مايۈننىڭ ئىگىلىك تىكلەش دەرىسخانىسى

WWW.UYHQT.COM

	تۆتىنچى دەرس ئالتىنچى پارگىراف كارخانا نېمە ئۈچۈن مەۋجۇت بولۇپ تۇرىشى كېرەك؟ ئۆز بۇرچىنى ئادا قىلىش ئۈچۈن! 2001 – يىلى، مايۈن نيويوركتا كېلېنتون ئەر –ئايالنىڭ ناشتىلىقىغا تەكلىپ قىلىنغان. ناشتىلىقتا كېلېنتون مۇنداق دىگەن:<<مەيلى ئىقتىساد، سىياسەت ۋە ھەربىي ئىشلار جەھەتتە بولسۇن، ئامېرىكا دۇنيادا بىرىنچى ئورۇندا تۇرىدۇ، ئۇنى تەقلىد قىلغىلى ۋە ئۈلگە ئالغىلى بولمايدۇ>>.ئامېرىكىنىڭ نېمىگە تايىنىپ دۇنيادا بىرىنچى ئورۇندا تۇرىۋاتقانلىق مەسىلىسىگە قارىتا، كېلېنتون بۇرچ تۇيغۇسىنىڭ ئامېرىكىنى ئالغا يىتەكلەپ كېتىۋاتقانلىقىنى ئېيىتقان.    بۇ سۆزلەرنىڭ مايۈنگە بولغان تەسىرى ناھايىتى چوڭقۇر بولغان. ئۇنىڭ قارىشىچە،جۇڭگودىكى ئېنتىرنىت تورى شىركەتلىرى «ياخو»، «ئامېرىكا تورى»، «ئامازون» ۋە «ئەلىبابا» نى تەقلىد قىلسا بولاتتى، بىراق «ئەلى بابا» كىمنى تەقلىد قىلىشى كېرەك؟«بىردىنبىر» بولىمىز دىگەن شىركەت باشقىلارنىڭ كۆچۈرۈلمىسى بولۇپ قالسا بولمايىتتى، شۇڭا «ئەلى بابا»  بۇرچ تۇيغۇسىنى ئۆزىگە ھەمراھ قىلىپ مېڭىشنى قارار قىلغان ئىدى.    ئۇنىڭدىن كىيىن، مايۈن شىركەتنىڭ بۇرچ تۇيغۇسىنى تېخىمۇ ئېنىقلاشتۇرغان، يەنى «دۇنيادا قىلغىلى بولمايدىغان تىجارەت يوق!» دىگەن بىر جۈملە سۆزگە يىغىنچاقلىغان. بۇ بۇرچ تۇيغۇسىنىڭ يىتەكچىلىكىدە «ئەلى بابا» ئۆزىگە خاس بولغان قىممەت قارىشىنى تىكلىگەن. «ئەلى بابا» دا، قىممەت قاراش ھەممىنى بەلگىلەيدىغان ئۆلچەم، ئۇلار قانداق خىزمەتچىنى قوبۇل قىلىش، خىزمەتچىلەرنى قانداق تەربىيلەش، خىزمەتچىلەرنى قانداق سىناش ۋە خېرىدارلارغا قانداق مۇلازىمەت قىلىش قاتارلىقلاردا مۇشۇ ئۆلچەمنى ئاساس قىلغان.    مايۈن مۇنداق دىگەن: «بىز <دۇنيادا قىلغىلى بولمايدىغان تىجارەت يوق!> دىگەن قاراشنى ئوتتۇرىغا قويغاندىن كىيىن، بۇنى <ئەلى بابا> نىڭ ھەر قانداق مۇلازىمەت ۋە مەھسۇلاتنى ئوتتۇرىغا چىقىرىشىدىكى بىردىنبىر ئۆلچەم قىلدۇق. بىزنىڭ ئېنژىنىرلىرىمىز ۋە مەھسۇلات لايىھەلىگۈچىلىرىمىز بىزنىڭ مەھسۇلاتلىرىمىزنى ناھايىتى ئاددى ، خېرىدارلىرىمىز تېخىمۇ ئاسان مەشغۇلات قىلالايدىغان قىلىپ لايىھەلەيدۇ، بىز ئاۋارە بولدىغان ئىشلارنى ئۆزىمىزگە قالدۇردۇق، بۇ دەل بۇرچ تۇيغۇسىنىڭ قوزغىتىشىدىن كەلگەن.»    باشقىلارنىڭ«ئەينى ۋاقىتتا، (ئەلى بابا) نېمىشقا باشقىلار قوبۇل قىلغان پۇل تېپىش شەكلىنى تاللىماي، تور سودىسىنى تاللىغان؟» دىگەن سۇئالىغا قارىتا، مايۈننىڭ جاۋابى مۇنداق بولغان: «پەقەت تور سودىسىلا جۇڭگونىڭ كەلگۈسىدىكى ئىقتىسادىنى ئۆزگەرتەلەيدۇ، مەن شۇنىڭغا چوڭقۇر ئىشىنىمەنكى، كىشىلەر ئۇچۇر ئىگىلىكى دەۋرىگە كىرگەندىن كىيىن،جۇڭگونىڭ دۇنيادىكى بىرىنچى ئورۇندا تۇردىغان دۆلەتكە ئايلىنالىشى تامامەن مۇمكىن.مەيلى سىياسىي، ئىقتىساد، ھەربىي ئىشلار ۋە مەدەنىيەت جەھەتتە بولسۇن، ھەممىسىدە شۇنداق.    <ئەلىبابا> يېڭىدىن قۇرۇلغاندا مەن دەپ ئۆتكەن، بىز جۇڭگونىڭ WTO (دۇنيا سودا تەشكىلاتى) كىرەلەيدىغانلىقىغا ئىشىنىمىز. جۇڭگونىڭ ئۇچقاندەك تەرەققىي قىلىشى ئوتتۇرا – كىچىك تىپتىكى كارخانىلارنىڭ تەرەققىياتىنى ئاساس قىلغان، بىز تور تېخنىكىسى ئارقىلىق ئۇلارنى قوراللاندۇرۇپ، ئۇلارنىڭ ۋە ئۆزىمىزنىڭ تەرەققىي قىلىشىغا شارائىت ھازىرلايمىز. <ئەلى بابا> نىڭ بۇرچى دەل جاھاندىكى ھەممە تىجارەتنى ئاسانلاشتۇرۇش، خېرىدارلارغا پۇل تېپىش پۇرسىتى يارىتىپ بېرىش، ئۇلارنىڭ پۇل ئىقتىساد قىلىشى ۋە خىزمەتچىلىرىنى باشقۇرۇشىغا ياردەم قىلىش.»    شۇنداق، بىر شىركەتنىڭ بۇرچ تۇيغۇسى ۋە قىممەت قارىشى ھەمىشە پۈتكۈل كوللىكتىپنىڭ ئۇيۇشۇشچانلىقىنى ئاشۇرالايدۇ، ھەمدە بۇ كوللىكتىپنى بەلگىلەنگەن يۆنىلىشكە قاراپ توختىماستىن ئالغا ئىلگىرلىتەلەيدۇ.    مايۈن يەنە مۇنداق دىگەن: «بىزنىڭ خىزمەتچىلىرىمىز 11 دۆلەت ۋە رايوندىن كەلگەن، ئۇلارنىڭ مەدەنىيەت ئارقا كۆرۈنۈشى ئوخشىمايدۇ، ئورتاق قىممەت قارىشى بىزنى ئىتىپاقلاشتۇرۇپ، بۈگۈنگىچە كۆرەش قىلىشىمىزغا تۈرتكە بولغان. بىز تەكلىپ قىلغان CEO (باش ئىش بېجىرگۈچى) ئاللىقاچان 53 ياشقا كىردى، ئۇ ئەنئەنىۋى كارخانىلاردا مەسئۇل بولۇپ ئىشلىگەن بولغاچقا  ناھايىتى ئۆزگىچە خاسلىققا ئىگە، ئۇ ئامېرىكا (ھەممىباب)ئېلېكتىر شىركىتىدە 16 يىل خىزمەت قىلغان. بىز ئۆزىمىزگە خاس توققۇز خىل قائىدىنى خۇلاسىلىدۇق، ئۇ بىزنىڭ 4 يىل كۈرەش قىلىشىمىزغا تۈرتكە بولدى. بىز بارلىق خىزمەتچىلەرنىڭ بۇ توققۇز خىل قائىدىگە ئەگىشىشىنى تەلەپ قىلىمىز: بىرىنچىسى،  كوللىكتىۋىزىملىق روھ، ئىككىنچىسى، ئۆز – ئارائۆگىنىش، ئاندىن سۈپەت، قولاي بولۇش، قايناق ھېسىيات، يېڭىلىق يارىتىش، كۆڭۈل قويۇش، مۇلازىمەت ۋە ھۆرمەت. بۇ توققۇز خىل قىممەت قارىشى <ئەلى بابا> دىكى ئەڭ پۇلغا يارايدىغان نەرسىلەر.»    2000 –يىلىدىن باشلاپ، يېڭى خىزمەتچىلەر ھەممىسى ئۆگىنىشكە قاتنىشىپ، پەقەت «ئەلى بابا»نىڭ قىممەت قارىشىنى پۈتۈنلەي قوبۇل قىلالايدىغان ۋە بۇرچ تۇيغۇسىغا ئىگە خىزمەتچىلەرلا«ئەلى بابا» غا رەسمىي كىرەلەيدىغان بولغان. مايۈن مۇنداق دىگەن: «بۇرچ، قىممەت قاراش، نىشان قاتارلىقلار ھەرقانداق كارخانا ۋە ئورگانلاردا بولۇشقا تىگىشلىك نەرسىلەر، ئەگەر بۇ ئۈچى بولمىسا سىز يىراققا ماڭالمايسىز.»    GE (ھەممىباب شىركىتى) نىڭ لامپۇچكىدىن ئىش باشلاشتىكى نىشانى پۈتۈن دۇنيانى «يورۇتۇش» ئۈچۈن بولغان؛ «دېسنى» شىركىتى ئىزچىل پۈتۈن دۇنيانى خۇشاللىققا تولدۇرۇشنى ئۆزىگە نىشان قىلغان؛ «تويوتا» پۈتۈن دۇنياغا ھۆرمەتنىڭ نېمىلىكىنى بىلدۈرۈشنى ئۆزىگە بۇرچ قىلغان؛ «ئەلى بابا» ئەزەلدىن ئۆزىنىڭ «دۇنيادا قىلغىلى بولمايدىغان تىجارەت يوق!» دىگەن بۇرچىنى ئۇنتۇپ قالمىغان. شۇڭا ئۇلار قانداق ئىش قىلىشتىن قەتئىينەزەر بۇ خىل بۇرچ تۇيغۇسى بۇيىچە قىلغان، بۇ قائىدىگە خىلاپ بولغان ھەرقانداق ئىشنى قىلمىغان.    2003 –يىلى، «ئەلى بابا» نىڭ B2Bتىجارەت شەكلىدىكى تەرەققىياتى ناھايىتى تىز بولغان. ھالبۇكى، داۋاملىق قانداق مېڭىشقا نىسبەتەن، مايۈن «ئېزىپ قېلىش» قا باشلىغان. چۈنكى، سىز بىرىنچى ئورۇندا تۇرغان ۋاقتىڭىزدا دائىم قايسى يۆنىلىشكە قاراپ مېڭىشنى بىلمەيسىز، ئىككىنچى،ئۈچىنچى ئورۇندىكىلەر بىرىنچى بولغانغا ئەگشىدۇ، بىراق بىرىنچى بولغان كارخانا ئەگىشىدىغان ئۈلگە يوق ئىدى. بۇ ۋاقىتتىكى مايۈن كۈچلۈك بۇرچ تۇيغۇسىغا ئاساسەن«ئەلى بابا» نى داۋاملىق تەرەققىي قىلىشقا يىتەكلەيدىغان بىر قاتار قارارلارنى چىقارغان.    2004 –يىلى، «ئەلى بابا» شىركەتنىڭ نىشانىنى يېڭىدىن بەلگىلىگەن: بىرىنچى، 102 يىللىق تارىخى بار شىركەت بولۇشقا تىرىشىش؛ ئىككىنچى، دۇنيادىكى ئون چوڭ تور بېكىتىنىڭ بىرى بولۇش؛ ئۈچىنچى، ھەربىر سودىگەرنى «ئەلى بابا» دا سودا قىلىشقا جەلپ قىلىش.    مايۈن يەنەمۇنداق خىتاب قىلغان: بىز ھەربىر قارارنى چىقىرىشتىن بۇرۇن، قانداق قىلغانداخېرىدارلارنىڭ مەنپەئەتىنى ئەڭ يۇقىرى چەكتە يۇقىرى كۆتۈرگىلى بولىدىغانلىقىنى ئويلىشىمىز.    2007 –يىلى، «ئەلى بابا» نىڭ پايچېكى بازارغا چىقىشتىن بۇرۇن، مايۈن يەنە پايچېكىنى بازارغا سېلىش ئارقىلىق تور سودىگەرلىرىنى باي قىلىشنى ئۈمىد قىلغان، بۇمۇ «ئەلى بابا» نىڭ ۋەزىپىلىرىدىن بىرى.    دەل«دۇنيادا قىلغىلى بولمايدىغان تىجارەت يوق!» دىگەن بۇرچ تۇيغۇسى بولغاچقا، «ئەلىبابا» خېرىدارلارنىڭ ھۆرمىتىگە ئېرىشكەن. «ئەلى بابا» دىن ئىبارەت بۇ سەھنە ئوتتۇرا – كىچىك كارخانىلارنىڭ مەسىلىسىنى ھەل قىلىپلا قالماستىن، يەنە جەمئىيەت ئۈچۈن نۇرغۇنلىغان ئىشقا ئورۇنلىشىش پۇرسىتىنى يارىتىپ بەرگەن.    بۇنىڭغا نىسبەتەن، مايۈن خۇلاسىلاپ مۇنداق دىگەن: «بىز ئوتتۇرا – كىچىك كارخانىلارغاھەقىقىي پۇل تېپىش پۇرسىتى يارىتىپ بېرىشىمىز، ئۇلارغا تېخىمۇ كۆپ ئىزباسار تەربىيلەپ بېرىشىمىز كېرەك. بىزنىڭ دۆلىتىمىزدە بىر مىليارد 300 مىليون نوپۇس بار،20 يىلدىن كىيىن نۇرغۇنلىغان كىشىلەر ھەرخىل سەۋەبلەر تۈپەيلىدىن ئىشسىز قېلىشى مۇمكىن، مەن تور سودىسىنىڭ تېخىمۇ كۆپ كىشىلەر ئۈچۈن ئىشقا ئورۇنلىشىش پۇرسىتى يارىتىپ بېرىشىنى ئۈمىد قىلىمەن. ئىشقا ئورۇنلىشىش پۇرسىتى بولسا، جەمئىيەت مۇقىم بولىدۇ،ئائىلە تىنچ – ئامان بولىدۇ، ھەمدە تەرەققىياتمۇ بولىدۇ.»    كارخانىنىڭ بۇرچ تۇيغۇسى بولسا كارخانا ئۈستىگە ئالغان ۋەزىپە ئارقىلىق بارلىققا كەلگەن بىرخىل قوزغاتقۇچ كۈچ، بۇرچ -ئىش قىلىشتىكى ئەڭ چوڭقۇر قاتلاملىق نىشان. بۇ نۇقتىنى چىقىش قىلغان مايۈن مۇنداق دىگەن: «ھەربىر كارخانا ئىجتىمائىي مەسئۇليەتنى ئۈستىگە ئېلىشى، ھەمدە بۇ مەسئۇليەتنى كارخانىنىڭ خىزمىتىگە سىڭدۈرۈشى كېرەك. كارخانىنىڭ بۇرچ تۇيغۇسى ئورتاق ئىدىيە، ئۇيۇشۇش، ئورتاق ھەركەت، ئۈنۈمنى يۇقىرى كۆتۈرۈش،ئوبوروت تەننەرخىنى ئازايتىش، خىزمەتچىلەرنىڭ ئاكتىپلىقىنى قوزغاش قاتارلىقلارغا ئىگە بولۇپلا قالماستىن، ئۇ يەنە كارخانىنىڭ قان – تومۇرى، ئاساسى ۋە ئىستىلى.»    2007 –يىلىنىڭ بېشىدا، «ئەلى بابا» پايچېكىنى بازارغا سالغاندىن كىيىن، مايۈن يەنە 30مىليون چىقىرىپ چەتئەل بازارلىرىغا مەبلەغ سالغان. ئۇ شۇنداق كۆرسەتكەن: «ئەلىبابا» B2B كەسپىنى تەرەققىي قىلدۇرۇش ئارقىلىق جۇڭگودىكى  ياساش بىلەن شۇغۇللىنىدىغان، ئەمما پايدىسى ئاز بولۇپ، چەتئەللەردە تىجارەت قىلىشقا ئەمەلىي كۈچى يەتمەيدىغان ئوتتۇرا – كىچىك كارخانىلارغا تەننەرخى  تۆۋەن ۋە تېخىمۇ يۇقىرى ئۈنۈملۈك بولغان سودا سەھنىسى ھازىرلاپ بېرىدۇ. بۇ قارار دەل «دۇنيادا قىلغىلى بولمايدىغان سودا يوق!»دىن ئىبارەت بۇرچنى چىقىش نۇقتىسى قىلغان، مايۈن بۇ خىل بۇرچ تۇيغۇسىدا چىڭ تۇرغاچقا، «ئەلى بابا» داۋاملىق ئالغا قاراپ تەرەققىي قىلغان. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	بەشىنچى دەرس پەقەت ئىزچىل داۋاملىشىدىغان قىزغىنلىق بولغاندىلا ئاندىن پۇل تاپقىلى بولىدۇ بەشىنچى دەرس بىرىنچى پارىگىراف قىزغىنلىق-ئىگىلىك تىكلىگۈچىلەرنىڭ ئەڭ مۇھىم ئامىلى ھەربىر ئىگىلىك ياراتقۇچى ئىگىلىك يارىتىش جەريانىدىكى قاتمۇ – قات توسالغۇلارنى، قەدەم ئېلىشنىڭ ناھايىتى تەسلىكىنى بىلىدۇ، ئەگەر سىزدە ئىگىلىك يارىتىشقا بولغان ئازراقمۇ قىزغىنلىق بولمىسا، ئۇنداقتا سىزنىڭ بۇ قىيىنچىلىق ئۈستىدىن غالپ كېلەلىشىڭىز، ئاخىرىغىچە داۋاملشتۇرالىشىڭىز ناتايىن. ئەكسىچە سىزدە ئىگىلىك يارىتىشقا بولغان كۈچلۈك قىزغىنلىق بولسا سىز ھەر قانداق قىيىنچىلىقلارغا بەرداشلىق بېرەلەيسىز. بۇ نۇقتىغا نىسبەتەن، «ئەلى بابا» نىڭ قۇرغۇچىسى مايۈننىڭ تەسىراتى ناھايىتى چوڭقۇر. 