – ئارا سۈركىلىش كۆرۈلگەن. مايۈننىڭ ئىستىراتىگىيىلىك نىشانى جۇڭگونىڭ «ياخو» سى بولۇش ئىدى، بۇنىڭ ئۈچۈن ئۇ بىر قاتار داڭلىق ماركا يارىتىش ئىستىراتىگىيىسىنى تۈزگەن، ئەمما خاڭجۇ تېلگراف شىركىتى پەقەتلا پۇل تېپىشقا كۈچەۋاتاتتى. بىر نەچچە ئايدىن كىيىن، ئىككى تەرەپنىڭ قارشى ئوخشاش بولمىغاچقا، ئۇلارنىڭ زىددىيىتى بارغانسىرى ئۆتكۈرلەشكەن، مايۈن ئوتتۇرىغا قويغان بارلىق تىجارەت ئۇسۇللىرى چوڭ پايچىك تەرىپىدىن ئىنكار قىلىنغان. بۇنى قوبۇل قىلالمىغان مايۈن ئىستىپا بەرمەكچى بولغان.    كىيىنكى ئىگىلىك تىكلەش داۋامىدا بەزىلەر ئۇنىڭغا مۇناسىۋەت تورىغا تايىنىپ مەبلەغ  توپلاش تەكلىپى بەرگەندە، ئۇ بىرلا ئېغىز جاۋاب بىلەن رەت قىلىپ مۇنداق دەيىتتى: «مۇناسىۋەتكە ئىشىنىشكە بولمايدۇ، دۇنيادا ئەڭ ئىشەنچىسىز نەرسە دەل مۇناسىۋەت. قىلىشقا تىگىشلىك ئىش بولسا خېرىدارلارنىڭ رازىمەنلىكى ۋە سەمىمىيلىكىنى قولغا كەلتۈرۈشتىن ئىبارەت.» نۇرغۇنلىغان ئىسسىق –سوغۇقلارنى باشتىن كەچۈرگەن مايۈننىڭ بۇ بىر جۈملە سۆزگە بولغان چۈشەنچىسى چوڭقۇر،ئۇنىڭ تەلەپپۇزىدىنلا بۇنى ھېس قىلالايمىز.    ھەقىقەتەن،ئەگەر ئىگىلىك تىكلىگۈچى بارلىق مەغلۇبىيەت ۋە غالبىيەتنى مۇناسىۋەت ۋە ھېسىياتقا باغلاپ چۈشەنسە، نورمال باشقۇرۇش تەرتىپى ۋە قانۇن – تەرتىپلەردىن ئايلىنىپ ئۆتۈپ كېتىشنى ئويلاپ، تۈزۈمنىڭ سىرتىدىكى مەلۇم بىر ئالاھىدە ھوقۇققا ئېرىشىشنى، ھەمدە بۇ ئارقىلىق مونوپول خاراكتېرلىك پۇرسەت ۋە پايدىغا ئېرىشىشنى ئويلايدۇ.ئەمەلىيەتتە، بۇنداق ئادەملەر ھەمىشە كارخانا قۇرۇشتىكى ئەڭ ئاساسى مەسئۇلىيەت قارىشى ۋە قىممەت قارىشىغا سەل قارىغان بولىدۇ، ئۇلار مۇناسىۋەتكە تايىنىپ ۋاقىتلىق غەلبىنى قولغا كەلتۈرگەن بولسىمۇ، بۇ غەلبە  ھەرگىزمۇ ئوزۇنغا بارمايدۇ.    ئىلگىرى توردا مۇنداق بىر گەپ مودا بولغان: 20 – ئەسىرنىڭ 80 – يىللىرىدا پۇل تېپىش تەلەيگە، 90 – يىللىرىدا مۇناسىۋەتكە، ھازىر بولسا چوقۇم بىلىم ۋە ئىقتىدارغا باغلىق. ھەقىقەتەن، مەلۇم مەنىدىن مۇناسىۋەت ئىگىلىك تىكلىگۈچىنىڭ مۇۋەپپەقىيەت قازىنىشىغا ياردەم بېرەلەيدۇ، بىراق مۇناسىۋەتكە ھەددىدىن زىيادە تايىنىۋالغاندا،ئىگىلىك تىكلىگۈچى ھامان مەغلۇب بولىدۇ، چۈنكى مۇناسىۋەت كارخانىنىڭ يادرولۇق رىقابەت كۈچى ئەمەس، ئۇ ھەر ۋاقىت يوقىلىپ كېتىشى مۇمكىن. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	تۆتىنچى دەرس ئىككىنچى پارگىراف سەمىمىيلىكنى پۇلغا، قۇرۇق گەپكە تېگىشمەسلىك كېرەك    بەزىلەر مۇنداق دىگەن: ئادەتتىكى مال ساتقۇچىلار مال ساتىدۇ، ئەقىللىق مال ساتقۇچىلار ئېھتىياج بەرپا قىلىدۇ، ئۇلۇغ مال ساتقۇچىلار سەمىمىيلىك ۋە مەسئۇليەتنى تىكلەيدۇ. مايۈن ھەقىقەتەن بىر ئۇلۇغ مال ساتقۇچى بولۇشقا مۇناسىپ. كىشىلەرگە «ئەلى بابا» نى تونۇتۇش ئۈچۈن، ئۇ نۇرغۇنلىغان سەييارە نۇتۇقلارنى سۆزلىگەن. بىراق ھەربىر قېتىملىق نۇتۇقتا ئۆزگەرمەيدىغان بىر مەزمۇن بولۇپ، ئۇ كىشىلەرگە توختىماستىن مۇنداق بىر قاراشنى تەشۋىق قىلغان:كارخانا قۇرۇشتا ئاۋال سەمىمىيلىك، مەسئۇليەتچانلىق بولۇشى كېرەك.    «جۇڭگودىكى غەلبە» پروگراممىسىدا، بىر ماھىر<< ئىناۋەت مۇلازىمىتى تورى قۇرۇپ،كارخانىچى – سودىگەرلەرنىڭ ئىناۋەت ئارخىپىنى تۇرغۇزۇپ چىقىش، پۈتۈن مەملىكەتتىكى ئۇچۇر مەركىزى ئارقىلىق سودىگەرلەرنىڭ خېرىدار تېپىشىغا ياردەم قىلىش، شۇنىڭ بىلەن بىر ۋاقىتتا، ئۇچۇرغا نىسبەتەن ئالماشتۇرۇش ئېلىپ بېرىپ، توردىكى مۇلازىمەتنى ھەر بىر سودىگەرگىچە يەتكۈزۈش >> تىن ئىبارەت بىر تۈرنى مۇسابىقىگە قاتناشتۇرغان.    بۇنىڭغا نىسبەتەن مايۈن مۇنداق باھا بەرگەن: «سەمىمىيلىك بىر خىل تىجارەت ئەمەس، ئۇ بىر <ئېتى ئۇلۇغ، سۇپرىسى قۇرۇق> نەزەرىيەمۇ ئەمەس، سەمىمىيلىك ئىش – ھەركەتتە بىردەك بولۇشنى، ھەر بىر ھالقىلارغا دىققەت قىلىشنى تەلەپ قىلىدۇ، سەمىمىيلىكنى پۇلغا،قۇرۇق گەپكە تېگىشىشكە بولمايدۇ.»    نۇرغۇنلىغان سودىگەرلەر باركى، ئېغىزىدا سەمىمىي بولۇشنى تەشەببۇس قىلسىمۇ، بىراق ئۆزىنىڭ مەنپەئەتى بىلەن زىددىيەتلىشىدىغان ئەھۋاللارغا ئۇچرىغاندا، سەمىمىيلىكنى بىرتەرەپكە قايرىپ قويىدۇ.    يېقىندا توردا ناھايىتى كەڭ تۈردە تارقىلىپ كەتكەن «داۋىنچى» ئائىلە جابدۇقلىرىنى ئېلىپ ئېيىتقاندا، «داۋىنچى» ئائىلە جابدۇقلىرى دۆلەت ئىچىدىكى تەسىرى ئەڭ كۈچلۈك ئائىلە جابدۇقلىرى ماركىسى بولۇپ، باھاسىنىڭ قىممەت بولۇشى بىلەن داڭق چىقارغان. ئۇ فەنجۇڭ شىيۇخۇا تەرىپىدىن بارلىققا كەلتۈرۈلۈپ، 11 يىللىق تەرەققىيات ئارقىلىق ئاسىيادىكى كۆلىمى ئەڭ چوڭ، ئەڭ ھەشەمەتلىك ئائىلە جابدۇقلىرى ۋاكالەتچىلىك شىركىتىگە ئايلانغان، ھەمدە كۆپ قېتىم «خۇرۈن مىليونىرلار ژۇرنىلى» تەرىپىدىن تارقىتىلغان«بايلارنىڭ ئەڭ ياختۇرۇشىغا ئېرىشكەن ئائىلە جابدۇقلىرى ماركىسى مۇكاپاتى» غائېرىشكەن.    2011 –يىلىغىچە، باش شىركەت بېيجىڭ، شاڭخەي، گۇاڭجۇ، شىنجىن، چېڭدۇ، چوڭچىڭ، خاڭجۇ،شاڭگاڭ قاتارلىق جايلاردا تارماق شىركەتلەرنى ۋە مەخسۇس سېتىش دۇكانلىرىنى تەسىس قىلغان، ۋاكالىتەن ساتىدىغان ئائىلە جابدۇقلىرىدىن «كابلىت»، «جېنباۋ»،«ھوللىنىي»، «ئامەن»، «فەنسىجى»، «فېند» ۋە «لەنبورگىن» قاتارلىق 100 دىن ئارتۇق ماركا بولۇپ، بۇلارنىڭ ھەممىسى ئائىلە جابدۇقلىرى دۇنياسىدىكى «خەلقئارالىق داڭلىق ماركا» لار ھېسابلىنىدۇ.    