گۆش سالغان ئۇماچ
ماتېرىيالى: گۆش، چامغۇر، قوناق ئۇنى، تۇز مۇۋاپىق مىقداردا.
تەييارلاش ئۇسۇلى: گۆشنى ئۇششاق يالپاقلاپ توغراپ قازانغا سېلىپ سۇ قويۇپ قايناتقاندىن كېيىن تۇزىنى تەڭشەپ چامغۇرنى سېلىۋېتىمىز. ئاندىن قازاننى قوشۇقتا قوچۇپ تۇرۇپ قوناق ئۇنىنى ئاز-ئازدىن سالىمىز. ئاخىرىدا ئاش كۆكى سېلىپ قاچىغا ئالىمىز. تەبىئىتى ھۆل ئىسسىق.
شىپالىق رولى: يۈرەك ئاجىزلىقىغا مەنپەئەت قىلىدۇ.

سۈت زېڭى
ماتېرىيالى: قوناق ئۇنى، يېڭى، ساپ سۈت مۇۋاپىق مىقداردا
تەييارلاش ئۇسۇلى: قازانغا سۇ قۇيۇپ، تۇزىنى تەڭشەپ قازان قاينىغاندىن كېيىن بىر چىنە سۈيىنى ئېلىۋېتىپ، قازاندىكى سۇنى نوغۇچ بىلەن قوچۇپ تۇرۇپ قويۇق ھالەتكە كەلگۈچە قوناق ئۇنىنى سالىمىز. ئاندىن ئاش تەكشى قوچۇلۇپ ئالدىن ئېلىۋېلىنغان سۇ يېگۈزۈلىدۇ ھەمدە سۇ سىڭىپ بولغىچە سۇس ئوتتا دۈملەپ پىشۇرۇلىدۇ. ئاخىرىدا يېڭى، ساپ كالا سۈتىنى پىشۇرۇپ كۆپۈكى چىققۇچە قاينىتىپ، تۇز تەمى تەڭشىلىپ قاچىلارغا ئۇسۇلغان زاڭنىڭ ئۈستىگە قويۇلىدۇ. تەبىئىتى ھۆل ئىسسىق.
شىپالىق رولى: سوغۇقتىن بولغان يۈرەك ئاجىزلىقىغا مەنپەئەت قىلىدۇ.

سىركىلىك مېۋە سۈيى قىيامى
ماتېرىيالى: ئۈزۈم سۈيى، ئالما سۈيى، بېھى سۈيى، ئۆرۈك غورىسى سۈيى، ئەينۇلا سۈيى، ئانار سۈيىنىڭ ھەر قايسىسىدىن 100 مىللىلېتىر، سىركە 250 مىللىلېتىر، شېكەر 600 گرام ئەتراپىدا.
تەييارلاش ئۇسۇلى: يۇقىرىقى مېۋە سۇلىرىنى ئۆز-ئارا بىرلەشتۈرۈپ، ئۈستىگە سىركە قوشۇپ، شېكەر سېلىپ قاينىتىپ قىيام تەييارلايمىز. تەبىئىتى ھۆل سوغۇق.
شىپالىق رولى: قان ۋە سەپرادىن بولغان يۈرەك ئاجىزلىقىغا مەنپەئەت قىلىدۇ.