1999 –يىلى، «ئەلى بابا» نۇرغۇنلىغان كىشىلەر تەرىپىدىن تېخى بىلىنىپ قوبۇل قىلىنمىغان ۋاقىتتا، مايۈن ئۆزىنىڭ ھەمراھلىرىغا مۇنداق دىگەن: «بىز چوقۇم 80 يىللىق تارىخقا ئىگە بىر شىركەت قۇرۇشىمىز، پۈتۈن يەر شارىدىكى ئالدىنقى ئون تور بېكەتنىڭ بىرى بولۇشىمىز كېرەك.» دەل مۇشۇ ۋاقىتتا، ئىلگىرى شىۋېتسىيە Wallenberg جەمەتىنىڭ ئاساسلىق مەبلەغ سېلىش شىركىتى بولغان InvestorAB نىڭ مۇئاۋىن لېدىرى بولغان ساچوڭشىن«ئەلى بابا» غا مەبلەغ سېلىش مەخسىدىدە مايۈن بىلەن كۈرۈشكەن. بىر نەچچە قېتىملىق ئۇچرىشىشتىن كىيىن، ساچوڭشىن مايۈننىڭ ئىدىيىسى ۋە قىزغىنلىقىغا مەھلىيا بولۇپ قالغان. ئۇ شۇ ۋاقىتتىلا 750 مىڭ ئامېرىكا دوللىرىلىق يىللىق ئىش ھەققىدىن ۋازكېچىپ، «ئەلى بابا» غا كېلىپ 500 يۈەن ئايلىق ئىش ھەققى ئېلىپ ئىشلەشنى قارارقىلغان. مايۈننىڭ قىزغىنلىقى ئۇنىڭ قىيىنچىلىقلارنى يېڭىشىگە تۈرتكە بولۇپلا قالماستىن، يەنە ئۇنىڭ بىلەن ئۇچراشقان ھەربىر ئادەمنى تەسىرلەندۈرۈپ جەلپ قىلغان.    كىيىن،مايۈن قىزغىنلىقىنى تېخىمۇ جارى قىلدۇرۇپ مۇنداق جاكارلىغان: «بىز چوقۇم 102يىللىق تارىخى بار شىركەتكە ئايلىنىشىمىز، پۈتۈن يەر شارىدىكى تور بەتلەرنىڭ ئالدىنقى ئۈچىنىڭ بىرى بولۇشىمىز كېرەك››. مايۈننىڭ بارلىق خىياللىرى ئۇنىڭ ئەنە شۇنداق قىزغىنلىقىنى پىلتە قىلغان. مايۈندە مانا مۇشۇنداق  ئالاھىدىلىك بولغاچقا، رۇەنيىن گورۇھىنىڭ باش مۇدىرى سۈن جېڭيى مەبلەغ سېلىش ئوبيېكتىنى تاللىغاندا، پەقەت ئىككى مىنوت ۋاقىت سەرپ قىلىپلا «ئەلى بابا»بىلەن ھەمكارلىشىپ 20 مىليونلۇق مەبلەغنى بىرلەشتۈرۈشنى قارار قىلغان.    سۈنجېڭيىنىڭ رۇەنيىن شىركىتى ھەريىلى 700 دىن كۆپرەك شىركەتنىڭ مەبلەغ سېلىش ئىلتىماسىنى تاپشۇرۋالىدىغان بولۇپ، بۇ شىركەتلەرنىڭ %10 لا، يەنى 70ئەتراپىدىكى شىركەتلا مەبلەغقە ئېرىشەلەيىتتى، ئەمما بۇلارنىڭ ئىچىدىكى پەقەت ‹‹ئەلى بابا›› دىن ئىبارەت بىرسىگىلا سۈن جېڭيى ئۆزى بېرىپ كۆرۈشكەن. «ئەلى بابا» قىسقىغىنە ئالتە مېنۇتتا سۈن جېڭيىنى مەبلەغ سېلىش قارارى چىقارغۇزغان، ئۇ‹‹ مايۈننىڭ ئىگىلىك يارىتىش قىزغىنلىقى ۋە رەھبەرلىك سەنئىتى مېنى ئۆزىگە جەلپ قىلىۋالدى›› دىگەن. سۈنجېڭيى ھەر قېتىم مايۈننى كۆرگەندە مۇنداق دەيدۇ: «مايۈن، ئۆزىڭىزگە خاس سالاپىتىڭىزنى ساقلاڭ، بۇ مېنىڭ سىز ئۈچۈن مەبلەغ سېلىشىمدىكى ئەڭ مۇھىم سەۋەب.»    مايۈن ھەقىقەتەن ناھايىتى قىزغىن ئادەم، مايۈننى بىۋاستە كۆرگەن ياكى تېلېۋېزوردا كۆرگەن كىشىلەرمۇ مايۈننىڭ قىزغىنلىقىنىڭ تەسىرىگە ئۇچرايدۇ. ئەمەلىيەتتە، مايۈننىڭ غايەت زور مۇۋەپپەقىيىتى ئۇنىڭ قىزغىنلىقىدىن كەلگەن. ئەنە شۇنداق ئىگىلىك يارىتىش قىزغىنلىقى بولغاچقا، مايۈن شۇغۇللانغىلى ئالتە يىل بولغان ئوقۇتقۇچىلىق كەسپىدىن خوشلىشىپ ‹سودا دېڭىزىغا كىرىش ›نى قارار قىلغان؛ يەنە شۇ قىزغىنلىق بولغاچقا،مايۈن نۇرغۇن قېتىملاپ قىيىنچىلىققا يولۇققان بولسىمۇ، ئەمما يەنىلا ئۆزىنىڭ ئاكتىپ پوزىتسىيىسىنى ساقلىغان، ھەمدە قىيىنچىلىقلارغا خاتىمە بېرىپ شان – شەرەپكەئېرىشكەن.    مايۈننىڭ كەچۈرمىشلىرى بىزگە شۇنى ئېيتىپ بېرىدۇكى، قىزغىنلىق ئادەمنى ھەرقانداق قيىنچىلىقتىن بۈسۈپ ئۆتۈشكە يىتەكلەيدۇ،، ھەرقانداق مەسىلىنى ھەل قىلدىغان ئامالنى تېپىشقا ئىلھاملاندۇرىدۇ. مۇھىمى، قىزغىنلىقىڭىز بىلەن بىرلەشكەن تەدبىرىڭىزنىڭ ئىزچىللاشقان،ئۈنۈملۈك ۋە قاراتمىلىق بولغان – بولمىغانلىقىدا. قىزغىنلىق كىشىلەرنى مەسىلىنىڭ تۈگۈنىنى تېپىشقا ۋە ئۇنى ئەڭ ياخشى بىر تەرەپ قىلىش ئۇسۇلىنى تېپىشقا يىتەكلەپ،قىيىنچىلىقنى باش ئەگكۈزىدۇ. ئۇنىڭدىن باشقا، قىزغىنلىق ئادەمنىڭ يوشۇرۇن ئىقتىدارىنى جارى قىلدۇرىدۇ. بىزئەتراپىمىزغا نەزەر سالساقلا شۇنى بايقايمىزكى، بەزىلەرنىڭ كەسپىي قابىليىتى كۈچلۈك بولمىسىمۇ، ئانچە ئەقىللىق بولۇپ كەتمىسىمۇ، ئادەمنى ھەيران قالدۇردىغان نەتىجىلەرنى قولغا كەلتۈرەلەيدۇ.  مۇنداق كىشىلەرنىڭ مۇۋەپپەقىيەت قازىنىشىدىكى سەۋەب، ئۇلارنىڭ ئۆز غايىسىگە بولغان قىزغىنلىقىنىڭ بولغانلىقىدا. قىزغىنلىق كىشىلەرنى ئادەتتىكى كىشىلەر ئەزەلدىن ھېس قىلىپ باقمىغان، ئۆزىگىمۇ ناتونۇش بولغان ئىشلارنى سىناپ بېقىشقا رىغبەتلەندۈرىدۇ،بۇنىڭ بىلەن ئادەمدىكى يوشۇرۇن قابىليەت ئاشكارىلىنىدۇ. كىم ئالدىراشلىقتىن تاماق يىيىشكىمۇ ئۈلگۈرەلمىگەن ھېسىياتنى باشتىن كەچۈرەلەيدۇ؟ كىممۇ يېرىم يىللىق ئىشنى بىر ھەپتىدە ئورۇنلايدىغان ئالدىراشچىلىقنى تەسەۋۋۇر قىلالايدۇ؟ كىم ئىلگىرى چۈشىدىمۇ ئۆزى قىلماقچى بولغان ئىشنى كۆردىغان قىزغىنلىقنى باشتىن كەچۈرۈپ باققان؟   مايۈننىڭ مۇنداق داڭلىق ئەقىليە سۆزى بار: «پەقەت سىز ئويلاپ باقمىغان ئىشلار بار، ئەمما مايۈن قىلالمايدىغان ئىش يوق.» ھەقىقەتەن، قىزغىنلىق كىشىلەر تەسەۋۋۇر قىلالمايدىغان يېڭىلىق يارىتىش روھىنى قوزغىتىدۇ. قىزغىنلىق بولغاچقىلا، ئادەمنىڭ مېڭىسى ئوزۇن مەزگىللىك جانلىنىش ھالىتىنى ساقلىيالايدۇ، ئىدىيەلەرنىڭ كېسىشمىسى ۋە ئارلىشىشى ئارقىلىق يېڭىلىق يارىتىش روھى بارلىققا كېلىدۇ. ئۇنىڭدىن باشقا،ئادەمدە ئەگەر قىزغىنلىق بولسا، ئۇ تەبىئىلا ئۆزىنىڭ قىلۋاتقان ئىشىنىڭ ماھىيىتىنى بايقىيالايدۇ، ھەمدە بۇ ئارقىلىق ئىلھامىنى قوزغىتالايدۇ.قىزغىنلىق يەنە كىشىلەرگە ئىشلارنى ئەتراپلىق پىلانلاتقۇزىدۇ، ئۇ ئادەمنى ئىش قىلىشقا ماھىر قىلىدۇ ھەمدە ئوي – خىيالنى رېئاللىققا ئايلاندۇرۇشقا ئىلھاملاندۇرىدۇ.    ھالبۇكى،گەرچە قىزغىنلىقنىڭ پايدىسى ناھايىتى كۆپ بولسىمۇ، بىراق بىر ئىرادىلىك ئىگىلىك تىكلىگۈچىدە يالغۇز قىزغىنلىقنىڭ بولۇشىلا كۇپايە قىلمايدۇ. ئىگىلىك يارىتىش بولسا جەڭ ئېلان قىلىش خاراكتېرلىك ئىجتىمائىي پائالىيەت، ئۇ ئىگىلىك ياراتقۇچىنىڭ ئەقىل– پاراسىتى، ئىقتىدارى، جاسارىتى قاتارلىقلارنى سىنايدۇ.شۇڭا بىر ئادەم ئىگىلىك يارىتىپ مۇۋەپپەقىيەت قازانماقچى بولسا قىزغىنلىق بولۇپلا قالماستىن، يەنە ئىگىلىك تىكلىگۈچىنىڭ ئىگىلىك يارىتىش ساپاسى بولۇشى يەنى تۆۋەندىكى شەرتلەرنى ھازىرلىشى كېرەك: بىرىنچىدىن،ئىگىلىك تىكلىگۈچىئۆزىنىڭ تەدبىر بەلگىلەش ئىقتىدارىنى يىتىلدۈرۈشى كېرەك.    تەدبىر بەلگىلەش ئىقتىدارى بولسا بىر ئادەمنىڭ ئۇنىۋېرسال ئىقتىدارىنىڭ ئىپادىسى. ئىگىلىك تىكلىگۈچى ئىگىلىك يارىتىش جەريانىدا مۇرەككەپ ھادىسىلەرنى بايقىشى، مەسىلىنىڭ ماھىيىتىنى بىلىشى، ھەقىقىي مەۋجۇت مەسىلىنى تېپىپ چىقىپ، ئۇنى تەھلىل قىلىشى ھەمدە مەسىلىنى توغرا بىر تەرەپ قىلىشى كېرەك. ئىككىنچىدىن، ئىگىلىك تىكلىگۈچىدە چۇقۇم باشقۇرۇش ئىقتىدارى بولۇشى كېرەك.    شۇنداق دىيىشكە بولىدۇكى، باشقۇرۇش ئقتىدارى ئىگىلىك تىكلىگۈچىنىڭ غەلبە قىلىشى ياكى قىلالماسلىقى بىلەن بىۋاستە مۇناسىۋەتلىك. باشقۇرۇش ئىقتىدارى خادىملارنىڭ تاللىنىشى، ئىشلىتىلىشى، گورۇپپىلاشتۇرۇش ۋە ئەلالاشتۇرۇش قاتارلىقلارغا بېرىپ تاقىلىپلا قالماستىن، يەنە مەبلەغنىڭ توپلىنىشى، ھېسابات قىلىش،مەبلەغنىڭ تەقسىملىنىشى،مەبلەغ ئىشلىتىش ۋە ئېقىپ كېتىش قاتارلىقلارغا تەسىر كۆرسىتىدۇ. باشقۇرۇش ئىقتىدارى بولسا ئۇنىۋېرساللىقى ناھايىتى كۈچلۈك بولغان ئىقتىدار، شۇڭا ئىگىلىك تىكلىگۈچى تىجارەت ئۇسۇلى، ئادەم ئىشلىتىش ۋە باشقۇرۇش، مالىيە قاتارلىق بىر نەچچە تەرەپتىن ئەتراپلىق ئۆگىنىشى كېرەك.   ئۈچىنچى،ئىگىلىك تىكلىگۈچىدە چوقۇم كەسپىي تېخنىكا ئىقتىدارى بولۇشى كېرەك.    كەسپى تېخنىكا ئىقتىدارى بولسا ئىگىلىك تىكلىگۈچى كەسپىي بىلىملەرنى ئىگەللەش ۋە ئىشلىتىش ئارقىلىق يۈرگۈزۈلدىغان ئىقتىدار. ئىگىلىك يارىتىش جەريانىدا، ئىگىلىك تىكلىگۈچى كەسپىي تېخنىكا جەھەتتىكى تەجرىبىسىنىڭ جۇغلىنىشى ۋە كەسپىي قابىليەت مەشىقىگە ئېتىبار بېرىشى كېرەك.   تۆتىنچى،ئىگىلىك تىكلىگۈچىدە ئالاقە ئىقتىدارى بولۇشى كېرەك.    ئالاقە ئىقتىدارى بولسا ھۆكۈمەت ئورگانلىرى، تاراتقۇلار ۋە خېرىدارلار بىلەن بولغان مۇناسىۋەتنى تەڭشەش ئىقتىدارىنى، ھەمدە قول ئاستىدىكى خادىملار ئوتتۇرىسىدىكى مۇناسىۋەتنى تەڭشەش ئىقتىدارىنى كۆرسىتىدۇ.   ئاخىرىدا،ئىگىلىك تىكلىگۈچىدە كەم بولسا بولمايدىغىنى - ئىزچىل يېڭىلىق يارىتىش ئىقتىدارى.    يېڭىلىق يارىتىش ئىقتىدارى ئىگىلىك تىكلەشنىڭ مۇۋەپپەقىيەتلىك بولۇشىدىكى قانات. رىقابەت ناھايىتى كەسكىن بولغان بازاردا يېڭىلىق يارىتىش ئىقتىدارى كەمچىل بولغان كارخانىلارنىڭ پۇت دەسسەپ تۇرمىقى ناھايىتى تەس. كىچىككىنە ئۆزگىرىشمۇ سىزنىڭ شىركىتىڭىزگە چىقىش يولى، مەھسۇلاتلىرىڭىزغا سېتىلىش بازىرى ئېچىپ بېرىشى مۇمكىن.شۇنىڭ ئۈچۈن، ئىسلاھات ۋە يېڭىلىق يارىتىش مەڭگۈ كارخانىنىڭ ھاياتى كۈچى ۋە رىقابەت كۈچىنىڭ مەنبەسى.   پەقەت يۇقىرىدىكى ئىقتىدارلارغا، ھەمدە كۈچلۈك ئىگىلىك تىكلەش قىزغىنلىقىغا ئىگە بولغاندىلا، ئاندىن مۇۋەپپەقىيەت سىزگە يۈزلىنىدۇ. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	بەشىنچى دەرس ئىككىنچى پارىگىراف ئۆز غايىسى ۋە ئارزۇسىدا ئىزچىل چىڭ تۇرۇش كېرەك ئىلگىرى مايۈن «ئەلى بابا مەھەللە مۇنبېرى» دە مۇنداق دىگەن: «تۇنجى مۇھەببەت ناھايىتى گۈزەل بولىدۇ، ھەربىر ئادەمنىڭ تۇنجى مۇھەببىتى ناھايىتى ئاسان ئەستە ساقلىنىپ قالىدۇ.ئوخشاشلا، ھەربىر ئادەمنىڭ دەسلەپكى ئىگىلىك تىكلەش غايىسىمۇ ناھايىتى گۈزەل بولىدۇ، بىراق قارىغۇلارچە مېڭىۋەرگەندە ئادەم ئۆزىنىڭ يولىنى تاپالمايدىغان ئەھۋال كېلىپ چىقىدۇ، ئەمەلىيەتتە سىزنىڭ تۇنجى غايىڭىز ئەڭ ياخشى بولىدۇ... 2001 – يىلى تورئىقتىسادىنىڭ كۆپۈكلىشىش ھادىسىسى يۈز بەرگەندە، 30 نەچچە شىركەت بار ئىدى، بىراق ھازىر ئۇلار تاقىلىپ قالدى، پەقەت بىزلا راۋاجلىنىپ كەلدۇق. بىز دەسلەپكى غايىمىزدە چىڭ تۇرالىغان كىشىلەر، شۇڭا بۈگۈنكە قەدەر مەۋجۇت بولۇپ تۇرالىدۇق ھەم غەلبە قىلدۇق». مايۈن «ئەلىبابا» نى قۇرۇش جەريانىنى ئەسلىگەندە، ئىگىلىك تىكلەپ مۇۋەپپەقىيەت قازىنىش تەجرىبىسىنى خۇلاسىلىگەن بولۇپ، بۇلارنىڭ ئىچىدىكى بىر قائىدە دەل «ئۆزىنىڭ غايىسىدە چىڭ تۇرۇش» تىن ئىبارەت.    ئىگىلىك تىكلەش ئادەم بولۇشقا ئوخشايدۇ، شۇڭا ئادەم چوقۇم ئۆزىنىڭ دەسلەپكى غايىسىدە چىڭ تۇرۇش كېرەك،ھەرگىزمۇ ئاسانلا ئۆزىنىڭ غايىسىدىن تەۋرىنىشكە بولمايدۇ، نۇرغۇنلىغان كىشىلەرقارىشى تۇرغان تەغدىردىمۇ، پەقەت سىز ئىشەنچ قىلىسىڭىزلا، چوقۇم غايىڭىزدە چىڭ تۇرۇشىڭىز كېرەك.    