دۆلەت ئىچىدە، «داۋىنچى» ئائىلە جابدۇقلىرىدىن بىر يالغۇز كىشىلىك كارۋات 100 مىڭ يۈەندىن ئارتۇق پۇلغا ، بىر يۈرۈش سافا 300 مىڭ يۈەنگە سېتىلىدىغان بولۇپ، سېتىلىشى ئادەمنى ھەيران قالدۇرىدۇ. بۇ ئائىلە جابدۇقلىرىنىڭ ناھايىتى يۇقىرى باھاداسېتىلغانلىقى مەسىلىسىگە نىسبەتەن، «داۋىنچى» دىكى ساتقۇچى خادىملار بۇ ئائىلە جابدۇقلىرىنىڭ پۈتۈنلەي ئىتالىيەدە ئىشلەنگەنلىكىنى، «خەلقئارالىق ماركا» ئىكەنلىكىنى،ئىشلەتكەن خام ئەشيالارنىڭمۇ ھېچقانداق بۇلغانمىغان «تەبئىي خام ئەشيا»ئىكەنلىكىنى ئېيتىدۇ.    ھالبۇكى،كىشىلەر ئويلىمىغان يەردىن، 2011 – يىلى 7 – ئاينىڭ 10 – كۈنى، مەركىزى تېلېۋېزىيە ئىستانىسىسىنىڭ «ھەر ھەپتىلىك باھا دوكلاتى» دا «(داۋىنچى) نىڭ قىممەت باھالىق ئائىلە جابدۇقلىرى (چەتئەل ماركىسى) دىگەن نامدا ئوخشىتىپ ياسالغان»دىگەن خەۋەر بېرىلدى.    خەۋەردىن قارىغاندا، «داۋىنچى» شىركىتى سېتىۋاتقان بۇ قىممەت باھالىق ئائىلە جابدۇقلىرىنىڭ كۆپ قىسىملىرى ئىتالىيەدە ئىشلەپچىقىرىلمىغان ، ئىشلەتكەن خام ئەشيالارمۇ ئۇلاركۆككە ئۇچۇرغان قىممەت باھالىق، چىداملىق ماتېرىياللار ئەمەس ئىدى. تەكشۈرۈش جەريانىدا، ھەتتا بەزى «داۋىنچى» ئائىلە جابدۇقلىرى لاياقەتسىز بولۇپ باھالانغان.    دەل مۇشۇ سەۋەبلىك، «داۋىنچى» دىن ئىبارەت ئىلگىرى «ئائىلە جابدۇقلىرى بەيگىسىدە ئات چاپتۇرغان» چەۋەنداز يىقىلىپ چۈشكەن.    ئەمەلىيەت ئىسپاتلىدىكى،سەمىمىيلىك سىزگە نۇرغۇنلىغان ھوسۇل ۋە تەرەققىيات پۇرسىتى ئاتا قىلالايدۇ؛ قارىنى ئاق قىلىپ ئالدامچىلىق قىلىش پەقەت كارخانىنى يوقىلىشقا قاراپ يىتەكلەيدۇ، خالاس.    «بوشى» كۆزئەينەكلىرىنىڭ باش لېدىرى فەنچىن ئىلگىرىكى بىر قېتىملىق سۆھبەتتە مۇنداق دىگەن:«نۇرغۇنلىغان داڭلىق شىركەتلەردە سەمىمىيەتسىزلىك مەسىلىسى كېلىپ چىققانلىقىنى كۆرگەندە،بىر كارخانىچى بولۇش سۈپىتىم بىلەن، مەن ناھايىتى ئازاب ھېس قىلىمەن. ئەمەلىيەتتە كارخانىنىڭ ئۆسۈپ – يىتىلىشى ناھايىتى مۇشەققەتلىك، كارخانىچىمۇ بۇنىڭ ئۈچۈن نۇرغۇنلىغان بەدەل تۆلەيدۇ. بۇ خىلدىكى ئىشلارنىڭ كارخانىغا بولغان زەربىسى ناھايىتى قاتتىق بولۇپ، ئېھتىمال قايتا ئورنىدىن تۇرالماسلىقى مۇمكىن>>.    ھەقىقەتەن،ئەگەر بىر كارخانا سەمىمىيلىكنى ئۆزىگە ئەقىدە قىلىپ تىكلىمىسە، ئېنىق بولغان ئوزۇن مەزگىللىك تەرەققىيات پىلانى بولمىسا، پەقەت كۆز ئالدىدىكى مەنپەئەتنى قوغلاشسا، بۇنداق كارخانىنىڭ مەغلۇب بولۇشى مۇقەررەر، ئۇ پەقەت ئىگىلىك تىكلەش جەريانىدىكى كارخانىچىنىڭ تارتقان جاپاسى ۋە پۇلىنى بېكار قىلغان بىلەن باراۋەر،خالاس.    «ئەلى بابا»دا مايۈن ئىزچىل سەمىمىيلىكنى ئۆزلىرىگە مىزان قىلىشتا چىڭ تۇرۇپ كەلگەن. ئۇ ئۆزى خېرىدارلارغا سەمىمىي مۇلازىمەت قىلىپلا قالماستىن، يەنە خېرىدارلارنى سەمىمىيەت بىلەن تىجارەت قىلىشقا ئۈندەپ كەلگەن، ھەمدە «ئەلى بابا» دا «سەمىمىيەت ئۆتىڭى»،«تاۋباۋ» دا «ھەمىيان» قاتارلىقلارنى تەسىس قىلىپ ئىستىمالچىلارغا بولغان سەمىمىيەتنى كاپالەتلەندۈرگەن.    بۈگۈنكى كۈندە، «ھەمىيان» نۇرغۇنلىغان كەسىپلەردە زور نەتىجىلەرنى قولغا كەلتۈردى.< 51666 شەھەر ساياھىتى تورى>دۆلەت ئىچىدىكى ئەڭ چوڭ ئايروپىلان بېلىتى سېتىش سەھنىسى بولۇش سۈپىتى بىلەن،ئاللىقاچان «ھەمىيان» بىلەن ئومۇميۈزلۈك ھەمكارلىقنى قانات يايدۇرغان. مەبلەغ زەنجىرى ھاسىل قىلىش، بېلەت سېتىۋېلىشقا قولايلىق بولۇش، سودىگەرلەرنىڭ  مەبلىغىنىڭ ئېقىپ كەتمەسلىكىنى كاپالەتلەندۈرۈش ئۈچۈن، 51666 شەھەر ساياھىتى تورى ساياھەتچىلەرنى«ھەمىيان» غا كىرىشكە يىتەكلىگەن؛ جۇڭگودىكى ئەڭ چوڭ تور ئويۇنى سودىگەرلىرىدىن بىرى بولغان - «توققۇزىنچى شەھەر» مۇ ئاللىقاچان B2B,B2C ھەق تاپشۇرۇش كەسىپلىرىدە «ھەمىيان» ئىشلىتىشنى باشلىغان، ئۇنىڭ قارمىقىدىكى «غەلىتەدۇنيا» (بىر خىل ئويۇننىڭ ئىسمى) قاتارلىق كۆپلىگەن ئويۇنلارنىڭ ئوينىغۇچىلىرى«ھەمىيان» ئارقىلىق توردا قىممەت تولۇقلىسا بولىدۇ؛ دۆلەت ئىچىدىكى ئەڭ چوڭ B2B كارتىسى سېتىش سەھنىسى بولغان «كايى» مۇ «ھەمىيان» نىڭ رولىدىن تولۇق پايدىلىنىپ مال كىرگۈزۈش ۋە مال تەمىنلەش مەشغۇلاتلىرىنى ئېلىپ بارماقتا. مۇناسىۋەتلىك تەرەپنىڭ ئاشكارلىغان سانلىق مەلۇماتلىرىغا ئاساسلانغاندا، 2007 – يىلى 12 – ئاينىڭ 31 –كۈنىگىچە «ھەمىيان» غا تىزىملاتقان ئابونىتلارنىڭ سانى 62 مىليوندىن ئاشقان. پەقەت2007 – يىلىلا، «ھەمىيان» نىڭ پۇل تۆلەش مىقدارى 2006 – يىلى پۈتۈن مەملىكەتتىكى ئۈچىنچى تەرەپتىن پايدىلىنىپ ھەق تۆلىگەن كارخانا تورلىرىنىڭ ھەق تۆلەش يىغىندىسىغا تەڭ بولغان.    «ھەمىيان»جۇڭگودىكى ئۈچىنچى تەرەپ ھەق تۆلەش سۇپىسىدىكى سەركە بولۇش سۈپىتى بىلەن،ئاللىقاچان ئۈچىنچى تەرەپ ئېلېكترونلۇق ھەق تۆلەش سۇپىسىدىكى ئۈلگىگە ئايلاندى،يەنە «ھەمىياندىن پايدىلىنىپ تاۋباۋدا مال سېتىۋېلىش» شەكلى ئاللىقاچان بىر قىسىم ھەق تۆلەش كەسىپلىرىنىڭ ئۆلچىمىگە ئايلاندى.    «سەمىمىيەت بىر خىل تىجارەت ئەمەس، ئۇ ھەرگىز قۇرۇق گەپ ئەمەس، شۇڭا كىشىلەر چوقۇم ھەركىتى ئارقىلىق سەمىمىيلىكنى ئىسپاتلاش، ھەربىر ھالقىغا دىققەت قىلىش كېرەك!» بۇ مايۈننىڭ ئەقىليە سۆزى، يەنە بۈگۈنكى كۈندىكى بىر قىسىم كارخانىچىلارنىڭ تىجارەتتىكى ئۇل تېشى. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	تۆتىنچى دەرس ئۈچىنچى پارگىراف سەمىمىي بولغان كىشىلەر ئاۋال باي بولالايدۇ   جۇڭگونىڭ تەرەققىيات يۆنىلىشىنى بېكىتكەندە،دىڭ شاۋپىڭ بىر قىسىم كىشىلەرنىڭ ئالدىن باي بولىدىغانلىقىنى ئېيىتقان.ئەمەلىيەتتە، بۇ يەردە دېيىلىۋاتقان بىر قىسىم كىشىلەر دەل «سەمىمىيلىك بىلەن ئەمگەك قىلدىغان كىشىلەردۇر.» مايۈننىڭ ھېس قىلىشىچە، بۈگۈنكى سودا دۇنياسىدىكى نۇرغۇنلىغان ئوتتۇرا – كىچىك تىپتىكى كارخانىلاردا بىر يۈرۈش مۇكەممەل بولغان ئىناۋەت سېستىمىسى يوق، ئۇلارنىڭ ئەھۋالى بۈگۈن ياخشى بولسا، ئەتە ناچار. شۇنداق قىلىپ، بۇ مەسىلىنى ھەل قىلىش ئۈچۈن، «ئەلى بابا» پۇل تۆلەپ ئەزا بولۇش مۇلازىمىتىنى يولغا قويغان. مايۈن مۇنداق دىگەن: «بىز ھەربىر ھەق تۆلىگەن ئەزاغا توردىكى ئىناۋەت سېستىمىسىنى تۈزۈپ بېرىمىز. بىز كەلگۈسىدە (ئەلى بابا) نىڭ ئىناۋەت سېستىمىسىنى قۇرۇپ نۇرغۇنلىغان كارخانىلار بىلەن ھەمكارلىشىمىز.»    شۇنىڭ بىلەن بىر ۋاقىتتا، «ئەلى بابا» نىڭ «سەمىمىيەت ئۆتكىلى» مۇ بارلىققا كەلگەن. ئۇ بارلىققا كەلگەندىن كىيىن مايۈن شۇنداق دىگەن: «سەمىمىي كىشىلەر ئاۋال باي بولۇشى كېرەك.» نۇرغۇنلىغان كىشىلەر خېلى يىللاردىن كىيىن ئۇنىڭ يىراقنى كۆرەرلىكىنى ھېس قىلغان، بىراق ئەينى ۋاقىتتا بۇنىڭغا قىزىقىدىغانلار ئانچە كۆپ  ئەمەس ئىدى.    مايۈنگە نىسبەتەن ئېيىتقاندا، بۇ بىر خىل مۇشەققەتلىك ،ئىستىراتىگىيىلىك ئىلگىرلەش ئىدى.2001 – يىلىدىكى بىر قېتىملىق ئاخبارات ئېلان قىلىش يىغىنىدا مايۈن  ئازابلانغان  ھالدا مۇنداق دىگەن: «بىز سەمىمىيەت ئۆتكىلىنى ئاللىقاچان يولغا قۇيۇپ بولدۇق، بىز يەنە داۋاملىق شۇنداق قىلىمىز. بىز ئەزالارنىڭ ئازلاپ كېتىشىگە رازىكى، توردىكى ئىناۋەت سېستىمىسىنى بېكار قىلماي داۋاملىق يۈرگۈزىمىز. چۈنكى ھەقىقىي تور سودىسىغا جەزمەن ئىناۋەتلىك سودىگەرلەر كېرەك بولىدۇ. (ئەلى بابا)پۈتۈن دۇنيادىكى سودىگەرلەرنىڭ تور بېكىتى، بىزگە ھازىر سان ئەمەس، سۈپەت لازىم،سۈپەت بولماي قانچە كۆپ سان بولسىمۇ پايدىسى يوق.»    2001 – يىلى ۋېنجۇدىكى ئەزالار ئۇچرىشىش يىغىنىدا مايۈن يەنە مۇنداق دىگەن: «بىز كۆپچىلىككە شۇنداق دىيەلەيمىز، سىز مېنىڭ سۆزلىرىمگە قوشۇلمىسىڭىز ھېچقىسى يوق، بىز ھەممەيلەننىڭ بۇنىڭغا قوشۇلۇشىغا مۇھتاج ئەمەس، بىر قىسىم كىشىلەر بۇنىڭغا قوشۇلسىلا بولدى. بىر قىسىم كىشىلەرنى ئاۋال باي قىلىش ناھايىتى مۇھىم. مەن بېيجىڭ ئۇنىۋېرسىتىتىدا نۇتۇق سۆزلىگەندە نۇرغۇنلىغان كىشىلەر مېنىڭ كۆز – قارشىمغا قوشۇلغان، يەنە نۇرغۇنلىغان كىشىلەر بىزنى تەنقىدلىگەن. <ئەلى بابا> بىرەرتال  كومپيۇتېرمۇ سېتىۋالمايدىغان كارخانىلارغا مەڭگۈ ياردەم قىلمايدۇ. بىزنىڭ بۇنى ئومۇملاشتۇرۇش، ماسلاشتۇرۇش،ئاندىن ئۇلارغا قانداق قىلىشنى ئۆگىتىش مەجبۇريىتىمىز يوق... بىزنىڭ تەدبىرىمىز ھەرگىزمۇ تېخىمۇ كۆپ ئەزالارنى جۇغلاش ئەمەس، ئەكسىچە بىزنىڭ مۇلازىمىتىمىزنى ئىشلەتكەن ئەزالارغا تېخىمۇ ياخشى مۇلازىمەت قىلىش. بىز ئەزالارغا مەبلەغ سېلىشنى تېخىمۇ خالايمىز، ئەزالارنىڭ ئەھۋالى ياخشىلانسا، بىزنىڭمۇ ئەھۋالىمىز ياخشىلىنىدۇ، ئەزالار بولسا ئەڭ ياخشى تەشۋىقاتچى.»    گەرچە دەسلەپتە نۇرغۇنلىغان كىشىلەر بۇنىڭدىن گۇمانلانغان بولسىمۇ، بىراق ۋاقىتنىڭ ئۆتۈشىگە ئەگىشىپ نۇرغۇنلىغان كىشىلەر «سەمىمىيەت ئۆتكىلى» نىڭ ئەزالىرىغا ئايلانغان، بۇ مۇنازىرە تەلەپ قىلمايدىغان پاكىت.    «سەمىمىيەت ئۆتكىلى» بىر خىل يۇمشاق دېتال، تېخىمۇ مۇھىمى ئۇنىڭ شەكىلسىز قىممىتى، ئۇ ئىناۋەت خاتىرىسى ۋە باھاسىنى ئېلىپ يۈرىدۇ. شۇ سەۋەبتىن، «سەمىمىيەت ئۆتكىلى» بىر خىل ئىناۋەت باھالاش قۇرۇلمىسى، بىر خىل «ياخشىلارنى مۇكاپاتلايدىغان، يامانلارنى جازالايدىغان» قۇرۇلما. «ئەلى بابا» ئالدىنقى قاتارغا تىزىش ئۇسۇلى بۇيىچە باشقا خېرىدارلارغا تەۋسىيە قىلىش شەكلىنى قوللىنىپ، ئىناۋەت خاتىرىسى ياخشى بولغان ئابونىتلارنى ئىلھاملاندۇرىدۇ.    «سەمىمىيەت ئۆتكىلى» بىلەن سودا – سانائەت بانكىسى ۋە يەنە بىر نەچچە سودا تەكشۈرۈش ئورگانلىرى ھەمكارلىشىپ ئەزالارنىڭ ئىناۋىتىنى تەكشۈرىدۇ، بۇ خىل تەكشۈرۈش «ئەلىبابا» ئارقىلىق ئېلىپ بېرىلغان سودىدا كىشىلەرنى تېخىمۇ خاتىرجەم قىلىدۇ. شۇ سەۋەبتىن، «سەمىمىيەت ئۆتكىلى» ئەزالىرىنىڭ سودىدا پۈتۈشۈش نىسبىتى ئادەتتىكى ئەزالارنىڭكىدىن ئون ھەسسە يۇقىرى بولغان. ئۇنىڭدىن كىيىن، «ئەلى بابا» يەنە«سەمىمىيەت ئۆتكىلى» نىڭ ئېنگلىزچە نەشىرىنى چىقارغان، خېرىدارلارنىڭ بۇنىڭغا بولغان ئىنكاسى ناھايىتى ياخشى بولۇپ، ئىككى ھەپتىدە زاكاس 200 پارچىدىن ئاشقان.شۇ سەۋەبتىن، «سەمىمىيەت ئۆتكىلى» نىڭ قاپلاش دائىرىسى كېڭىيىپ، ئامېرىكا،سىنگاپور، ياپونىيە، كورىيە، كانادا ۋە گېرمانىيە قاتارلىق دۆلەتلەرگە كېڭەيگەن.    