ئىستىراتىگىيىلىك ماددىي ئەشيالارنى قوغدايدىغان قىسىملارنىڭ ئادەم سانى كۆپ بولسىمۇ، ئەمما تۇيۇقسىز ھۇجۇم ئالدىدا تەمتىرەپ نېمە قىلىشنى بىلمەي قېلىشتى. بىر قىسىم ئامېرىكا ئەسكەرلىرى «خاممېر» ماشىنىنىڭ ئۈستىگە ئورۇنلاشتۇرۇلغان پىلىموت ۋە تانكىغا قارشى مىناميوتلارنى ئېتىپ، جۇڭگو، روسىيە ئەسكەرلىرى بىلەن بىرلىكتە جېنىنىڭ بېرىچە تىركەشمەكتە ئىدى، بىراق تېخىمۇ كۆپ ئامېرىكا ئەسكەرلىرى ئاللىقاچان قوللىرىدىكى قوراللىرىنى تاشلاپ قېچىشقا باشلىدى! بىراق پۈتكۈل قىسىم غەلىتە مەخلۇقلارنىڭ ھۇجۇمىدا چېچىلىپ كەتكەچكە، ئۈنۈملۈك قايتۇرما زەربە بېرەلمىدى. غەلىتە مەخلۇقلارمۇ يېرىقتىن ئۈزۈلدۈرمەي چىقىشقا باشلىدى، ھەممە يەرنى ئېچىنىشلىق چىقىرىغان ئاۋازلار قاپلىدى! «گۇمباڭ!» قىلغان غايەت كۈچلۈك پارتلاش ئاۋازى ئاڭلاندى. ئەسلىدە بىر قىسىم ئوق-دورىلار غەلىتە مەخلۇقلار پۈركىگەن كىسلاتالىق سۇيۇقلۇق تەسىرىدە پارتلىغان ئىدى. پۈتكۈل تەمىنات بازىسى بىردىنلا ئوت يالقۇنى ئىچىدە قالدى. ئوت يۇرۇقىدا غەلىتە مەخلۇقلار خۇددى دوزاختىن چىققان ئالۋاستىلاردەك كۆرۈنۈپ كەتتى، نۇرغۇنلىغان ئەسكەرلەرنىڭ كاللىسى توختاپ قالدى. گەرچە ئۇلارنىڭ ھەممىسى جەڭگە چىقسا ھەر ۋاقىت ئۆلۈمگە دۇچ كېلىدىغىنىنى بىلسىمۇ، ئەمما ئۇلارنىڭ كۆز ئالدىدىكى رەقىبى ئۆزىگە ئوخشاش ئىنسانلار بولۇپ، ئىلگىرىكى ئوققا قارشى كېلىدىغان ئۆلۈمدىن قىلچىمۇ قورقمايدىغان غەلىتە مەخلۇقلارغا ئوخشىمايتتى. كۈچلۈك كىسلاتا بەدەنگە چېچىلىش بىلەنلا دەرھال بەدەننى چىرىتىپ يوغان تۆشۈك ئېچىپ قوياتتى، ئەمما بۇ ۋاقىتتا ئادەم تېخى ئۆلمەيتتى، ئورغاققا ئوخشايدىغان بېلەك بىر پۇلاڭشىش بىلەنلا، ئادەم پارچە-پارچە بولۇپ كېتەتتى. يەر يۈزى پۈتۈنلەي غەلىتە مەخلۇق ۋە ئادەملەرنىڭ جەسىتى بىلەن توشقان بولۇپ، ئۇلار قىزىل، يېشىل ئارىلاشقان قان سۇيۇقلۇقىغا چىلىشىپ ياتاتتى!