مايۈننىڭ ئىگىلىك تىكلەش يولى ئەگرى – توقايلىققا تولغان، «ئەلى بابا» قۇرۇلغاندىن تارتىپ كىشىلەرنىڭ گۇمانى پوزىتسىيەسىگە ئۇچراپ كەلگەن، بىراق مايۈن ئۆزىدىن گۇمانلىنىپ باقمىغان. مايۈن مۇنداق دىگەن: «سەككىز يىل ئىلگىرى (ئەلى بابا) نى قۇرغاندىن تارتىپ، مەن ئىزچىل تەنقىدكە ئۇچراپ كەلگەن، كىشىلەرنىڭ ھەممىسى‹ بۇ مۇمكىن ئەمەس› دىيىشەتتى. ئەمما مەن تىل –ئاھانەتتىن قورقمايىتتىم، باشقىلارمۇ مېنى تىللاپ بولالمايىتتى. مەنمۇ باشقىلارغا پەرۋا قىلمايىتتىم، چۈنكى مەن مەڭگۈ مۇنداق سۆزگە ئىشىنەتتىم: ‹ سېنىڭكى توغرا تۇرسا، باشقىلار ئاللىقاچان سېنىڭ پىكىرىڭگە قوشۇلغان تۇرسا، بۇنداقتا نۆۋەت ساڭا كەلگەن بولىدۇئەمەسمۇ؟». شۇ سەۋەبتىن، مايۈن ئىزچىل ئۆزىنىڭ غايىسىدە چىڭ تۇرغان، ئىزچىل تەۋرىنىپ قالمىغان.  ھەم مايۈن ئىگىلىك تىكلەشكە بەل باغلىغان  كىشىلەرگە شۇنداق ئاگاھلاندۇرۇش بەرگەن: ئىگىلىك تىكلىمەكچى بولغانلار ئاۋال ئۆزىنىڭ كۈچلۈك ئىگىلىك يارىتىش قىزغىنلىقىنىڭ بار – يوقلۇقىنى، ئۆزىنىڭ غايىسىدە چىڭ تۇرالايدىغان ياكى تۇرالمايدىغانلىقىنى ئايدىڭلاشتۇرۇش كېرەك. ئەگەر بۇ ئىككى سۇئالنىڭ جاۋابى ئېنىق بولمىسا،  ئۆزىنىڭ ئىگىلىك يارىتىش قىزغىنلىقى كۈچلۈك بولمىسا،ئۇنداقتا ئىگىلىك تىكلەشكە بولمايدۇ. چۈنكى ئىگىلىك تىكلەشنىڭ تۇنجى كۈنىدىن تارتىپ، سىز ھەر كۈنى قىيىنچىلىقلارغا ۋە ئوڭۇشسىزلىقلارغا ئۇچرايسىز، ئىگىلىك تىكلەشنى داۋاملاشتۇرۇش سىزنىڭ تەۋرەنمەس ئىرادىڭىزگە مۇھتاج. ئەينى ۋاقىتتا، مايۈن تور سودىسىغا قىزىققان، ھەمدە ئىزچىل ئۆزىنىڭ بۇ قىزىقىشى بۇيىچە ئىشلىرىنى داۋاملاشتۇرغان. مايۈن مۇنداق دىگەن: «مەن تورنىڭ جۇڭگوغا تەسىر قىلدىغانلىقىغا،جۇڭگونى ئۆزگەرتىدىغانلىقىغا ئىشىنەتتىم، مەن جۇڭگودا تور سودىسىنى تەرەققىي قىلدۇرغىلى بولدىغانلىقىغا، تور سودىسىنى تەرەققىي قىلدۇرۇشتا خېرىدارلارنى باي قىلىشنىڭ مۇھىملىقىغا ئىشىنەتتىم، ئەگەر خېرىدارلار باي بولالمىسا، ‹ئەلى بابا› قۇرۇق نەرسىگە ئايلىنىپ قالاتتى.»تەرەققىيات جەريانىدا مايۈن نۇرغۇنلىغان قىزىقتۇرۇشلارغا دۇچ كەلگەن، بىراق ئاخىرىدا يەنىلا تور سودىسى يولىدا ماڭغان، چۈنكى مايۈن ئىزچىل ئۆزىنىڭ دەسلەپكى غايىسىدە چىڭ تۇرغان، ھەمدە ئۆز تاللىشىنىڭ توغرىلىقىغا ئىشەنگەن.    «ئەلى بابا»ئىزچىل تور سودىسى يولىدا ماڭغان، گەرچە مايۈن تور سودىسىدا بىر نەچچە يىلغىچە پۇل تاپقىلى بولمايدىغانلىقىنى ئېتىراپ قىلسىمۇ، بىراق ئۇ نەچچە يىلدىن كىيىن چوقۇم پۇل تاپالايدىغانلىقىغا ئىشەنگەن. شۇنىڭ ئۈچۈن، ئۇ ئىزچىل تور سودىسىغا مەبلەغ سالغان، گەرچە نۇرغۇنلىغان قىزىقتۇرۇشلارغا دۇچ كەلگەن بولسىمۇ، ئۇئەزەلدىن نىيتىدىن يېنىپ باقمىغان. 2001 – يىلى قىش ئېنتىرنىت تورىنىڭ «قىش پەسلى» بولۇپ، بۇيىل پۈتۈن جۇڭگو تور ساھەسىگە نىسبەتەن ئېيىتقاندا ۋەيرانچىلىق يىل بولغان. تورسودا ساھەسىدىكىلەر كۈچەپ تەشۋىق قىلغان «تور قەھرىمانلىرى» ئاللىقاچان «ئىشىكنى تاقىغان» ، نۇرغۇنلىرى تور ساھەسىدىن ئايرىلىپ «توردىن چۈشكەن» ئىدى.    2001 – يىلى، سۈن جېڭيى شاڭخەيدە بىر قېتىملىق مەبلەغ سېلىش يىغىنى ئاچقان، سۈن جېڭيى مايۈندىن مۇنداق سورىغان: «سىزئىستىراتىگىيىڭىزنى تەڭشەپ، تور سودىسىنى تاشلاپ، باشقا ساھەلەرگە يۈرۈش قىلىپ باقامسىز؟» مايۈن ناھايىتى ئىشەنچلىك ھالدا ئۆزىنىڭ «مەبلەغ سالغۇچىسى» غا شۇنداق جاۋاب بەرگەن: «سۈن ئەپەندىم، سىز بىر يىل بۇرۇن ماڭا مەبلەغ سېلىپ مەن سىزدىن پۇل تەلەپ قىلغان شۇ ۋاقىتتا، مەن شۇنداق بىر غايىنى سۆزلىگەن؛ بۈگۈن مەن سىزگە يەنىلامېنىڭ شۇ ۋاقىتتىكى غايەمنى ئېيتىپ بېرىمەن، ئوخشىمايدىغان يېرى شۇكى، مەن غايەمگە تېخىمۇ يېقىنلاشتىم، ھەم بۇندىن كىيىن تېخىمۇ ئالغا قاراپ ئىلگىرلەيمەن!»    مايۈن ئارقىدىنلا مۇنداق دىگەن: «بىز پۇل تاپالايمىز، مەن بۇنىڭدىن گۇمان قىلمايمەن. ئامازۇن دۇنيادىكى ئەڭ ئوزۇن دەريا،جۇمۇلاڭما چوققىسى دۇنيادىكى ئەڭ ئېگىز چوققا، (ئەلى بابا) دۇنيادىكى بايلىقى ئەڭ مول كان.» مايۈن بىلەن ئۇچراشقان ھەربىر ئادەم ئۇنى ئۆزىگە ناھايىتى ئىشىنىدىكەن دەپ ئويلايدۇ. بەزىلەر مايۈنگە باھا بېرىپ مۇنداق دىگەن: «ئۇ ھەربىر قەدىمىنىمۇ ناھايىتى پۇختىلىق بىلەن باسىدۇ، بۇ كىشىلەرگە ئۇ ھەممىنى كونترول قىلىپ، پىلانلاپ بولغاندەك كۆرۈنىدۇ، شۇنىڭ ئۈچۈن ئۇ ھېچنىمىدىن قورقمايدۇ.»    نەتىجىدە، ئوزۇنغا سوزۇلغان داۋاملاشتۇرۇش ۋەكۈتۈشتىن كىيىن، «ئەلى بابا» ئاخىرى قىيىنچىلىقتىن قۇتۇلۇپ، يېڭى دەۋرىنى كۈتۈۋالغان، مەبلەغ سالغۇچىلار ۋە خىزمەتچىلەرنىڭ ھەممىسى مايۈنگە قايىل بولغان. ئەلۋەتتە بۇنداق نەتىجىلەرنىڭ قولغا كېلىشىدىكى سەۋەب مايۈننىڭ ئۆزىنىڭ غايىسىدە چىڭ تۇرغانلىقى بىلەن مۇناسىۋەتلىك.   ئىگىلىك تىكلەش يولى قيىنچىلىقلارغا تولغان،ئەگەر ناھايىتى كۈچلۈك ئارزۇ ۋە ئىرادە بولمىسا، باشلىغان ئىشنى ئاخىرىغىچە قىلىش ناھايىتى تەس. بۇ خىل ئارزۇنى داۋاملاشتۇرالايدىغان كۈچ  دەل ئىگىلىك تىكلىگۈچىنىڭ ئۆزىنىڭ مۇۋەپپەقىيەت قازىنىشىغا بولغان ئىشەنچىسى. ئىگىلىك تىكلەپ مۇۋەپپەقىيەت قازانغان بىر كىشى مۇنداق دىگەن: «ئىگىلىك تىكلەش بىر قاراڭغۇ ئۆيگە كىرىپ قالغانغا ئوخشايدۇ، بۇ ئۆيدە ئازراقمۇ نۇر يوق، بىراق سىز ئۆزىڭىزگە شۇنداق نۇر باريۆنىلىشنى تېپپ بېرىشىڭىز كېرەك، ئاندىن ھەمراھلىرىڭىزغا شۇنداق دىيەلىشىڭىزكېرەك: ماڭا ئەگىشىڭلار، مەن يۆنىلىشنى بىلىمەن.» شۇڭا ئىگىلىك تىكلىگۈچى ئۆزىنىڭ تاللىشىغا، ھۆكۈم قىلىش ئىقتىدارىغا ئىشىنىشى، ھەمدە ئۆزى تاللىغان يۆنىلىشكە قاراپ توختىماستىن ئىلگرىلىشى لازىم.    بۈگۈنكى كۈندە، ئىگىلىك تىكلىگۈچىلەر بارغانسىرى كۆپىيىۋاتىدۇ، بارغانسىرى كۈچىيىۋاتىدۇ،ئەمما مۇۋەپپەقىيەت قازانغانلار ناھايىتى ئاز. شۇنىڭ ئۈچۈن، ئىگىلىك تىكلەشنىڭ دەسلىپىدە بىز چوقۇم مايۈننىڭ ئاگاھلاندۇرىشىنى ئاڭلىشىمىز كېرەك. ئۆزىمىزدىن ‹كۈچلۈك ئارزۇنىڭ بار – يوقلۇقىنى، غايىنى ئەمەلگە ئاشۇرۇشتىكى تەۋرەنمەس ئىرادىنىڭ بار – يوقلۇقىنى، ھەرخىل قىيىنچىلىق ۋە مۈشكۈلاتلارغا تاقابىل تۇرالايدىغان ياكى تۇرالمايدىغانلىقىىزنى› سوراپ بېقىشىمىز كېرەك. ئەگەر سىز ئىگىلىك يارىتىش قىزغىنلىقىڭىزنىڭ بىردەملىك قىزىقىش ياكى تەۋرەنمەس تاللاش ئىكەنلىكىنى جەزملەشتۈرەلمىسىڭىز، ئۆزىڭىزنىڭ ئىگىلىك يارىتىش ئارزۇسىنىڭ قانچىلىك ئىكەنلىكىنى مۆلچەرلىيەلمىسىڭىز، يەنە ئۆزىڭىزدە قىيىنچىلىقلارغا تاقابىل تۇرالايدىغان جاسارەتنىڭ بار –يوقلۇقىنى بىلەلمىسىڭىز، ئۇنداقتا سىزنىڭ ئىگىلىك تىكلىشىڭىزنىڭ مۇۋەپپەقىيەتلىك بولۇشى ناھايتى تەس. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	بەشىنچى دەرس ئۈچۈنچى پارىگىراف ئىگىلىك يارىتىشتا بىر خىل «ئەسەبىيلىك» بولۇشى كېرەك، پەقەت تىرشىپ – تىرمىشىپ ئالغا ئىلگىرىلىگەندىلا ئاندىن ھايات قالغىلى بولىدۇ    مايۈن ئىلگىرى مۇنداق دىگەن: «پەقەت سىزئويلاپمۇ باقمىغان ئىشلار بار، ئەمما مايۈن قىلالمايدىغان ئىش يوق.» ئەمەلىيەتتە،بۇ جۈملە مايۈننىڭ ۋۇجۇدىدىكى «ئەسەبىي» تەرەپنى ئۆز ئىچىگە ئالغان بولۇپ، شۇ سەۋەبتىن دوستلىرى ئۇنىڭغا مۇنداق ئىككى لەقەم قويغان: «ساراڭ» ۋە «ئەسەبىي ئادەم.»    «ساراڭ» دىگەن بۇ لەقەمگە قارىتا، مايۈن ناھايىتى كەمتەرلىك بىلەن مۇنداق دىگەن: «مەن بىر ئەسەبىي ئادەم، ئەمما ھەرگىزمۇ ئەخمەق ئەمەس.» «ئەسەبىيلەشكەن» مايۈن دائىم ياشلارغا مۇنداق دەيدۇ: «مەن بىر دۆت ئادەم.ھېسابتا باشقىلارغا يەتمەيمەن؛ گەپ قىلىشتا باشقىلارغا يەتمەيمەن، بىراق مېنىڭ ئىگىلىك تىكلىشىم مۇۋەپپەقىيەتلىك بولدى. مېنىڭچە، مەن مۇۋەپپەقىيەت قازانغان يەردە، %80 ياشلار چوقۇم مۇۋەپپەقىيەت قازىنالايدۇ...» مايۈننىڭ ئىگىلىك تىكلەش يولى «ئەسەبىيلىك» نى ئۆزىگە ھەمراھ قىلغان. 1995 – يىلى، ئۇ بىر قېتىمىق تاسادىپىي پۇرسەتتە ئېنتىرنىت تورى بىلەن ئۇچراشقاندىن كىيىن، بۇ نەرسىگە «ئەسەبىيلەرچە»مەپتۇن بولۇپ قالغان. شۇنداق قىلىپ، ئۇ ئېنتىرنىت تورىدىن ئىبارەت بۇ كەسىپ بىلەن شۇغۇللىنىشنى قارار قىلغان. بۇ ۋاقىتتا، نۇرغۇنلىغان كىشىلەر ئۇنى ساراڭ بولۇپ قاپتۇ دەپ ئويلىغان، بەزىدە دوستلىرى ئۇنىڭغا قارىشى تۇرۇپ شۇنداق دىگەن: «تورنىڭ ئىشى  ناھايىتى قالايمىقان،ئاخىرسىنى بىلگىلى بولمايدىغان ئىشكەن. ھۆكۈمەتمۇ تېخى قىلىشنى باشلىمىغان ئىشنى بىز قانداق قىلالايمىز؟ ئۇنىڭ ئۈستىگە بۇ ئىش نۇرغۇنلىغان پۇلغا مۇھتاج!»    ئەينى ۋاقىت مايۈن خاڭجۇ سانائەت ئىنىستىتۇتىدا كۈنلىرىنى خاتىرجەم ئۆتكۈزۋاتقان ۋاقىت بولۇپ، ئۇ يەنىلادوستلىرىنىڭ ئاگاھلاندۇرىشىنى ئاڭلىماي ھەممىدىن ۋاز كېچىپ، «ئەسەبىيلەرچە»ئېنتىرنىت تورى كەسپى بىلەن شۇغۇللىنىشنى باشلىغان. گەرچە ئىگىلىك تىكلەش يولىدا نۇرغۇنلىغان قىيىنچىلىقلارنى باشتىن كەچۈرگەن بولسىمۇ، بىراق ئۇ يەنىلا ئۆزىنىڭ غايىسىدە چىڭ تۇرغان. 1999 – يىلى، پۈتۈن دۇنيادىكى ئېنتىرنىت تورى كارخانىلىرى ئامېرىكا ئەندىزىسىنى دوراپ %20 لىك نىسبەتتىكى چوڭ تىپلىق كارخانىلارئۈچۈن مۇلازىمەت قىلىشنى باشلىغاندا، مايۈن يەنە قارار چىقىرىپ جۇڭگودىكى %80 نىسبەتنى ئىگەىلەيدىغان ئوتتۇرا – كىچىك كارخانىلار ئۈچۈن مۇلازىمەت قىلىشنى قارار قىلغان، ھەمدە ناھايىتى غەلىتە قىلىپ مۇنداق دىگەن: «مەن راك تۇتۇپ باي بوپتۇ دەپ ئاڭلىغان، ئەمما كىت تۇتۇپ باي بوپتۇ دەپ ئاڭلاپ باقمىدىم.» شۇنداق قىلىپ، ئۇكىشىلەرنىڭ گۇمانلىق سادالىرى ئىلكىدە «ئەلى بابا» نى قۇرۇپ چىققان.    مايۈن «جۇڭگودىكى غەلبە» پروگراممىسىدا بىرماھىرغا باھا بېرىپ مۇنداق دىگەن: «سىزنىڭ خاراكتېرىڭىز ئىگىلىك يارىتىشقا ماس كەلمەيدىكەن، سىز ناھايىتى (زىيالىي مىجەز) كەنسىز.» ئەمەلىيەتتە، مايۈننىڭ دىمەكچى بولغىنى بولسا بىر ئادەم ئىگىلىك تىكلەشتە بەك «يۇمشاق» بولۇپ كەتسە بولمايدۇ، چوقۇم ئانچە – مۇنچە «ئەسەبىي» تەرىپىمۇ بولۇشى كېرەك.    ئەسەبىي مىجەز ئادەملەردە مۇرەسسە قىلمايدىغان، ۋاز كەچمەيدىغان روھ بولىدۇ، ئۇلار بىر ئىشنى قىلىشنى قارار قىلسىلا، توغرا –خاتا بولۇشىدىن قەتئىينەزەر ئاخىرىغىچە داۋاملاشتۇرىدۇ. دەل بۇ خىلدىكى توغرا –خاتاسى بىلەن كارى بولماسلىقتەك تىركىشىش روھى ئۇلاردىكى «ئۆزىگە باھانە تېپىپ بېرىش» تەك خەتەرنى يوقاتقان، شۇڭا ئۇلارنىڭ ئىزچىل داۋاملاشتۇرۇش مۇمكىنچىلىكى ناھايىتى چوڭ بولىدۇ. شۇنىڭ ئۈچۈن، پەقەت توغرا يىتەكلەش بولسىلا،«ئەسەبىي ئادەملەر» تېخىمۇ ئاسان غەلبە قىلالايدۇ. مايۈننىڭ يەنە بىر ئەسەبىي ھەركىتىنى مىسالغا ئالساق، پۈتۈن يەر شارىدىكى تور سودىسى سەركىسى eBay دۆلەت ئىچىدىكى C2C شىركىتى «يىچۈ» نى سېتىۋېلىپ كۈچلۈك ھەمكارلىقنى شەكىللەندۈرگەن، ھەمدە جۇڭگو تور سودىسى بازىرىنى ئىگىلەشكە تەييارلىق قىلغان. eBay دىن ئىبارەت يەر شارى خاراكتېرلىك بۇ رىقابەتچىگە دۇچ كەلگەن مايۈن ئارقىغا داجىپمۇ قويمىغان. 