2002 – يىلى3 – ئاينىڭ 10 – كۈنى، «ئەلى بابا» دۆلەت ئىچىدە «سەمىمىيەت ئۆتكىلى» پىلانىنى ئومۇميۈزلۈك يولغا قويۇپ، تۇنجى بولۇپ كارخانىلار ئارسىدىكى ئىناۋەت سودا سېستىمىسىنى قۇرۇپ چىققان. بىراق ئىناۋەت قۇرۇلۇشى ئوزۇن مەزگىللىك پىلان قۇرۇلۇشى بولۇپ، ھەرگىزمۇ بىردەمدىلا بارلىققا كېلىدىغان جەريان ئەمەس ئىدى. جۇڭگو تور سودىسىدىكى بىخەتەرلىك مەسىلىسى ئاللىقاچان تور سودىسىنىڭ تەرەققىياتىنى چەكلەيدىغان ئامىلغا ئايلانغان بولۇپ، تور سودىسىنىڭ مەسىلىسىنى ھەل قىلىش ئۈچۈن، ئاۋال تور سودىسىدىكى ھەق تۆلەش ھالقىسىنى ياخشىلاش كېرەك ئىدى.    2005 –يىلىغا كەلگەندە، مايۈن «تاۋباۋ» «ھەمىيان» نى ئوتتۇرىغا چىقارغاندا، كىشىلەربۇنىڭغىمۇ گۇمان نەزىرى بىلەن قارىغان. بىراق، مايۈن ناھايىتى قاپ يۈرەكلىك بىلەن جۇڭگو تور سودىسىغا مۇنداق بىر بىشارەت بەرگەن: «2005 – يىلى جۇڭگو تور سودىسىدىكى بىخەتەر ھەق تۆلەش يىلى بولىدۇ. تور سودىسى ئاۋال بىخەتەر بولۇشى كېرەك،بىخەتەرلىك كاپالىتى بولمىغان تور سودا مۇھىتىدا ھەقىقىي سەمىمىيلىك ۋە ئىناۋەتتىن گەپ ئاچقىلى بولمايدۇ. بۇ مەسىلىنى ھەل قىلىش ئۈچۈن چوقۇم ھەق تۆلەش ھالقىسىدىن ئىش باشلاش، بۇنى تۈپتىن ھەل قىلىش كېرەك. ھەق تۆلەش مەسىلىسىنى ھەل قىلمىغانداھەقىقىي مەنىدىكى تور سودىسىدىن ئېغىز ئاچقىلى بولمايدۇ.»    مايۈننىڭ قارىشىچە، بىر شىركەتكە نىسبەتەن خېرىدارلارنىڭ گۇمانىغا قانداق يۈزلىنىش بىرئىستىراتىگىيىلىك مەسىلە، بۇ مەسىلىنى ھەل قىلىشتا چوقۇم ئالاقە ماھارىتى بولۇشى،ئۈنۈملۈك ھەل قىلىش ئۇسۇلى بولۇشى كېرەك. مايۈن ئوتتۇرىغا چىقارغان «سەمىمىيەت ئۆتكىلى» ۋە «ھەمىيان» دەل بۇ مەسىلىنى ئۈنۈملۈك ھەل قىلدىغان قورال.    ئۇ مۇنداق دىگەن: «ئۈچ يىل بۇرۇن، كىشىلەر <سەمىمىيەت ئۆتكىلى> نىڭ غەلبە قازىنىشى مۇمكىن ئەمەس دىگەن، بىراق ئۈچ يىلدىن كىيىن بىز ئازراق نەتىجىنى قولغا كەلتۈردۇق. بىزنىڭ مەسئۇليىتىمىز دەل سەمىمىي سودىگەرلەرنى ئاۋال باي قىلىش، <سەمىمىيەت ئۆتكىلى>دەل مۇشۇنداق سودىگەرلەرگە مۇلازىمەت قىلىدۇ. مېنىڭچە، پەقەت تېخىمۇ كۆپ خىېرىدارلارنى باراۋەر بازار قۇرۇلمىسى بىلەن تەمىنلىگەندە، ئاندىن سەمىمىي سودىگەرلەرنى ئاۋال باي قىلغىلى بولىدۇ. پەقەت خېرىدارلار مۇۋەپپەقىيەت قازانسىلا،بىز ئاندىن غەلبە قىلالايمىز. ئۈچ يىلدىن بۇيان، بىز ئىزچىل ئېلان ئىشلىمىدۇق، بىز سەمىمىيەتتىن ئىبارەت بۇ ئېلاننى ئۆزىمىزنىڭ خېرىدارلىرىمىزغا قالدۇردۇق. بۇخىل ئۇسۇلنىڭ ئىجتىمائىي ئۈنۈمى ناھايىتى يۇقىرى بولىدۇ، چۈنكى بىز پۇل تېپىپلا قالماستىن، يەنە جەمئىيەتكە مەسئۇل بولۇشىمىز كېرەك.»    2005 –يىلى، مايۈن تورداشلارنىڭ سۇئالىغا جاۋاب بەرگەندە مۇنداق دىگەن: «بىز <ھەميان>نى بارلىققا كەلتۈرگەن بۇ مەزگىلدە كۈنلۈك كىرىمىمىز ئاللىقاچان نەچچە مىليونغا يەتتى. بۇنچىلىك كۆپ پۇل ھېساۋاتقا كىرگەن ئىكەن، بۇ ئۇنى ئومۇميۈزلۈك ئىشلىتىدىغان ۋاقىتنىڭ كەلگەنلىكىدىن دېرەك بېرىدۇ.»    «ھەميان»سودا قىلۋاتقان ئىككى تەرەپكە ئەڭ يۇقىرى چەكتە كاپالەت بېرىپ، ئۇلارنىڭ سوداخىيىم – خەتىرىنى ئازايتىدۇ. سېتىۋالغۇچى تەرەپ مالنى قوبۇل قىلغاندىن كىيىن ساتقۇچى تەرەپ ئاندىن پۇل ئالالىغاچقا، سېتىۋالغۇچى تېخىمۇ خاتىرجەم بولىدۇ، ھەمدە ئالدىنىپ قالىدىغان ئىش يۈز بەرمەيدۇ؛ ساتقۇچى تەرەپكە نىسبەتەن ئېيىتقاندا،«ھەمىيان» ئىشلەتكەن ساتقۇچىلار سېتىۋالغۇچىلارنىڭ ئىشەنچىسىگە تېخىمۇ ئېرىشەلەيدۇ، ئوبوروت مەبلىغىنى ئېلىشمۇ تور ئارقىلىق ئېلىپ بېرىلغاچقا، پەقەت مائوس ئارقىلىقلا سودا قىلغىلى بولىدۇ، بانكىغا بېرىپ ھېساۋاتنى سۈرۈشتۈرۈپ ئولتۇرۇشنىڭمۇ ھاجىتى قالمايدۇ، بۇنىڭدا ھېساۋاتنى باشقۇرۇشمۇ ناھايىتى ئاسانلىشىدۇ.    «تاۋباۋ»تورىدىكى تاۋارلارنىڭ %70 تىدە «ھەميان» ئىشلىتىش تەلەپ قىلىنىدۇ، ھەمدە يۇقىرى سوممىلىق سودىلارنىڭ ھەممىسى «ھەميان» ئارقىلىق ئېلىپ بېرىلىدۇ. مۇناسىۋەتلىك خادىملارنىڭ ئاشكارلىشىچە، جۇخەي ۋە شاڭخەيدىكى ئابونتلار «ھەميان» ئارقىلىق قىممىتى 500 مىڭ يۈەنلىك مەرۋايىت سودىسى قىلغان؛ شيامىندىكى يەنە بىر ئابونت«ھەميان» ئارقىلىق «تاۋباۋ» تورىدىن 300 مىڭ يۈەندىن ئارتۇق قىممەتتىكى «بېك»ماركىلىق دالا ماشىنىسى سېتىۋالغان؛ «ھەميان» ناھايىتى قولايلىق بولغاچقا، ياقا يۇرتلاردىن ئۆي ئىجارە ئالغان كىشىلەر «ھەميان» ئارقىلىق ئۆي ئىجارىسى تاپشۇرغان.    ئۇنىڭدىن باشقا، «ھەميان» يەنە «تولۇق سوممىلىق تۆلەم» تۈزۈمىنى يولغا قويغان، يەنى«ھەميان» نى ئىشلىتىپ ئالدامچىلىققا ئۇچرىغان ئابونتلارغا زىينى تولۇقلىنىپ بېرىلدىغان بولغان.بۇ دۆلەت ئىچىدىكى تور سودىسىدا ئىلگىرى كۆرۈلۈپ باقمىغان ئەھۋال ئىدى.    مايۈن ئىزچىل سەمىمىيلىكنى تەكىتلەپ كەلگەن. «ھەميان» ئوتتۇرىغا چىققاندىن كىيىن،مايۈننىڭ ئەڭ چوڭ ئۈمىدى -توردا سودىلىشىش مەسىلىسىنى ئامېرىكىغا ئوخشاش ياخشى ھەل قىلىش. ئۇ يەنە «ھەميان» نىڭ بۇنداق مەسئۇليەتنى ئۈستىگە ئالالىشىنى، جۇڭگو تورسودىسىدا بىخەتەر سودىنى تولۇق ئەمەلگە ئاشۇرالىشىنى ئۈمىد قىلغان. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

چىمەن.70

	بۇ تېمىنى ئەجەپ تەستە تاپتىما. تېما ئىگىسى  تېما توللاشتىن توختاپ قالمىسىڭىز.