ئافرىقىدىكى ھەرىكەت باشلىنىپ تۆت كۈندىن كېيىن، ئافرىقىدىكى چوڭ يايلاقتا سانسىزلىغان تىك ئۇچارلار كېچە-كۈندۈز توختىماي چارلاشقا باشلىدى، گەرچە مۇشۇنداق بولسىمۇ، بىراق جىمجىت يايلاقتا يۈگرەپ يۈرگەن كالا توپى ۋە ئويۇنچى پىللارنىلا كۆرگىلى بولاتتى. ھەممە يەر ئىناق، جىمجىت كۆرۈنەتتى، ھېچقانداق گۇمانلىق ئەھۋال بايقالمىدى! ئافرىقا چوڭ يايلىقىنىڭ چېتىدىكى رايوندا بىر ۋاقىتلىق ھەربىي بازا قۇرۇلدى، بىر ھەربىي چېدىردا جۇڭگو قىسىملىرىنىڭ ئافرىقىدا تۇرۇشلۇق قوماندانى ليۇ جىبو زېرىككەن ھالدا:
ــ ئۆلگۈر! بىز بۇ يەرگە كەلگىلى تۆت كۈن بولدى، ئاۋۇ غەلىتە مەخلۇقلارنىڭ سايىسىمۇ كۆرۈنمەيدىغۇ؟ــ دېدى. روسىيە قىسىملىرىنىڭ قوماندانى مالىشىكوف:
ــ سىز بۇ يەردە ئاچچىقلانسىڭىزمۇ بىكار، بىز ھازىر ئوۋچى، ئوۋچى دېگەن سەۋرچان بولۇشى كېرەك، بەك ئالدىراقسان بولسا بولمايدۇ،ــ دېدى. ليۇ جىبو بىر ئوتلام سۇ ئىچىپ:
ــ مەنمۇ بىلىمەن، ئەمما بۇ قېتىمقى ھەربىي ھەرىكەت بەك مۇھىم! ئەگەر ئاشۇ غەلىتە مەخلۇقلار مۆكۈنۈۋېلىپ چىقماي، ۋاقىتنى كەينىگە سوزسا، بىز قانداق قىلىمىز؟ــ دېدى. مالىشىكوف ئېڭىكىنى سىلىغىنىچە ئويلىنىپ تۇرۇپ:
ــ ھىم! دۇرۇس، بۇمۇ بىر چوڭ مەسىلىكەن…… مېنىڭچە، بىر نوچى ئوۋچى ئوۋنى ئىزدىمەستىن، ئوۋنى قىزىقتۇرۇپ چىقىرىدۇ،ــ دېدى. ليۇ جىبو سورىدى:
ــ ئۇلارنى چىقىرىمىز؟ سىزنىڭچە ئۇلار نېمىگە قىزىقىدىغاندۇ؟

جۇڭگو، ئامېرىكا، روسىيە ئۈچ دۆلەت مەڭگۈلۈك ھەربىي ئىشلار توختىمى ئىمزالاپ، پۈتكۈل دۇنيانى ھەيران قالدۇرغاندىن كېيىن، دېڭىز ئاستى تەجرىبىخانىسىغا ماڭغان قۇتقۇزۇش ئەترىتى دۇنيانى يەنە بىر قېتىم ھەيران قالدۇرىدىغان خەۋەر يوللىدى: دېڭىز ئاستى تەجرىبىخانىسىدىكى 10764 نەپەر ھەر قايسى دۆلەت خىزمەتچى خادىملىرىنىڭ ھەممىسى ئاپەتكە ئۇچراپ بىرىمۇ ھايات قالمىغان ئىدى، ئۇنىڭ ئۈستىگە بەكمۇ ئېچىنىشلىق ئۆلگەن بولۇپ، كىشى قاراشقىمۇ جۈرئەت قىلالمايتتى، تەجرىبىخانىدىكى بارلىق جانلىقلار ئەۋرىشكىلىرىنىڭ ھەممىسى ئوغرىلانغان بولۇپ، ئۈسكۈنىلەرنىڭ ھەممىسى بۇزۇۋېتىلگەن ئىدى! بۇ خەۋەر دۇنيادىكى بارلىق دۆلەتلەرنى ساراڭ قىلدى، كىممۇ مۇشۇنداق تەلۋىلەرچە قاتىللىق قىلىپ، بىرمۇ ئادەمنى تىرىك قويمىغاندۇ؟ ب د ت دىكى ھەر قايسى ئەللەر ۋەكىللىرى بەس-بەستە تالىشىپ، بۇنى پۈتكۈل جاھانغا بۆلگۈنچىلىك قىلغانلىق دەپ ۋاقىراپ كېتىشتى! ئەمما كىمنىڭ قىلغىنىنى بىلەلمىدى. جۇڭگو ۋەكىلى بۇ ئىشنى چوقۇم بارلىق كۈچى بىلەن تەكشۈرۈپ، دۇنيادىكى ھەر قايسى دۆلەتلەرگە ئېنىق چۈشەنچە بېرىدىغانلىقىنى ئېيتتى! ھەر قايسى دۆلەت ۋەكىللىرى شۇندىلا پەسكويغا چۈشتى، ھېچكىم جۇڭگودىن گۇمانلانمىدى، چۈنكى جۇڭگونىڭ خەلقئارادىكى ئىناۋىتى يۇقىرى ئىدى، ئۇنىڭ ئۈستىگە بۇ قېتىملىق چوڭ قىرغىنچىلىقتا ھەممىدىن بەك زىيان تارتقىنى جۇڭگو ئىدى.