2003 – يىلى 5 – ئايدا، مايۈن قاپ يۈرەكلىك بىلەن شۇنداق قارار چىقارغان: ‹ C2C (شەخس بىلەن شەخس ئوتتۇرىسىدىكى تور سودىسى) غا يۈرۈش قىلىپ، eBay «يىچۈ» غا  رىقابەت ئېلان قىلىش كېرەك!    بۇ مايۈننىڭ ناھايىتى «ئەسەبىي» خاراكتېرىنى يىتەرلىك ئىسپاتلاپ بەرگەن، چۈنكى ئۇلار ھەرگىزمۇ بىر قاتاردىكى شىركەتلەر ئەمەس بولۇپ، باشقىلارنىڭ نەزىرىدە بۇ «ئۆزىنى دەڭسىمەي مۇشت ئاتقانلىق» ئىدى.    مايۈننىڭ بۇ قارارىنى ئاڭلىغاندىن كىيىن،«ئەلى بابا» نىڭ ئەينى ۋاقىتتىكى باش تېخنىكى ۋۇتۇڭ قورققىنىدىن تۇرۇپلا قالغان:«مايۈن، سىز ساراڭ بولدىڭىزمۇ؟ مەن «ياخو» دا eBay بىلەن نۇرغۇن يىل ئالاقە قىلدىم، ئۇلارنى ھەرگىز بوش چاغلىغىلى بولمايدۇ...»    ھالبۇكى، مايۈن بۇنىڭدىن قورقۇپ قالمىغان.2003 – يىلى 7 – ئايدا، «ئەلى بابا» شاڭخەي، خاڭجۇ، بېيجىڭ قاتارلىق جايلاردا ئوخشاش ۋاقىتتا شۇنداق جاكارلىغان: «تاۋباۋ» تورىغا مەبلەغ سېلىپ، شەخسلەر ئارا تور سودىسىغا يۈرۈش قىلىمىز!    مايۈنىڭ بۇ قارارى ھەقىقەتەن «ئەسەبىي» ئىدى،ئەسەبىي بولغاندىمۇ ئادەتتىكىچە ئەمەس ئىدى! كىيىن مايۈن ئامېرىكىنىڭ ۋال كوچىسىغا بېرىپ نۇتۇق سۆزلىگەن، بۇ ۋاقىتتا «تاۋباۋ» نىڭ تىجارەت باشلىغىنىغا نەچچە ئاي بولغان ئىدى. مايۈن «تاۋباۋ» نىڭ كەلگۈسى توغرىسىدا توختالغاندا، فوند مەسئۇللىرى «180گرادۇس بۇرۇلۇپ» قارىشى تۇرغان، ھەتتا بىرى «eBay will win» (eBay يېڭىدۇ) دەپ ۋارقىرىغىنىچە مەيداندىن چىقىپ كەتكەن.    بىراق ئاخىرقى نەتىجە ۋۇتۇڭ ۋە « eBayچوقۇم يېڭىدۇ» دىگەن ئامېرىكا فوند مەسئۇلىنى ھەيران قالدۇرغان: «تاۋباۋ» تورى ئىككى يىلغا يەتمىگەن ۋاقىتتا جۇڭگو تور سودىسىنىڭ %70 نى ئىگەللىگەن ، ئەمما eBay بۇ سودىدىن چېكىنىپ چىقىشنى قارار قىلغان ئىدى.    بۇ دەل مايۈننىڭ: «مەن ناھايىتى ئەسەبىي، ئەمما كالۋا ئەمەس» دىگەن سۆزىنى گەۋدىلەندۈرۈپ بەرگەن. مايۈننىڭ ئەسەبىيلىكى ھەرگىزمۇ «ئېتى ئۇلۇغ، سۇپرىسى قۇرۇق» ئەسەبىيلىك ئەمەس، ئۇ مايۈننىڭ ئىگىلىك يارىتىش قىزغىنلىقى ۋە بازار ئېڭىدىن كېلىپ چىققان. چۈنكى بازارغا بولغان ئالدىن كۆرەرلىك بولغاچقا، مايۈننىڭ ھەرخىل ئۇچۇرلارغا بولغان ئىنكاسى تىز،ھەمدە ئەمەلىي ئەھۋالغا ئاساسەن ناھايىتى تىزلا قارار بەلگىلىيەلەيدۇ،ئۇتتۇرۋەتكەن تەغدىردىمۇ يەنە ناھايىتى ئەتراپلىق پىلان ۋە جانلىق بىر تەرەپ قىلىش شەكلى ئارقىلىق تەسەۋۋۇرىنى ئەمەلگە ئاشۇرىدۇ، بۇ مايۈننىڭ مۇۋەپپەقىيەت قازىنىشىدىكى ئاچقۇچلۇق سەۋەبلەرنىڭ بىرى.    شۇنىڭ بىلەن بىر ۋاقىتتا، ئۇ يەنە خەتەردىن ئۆزىنى قاچۇرۇش جەھەتتىكى ئەقىل – پاراسىتىنى نامايەن قىلغان. مۇۋەپپەقىيەت قازانغان ئىگىلىك تىكلىگۈچى ئەسەبىيلەرچە كۆرەش قىلىپلا قالماستىن، يەنە بازارغا بولغان سەزگۈرلىكى بىلەن خەتەردىن ئۆزىنى قاچۇرۇش ئىقتىدارىنىمۇ ھازىرلىغان بولىدۇ. ئىگىلىك تىكلىگۈچىلەر خۇددى ئۆزى مېڭىۋاتقان يول ئەھۋالىغا ئاساسەن سۈرئىتىنى تەڭشىيەلەيدىغان،بىخەتەرلىك تاسمىسىنى باغلىيالايدىغان ۋە ۋاقتىدا يول ئۇچۇرلىرىنى قوبۇل قىلالايدىغان شوپۇرغا ئوخشاش بولۇش كېرەك، شۇنداق قىلغاندىلا ھەممە ئىشنى مۇۋاپىق قىلغىلى، ئۆزىنى تەڭشىگىلى بولىدۇ. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	بەشىنچى دەرس  تۆتۈنچى پارىگىراپ ۋاقىتلىق قىزغىنلىقنىڭ پايدىسى يوق، ئوزۇن مەزگىللىك قىزىقىشنىڭلا قىممىتى بولىدۇ    بەزىلەر دەسلەپتە ئىگىلىك تىكلەشكە باشلىغان ۋاقىتتا، قىزغىنلىقى ناھايىتى يۇقىرى بولۇپ، ۋۇجۇدى ئىشەنچكە تولىدۇ – دە، كىشىلەرگە«مەڭگۈ يېڭىلمەيدىغاندەك» تۇيغۇ بېرىدۇ. بىراق، ئوڭۇشسىزلىققا ئۇچرىغاندىن كىيىن قىزغىنلىقىمۇ يوقايدۇ، ھەتتا قىيىنچىلىق ۋە ئوڭۇشسىزلىقلارغا يۈزلىنەلمەس بولۇپ قالىدۇ،مەغلۇبىيەتنىڭ زەربىسىگە چىداپ تۇرالمىغاچقا ئاخىرىدا چېكىنىشكە مەجبۇر بولىدۇ.    ئىلگىرى «جۇڭگودىكى غەلبە» پروگراممىسىدا بىرماھىر جۇڭگودىكى ئەڭ كەسىپلەشكەن موتورلۇق ماشىنا رېمونت مۇلازىمىتى ۋە ئۇنىۋېرسال مۇلازىمەت، موتورلۇق ماشىنا بىلەن تەمىنلەش، ئىككىنچى قول موتورلۇق ماشىنا بىلەن تەمىنلەش، رېمونت قىلىش، زاپچاسلارنى توپ تارقىتىش، يۇقىرى تېخنىكىلىق ماتېرىياللارنى ئېچىش كەسپى بىلەن شۇغۇللانماقچى بولغان. بۇ ياش مايۈننىڭ «نېمىشقا موتورلۇق ماشىنىنى تاللايسىز، نېمىشقا سۇجۇدا ئىگىلىك تىكلەشنى ئويلاشتىڭىز، خىزمەتچىلەرنى تەشكىللىك ئۆگىنىشكە قاتناشتۇرغاندا ئۇلارغا نېمىلەرنى ئۆگىتىسىز» دىگەن سۇئالىغا ناھايىتى تۈزلۈك بىلەن مۇنداق جاۋاب بەرگەن:    «چۈنكى بۇ كەسىپنىڭ بېسىمغا ئۇچراش نىسبىتى چوڭ، پۈتۈنلەي بازارنىڭ ئىلگىرىلىتىش كۈچىگە تايىنىپ تەرەققىي قىلىدۇ. ھازىر مەن ناھايىتى ياخشى خەۋەردىن بىرىگە ئېرىشتىم، يەنى ھۆكۈمەت بۇ خىل چەكلىمىلىكنى بېكارقىلىدىكەن، بۇ مۇشۇ كەسىپنىڭ ھاياتىي كۈچىنىڭ بىر قىسىم يەرلىك ھۆكۈمەتلەرنىمۇ يول قويۇشقا مەجبۇر قىلغانلىقىنى چۈشەندۈرۈپ بېرىدۇ. ھەقىقىي بازار قىممىتى بارنەرسىلەر ھەرگىزمۇ تايىنىۋېلىپ تەرەققىي قىلغان ئەمەس، ئەكسىچە بازار ئېھتىياجىغا تايىنىپ ھايات ساقلىغان، يەنە كېلىپ بىزنىڭ تېخنىكىمىز ۋە بۇ كەسىپكە ئىچكىرىلەپ كىرىش ئىمكانىيتىمىز بار، شۇڭا مەن بۇ كەسىپنى تاللىدىم.»    ‹ نېمىشقا سۇجۇدا ئىگىلىك ياراتماقچى بولدىڭىز›دىگەن مەسىلىگە قارىتا، ئۇ يەنە مۇنداق جاۋاب بەرگەن: «چۈنكى سۇجۇنىڭ توك بىلەن ھەركەتلىنىدىغان ماشىنىلارنى ئاسىراش نىسبىتى ناھايىتى يۇقىرى، ئەگەر مەن سۇجۇدا مۇۋەپپەقىيەت قازىنالمىسام، بۇ مېنىڭ ئىقتىدارسىزلىقىمنى ئىسپاتلايدۇ. ئۇنىڭدىن باشقا، مېنىڭ سۇجۇدا تايىنىشقا بولىدىغان ھىچ قانداق مۇناسىۋىتىم يوق، ئەگەر مەن مۇۋەپپەقىيەت قازانسام، بۇ مېنىڭ ئۇسۇلۇمنى پۈتۈن مەملىكەتكە كېڭەيتكىلى بولىدىغانلىقىنى چۈشەندۈرىدۇ.» ئۇ يەنە ئۆزىنىڭ خىزمەتچىلىرىنىڭ پەقەت تولۇقسىزئوتتۇرا مەدەنىيەت سەۋىيىسىگە ئىگە ئىكەنلىكىنى، بىراق ئۇلارنى قىسقا ۋاقىتتىلا ئەڭ مۇنەۋۋەر كوللىكتىپ قىلىپ قۇرۇپ چىقىش ئىشەنچىسى بارلىقىنى ئېيىتقان.    بىر ئىگىلىك ياراتقۇچىدا بۇنداق قىزغىنلىقنىڭ بولۇشى ھەقىقەتەن ياخشى باشلىنىش، ئىگىلىك تىكلىمەكچى بولغان ھەرقانداق ئادەمدە قىزغىنلىق بولۇشى كېرەك. ھالبۇكى، ئۇنىڭ بۇ گەپلىرىگە قارىتا مايۈن مۇنداق ئاگاھلاندۇرۇش بەرگەن: «ۋاقىتلىق قىزغىنلىقنىڭ پايدىسى يوق، ئوزۇن مەزگىللىك قىزغىنلىقنىڭلا قىممىتى بولىدۇ.»    شۇنداق، «مەڭگۈلۈك قىزغىنلىق» دىگەن سۆز بىلەن مايۈننىڭ ئىگىلىك تىكلەش تارىخىنى سۈپەتلىسەك ناھايىتى ماسلىشىدۇ. ئۇ 2004 –يىلىدىكى خەلقئارالىق تور سودىسى يىغىنىدا ئىنتايىن ھاياجانلانغان ھالدا مۇنداق دىگەن: «تور سودىسى بىر يېڭى ساھە، بىزدىكى ئەڭ مۇھىم بولغىنى ئۆزىمىز قىزىققان ئىشلىرىمىزئۈچۈن مەڭگۈ قىزغىنلىقىمىزنى ساقلاشتىن ئىبارەت. تور سودىسى قىلىش ئاسان ئەمەس،بۈگۈن بۇنچە كۆپ كىشىلەرنىڭ بۇ يەردە بولغانلىقىدىن مەن ناھايىتى خۇشال بولدۇم.تور بىلەن ھەپىلەشكەن كىشىلەر، بولۇپمۇ بۇ بىر نەچچە يىلدا شۇغۇللانغان كىشىلەرنىڭ كەچۈرمىشلىرى ناھايىتى نۇرغۇن...» ئېھتىمال بۇ ئۇنىڭ ئادەمگەرچىلىكتىكى جەلپكارلىقىنىڭ ئىپادىلىنىشى بولسا كېرەك.    ئالىي مەكتەپ ئوقۇتقۇچىسىدىن تارتىپ «جۇڭگوئېنتىرنىت تورىنىڭ ئاتىسى» غىچە مايۈن ئىزچىل قىزغىنلىقىنى ساقلاپ كەلگەن. «جۇڭگوئۇچۇر بېتى» قۇرۇلغاندا، ھەممە كارخانىلار دىگۈدەك ئېنتىرنىت تورىدا ئېلان بېرىش،تەشۋىق قىلىش قاتارلىقلارغا نىسبەتەن گۇمانلىنىش پوزىتسىيىسىدە تۇرغان، بىراق ئۇ ئىزچىل ئۆزىنىڭ غايىسىدە چىڭ تۇرۇپ كەلگەن.    1999 – يىلىغا كەلگەندە، مايۈن ۋە ئۇنىڭ ھەمراھلىرى 500 مىڭ يۈەن بىلەن «ئەلى بابا›› نى قۇرۇپ چىققاندىمۇ ئۇلارنىڭ قىيىنچىلىقى ناھايىتى ئېغىر ئىدى. شۇنداق بولۇشىغا قارىماستىن، مايۈن يەنىلا ئىشەنچكە تولغان ھالدا ئۆزى ۋە ھەمراھلىرى ئۈچۈن كۈرەش نىشانى بېكىتىپ، گۈزەل كەلگۈسىنىڭ خەرىتىسىنى سىزىپ چىققان.    بۈگۈنگە قەدەر، «ئەلى بابا» دا مۇنداق بىر سىن كۆرۈنۈشى ساقلانماقتا: 1999 – يىلى «ئەلى بابا» قۇرۇلغان دەسلەپكى مەزگىلدە،خاڭجۇدىكى خۇبەن گۈللۈكىدىكى مايۈننىڭ ئۆيىدە مايۈن ۋە ئۇنىڭ ئايالى، خىزمەتدېشى،ئوقۇغۇچىسى ۋە دوستى قاتارلىق 18 ئادەم ئولتۇرماقتا. ئەينى ۋاقىتتا چېچىنى ئوزۇن قويىۋالغان مايۈن ئۈمىدكە تولغان ھالدا شۇنداق دىمەكتە: «ھازىردىن باشلاپ، بىز بىرئۇلۇغۋار ئىشقا قەدەم قويىمىز. بىزنىڭ تور سودىمىز تور مۇلازىمىتىگە بىر قېتىملىق ئىنقىلاپ ئېلىپ كېلىدۇ!» ئۇ يەنە مۇنداق دىگەن: «سىلەر ھازىر خىزمەت تاپساڭلاربولىدۇ، بىر ئايدا 4 – 3 مىڭ يۈەن ئىش ھەققى ئالالايسىلەر، بىراق ئۈچ يىلدىن كىيىن سىلەر يەنە بۇنچىلىك ئىش ھەققى ئۈچۈن خىزمەت ئىزدەمسىلەر؟ ھازىر گەرچە بىزنىڭ ئايلىق ئىش ھەققىمىز پەقەت 500 يۈەن بولسىمۇ، بىراق شىركىتىمىز مۇۋەپپەقىيەت قازانسىلا بىز مەڭگۈ پۇلدىن غەم قىلمايمىز!»    ناھايىتى ئېنىقكى، مايۈننىڭ گەپلىرىدىن غايىۋى پۇراق چىقىپ تۇرىدۇ. «ئەلى بابا» قۇرۇلغان دەسلەپكى نەچچە يىلدا مۇۋاپىق بولغان تىجارەت شەكلىنى تېپىپ چىقالمىغاچقا، شىركەتتە كىرىم يوق بولۇپلا قالماستىن، يەنە نۇرغۇنلىغان تىجارەت چىقىمىنى ئارتىۋالغان ئىدى. 2001 – يىلى، پۈتۈن يەر شارى خاراكتېرلىك ئىقتىسادىي چېكىنىش ۋە تور ئىقتىسادىنىڭ كۆپۈكلىشىش تەسىرىگە ئۇچرىغان«ئەلى بابا» ۋەيران بولۇشقا تاسلا قالغان.    بىراق، قىيىنچىلىقنىڭ قانچىلىك ئېغىربولۇشىدىن قەتئىينەزەر، مايۈن ئىزچىل ئادەمنىڭ بىر قىسىم ئەسەبىي غايىلەر ئارقىلىق ئۆزىنى ئىلھاملاندۇرۇپ تۇرىشى لازىملىقىغا، «ئەلى بابا» نى قۇرۇشنىڭ پارلاق ئىستىقبال ئۈچۈن ئەمەس، بەلكى بىلىنمىگەن غايەت زور غايە ئۈچۈن ئىكەنلىكىگە ئىشەنگەن.    «قىيىن ئىش يوق ئالەمدە، كۆڭۈل قويغان ئادەمگە» دىگەندەك ،نەچچە قېتىملىق ئىگىلىك تىكلەش قىيىنچىلىقىنى باشتىن كەچۈرگەن مايۈن ئاخىرىدا «ئەلى بابا» نى شان – شەرەپ ۋە غايە قىرغاقلىرىغا ئېلىپ كەلگەن. مايۈن بۇنىڭ ھەممىسىنى ئىزچىللىققا باغلىغان. شۇنىڭ بىلەن بىرگە ئۇ ئىزچىل قىزغىنلىقنى ئۆزىگە ھەمراھ قىلىپ ماڭغان.