WWW.UYHQT.COM

	تۆتىنچى دەرس تۆتىنچى پارگىراف مەيلى قانداق كارخانا بولۇشتىن قەتئىي نەزەر باج تاپشۇرۇش كېرەك    ئىگىلىك يارىتىشنىڭ دەسلەپكى قەدىمىدە،ئىقتىسادىي ئەھۋالنىڭ ياخشى بولۇپ كېتىشى ناتايىن. بۇنداق ۋاقىتلاردا بەزى كىشىلەرباج ئوغرىلاش، باجدىن ئۆزىنى قاچۇرۇش ئارقىلىق چىقىمنى تېجىمەكچى بولىدۇ. ئومۇمەن ئېيىتقاندا بۇنداق كىشىلەرگە نىسبەتەن  بۈگۈن ئۆتسىلا ھېساب، كۈنى ئۆتسىلا بولىدۇ، ئۇلار ھەرگىزمۇ كارخانىنىڭ ئوزۇن مەزگىللىك تەرەققىياتى توغرۇلۇق باش قاتۇرۇپ ئولتۇرمايدۇ.    يەنە بەزىلەر ھەمىشە پۇلنى كۆپ تاپالمايۋاتقاندەك ھېس قىلىپ، باج ئوغرىلاش، باجدىن قېچىش قاتارلىق ئۇسۇللار بىلەن كىرىمىنى ئاشۇرماقچى بولىدۇ. ھالبۇكى ماقال –تەمسىللەردە ناھايىتى توغرا ئېيتىلغان: دائىم دەريا بويىدا ماڭغاندا ئاياغ قانداقمۇ ھۆل بولمىسۇن؟ مەيلى پىلان قانچە ئەتراپلىق بولسۇن، قوللانغان ئۇسۇل قانچە تېخنىكىلىق بولسۇن، ئۇلار ھامان قانۇن تورىدىن قېچىپ قۇتۇلالمايدۇ.ئاخىرىدا، كارخانىغا ھېچقانداق پايدا ئېلىپ كىلەلمەيلا قالماستىن، ئەكسىچە كارخانىنىڭ دەپنە مۇراسىمىنى ئۆتكۈزۈپ قويىدۇ، خالاس.    «ئەلى بابا»دا، مايۈن باج تاپشۇرۇشنىڭ كارخانىغا بولغان مۇھىملىقىنى قايتا – قايتا تەكىتلىگەن. بۇنىڭغا نىسبەتەن، ئۇ «ئەلى بابا» مۇنبېرىدە كۆز – قارىشىنى   مۇنداق بايان قىلغان: «دۇنيادا پەقەت ئىككى ئىشتىن ئۆزىنى قاچۇرغىلى بولمايدۇ، ئۇلار باج تاپشۇرۇش ۋە ئۆلۈمدىن ئىبارەت>>.مايۈن مۇنداق دىگەن: «(ئەلى بابا) نىڭ مۇۋەپپەقىيەت قازىنىشىدىكى سەۋەب ئۇنىڭ قانۇن بۇيىچە باج تاپشۇرغانلىقىدا. بۇ جايدا مەن ئىگىلىك تىكلىگۈچىلەرنى شۇنداق ئاگاھلاندۇرۇپ قويماقچى: قانۇن بۇيىچە باج تاپشۇرۇش كارخانىنىڭ مەجبۇريىتى، باجنى چوقۇم تولۇق تاپشۇرۇش كېرەك، شۇندىلا سىزنىڭ كارخانىڭىز ئاندىن تەرەققىي قىلالايدۇ، ئۇنداق بولمايدىكەن، كارخانا چوقۇم ۋەيران بولىدۇ.»    مايۈن باج ئوغرىلاش ۋە باجدىن قېچىشقا ئادەتلىنىپ قالغان ئىگىلىك تىكلىگۈچىلەرنى تەنقىدلەپ مۇنداق دىگەن: «باج ئوغرىلاش ۋە باجدىن قېچىش كارخانىغا نىسبەتەن نومۇس، پەقەت باج تاپشۇرۇشنى كارخانىنىڭ مەجبۇريىتى ۋە مەسئۇليىتى قاتارىدا كۆرۈشلا يىراققا نەزەرتاشلىغانلىقنىڭ ئىپادىسى.» ئەگەر بىر كارخانا باج تاپشۇرماي دۆلەتكە بولغان مەسئۇليىتىدىن قاچسا، ئۇنداقتا، كىشىلەر چوقۇم بۇ كارخانىنىڭ خېرىدارلارغا بولغان سەمىمىيىتىدىن گۇمان قىلىدۇ. باج تاپشۇرۇش كارخانىنىڭ تىجارەت نەتىجىسى ۋە ئەمەلىي كۈچىنىڭ ئىپادىسى. باج تاپشۇرۇشتا ئاكتىپ بولغان كارخانىلار ئىستىمالچىلارنىڭ قەلبىدە دۆلەت قانۇنىغا رىئايە قىلدىغان، سەمىمىي بولغان ئوبرازىنى تىكلىيەلەيدۇ –دە، ئىستىمالچىلار سىز بىلەن سودا قىلىشنى خالايدۇ، بۇنداق بولغاندا پايدىمۇ كۆپىيىپ تىجارەت روناق تاپىدۇ. ئەگەر بىر كارخانا باج تاپشۇرۇشتا بوشاڭلىق قىلسا،باجنى ئارقىغا سۈرسە جەزمەن باشقىلارغا ئىشەنچىسىز تەسىر بېرىدۇ – دە، ئوبرازى خۇنۇكلىشىدۇ، ئىستىمالچىلار بۇنداق كارخانىغا سوغۇق مۇئامىلە قىلىپلا قالماستىن،يەنە بانكىدىن قەرز ئېلىشمۇ تەسكە توختايدۇ.    ئەمەلىيەت ئىسپاتلىدىكى، بىر ئەقىللىق كارخانىچى ھەرگىزمۇ باج تاپشۇرۇشتا ئېرىنچەكلىك قىلمايدۇ، ئەكسىچە ۋاقتىدا باج تاپشۇرۇش ئارقىلىق ئۆزىنى يۈكسەلدۈرۈپ، ياخشى ئوبراز يارىتىپ كارخانىنى تېخىمۇ تەرەققىي قىلدۇرىدۇ.    ئامېرىكا كارخانا ئاخباراتى شىركىتىنىڭ خەۋىرىگە ئاساسلانغاندا، 2005 – يىلى بىر يىلدىلا،«ئەلى بابا» 254 مىليون 800 مىڭ يۈەن باج تاپشۇرۇپ، تۇنجى قېتىم تاپشۇرغان بېجى100 مىليوندىن ئاشىدىغان كارخانىلار قاتارىغا ئۆتكەن. بىر يىلنى 250 خىزمەت كۈنى بۇيىچە ھېسابلىغاندا، «ئەلى بابا» 2004 – يىلى ئوتتۇرىغا قويغان «2005 – يىللىق كۈنلۈك باجنى بىر مىليونغا يەتكۈزۈش» نىشانىغا يەتكەن.    تاراتقۇمۇ خبېرلىرى بۇنىڭ ئۈچۈن مايۈننى زىيارەت قىلغاندا، مايۈن مۇنداق دىگەن: <<قانۇن بۇيىچە باج تاپشۇرۇش كارخانا ۋە پۇقرالارنىڭ باش تارتىپ بولمايدىغان مەجبۇريىتى.كارخانىغا نىسبەتەن ئېيىتقاندا، باج تاپشۇرۇش ئۇنىڭ دۆلەت ۋە جەمئىيەت ئۈچۈن قىممەت ياراتقانلىقىنىڭ ئىپادىسى، يەنە كېلىپ ئۆزىنىڭ نەتىجىسىگە بولغان جەزملەشتۈرۈش بولۇپ ھېسابلىنىدۇ>>. ھازىرقى كارخانىلارنىڭ باج تاپشۇرۇش ئېڭى بارغانسىرى ئۆسمەكتە. «ئەلى بابا» 2004 – يىلى كۈندە بىر مىليون باج تاپشۇرۇشنى كارخانىنىڭ كەلگۈسىدىكى بىر قانچە يىللىق تىجارەت نىشانى قىلغان، ھەمدە ئۆزىگە مۇنداق ۋەزىپە بەلگىلىگەن – كۈندىلىك باج سوممىسى بىر مىليونغا يەتمىسە، بۇ جەمئىيەتكە نىسبەتەن ھېچقانداق تۆھپە قوشمىغانلىقىنى ئىپادىلەيدۇ.    ھەممەيلەن بىلىدۇكى، كارخانا تاپشۇرغان باجغا قاراپ بىر كارخانىنىڭ سەمىمىيلىكىنى ۋە ئەمەلىي كۈچىنى كۆرگىلى بولىدۇ، «ئەلى بابا» ھازىر پۈتۈن يەر شارىدىكى ئەڭ چوڭ، ئەڭ پائالىيەتچان بولغان تور بازىرى ۋە سودىگەرلەر سەھنىسى، كارخانا ۋە سودىگەرلەردىنب ولغان ئەزالىرى پۈتۈن يەر شارىدىكى 200 نەچچە دۆلەت ۋە رايونغا تارقالغان.    ھالبۇكى،ئادەمنى ئەپسۇسلاندۇردىغىنى، نۇرغۇنلىغان كارخانىچىلاردا دەل بۇنىڭ ئەكسىچە بولغان ئوي بار، يەنى ئۇلار ئامال قىلىپ باجدىن ئۆزىنى قاچۇرۇشنى ئويلايدۇ، دۆلەتنىڭ باج قانۇنىغا سەل قارايدۇ، باج تاپشۇرۇش ئېڭى تۆۋەن، باج يىغقۇچى خادىملار بىلەن «مۆكۈ– مۈكۈلەڭ» ئويناپ، باج يىغىشقا قىيىنچىلىق تۇغدۇرىدۇ. بۇ خىلدىكى ئىگىلىك تىكلىگۈچىلەرنىڭ ئاساسلىق ئىدىيىسى بولسا، باج دۆلەتنىڭ، ئوغرىلغىلى بولسىلا ئوغرىلاش، قاچقىلى بولسىلا قېچىش كېرەك. ئۇلار ھوقۇق بىلەن مەجبۇرىيەتنى قارشى ئورۇنغا قويىدۇ، بۇ ناھايىتى خاتا ئىدىيە.    باج ئوغرىلاش ۋە باجدىن قېچىش دۆلىتىمىزدە ناھايىتى ئېغىر، مايۈن بۇنىڭغا قارىتا ناھايىتى ئازابلىنىدۇ. ھەقىقەتەن، يېقىنقى يىللاردىن بۇيان دۆلىتىمىزنىڭ ھەر قايسى جايلىرىدىكى باج ئورگانلىرىنىڭ تەكشۈرۈپ بايقىشىچە، كارخانىنىڭ قانۇنىي ۋەكىلى مالىيە خادىمىغا يالغان ھېساب قىلدۇرۇش ئارقىلىق باج ئوغرىلاش ۋە باجدىن قېچىش قىلمىشلىرى ناھايىتى كۆپەيگەن، بۇ سەۋەبتىن قانۇننىڭ جازاسىغا ئۇچرىغان كىشىلەرمۇ ناھايىتى كۆپ بولۇپ، بۇلارنىڭ ئىچىدە شەخسىي ئىگىلىكتىكى كارخانىلار كۆپ سانلىقنى ئىگىلىگەن.   گۇمانلانغىلى بولمايدۇكى، باج ئوغرىلاش ۋە باجدىن قېچىش بىر كارخانىغا نىسبەتەن نومۇس، چۈنكى قائىدە بۇيىچە دۆلەتكە باج تاپشۇرۇش، باج ئوغرىلىماسلىق ۋەباجدىن قاچماسلىق بولسا كارخانىنىڭ ئىجتىمائىي مەسئۇليەتچانلىقىنى نامايەن قىلىدىغان بىردىنبىر يول. ئىجتىمائىي مەسئۇليەتچانلىقتىن ئىبارەت بۇ مەسىلىگە نىسبەتەن، مايۈن مۇنداق دىگەن: «نۆۋەتتە نۇرغۇنلىغان كارخانىچىلار كارخانىنىڭ ئىجتىمائىي مەسئۇليىتىگە قارىتا ئورتاق تونۇشقا كەلگەن، كارخانىنىڭ ئىجتىمائىي مەسئۇليىتى ھەرگىزمۇ تېلېۋىزوردا نەق مەيداندا پۇل ئىئانە قىلىپ ئۆزىنى كۆرسىتىش ئەمەس، ئەڭ مۇھىم بولغان تەرەپ بولسا ئۆزىنىڭ كارخانىسىنى ياخشى باشقۇرۇش، ھەمدە قائىدە بۇيىچە دۆلەتكە باج تاپشۇرۇش، باج ئوغرىلىماسلىق ۋە باجدىن ئۆزىنى قاچۇرماسلىق.»   ئەمەلىيەتتە، كارخانا مۇۋاپىق ھالدا باجدىن ساقلانسا ۋە باجنى تېجىسە بولىدۇ، بىراق ئۇنىڭ ئالدىنقى شەرتى قانۇنغا خىلاپلىق قىلماسلىق كېرەك. چۈنكى بىرئادەم ئاۋال ئىجتىمائىي ئادەم، شۇڭا ئىجتىمائىي مەسئۇليەتنى مۇھىم ئورۇنغا قويۇش كېرەك؛ ئۇنىڭ ئۈستىگە، قانۇن بۇيىچە باج تاپشۇرغان ئادەم ھەمىشە خېرىدارلارنىڭ ئىشەنچىسىگە ئېرىشەلەيدۇ.    مايۈن يەنەمۇنداق قارىغان، دۆلىتىمىزنىڭ باج يىغىش مۇھىتى ئۆزگىرىۋاتىدۇ، ئەگەر يەنە كونا قاراش بۇيىچە باجغا مۇئامىلە قىلساق، ئۇنداقتا ساۋاق تېخىمۇ ئېچىنىشلىق بولۇشى مۇمكىن. يېڭىدىن قۇرۇلغان كارخانىلار چوقۇم ساختا ھېساب ئويدۇردىغان خىيالىدىن ۋازكېچىشى، باج يىغىش سىياسىتىدىن ئۈنۈملۈك پايدىلىنىپ، قانۇن بۇيىچە تىجارەت قىلىشى كېرەك، شۇندىلا كارخانا داۋاملىق تىجارەت قىلدىغان كاپالەتكە ئىگە بولىدۇ. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	تۆتىنچى دەرس بەشىنچى پارگىراف مەھسۇلات ۋە مۇلازىمەت جەمئىيەتكە زىيانلىق بولسا، تىجارەت ناھايىتى مۇۋەپپەقىيەتلىك بولغان تەقدىردىمۇ قىلماسلىق كېرەك   مايۈن ئېنتىرنىت ساھەسىگە ئەمدىلا قەدەم باسقاندا مۇنداق دىگەن: «ئاچلىقتىن ئۆلسەممۇ تور ئويۇنلىرى بىلەن شۇغۇللانمايمەن.»ئۇ بالىلارنىڭ ھەممىسى ئويۇنچۇق ئوينىسا دۆلەتنىڭ كەلگۈسى قانداق بولىدۇ؟ دەپ ئويلىغان. ئەمما تور سودىسى ئۇنىڭغا ئوخشىمايىتتى، ئۇ جۇڭگودىكى ئوتتۇرا – كىچىككارخانىلارغا ياردەملىشىپ توردىكى ئالاقە سەھنىسىنى قۇرۇپ بېرەتتى، ھەمدە بىرقىسىم كىشىلەرنىڭ ئىشقا ئورۇنلىشىش مەسىلىسىنى ھەل قىلىشقا ياردەم بېرەتتى. شۇسەۋەبتىن، مايۈن تور سودىسى كەسپىنى تاللىغان.    