ئۇ يەنە 60 ياشقا كىرگەندىمۇ،  «ئەلىبابا» دا خىزمەت قىلىۋاتقان كىشىلەر بىلەن بىر تەرەپتە تۇرۇپ، رادىئودىن چىقىۋاتقان - «ئەلى بابا بۇ يىل يەنە پايدا ئۆلەشتۈردى، پايچېكىنىڭ قىممىتى ئۈزلۈكسىز ئۆسۈپ، پۈتۈن دۇنيا بۇيىچە ... ››– دىگەنلەرنى ئاڭلاشنى ئۈمىد قىلدىغانلىقىنى ئېيىتقان. مايۈن يەنە مۇنداق دىگەن: «شۇ ۋاقىتتىكى ھېسىياتلا ئاندىن ھەقىقىي غەلبە دەپ ئاتىلىدۇ.» مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	بەشىنچى دەرس بەشىنچى پارىگىراپ كوللىكتىپنىڭ ئوزۇن مەزگىللىك قىزغىنلىقىنى قوزغىتىڭ    مايۈن ئىلگىرى مۇنداق دىگەن: «ئىگىلىك تىكلىگۈچىنىڭ قىزغىنلىقى ناھايىتى مۇھىم، بىراق قىسقا مەزگىللىك قىزغىنلىقنىڭ پايدىسى يوق، ئوزۇن مەزگىللىك قىزغىنلىقنىڭلا ئاندىن قىممىتى بولىدۇ. بىر ئادەمنىڭ قىزغىنلىقىنىڭلا پايدىسى يوق، نۇرغۇنلىغان كىشىلەرنىڭ قىزغىنلىقى بولغاندىلا ئاندىن پايدىسى بولىدۇ. ئەگەر سىزنىڭ ۋۇجۇدىڭىز قىزغىنلىققا تولۇپ، سىز تۇرۋاتقان كوللىكتىپنىڭ قىزغىنلىقى بولمىسا، ئۇ ھالدا يەنىلا پايدىسى يوق. كوللىكتىپنى قانداق قىلىپ قىزغىنلىق بىلەن كەلگۈسىگە يۈزلىنىدىغان قىلىش، خىرىسقا تاقابىل تۇرالايدىغان قىلىش ناھايىتى مۇھىم ئىش.» بۇنىڭدىن كۆرۈۋالغىلى بولىدۇكى، مايۈن كوللىكتىپنىڭ قىزغىنلىقىنى ساقلاشقا ناھايىتى ئەھمىيەت بەرگەن.    ئۇ مۇنداق دىگەن: «بىر ئادەم ۋە بىر شىركەتنىڭ مۇنەۋۋەر ئىكەنلىكىگە ھۆكۈم قىلىشتا، ئۇنىڭ خارۋاردنىڭ، سىتەنفوردنىڭ ئوقۇغۇچىسى ئىكەنلىكىگە، ياكى شىركەتنىڭ ئىچىدە نۇرغۇنلىغان داڭلىق ئۇنىۋېرسىتىتىلارنىڭ ئوقۇغۇچىسىنىڭ بارلىقىغا ئەمەس، ئەكسىچە بۇ ئادەملەر ئىش قىلغاندا ئەسەبىيلەرچە قىلامدۇ؟ ھەر كۈنى ئىشتىن چۈشكەندە خۇشاللىق بىلەن ئۆيگە قايتامدۇ؟ دىگەنلەرگە قاراش كېرەك.»    ئۇنداقتا، قانداق قىلغاندا بىر كوللىكتىپنىڭ قىزغىنلىقىنى ئۇرغۇتۇپ، ئۇلارنىڭ ئەسەبىيلەرچە خىزمەت قىلىشىغا تۈرتكە بولغىلى بولىدۇ؟ بۇنىڭدىكى ئاچقۇچ كوللىكتىپقا رەھبەرلىك قىلغان كىشىدە، چۈنكى رەھبەرلىك قىلغۇچىنىڭ ھەربىر سۆز – ھەركىتى پۈتكۈل كوللىكتىپقا تەسىر كۆرسىتىدۇ. مۇنداق بىرجۈملە ناھايىتى توغرا ئېيتىلغان: ‹‹گەر بولسا ئىتلارغا ئارسلانلار باش، ھەممە ئىتلار بولۇرئارسلانسىمان››. شۇنداق، ئەگەر رەھبەرلىك قىلغۇچىنىڭ كۈرەش قىزغىنلىقى يۇقىرى بولسا،ئۇ يىتەكلەپ ماڭغان كوللىكتىپمۇ بۇنىڭدىن ئىلھاملىنىپ رەھبەرلىك قىلغۇچىغا ئوخشاش ھاياتىي كۈچكە تولىدۇ.    شۇنىڭ ئۈچۈن، ئەگەر سىز يېڭىدىن ئىگىلىك يارىتىشقا كىرىشكەن بولسىڭىز، ئۇنداقتا سىز چوقۇم بارلىق خىزمەتچىلىرىڭىز ۋە قول ئاستىڭىزدىكىلەرنىڭ ئالدىدا كۈلكىڭىز ۋە ھاياتىي كۈچىڭىزنى ساقلىيالىشىڭىز،ئۇلارغا سىز قىلالمايدىغان ئىشنىڭ يوقلۇقىنى بىلدۈرۈپ قويۇشىڭىز كېرەك. سىزئۆزىڭىزنىڭ ئىشەنچىڭىزنى ئىپادىلەپ چىقىشىڭىز، كۆپچىلىك نەتىجە قازانغاندا ئۇلارنى ماختىشىڭىز، قىيىنچىلىق بولغاندا ئۇلارغا ئىلھام بېرىشىڭىز كېرەك، شۇنىڭ بىلەن بىرۋاقىتتا بۇنداق روھى ھالەتنى ئەتراپتىكى سىزگە ئىشەنگەن كىشىلەرگە بەخشەندە قىلالىشىڭىز كېرەك. كۈنلەرنىڭ ئۆتۈشى بىلەن، سىزنىڭ قىزغىنلىقىڭىزنىڭ سىزگە ئېلىپ كەلگەن پايدىسى سىزنىڭ تەسەۋۋۇرىڭىزدىكىدىن كۆپ بولىدۇ، چۈنكى ھەربىر ئادەم ۋۇجۇدىدىن قىزغىنلىق ئۇرغۇپ تۇرغان، ئوچۇق – يورۇق كىشىلەر بىلەن ئالاقە قىلىشنى ياختۇرىدۇ.    ئەگەر سىزدە بىر مۇنەۋۋەركوللىكتىپ بار بولۇپ، ئاللىقاچان پايچېكلار بىلەن ھەمراھلىق مۇناسىۋىتى شەكىللەندۈرگەن بولسىڭىز، ھەمدە ھەركەتتە كەسكىن بولۇپ، سىز تۇرۋاتقان كوللىكتىپ ئىتىپاق بولغان بولسا، سىزنىڭ سىجىل يۇقىرى ئۈنۈمنى ساقلايدىغان كوللىكتىپ قۇرۇشىڭىزغا ياردەم بېرىدىغان نەرسە دەل ئىشەنچ.    بىر ئىشەنچىلىك شىركەتتە كىشىلەر تېخىمۇ كۆپ تىرىشچانلىق كۆرسىتەلەيدۇ. بىراق، سىزگە ئىشەنگەن خىزمەتچىلەردە بىر خىل قارىغۇلۇق بولىدۇ، سىز بىر خىل «پەردىشەپ» قۇرۇش ئارقىلىق بۇنى تەڭشىسىڭىز بولىدۇ. بۇ خىل چەك – چېگىرادا كىشىلەر مۇئەييەن ئەركىنلىكتىن بەھرىمان بولىدۇ، ئۇلار ئۆزىنىڭ قارارى، تاللىشى، ئوي – خىياللىرىنى ئەركىن ئىپادىلىيەلەيدۇ؛ يەنە مۇئەييەن مەسئۇلىيەت بولىدۇ، يەنى ھەقىقەتنى سۆزلەش، تەدبىر ئۈچۈن چۈشەنچە بېرىش، خاتالىق ئىچىدىن توغرىسىنى تېپىپ ئۆگىنىش قاتارلىقلار. مۇۋاپىق بولغان چەك – چېگرا بەلگىلەش ناھايىتى زۆرۈرۋە ناھايىتى ئۈنۈملۈك ئۇسۇل. خىزمەتچىلەر بۇ قائىدە تەرىپىدىن قوزغىتىلغان ۋاقىتتا، ئۇلارنىڭ ئىش ئۈنۈمى يۇقىرى كۆتۈرۈلۈشى مۇمكىن، بىراق چەك بەلگىلەشتىن بۇرۇنقى قالايمىقانچىلىق، ھەر قانداق ئىشنى باشقا ئېلىپ چىقماسلىقتەك ئىشلارغاخاتىمە بېرىلىدۇ.    كىشىلەر ئۆزى قىلۋاتقان ئىشنى ياخشى كۆرگەندە،ھەمدە ئۆزى بىلەن خىزمەت قىلىۋاتقان كىشىلەر بىلەن خۇشاللىقتىن ئورتاق بەھىرلىنەلىگەندە، ئۇلار ناھايىتى يۇقىرى ئۈنۈم بىلەن خىزمەتنى تاماملايدۇ. ئەگەرسىزنىڭ ئۆزىڭىزگە ۋە ئەتراپتىكى مۇھىتقا ئىشەنچىڭىز بولسا، ئۇنداقتا سىز جەزمەن جىددىيچىلىك ۋە ئارامبەخىشلىكنى مۇۋاپىق بىرىكتۈرسىڭىز بولىدۇ، بۇنداقتا مەسىلە ھەل قىلىشقا بولغان قىزغىنلىق دائىم سىزگە ياردەم بېرىدۇ. خۇددى سىز مۇسابىقىگە قاتنىشىشتىن بۇرۇنقى جىددى قوزغاتقۇچ كۈچكە ئوخشايدىغان كۈچنى سىز بىر مۇنەۋۋەر رەھبەرنىڭ ئالدىدىمۇ ھېس قىلالايسىز. سىز «ھەم جىددى ھەم تىنچ» كەيپىياتنى ھازىرلىغاندا، ئەمەلىيەتتە سىزنىڭ كوللىكتىپقا بەرگىنىڭىز بارلىق نەرسىلەردىن ئورتاق پايدىلىنىش ۋە ئۆز – ئارا قوللاشتىن ئىبارەت، بۇنداقتا شىركەتمۇ ئىزچىل تەرەققىي قىلالايدۇ.    ئەمما بىز يەنە بىر نۇقتىغا دىققەت قىلىشىمىزكېرەك، ۋاقىتلىق قىزغىنلىق پەقەتلا كۆپۈكلەشكەن ۋە ئەمەلىي بولمىغان ئۈمىد ئېلىپ كېلىدۇ، ئۇ ھەرگىزمۇ غايەت زور ئېنىرگىيە ھاسىل قىلالمايدۇ؛ ئەمما مەڭگۈلۈك قىزغىنلىق ئۆز – ئارا تەسىرلىشىپ تېخىمۇ قىزغىن بولغان مۇھىتنى بەرپا قىلىدۇ،بۇئارقىلىق تېخىمۇ ئىتىپاقلاشقان، ھاياتىي كۈچ ۋە ئۈمىدكە تولغان كوللىكتىپنى بەرپا قىلىدۇ. مايۈن خىزمەتچىلەرنىڭ ئاكتىپلىقىنى قوزغاشقا ناھايىتى ئەھمىيەت بېرىدىغان رەھبەر. «ئەلى بابا» ئەمدىلا قۇرۇلغاندا، مايۈن بىرئازادە مۇھىت بەرپا قىلىش ئۈچۈن،  «ئەلى بابا» دا «كۆپكۆك ئاسمان»، «پۇت تىرەپ تۇردىغان يەر»، «ئۆركەشلەۋاتقان دېڭىز» ۋە «ياپيېشىل ئورمان» بولۇشى كېرەك دەپ ئوتتۇرىغا قويغان، بۇنىڭ مەنىسى دەل تەدبىرنىڭ ئېنىق بولۇشى لازىملىقى، يەنى ھەربىر قارارنىڭ قانۇنىي ۋە ئەخلاقىي بىخەتەرلىكى بولۇشى، ساھە ۋە بۆلۈملەرنى قاپلاپ ھەركەتلىنەلەيدىغان بولۇشى لازىم دىگەنلىكتۇر. بۇنىڭ نىشانى بولسا ھەربىرخىزمەتچىگە «ئەلى بابا» نى ئۆزلىرىگە نۇرغۇنلىغان يېڭىلىق يارىتىش پۇرسىتى ۋەخۇشاللىق ئېلىپ كېلەلەيدىغان جاي دەپ ھېس قىلدۇرۇشتۇر.    مايۈن ئادەتتە ئۆزىنىڭ خۇشاللىقىنى ئىپادىلەپلا قالماستىن. يەنە دائىم بىر خىل ئازادە مۇھىت بەرپا قىلىش ئارقىلىق خىزمەتچىلەرنى خۇش قىلىدۇ. شىركەتتە، ئۇ خۇددى ھېرىپ قالمايدىغان بالىغا ئوخشايدۇ،بەزىدە خىزمەتچىلەرنىڭ ئالدىدا پەيدا بولغاندا، ناھايىتى قىزغىنلىق بىلەن كەسپ توغرۇلۇق سۆزلىشىدۇ، خىزمەتچىلەرگە توختىماستىن مەدەت  بېرىدۇ. مايۈن ئەينى ۋاقىتتا تېلفونىنىڭ قوڭغۇراقلىق مۇزىكىسىنى «بىز سوتسىيالىزم ئىزباسارلىرى»دىگەن ناخشىغا ئۆزگەرتكەن، بۇنىڭدىن ئۇنىڭ خۇشاللىق پەيدا قىلىشقا قانچىلىك كۈچىگەنلىكىنى ھېس قىلغىلى بولىدۇ.    ئەمەلىيەتتە ھەربىر ئادەمنىڭ قەلبىگە يوشۇرۇن قىزغىنلىق ئورناشقان، بىرەيلەن ئۇنىڭ قەلبىدىكى قىزغىنلىقنى قېزىپلا چىقىدىكەن، بۇۋاقىتتا ئۇ ئۆزىمۇ بىلمەيدىغان بىر خىل يوشۇرۇن كۈچ ئىپادىلىنىپ چىقىدۇ.بىركوللىكتىپنىڭ رەھبىرى دەل بۇ خىل قىزغىنلىقنى ئۇرغۇتالايدىغان ئەڭ ياخشى نامزات.«نۇرلۇق قېلىچ» ناملىق تېلېۋېزىيە تىياتىرىنى كۆرگەن ئادەملەر بىلىدۇكى، ئەترەت باشلىقى لى يۈنلوڭ ۋۇجۇدى قىزغىنلىققا تولغان ئادەم، ئۇ باشلاپ ماڭغان ئەترەتمۇ ھاياتىي كۈچكە تولغان.    مايۈن دەل شۇنداق جەلپكار سەركە. ئەينى ۋاقىتتا، «ئەلى بابا» ئۈچ يىل ھېچقانداق كىرىمگە ئېرىشەلمىگەن، خىزمەتچىلەرنىڭ ھەرئايلىق مۇئاشى پەقەت 500 يۈەن بولسىمۇ، بىراق ئۇلار ناھايىتى تىرىشىپ خىزمەت قىلغان. خاڭجۇ خۇبەن ئولتۇراق رايونىدىكى مايۈننىڭ ئۆيىدە دائىم چىراق يېنىقلىق تۇراتتى، خىزمەتچىلەر كىمنىڭ ئاز، كىمنىڭ كۆپ قىلغانلىقى بىلەن ھېسابلاشماي، يەنە500 يۈەن مۇئاش ئالغانلىقىدىن قاخشىماي تىرىشىپ ئىشلەيىتتى. مايۈننىڭ «شىركىتىمىزمۇۋەپپەقىيەت قازانغان ھامان بىزنىڭ پۇلدىن غەم قىلىشىمىزنىڭ ھاجىتى قالمايدۇ.»دىگەن بىر جۈملە سۆزى خىزمەتچىلەرنى كەلگۈسىگە بولغان تەسەۋۋۇرنىڭ قوينىغا مەھكۇم قىلغان ئىدى.    بىر ئادەمدە قىزغىنلىق بولغان ئىكەن، ئۇنىڭ ھاياتىي كۈچى ئۇرغۇپ تۇرىدۇ، باشتىن – ئاخىر بىر خىل يۇقىرىغا يامىشىدىغان ھالىتىنى ساقلايدۇ؛ بىر ئەترات قىزغىنلىققا تولغان ئىكەن، ئۇلار ھېرىپ –چارچىغىنىغا قارىماستىن ئاخىرىغىچە كۈرەش قىلىدۇ. دەل ئۇرغۇپ تۇرغان قىزغىنلىق بولغاچقا، «ئەلى بابا» ئۈچ يىللىق قىيىنچىلىقتىن بۆسۈپ ئۆتۈپ، تور سودىسىدىكى سەركىگە ئايلانغان.    شۇنىڭ ئۈچۈن بىر رەھبەر بولۇش سۈپىتىڭىز بىلەن سىزدە باشقىلارغا تەسىر قىلالايدىغان ئىقتىدار بولۇشى كېرەك. ئەگەر سىز ئىشەنچكە تولغان، خۇشاللىقنى ساقلىيالايدىغان، قىزغىنلىققا تويۇنغان ۋە ھەربىر ئادەمگە تەرەققىيات بوشلۇقى يارىتىپ بەرگەن مۇھىت بەرپا قىلالىسىڭىز، ئۇنداقتا، سىز بىر داۋاملىشىشچان،يۇقىرى ئۈنۈملۈك كوللىكتىپ قۇرۇپ چىقالايسىز، بۇ جەرياندا سىز يەنە نۇرغۇنلىغان يېڭى رەھبەرلەرنى يىتىشتۈرۈپ چىقالايسىز.    بىر ئادەمدە مەيلى قانچىلىك سەۋرچانلىق،قانچىلىك ئەقىللىق كاللا بولۇشىدىن قەتئىينەزەر، كەسىپ تاللىغان ۋاقىتتا، ئەگەركاللىسىنى ھەممە ئىشقا چاچسا، بىردەم ئۇنى بىردەم بۇنى قىلسا، ياكى زېھنىنى ئوخشاش ۋاقىتتا بىر نەچچە ئىشقا سەرپ قىلسا، ئاخىرقى نەتىجىنىڭ مەغلۇبىيەت بولۇشى ناتايىن، ئەمما ئۇنىڭ ئىشلىرىنىڭ غەلبىلىك بولۇشى تېخىمۇ ناتايىن.    بىر ئادەمنىڭ زېھنى چەكلىك بولىدۇ، شۇنىڭ ئۈچۈن ئىگىلىك يارىتىشقا ئىرادە باغلىغان ئاشۇ كىشىلەر چوقۇم ئۆزىنىڭ زېھنىنى بىر ئىشقا مەركەزلەشتۈرۈشى كېرەك. پەقەت بىر ئىشنى ئەستايىدىل قىلغان ئادەملا ئاندىن بىرئېنىق نىشانغا ئىگە بولىدۇ، ھەمدە زېھنىنى مەركەزلەشتۈرۈپ بۇ نىشانغا قاراپ ئاتلىنىدۇ. مەسىلەن: «ۋولۋىس» نىڭ نىشانى پۈتۈن مەملىكەتنىڭ ھەر قايسى جايلىرىدا«زەنجىرسىمان سېتىش دۇكانلىرى» نى بەرپا قىلىش ئىدى، شۇنداق قىلىپ ئۇلار ئۆزىنىڭ بارلىق زېھنىنى بۇ ئىشقا قارىتىپ، ئاخىرىدا بۇ نىشاننى ئەمەلگە ئاشۇرغان، يەنەكېلىپ بۇ نىشان ئۇلارنى غايەت زور نەتىجىگە ئىگە قىلغان.    «خەيبو» تەرجىمانلىق ئورنىنى سېتىۋەتكەندىن كىيىن، «جۇڭگو ئۇچۇر بېتى» دىن ۋاز كەچكەن مايۈن ئىلگىرى ئۆزىنى مەسخىرە قىلىپ مۇنداق دىگەن: «بىر شاختىن يەنە بىر شاخقا قونۇپ تۇرىدىغان كېسىلىمنى ئۆزگەرتىدىغان ۋاقىت كەلدى.» شۇنداق قىلىپ، ئۇ «ئەلى بابا» نى قۇرغان بىرىنچى كۈندىن باشلاپ ئۆزىنىڭ قىلماقچى بولغان ئىشىنى قارار قىلغان، ھەمدە بۇ نىشاندا ئاداققىچە چىڭ تۇرغان.    2003 – يىلى، «ئەلى بابا» نىڭ پايچېكى سۈنجېڭيى ئۆزى مەبلەغ سالغان بارلىق شىركەتلەرنى يىغىپ يىغىن ئاچقان، ھەمدە ھەربىرئادەمگە ئۆز شىركىتىنىڭ ئەھۋالىنى تونۇشتۇرۇشقا بەش مېنۇت ۋاقىت بەرگەن. مايۈن ئۆزىنىڭ بايانىنى قىلىپ بولغاندىن كىيىن، سۈن جېڭيى ئۇنىڭغا مۇنداق باھا بەرگەن:«مايۈن، سىز ئۈچ يىل بۇرۇن ماڭا نېمە دىگەن بولسىڭىز، ھازىرمۇ شۇنداق دىگەن بىردىن بىر ئادەم.»    بۇ مايۈننىڭ 1999 – يىلى «ئەلى بابا»شىركىتىنى قۇرۇپ چىققاندىكى ئارزۇسىنىڭ ھازىرغىچە داۋاملىشىۋاتقانلىقىنى چۈشەندۈرۈپ بەرگەن. مايۈن مۇنداق دىگەن: «مەن كۆپچىلىككە شۇنداق دىمەكچى، ئىگىلىك يارىتىش ناھايىتى ئاسان، چوقۇم بىر كۈچلۈك ئارزۇ بولۇشى كېرەك، يەنە ئۆزىنىڭ نېمە قىلماقچى بولغانلىقىنى ئېنىق ئايدىڭلاشتۇرۇش كېرەك، نېمىنى ئۆزگەرتمەكچى بولغانلىقىنى ئېنىقلىۋېلىش كېرەك. سىز بۇلارنى ئويلىشىپ بولغاندىن كىيىن، مەڭگۈ شۇنىڭدا ئىزچىل چىڭ تۇرۇشىڭىز كېرەك.»    ئىگىلىك يارىتىشتىن بۇرۇن، مايۈن جۇڭگونىڭ«دۇنيا سودا تەشكىلاتى»غا كىرىشىنى ناھايىتى بۇرۇنلا پەرەر قىلغان، بۇ جۇڭگوكەسىپلىرىنىڭ چەتئەللەرگىچە كېڭىيدىغانلىقىدىن بىشارەت بېرەتتى. شۇنىڭ ئۈچۈن،«ئەلى بابا» قۇرۇلغاندىن كىيىنكى بىرىنچى ئىش ئېنتىرنىت تورى ئارقىلىق جۇڭگوكارخانىلىرىنىڭ ئېكىسپورتىغا ياردەم قىلىش، چەتئەل كارخانىلىرىنىڭ جۇڭگوغا كىرىشىگە ياردەم قىلىش ئىدى. قايسى كارخانىلارنىڭ چەتئەل ئېكىپورتىغا ياردەم قىلىش كېرەك؟ مايۈن ئەينى ۋاقىتتا بۇ مەسىلىنىمۇ ئېنىق ئويلىشىپ بولغان، ئۇنىڭ قارىشىچە ،جۇڭگو ئىقتىسادنىڭ يۇقىرى سۈرئەتتە تەرەققىي قىلىشقا تۈرتكە بولدىغىنى ئوتتۇرا –كىچىك تىپتىكى كارخانىلار ۋە ۋە پۇقراۋى كارخانىلار ئىدى، شۇنىڭ ئۈچۈن «ئەلى بابا»ياردەمگە ھەقىقىي ئېھتىياجلى بولغان ئاشۇ كارخانىلارغا ياردەم قىلىشى كېرەك ئىدى.بۇ مايۈننىڭ ئەڭ دەسلەپكى تەسەۋۋۇرى ئىدى. مايۈننىڭ بۇ تەسەۋۋۇرى نەچچە يىللىق ئېنتىرنىت كۆپۈكچىلىكىدىن كىيىن تەۋرەنمەيلا قالماستىن، يەنە تېخىمۇ كۈچىيىپ بارغان. شۇنداق دىيىشكە بولىدۇكى، بۇ تەسەۋۋۇر مايۈننىڭ قىلماقچى بولغان بىردىن بىرئىشىنى ئايدىڭلاشتۇرغان، بۇمۇ «ئەلى بابا» نىڭ بۈگۈنگە قەدەر ماڭالىشىنىڭ،ماڭغانسىرى تېخىمۇ پۇختا قەدەم بىلەن ئالغا ئىلگىرىلەۋاتقانلىقىنىڭ سەۋەبى.    2005 – يىلى 8 – ئايدا، «ئەلى بابا» «جۇڭگو ياخو» نى سېتىۋالغان، بۇ ۋاقىتتا توردىكى ئىنكاسلار ناھايىتى كۆپ بولغان. بەزىلەر«ئەلى بابا» نىڭ «جۇڭگو ياخو» نى سېتىۋېلىشىنى «بەيدۇ» نىڭ پايچەك قىممىتىنىڭ ئۆرلىگەنلىكىدىن بولۇپ، ئۇلارنىڭ ئىزدەش ماتورىغا بولغان قىزىقىشىنى قوزغىغان دەپ قارىغان. شۇنداق قىلىپ، مەركىزى تېلېۋېزىيە ئىستانىسسىنىڭ ئىقتىساد قانىلىدا ئۆتكۈزۈلگەن 2005 – يىللىق جۇڭگو ئىقتىسادى يىللىق شەخىسلەرنى باھالاش مۇنبېرىدە،مايۈن بېيجىڭ ئۇنىۋېرسىتىتى ئىقتىساد تەتقىقات مەركىزنىڭ نۇتۇق سۆزلەش تەكلىپنامىسىنى قوبۇل قىلغان، ھەمدە نۇتۇقىدا ئۆزىنىڭ «ئەلى بابا» نىڭ ئىشلىرىنى ياخشى قىلىشقا بولغان كەسكىن ئىرادىسىنى ئىپادىلەپ بېرىپ كۆپچىلىكنىڭ ھەرخىل پەرەزلىرىگە جاۋاب بەرگەن.    ئەمما نۇرغۇنلىغان كىشىلەر بۇ قائىدىنى چۈشەنمەيدۇ، ھەمىشە قايسى سودىنى ياخشى قىلغىلى بولسا شۇ سودىنى قىلىدۇ – دە،نەتىجىدە ھېچنىمىنى قىلالمايدۇ؛ ئەكسىچە مۇۋەپپەقىيەت قازانغان ئىگىلىك تىكلىگۈچىلەر قىلغان ئىشىنى ئاخىرىغىچە داۋاملاشتۇرالايدۇ، ئۇلار ئىشنى ئەمدىلا باشلىغاندا ناھايىتى جانلىق بولىدۇ، سودىسىنىڭ تېخىمۇ يۈكسىلىشىگە ئەگىشىپ،ئۇلاردا بىر – بىردىن ئېنىق بولغان پىلانلار تۇغۇلىدۇ – دە، تېخىمۇ كۆڭۈل قويۇپ خىزمەت قىلىدۇ.    بېيجىڭ «ۋۇفۇ» چايچىلىق سارىيىنىڭ باش مۇدىرى،بېيجىڭ «فېلىت» جۇڭگو چاي شەھەرچىسىنىڭ باش مەسئۇلى دۈەن يۈنسوڭ مۇنداق دىگەن:«بىردەم ئۇنى، بىردەم بۇنى قىلىشنى ئويلايدىغان كىشىلەر ئاخىرىدا ھېچقانداق ئىشنى باشقا ئېلىپ چىقالمايدۇ. تاللاش ناھايىتى مۇھىم، ئەمما تاللاپ بولغاندىن كىيىن چوقۇم شۇنىڭدا چىڭ تۇرۇش كېرەك.» دەل مۇشۇنداق ئىدىيىنى ئۆزىگە ھەمراھ قىلغان دۈەن يۈنسوڭ نۇرغۇن قېتىملىق مەغلۇبىيەتلەردىن كىيىن غەلبىنى كۈتىۋالغان.    بۇنىڭغا نىسبەتەن، جېڭتەي گورۇھىنىڭ باش لېدىرى نەن سۈنخۇي ئىلگىرى مۇنداق دىگەن: «مەخسۇس بىر ئىشنى قىلغاندا ياخشى قىلغىلى، تېخىمۇ كۈچلەنگىلى ۋە ئوزۇن مەزگىل قىلغىلى بولىدۇ.» شۇنىڭ ئۈچۈن، جېڭتەي گورۇھى يىگىرمە يىللىق تەرەققىياتىدا قىزىقتۇرۇش ۋە زېرىكىشلەرگە بەرداشلىق بەرگەن، باشتىن – ئاخىر توك بېسىمى ئۆزگەرتكۈچ، ئېلېكتىر ئەسلىھەلىرى،ئاپتوماتلاشقان سايمانلار قاتارلىق ساھەلەردە بارغانسىرى چوڭىيىپ بارغان.    سىز ئۆزىڭىز قىلماقچى بولغان ئىشنى نۇرغۇنلىغان تارتمىلار ئارىسىدىكى بىر تارتما دەپ پەرەز قىلسىڭىز، سىز تارتمىلارنى بىر – بىرلەپ ئېچىپ باشقىلارنى قانائەتلەندۈرگەندىن كېيىن تارتمىلارنى يېپىۋەتسىڭىزلا بولىدۇ. مۇنداق شارائىتتا سىز  ھەممە تارتمىنى ئويلىسىڭىزھەرگىزمۇ بولمايدۇ، سىز چوقۇم بارلىق زېھنىڭىزنى ئۆزىڭىز تاللاپ ئېچىپ بولغان تارتمىغا قارىتىشىڭىز كېرەك.سىز بىر تارتمىنى يېپىۋەتكەندىن كىيىن، ئۇنى قايتا ئويلىماڭ. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	ئەسسالامۇئەلەيكۇم! مايۈننىڭ ئىگىلىك تىكلەش دەرىسخانىسى تور بېتىمىز تەرىپىدىن داۋاملىق تەرجىمە قىلىنىۋاتىدۇ.بۇ بىر نەچچە كۈن ئىچىدە ئالاھىدە ئەھۋال بولۇپ قالغاچقا داۋامىنى يوللىيالماي قالدۇق.ئۆزرىلىكمىز. ئاللاھ خالىسا،يەكشەنبىدىن تارتىپ داۋامىنى يوللايمىز.

WWW.UYHQT.COM

	بەشىنچى دەرس ئالتىنچى پارگىراف ئادەمنىڭ ھاياتى ئىگىلىك تىكلەش بىلەن ئۆتىدۇ مايۈن مۇنداق دىگەن: «مەن  ئادەمنىڭ ھاياتىنىڭئىزچىل ئىگىلىك تىكلەش بىلەن ئۆتىدىغانلىقىغا ئىشىنىمەن، ئىلگىرى شىنجىندا ‹ھاياتلىقتا ئۈچ قېتىم ئىگىلىك تىكلەش› دىگەن شۇئار تارقالغان، مەن بۇنىڭغا ئانچە قوشۇلمايمەن، ئادەمنىڭ ھاياتى ئىگىلىك تىكلەشنىڭ بىرىنچى كۈنىدىن باشلاپ ئىزچىل ئىگىلىك تىكلەش بىلەن ئۆتىدۇ.»    مايۈننىڭ قارىشىچە ئىگىلىك تىكلىگۈچى ئىگىلىك تىكلەشنى تاللىغان ئىكەن، چوقۇم ئىزچىل داۋاملاشتۇرىشى كېرەك. ۋاقىتلىق مەغلۇبىيەت ھەرگىزمۇ مەڭگۈلۈك يوقىتىشقا باراۋەرئەمەس؛ ۋاقىتلىق غەلبىمۇ ھەرگىز مەڭگۈلۈك غەلبە قازانغانغا باراۋەر ئەمەس. پەقەت ئۇلۇغ غايە تۇرغۇزغاندىلا، ھەمدە يۈكسەك غايىدە ئىزچىل چىڭ تۇرغاندىلا ئاندىن ئەڭ چوڭ غەلبىنى قولغا كەلتۈرگىلى بولىدۇ.    «ئالما»كومپيۇتېر شىركىتىنىڭ قۇرغۇچىسى، ئىلگىرىكى باش لېدىرى سىتىف. جوبس 20 ياش ۋاقتىدىن باشلاپ ئىگىلىك تىكلەشنى باشلىغان. ئۇ ۋە ئۇنىڭ ھەمراھلىرى دەسلەپتە ماشىنا ئىسكىلاتىدا ئىش باشلىغان، 10 يىللىق بوران – چاپقۇنلارنى باشتىن كەچۈرگەندىن كىيىن، ئۇ «ئالما» شىركىتىنى 4000 دىن ئارتۇق خىزمەتچى خادىمغا ئىگە،بازار باھاسى ئىككى مىليارد ئامېرىكا دوللىرى بولغان خەلقئارالىق شىركەتكە ئايلاندۇرغان.    ئادەمنىڭ ئەقلى يەتمەيدىغىنى، جوبس 30 ياش ۋاقىتىدا ئۆزى قۇرغان شىركەتتىن ھەيدەپ چىقىرىلغان. جوبس مۇنداق دىگەن: «شۇنداق قىلىپ، مەن ئىلگىرى پۈتكۈل ھاياتىم بەدىلىگە ئېرىشكەن نەرسىلىرىم بىر كېچىنىڭ ئىچىدىلا غايىب بولدى، مەن ئۇ چاغدا ئۆزۈمنى ماڭىدىغان يولۇم قالمىغاندەك ھېس قىلدىم. كىيىنكى بىر نەچچە ئايدا، مەن ئۆزۈمنىڭ نېمە ئىش قىلسام بولىدىغانلىقىنى بىلەلمىدىم. مەن جامائەتچىلىكنىڭ نەزىرىدىكى ناھايىتى پاسسىپ ئۈلگىگە ئايلاندىم، ھەتتا ھەممە نەرسىدىن ۋازكېچىشنىمۇ ئويلىدىم.»    ھەقىقەتەن،مايۈننىڭ دىگىنىگە ئوخشاش، ئىگىلىك تىكلىگۈچىلەر ئىگىلىك تىكلەشنىڭ بىرىنچى قەدىمىدىن باشلاپ ئىزچىل داۋاملاشتۇرۇشى كېرەك. مەيلى مەغلۇب بولۇشىدىن ياكى مۇۋەپپەقىيەت قازىنىشىدىن قەتئىينەزەر ئىزچىل بولۇش كېرەك. سىز تۇغۇلۇشنى تاللىغان ئىكەنسىز، چوقۇم ئىزچىل ياشىشىڭىز كېرەك. بەزىدە تۇرمۇشمۇ بىرخىل پاسسىپلىق،كارخانىمۇ بىرخىل پاسسىپلىق، ئەمما بۇ خىل پاسسىپلىقنى ئاكتىپلىققا ئۆزگەرتىدىغان ئەڭ ياخشى ئۇسۇل بولسا قىزغىنلىقىمىزنى ئۇرغىتىپ، ئىزچىل داۋاملاشتۇرۇشتىن ئىبارەت.    خۇددى جوبسنىڭ ھېكايىسىنىڭ بىزگە بەرگەن ئىلھامىغا ئوخشاش، گەرچە مۇدىرىيەت ئۇنى ئىنكارقىلغان بولسىمۇ، بىراق ئۇ ئىزچىل سۆيگەن كەسىپ ئۇنى ئىنكار قىلمىغان، شۇڭا جوبس ھەممىنى قايتىدىن باشلاشنى قارار قىلغان. كىيىنكى بەش يىلدا،جوبىس NeXT ۋە Pixarقاتارلىق ئىككى شىركەتنى قۇرغان. Pixar غايەت زور مۇۋەپپەقىيەت قازىنىپ، دۇنيادىكى پۈتۈنلەي كومپيۇتېر ئارقىلىق ئىشلەنگەن تۇنجى كارتون فىلىم - «ئويۇنچۇق خادىملار» نى ئىشلەپ چىققان. ئۇنىڭدىن كىيىن، بۇ شىركەت «ئالما» شىركىتى تەرىپىدىن سېتىۋېلىنغان، شۇنىڭ بىلەن جوبسمۇ «ئالما»شىركىتىگە قايتىپ كەلگەن. NeXT تەرەققىي قىلدۇرغان تېخنىكا «ئالما كومپيۇتېرى» نى تەرەققىي قىلدۇرۇشتىكى يادروغا ئايلانغان.    جوبس ئىلگىرى مۇنداق دىگەن: «مەن شۇنداق جەزملەشتۈرىمەنكى، ئەگەر (ئالما) شىركىتى مېنى ھەيدىۋەتمىگەن بولسا، بۇنداق ئىش ھەرگىز يۈز بەرمەيىتتى. گەرچە بۇ كەچۈرمىش ناھايىتى ئاچچىق بولسىمۇ، بىراق ئۇ كىيىن (ئالما) شىركىتىنى قۇتقۇزۇپ قالغان(خىسلەتلىك دورا) غا ئايلانغان.»    