مايۈننىڭ قارىشىچە، سودا قىلىشتا پۇل تېپىشقىلا كۆڭۈل بۆلۈشكە بولمايدۇ، ئىجتىمائىي مەسئۇليەت چوقۇم كارخانىنىڭ يادرولۇق قىممەت قارىشى سىستېمىسى ۋە تىجارەت شەكلىگە كىرگۈزۈلۈشى كېرەك، شۇنداق بولغاندىلا مەۋجۇتلۇقنى ئوزۇن ساقلىغىلى بولىدۇ.باشقىچە ئېيىتقاندا، بىر كارخانىنىڭ مەھسۇلاتى ۋە مۇلازىمىتى چوقۇم جەمئىيەتكەمەسئۇل بولۇشنى ئالدىنقى شەرت قىلىش كېرەك. مەھسۇلات ۋە مۇلازىمەت جەمئىيەتكە زىيانلىق بولسا، تىجارەت ناھايىتى مۇۋەپپەقىيەتلىك بولغان تەغدىردىمۇ قىلماسلىق كېرەك.   ئەمەلىيەتتە، «كارخانىچىلارنىڭ ئىجتىمائىي مەسئۇليىتى» ئىزچىل پۈتۈن يەرشارى خاراكتېرلىك قىزىق نۇقتىلارنىڭ بىرى بولۇپ كەلدى. يېقىنقى بىر – ئىككى يىلدىن بۇيان، دۆلەت ئىچىدىكى كارخانىلارمۇ «ئىجتىمائىي مەسئۇليەت» ئۇقۇمىنى كارخانىچىلارنى باھالاش سىستېمىسىدىكى بىر يادرولۇق كۆرسەتكۈچ قىلماقتا. ئەمما، نېمىنىڭ«ئىجتىمائىي مەسئۇليەت» ئىكەنلىكىگە قارىتا ئىزچىل كۆز – قاراشلاردا پەرق ساقلانماقتا. بەزى كارخانىچىلار ئىجتىمائىي مەسئۇليەتنى خەير – ساخاۋەت، پۇل ئىئانە قىلىش قاتارلىق تاشقى پائالىيەتلەرگە باغلاپ قويىدۇ؛ بەزىلەر ئۇنى كارخانىچىلارنىڭ ئەخلاق ساپاسىنىڭ سۇبيېكتىپ ئۆلچىمى قىلىپ چۈشەندۈرىدۇ.    بۇنىڭغا نىسبەتەن، مايۈن پۈتۈنلەي ئوخشىمايدىغان ئېنىقلىما بېرىپ مۇنداق دىگەن:«ئىجتىمائىي مەسئۇليەت ھەرگىزمۇ بىر قۇرۇق ئۇقۇم بولۇپ قالماسلىقى كېرەك، يەنە ئاددى ھالدا خەير – ساخاۋەت، پۇل ئىئانە قىلىش قاتارلىقلار بىلەن چەكلىنىپ قالماسلىقى كېرەك، ئۇ ئەكسىچە كارخانىنىڭ قىممەت قارىشى، ئادەم ئىشلىتىش تۈزىمى،تىجارەت شەكلى قاتارلىقلار بىلەن زىچ مۇناسىۋەتلىك بولىدۇ. نۇرغۇنلىغان كىشىلەركارخانا نۇرغۇن پۇل تاپالايدۇ دەپ ئويلايدۇ، بىراق بۇ <ئەلى بابا> نىڭ نىشانى بولغان ئەمەس. خىزمەتچىلەرگە كۆڭۈللۈك خىزمەت پۇرسىتى يارىتىپ بېرىش،خېرىدارلارنى رازى قىلىش، جەمئىيەتكە ئۆزىنىڭ مەۋجۇتلۇق قىممىتىنى ھېس قىلدۇرۇش قاتارلىقلارلا <ئەلى بابا> نىڭ ئىجتىمائىي مەسئۇليىتى، پۇل تېپىش ۋە جەمئىيەتتىن قايتۇرۇپ ئېلىش بولسا كىيىنكى ئىشلار.»    مايۈن شۇنىڭغا چوڭقۇر ئىشىنىدۇكى، تور سودىسى چوقۇم جەمئىيەتنى ئۆزگەرتەلەيدۇ، بۇنىڭدىكى پۇل تېپىش ئويۇنى بولسا ھەرقانداق جەمئىيەت ئويناپ بولالمايدىغان ساغلام ئويۇن،شۇڭا «ئەلى بابا» نىڭ مەھسۇلاتى ۋە مۇلازىمىتى چوقۇم ئوتتۇرا – كىچىك كارخانىلارنىڭ ياخشى كۆرۈشىگە ئېرىشەلەيدۇ. دەل مۇشۇ سەۋەبتىن، «ئەلى بابا» ئوچۇق– ئاشكارە شۇنداق دىگەن: «ئەلى بابا» نىڭ پۇلىسى ھەرقانچە كۆپ بولسىمۇ تورئويۇنلىرىغا مەبلەغ سالمايدۇ. شۇڭا ئۇلار «جۇڭگو ياخو» نى سېتىۋالغاندىن كىيىن،گەرچە نۇرغۇن پۇل تاپقىلى بولسىمۇ، ئەمما ناھايىتى قالايمىقان بولغان قىسقا ئۇچۇر كەسپىنى ئەمەلدىن قالدۇرۋەتكەن.    مايۈننىڭ قارىشىچە، <كارخانىدا ئۈچ خىل ۋەكىللىك قىلىش >بولىدۇ، بىرىنچىسى،خېرىدارنىڭ مەنپەئەتىگە ۋەكىللىك قىلىدۇ، ئىككىنچىسى، خىزمەتچىلەرنىڭ مەنپەئەتىگە ۋەكىللىك قىلىدۇ، ئۈچىنچىسى بولسا پايچېكلارنىڭ مەنپەئەتىگە ۋەكىللىك قىلىدۇ.خېرىدار بىرىنچى، خىزمەتچىلەر ئىككىنچى، پايچېكلار ئۈچىنچى ئورۇندا تۇرۇشتىن ئىبارەت  بۇنداق تەرتىپنى ئالماشتۇرۇپ قويۇشقا بولمايدۇ.    شۇ سەۋەبتىن، مايۈن خىزمەتچىلەرگە ناھايىتى ئەستايىدىل مۇئامىلە قىلىدۇ، ئۇ ئەزەلدىن خىزمەتچىلەرنىڭ تۇرمۇشىغا ئەستايىدىل مۇئامىلە قىلىشىنى، ئۇلارنىڭ كۆڭۈللۈك خىزمەت مۇھىتىغا ئىگە بولۇشى كېرەكلىكىنى تەكىتلەپ كەلگەن. مايۈننىڭ قارىشىچە،خىزمەتچىلەرنىڭ خىزمەت قىلىش نىشانى قانائەتلىنەرلىك مائاش ۋە بىر ياخشى خىزمەت مۇھىتىنى ئۆز ئىچىگە ئېلىپلا قالماستىن، يەنە كارخانىدا كۆڭۈللۈك خىزمەت قىلىشنىمۇ ئۆز ئىچىگە ئالىدۇ. ئەمەلىيەتتە، مايۈن ئىلگىرى سۆزلىگەن لېكسىيەلىرىدە نۇرغۇن قېتىم تەكىتلەپ، «ئەلى بابا» نىڭ ئەڭ چوڭ بايلىقىنىڭ «ئەلى بابالىقلار» ئىكەنلىكىنى، كۆڭۈللۈك خىزمەت قىلالماسلىقنىڭ ئۆزىگە بولغان مەسئۇليەتسىزلىك ئىكەنلىكىنى ئېيىتقان.    <<ئەلىبابا>> ھەر يىلى ئاز دىگەندە %20 لىك زېھىن ۋە مالىيە كۈچىنى خىزمەتچىلەرنىڭ ئىشخانا مۇھىتىنى ياخشىلاش ۋە خىزمەتچىلەرنى تەربيلەشكە سەرپ قىلىدۇ. «ئەلى بابا»كادىرلار ئىشلىرى بۆلۈمىنىڭ مەسئۇلى چېن لىرۇ مۇنداق دىگەن: «(ئەلى بابا)خىزمەتچىلەرنىڭ خىزمەت ۋاقتىغا قارىتا قاتتىق يوخلىما تۈزۈمى ئورناتمىغان، پەقەت خىزمەتچىلەر خىزمەت ۋەزىپىسىنى ۋاقتىدا تاماملىسىلا ئىشقا چىقىش – چۈشۈشنى ئۆزلىرى بەلگىلسە بولىدۇ. ئېلېكترونلۇق سودىدا تەتقىقات خاراكتېرلىك خىزمەت كۆپ بولغاچقا،خىزمەتچىلەر دائىم جىددىيچىلىك ھالىتىدە تۇرىدۇ. ئالىيراق خىزمەت مۇھىتى بىلەن تەمىنلىگەندە، خىزمەتچىلەرنىڭ كۆڭلى ئارام تېپىپ، كۆڭۈللۈك خىزمەت قىلالايدۇ.»    