مايۈن شۇنداق دىگەن: «بۈگۈن ناھايىتى ئېچىنىشلىق، ئەتە تېخىمۇ تراگىدىيىلىك، ئەمما ئۆگۈن ناھايىتى گۈزەل بولىدۇ، بىراق ناھايىتى كۆپ قىسىم كىشىلەر ئەتە كەچتىلا ۋازكېچىۋىتىدۇ، شۇڭا ھەربىر ئادەم مەڭگۈ بۈگۈندىن ۋاز كەچمەسلىكى كېرەك.» ئىگىلىك تىكلەش يولىدا مېڭىۋاتقان ئاشۇ كىشىلەر چوقۇم مايۈننىڭ بۇ سۆزلىرىنى ئېسىدە چىڭ تۇتۇشى كېرەك، ھەرگىزمۇ ئۈمىدسىزلىنىشكە بولمايدۇ، چوقۇم ئىزچىل داۋاملاشتۇرۇش كېرەك، شۇنداق قىلغاندىلا ئاخىرقى غەلبە بىزگە قاراپ قۇچاق ئاچىدۇ. مايۈن شۇنداق دىگەن: «ئەينى ۋاقىتتا، نۇرغۇنلىغان كىشىلەر ‹ئەلى بابا›نىڭ مۇۋەپپەقىيەت قازىنىشى تۈمەن توننا كېلىدىغان كېمىنى ھىمالايا تېغىغا ئەپ چىققانغا باراۋەر دىگەن. مەن خىزمەتداشلىرىمغا بىزنىڭ ۋەزىپىمىزبۇ كېمىنى تاغ چوققىسىدىن تاغ تۈۋىگە ئېلىپ چۈشۈش دەپ چۈشەندۈردۈم. باشقىلارنىڭ ئېغىزىنى ئىتىۋالغىلى بولمايدۇ، بىراق سىزچوقۇم ئۆزىڭىزنىڭ نەگە بارىدىغانلىقىڭىزنى، جەمئىيەتكە قانداق قىممەت يارىتالايدىغانلىقىڭىزنى بىلىشىڭىز كېرەك. مېنىڭ خىزمەتداشلىرىم ۋە دوستلىرىم ياش تۆكۈپ باققان بولۇشى مۇمكىن، بىراق مەن ئۇنداق قىلىپ باقمىغان، چۈنكى كۆز يېشىنىڭ ھېچنىمىگە پايدىسى يوق.»    گەرچە ھازىر كۆپچىلىك «ئەلى بابا» ناھايىتى چوڭ مۇۋەپپەقىيەتلەرگە ئېرىشتى دىيىشىۋاتقان بولسىمۇ، بىراق مايۈن خىزمەتچىلەرنى سىرتقى دۇنيانىڭ ماختاشلىرىغا پەرۋا قىلماسلىققا بۇيرۇيدۇ، چۈنكى ئۇنىڭ نىشانى 102 يىللىق تارىخقا ئىگە شىركەت قۇرۇش. مايۈن مۇنداق دىگەن: «ئەگەر بىر كۈنى سىز بىرەر ژۇرنالنىڭ مۇقاۋىسىغا چىقسىڭىز، ئۇنى مەن بىركۆڭۈل ئېچىش ژۇرنىلىنىڭ مۇقاۋىسىغا چىقتىم دەپ ئويلاڭ. ھەرگىزمۇ ئۇنى مۇۋەپپەقىيەت دەپ ئويلىماڭ، مۇۋەپپەقىيەت ۋاقىتلىق بولىدۇ، مۇۋەپپەقىيەت ئۈچۈن تۆلىگەن بەدەل بولسا ناھايىتى چوڭ بولىدۇ.»    مايۈننىڭ بۇسۆزلىرى دەل ئۇ دەسلەپتە ئېيىتقان «ئىگىلىك تىكلەش  ئۆمۈرلۈك ئىش» دىگەن سۆزلىرىنى چۈشەندۈرۈپ بەرگەن. دەسلەپتىلا، ئۇ ئېنتىرنىت تورى بىر قېتىملىق ئوزۇن سەپەر دەپ قارىغان. تاللىغان ئىكەنسىز، سىز تاللىشىڭىزدا چىڭ تۇرۇشىڭىز كېرەك!ئىگىلىك تىكلىگۈچىنىڭ چېكىنىش يولى بولمايدۇ، ئەڭ چوڭ مەغلۇبىيەت بولسا ۋاز كېچىش.    شۇنىڭ ئۈچۈن،مايۈن قىلچە ئىككىلەنمەستىن 80 يىللىق، 102 يىللىق تارىخقا ئىگە شىركەت قۇرۇش پىلانلىرىنى تۈزگەن، بۇ نۇقتا يەنە بىر قېتىم مايۈننىڭ «ئوزۇن سەپەر پىسخىكىسى» نى ئەكىس ئەتتۈرۈپ بەرگەن.    2001 –يىلى، مايۈن تورداشلارنىڭ سۇئاللىرىغا جاۋاب بەرگەندە مۇنداق دىگەن: «تور يېڭىدىن گۈللىنىۋاتقان كەسپ، ئۇ كەلگۈسىدە دۇنيانى ئۆزگەرتىدۇ... مەن ئېنتىرنىت تورى ۋە تور سودىسىنىڭ بىر – ئىككى يىل ئىچىدە مۇۋەپپەقىيەت قازىنالايدىغانلىقىغا ئىشەنمەيمەن، ئۇنىڭ مۇۋەپپەقىيەت قازىنىشىغا 10 يىل، ھەتتا 20 يىل ۋاقىت كېتىدۇ.ئۇنى باشلاش ئاسان، داۋاملاشتۇرۇش تەس. بۇ قېتىملىق ئوزۇن سەپەردە، پەقەت سىزنىڭ ئىرادىڭىز قەتئىي بولسىلا، نەزەر – دائىرىڭىز ئۈستۈن بولىدۇ – دە، خۇشاللىق ۋە ئازابقا كۈلۈپ تۇرۇپ مۇئامىلە قىلالايسىز؛ پۇلنى بەك چوڭ بىلىپ كەتمىسىڭىزلا،تېخىمۇ كۆپ پۇل تاپالايسىز؛ پەقەت باشقىلارغا قىممەت يارىتالىسىڭىزلا ئاندىن پۇل تاپالايسىز.»    گەرچە ئىگىلىك تىكلەش يولىنىڭ ناھايىتى جاپالىق ئىكەنلىكىنى بىلىپ تۇرسىمۇ، مايۈن پەقەت غايە، ئىزچىل تىرىشچانلىق ۋە توختىماستىن ئۆگىنىش بولسىلا مۇۋەپپەقىيەتنىڭ قىرغاقلىرىغا يىتىپ بارغىلى بولىدۇ دەپ قارايدۇ. مۇۋەپپەقىيەت قىرغاقلىرىغا بىرئۆمۈر ۋاقىت سەرپ قىلغاندا ئاندىن بارغىلى بولىدۇ، ھەتتا مۇۋەپپەقىيەت قازانغان تەغدىردىمۇ بۇنىڭ ئەڭ ئاخىرقى غەلبە بولۇشى ناتايىن، ئىگىلىك تىكلىگۈچىلەر بۇنىڭغا نىسبەتەن ئاگاھ ۋە دانا بولۇشى كېرەك. ئىگىلىك تىكلەشنى تاللىغان ئىكەنمىز،ئارقىغا يېنىشقا بولمايدۇ، بۇ ئىگىلىك تىكلىگۈچىنىڭ بىر ئۆمۈر ئىگىلىك تىكلىشىدىن دېرەك بېرىدۇ. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	6-باب ئىگىلىك تىكلەش خام خىيال ئەمەس، پۇختىلىق  ھامان مېۋە بېرىدۇ بىرىنچى پارگىراف:   ئېشنى چوڭ باشلىۋالماي ياخشى باشلاش كېرەك «كۆڭلىڭىز بولمىسا ئاۋارە قىلماڭ»پىروگىراممىسىنىڭ رىياسەتچىسى مىڭ فېي : «كۆپلىگەن ئەر مېھمانلار ئۆزىنىڭ بۇنىڭدىن كېيىنكى پىلانلىرىنى دېگىنىدە ھەممىسى ‹مېنىڭ شىركىتىمنى كۈچەيتىش ئارزۇيۇم بار›، ‹ مېنىڭ نىشانىم كەلگۈسى بەش يىلدا شىركەتنى بازارغا ئېچىۋېتىش ›دېگەندەك سۆزلەرنى قىلىدۇ. دەرھەقىقەت بۇ نۇرغۇنلىغان ئىگىلىك تىكلىگۈچىلەرنىڭ كۆڭلىدىكى ئۇلۇغ ئارزۇ بولۇپ، ئۇلار گەرچە ئىگىلىك تىكلەشكە ئەمدىلا قەدەم باسقان بولسىمۇ، كۆڭلىگە ئالەم شۇمۇل ئارزۇلارنى پۈككەن. بۇنى بىر يامان ئىش دېگىلى بولمىسىمۇ، غەلبە قىلىش ئستىكى ئۇلارنىڭ كۆڭلىنى چۇلغىۋالسا كونكىرىت ئەمەلىيەتتىن ئاسانلا چەتنەپ كېتىدۇ» دېگەن ئىدى. مايۈن ئىگىلىك تىكلىگۈچىلەرنى :« بىر مۇنەۋۋەر ئىگىلىك تىكلىگۈچى،قەدەمنى چوڭ ئەمەس ياخشى  بېسىشى، ئۆزى قىلىۋاتقان ئىشنىڭ نازۇك ھالقىلىرىنىڭ ئىجراچانلىقىغا دىققەت قىلىش لازىم» دەپ ئاگاھلاندۇرىدۇ.   بۈگۈنگە قەدەر، ئەگەر سىز «خەيبو تەرجىمىچىلىكى » نىڭ باش بېتىگە كىرسىڭىز، تۆۋەندىكىدەك تونۇشتۇرۇش قۇرلىرىنى كۆرەلەيسىز. «خەيبو تەرجىمىچىلىكى 1994-يىلى 1-ئايدا مايۈن ئەپەندى تەرىپىدىن قۇرۇلغان،  سودا- سانائەت تارماقلىرى تەرىپىدىن ئەنگە ئېلىنغان كەسپى تەرجىمانلىق ئورگىنى، شۇنداقلا خاڭجۇدا تۇنجى قۇرۇلغان كەسپى تەرجىمانلىق ئۇيۇشمىسى.خەيبو تەرجىمىچىلىكى يېڭىدىن قۇرۇلۇپلاخاڭجۇ شەھرى  ھۆكۈمەت گۇۋاھلىق بېرىش ئورنىنىڭ بېكتىلگەن تەرجىمانلىق ئورنىغا ئايلانغان،كۆپ يىللاردىن بۇيان ئۇلار تېز،توغرا قىلىش، قەتئىي سىر ساقلاش، ئەتراپلىق مۇلازىمەت قىلىش ئارقىلىق گۇۋاھلىق ئورگىنىنىڭ ئىشەنچىسىگە ئېرىشىكەن ھەمدە جېجىياڭ ئۆلكىسى ئەدلىيە نازارىتى جامائەت گۇۋاھلىق ئۇيۇشمىسى بىلەن تەرجىمە ھەمكارلىقى مۇناسىۋىتى ئورناتقان.   تەرجىمانلىق بىرلەشمىسى قۇرۇلغاندىن بۇيان باشتىن-ئاخىر خېرىدار ۋە ئېشەنچنى بىرىنچى ئورۇنغا قويۇپ، سۈپەتكە كاپالەتلىك قىلدى، مۇلازىمەتتە مۇكەممەللىكنى قوغلىشىپ كۆپ خېرىدارغا ئىگە بولدى. ئۇيۇشمىدا ياخشى تەرجىمانلار  بولۇپلا قالماي يەنە بىر تۈركۈم قولىدىن ئېش كېلىدىغان ئارقا سەپ خادىملىرى بار بولۇپ، ئون نەچچە يىلدىن بېرى، ئۇلار پۇختا قەدەم بىلەن، خلمۇ-خىل بوران-چاپقۇنلارنى بىرمۇ- بىر بېسىپ ئۆتۈپ گۈزەل ئەتىنى كۈتىۋالدى››.   گەرچە مايۈن تەرجىمىچىلىكتىن ئايرىلغان بولسىمۇ مايۈننىڭ بۇ خىل پۇختىلىقى، غەيرىتى تەرجىمە سېپىدىكى كىشلەرنىڭ ئارىسىدا قالدى. مايۈن مانا مۇشۇنداق ئادەم بولۇپ باشتىن-ئاخىر پۇختىلىق، تىرىشچانلىق بىلەن بار كۈچىنى كىچىك بىر شىركەت قۇرۇپ چىقىشقا سەرپ قىلدى.   مايۈن  ئىگىلىك تىكلەشنى بالا بېقىشقا ئوخشىتىپ، ئۇنىڭ تۇغۇلۇپلا پۇل تېپىپ ئائىلىنى قامدىشىنى ئۈمىد قىلىپ كەتمىدى.ئۇ  توختىماستىن ئوزۇقلۇق ۋە تەلىم بەرگەندە ئاندىن بۇ بالىنى ياراملىق چوڭ قىلغىلى بولىدۇ- دە ،پۇلمۇ ھامان بىر كۈنى ئۆزلىكىدىن كېلىدۇ دەپ قارىدى.   ئۇنداقتا قانداق قىلىپ خۇددى بالا باققاندەك شىركەتنى ياخشى باشقۇرغىلى بولىدۇ؟ مايۈننىڭ بىزگە بەرگەن تەكلىپى:« ئالدى بىلەن بىرنۇقتىنى چىڭ تۇتۇش ».   بىر نۇقتىنى چىڭ تۇتۇش دېگىنىمىز- قىلىدىغاننى قىلىش، قىلمايدىغاننى قىلماسلىق دېگەنلىك بولۇپ بۇ نۇقتا ئىنتايىن مۇھىم.ئەگەرشىركەت تېخى ئورنىدىن دەس تۇرىۋالماي تۇرۇپلا كۆپ مەنبەلىشىشنى قوغلاشسا كىچىك شىركەت ئەمەس چوڭ شىركەتمۇ مەغلۇبىيەتنىڭ مىسالى بولۇپ قالىدۇ.شۇڭا كىچىك شىركەت بىر نۇقتىنى چىڭ تۇتۇپ مۇستەھكەم بىر باشقا ئېلىپ چىققاندا ئاندىن تېخىمۇ كۆپ مەنبەگە ئىگەبولغىلى بولىدۇ.كىچىك شىركەت ھەممە تۈرگە قول سېلىپ يۈرسە، كارخانا بايلىق مەنبەسىنى ئىسراپ قىلىدۇ خالاس.   ھەممىمىزگە تونۇش بولغان 3721تورى، خەنزۇچە تورغا چىقىش، خەنزۇچە ئىزدەش بىلەن  ئىزچىل تۈردە ئالتە يىل شۇغۇللاندى. ئۇنىڭدىن باشقا  百度،GOOGLE  قاتارلىقلارمۇ بىرنۇقتىنى چىڭ تۇتشنىڭ ئۈلگىلىرى. شىركەت باشقۇرۇشتا بەلگىلىك تەجىربىگە ئىگە بولغاندىلا ئاندىن شىركەتنى توغرا يۆلىنىشتە كىڭەيتكىلى بولىدىغان بولۇپ، بۇ خىل تەجىربە ئادەم كۈچى، مەنبە، مەبلەغ قاتارلىقلارنى ئۆز ئىچىگە ئالىدۇ.   ئەتراپىمىزدىكى نۇرغۇنلىغان ئىگىلىك تىكلىگۈچىلەرنىڭ مەغلۇب بولۇشىدىكى سەۋەپ- ئۇلاردا تەجىربە، مەبلەغ... كەمچىل بولماستىن بەلكى ئۇلارنىڭ كۆپ قىسمىنىڭ بىر نۇقتىنى چىڭ تۇتالمىغانلىقىدىن ئىبارەت .چۈنكى ئىگىلىك تىكلىگۈچىلەر ئۆزىدىكى قانائەتسىزلىك تەرىپىدىن يېتىلىنىپ، بۈگۈن بۇ يەرنى كولاپ بېقىپ، ئەتە ئۇ يەرنى كولاپ بېقىپ، ئەڭ ئاخىردا ھېچيەردىن سۇ چىقىرالماي پەقەت نۇرغۇنلىغان ئورەكلەرگىلا ئېرىشىدۇ.   ئىككىنچىدىن ئىگىلىك تىكلىگۈچىلەر يەنە بىر خىل ئىقتىدارغا  يەنى دەۋر بىلەن تەڭ ئىلگىرلەش روھىغا ئىگە بولۇشى كېرەك.   بەزى ئىگىلىك تىكلىگۈچىلەرنىڭ مەنمەنچىلىكى ئۇلارنىڭ غەلبە قازىنالماسلىقىنىڭ سەۋەبى بولۇپ، ئۇلار غەلبە قازانغۇچىلارنىڭ ئارتۇقچىلىقلىرىنى ئۆگەنمەيدۇ، ئۇلارنىڭ تەكلىپىگە قۇلاق سالمايدۇ. ئەمەلىيەتتە بىر ئىگىلىك تىكلىگۈچىنىڭ تەجىربىسىنىڭ كەمچىل بولۇشى قورقۇنۇچلۇق بولماستىن، مۇھىم بولغىنى كەمتەرلىك، ئۆزىنى ئىسلاھ قىلىپ تۇرىدىغان ئۆگىنىش روھىدۇر.   ئۈچىنچىدىن، بىر شىركەتنى ياخشى يۈرۈشلەشتۈرىمەن دەيدىكەنمىز مۇئەييەن ئىجرا قىلىش كۈچىگە ئىگە بولۇشىمىز لازىم. بەزىلەر ئىش قىلمىغان چاغدا قۇرۇق گەپ سېتىپ ئاغزىدا شەھەر ئالىدۇ، ئەمەلىي ئىشقا كەلگەندە بولسا ئارمانغا چۈشلۇق دەرمان يوق. قارىماققا ئۇلارنىڭ كاللىسى يېڭىلىققا تولغان، ھەممىسى شۇنداق ئورۇنلۇق، لېكىن ئەمەلدە كۆرسىتەلمەيدۇ.   بىلىش كېرەككى، خىيال پەقەت بىر باشلىنىشتىنلا ئىبارەت بولۇپ، قۇرۇق خىيالنى ھىچكىم پۇلغا ئالمايدۇ. ئورنىمىزدا ئولتۇرساق بىردەمدە نەچچە خىل چارە ئويلاپ تاپقىلى بولىدۇ، مۇنداقلا ئويلىساق بىردەمدە دۇنيانى نەچچىنى چۆگلەپ چىقىمىز.ئەمما پەقەت ھەركەتلا ھەممىدىن مۇھىم. ئىگىلىك تىكلىگۈچىلەر مۇشۇ خىل ئىقتىدار ،تەجىربە ۋە ئىجرا قىلىش كۈچى ئۆزىدە بارمۇ يوق ،دىگەن مەسىلە ئۈستىدە ئويلىنىش كېرەك. ئوخشاش بىر خىل ئىشنى قىلغان ئىككىيلەننىڭ قايسىنىڭ تەجىربىسى مول، ئىجرا قىلىشچانلىقى كۈچلۈك بولسا شۇ تېخىمۇ ئاسان غەلبە قازىنالايدۇ.   ئاخىرىدا دەيدىغىنىمىز،يېڭىدىن ئىگىلىك تىكلىگۈچىلەر يەنە چوڭ شىركەتلەرنىڭ ئۇسۇلىنى كۆچۈرۈپ ئەكەلمەسلىكى ۋە دورىماسلىقى لازىم.   توربەت قۇرۇشنى مىسالغا ئالساق،  شىنلاڭ، سوۋخۇغا ئوخشاش بىرقىسىم توربەتلەر  چوڭ شىركەتلەرنىڭ ئۇسۇلى بويىچە بىر تۈركۈم قائىدىلەرنى تۈزۈپ چىققان بولۇپ،چوڭ شىركەتلەرگە ئوخشاش ئۇزاق مۇددەت پۇت تېرەپ تۇرۇش ئۈچۈن مۇشۇنداق قىلغان . بىر قىسىم چوڭ شىركەتلەرنىڭ ئادەتتە بىر قەدەر ئۇزاققا سوزۇلغان پىلانى بولۇپ، ئۇلارنىڭ بۇنىڭغا بەرداشلىق بەرگۈچىلىكى بار. بىراق كىچىك شىركەتلەرنىڭ بۇنىڭغابەرداشلىق بەرگۈدەك دەسمايىسى يوق.   مايۈن توشقان بىلەن پىلنىڭ مۇنداق ھېكايىسىنى سۆزلەپ ئۆتكەن: پىل ۋە تۆگە ئۈچ كۈنگىچە بىر نەرسە يېمىسىمۇ ھېچنىمە بولمايدۇ، بىراق كىچىك توشقان ئۇنىڭغا ئوخشىمايدۇ.كىچىك شىركەتلەر  خۇددى توشقانغا ئوخشاش بولۇپ،ئۇلار ھەربىر قەدەمنى تىزئېلىشى، ھەر تەرەپتىن ئوزۇقلۇق ئىزدىشى كېرەك. ھالبۇكى  يېڭىدىن قۇرۇلغان كىچىك شىركەتلەر ئەنە شۇ توشقانغا ئوخشاش ئاجىز تۇرۇقلۇق ئۆزىنى پىل چاغلاپ، پىلنىڭ ئىدىيىسى بويىچە ئىش قىلىسا ھامان ئاۋارىچىلىققا يۇلۇقىدۇ.چۈنكى سەن بۆرىگە دۇچ كەلگەندە ئۇنىڭ ئالدىدا تىزقاچمىساڭ، ھامان بۆرىگە يەم بولىسەن.شۇڭا ئىگىلىك تىكلەش سەندىن ئىگىلىك تىكلەشكە ماس كېلىدىغان ئىش قىلش ئۇسۇلىنى تەلەپ قىلىدۇ.   ئەگەر بىز چوڭ شىركەت بىلەن ئوخشاش ئىش قىلساق،ئۇلارنىڭ  ئەمەلىي كۈچى ناھايتى زور بولغان ئەھۋال ئاستىدا بىزگە ھېچقانداق پايدىسى يوق. شۇڭا بىزبارلىق ساھەنى بىر خەرىتە دەپ قارىساق، ئۇنداقتا بىز قايسى ساھەنى باشقىلارئىگىلەپ بولدى، كىمنىڭ قانداق ئەۋزەللىكى بار دىگەنلەرگە دىققەت قىلىپ خەرىتگە ئېلىنمىغان ئىشلارغا قول تىقىشىمىز كېرەك. مەسىلەن، نەچچە يىل بۇرۇن ھەممەيلەن بۇ ھەقتە ئىزدىنىشكە ئانچە ئېتىبار بېرىپ كەتمىگەن بولسا ،مانا بۈگۈن كىشىلەر بۇ نوقتىغا ئالاھىدە ئېتىبار بىرىدىغان بولدى . شىركەت قۇرۇپلا ھەممىنى يۇتىۋېلىشنى، موللاق ئاتقۇزۇشنى ئويلاش ئەمەلىيەتكە ئۇيغۇن كەلمەيدۇ. كىچىك شىركەتلەر چوڭ شىركەتلەر بىلەن ھەمكارلىشىشنى، دوسلىشىشنى ئۆگىنىشى كېرەك .چۈنكى ئىگىلىك زەنجىرىدە باشقىلار بىلەن ھەمكارلاشقاندىلا ئاندىن غەلبە قەدىمىنى تېخىمۇ تىزلەتكىلى بولىدۇ. ئەگەر سىز ھازىرمۇ بۇ ئىقتىدارلارنى يېتىلدۈرمىگەن بولسىڭىز ئەڭ ياخشىسى ئىگىلىك تىكلەيمەن دىمەي باشقىلار ئۈچۈن ئىشلەپ، شىركەتتىكى ئۆزىڭىز قىلىشقا تىگىشلىك ئىشلارنى ياخشى قىلىڭ .بۇ جەرياندا ئۆزىڭىزنىڭ ئىقتىدارىنى ئۆستۈرۈپ، مۇشۇ ئارقىلىق ئىگىلىك تىكلەشنىڭ يۆلىنىشىنى تېپىۋالالايسىز. مۇنداق بولغاندا قارىماققا سىز باشقىلار ئۈچۈن ئىشلىگەن بىلەن ،ئەمەلىيەتتە شىركەت سىزنىڭ  ئوقۇش پۇلىڭىزنى تۆلەپ سىزنى ئۆگىنىش مۇھىتى بىلەن تەمىنلەيدۇ. شۇنىڭ بىلەن بىر ۋاقىتتاسىز مۇشۇ سەھنە ئارقىلىق مول تەجىربە، ئەمەلىي بىلىم توپلىيالايسىز. ھەممە تەرەپتىن پىشىپ يېتىلگەندىن كېيىن ئاندىن ئىگىلىك تىكلەشكە ئاتلانسىڭىز غەلبە قىلىش مۇمكىنچىلىكىڭىز شۇنچە چوڭ بولىدۇ. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى: WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام

WWW.UYHQT.COM

	ئالتىنچى دەرس ئىككىنچى پارىگىراف    ياخشى مەھسۇلات توساتتىن كىلىپ قالغان ئەقىل بىلەنلا بارلىققا كەلمەيدۇ مەھسۇلات سۈپىتى كارخانىنىڭ جېنى، سودا رىقابىتىدە غەلبە قىلىشنىڭ كاپالىتى. ئىگىلىكنىڭ مەۋجۇت بولۇپ تۇرىشى ۋە تەرەققىياتىنڭ ئاساسى. ئەمەلىيەت ئىسپاتلىدىكى، بىر ئىگىلىك تىكلىگۈچى تاللىغان تۈر ئەگەر سۈپەت ئۆتكىلىدىن ئۆتەلمىسە،ئۇ قانچىلىك ئىستىقباللىق كەسىپ بولىشىدىن قەتئىي نەزەر،ئۇنىڭ كىشىنى مەھلىيا قىلىدىغان سىرىتقى قىياپىتى ،ئادەمنى تەسىرلەندۈرىدىغان ئەتراپلىق مۇلازىمىتى بولغان تەقدىردىمۇ ھېچقايسسى ئەسقاتمايدۇ، بۇ كەسىپ ۋە ئىگىلىك تىكلىگۈچى مەغلۇبىيەتكە يۈزلىنىدۇ. سۈپەت ياخشى بولغاندىلا ئاندىن قالغانلىرىدىن ئېغىز ئاچقىلى بولىدۇ.   «جوڭگودىكى رىقابەت» پىروگىراممىسىدا  ۋاڭ لىۋىي ئىسىملىك  چاي ساتىدىغان بىر ماھىربىلەن مايۈننىڭ مۇنداق بىر دىئالوگى بار: ۋاڭ لىۋىي: پۇئىر چېيىنى سېتىشتا ئۇنىڭ جۇڭگودىلا ئىشلەپچىقىرىلىپ دۇنياغا داڭ قازانغان ئەۋزەللىكى،كىشلەرنىڭ ئىستىمال قىزغىنلىقىدىن ئىبارەت ئىككى نوقتىنى چىڭ تۇتۇپ، پىشىپ يېتىلگەن ئەنئەنىۋى سودا ئۇسۇلىدىن پايدىلىنىپ بۇ چاينى ئىستىمالچىلارغا تېخىمۇ تونۇتۇش كېرەك.   مايۈن: بەزىلەر ماڭا ‹پۇئىر چېينىڭ ئاشقازانغا شىپالىق ئۈنۈمى بار، چاي قانچە سەت كۆرۈنسە شۇنچە ياخشى›دەيدۇ. سىلەرچاينىڭ ئەۋزەللىكىنى كۆپتىرىۋەتتىڭلارمۇ ياكى ھەقىقەتەن شۇنداق ياخشىمۇ؟ ۋاڭ لىۋېي: چاي سودىسىدا كىشىلەردە « چاي بۇ يىل گۆھەر، كىلەر يىلى پاخال»  دەيدىغان قاراش بار، ئەمما بۇ گەپ پۇئىر چېيىدىن باشقاچايلارغا قارىتىلغان .....چۈنكى داۋگۇاڭ يىلىدىن ھازىرغىچە ساقلاپ كەلگەن ئالتە توننا پۇئىر چېيى ياخشىلىقىدىن باھاسىغا يەتكىلى بولمايدىغان دەرىجىگە يەتتى.   مايۈن: مېنىڭ سوئالىم، پۇئىر چېيى ھەقىقەتەنمۇ شۇنداق ياخشىمۇ ياكى كۆپتىرىۋېتىلگەنمۇ؟   ۋاڭ لىۋېي: ھەقىقەتەن شۇنداق ياخشى، ئەلۋەتتەبەزى كۆپتىرىۋېتىشلەرمۇ بار.   مايۈن: مۇھىم مەسىلە پۇئىر چېيىنىڭ سۈپەت مەسىلىسى، سۈپەتكە كاپالەتلىك قىلىنغاندا ئاندىن پىلان ئەمەلگە ئېشىشى مۇمكىن،مېنىڭ قارىشىمچە سۈپەت بولمىسا پىلانلىرىمىز ئەمەلگە ئاشمايدۇ. پۈتۈن دىئالوگ جەريانىدا مەن مەھسۇلات، سۈپەت،مۇلازىمەت دېگەندەك مەزمۇنلارنى ئىنتايىن ئاز ئاڭلىدىم، مېنىڭچە مۇشۇلار بولغاندىن كېيىن  پىلانلاش ئېلىپ بارغاندا ئاندىن ئاسان مۇۋەپپىقىيەت قازانغىلى بولىدۇ، بۇلارسىز بارلىق پىلانلار پەقەت قۇرۇق خىيال خالاس.   مەھسۇلاتنىڭ سۈپىتىگە قەتئىي كاپالەتلىك قىلىش كېرەك، بۇ سودا ساھەسىنىڭ جېنى، شۇنداقلا سودا ساھەسىنىڭ سودا ئەخلاقى. ئىگىلىك تىكلىگۈچى چوقۇم بۇ نۇقتىنى ئېنىق تونۇپ يېتىشى،  مەھسۇلات ئىشلەپچىقىرىشتا سۈپەتنى مۇھىمنىڭ مۇھىمى قىلىش كېرەك.مۇشۇنداق قىلغاندىلامەھسۇلاتىڭىز ئىستىمالچىنىڭ ئىشەنچىسىگە ئېرىشىپ، پۇل تاپالايسىز. مەن ئۇلۇغ پىلانلارنى تۈزگەن كىشلەرگە بەك ئىشىنىپ كەتمەيمەن، مىڭنيۇ(蒙牛)،كىچىك قوزىچاق دېگەنلەر مېنىڭچە پىلان ئارقىلىق بارلىققا كەلمىگەن، بەلكى ھەقىقىي مەھسۇلات ۋە مۇلازىمەتكە تايىنىپ بارلىققا كەلگەن كۆپچىلىكنىڭ ھەممىسى شېيىجۇنىڭ پىلان تۈزۈشتە ماھىر ئىكەنلىكىنى بىلىدۇ، بىراق مېنىڭچە ئۇنى مەھسۇلات سېتىشنىڭ پىرى دىسسەك بولىدۇ.   شۈبھىسىز «مېڭنىيۇ» نىڭ بۈگۈنكى تەرەققىياتى، مەھسۇلاتلىرى، شىركەت قۇرۇلمىسى باشقىلارنىڭ كۆزىنى قىزارتىدۇ. «مېڭنىيۇ» نىڭ  جوڭگۇ كارخانىلىرى ئىچىدىن دەس تۇرۇپ «يۈزكۈچلۈك كارخانا»، « جوڭگۇ سۈت مەھسۇلاتلىرى ساھەسىدىكى بىرىنچى كارخانا»،‹‹جوڭگودىكى ئەڭ چوڭ كۆلەمگە ئىگە خەلقئارالىق ئۈلگىلىك سۈتچىلىك مەيدانى» دېگەن ناملارغا ئېرىشىشى؛ تۇنجى قېتىم سۈت سېغىش ماشىنىسى كىرگۈزۈپ ،جوڭگۇدىكى سۈت سېغىش مىقدارى ئەڭ كۆپ بولغان ‹‹باشلامچى كارخانا»،«ئىستىمالچىلارنىڭ ياخشى باھاسىغا ئېرىشكەن مەھسۇلات» دېگەندەك ناملارغا ئېرىشىشىنىڭ ھەممىسى بۇلارنىڭ ھەقىقى دەلىلى بولالىغۇسى. ******************************************************************************   مايۈنگە قارايدىغان بولساق، تىجارىتى مەۋھۇم  ئېلىكتىرون سودىسى بولسىمۇ بىراق مايۈن يەنىلا سۈپەتنى ئەڭ ئالىي ئورۇنغا قويغان. مايۈن:«ئۇششاق ھالقىلارنى ياخشى بىر تەرەپ قىلىش بىلەن سۈپەتنى چىڭ تۇتۇش كارخانىنىڭ جېنى» دەيدۇ. بۇنىڭغا قارىتا كىشىلەر جۈملىدىن كارخانىچىلار« مايۈن شۇنداق دېدى ھەم شۇنداق ئىجرا قىلدى.» دېيىشتى.   2004-يىلى ئالقاندىكى زېرەك (掌上灵通) ،ئاسمان تورى(空中网)،ياردەمچى(携程) قاتارلىق بازار ماسلاشتۇرۇش شىركەتلىرى مۇۋەپپەقىيەتلىك ھالدا ناسىداكتا ipoنى ئەمەلگە ئاشۇردى. مالىيە-ئىقتىساد تورى ۋە 51jobخىزمەت ئىزدەش تورى ئالدى-كەينى  بولۇپ ناسىداك بىلەن سودا مۇناسىۋىتى ئورناتتى.60مىليون مەبلەغگە ئېرىشكەن E龙تورى ناسىداكتا بازار ئېچىپ مەبلەغ يۈرۈشتىرىشى 62مىليون 100مىڭ ئامرىكا دوللىرىغايەتتى. بىراق b2b يولباشچىسى بولغان ئالى با با تېخى ھېچقانداق مەھسۇلاتىنى بازارغا سالمىغان ئىدى.   سەۋەبى ئىنتايىن ئاددىي، چۈنكى مايۈن :« بۇ يىل بىز ئەمدى 800مىليون خۇسۇسى مەبلەغگە ئىگە بولدۇق، نۆۋەتتە شىركىتىمىز باشقا ساھەگە قول تىقمايمىز، مەھسۇلاتنى بازارغا سالغاندىن كېيىن ھەر پەسىلدىكى رويخەتكە ئېلىنغان تىزىملىككە تاقابىل تۇرۇشى كېرەك، بۇ  ھال بەلكىم بىزنى ئۇزاق مەزگىللىك پىلاندىن مەھرۇم قالدۇرىشى مۇمكىن. نۆۋەتتە ئالى باباغا نىسبەتەن ئېيىتقاندا شىركەتنى زورايتىش مەھسۇلاتنى بازارغا سېلىشقا قارىغاندا تېخىمۇ تەخىرسىز. بىزدە پۇل كەمچىل ئەمەس، پايچىكلارمۇ پۇلغا ئالدىرىمايدۇ. بىزدە سەۋىرچانلىق بولۇشى لازىم»دەپ قارايدۇ.   مايۈن دائىم ئۆزىنىڭ خىزمەتچىلىرى ۋە ئاخبارات ساھەسىدىكىلەرگە «ئالى بابا تېخى مەن كۆزلىگەن مەقسەتكە يەتمىدى» دەيدۇ. مايۈن ئوتۇپىيەگە ئوخشاش ئالى بابانىڭ كەلگۈسىگە بولغان ئارزۇسىنى ئاددى قىلىپ مۇنداق تەسۋېرلىدى: بىزنىڭ ئارزۇيىمىز-ئالى بابانى سەھنە قىلغان ئاساستا، ئوتتۇرا-كىچىك كارخانىلارنىڭ سېتىش مەركىزى، كادىرلار مەركىزى، تېخنىكا مەركىزى، ھەق تاپشۇرۇش، مالىيە مەركەزلىرىنى ئاستا-ئاستا بىر نۇقتىغا ئەكىلىپ، توغرا قەدەم بىلەن B2B،B2C،C2C ئوتتۇرىسىدىكى ھالقىلارنى راۋانلاشتۇرۇپ، ئالى بابانى ئۆزىنىڭ پۇل چېكىگە، خاس قائىدىسىگە، ئىجرا قۇرۇلمىسىغا ئىگە بولغان ئىلىكتىرون پادىشاھلىقىغا ئايلاندۇرۇشتىن ئىبارەت.   ھازىرقى كارخانىلار ئۇچۇرلىشىۋاتقان بازاردا «كۆپتۈرۈپ داڭلاش» دەيدىغان بىر ھادىسە مەۋجۇت. شۇنداق بولىشىغا قارىماي رىقابەت كۈچلۈك بازاردا دەل ئاشۇنداق شىركەتلەر ئالدى بىلەن «قوغلاندى» قىلىنىدىغان تىزىملىككەكىرىپ قالىدۇ. بۇ دەل يەنە بىر نۇقتىدىن مەھسۇلاتنىڭ سۈپىتىگە ئەھمىيەت بېرىشنىڭ مۇھىملىقىنى ئەكىس ئەتتۈرۈپ بەرگەن. شۇڭا بىر قىسىم تەلەي سىناپ غەلبە قازانغان ئىگىلىك تىكلىگۈچىلەرنى ئاگاھلاندۇرىمىزكى، «كۆپتۈرۈپ ماختاش» تىن  ئەستايىدىللىق بىلەن مەھسۇلات ئىشلەپچىقىرىش كۆپ ياخشى، مەھسۇلاتنىڭ سۈپىتىنى ۋە ئىقتىدارىنى ئاشۇرغاندىلا بازاردا پۇت تېرەپ تۇرغىلى ۋە تەرەققى قىلغىلى بولىدۇ. مەنبە:چېڭدۇ دەۋر نەشىرياتى 2014-يىلى 7-ئايلىق تۇنجى نەشىرى <<مايۈننىڭ ئىگىلىك تىكلەش دەرىسخانىسى>> ناملىق كىتاب تەرجىمە قىلغۇچى:ئەقىدە قاشگەرلىكى-ئويغۇر قاشتېشى تورى تور بەت ئادرېسى:WWW.UYHQT.COM تەرجىمان:ئابدۇللا ئۆمەر تەرجىمە تەھرىرى:ئەقىدە قاشگەرلىكىدىن رەيھانگۈل نىزام