بۇ ئېھتىمال ئادەتتىكى كارخانىلاردا ئىختىساسلىقلارنىڭ ئېقىپ كېتىش نىسبىتى %10 دىن %15 بولسا،«ئەلى بابا» نىڭ نەچچە يىللىق ئىختىساسلىقلارنىڭ ئېقىپ كېتىش نىسبىتىنىڭ %3.3بولۇشىنىڭ سەۋەبى بولسا كېرەك.    ئەلۋەتتە،ئۇنىڭدىن باشقا مايۈن يەنە مۇنداق دىگەن: كىرىم ۋە غايىنىڭ ھەر ئىككىلىسى بولۇشى ۋە چىڭ تۇتۇلۇشى كېرەك، پەقەت كىرىمنىلا تەكىتلىگەندە، باشقىلار چوقۇم سىزنىڭ خىزمەتچىلىرىڭىزنى تارتىپ كېتىدۇ؛ پەقەت غايىنىلا سۆزلىگەندە، دەسلەپتە بۇنىڭ ئۈنۈمى بولىدۇ، بىراق كىيىن كۆپچىلىكنىڭ قورسىقى ئاچقاندا قۇرۇق گەپنىڭ لازىمى بولمايدۇ – دە، ئۇلار يەنىلا سىزدىن ئايرىلىشى مۇمكىن. شۇنىڭ ئۈچۈن، سىز غايىدىن ئەمەليەتكىچە بولغان جەرياندا خىزمەتچىلەرنىڭ كىرىمىنىڭ ھەر يىلى يۇقىرىلاپ مېڭىشىغا كاپالەتلىك قىلىشىڭىز كېرەك.   خىزمەتچىلەرنىڭ تەمىناتى جەھەتتە، 2007 – يىلى «ئەلى بابا» نىڭ پايچېكى بازارغاسېلىنغاندىن كىيىن مىڭلىغان خىزمەتچىلىرىنىڭ سېتىش قىممىتى مىليوندىن ئاشقان.مۇناسىۋەتلىك كىشىلەرنىڭ ئاشكارلىشىچە، ئەسلىدە مايۈن «ئەلى بابا» نىڭ پايچېكىنى بازارغاسېلىپ مەبلەغ يىغىشقا ئالدىرىمىغان، ئەمما ئاخىرىدا پايچىكىنى شاڭگاڭدا بازارغا سېلىشتىكى ئەڭ چوڭ سەۋەب بولسا خىزمەتچىلەرگە جاۋاب قايتۇرۇش، شىركەتنىڭ خىزمەتچىلەرگە بەرگەن ۋەدىسىنى ئەمەلگە ئاشۇرۇش ئىدى. «ئەلى بابا» پايچېكىنى بازارغا سالغاندىن كىيىن، تەخمىنەن 4900 نەپەر خىزمەتچى پايچېكىگە ئىگە بولغان، ھەمدە كۆپ قىسىملىرى بىر كېچىنىڭ ئىچىدىلا مىليونېرغا ئايلانغان.    شىركەتنىڭ باشقۇرۇش قاتلىمىدىكى 18 نەپەر قۇرغۇچى ۋە 100 دىن ئارتۇق مېھمان «ئەلى بابا» نىڭ پايچېكىنى بازارغا سېلىش مۇراسىمىغا قاتناشقان، شىركەتنىڭ باش ئىش بېجىرگۈچىسى ۋېيجى مۇنداق دىگەن: «بىزنىڭ شاڭگاڭدا پايچېكىنى بازارغا سېلىشىمىز شىركىتىمىزگە نىسبەتەن دەۋر بۆلگۈچ ئەھمىيەتكە ئىگە ئىش. (ئەلى بابا) 1999 – يىلى قۇرۇلغان، ئۇنىڭ نىشانى ئېنتىرنىت تورى ئارقىلىق پۈتۈن دۇنيادىكى ئوتتۇرا – كىچىك كارخانىلارنىڭ كەسپلىرىنى تەرەققىي قىلدۇرۇش. بۈگۈن بىز ئاللىقاچان پايچېكى بازارغا سېلىنغان شىركەتكە ئايلاندۇق، بىراق بىزنىڭ نىشانىمىز يەنىلا ئۆزگەرمەيدۇ. بىز پايچېكىنى بازارغا سېلىشنىڭ بىزگە ئېلىپ كەلگەن بايلىق ۋە ماركا بىلىشچانلىقى ئارقىلىق ئەزالار رايونىمىزنى كېڭەيتىپ، ئەزالار ئۈچۈن تېخىمۇ كۆپ قىممەت يارىتىمىز.»    كەلگۈسى نىشان توغرۇلۇق گەپ بولغاندا، مايۈن يەنە «ئەلى بابا» نىڭ 10 يىللىق خاتىرىلەش مۇراسىمىدە سۆزلىگەن سۆزلىرىنى تەكرارلاپ مۇنداق دىگەن: «بىرىنچى، بىز پۈتۈن يەرشارىدىكى ئون مىليون كىچىك تىپتىكى كارخانىلارنى ھايات قېلىش، ئۆسۈپ يىتىلىش ۋە تەرەققىيات سەھنىسى بىلەن تەمىنلەپ بېرىشنى ئۈمىد قىلىمىز؛ ئىككىنچى، بىز پۈتۈن يەر شارىدىكى 100 مىليون ئادەمنىڭ ئىشقا ئورۇنلىشىش مەسىلىسىنى ھەل قىلىشنى ئۈمىد قىلىمىز؛ ئۈچىنچى، بىز پۈتۈن يەر شارىدا بىر مىليارىد ئىستىمالچى يىتىشتۈرۈپ چىقىشنى، ھەمدە ئۇلارنىڭ ئىستىمالى ئۈچۈن مۇلازىمەت قىلىشنى ئۈمىد قىلىمىز.»    شۇنداق دىيىشكە بولىدۇكى، ئۇ كارخانىنىڭ تەغدىرى، قىممەت قارىشى قاتلىمىدا رەھبەرلىك رولىنى جارى قىلدۇرغان، ھەرگىزمۇ ئاددى ھالدا خىزمەتچىلەرنى نىشاننى ئەمەلگە ئاشۇرۇشقا، پايدا ئېلىشقا يىتەكلىمىگەن. مايۈننىڭ تەسىرى ئاستىدا، «ئەلى بابا» نىڭ ئىگىلىك يارىتىش كوللىكتىپى مايۈن بىلەن ھەمنەپەس بولۇپ، «ئەلى بابا» نى جۇڭگودىكى ئەڭ ياخشى كارخانا قىلىپ قۇرۇپ چىقىش ئۈچۈن تىرىشماقتا. B2B (كارخانىنىڭ كارخانىلار بىلەن بولغان تىجارەت مۇناسىۋىتى) شەكلى مىڭلىغان ئوتتۇرا – كىچىك كارخانىلارنى ۋاقىت، بوشلۇقنىڭ چەكلىمىسىدىن قۇتۇلدۇرۇپ چىقىپ، ئۇلارنى ئاددى ۋە قوللىنىشچان بولغان كەسپلەر زەنجىرىدىن خېرىدار تېپىش شارائىتىغا ئىگە قىلغان. ئۇلار بۇ ئارقىلىق ئۆزىنىڭ تەغدىرىنى ئۆزگەرتىپلا قالماستىن، يەنە جۇڭگودىكى ئوتتۇرا – كىچىك كارخانىلارنىڭ خەلقئارادىكى ئىناۋىتىنى ئۆستۈرگەن، يەنە «ئەلى بابا» نىڭ ئەڭ چوڭ ئېلېكترونلۇق سودا كارخانىسىغا ئايلىنىشىنى ئىلگىرى سۈرگەن. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام